Vakavulici na Lotu vei ira na Tabagone kei na Tabagone Qase - Veivosaki Raraba
Veivosaki Wase e II– Peresitedi Oaks, Chad Webb, Adam Smith
Peresitedi Dallin H. Oaks: Brother Webb, ka marautaki me tiko vata kei iko. Brother Smith. Me datou sa toso sara yani.
Brother Chad Webb: Io, vinaka vakalevu. Keitou marautaka ni keitou tiko vata kei kemuni nikua. Vinaka vakakalevu na itukutuku totoka o ya. Na kena dina, na vakarorogo ki na nomu ivakasala sa vakavurea e vica na taro ka keitou gadreva me da veitalanoa kina. Ni da tekivu ena kena oqo, ni da tukuna tiko baleta na loloma me baleti ira na noda gonevuli, ka tiki ni noda lolomi ira na noda gonevuli o ya na vakatavulici ira ena kosipeli ka vukei ira me kila vakavinaka na veika ena yaga vakalevu sara. Eda na vakadeitaka vakacava ena veika duidui kece e rawa ni da vakavulica, ni da vakaliuca na veika talei vakalevu sara vei ira na noda gonevuli?
Peresitedi Dallin H. Oaks: Na ka e duatani duadua kina na noda iVakarau ni Vuli ni Lotu sai koya na noda itavi vakayalo me vakasaqarai na kila ka sega walega ena vuli, ia ena vakabauta talega.
Brother Adam N. Smith: Niu vakananuma na veika kece eda rawa ni vakavulica vei ira na noda gonevuli ka na yaga vakalevu sara, au dau dusimaki mai na dua na ivakavuvuli nei Peresitedi Eyring kau gadreva meu wasea. E kaya o Peresitedi Eyring, “Mai na dina taucoko ka rawa me vakamatatataki ena iwase ni ivolanikalou oqo, na kena cava na vukei ira na noqu gonevuli me na toro voleka vua na Tamada Vakalomalagi kei na iVakabula ka veimuataki yani ki na veivakabulai?” A qai kaya tale o Peresitedi Eyring, “Ni o vakarautaka e dua na lesoni, vaqara kina na ivakavuvuli ni saumaki. … Na ivakavuvuli ni saumaki sai koya e dua ka na veimuataki ki na talairawarawa ki na lewa ni Kalou.”1 Na ka au taura rawa mai na ivakavuvuli cecere oqo mai vei Peresitedi Eyring o ya ni veika ka na talei vakalevu vei ira na noda gonevuli ena semati ira ena sala vakatamata yadua kei na sala e vakayaco ka vua na Tamada Vakalomalagi kei Jisu Karisito. Eda na gadrevi me vakavulica na veika ka na vukei ira na noda gonevuli mera vakila ka kila matata na vei dina ni kosipeli, ka vakauasivi na dina me baleti Jisu Karisito kei na Nona Veisorovaki kei na Tucaketale—ka vukei ira me vakila na veisala vakarautaki eso, ni tiko vei Jisu Karisito na kaukauwa me veivakabulai ka veivuke ka veivakacegui ka vakasavasavataki ira. Au nanuma oqori na veika bibi duadua eda rawa ni vakanamata kina.
Peresitedi Dallin H. Oaks: Kaukauwa ka dina.
Brother Webb: Vinaka vakalevu. Ka sema vakavinaka kei na vakasama me ra raici matua me ra vuli ena vakabauta—era cakacaka ena vakabauta ka rawata na veivakadeitaki mai vua na Yalo Tabu ni veika era vulica ka bulataka tiko e lako dina mai vua na Tamada mai Lomalagi. Vinaka vakalevu. Peresitedi, o ni a tukuna talega na itavi ni Yalo Tabu ena noda veivakavulici. Io au na vinakata meu taroga na ikuri ni dina me baleta na Yalo Tabu kei na Nona veivakayarayarataki kei na itavi ena loma ni kalasi o ni via wasea vei keimami.
Peresitedi Oaks: Au nanuma ni idola ki na veivakauqeti ni Yalo Tabu sa ikoya na vakaivotavota ena sakaramede. Baleta e tiko e dua na yalayala ena veiyalayalati eda vakayacora ni da vakayagataka na sakaramede me “tiko ga kina kei [keda] na Yalona.” O ya e ka bibi.
Brother Webb: Kila, au taleitaka ni o ni tukuna o ya. Au nanuma sara na gauna au a se qasenivuli gone kina, au a vakayagataka e vica na vula meu vulica na ivakavuvuli e vakalawataki tu baleta na sureti ni Yalo Tabu. Kau vakabauta ni oqori e dua na madigi vinaka sara ka dodonu me da tomana kena vakavuvuli. Ia na ka bibi duadua au raica sai koya na veika o ni se qai cavuta toka ga oqo: ni masu ni sakaramede e kaya ni kevaka eda na dau nanumi Koya tikoga, ena tiko vata kei keda na Nona Yalotabu. Oqori e sega ena gauna ni sakaramede se Sigatabu walega, ia e veigauna—oka kina ena noda valenivuli. Ke da vakanamata vua noda iVakabula—ni da dau nanumi Koya ni sa ivakaraitaki ni kena bulataki na kosipeli ka rawata na Nona kaukauwa kei na Nona ivakavuvuli—ni da dau nanumi Koya, eda na sureta na Yalo Tabu me tiko ena noda vuli-ka. Ena noqu vakasama na itavi se ilesilesi bibi duadua ni Yalo Tabu o ya me vakadinadinataka na Tamada Vakalomalagi dauloloma kei Jisu Karisito ni sa iusutu ni yavu nei Tamada Vakalomalagi. O koya gona ke da via sureta na Yalo Tabu ki na noda vei rumu ni vuli, me da vakanamata ki na veika ena vakadinadina kina o Koya. Au taleitaka o ya. Vinaka vakalevu.
Peresitedi Oaks: Ka tokona o Peresitedi Nelson ena veivosa oqo na bibi ni veika oqori. A kaya, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, kei na veivakacegui tudei ni Yalo Tabu.”2
Brother Webb: Vinaka vakalevu. Ia, au marautaka dina na veika sa cavuti oti, ka muataki au meu taroga na taro oqo: Edatou sa vosa oti vakalailai me baleta na cava era vakaliuca na qasenivuli ena sala ka na sureta na Yalo Tabu. Eda na vukei ira vakacava na noda gonevuli me ra vakaliuca na veika e bibi duadua ena nodra bula?
Peresitedi Oaks: Niu vakasamataka na ka oqori ena noda gauna oqo ena levu ni veivakayarayarataki vakavuravura e solegi keda tu kei ira noda gonevuli, au nanuma ni gadrevi meda nanuma ni veika ni vuravura—na veika e vakamareqeta ko vuravura, se cava ga o ya—e vakaicavacava na kedra vakamareqeti. Ena yaco na gauna, era sa na sega soti ni bibi vakalevu cake mai na vei ivakavuvuli ka gadrevi me vulici kina na inaki ni bula oqo kei na noda icavacava tawamudu. Na cava o rawa ni vakuria kina, Brother Smith?
Brother Smith: Peresitedi Oaks, ni o ni vakavulica tiko o ya, e basika vei au edua na tiki ni ivolanikalou, ni bera ni curu ki Kecisemani na iVakabula, a cavuta edua na masu tabu, ka kaya o Koya, “Ia sai koya oqo na bula tawamudu, me ra kilai kemuni na Kalou dina duadua ga, kei Jisu Karisito o koya ko ni a tala mai.”3 Au nanuma ke da vukei ira na noda gonevuli me ra kila vinaka na ka era gadreva me ra vakatulewataka kina kei na vanua me ra vakayagataka kina nodra gauna kei na vanua mera vakanamata kina vakalevu, ena vukei ira beka na ka oqo mera mai kila ka lomana na Tamada Vakalomalagi kei Jisu Karisito? Kei na dua tale na vakasama au semata kei na kena o ya sai koya edua na ka o ni a vakavulica ena dua na koniferedi raraba sa oti, Peresitedi Oaks, o ya me tarogi na taro, “Ena veimuataki ki vei na ka oqo?” Kei na vakasamataki ni taro o ya ena kena vakasama “E tuberi au tiko beka vakavoleka na ka oqo ki vua na Tamada Vakalomalagi kei Jisu Karisito? E tuberi au tiko beka na ka oqo meu rawata na kequ ituvaki se inaki vakalou” Kau nanuma ni oqo e vakarautaka vei keda edua na vulo kaukauwa. Ka na rawa me da vukei ira na noda gonevuli me ra kila vinaka talega na vulo oqo ni ra digitaka na vanua era vakayagataka kina na nodra gauna, kei na ka era sarava se vakarogoca se raica. E dodonu me ra na cakava kina na nodra digidigi vakataki ira. Kevaka eda rawa ni vukei ira me ra taroga, “Ena veimuataki beka ki vei, ena tuberi au beka vakavoleka na ka oqo vei Tamada Vakalomalagi kei Jisu Karisito?”
Peresitedi Oaks: Io, sa ka bibi sara oqori, ka na yaga vakalevu sara mera kila vinaka na ivakavuvuli oqori o ira kece na noda gonevuli.
Brother Chad Webb: Ka vakakina na nodra vakabibitaka ka vakadinadinataka na qasenivuli na veika kece ka na sureta na Yalo Tabu me vakadeitaka na bibi—sega walega na kena dina, ia na bibi ni vei ivakavuvuli o ya ki na nodra dui bula. Au via tomana talega, ke rawa, na vakasama ni veisemati. Au vakananuma na veika kece eda rawa ni cakava me veivuke me sureti ira na gonevuli me ra kunea na yaga ni vei ivakavuvuli oqori ki na nodra bula. Ena so na gauna au vakasamataka ni da dau veivosakitaka na veika oqo ena ivakarau eso ni veisisivi kei na nodra gauna se na kauwai. Kei na so na gauna sa dodonu meda vakaliuca na veika e talei sara vakalevu. Ia au nanuma ni da rawa talega ni vukei ira me ra raica na sala e veitokoni kina na kosipeli ki na nodra bula e veisiga. Me kena ivakaraitaki, au a vulica, niu a se gonevuli, ni kevaka au vakarokorokotaka na Sigani Vakacecegu, kevaka au vulica na ivolanikalou ni bera niu vuli lesoni, au raica niu a gonevuli vinaka cake mai na noqu a wasea na veika oqori ka kaya “Au na vakayagataka na gauna ena veika vakayalo, kau na qai vakayagataka na gauna ena veika vakavuravura.” Ia ena vei gacagaca kece ni noqu bula, niu okata kina na Tamada Vakalomalagi—niu sureta na Yalona me vukei au—ia na veika ka rairai vei ira na noda gonevuli me vakayago na kedra ituvaki, era raica kina na yaga ni kosipeli ena veika era saga me ra rawata ena nodra bula. Era na sega ni veisugusugutaka na nodra gauna, ia era na cakacaka vata.
Peresitedi Oaks: E da nanuma tiko na Turaga e vakavulici keda ni o Koya e sega ni solia e dua nai vakaro vakayago. Na Nona ivakaro kece kei na Nona veidusimaki e ka vakayalo.
Brother Smith: E dua tale na vakasama e basika mai vei au ni o ni cavuta tiko na ka o ya—vei ira sara ga na noda gonevuli ni semineri—sai koya na parokaramu ni Lotu ni iTabagone kei ira na Gone. O ya e dua na sala kaukauwa me yaco na kosipeli me yaga ka bucini eso na lalawa me bulataki kina na kosipeli me vukei keda ena tiki cava ga ni noda bula ni da tovolea me ucui Koya vakalevu cake na iVakabula.
Peresitedi Oaks: Dina sara. Oqo, au via taroga e dua na taro vei rau e rua na turaga ka kenadau ena vakatavulici ni veika vakalotu: Na cava drau sa vulica na veitacini kei ira na nomudrau ilawalawa baleta na vakavulici ni kosipeli i Jisu Karisito ena gauna ni matedewa raraba ka da lako curuma tiko oqo?
Brother Smith: Au na tukuna ni da sa vulica taumada—se eda sa vakananumi, ka sa vakabibitaki—o ira na qasenivuli totoka ka ra tiko vei keda, ka ra lomana dina na Kalou kei ira na gonevuli ka cakava na ka e sivia na ka e namaki vei ira ka da sa vakavinavinaka kina vakalevu. Au nanuma talega ni matedewa raraba oqo e sa mai vakavotuya cake na gacagaca ni veiqaravi ka tiko ena vakatavulici ni kosipeli. Au kila ni da sa vinaka cake ena noda rogoci ira na noda gonevuli, ena noda kila na nodra gagadre kei na igu ka sotava vakakina, ka lomani ira ena kedra ituvaki era tiko kina, ka vakavurea eso na sala vou me vukei ira me toro voleka vua na Tamada Vakalomalagi kei Jisu Karisito. Au nanuma talega ena gauna ni matedewa raraba ni levu mai kina na dredre, eda raica na veivuke vakalou ni vukei ira na qasenivuli ka segata dina me ra lomana na Kalou kei ira nodra gonevuli ka cakava na nodra vinaka taucoko.
Brother Webb: Au nanuma ni sa tukuni vakavinaka sara oqori. Au nanuma meu na kaya vinaka vakalevu ka vakaraitaka na noqu marau. O ni kila, ni tiko eso noda qasenivuli era tovolea me ra veivakavulici e matanavotu ka vulica me ra veivakavulici vakakina ena initaneti. Era daramaka na matavulo ka so na gauna e sa dau logalogaca. Era sotava na dredre ena so na gauna ka ra sa cakava sara ga ena dela ni loloma levu vei ira na nodra gonevuli kei na Tamada Vakalomalagi ena yalodina cecere vakaoqo. Au gadreva meu cavuta ga na vakavinavinaka vakalevu vei kemuni ena vuku ni solibula kei na sasaga taucoko mo ni cakava kina ena loma ni gauna dredre oqo.
Peresitedi Oaks: Au duavata, ena vukudratou na Mataveiliutaki Taumada, ena vakavinavinakataka na veika o ni se qai vakaraitaka toka oqo. Keitou lomani kemuni na veitacini kei na veiganeni ko ni veivakatavulici ena noda semineri kei na inisitute ni lotu ena univesiti kei na koliji.
Brother Webb: Vinaka vakalevu; oqori e veivakauqeti sara vakalevu. E dua tale na taro kau marautaka meu taroga vei kemuni ena vuku ni veika o ni sa vakavulica oti ena ituvaki eso: Na cava e bibi kina meda vakatavulica na ivakavuvuli ka sega na ivakaro?
Peresitedi Oaks: Au marau ni o taroga na taro oqori. Oqo e dua na noqu taro taleitaki. Ena dua na kolomu kilai levu ena iTukutuku ni Lotu, e kaya oqo o Tad R. Callister, na noda peresitedi vakacegu ni Wilivola ni Sigatabu, me baleta na ulutaga o ya: “Taumada na ivakaro e yalani ki na dua se ki na vica ga na ituvaki vakatabakidua, ia na ivakavuvuli e raraba na kena rawa ni vakayagataki. Kena ikarua, na ivakavuvuli e vakavurea na ituvaki ka vakalevutaka na galala ni digidigi ia na ivakaro e vakalailaitaka se yalana, ka so na gauna e dau vakatulewataka sara ga na noda digidigi.” Au na tomana kina ni iVakabula e a vakaisosomitaka na Lawa i Mosese, ka cakacaka ena ivakaro, kei na lawa cecere cake i Karisito, ka cakacaka ena ivakavuvuli. E a vakamatataka o Baraca Callister na ivakavuvuli o ya me vakaoqo. E kaya: “Na ivakavuvuli erau salavata kei na lawa cecere, na ivakaro kei na lawa lailai. E dodonu me da vakanamata ena vakatavulici ni ivakavuvuli ni i vunau. Baleta na cava? Baleta na ivakavuvuli e tiko kina na kaukauwa me laveti keda ki na veiyasana cecere vaka silesitieli, ka kena iotioti, na ivakavuvuli—sega ni ivakaro—ena vakatulewa ena matanitu vaka silesitieli.”4 Oqori na itinitini ni vosa cavuti.
Brother Webb: Au marautaka vakalevu talega oqori. E tiko tale e dua na kena yaga. Au a tiko kei na dua na ilawalawa qasenivuli ena dua na gauna lekaleka sa oti ka ra tukuna vei au ni ena nodra kalasi e vaka me tiko vakalevu cake—na vosa era vakayagataka na “veileti” ena nodra taroga na gonevuli e levu na taro ka duidui kina na nodra rai kei na vakasama. Kau taleitaka na veika o se qai vakavulica baleta e kauti au lesu ki na dua na veitalanoa ka vukei au meu kila ni dua na sala mo walia kina oqori o ya mo kua ni vakatavulica na kena vakayagataki, era na veileti kina ena nodra vakayagataka ena ituvaki era dui sotava yadua, ia me vakavulici ga na ivakavuvuli ni kosipeli. Ki na kena taumada—vakavulici ni ituvatuva ni veivakabulai, vakavulici na ivunau i Karisito, vakavulici na ivakavuvuli ni kosipeli, ka vakatarai na kena bulataki vakayadua ena veivuke ni Yalo Tabu.
Peresitedi Oaks: Sa matata dina.
Brother Webb: Au nanuma ni oqori e rawa ni caka dina ka na veivuke ki na veika eda via cakava tiko, Peresitedi. Vinaka vakalevu. Brother Smith, o ni via vakuria e dua na ka e kea?
Brother Smith: Io, au nanuma ni tautauvata kei na ka ko ni a vakabibitaka, Baraca Webb. Kena ikuri, ena vakatavulici ni dua na ivakavuvuli ka sega ni kena vakayagataki, eda sureta kina e dua na gonevuli me cakacakataka nona galala ni digidigi ena gauna ni vuli, ena gauna ni nodra tubu vakai ira—me ra taura kina edua na ivakavuvuli ka vaqara nai vakatakila yadua, me ra qai laki vulica vakataki ira ka digitaka na ka vinaka duadua me ra cakava ni ra vakayagataka na ivakavuvuli ki na nodra vei ituvaki vakayadua.
Brother Webb: Vinaka vakalevu. Na taro rakorako me sala-muria o ya, “Ena veivakayarayarataki kece—ena veidomo kece e vuravura—eda na vukei ira vakacava na noda gonevuli me ra levea na veivakayarayarataki ka sa tu ena keda maliwa?”
Peresitedi Oaks: E gadrevi me da kila ni tevoro e tama ni ka lasu kecega—“ko koya na daulasulasu mai na ivakatekivu,”5 e tukuna na ivolanikalou. Na nona i vadi qaseqase duadua o ya me wakia vata na nona lasu kei na dina. O koya gona, e dreta mai ka vakacacana na nodra vakasaqaqara na tamata vinaka ena nona veiwakitaka na dina kei na lasu. Ka sa gadrevi kina, ena maliwa ni veika mareqeti duadua sa rawa meda tovolea meda vulica ena bula oqo na veivakavulici ni Yalo Tabu ka na vakatara vei keda me da kila na cava e dina—kei koya e—lasu.
Brother Smith: Ena dua na sala e tautauvata, ena loma ni veiwaki oqo ni dina kei na lasu, na vunica e vakatikitikitaka na dina mai na kena itutu tawamudu kei na kena tikina mai na ituvatuva ni Kalou. O ya e vakalevutaka kina na kena rawa ni vakayagataki cala se sega ni kilai vakavinaka kina na dina. Me kena ivakaraitaki, ena vica na miniti sa oti, Peresitedi Oaks, ko ni vakavulica vei keimami baleta na ivakavuvuli ni loloma kei na kena yaga ena ituvatuva ni Kalou—na bibi ni lomana na Kalou kei na lomana na wekada—na loloma o ya sai koya na kaukauwa veivakauqeti ka vakavuna vua na Tamada Vakalomalagi me gadreva me vakarautaki keda ki na bula tawamudu, ka da kila ni isolisoli cerecere duadua ni Kalou. Kei na noda lomana na Kalou sai koya e vakayacori keda me da lomani ira ka qaravi ira na tani e na yalo ni guilecavi koya. O koya gona, ena gauna ena kaliraka tani rawa kina o vunimeca na ivakavuvuli ni loloma mai kena itutu dina, sa na rawarawa kina me vakatanitaki. Ka kevaka edua e sega ni matata vua na ibalebale ni loloma ena rawa ni veitokoni ki na dua na ile cala. Era na rawa ni kunei ira ni ra saqata tiko na lawa ni Kalou kei ira na Nona parofita, baleta na tawasei ni dina mai na kena itutu tawamudu ena rawa ni veimuataki ki na kila-ka cala se vakasama vakatani. Ka dau vakayacora oqori na vunica ki na vuqa sara na ivakavuvuli.
Peresitedi Oaks: Eda raica e vuqa sara nai vakadinadina ni veika oqori ena vuravura ka wavoliti keda tu, se sega beka? Brother Webb, vaka qasenivuli, o ni na walia rawa vakacava na nodra taro na nomuni gonevuli me baleta na nodra kauwai ena gauna oqo me vaka na itukutuku makawa ni Lotu ka dau veivakaleqai, na veika baleti ira na mataqali vata na LGBT, na taro baleta na muri ni vakatulewa ni matanitu ena vuku ni matedewa raraba, kei na so tale? Na taro e sega ni vakaiyalayala. O na sauma beka vakacava na vei taro oqori ena vei ituvaki eso ena noda vei rumu ni vuli ni lotu?
Brother Webb: Oqori e dua dina na taro vinaka ka ra dau sotava vakawasoma na qasenivuli. Au na tekivu ena noqu kaya niu taleitaka na nona vakaroti keda nai Apositolo o Paula meda vakavulica se tukuna na dina ena dela ni loloma. E matata tu ni gadrevi vei keda meda vakatavulica na kosipeli. E gadrevi meda vakatavulica na ivolanikalou kei na nodra ivakavuvuli na parofita ni gauna oqo. E gadrevi me da vakatavulica na dina. Ena sega ni yaga ki vua e dua me vakatavulica na veika e sega ni dina; ni na sega ni veimuataki ki na marau. Ia ena yasa kadua—au nanuma ni oqori e ka bibi sara: ni tukuna o Koya me vakayacori o ya ena dela ni loloma, me vaka na nomuni cavuta tale ena bogi ni kua. Au nanuma kina ni na bibi me da tekivu ena veimaliwai. E levu na vakadidike e sa caka oti ka vakaraitaka vakamatata vei keda ni nodra vuli-ka na gonevuli, e vakatau vakalevu tiko ena veimaliwai. Ia vei au, na veimaliwai oqori e tekivu vei ira na qasenivuli era yalorawarawa me ra vakarorogo—me ra kilai ira vinaka na gonevuli kei na nodra vei ituvaki yadua ka tovolea me kila vinaka na nodra gagadre. Au nanuma ni sa bibi talega me kilai ni tamata yadua e tiko na nodra cau, ka da taleitaka—ni da veigadrevi vakai keda kei na veika eda dui sotava me da tautauri ka vuli mai kina. E levu sara na ka eda rawa ni tukuna baleta na taro oqo, kau taleitaka na taro. Ia vei au, me tukuni na dina ena dela ni loloma, ka kena ibalebale na veimaliwai ka vukea na tamata mera vakararavi ka vuli vata ka sureta vata na Yalo Tabu ki na veika era sotava.
Peresitedi Oaks: Na ka o tukuna baleta na veimaliwai e vakananumi au ena dua na vosa wiliki talei maivua na noda Peresitedi Raraba ni Cauravou, o Steven J. Lund, ena Koniferedi ni Marama e BYU wale tikoga oqo. A vakamacalataka—ni veimaliwai sai koya na kaukauwa me da veivakayarayarataki kina ena nodra bula o ira era vaqara tiko eso na tamata ivakaraitaki vinaka ka daunivakasala. E kaya ni o ira na noda dau ni vakadidike era sa kunea ni nodra tubu vakayalo na itabagone ni YDE e vakatau vakalevu ena ivakatagedegede ni nodra veimaliwai, vata kei nodra itubutubu, icaba vata, kei ira na qasenivuli. Kei na veimaliwai vata kei ira na iliuliu e susugi vakavinaka ena veikalasi ni semineri kei na Matawilivola ni Sigatabu kei na veikuoramu, na vanua era na doka ka lomani ira kina na nodra iliuliu kei ira na wekadra yalododonu.6 Oqori na itinitini ni vosa cavuti. Na veika kece oqo, meu tinia, e kena isoqoni na vakaitamera ni kena tokoni na bibi ni nodra lomani ka cakacaka vata kei ira na nodra gonevuli o ira na qasenivuli. Na veidinadinati ka tarai cake ena sala oqo ena dua na veivakayarayarataki veivakauqeti ka na vaqaqacotaki ira me ra sauma vakataki ira na vei taro dredre eso
Baraca Webb: Vinaka vakalevu. Io, au nanuma ni oqori na usutu ni ka eda tovolea tiko meda rawata: na tarai cake ni veiwekani. Mai na ka ko ni se qai wasea oti, eda rawa ni cakava eso na ka ena semineri me vukei ira me ra vaqaqacotaka na veimaliwai tale eso. O ni cavuta na parokaramu ni nodra tarai cake na itabagone. E rawa ni da dusi ira vei ira nodra iliuliu ni itabagone, ki na nodra bisopi, ki na nodra iliuliu ni Goneyalewa. Eda rawa ni veivuke me vaqaqacotaki na nodra veimaliwai vata kei ira nodra itubutubu ena sala eda veivosakitaka kina na matavuvale ka vagolei ira vei ira nodra itubutubu. Au nanuma kina ni veika oqori sa bibi sara—sega walega ena tarai cake ni noda veimaliwai kei ira, ia na vaqaqacotaki ni nodra veimaliwai kei ira na tamata ka ra na tuberi ira ena sala dodonu. Vinaka vakalevu na nomuni tukuna mai o ya. Ia oqo, de rawa meda veitalanoa vakalailai tale me baleta na sala eda na vakavulica kina na veiyavutu oqo ena sala ka na sega ni veivakacalai se vagolei ira tani kina itabagone mai na kosipeli. Ke rawa, meu na wasea edua na ivakaraitaki totolo me waqawaqa ni taro ka tiko ena noqu vakasama. Ena macawa se qai oti oqo, a qiriti au mai e dua na qasenivuli ka kaya ni dua na itubutubu e sa mai vakasukai luvena yalewa mai na semineri baleta ni a vakatavulica eso na ivakavuvuli baleta na matavuvale kei na kena bibi. Na itubutubu oqo e a mosi na yalona baleta na veisau ena kauta mai ki na nona matavuvale ka sega ni vinakata me vakavulici na gone ena i usutu ni tavi ni matavuvale—kei na kena isema ki na ituvatuva ni veivakabulai. E a rarawa vakalevu na qasenivuli oqo ni vakayalia na gonevuli oqo ka taroga na taro: “Au na vakatavulica vakacava na dina? Ena rawa vakacava meu na sotava oqo ena dua na vuravura ka da sega ni vinakata me biligi ira tani na tamata, ia meda vakavulica ga na dina ni kosipeli vei ira na noda gonevuli?”
Peresitedi Oaks: Sa dua dina na ivakaraitaki totoka. Brother Smith, na cava ko via tukuna me baleta na ulutaga o ya?
Brother Adam N. Smith: Io, au vakasama tale—au kila ni tou se qai veivosakitaka walega oqo na veimaliwai. Ia au nanuma ke dua na gonevuli e nuitaka e dua na qasenivuli—ka vakila ni lomani mai vei ira nona qasenivuli—era na dolava na yalodra. Ena so na gauna era na sega ni dau dolavi ira ke da vakavulica eso na vakasama ka sega ni tiki ni nodra bula. Ka dua na ka ena walia oqo o ya kevaka edua na gonevuli e lomana ka nuitaki ira na nona qasenivuli. O koya gona, sa ka bibi sara. Au via vakabibitaka na vakasama baleta na taro ka sa tarogi oti—o ya me tarai cake na veimaliwai kei ira na gonevuli.
Peresitedi Oaks: Dina sara. Au nanuma ni sa bibi sara vei keda meda kila ni da sega ni vakaukauwataki me da duavata kei na ka kece e biu e matada—se mai vua edua na gonevuli se itubutubu nei gonevuli se dua tale ena noda itikotiko. E sega ni noda itavi me da duavata kei na vei vakabauta kece e suguraki mai ena veituvaki ni vakasama vei keda. E sa vakacolati vei keda me da vakatavulica na dina. Ia ni da cakava oqori, meda qarauna sara me da kua ni levea na noda itavi, ka solia vei keda na iVakabula, o ya me da lomani ira na wekada. Na ka kece eda cakava me caka ena dela ni loloma me da kua kina ni veisaqasaqa kei na dua na tamata, ia me da solia na noda ivakavuvuli me kena ivakavuvuli, ka basika kina na vakabauta e cala. O Brigham Young, e dua ka dau veisaqasaqa, e a laveta cake e dua na vakasama vinaka kau a qai wilika wale tikoga oqo ena ivakavuvuli—se na vosa nei Brigham Young. Ena dua na nona vosa, a kaya kina—kau cavu vosataka: “E sega ni se veisautaka vakadua na itovo ni yaloqu vua edua na tamata, se turaga se marama, se ra vakabauta vata kei au se sega. E rawa ni o bula vaka edua na neiba vata kei au? E rawa vei au; kau sega sara ni kauwaitaka se o vakabauta vata kei au se sega.”7 Oqori na itinitini ni cavu vosa mai vei Brigham Young. Au vakasamataka ni o ya edua na ivurevure sega ni namaki me vakaraitaki mai kina na dina ni rawa vei keda me da veilomani kei ira eda sega ni duavata.
Brother Webb: Io, oqori e yaco mai ena gauna donu vei ira na noda qasenivuli ni kua. E dua vei ira na itovo bibi, au nanuma, me tiko vua e dua na tisaipeli ni iVakabula ni kua: o ya me rawa ni kua ni duavata ka tomana tiko me lomani ira na tamata ka dinata na veimaliwai o ya dina ga ni tu na duidui ni vakabauta.
Peresitedi Oaks: E dua tale na tiki ni ka o ya sai koya ni gadrevi meda cakacaka baleta na noda loloma kei na veiciqomi—na noda veimaliwai vata kei ira eda ilawalawa vata era vakayacora na ivalavala tawa savasava—me kua ni nanumi ni da vakadonuya. Oqori e dua na ka dredre me dau caka. Ka da raica ena vuravura ni polotiki kei na veitaratara raraba, mai na vuqa na ivurevure, na nodra sega ni duavata kina. Vakavuqa na tamata era dau nanuma ni da vakadonuya na ivalavala sega ni savasava baleta ni da lomani ira na tamata era vakaitavi kina.
Brother Webb: Oqo era sa veisemati vinaka dina, se vacava? E lesu tale ki na veimaliwai; e lesu tale ki na vakarorogo kei na veikilai yalo. Ia e lesu tale ga ki na vakatavulici ni ivakavuvuli. E lesu tale ki na ulu ni veivosaki sai koya na cava na vuna eda vakabauta kina na ka eda cakava tiko, yavutaki ena ituvatuva ni veivakabulai kei na ivunau i Karisito, ka semati ira vata na veika oqori ka lakova na laini mamare ko ni vakamacalataka.
Peresitedi Oaks: Kau nanuma ni semati lesu ki na imatai kei na ivakaro cecere me da lomana na Kalou, ka qai kaya na iVakabula, “kevaka ko sa lomani au, muria na noqu i vunau.”8 Kei na ikarua ni i vunau me da lomani ira na wekada. Na dina ni noda lomani ira na wekada e sega ni kena ibalebale ni da sega ni lomana taumada na Kalou ka muria taumada na Nona i vunau.
Brother Webb: Vinaka vakalevu.
Brother Smith: E tiko ena noqu vakasama na i yaloyalo ni dua na qasenivuli ka vosataka na dina ena dela ni loloma ka taqomaka na i vunau i Karisito ena yaloqaqa—ia e lomani ira talega na nona gonevuli, ka ra vakila ni ra taqomaki na nona gonevuli, ka ra nuitaka ka lomana na qasenivuli. Ka na rairai tiko beka e dua na gonevuli ena sega ni duavata kei na dua na tiki ni vunau i Karisito—se ivakavuvuli ni kosipeli e sala vinaka beka me tukuni kina—ia era gole tiko ga mai ki vuli. Ka ra gole tikoga mai ki na inisitute se semineri baleta ni ra vakila ni ra taqomaki, ka ra vakila ni ra rawa ni tara cake na vakabauti Jisu Karisito ena ituvaki o ya. Kau nanuma kina ni vakatulewa matau ka da gadreva me da yacova: me taqomaki ena yaloqaqa na dina ka lomani o ira ka ra sega beka ni duavata kei na dina, me rawa kina ni dua na vanua vinaka ni veitaqomaki vua edua na gonevuli, na rumu ni vuli se semineri se inisitute.
Peresitedi Oaks: Au gadreva meu kaya ni o kemuni o ni tiko ena vavakoso nikua ni veivakavulici kei veiliutaki tiko ena inisitute ena vei univesiti kei na vuli torocake, e tiko vei kemuni na bolebole levu ena ulutaga oqo. E vuqa vei ira na gonevuli matua cake era gadreva me ra vakasama ga vakataki ira ka rawa ni veirawai ni vakatauvatani vei ira na gonevuli ena semineri, me vakaoqo. Ia na ivakavuvuli e tautauvata ga. Ia e duidui ga na kena vakayagataki ka vakatau ki na ituvaki kei na matua ni bula ni tamata, ia na ivakavuvuli sa ikoya ga edatou veitalanoataka tiko.
Brother Webb: Vinaka vakalevu.
Peresitedi Oaks: Oqo e dua na taro ka veisautaka vakalailai na ulutaga, ia e yaga sara ki na noda gauna: E rawa vakacava me da vakamasuti ira na noda gonevuli me ra biuta vakatikitiki na nodra talevoni ena gauna eda tovolea kina me vakatavulici ira?
Brother Webb: Oqori e dua dina na taro vinaka ka semati ki na veileti ena kalasi se na sega ni duavata, baleta ena so na gauna oqori sara ga na ka ena vakavurea mai, dina? Se vacava Baraca Smith?
Brother Smith: Io, au nanuma ni dau tiko eso na gauna ni vuli-ka, ena gadrevi kina vei ira na gonevuli me ra biuta vakatikitiki kina na nodra talevoni. Na noqu nanuma ni ka vinaka duadua ena vukei ira me ra vakayacora o ya sai koya na veivakavulici e dreta na vakasama ka taleitaki. O Elder Ballard—se o Peresitedi Ballard—a tukuna vei keda ena dua na gauna me taleitaki na neimami veivakavulici. Ia au nanuma talega ena so na gauna e rawa me da sureta e dua na gonevuli me vakayagataka na nona talevoni ena gauna ni vuli. Ena vei ivurevure ka tiko ena ChurchofJesusChrist.org kei na Gospel Library app, ena rawa vei keda ena so na gauna me da sureta edua na gonevuli me vakaitavi ena vuli-ka ena vakayagataki ni veika ka tara cake na vakabauta ena nodra talevoni. Kau nanuma ni o ya ena veivakalougatataki—ka na mana sara vei ira e na taudaku ni kalasi—me ra raica kina na iyaya oqo e sega walega ni ka ni qito se ka ga ni veitarara ena vanua ni vakau itukutuku raraba—se vei ira tale eso, me ivurevure ni veitemaki. Ka rawa me ra vulica ena so na gauna, ni iyaya vata o ya e rawa ni vakayagataki me tara cake na vakabauti Jisu Karisito. Kau nanuma ni oqo ena taura na veiuqeti mai vua e dua na qasenivuli—kei na vakatulewa matau. Ia au nauma ni Turaga ena vukei keda me da kunea eso na madigi me tarai cake kina na vakabauta ena vakayagataki ni iyaya ka qai kilai talega na gauna me boko kina ka biu vakatikitiki.
Peresitedi Oaks: Na nomu vakatutu me kua ni saqati na vakayagataki ni talevoni e vakananumi au ki na dua na ka au a sotava—ena 10 se 15 na yabaki sa oti—niu a curuma e dua na kalasi ni Matawilivola ni Sigatabu ni cauravou kei na goneyalewa ena itaba yabaki ni semineri. Kau a curu yani ena vakasama ni sega ni taleitaka na talevoni. Ia niu rai wavoki e loma ni kalasi ka ra lewena e tinikarua na gonevuli, au raica ni dua ga vei ira kece ena loma ni kalasi e a vakayagataka tiko na ivolanikalou . Na kena vo era a wilika tiko na ivolanikalou ka muria tiko na lesoni ena nodra talevoni. O ya na gauna au sa qai raica kina ni oqo e sega ni ka ni vakatatabu ia e ka ga ni vakatulewa matau.
Brother Webb: Sa matata dina, vinaka vakalevu. Ia, Peresitedi, keitou taleitaka na tiko kei kemuni, vinaka vakalevu na nomuni ivakasala ni kua, ka keitou nanuma de rawa me tauri e dua na miniti, Baraca Smith mo ni liu, mo ni wasea na ivakadinadina cava ko ni vinakata, kau na qai vakayacora vakakina, ka qai soli na vo ni gauna vei kemuni.
Brother Webb: Vinaka vakalevu. Niu vakananuma na noda madigi tabu me vakavulici ira na itabagone kei ira era qase cake ena lotu, kei ira ena koronivuli ni VVL, au nanuma sara edua na ivakavuvuli mai vua na noda parofita lomani, o Peresitedi Russell M. Nelson. E kaya; “E levu vei ira na yalo vakaturaga duadua ni [Kalou]—na Nona timi uasivi duadua … beka …era a talai mai ki Vuravura ena gauna sara ga oqo. … [Era] sa maliwai ira na isakisaki ka se qai bau talai ira mai na Turaga ki na vuravura oqo.”9 Kau vinakata meu wasea na noqu ivakadinadina ni o ira na itabagone ka noda na madigi me da veimaliwai vata, sai ira sara ga ka tukuna tiko na parofita ni Kalou. Ka sa dua dina na ilesilesi tabu meda vakadinadinataka vei ira na dina kei Jisu Karisito kei na Nona Veisorovaki kei na Nona tucaketale. Kau vakadinadinataka ni kua na dina ni Veisorovaki kei na Tucaketale i Jisu Karisito; ni oqo na Nona Lotu; ni da sa liutaki mai vei ira na Nona parofita bula, daurairai, ka dauvakatakila; ka da sa oga tiko ena Nona cakacaka ni da vakatavulici ira tiko na itabagone ena ivakataotioti ni gauna. Au wasea vei kemuni na ivakadinadina o ya ena yaca i Jisu Karisito, emeni.
Brother Webb: Emeni. Au gadreva meu kuria ena noqu ivakadinadina ni bula tiko na Tamada Vakalomagi dauloloma kei Jisu Karisito na noda iVakabula ka Dauveivueti kei vuravura—ni oqo na Nona Lotu kei na Nona matanitu e Vuravura. Kau marautaka vakalevu meu vakayagataka na veisiga kecega ni noqu bula meu vakadinadinataki Koya ka vakavulici ira na tani ena Nona kosipeli. Au vakavinavinakataki ira vakalevu na vakavulici au ka vakalougatataki au ena nodra vakabauta kei na ivakadinadina baleta na iVakabula, kau marau meu tiki ni cakacaka oqo kei kemuni ena vakatavulici ni kosipeli vakalesui mai i Jisu Karisito. Kau via kaya vakatotolo niu vakasamataka na loloma ni Tamada Vakalomalagi, eda dau veitalanoataka vakavuqa na levu ni Nona lomani ira na noda gonevuli na Tamada Vakalomalagi. Ia au via tomana ga niu kila ni Tamada mai Lomalagi e lomani iko, ka marautaka o Koya ni o vinakata mo vakayagataka na nomu bula mo vakavulici ira na luvena, ka lomani ira na nomuni matavuvale o Koya, ka ni o tomana tiko mo veiqaravi ena yalodina ni vakavulici ira na luvena, ena vakalougatataki iko o Koya kei na nomu matavuvale ni o vakalougatataki ira na luvena ena nomu veivakatavulici kei na ivakadinadina kei na ivakaraitaki. Vinaka vakalevu na nomuni dui bula vakayadua kei na ka o ni cakava, ena yaca i Jisu Karisito, emeni.
Peresitedi Oaks: Emeni. Au tomana ena noqu ivakadinadina ki vei ira ka sa cavuti oti mai vei ira na italai totoka ni Turaga. Au vakadinadinataka na Tamana kei na Luvena, ena kaukauwa ni Yalo Tabu, ka oqo na Nona cakacaka, ka ko ni sa Nona italai, ka qasenivuli vata ni kosipeli i Jisu Karisito. Kau sa vatonaka kina na veivakalougatataki mai lomalagi vei kemuni ni o ni qarava na Turaga ka toso ki liu kei ira nomuni matavuvale ki na icavacava sa lesia oti tu na Kalou vei ira na luvena bula kilikili: na bula tawamudu. Kau vakayacora ena yaca i Jisu Karisito, emeni.
Taucoko: Emeni.