Tsetlana 52
Tshenolo e e neetsweng ka Moperofeti Joseph Smith, go bagolwane ba Kereke, kwa Kirtland, Ohio, Seetebosigo 7 1831. Khonferense e ne e tshwaretswe kwa Kirtland, go simolola ka di 3 mme ya tswalwa ka Seetebosigo 6. Kwa khonferenseng e ditlhomo tse di tlhomameng tsa ntlha mo ofising ya boperesiti jo bogolo di ne tsa dirwa, mme diponatshego dingwe tsa mewa e e seng yone le ya tsietso di ne tsa lemogiwa le go kgalemelwa.
1–2, Khonferense e e latelang e tlhometswe go tshwarwa mo Missouri; 3–8, go tlhomiwa ga bagolwane bangwe go tsamaya mmogo; 9–11, Bagolwane ba tshwanetse go ruta seo baaposetole le baperofeti ba se kwadileng; 12–21, Bao ba sedifaditsweng ka Mowa ba ungwa maungo a kgalaletso le tlhalefo; 22–44, Bagolwane ba lemmalwa ba tlhomilwe go tswela pele ba rera efangele fa ba ntse ba tsamaya go ya kwa Missouri kwa khonferenseng.
1 Bonang, go bua jaana Morena le bagolwane ba a ba biditseng e bile a ba itshenketse mo malatsing ano a bofelo, ka lentswe la Mowa wa gagwe—
2 A re: Nna, Morena, ke tlaa lo itsise seo se Ke tlaa ratang lo se dira go tswa mo nakong e go fitlha khonferense e e latelang, e e tlaa tshwarelwang kwa Missouri, mo lefatsheng le Ke tlaa le tshwaelang batho ba me, ba e leng masalela a ga Jakobe, le bao ba e leng ba ja boswa go yeng ka kgolagano.
3 Ke gone, ammaaruri Ke a lo raya, a batlhanka ba me Joseph Smith, Jun., le Sidney Rigdon ba tseye loeto la bone fela fa dipaakanyo di sena go dirwa go tlogela malwapa a bone, mme ba tsamaele kwa lefatsheng la Missouri.
4 Mme e re ka baikanyega mo go nna, ba tlaa itsisiwe se ba tlaa se dirang;
5 Mme le gone, e re ka ba le boikanyega, ba tlaa itsisiwe lefatshe la boswa jwa lona.
6 Mme e re ka ba sa ikanyege, ba tlaa kgaolwa, fela jaaka ke rata, jaaka ke bona go le molemo mo go nna.
7 Mme gape, ammaaruri Ke a lo raya, a motlhanka wa me Lyman Wight le motlhanka wa me John Corrill ba tseye loeto la bone ka bofefo;
8 Mme le gone motlhanka wa me John Murdock, le motlhanka wa me Hyrum Smith, ba tseele loeto lwa bone kwa lefelong lone leo ka tsela ya Detroit.
9 Mme a ba tseye loeto go tswa foo ba rera lefoko mo tseleng, ba sa bue dilo dipe go na le tseo tse di kwadilweng ke baperofeti le baaposetole, le tseo tse ba di rutiwang ke Mogomotsi ka thapelo ya tumelo.
10 A ba tsamaye ka sebedi bedi, mme jaana ba rere bantse ba le mo tseleng mo phuthegong nngwe le nngwe, ba kolobetsa ka metsi, le go baya diatla gaufi le fa thoko ga metsi.
11 Gonne go bua jaana Morena, Ke tlaa khutshwafatsa tiro ya me mo tshiamong, gonne malatsi a e tla a ke tlaa ntshetsang katlholo phenyo.
12 Mme a motlhanka wa me Lyman Wight a itise, gonne Satane o eletsa go mo fefera jaaka mmoko.
13 Mme bonang, yo o boikanyego o tlaa laola dilo tse dintsi.
14 Mme gape, Ke tlaa lo neela sekao mo dilong tsotlhe, gore lo seka lwa tsiediwa; gonne Satane o mo ntlheng tsotlhe mo lefatsheng, mme o tswela pele a tsietsa ditšhaba—
15 Ke gone yoo a rapelang, yo Mowa wa gagwe o ngomogileng, ene yoo o amogelesega mo go nna fa a obamela ditao tsa me.
16 Ene yo o buang, yo Mowa wa gagwe o ngomogileng, yo o puo ya gagwe e leng bonolo mme e nonotsha maikutlo, ene yo o ke wa Modimo fa a obamela ditao tsa me.
17 Mme gape, yo o roromang ka fa tlase ga thata ya me o tlaa nonotshiwa, mme o tlaa ungwa maungo a kgalaletso le tlhalefo, go yeng ka ditshenolo le boammaaruri jo Ke lo bo neetseng.
18 Mme gape, yo o fentsweng mme a sa ungwe maungo, fela go yeng ka sekao se, ga se wa me.
19 Ke gone, ka sekao se lo tlaa itse mewa mo diemong tsotlhe ka fa tlase ga magodimo ka botlalo.
20 Mme malatsi a tlile; go yeng ka tumelo ya batho go tlaa diragadiwa mo go bone.
21 Bonang, taelo e e neelwa bagolwane botlhe ba Ke ba itshenketseng.
22 Mme gape, ammaruri Ke a lo raya, a motlhanka wa me Thomas B. Marsh le motlhanka wa me Ezra Thayre ba tseye loeto lwa bone, ba rera lefoko ka tsela go ya kwa lefatsheng lone leo.
23 Mme gape, a motlhanka wa me Isaac Morley le motlhanka wa me Ezra Booth ba tseye loeto lwa bone, gape ba rera lefoko ka tsela go ya kwa lefatsheng lone leo.
24 Mme gape, a motlhanka wa me Edward Partridge le Martin Harris ba tseye loeto lwa bone le batlhanka ba me Sidney Rigdon le Joseph Smith, Jun.
25 A batlhanka ba me David Whitmer le Harvey Whitlock le bone ba tseye loeto lwa bone, mme ba rere ka tsela go ya kwa lefatsheng lone leo.
26 Mme a batlhanka ba me Parley P. Pratt le Orson Pratt ba tseye loeto lwa bone, mme ba rere mo tseleng, le e leng go ya kwa lefatsheng lone leo.
27 Mme a batlhanka ba me Solomon Hancock le Simeon Carter le bone ba tseye loeto lwa bone go ya kwa lefatsheng lone leo, mme ba rera mo tseleng.
28 A batlhanka ba me Edson Fuller le Jacob Scott le bone ba tseye loeto lwa bone.
29 A batlhanka ba me Levi W. Hancock le Zebedee Coltrin le bone ba tseye loeto lwa bone.
30 A batlhanka ba me Reynolds Cahoon le Samuel H. Smith le bone ba tseye loeto lwa bone.
31 A batlhanka ba me Wheeler Baldwin le William Carter le bone ba tseye loeto lwa bone.
32 Mme a batlhanka ba me Newel Knight le Selah J. Griffin botlhe ba tlhomiwe, mme le bone ba tseye loeto lwa bone.
33 Ee, ammaaruri Ka re, a botlhe ba ba tsamaele kwa lefelong le le lengwefela, ka ditsela tsa bone tse di farologanyeng, mme motho a le mongwefela a se ka a aga mo motheong wa motho yo mongwe, le fa e le go tsamaya mo motlhaleng wa yo mongwe.
34 Yo o boikanyego, ene yo o tlaa tshegediwa mme a segofadiwe ka maungo a mantsi.
35 Mme gape, Ke a lo raya, a batlhanka ba me Joseph Wakefield le Solomon Humphrey ba tseye maeto a bone go yeng kwa mafatsheng a a kwa botlhaba;
36 A ba dire le malwapa a bone, ba sa bolele dilo dipe go na le tse baperofeti le baaposetole ba di boletseng, tse ba di boneng le go di utlwa mme bogolo ruri ba di dumela, gore diperofeso di tle di diragale.
37 Ka ditlamorago tsa tlolo molao, a seo se se neng se neetswe Heman Basset se tsewe mo go ene, mme se bewe mo tlhogong ya ga Simonds Ryder.
38 Mme gape, ammaruri Ke a lo raya, a Jared Carter a tlhongwe moperesiti, mme le ene George James a tlhongwe moperesiti.
39 A masalela a bagolwane ba lebelele dikereke, mme ba bolele lefoko mo dikgaolong tse di mo tikologong ya bone; mme a ba dire ka diatla tsa bone gore go se nne le kobamelo ya medimo ya disetwa le fa e le ditiro tsa boikepo tse di dirwang.
40 Mme gakologelwang mo dilong tsotlhe bahumanegi le batlhoki, balwetse le ba ba patikiwang, gonne yo o sa direng dilo tse, ene yo o ga se morutwana wa me.
41 Mme gape, a batlhanka ba me Joseph Smith, Jun., le Sidney Rigdon le Edward Partridge ba tseye tetla go tswa mo kerekeng. Mme a go nne le e nngwe e e tseetsweng motlhanka wa me Oliver Cowdery.
42 Mme jaana, fela jaaka Ke buile, fa lo le boikanyego lo tlaa iphutha go itumela mo lefatsheng la Missouri, le e leng lefatshe la lona la boswa, le jaanong e leng lefatshe la baba ba lona.
43 Mme, bonang, Nna, Morena, ke tlaa potlakisa toropo mo nakong ya yone, mme ke tlaa rwesa ba ba boikanyego ka boitumelo le ka boipelo.
44 Bonang, Ke Jeso Keresete, Morwa Modimo mme Ke tlaa ba tsholetsa ka letsatsi la bofelo. Fela jalo. Amene.