Ko e hā ʻoku finangalo ai e ʻEikí ke u moʻui leleí?

Ko ha konga mahuʻinga ʻo e moʻui fakafalala pē kiate kitá ʻa e moʻui leleí. ʻE fakaʻatā kitautolu ʻi hono tauhi ʻetau moʻui leleí ke tau aʻusia hotau tuʻunga fakalangí mo tokoniʻi lelei ange ai e niʻihi kehé. ʻOku uesia ʻetau moʻui lelei fakalaumālié mo ʻetau malava ke maʻu e tataki ʻa e Laumālie Māʻoniʻoní ʻe he anga ʻetau tauhi hotau sinó. ʻOku totonu ke tau tauhi e Lea ʻo e Potó, kai e meʻakai fakatupu ivi, fakamālohisino maʻu pē, mo maʻu ha mohe feʻunga, kae lava ke tauhi ʻetau moʻui leleí.

Teuteuʻi fakalaumālie koe

Ko e hā ha founga kuo lelei ange ai hoʻo ngāue ki he ʻEikí ʻi hono tauhi hoʻo moʻui leleí? Ko e hā ha ngaahi tāpuaki kehe kuó ke maʻu ʻi hoʻo feinga ke moʻui leleí?

Ko e hā ha ngaahi ʻahiʻahi ʻoku fehangahangai mo e kau finemuí te ne lava ʻo uesia ʻenau moʻui leleí? Ko e hā ha ngaahi tāpuaki te nau maʻu ʻi heʻenau tauhi e fono ʻa e ʻEikí ki he moʻui leleí?

Ko e hā ha ngaahi potufolofola mo ha maʻuʻanga tokoni kehe ʻe tokoni ke mahino ki he kau finemuí e ʻuhinga ʻoku finangalo ai e ʻEikí ke tau moʻui leleí?

1 Kolinitō 6:19 (Ko hotau ngaahi sinó ko e temipale ʻo e ʻOtuá)

T&F 88:124 (Ngaahi fakahinohino ki hono tauhi hotau sinó mo e ʻatamaí ke moʻui leleí)

T&F 89 (Ko e Lea ʻo e Potó)

Thomas S. Monson, “Ngaahi Tefitoʻi Moʻoní mo e Ngaahi Talaʻofá,” Ensign pe Liahona, Nōvema 2016, 78-79

“Moʻui Lelei Fakaesino mo Fakaeloto,” Ki Hono Fakamālohia ʻo e Toʻu Tupú (2011), 25–27

Vitiō: “Ko ha Taʻu Foʻou 2010: Moʻui Lelei Fakaesino,”

7:29

Ko e faiako ʻi he founga ʻa e Fakamoʻuí

Naʻe fakaafeʻi ʻe he Fakamoʻuí ʻa kinautolu naʻá Ne akoʻí ke nau ngāue ʻi he tui mo moʻui ʻaki e ngaahi moʻoni naʻá Ne akoʻí. Ko e hā ha founga te ke lava ʻo fakaafeʻi ai e kau finemui ʻokú ke akoʻí ke nau ngāue ʻi he tuí pea tauhi honau ʻatamaí mo e sinó ke moʻui leleí? Ko e hā ha founga te ke ueʻi ai kinautolu ke nau fekumi ki he ngaahi lelei ʻo e moʻui fakalaumālié mo fakaesinó ʻo hangē ko e fekau ʻa e ʻEikí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Fakaʻaliʻali fakataha ha fakatātā ʻo ha finemui mo ha fakatātā ʻo ha temipale. ʻEke ki he kau finemuí pe ko e hā e founga ʻoku tatau ai honau sinó mo e temipalé (vakai, 1 Kolinitō 6:19). Fakaafeʻi e finemui takitaha ke ne aleaʻi mo ha taha kehe ʻi he kalasí e ʻuhinga ʻoku mahuʻinga ai ke tauhi hotau sinó mo e ʻatamaí ke maʻa mo moʻui leleí.
Tohi ʻi he palakipoé “Ko e hā ʻoku finangalo ai e ʻEikí ke tau moʻui leleí?” Fakaafeʻi e kau finemuí ke nau vahevahe ha ngaahi tali pea kumi ha tali lahi ange he lolotonga ʻa e lēsoní.

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e ʻuhinga ʻoku finangalo ai e ʻEikí ke nau moʻui leleí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Fakaafeʻi e kau finemuí ke nau hiki ha ngaahi meʻa ʻoku nau fai ke tauhi ai honau ʻatamaí mo e sinó ke moʻui leleí. Vahevahe fakakulupu e kalasí, pea vahe ki he kulupu takitaha ke ne kumi ha taha ʻo e ngaahi potufolofola ko ʻení, ʻo kumi ha faleʻi te ne tokoniʻi kinautolu ke tauhi honau ʻatamaí mo e sinó ke moʻui leleí: T&F 88:124; T&F 89:5–9; mo e T&F 89:10–16 (kapau te nau fie maʻu ha tokoni ke mahino ai e faleʻi ʻi he T&F 89, vakai, Tuʻu Maʻu ʻi he Tuí,peesi 103–05). Tuku ki he kulupu takitaha ke nau lipooti e meʻa ʻoku nau ʻiló. Kole ki he kau finemuí ke vakaiʻi ʻenau lisí mo fakapapauʻi pe ʻoku toe ʻi ai ha ngaahi meʻa ʻe lava ke tauhi ai ʻenau moʻui leleí. Fakaafeʻi e kau finemui ʻoku nau ongoʻi fiemālie ke fai iá ke nau vahevahe ha faʻahinga liliu ʻoku nau palani ke fai te ne tāpuekina kinautolu he taimí ni mo e kahaʻú.
Kapau ʻe fie maʻu, toe vakaiʻi nounou e Lea ʻo e Potó ke fakapapauʻi ʻoku mahino ki he kau finemuí e faleʻi ʻa e ʻEikí ʻo kau ki he moʻui lelei fakaesinó. Hiki he palakipoé, “Ko e hā naʻe ʻomai ai ʻe he ʻEikí kiate kitautolu e Lea ʻo e Potó?” Kole ki he kau finemuí ke nau fokotuʻu mai ha ngaahi tali. Fakaafeʻi e kau finemuí ke nau lau e T&F 89:18–21 ke ʻilo e ngaahi talaʻofa ʻoku fai ʻe he ʻEikí maʻanautolu ʻoku talangofua ki he Lea ʻo e Potó. Ko e hā ha founga ʻoku fakahoko ai e ngaahi talaʻofa ko ʻení ʻi heʻetau moʻuí? (Kapau te nau fie maʻu ha tokoni ke mahino ai e ngaahi talaʻofa ko ʻení, fokotuʻu ange ke nau sio ki he fakamatala ʻa Poiti K. Peeka ʻi heʻene lea “The Word of Wisdom: The Principle and the Promises”). Fakaafeʻi ke nau vahevahe ʻenau fakamoʻoni ki he tokāteline ko ʻení pe ngaahi tāpuaki ne nau maʻu ʻi hono moʻui ʻaki e Lea ʻo e Potó.
Huluʻi e foʻi vitiō ko e “Moʻui Lelei Fakaesino,” pea fakaafeʻi e kau finemuí ke nau sio ki ha ngaahi ʻuhinga ʻoku totonu ke tau tauhi ai hotau sinó ke moʻui leleí—kau ai e ngaahi ʻuhinga fakatuʻasino mo fakalaumālie. Kole ange ke nau vahevahe e meʻa ʻoku nau maʻú. Fakakaukau ke vahevahe e fakamatala ko ʻeni meia Palesiteni Poiti K. Peeka ke hoko ia ko ha konga ʻo e fealēleaʻaki ko ʻení,: “ʻOku pau pē naʻe ʻomi e Lea ʻo e Potó koeʻuhí ke ke lava ʻo tauhi e konga pelepelengesi, ongoʻingofua, mo fakalaumālie ho ʻulungāngá ke mateuteu. Ako ke ʻfakafanongoʻ ki hoʻo ngaahi ongó. ʻE tataki, fakatokaga, akoʻi mo tāpuekina koe” (“The Word of Wisdom: The Principle and the Promises,” Ensign, May 1996). Ko e hā ha founga kuo fakahoko ai e talaʻofa ʻa Palesiteni Peeka ʻi he moʻui ʻa e kau finemuí?

7:29
Fakaafeʻi e kau finemuí ke nau lau e “Moʻui Lelei Fakaesino mo Fakaeloto” ʻi he Ki Hono Fakamālohia ʻo e Toʻu Tupú. Kole ki ha niʻihi ʻo e kau finemuí ke nau hiki ʻi he palakipoé ha konga lahi ʻo e ngaahi faleʻi ʻoku nau ʻiló, pea kole ki he niʻihi kehé ke nau hiki e ngaahi tāpuaki naʻe talaʻofa kiate kinautolu ʻoku muimui he faleʻi ko ʻení. Kole ke nau aleaʻi e founga ʻoku uesia ai honau laumālié ʻe he anga ʻenau tauhi honau sinó. Ko e hā ha founga te nau ngāue ʻaki ai e lisi ʻi he palakipoé ke fakamatalaʻi ʻaki ʻenau tuʻunga moʻuí ki honau kaungāmeʻa mei ha tui fakalotu kehe?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau?ʻOku mahino nai kiate kinautolu e ʻuhinga ʻoku finangalo ai e ʻEikí ke nau moʻui leleí? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Siofi ‘a e meʻakai ‘oku nau kaí ʻi ha uike ʻe taha pea fakafuofuaʻi pe ʻoku nau muimui ki he akonaki ʻa e ʻEikí fekauʻaki mo e moʻui lelei fakaesinó.
Fakakakato e ngāue fika 3 ki he tuʻunga ʻulungaanga mahuʻinga Ko e ʻIló ʻi he Fakalakalaka Fakatāutahá.
Palani ha ʻekitivitī Mutuale ʻoku kau ai e fakamālohisinó pea mo e ngaahi meʻakai moʻui leleí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.