Ang Sulat sa Unang Kapangulohan ngadto sa mga Lider
Pangserbisyo nga mga Misyon alang sa Batan-ong mga Misyonaryo
Nobyembre 2018
Ang programa sa Pangserbisyo nga Misyonaryo karon mahimo na sa gawas sa U.S ug Canada, ubos sa eksaktong panahon ug direksiyon sa Kapangulohan sa Area ug inubanan sa pag-aprobar sa Korum sa Napulog Duha ka Apostoles. Palihog kontaka ang Kapangulohan sa Area alang sa dugang nga impormasyon sa inyong area.
Pahinumdom: Ang mga misyonaryo dili na tawagon ngadto sa duha ka transfer nga mga misyon (o tulo ka bulan nga misyon).
Ngadto sa: Mga General Authority; Mga Kapangulohan sa Kinatibuk-ang Auxiliary; ug sa mosunod nga mga lider sa Estados Unidos ug Canada: Mga Area Seventy; Mga Presidente sa Stake, Misyon, ug District; Mga Bishop ug mga Presidente sa Branch
Minahal nga mga Kaigsoonan:
Pangserbisyo nga mga Misyon alang sa Batan-ong mga Misyonaryo (U.S. ug Canada Lamang)
Ang Ginoo namahayag, “Kon kamo adunay tinguha sa pag-alagad sa Ginoo kamo gitawag ngadto sa buhat” (Doktrina ug mga Pakigsaad 4:3). Ang pagserbisyo sa Ginoo isip usa ka misyonaryo usa ka mahimayaon, sagrado nga pribilehiyo nga magdala og mahangtoron nga mga panalangin ngadto sa indibidwal ug niadtong iyahang giserbisyohan.
Sulod sa daghang katuigan, ang mga batan-ong lalaki ug babaye nga may tinguha sa pagserbisyo og misyon apan dili makahimo sa ingon tungod sa mga rason sa panglawas maisogon nga miserbisyo sa Ginoo sa nagkadaiyang mga organisasyon sa komunidad ug sa Simbahan. Kami mapasalamaton sa ilang serbisyo ug nalipay nga mopahibalo sa gipalapdan nga mga oportunidad alang sa batan-ong mga misyonaryo kinsa adunay mga hagit sa panglawas.
Sugod sa Enero 2, 2019, ang tanang batan-on nga mga kandidato sa pagkamisyonaryo mogamit sa online nga proseso sa pagrekomendar sa misyonaryo [missionary online recommendation]. Ubos sa direksiyon sa Unang Kapangulohan ug sa Korum sa Napulog Duha ka Apostoles, ang matag umaabot nga misyonaryo kinsa nahimong kwalipikado makadawat og usa ka tawag nga labing haom kaniya.
Ang pagsangyaw sa ebanghelyo aron sa pagpundok sa nagkatibulaag nga Israel mao kanunay ang nag-unang katuyoan sa misyonaryo nga pagserbisyo, busa ang Ginoo, pinaagi sa Iyang mga lider, motawag sa kadaghanan sa batan-ong mga tawo sa pagpangita, pagtudlo, ug pagbunyag sa mga kinabig. Ang uban, nga dili makaserbisyo sa ingon niining paagiha, tingali matawag sa pagserbisyo sa Ginoo isip usa ka pangserbisyo nga misyonaryo. Dugang pa, ang mga misyonaryo kinsa mauli og sayo gikan sa usa ka pangsangyaw nga misyon tungod sa sakit nga tagdugay maayo mahimong ma-assign pag-usab sa pagserbisyo sa Ginoo isip usa ka pangserbisyo nga misyonaryo. Ang pipila sa ubang mga kandidato, uban sa among pasalamat sa ilang tinguha sa pagserbisyo, dungganong i-excuse gikan sa bisan unsang pormal nga misyonaryo nga pagserbisyo.
Alang sa dugang nga impormasyon, palihog ribyoha ang gisukip nga dokumento sa pagpasabot ug ang mga materyal diha sa churchofjesuschrist.org/service-missionary.
Kami nag-ampo nga ang Ginoo mopadayon sa pagpanalangin sa talagsaon nga mga batan-ong lalaki ug mga babaye sa tibuok Simbahan kinsa naghigugma Kaniya ug nagtinguha nga moserbisyo.
Kaninyo matinuoron, Ang Unang Kapangulohan