Usa ka Pinahaom nga Kasinatian
Si Presidente Russell M. Nelson mipahayag: “Pinaagi sa tibuok kinabuhi nga pagserbisyo niining Simbahan, akong nakat-onan nga dili gayod kana igsapayan asa moserbisyo ang usa ka tawo. Ang gipakabanaan pag-ayo sa Ginoo mao ang giunsa sa pagserbisyo sa usa ka tawo” (“Ang Pagpangalagad uban sa Gahum ug Katungod sa Dios,” Liahona, Mayo 2018, 68).
Ang matag pangserbisyo nga misyonaryo hatagan og usa ka pinahaom nga kasinatian sa misyon nga gitakdo sa talagsaon nga paagi ngadto sa iyang mga talento, mga kahanas, ug mga gasa. Atol sa panahon sa ilang mga misyon, komon alang sa pangserbisyo nga mga misyonaryo nga moserbisyo og dinaghan nga mga buluhaton, lakip sa aprobado nga komunidad ug matinabangon nga mga organisasyon, mga organisasyon nga gipadagan sa Simbahan, ug sa gi-assign sa stake nga mga oportunidad sa pagserbisyo. Sa tibuok nilang mga misyon, ang pangserbisyo nga mga misyonaryo moserbisyo ubos sa direksiyon sa usa ka presidente sa misyon, uban sa hugot nga suporta sa mga lider sa pangserbisyo nga misyon. Ang presidente sa stake ug bishop mohatag og suporta sa eklesiyastikal nga mga butang sama sa pagkatakos ug mga rekomend sa templo.
Proseso sa Misyonaryo nga Rekomendasyon
Ang tanang takos nga mga batan-ong lalaki ug mga batan-ong babaye nga dunay tinguha nga moserbisyo og misyon mokompleto sa online nga rekomendasyon nga giproseso sa ilang bishop ug presidente sa stake.
Usahay ang usa ka miyembro nga nagtinguha nga moserbisyo mahimong dili tawagon isip full-time nga pangtudlo o pangserbisyo nga misyonaryo. Tungod tingali kini sa mga hagit sa kahimsog, wala makatuman sa mga sumbanan sa katakos, legal nga mga isyu, o ubang mga sirkumstansiya. Ang bishop ug ang presidente sa stake mopahayag og gugma ug pasalamat sa pagkaandam sa miyembro sa pagserbisyo. Ang mga lider mahimong motubag sa bisan unsang mga pangutana ngadto sa Missionary Department sa 801-240-2179.
Ang aplikasyon alang sa tanan nga misyonaryo maglakip sa mga pagtimbangtimbang sa bishop, sa presidente sa stake, ug sa mga propesyonal sa medikal. Ang Korum sa Napulog Duha ka Apostoles ug mga General Authority Seventy modumala sa proseso sa rekomendasyon sa misyon.
Ang kandidato sa pagkamisyonaryo dili makapili kon unsa nga matang sa misyon ang iyang serbisyohan. Ang tanang aplikante gikonsiderar alang sa pangtudlo nga mga misyon. Ang mga batan-ong lalaki ug mga babaye kansang mga talento ug mga sirkumstansiya labing haom alang sa pangserbisyo nga misyon tawagon isip pangserbisyo nga mga misyonaryo. Kon ang usa ka aplikante tawagon isip pangserbisyo nga misyonaryo, ang serbisyo itakdo sa talagsaon nga mga talento, mga kahanas, ug mga gasa sa aplikante ug sa mga oportunidad nga anaa diha sa komunidad.
Ang presidente sa stake dili motino kon ang usa ka aplikante gi-assign sa usa ka pangtudlo nga misyon o usa ka pangserbisyo nga misyon. Atol sa proseso sa pag-aplay, ang mga presidente sa stake padayon nga mohatag og impormasyon sigon sa ihangyo sa Missionary Department. Kon ang kandidato dili ma-assign sa usa ka pangtudlo nga misyon, usa ka representante gikan sa Missionary Department makigtambag sa presidente sa stake sa dili pa ang tawag alang sa pangserbisyo nga misyon ihatag. Ang presidente sa stake mogamit sa paghukom aron sa pagtino kon pahibaloon ba niya ang aplikante ug ang pamilya nga adunay nagsingabot nga tawag alang sa pangserbisyo nga misyon.
Diha sa aplikasyon, ang mga bishop ug mga presidente sa stake motubag sa pangutana nga “Kini nga kandidato duna bay grabe nga pisikal, mental, o emosyonal nga limitasyon nga angayng hunahunaon kon i-assign?” Kon ang tubag oo, ang mga lider sa pagkapari hangyoon sa paghatag og dugang nga impormasyon. Ang mga lider sa pagkapari mahimong maghisgot usab kauban ang kandidato sa posibilidad nga madungganong pag-excuse gikan sa pormal nga misyonaryo nga pagserbisyo.
Mga Pag-reassign sa Nauli og Sayo
Ang pipila ka misyonaryo nga sa sinugdanan gi-assign sa usa ka pangtudlo nga misyon tingali wala sa posisyon nga mopadayon sa ilang pangtudlo nga mga misyon tungod sa managlahing mga rason. Human makigtambag sa mga lider sa misyon, sa mga lider sa pangserbisyo nga misyon, sa konseho sa kahimsog sa misyon, ug sa presidente sa stake sa misyonaryo, ang Missionary Department mahimong motino nga ang usa ka pangtudlo nga misyonaryo mopauli. Usa ka representante gikan sa Missionary Department ang mopahibalo sa presidente sa stake bahin sa mauli og sayo nga misyonaryo.
Sa dili pa mouli ang misyonaryo, ang presidente sa stake makigtambag sa presidente sa misyon, mga lider sa pangserbisyo nga misyon, misyonaryo, ug sa mga ginikanan sa pagtimbangtimbang sa tinguha, mga sirkumstansiya, ug abilidad sa misyonaryo sa pagpadayon sa pagserbisyo isip usa ka pangserbisyo nga misyonaryo. Kon ang pag-reassign irekomendar, ang misyonaryo makadawat og reassignment sa pangserbisyo nga misyon pinaagi sa Korum sa Napulog Duha
Sa mga sitwasyon diin ang sayo nga pagpauli sa pangtudlo nga mga misyonaryo i-assign pag-usab isip pangserbisyo nga mga misyonaryo, usa ka gipahaom nga plano alang sa pangserbisyo nga misyon ang himoon alang sa matag misyonaryo. Kon ang misyonaryo mipauli tungod sa pisikal nga panglawas nga mga rason, ang misyonaryo mahimong magpadayon sa pagserbisyo isip pangserbisyo nga misyonaryo o mahimong mobalik ug i-assign pag-usab isip pangtudlo nga misyonaryo sa higayon nga ang medikal nga mga isyu masulbad na.
Ang presidente sa stake makigtambag sa Missionary Department sa dili pa moisyu og sayo nga pag-release ngadto sa misyonaryo.
Mga Kapanguhaan sa Pangserbisyo nga Misyon
Opisina sa Pangserbisyo nga Misyon
Ang Opisina sa Pangserbisyo nga Misyon nahimutang sa punoang buhatan sa Simbahan ug dunay kawani nga mga empleyado sa Simbahan ug senior nga pangserbisyo nga mga misyonaryo.
Ang Opisina sa Pangserbisyo nga Misyon makigtambayayong gayod sa kawani sa Missionary Department diha sa proseso sa rekomendasyon sa misyonaryo ug mohatag og suporta ngadto sa lokal nga mga lider sa pagkapari, mga lider sa pangserbisyo nga misyon (tan-awa sa ubos), ug sa Simbahan ug mga kalihokan sa matinabangon nga komunidad. Ang Opisina sa Pangserbisyo nga Misyon nakigtambayayong usab sa Missionary Department aron sa paghatag og pagbansay, mga kapanguhaan, ug impormasyon ngadto sa mga lider sa pangserbisyo nga misyon aron sa pagtabang sa pangserbisyo nga mga misyonaryo nga magmalamposon.
Mga Lider sa Pangserbisyo nga Misyon
Kon gikinahanglan, ang Kapangulohan sa Area mohatag og pagtugot sa Area Seventy sa pagtawag og hingkod nga magtiayon nga mahimong mga lider sa pangserbisyo nga misyon. Kini nga mga lider magsilbi nga tigpasabot tali sa mga presidente sa misyon, matinabangon nga mga organisasyon, ug sa mga organisasyon nga gipadagan sa Simbahan sa pagtino sa potensyal nga mga buluhaton. Ang mga lider sa pangserbisyo nga misyon makigtambayayong gayod sa Public Affairs ug sa JustServe.org. Kini nga mga lider motabang sa mga pangserbisyo nga mga misyonaryo aron makab-ot ang mga ekspektasyon sa mga organisasyon.
Ang mga lider sa pangserbisyo nga misyon moserbisyo ubos sa direksiyon sa presidente sa misyon. Sila adunay regular nga kontak sa pangserbisyo nga misyonaryo, nagrebyo kon giunsa niya pagtrabaho, ug naghatag og feedback. Kini nga mga lider , uban ang pagtugot sa presidente sa misyon, motabang sa paghatag og makatagbaw nga mga buluhaton sa pagserbisyo alang sa pangserbisyo nga misyonaryo diha sa matinabangon nga mga organisasyon, mga organisasyon nga gipadagan sa Simbahan, pagserbisyo sa templo o mga panagpundok uban sa ubang mga misyonaryo. Ang presidente sa stake mao ang responsable sa pangserbisyo nga misyonaryo sa eklesiyastikanhong paagi.
Ang mga lider sa pangserbisyo nga misyon makadawat og pagbansay gikan sa Missionary Department.
Mga Tigdumala sa Panggawas nga Operasyon [External Operations Managers]
Ang mga tigdumala sa panggawas nga operasyon mao ang mga indibidwal nga responsable sa organisasyon sa pagserbisyo, sama sa mga balay tipiganan sa bishop ug mga kan-anan nga libre ang pagkaon. Motabang sila sa matag pangserbisyo nga misyonaryo sa pagbaton og tinuoray nga kasinatian sa pangserbisyo nga misyonaryo samtang nagserbisyo sa gi-assign nga lokasyon. Motabang usab sila sa pangserbisyo nga mga misyonaryo aron molampos sa pagkompleto sa ilang mga gimbuhaton sa pagserbisyo. Sila mopalig-on sa personal nga pasalig sa pangserbisyo nga mga misyonaryo sa mga sumbanan diha sa Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyon.