O Se Misiona o Auaunaga

A tatou auauna atu i fanau a le Tama Faalelagi, ua tatou fesoasoani e taitai mai i latou ia talitonu i le Atua. “Sa fai atu Amona ia te ia: E leai, ae o le a avea a’u ma āu auauna. O lea na avea ai Amona ma se auauna i le tupu o Lamonae. … O lenei ina ua vaai atu Amona i lenei mea sa faatumulia lona loto i totonu o ia i le olioli; ona, sa faapea ifo o ia, o le a ou faaali atu loʼu mana ia te i latou nei o oʼu uso a auauna, po o le mana ua ia te aʼu, e toe aumai ai nei lafu manu i le tupu, … ina ia mafai ona ou taitai mai o i latou ia talitonu” (Alema 17:25, 29).

Pe a tatou auauna atu i isi, ua tatou faaalia lo tatou alolofa i le Tama Faalelagi: “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17

Susu Maia i Misiona o Auaunaga

O Le Faamoemoega o le Faifeautala’i o Auaunaga

Fesoasoani i isi ia o mai ia Keriso e ala i le auauna atu ma le agalelei alofa e pei ona faia e le Faaola. Auauna atu i Lona suafa i le toatasi e ala i le mana o le Agaga Paia ma ola o se faataitaiga o le faatuatua ia Iesu Keriso, salamo, tausia o feagaiga ma le Atua, ma tumau e oo i le iuga.

O Vaega Autu o se Misiona o Auaunaga

• E tuuina atu ai se avanoa mo tamaitai ma alii talavou naunautai uma e auauna ai i le Alii ma faateleina a latou molimau ia te Ia.
• E fesoasoani i faifeautala’i o auaunaga taitoatasi ia saunia mo se auaunaga i le olaga atoa.
• Ia tuuina atu auaunaga manaomia ma le taua i le Ekalesia ma faalapotopotoga i le lotoifale.

O le a le faifeautala’i o auaunaga?

E pei o faifeautala’i tala’i, o faifeautala’i o auaunaga e galulue e oo atu i le 18 masina (tamaitai talavou e ta’i 19-29 tausaga) ma e oo atu i le 24 masina (alii talavou e ta’i 18-25 tausaga). Latou te nonofo i aiga ma auauna i le lotoifale. Latou te auauna atu e lata i le taimi faamisiona atoa e pei ona faatagaina ai e o latou tulaga. O faifeautala’i o auaunaga taitoatasi o le a tuuina atu i ai ni aafiaga faa-misiona faapitoa e fua faatatau i ana taleni, tomai ma meaalofa. I taimi o a latou misiona, e masani i faifeautala’i o auaunaga ona galulue i isi tofiga eseese e aofia ai nuu ma faalapotopotoga fesoasoani alofa ua faamaoniaina, faatautaiga a le Ekalesia, ma avanoa o auaunaga e tofia i ai e le siteki. I le gasologa o a latou misiona, o faifeautala’i o auaunaga e auauna atu i le lotoifale i lalo o le taitaiga a se peresitene o le misiona, faatasi ai ma le lagolagosua vavalalata a taitai o misiona mo auaunaga. E tuuina atu e le peresitene o le siteki ma le epikopo le lagolago i mataupu faalelotu e pei o le agavaa ma pepa faataga o le malumalu.

O ai e mafai ona auauna atu o se faifeautala’i o auaunaga?

O alii talavou agavaa (tausaga 18 i le 25) ma tamaitai talavou (tausaga 19 i le 29) o o latou tulaga e sili ona talafeagai mo se misiona o auaunaga e mafai ona tofia o ni faifeautala’i o auaunaga.

O faifeautala’i tala’i e toe vave foi mai i le fale ona o se faalavelave faafuasei, gasegase, po o isi tulaga tau i le soifua maloloina ma o i ai le manao e faaauau ai la latou auaunaga e mafai ona toe tofia i se misiona o auaunaga pe a fautuaina mai e taitai perisitua ma faamaonia mai e le Korama a le Toasefululua. A uma ona foia o latou tulaga faalesoifua maloloina, e mafai ona latou toe foi atu i lo latou uluai tofiga o ni faifeautala’i tala’i.

E faapefea ona valaauina faifeautala’i o auaunaga?

O faifeautala’i o auaunaga e valaauina i le ala lava e tasi e pei o faifeautala’i tala’i. O alii ma tamaitai talavou o o latou tulaga e sili ona talafeagai mo se misiona auauna atu e ono mafai ona tofia e avea ma faifeautala’i o auaunaga. O le tofiga lenei e faia i le taimi o le faagasologa o le fautuaina mai o le faifeautala’i pe o le maea ai ona auauna atu o se tagata i se vaega o le misiona tala’i ma toe foi atu i le aiga ae le’i oo i le aso na atofaina e uma ai. E valaauina se faifeautala’i o auaunaga e le Alii e ala i Lana perofeta e auauna atu i se siosiomaga e fuafaatatau faapitoa i ana taleni, tomai ma meaalofa.