Ko e hā e founga ʻa e ʻEikí ke tokoni ki he masivá mo e faingataʻaʻiá?

ʻI he taimi naʻe hāʻele mai ai ʻa Sīsū Kalaisi ki he māmaní, naʻá Ne fakaʻaongaʻi ha konga lahi ʻo ʻEne ngāué ki hono tokoniʻi e masivá mo e faingataʻaʻiá. Kuo ʻomi ʻe he ʻEikí ʻo fakafou mai ʻi Hono Siasí ha founga kiate kitautolu ki hono tokangaʻi ʻo kinautolu ʻoku faingataʻaʻiá. Kuó Ne kole mai ke tau foaki lahi ʻo fakatatau ki he meʻa kuo tau maʻu meiate Iá. “ʻOku kehe ʻa e founga ia ʻa e ʻEikí ki hono tokangaʻi ʻo e faingataʻaʻiá mei he founga ʻa e māmaní. Kuo folofola e ʻEikí ʻo pehē, ʻKuo pau ke fai ia [tokangaʻi ʻo e masivá] ʻi heʻeku founga pē ʻaʻaku.’ ʻOku ʻikai ngata pē ʻi Heʻene tokanga ki heʻetau fie maʻu fakavavevave tahá; ka ʻokú Ne tokanga ki heʻetau fakalakalaka taʻengatá. Ko hono ʻuhinga ʻeni kuo kau maʻu ai pē ʻi he founga ʻa e ʻEikí ʻa e moʻui fakafalala pē kiate kitá mo e tokoni ki hotau kaungāʻapí ʻo tānaki atu ki hono tokangaʻi ʻo e masivá” (Dieter F. Uchtdorf, “Tokoniʻi ʻi he Founga ʻa e ʻEikí,” Ensign pe Liahona, Nōvema 2011, 54).

Teuteuʻi fakalaumālie koe

Kuó ke fekumi fēfē ke muimui he sīpinga ʻa e Fakamoʻuí ʻi hono tokoniʻi e niʻihi kehé? Ko e hā ha ngaahi meʻa kuó ke aʻusia te ke lava ʻo vahevahe mo e kau finemuí?

Ko e hā ha ngaahi tefitoʻi moʻoni ʻo e tokoni ʻi he founga ʻa e ʻEikí ʻoku fie maʻu ke mahino ki he kau finemuí? ʻE tokoni fēfē ʻa e mahino ʻo e ngaahi tefitoʻi moʻoni ko ʻení kiate kinautolu ke nau hoko ai ko e kau ākonga lelei ange ʻo Kalaisi?

Ko e hā e ngaahi potufolofola mo ha ngaahi maʻuʻanga tokoni kehe ʻe tokoni ke mahino ki he kau finemuí, ʻa e founga ʻoku tokoniʻi ai ʻe he ʻEikí ʻa e masivá mo e faingataʻaʻiá?

ʻIsaia 58:6–11; Malakai 3:8–10; Mātiu 25:35–40; T&F 82:18–19 (Ngaahi founga ke tokoniʻi ʻa e masivá)

Sēmisi 1:27; Mōsaia 18:27–28; T&F 42:29–30 (Ko hono mahuʻinga ʻo e tokoni ki he masivá mo e faingataʻaʻiá)

ʻAlamā 34:27–28;Molomona 8:35–37: T&F 56:16–18; 70:14 (Ko e fakatokanga ʻa e ʻEikí kiate kinautolu ʻoku ʻikai tokoni ki he masivá)

T&F 104:15–18 (Tokoniʻi ʻa e masivá ʻi he founga ʻa e ʻEikí)

Patrick Kearon, “Hūfangaʻanga mei he Afaá,” Ensign pe Liahona, Mē 2016, 111–14

Linda K. Burton, “Ko e Muli Au,” Ensign pe Liahona, Mē 2016, 13–15

Jeffrey R. Holland, “ʻIkai ko e Kau Kolekole Kotoa Pē Kitautolu?”Ensign pe Liahona, Nōvema 2014, 40–42

“Ngaahi Ngāue ʻa e Kāingalotú ke Tokangaʻi e Masivá mo e Faingataʻaʻiá mo Fai ha Tokoni,” Tohi Tuʻutuʻuni Fika 2: Ko Hono Puleʻi ʻo e Siasí (2010), 6.1.2

Videos: “I Was a Stranger: Love One Another,” “When We Were Strangers,”

3:25

3:3

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Huluʻi ha taha ʻo e ngaahi vitiō tokoni ʻofa fakaetangata ʻa e Siasí, pea ʻeke ki he kau finemuí e meʻa ʻoku nau ako kau ki hono tokoniʻi ʻo e masivá mo e faingataʻaʻiá mei he sīpinga ʻa e Siasí. Fakaafeʻi ke nau vahevahe e ngaahi aʻusia ne nau maʻu ʻi hono tokoniʻi e niʻihi kehé.
Kole ki he kau finemuí ke nau hiki ha niʻihi ʻo e ngaahi fie maʻu fakatuʻasino mo fakalaumālie ʻoku ngalingali ʻe maʻu ʻe ha taha. Hiki ʻi he palakipoé, “Ko e hā e founga ʻa e ʻEikí ki hono tokangaʻi ʻo e masivá mo e faingataʻaʻiá?” Vahevahe mo e kau finemuí e lea ʻa Palesiteni Tieta F. ʻUkitofa ʻi he kamataʻanga ʻo e fokotuʻutuʻu ko ʻení, pea kole ki he kau finemuí ke nau fanongo ki he ngaahi tali ki he fehuʻí. Fakaafeʻi ke nau vahevahe e meʻa ʻoku nau ʻiló. Ko e hā ha founga te tau lava ʻo tokoniʻi ai e masivá mo e faingataʻaʻiá ke nau moʻui fakafalala lahi ange kiate kinautolú?

Ako fakataha

‘E lava ke tokoni e ngaahi ‘ekitivitī takitaha ‘i laló ke ako e kau finemuí ʻo kau ki he founga ʻa e ʻEikí ki hono tokoniʻi e masivá mo e faingataʻaʻiá. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

ʻI he lea ʻa ʻEletā Patrick Kearon ko e “Hūfangaʻanga mei he Afaá,” naʻá ne pehē ai, “ʻOku fakafuofua ʻoku ʻi ai ha kau kumi hūfanga ʻe toko 60 miliona ʻi he māmaní nai he ʻahó ni. … ʻOku fakaloloma ke fakkaaukau ki he tokolahi ʻoku kau ki aí pea mo hono ʻuhinga ki he moʻui fakafoʻituitui ʻa e taha kotoa.” Ke tokoni ke ʻiloʻi ʻe he kau finemuí ni e palopalema ʻo e kumi hūfangá mo e founga te nau ala tokoni aí, huluʻi ange ha foʻi vitiō ʻe taha pe lahi ange ʻi he lēsoni ko ʻení. Ko e hā e ongo ʻoku nau maʻu ki he ngaahi faingataʻa ʻoku fehangahangai mo e kau kumi hūfangá? Te ke lava ʻo fakaafeʻi e kalasí ke nau vakaiʻi ʻi he fanga kiʻi kulupu iiki ʻa e lea ʻa ʻEletā Kearon pe Sisitā Linda K. Burton “Ko e Muli Au,” ʻo kumi hake ʻa e ngaahi meʻa ʻe lava ke nau tokoni ai ki he kau kumi-hūfangaá. Tokoni ke faʻu ʻe he kau finemuí ni ha palani ke nau ngāueʻi ai e ngaahi fokotuʻú ni.
Vahevahe e kau finemuí ke tautau toko ua. Vahe ki ha mēmipa ʻo e hoa takitaha ke lau e ʻū potufolofola kau ki he mahuʻinga ʻo hono tokangaʻi ʻo e masivá mo e faingataʻaʻiá, pea vahe ki he mēmipa ʻe tahá ke lau e ʻū potufolofola ʻoku fakatokanga kiate kinautolu ʻoku ʻikai tokanga ki he masivá mo e faingataʻaʻiá (ki ha ngaahi fakakaukau, vakai ki he ʻū potufolofola ʻoku fokotuʻu atu ʻi he fokotuʻutuʻu ko ʻení). Fakaafeʻi ʻa e kau finemuí ke ako ʻenau ʻū potufolofolá pea vahevahe e meʻa ne nau akó mo honau hoá. Fehuʻi ange pe ko e hā ʻoku fuʻu mahuʻinga ai ʻa hono tokangaʻi ʻo e masivá mo e faingataʻaʻiá ki he Tamai Hēvaní. Fakaafeʻi ʻa e kau finemuí ke aleaʻi e ngaahi founga te nau lava ai ʻo tokoniʻi kinautolu ʻoku faingataʻaʻia ʻi honau fāmilí, uōtí, mo e koló.
ʻOange ki he kau mēmipa ʻo e kalasí ha tatau ʻo e lea ʻa ʻĒletā Jeffrey R. Holland “ʻIkai ko e Kau Kolekole Kotoa pē Kitautolu? Kole ki he finemui takitaha ke fili ha taha ʻo e ʻū potufolofola ne lea ʻaki ʻe ʻEletā Hōlaní kau ki hono tokoniʻi e masivá mo e faingataʻaʻiá. Fakaafeʻi e finemui takitaha ke vahevahe e potufolofola kuó ne filí mo hono ʻuhinga kiate iá. Vakaiʻi he kalasí e faleʻi ʻa ʻEletā Hōlaní: “ʻOku ʻikai ke u ʻiloʻi pau pe ʻe anga fēfē haʻamou takitaha fakahoko homou fatongia kiate kinautolu ʻoku ʻikai pe ʻikai ke nau lava ʻo tokoniʻi kinautolú. Ka ʻoku ou ʻiloʻi ʻoku ʻafioʻi ia ʻe he ʻOtuá, pea te Ne tokoniʻi mo tataki koe ʻi he ngāue ʻofa ʻo e tuʻunga faka-ākongá.“ Tuku ha taimi ki he kau mēmipa ʻo e kalasí ke fakakaukau ki he founga ʻoku nau ongoʻi ai ʻoku finangalo e ʻOtuá ke nau tokanga ki he masivá mo e faingataʻaʻiá. Fakaafeʻi kinautolu ke vahevahe ʻenau ngaahi ongó mo e kalasí.
Fakaafeʻi ha mēmipa ʻo e kau pīsopelikí ke vahevahe mo e kau finemuí ʻene ongo kau ki hono tokangaʻi ʻo e masivá mo e faingataʻaʻiá mo e ngaahi faingamālie ʻoku maʻu ʻe he kau finemuí ke tokoniʻi e kau mēmipa faingataʻaʻia ʻo e uōtí pe koló. Te ne lava foki ʻo talanoa ki he founga hono ngāue ʻaki e paʻanga toputapu ʻa e Siasí, kau ai e foaki ʻaukaí, tokoni ʻofa fakaetangatá, mo e tokoni ki he Paʻanga Tokoni Fakaako Tuʻumaʻú (vakai, Tohi Tuʻutuʻuni Fika 1: Kau Palesiteni Fakasiteikí mo e Kau Pīsopé [2010], 14.4). Fakakaukau ke fakaʻaongaʻi e taimi kalasí ke palani ha ngāue ʻofa pau fakatefito ʻi he fealeaʻaki ko ʻení.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino nai kiate kinautolu ʻa e ʻuhinga ke tokoniʻi ʻa e faingataʻaʻiá ʻi he founga ʻa e ʻEikí? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Fakakakato ha taha ʻo e ngaahi meʻa ko ení ʻi he Fakalakalaka Fakatāutahá:ngāue fika 3 ki he tuʻunga ʻulungaanga mahuʻinga Ko Hoto Mahuʻinga Fakatāutahá pe meʻa ʻoku fie maʻu ke aʻusia fika 6 ʻi he tuʻunga ʻulungaanga mahuʻinga ko e Ngaahi Ngāue Leleí.
Fakahoko ha ngāue lelei ki ha taha ʻoku fie maʻu tokoni.
Muimui ʻi he akonaki ʻa Palesiteni Tōmasi S. Monisoní ke “lotua ha ueʻi fakalaumālie ke tau ʻiloʻi e ngaahi fie maʻu ʻa e kakai ʻoku tau feohí pea … laka atu ʻo fakahoko e tokoní” (“Ke ʻIate Kimoutolu ʻa e ʻOtuá Kae ʻOua Ke Tau Toe Fakataha Mai,” Ensign pe Liahona, Nōvema. 2012, 111).

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.