O le auaunaga a le Faaola o loo faaalia mai ai ia poloaiga sili e lua: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” ma “E te alofa atu i lē lua te tuaoi, ia pei o oe lava ia te oe” (Mataio 22:37, 39). Pe a tatou auauna atu i o tatou tuaoi, ua tatou faaalia lo tatou alolofa i le Tama Faalelagi: “Pe a outou auauna atu i o outou uso-a-tagata, ua na’o lo outou auauna atu lava lea i lo outou Atua” (Mosaea 2:17)
Susu Mai ia i Misiona o Auaunaga
Service Missions Family Orientation | Elder W. Mark Bassett
Service Missions: Elder Quade’s Story
Tusitaulima mo Faifeautala’i o Auaunaga
O se Tulaga Faatonuina mo Faifeautala’i mo Soo o Iesu Keriso—Misiona o le Auaunaga o le tusitaulima lea o le misiona ua tuuina atu i faifeautala’i talavou uma o auaunaga. O le tusitaulima ua tuuina atu ai fautuaga ma taiala e uiga i mataupu e pei o le tuuto atu i le auaunaga i le Alii, amioga a le tagata lava ia ma le faasologa o polokalama o aso taitasi. Ao e lei amataina le misiona mo auaunaga, e tatau i faifeautala’i ona iloilo ma le toto’a le tusitaulima faatasi ma o latou matua ma le peresitene o siteki.
Fetuunai i le Olaga Faafaifeautalai o Auaunaga
O se misiona o auaunaga e mafai ona fiafia ma atuatuvale. O le galue malosi ma le auauna atu o meafaigaluega faamaonia ia i le taulimaina o le popole, leai o se faamoemoe, ma le vaivai. E taua tele mo se tasi e punouai i le galuega a le Alii, i le taimi o le auaunaga faafaifeautala’i ma le mae’a ai foi. Ae o le galue malosi ma le auaunaga lava ia ua le na o le pau ia o au meafaigaluega. O isi punaoa o fesoasoani faapolofesa, faamanuiaga faaleperisitua, fautuaga mai tagata matutua ua lava le potomasani, ma Fetuunaiga i le Olaga Faafaifeautala’i mo Auaunaga: Tamaitusi mo Punaoa. O le a fesoasoani le Alii ia te oe e atinae ia tomai ma uiga faaalia e fesoasoani ai ia te oe ia manuia lau auaunaga ma lau faasoa atu i isi.
Fesili Masani
E fesoasoani matua e faailoa mai mea e fiafia i ai, gafatia ma taleni o se faifeautala’i faaolioli o auaunaga. Latou te tuu atu i taitai perisitua ma taitai misiona o auaunaga se malamalama’aga i ni auala e mafai ai ona auauna atu lelei le faifeautala’i o auaunaga. E mafai foi ona tuuina atu e matua ni tuualalo ia iloa ai po o le fea auaunaga e sili ona talafeagai mo le faifeautala’i. E tuuto atu le lagolago e manaomia i le taimi o le misiona, e pei o le tuliloaina o gaoioiga i aso taitasi, fesoasoani i le feaveaiina pe a manaomia, o le taulimaina o tulaga tautupe mo le vaaia o le fomai ma meatautupe mo taavale pe a manaomia, ma le ofoina atu o le lagolago alofa.
O alii ma tamaitai talavou ua i ai le manao e auauna atu i se misiona ma ua agavaa, e faatumuina se talosaga i luga o le initoneti e faagaoioia e le peresitene o le siteki. E tusa ai ma mea o loo i totonu o le talosaga, faatasi ai ma le iloiloga a le epikopo, peresitene o le siteki, ma fomai, e ono faia ai se valaauga o se faifeautala’i o auaunaga. O le Korama a Aposetolo e Toasefululua ma le Pulega Aoao a Fitugafulu e latou te vaaia talosaga, ma e tuuina atu se valaauga o se faifeautala’i mai le Alii e ala mai i Lana perofeta.
Leai. O talosaga uma e faitaulia muamua mo misiona tala’i. O alii ma tamaitai talavou o e e sili ona fetaui o latou tulaga mo se misiona auauna atu o le a valaauina o ni faifeautala’i o auaunaga. Afai e valaauina se tagata talosaga o se faifeautala’i o auaunaga, o le valaauga e mai le perofeta, ma o le auaunaga e fua i taleni , tomai, ma meaalofa tulaga ese a le tagata talosaga ma le siosiomaga faalelotoifale.
O alii ma tamaitai talavou o o latou taleni ma tulaga e sili ona talafeagai mo se misiona auauna atu ua valaauina e avea ma faifeautala’i o auaunaga. O le iloiloga lenei e faia i le taimi o le faagasologa o le fautuaina mai o le faifeautala’i pe o le maea ai ona auauna atu o se tagata i se vaega o le misiona tala’i ma toe foi atu i le aiga ae lei oo i le aso na atofaina e mae’a ai. E valaauina se faifeautala’i o auaunaga e le Alii e ala i Lana perofeta e auauna atu i se siosiomaga e fuafaatatau faapitoa i ana taleni, tomai ma meaalofa.
A uma ona valaauina se alii po o se tamaitai talavou e auauna atu o se faifeautala’i o auaunaga, e fatuina se misiona patino e fetaui ma taleni, tomai, ma meaalofa a le faifeautala’i e taitai misiona o auaunaga i lalo o le taitaiga a le peresitene o le misiona. E fesoasoani foi le faifeautalai ma ona matua. E ono mafai ona fetuunai ia tofiga i le taimi o le misiona.
O faifeautala’i mo auaunaga e galulue i faalapotopotoga fesoasoani i nuu ua faamaoniaina (e pei o nofoaga e faaputu ai mea taumafa, nofoaga o tagata sulufai, malutaga), o galuega a le Ekalesia (e pei o fale teu meaai, fale tuu apa ai meaai, malumalu, seminare ma inisitituti), po o tofiga mai o latou taitai o le Ekalesia i le lotoifale.
O faifeautala’i o auaunaga e nonofo lava i le aiga ma auauna atu i le lotoifale. I nisi tulaga e seāseā ona tupu, e ono maua se faatagaga mo faifeautala’i o auaunaga e auauna atu ai i nofoaga e ese mai o latou aiga, ao nonofo ma o latou tauaiga. E matua leai lava se tulaga o le a nofo toatasi ai se faifeautala’i o auaunaga.
O faifeautala’i o auaunaga e fai i taimi uma ia pine o igoa o le faifeautala’i o auaunaga i taimi o latou tofiga o auaunaga ma aoaoga, i fonotaga a le misiona, ma i sauniga a le Ekalesia i Aso Sa. E mafai foi ona fai a latou pine o igoa i isi taimi.
Leai. E le faatagaina le tafafao faamasani o faifeautala’i o auaunaga i le taimi o a latou misiona. E mafai ona auai faifeautala’i o auaunaga i gaoioiga faaleuarota, siteki po o le autalavou nofofua matutua.
O faifeautala’i o auaunaga ma o latou aiga e nafa ma tupe faaalu e faatatau i a latou misiona o auaunaga. O nei tupe faaalu e aofia ai ae le na o le pau lea, femalagaaiga, meaai, lavalava, tausiga faafomai, tausiga o nifo, ma inisiua o taavale. O faifeautala’i o auaunaga e nafa ma femalagaaiga i le alu ma le sau mai nofoaga o a latou auaunaga. E le maua e faifeautala’i o auaunaga se lagolago tautupe mai le Tupe Lautele mo Faifeautala’i.
E ui lava e leai ni soa a faifeautala’i o auaunaga e pei ona faia e faifeautala’i tala’i, ae e mafai e o latou taitai misiona o auaunaga ona fatuina ni soa mo le suesueina o le talalelei ma isi gaoioiga e faatatau i le misiona. O lo latou saogalemu ma le soifua manuia o mea e sili ona faamuamua. E faamautinoa e taitai o misiona o auaunaga ma matua o loo i ai le lagolago talafeagai, vaavaaiga ma le puipuiga i taimi o galuega faatulagaina i aso uma a faifeautala’i o auaunaga.
Ioe. E tuuina atu e le peresitene o le misiona ma taitai o misiona o auaunaga ni avanoa talafeagai e atinae ai tulaga faaletaitai i faifeautalai o se vaega o a latou aafiaga faalemisiona. O matafaioi faaletaitai e avanoa mo tamaitai ma alii faifeautala’i.
Ioe. E faamauina e pei lava o se misiona tala’i.
Leai. O faifeautala’i o auaunaga e tatau ona faasolo atu i le sailia o ni galuega po o aoaoga faamasani i le maea ai o aoga maualuga po o le aotauina.
Faamolemole silasila i le vaega o le Toe Tofia o i Latou e Vave Ona Toe Foi i Aiga i le itulau o le Aafiaga Faapitoa.
E mafai ona toe valaauina se faifeautala’i e auauna mo se taimi talafeagai e faaatoa ai le 18 po o le 24 masina o le auaunaga.
O fuafuaga o le saogalemu ma lamatiaga o le faifeautala’i o mea faamuamua na mo le faifeautala’i, le Ekalesia ma faalapotopotoga o fesoasoaniga alofa i nuu. O tofiga uma mo faalapotopotoga o fesoasoaniga alofa e manaomia ai se maliliega tusitusia e puipui ai le ta’uleleia o le faifeautala’i ma le Ekalesia. O le mea lea e tatau ona faatinoina e ala atu i le Matagaluega mo Faifeautala’i ma le Ofisa o Misiona o Auaunaga. E i ai ituaiga o gaoioiga e le faatagaina pe faasaina ona e ono tulai mai ai se lamatiaga i tagata ma faalapotopotoga. E le tatau ona auai faifeautala’i o auaunaga i ituaiga gaoioiga o loo taua i lalo i soo se tulaga lava:
Fesootaiga taitoatasi ma tamaiti po o ni tagata matutua e ono aafia e aunoa ma se tagata e vaaia.
Faataele, vaaia o tamaiti po o le tuuina atu foi o isi auaunaga patino e talitutusa.
O le faafoeina o masini po o taavale e aunoa ma aoaoga faamasani talafeagai po o se faamaoniga e faafoe ai.
O isi avanoa o auaunaga e tele so latou lamatiaga e faia e faifeautala’i o auaunaga i faalapotopotoga mo fesoasoaniga alofa e faia ma le faaeteete e ala i ni maliliega. E faapena foi nisi avanoa o auaunaga e tele sona lamatiaga i galuega a le Ekalesia ma isi galuega totofi mai le siteki e taulima e ala i aiaiga masani ma aoaoga faamasani. O nisi nei o gaoioiga e maualuga lo latou lamatiaga e i ai:
O le faiaoga po o le faufautua i tulaga o vaega.
Taulimaina po o le umiaina o soo se tinoitupe, puipuiga, po o isi mea taua.
Tuuina atu o se manatu faaalia faapolofesa.
Faafoeina o masini, mea e faaaoga, po o ni taavale e aunoa ma se aoaoga faamasani talafeagai po o se faamaoniga e faafoe ai.
O faifeautala’i o auaunaga e lauga i le sauniga faamanatuga ae lei alu ma pe a maea a latou misiona, ma tuuina atu i ai le amanaia e pei o faifeautala’i tala’i (faailoga mai misiona, puletini, talafou ma isi mea faapena) ma lipoti atu i le fono a fautua maualuga i le maea ai o a latou misiona.
O le Aotelega
O misiona o auaunaga e lagolago i misiona tala’i e ala i le faatagaina o isi ia iloa le alofa o le Atua e ala i le mauaina lea o le auaunaga faa-Keriso. I le taimi nei ua sili atu nai lo se isi lava taimi, o alii ma tamaitai talavou ua i ai le manao e auauna atu, o le a tuuina atu i ai le avanoa e faalautele ai le galuega a le Alii i le avea ai o se faifeautala’i. O se faamanuiaga sili lenei i faifeautala’i, i o latou aiga ma i e latou te auauna atu i ai.