Usa ka Pangserbisyo nga Misyon

Kon kita moserbisyo sa mga anak sa Langitnong Amahan, nagtabang kita sa paggiya kanila aron motuo sa Dios. “Si Ammon miingon ngadto kaniya: Dili, apan ako mahimo nga imong sulugoon. Busa si Ammon nahimo nga usa ka sulugoon ni hari Lamoni. … Karon sa diha nga si Ammon nakakita niini ang iyang kasingkasing napuno sa hingpit nga kalipay; kay, miingon siya, ako mopakita sa akong gah[o]m ngadto niini nga akong mga kauban nga mga sulugoon, o ang gah[o]m diin ania kanako, sa pagpahiuli niini nga mga panon ngadto sa hari , … nga ako mogiya kanila sa pagtuo ” (Alma 17:25, 29; mga italic gidugang).

Kon kita moserbisyo sa uban, kita nagpakita usab sa atong gugma ngadto sa Langitnong Amahan: “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Ang Katuyoan sa Pangserbisyo nga Misyonaryo

Ang atong katuyoan mao ang pagtabang sa uban nga moduol ngadto kang Kristo pinaagi sa pagserbisyo kanila sama sa buhaton sa Manluluwas. Kita boluntaryo nga moserbisyo diha sa matinabangon nga mga organisasyon, mga kalihokan sa Simbahan, ug sulod sa komunidad. Kita mangalagad sa Iyang ngalan ngadto sa usa ka tawo, sama sa Iyang gibuhat, nga nagpahayag sa Iyang mahigugmaong pagkamabination.

Mahinungdanong mga Tumong sa Pangserbisyo nga Misyon

• Mohatag og oportunidad alang sa tanan nga mga batan-ong babaye ug mga batan-ong lalaki nga andam nga moserbisyo sa Ginoo ug madugangan ang pagpamatuod bahin Kaniya.
• Motabang sa matag pangserbisyo nga misyonaryo sa pag-andam alang sa tibuok kinabuhi nga pagserbisyo.
• Mohatag sa gikinahanglan ug bililhon nga pagserbisyo sa Simbahan ug sa mga organisasyon sa komunidad.

Unsa ang pangserbisyo nga misyonaryo?

Ang pangserbisyo nga mga misyonaryo moserbisyo sulod sa 6 hangtod sa 18 ka bulan (sa mga batan-ong babaye nga nag-edad og 19–25) ug 6 hangtod sa 24 ka bulan (sa mga batan-ong lalaki nga nag-edad og 18–25). Sa balay ra sila magpuyo ug magserbisyo sa lokal nga komunidad. Moserbisyo sila nga daw sama sa full-time kon itugot sa ilang kapabilidad ug mga kahimtang. Ang matag pangserbisyo nga misyonaryo hatagan og usa ka pinahaom nga kasinatian sa misyon nga gitakdo sa talagsaon nga paagi ngadto sa iyang mga talento, mga kahanas, ug mga gasa. Atol sa panahon sa ilang mga misyon, komon alang sa pangserbisyo nga mga misyonaryo nga moserbisyo sa dinaghan nga gimbuhaton, lakip sa aprobado nga matinabangon nga mga organisasyon, mga kalihokan sa Simbahan, ug sa gisangon ngadto sa stake nga mga oportunidad sa pagserbisyo. Sa ilang tibuok misyon, ang pangserbisyo nga mga misyonaryo ipaubos sa eklesyastikal nga direksiyon sa ilang mga presidente sa stake.

Kinsa ang makaserbisyo isip pangserbisyo nga misyonaryo?

Ang takos nga mga batan-ong mga lalaki (nag-edad og 18 ngadto sa 25) ug mga batan-ong babaye (nag-edad og 19 ngadto sa 25) nga dili makahimo pagserbisyo og pangsangyaw nga misyon tungod sa pisikal, mental, o emosyonal nga mga rason mahimong tawagon sa usa ka pangserbisyo nga misyon. Ang takos nga batan-ong lalaki kinsa dili makahimo sa pagserbisyo og pangsangyaw nga misyon walay obligasyon sa pagkapari nga moserbisyo og pangserbisyo nga misyon.

Ang pangsangyaw nga mga misyonaryo nga nauli og sayo tungod sa aksidente, sakit, o ubang kahimtang sa kahimsog ug dunay tinguha nga mopadayon sa ilang serbisyo mahimong i-reassign ngadto sa pangserbisyo nga misyon kon i-rekomendar sa mga General Authority sa Departamento sa Misyonaryo ug sa presidente sa stake ug aprobahan sa Kurom sa Napulog Duha.

Sa unsang paagi tawagon ang pangserbisyo nga mga misyonaryo?

Ang batan-ong mga lalaki ug batan-ong mga babaye nga dili makahimo sa pagserbisyo og full-time nga pangsangyaw nga misyon tawagon nga mahimong pangserbisyo nga mga misyonaryo. Kini nga pagtimbang-timbang mahimong himoon atol sa pagproseso sa rekomendasyon sa misyonaryo o human ang indibidwal makaserbisyo og porsiyon sa pangsangyaw nga misyon ug mauli sa dili pa mahuman ang gilaoman nga petsa sa pagkompleto. Ang usa ka pangserbisyo nga misyonaryo gitawag sa Ginoo pinaagi sa Iyang propeta aron moserbisyo diha sa usa ka palibot nga gitakdo sa talagsaon nga paagi ngadto sa iyang mga talento, kahanas ug mga gasa.