Ko e hā ʻoku hoko ai e ngāué ko ha tefitoʻi moʻoni mahuʻinga ʻo e ongoongoleleí?

ʻOku fekauʻi mai ʻe he ʻEikí ke ʻoua naʻa tau nofonoa. ʻOku tokoni kiate kitautolu hono fakatupulaki ʻo e malava ke ngāué ke tau tokoni ai ki he māmani ʻoku tau nofo aí. ʻOkú ne fakatupulaki ai ʻa e ongoʻi mahuʻingaʻia ʻiate kitá. ʻOkú ne tāpuekina kitautolu mo hotau fāmilí ʻi he taimí ni pea mo e kahaʻú.

Teuteuʻi fakalaumālie koe

Ko e hā ha meʻa kuo fai ʻe he ngāué ʻi hoʻo moʻuí? Ko e hā ha founga kuó ne tāpuekina fakatuʻasino mo fakalaumālie ai koe mo ho fāmilí?

ʻOku fakakaukau nai e kau finemui ʻokú ke akoʻí ko e ngāué ko ha faingamālie pe ko ha meʻa ia ʻoku nau loto ke fakamamaʻo mei ai? Ko e hā ha founga te ke lava ʻo tokoniʻi ai ke nau fakatokangaʻi e ngaahi tāpuaki lahi ʻo e ngāué mo fakatupulaki ha holi ke ngāué?

Ko e hā ha ngaahi potufolofola mo ha lea te ne tokoniʻi e kau finemuí ke mahino kiate kinautolu e ʻuhinga ʻoku hoko ai e ngāué ko ha tefitoʻi moʻoni mahuʻinga ʻo e ongoongoleleí?

Sēnesi 3:19; Kalētia 6:3–5; 1 Tesalonika 4:11; Mosaia 10:4–5 (ʻOku fekauʻi ke tau ngāue)

Lea Fakatātā 31:27; ʻAlamā 38:12; T&F 58:27; 60:13; 75:29 (ʻOua ʻe nofonoa)

Mōsese 1:39 (Ko e ngāue mo e nāunau ʻo e ʻOtuá)

Dieter F. Uchtdorf, “Tefitoʻi Moʻoni ʻe Ua ki ha Faʻahinga ʻEkonōmika pē,” Ensign pe Liahona, Nōvema 2009, 55–58

“Ngāué mo e Moʻui Fakafalala pē Kiate Kitá,” Ki Hono Fakamālohia ʻo e Toʻu Tupú (2011), 40–41

Vitiō: “Tataki Faingofua”

3:41

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Fakaafeʻi e kau finemuí ke nau sio he foʻi vitiō “Tataki Faingofua” pea fekumi ki he ngaahi tāpuaki ʻoku maʻu mei he ngāue mālohí. Kole ki he kau finemuí ke nau aleaʻi e ngaahi tāpuaki ne nau maʻu koeʻuhí ko e ngāue mālohí.

3:41
Fakaafeʻi ha finemui ke ne vahevahe hano talēniti ki he kalasí pea fakamatalaʻi e meʻa naʻe pau ke ne fai ke fakatupulaki ai e talēniti ko iá. Ko e hā ha meʻa naʻá ne fakaʻaiʻai ia ke ngāueʻi mālohi hono talēnití? Fakaafeʻi ha niʻihi kehe ʻi he kalasí ke nau vahevahe ha ngaahi aʻusia ne nau ngāue ai ke lavaʻi ha meʻa. Ko e hā e ʻuhinga ʻoku finangalo ai e Tamai Hēvaní ke tau ako ke ngāué?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e mahuʻinga ʻo e ngāué. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

ʻOange ki he finemui takitaha ha potufolofola fakafekauʻaki kau ki he ngāué (hangē ko ia ʻoku hiki atu ʻi he fokotuʻutuʻu ko ʻení). Kole ange ke ne lau e folofolá pea fakakaukau ki ha sīpinga mei heʻene moʻuí pe moʻui ʻa ha taha kehe ʻoku hā mei ai e tefitoʻi moʻoni naʻe akoʻi ʻi heʻene potufolofolá. Fakaafeʻi e kau finemuí ke nau vahevahe ʻenau potufolofolá mo e ngaahi sīpinga ʻoku nau fakakaukau ki aí. Ko e hā ha founga ʻoku tāpuekina ai ʻe he ngāué ʻetau moʻuí?
ʻOange ki he finemui takitaha ha taha ʻo e ngaahi potufolofola mei he fokotuʻutuʻu ko ʻení, pea kole ke ne hiki fakanounou e potufolofolá ʻi ha laʻipepa. Kole ki he kau finemuí ke fakapipiki ʻenau fakamatala fakanounoú ʻi he palakipoé. Vahe ki he finemui takitaha ha potufolofola kehe, pea fakaafeʻi ia ke ne lau mo kumi e fakanounou ʻi he palakipoé ʻoku hoa mo e potufolofolá. Ko e hā ʻoku ako ʻe he kau finemuí mei he ngaahi potufolofolá ni kau ki he mahuʻinga ʻo e ngāué? Ko e hā ha founga kuo tāpuekina ai e kau finemuí koeʻuhí ko ʻenau ngāue mālohí?
Fakaʻaongaʻi e konga ko e “Ngāué mo e Moʻui Fakafalala pē Kiate Kitá” ʻi he Ki Hono Fakamālohia ʻo e Toʻu Tupú, ngaahi lea ʻoku fokotuʻu atu ʻi he fokotuʻutuʻu ko ʻení fili e ngaahi lea kau ki he ngāué ʻokú ke fakakaukau ʻe mahuʻingamālie ki he kau finemuí. ʻOange ki he finemui takitaha ha tatau ʻe taha ʻo e ngaahi fakamatalá. Fakaafeʻi ia ke ne lau fakalongolongo e fakamatalá pea ʻave ia ki he tokotaha ʻoku tangutu hoko mai ki aí. Tuku ke hokohoko atu e kau finemuí kae ʻoua kuo lau ʻe he tokotaha kotoa ʻene fakamatalá. Tuku kotoa e ʻū fakamatalá ʻi he palakipoé, pea fakaafeʻi e finemui takitaha ke ne fili ha taha ʻoku mahuʻingamālie makehe ki aí pea vahevahe e ʻuhinga ʻokú ne pehē ai ʻoku mahuʻingamālié. Ko e hā ʻoku nau ako mei he ngaahi fakamatala ko ʻení kau ki hono mahuʻinga ʻo e ngāué? Ko e hā ha founga ʻo e ako ki he anga ʻo e ngāué te ne tāpuekina ai kinautolu mo honau ngaahi fāmili ʻi he taimi ní mo e kahaʻú?
ʻOange ki he kau finemuí ha ngaahi tatau ʻo e ngaahi konga mahuʻinga mei he taha ʻo e ngaahi lea ʻoku fokotuʻu atu ʻi he fokotuʻutuʻu ko ʻení. Fakaafeʻi ke nau lau fakafoʻituitui e ngaahi kongá pea laineʻi e ngaahi foʻi lea mo e kupuʻi lea ʻokú ne fakamatalaʻi e ngaahi tāpuaki ʻoku maʻu mei he ngāué. Kole ke nau vahevahe mo ha taha kehe ʻi he kalasí e meʻa ne nau laineʻí. Ko e hā kuo ako ʻe he kau finemuí kau ki he ngāué mei honau fāmilí? Ko e hā ha ngāue te nau lava ʻo fai he taimí ni te ne tāpuekina honau ʻapí? ʻE tokoniʻi fēfē ʻe hono ako he taimí ni e ngāue ki haʻanau hoko ko ha ngaahi faʻē?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino lelei ange nai kiate kinautolu ʻa e mahuʻinga ʻo e ngāué? Ko e hā haʻanau ngaahi ongo pe fakakaukau?ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Tokoni lahi ange ʻi he ngaahi ngāue fakaʻapí, kumi ha ngāue fakataimi, pe ngāueʻofa ʻi ha potungāue tokoni fakalotofonua.
Fakakakato ha meʻa ʻe taha pe lahi ange mei he ngaahi meʻá ni ʻi he Fakalakalaka Fakatāutahá: ngāue fika 1 ʻi he tuʻunga ʻulungaanga mahuʻinga Ko e ʻIló, ngāue fika 5 ʻi he tuʻunga ʻulungaanga mahuʻinga ko e Tauʻatāina ke Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.