Tusi a le Au Peresitene Sili i Taitai
Misiona o Auaunaga mo Faifeautalai Talavou
Novema 2018
O le polokalama o Faifeautalai o Auaunaga ua maua i fafo atu o le IunaiteSetete ma Kanata, i lalo o le taimi ma taitaiga a le Au Peresitene o le Eria ma le faatagaga a le Korama a Aposetolo e Toasefululua. Faamolemole faafesootai le Au Peresitene o Eria mo nisi faamatalaga i lau eria.
Manatua: Ua le toe valaauina faifeautalai i ni misiona se lua.
I le: Au Pulega Aoao; Au Peresitene Aoao o Faalapotopotoga; ma taitai nei i le Iunaite Setete ma Kanata: Fitugafulu Eria; Peresitene o Siteki, Misiona, ma Itu; Epikopo ma Peresitene o Paranesi
Uso e ma Tuafafine Pele:
Misiona o Auaunaga mo Faifeautalai Talavou (Na o le I.S. ma Kanata)
Ua folafola mai e le Alii, “O le mea lea, afai o ia te outou le manao e auauna atu i le Atua ua valaauina outou i le galuega” (Mataupu Faavae ma Feagaiga 4:3). O le auauna atu i le Alii o se faifeautalai o se avanoa faamamaluina, ma le paia lea e aumai ai faamanuiaga e faavavau i tagata taitoatasi ma i latou o loo ia auauna i ai.
Ua tele tausaga, o auauna atu ma le totoa ia alii ma tamaitai talavou e i ai se manao e auauna atu i se misiona ae e le mafai ona faia ona o mafuaaga tau i le soifua maloloina, i nuu ma faalapotopotoga eseese a le Ekalesia. Matou te faafetai tele mo la latou auaunaga ma e matou te fiafia e faasilasila atu ia avanoa ua faateleina mo faifeautalai talavou o e i ai faigata tau i le soifua maloloina.
E amata atu i le aso 2 Ianuari, 2019, o le a faaaoga ai e talavou uma e talosaga e faamisiona le faagasologa i luga o upegatafailagi e fautuaina atu ai. I lalo o le taitaiga a le Au Peresitene Sili ma le Korama a Aposeolo e Toasefululua, o faifeautalai faaolioli taitoatasi e agavaa, o le a mauaina se valaauga e sili ona fetaui mo ia.
O le folafolaina atu o le talalelei e faapotopoto ai Isaraelu ua faataapeapeina o le a avea pea lava e le aunoa ma faamoemoega autu o le auaunaga faafaifeautalai, o lea o le a valaauina ai e le Alii, e ala atu i Ona taitai, le toatele o tagata autalavou e saili, aoao atu, ma papatiso tagata liliu mai. O isi, e le mafai ona auauna atu i lea auala, e mafai ona valaauina e auauna atu i le Alii o se faifeautalai o auaunaga. E faaopoopo atu, o faifeautalai e vave ona toe taliu mai i le fale mai se misiona tala’i ona o mafuaaga faaumiumi o le soifua maloloina, e mafai ona toe tofia e auauna i le Alii o se faifeautalai o auaunaga. O nisi tagata e talosaga, faatasi ai ma lo matou agaga talisapaia o lo latou manao e auauna atu, e mafai ona faapafala mai ma le mamalu mai soo se auaunaga aloaia faafaifeautalai.
Mo nisi faamatalaga, faamolemole iloilo le pepa o faamatalaga ua auina faatasi atu ma anomea i le churchofjesuschrist.org/service-missionary.
Matou te tatalo ia faaauau pea ona faamanuia atu le Alii i alii ma tamaitai talavou lelei i le Ekalesia atoa o e alolofa ia te Ia ma mananao e auauna atu.
Ma le faaaloalo lava, O Le Au Peresitene Sili