31 Iulai, 2022, Aso Sa Lima – Faasoaina Atu o le Talalelei (50 minute)

Vaaiga Aoao 

O le faamoemoega o lenei fonotaga o le iloaina lea ma talanoaina faatasi o le olioli ma faamanuiaga e sau mai le faasoaina atu o le talalelei a Iesu Keriso. Ia taulai atu le fonotaga i faamoemoega nei e lua:

1. Fesoasoani i alii talavou taitasi ia saunia ma auauna atu i se misiona, ma fesoasoani i tamaitai talavou taitasi o e mananao e saunia ma auauna atu i se misiona.
2. Fesoasoani i tagata taitasi e faasoa atu le talalelei a Iesu Keriso i auala masani ma faalenatura e ala i le faatinoina o mataupu faavae o le alofa, faasoa, ma le valaaulia.

Mulimuli i le taitaiga a le Agaga a o sauniuni. Aoao atu i se auala e faamalosiau ai i tagata o lau uarota po o le paranesi ia auai i le talanoaga, aemaise lava le autalavou. O le auivi lenei ua tuuina atu mo lou faaaogaina e sauniuni ai. Sii mai le PDF

O Lo Tatou Tiutetauave Faalefeagaiga ma le Faamanuiaga e Talai Atu le Talalelei o le Filemu (10 minute)

Amata le sauniga i le faaali atu o le kilipi lenei mai le saunoaga a Peresitene Russell M. Nelson i le konafesi aoao talu ai nei.

Fesili mo le talanoaga (5 minute): 

• O le a se mea na e aoaoina po o a ni uunaiga na e maua i le taimi o le savali a le perofeta?
• Aisea e taua tele ai i le Alii le faasoa atu o le talalelei?
• O le a sou lagona e uiga i le saunoaga a Peresitene Nelson e uiga i le faamoemoega o le Alii mai le tupulaga faia’e e faatatau i le auaunaga faafaifeautalai?
• O le a se mea e mafai ona tatou faia faaletagata lava ia faapea ma le au paia atoa e ausia ai mea ua faamoemoeina e le Alii mai ia i tatou e faatatau i le faasoaina atu o le talalelei?

Sauniuniga mo le Auaunaga i se Misiona Faafaifeautalai (10 minute)

O le kilipi vitio nei mai ia Peresitene M. Russell Ballard ma Elder Quentin L. Cook o loo faasoa maia ni auala e mafai ai e le autalavou ona saunia patino ai le tagata lava ia mo le auaunaga faafaifeautalai ma le auala e mafai ai e aiga, uo, ma taitai o le Ekalesia ona maua se tosinaga lelei.

Fesili mo le talanoaga (5 minute): 

• E mafai faapefea ona fesoasoani le aiga, taitai, ma uo i tamaiti ma le autalavou ia saunia ma auauna atu?
• O le a se mea o e faia o se talavou e mulimuli ai i le faatonuga a le perofeta ia saunia mo le auaunaga faafaifeautalai?
• E mafai faapefea e oe o se talavou ona fesoasoani i au uo ia saunia e auauna atu?

O Faamanuiaga o le Auaunaga Faafaifeautalai (8 minute)

I le vitio lenei, o loo faasoa mai ai e Peresitene Ballard lona aafiaga patino e uiga i le filifili e auauna atu i se misiona faafaifeautalai o se alii talavou ma faamanuiaga na ia maua o se taunuuga.

Fesili mo le talanoaga (5 minute): 

• Mo i latou na auauna atu i ni misiona, ua faapefea ona faamanuiaina lou olaga i lena aafiaga?
• O le a se mea o outou tulimatai atu i ai—o ni talavou ma ni tagata matutua—i le taimi o lau auaunaga faafaifeautalai?

O Isi Mau ma Punaoa 

• Mataupu Faavae ma Feagaiga 18:13-16 ma le 62:3
• 3 Nifae 18:24–25
• Tusitaulima Aoao mataupu 24 

Alofa, Faasoa, Valaaulia (16 minute)

O faamanuiaga ma le olioli o le galuega faafaifeautalai o loo avanoa mai ia i tatou taitoatasi. E faamanuiaina tagata uma o le Ekalesia pe a tatou [faia]—i ni auala masani ma faalenatura—e alolofa atu i le Atua ma o tatou tuaoi; faasoa atu le talalelei o se faaopoopoga o lo tatou olaga patino, faaleaiga, ma faaleekalesia; ma valaaulia isi ia o mai ma vaai, o mai ma fesoasoani, ma o mai ma auai. O le faasoaina atu o le talalelei e aumaia ai le olioli ia i tatou, i le Alii, ma i isi; e aumai ai le Agaga ma le mana o le Atua e sili atu ona taumasuasua i o tatou olaga (Mosaea 18:10, Ioane 15:4-5); e puipuia i tatou mai faaosoosoga (3 Nifae 18:24-25); ma e aumaia ai le faamalologa ma le faamagaloga o agasala (Mataupu Faavae ma Feagaiga 62:3).  

O vitio nei mai ia Elder Quentin L. Cook ma Elder Gary E. Stevenson e faamalamalama ai nei aoaoga.

Fesili mo le talanoaga (10 minute):

• E faapefea e le faasoaina atu o le talalelei ona aumaia i tatou ia latalata atili ia Iesu Keriso?
• E mafai faapefea ona e faaaofiaina isi i se auala masani ma faalenatura i lou olaga e faatotonugalemu-ia-Keriso?
• E mafai faapefea e le tatou uarota po o le paranesi ona fatuina se siosiomaga lea e faigofie ai ona alofa, faasoa, ma valaaulia?

O Isi Mau ma Punaoa 

• Mataio 28:18–20 
• Tusitaulima Aoao mataupu 23 

Saunoaga Faaiu, Valaaulia, ma le Molimau (2 minute)

• Valaaulia le vasega e iloilo ma le agaga tatalo pe faapefea ona fesoasoani le tasi i le isi aemaise lava le autalavou ia saunia mo le auaunaga faafaifeautalai.
• Valaaulia taitai o le uarota ma le au paia ia auauna atu ia i latou e lei faalogo lava i le savali a le perofeta.
• Valaaulia le autalavou ia saunia mo le auaunaga i se misiona ma ia valaaulia a latou uo ia faia foi faapena.
• Valaaulia tagata uma ia mataalia i le alofa, faasoa, ma valaaulia i latou o siomia i latou i ni auala masani ma faalenatura.
• Ia molimau atu i le talalelei toefuataiina ma le olioli o le faasoaina atu i isi.