Vakavulici na Lotu vei ira na Tabagone kei na Tabagone Qase - Vosa e Liu
Peresitedi Dallin H. Oaks
Tikina 1
Kemuni na taciqu kei na ganequ lomani,
E ka dokai vei keirau me tiko ena soqoni oqo ni qasenivuli ni semineri kei na inisitute kei na qasenivuli ni lotu ena noda vei univesiti kei na koliji. Keirau marautaka na nomuni tomani mai vei ira na watimuni, era sa tiki bibi sara ni nomuni ilesilesi tabu vaka qasenivuli. Keirau bolei ni keirau mai vosa vei kemuni ena gauna matalia ka dredre oqo—ni ravuti vuravura tiko edua na mate dewa.
Me vaka sa vakasalataka oti vei kemuni o Komisina Paul V. Johnson, ni oti na noqu idolavosa lekaleka, ena rua tiko na iwase duidui ni noda veivosaki ena vo ni parokaramu.
Au tekivu ena noqu vosa baleta na kaukauwa ni loloma. Na cava na vuna e sa imatai kina ni ivakaro levu duadua na lomana na Kalou? E imatai baleta e yavutu ni kena kilai matata ka muri na ituvatuva ni Kalou kei na Nona ivakaro vei ira na luvena. Na noda lomana na Kalou kei na Nona loloma vei keda e uto ni ivakavuvuli ni kosipeli, ebibi ena noda vakayarayarataki keda kei na ka e dodonu meda na nanuma tiko. Na Kalou e lomani iko ni ko sa Nona qasenivuli. O ira na Nona iliuliu era lomani iko ni ko sa qasenivuli ni Nona ituvatuva kei na Nona vosa. Ka lomani ira na nomuni gonevuli. E na vica na yabaki sa oti a vosa vei ira na qasevuli o Elder Gordon B. Hinckley: “E sega ni dua tale na sala vinaka ni kena vakaraitaki na loloma vua na Kalou ia ena kena vakaraitaki ga na loloma vei ira na luvena, vakabibi vei ira … era mai vuli veikemuni.”1
Rauta ni 80 na yabaki sa oti e mate kina o tamaqu. Na cava au nanuma vinaka me baleta na neirau veimaliwai? Nona ivakavuvuli? Nona dau vakadodonutaki au? Sega, au nauma vinaka tu nona daulomani au.
Me vaka, au vakabauta o ira tale ga na nomuni gonevuli era na nanuma vakalevu cake na veika era vakila me baleta nai tovo ni yalomuni vei ira. Era na nauma na sala o dau vukei ira kina ena yaloloma mera vulica na kosipeli, mera vakila na veivakauqeti ni Yalo, ka bulataka na kosipeli ena nodra bula. Na loloma sai koya na kaukauwa ka vakauqeti keda meda veivakatavulici.
Sa oti oqo e 70 na yabaki mai na noqu a gonevuli ena semineri. Na cava au nanuma vinaka baleti rau na noqu qasenivuli e rua e Vernal, Utah? Au sega mada ga ni nanuma rawa na lesoni ena kalasi au taura, ia au nanuma rawa ni rau a lomani au ka kauwaitaki au.
Na loloma e tiko kina na kaukauwa: na kaukauwa me kilai kina na Veisorovaki i Jisu Karisito, na kaukauwa me kilai kina na ituvatuva ni veivakabulai, kei na kaukauwa me vakamacalataki kina na ivakaro ni Kalou.
Kevaka eda na sega ni kila vinaka na loloma, na veika tale eso baleta na kosipeli ena cakitaki se vakamalumalumutaki ena veitemaki i vunica kei na kaukauwa ni veika vaka vuravura kei ira na tamata era wavoliti keda.
Nai karua ni noqu ulutaga sai koya na nomu veiwekani kei na lesoni vakosipeli o vakavulica.
Ena vakavulici ni lesoni e sega ni vakalotu, e dau matau ka dau vakatarai vakawasoma vei ira na qasenivuli mera okati ira mera kenadau ena lesoni ka vakatavulici. Oqo e sega ni vakatarai ena vakavulici ni vei ivakavuvuli vakalotu. Eda sega ni noda na iotioti ni lewa ena kosipeli i Jisu Karisito. Na Yalo Tabu e dua na Lewetolu Vakalou, e nona na iotioti ni lewa, ka nona itavi me vakadinadinataka na Tamada kei na Luvena ena nona tuberi keda ki na dina. E vakararamataka na veika eda vakavulica. Me vaka ni da sega ni vakataki ira na qasenivuli ka vakavulica na lesoni e sega ni vakalotu, sa dodonu kina meda na kua ni dokadokai keda ena dua na noda vakasama ka vaqaqacotaka na veidina lelevu ni kosipeli. E dodonu meda na kua ni vakayacora e dua nai valavala e loma ni rumu ni vuli se e taudaku ka na veisaqasaqa kei na ivakaraitaki se ivakavuvuli ni noda iVakabula ko Jisu Karisito. E dodonu meda na kua ni vakacacana na lesoni eda vakavulica ena noda ile ena inaki meda qoroi kina.
Eda veivakavulici ena noda loloma vua na Tamada mai Lomalagi kei na Luvena ko Jisu Karisito kei na loloma vei ira na luvena, sai ira na noda gonevuli. Eda vakayavalati ena noda gagadre me tosoya cake na nodra i gu me rogoca ka muri Koya na noda iVakabula.
Au vakadinadinataka na noda iVakabula o Jisu Karisito, ka masuta na Nona veivakalougatataki me tiko kei keda ni da toso tikoga ki liu, ena yacai Jisu Karisito, emeni.