Vakavulici na Lotu vei ira na Tabagone kei na Tabagone Qase - iTini ni Veivosaki Raraba
Wase III: Veitalanoa DHO/KMO
Au marau meu mai tomani Kristen ena iotioti ni veiwasei oqo. O koya e bau dua ka kilaka vaka qasenivuli - oka kina e dua na yabaki ena BYU - a kaulotu, marama vakawati, ka vakamakubuni. Ena vosa tiko o koya mai na veika a lako curuma ka vakakina na nona vakawatitaka e dua na italai ni Kalou. Na neirau inaki eke oya me keirau vukei kemuni na qasenivuli ni lotu ka vukea talega na watimuni ena nodra veitokoni bibi.
SISTER OAKS:Peresitedi Oaks, au vakavinavinaka niu rawa ni mai tiko kei kemuni ena bogi nikua. Au vakavinavinaka niu rawa ni tiko kei ira na qasenivuli. Ni matataki ira era vakatavulica na kosipeli ka vakalougatataka noqu matavuvale. Keirau nanuma ni ko ni sa matalia dina. E vuqa vei ira na neirau itokani kei na neirau lewenivuvale era diva me ra vakaitavi ena cakacaka vaka qasenivuli o ni sa lesi kina ia e a sega ni soli vei ira na madigi oqo. Ia na kena dina oqo, keitou raica ni o ni a digitaki mai vua na Turaga mo ni veivakatavulici vei ira na luvena. Keitou kila ni oqo e dua na gauna dredre ni veivakavulici, na dredre ni veivakacurumi e koronivuli, na dredre ni bula raraba, kei na veisaqasaqa ni vakavuvuli dodonu kei na dina.
PERESITEDI OAKS: Ni na nanuma na noda a tekivutaka na noda veitalanoa ena kaukauwa ni loloma ena noda veimaliwai: noda lomana na Kalou, na Nona lomani ira na luvena, na noda veilomani vakataki keda, ka bibi duadua ena inaki oqo, na nomu lomani ira na nomu gonevuli. Keirau sa gole ena 2 ni wasewase ni veiwasei, ka veitalanoataki kina na veika me baleta na “Ena rawa vakacava meu vakatavulica na veika e vakamareqeta vakalevu cake?” kei na “Na cava e sa rui bibi kina meda vakatavulica na ivakavuvuli mai na lawa?” kei na “Eda na vukei ira vakacava na noda gonevuli mera ena nodra muataka na veivakasama kei na veika e vakamareqeta ko vuravura?”—ena loma ni veika oqo, me wasei na loloma vei keda kece.
SISTER OAKS: Au kila ni da tiko ena bogi nikua me rawa ni da qasenivuli vinaka duadua, oqo e dua na itaba ni tui ni ki a soli vei au. E tukuni toka kina, “Mo dina vei iko. Baleta era sa tauri kece na kenavo.” Oqo e dua na malanivosa mai vei Osar Wilde. Ena imatai ni gauna au a ciqoma kina, au a nanuma ni a sega soti ni marautaka. Ia, oqo sa ikoya e dua na vosa ni veivakacaucautaki cecere duadua me soli vei au, kau na solia vei kemuni.
Ena kena vakatavulici ni kosipeli, sa ikemuni saraga na digitaki ni Kalou. O ni sa dua na kena mataqali, e tiko vei iko na ivakarau, kaukauwa, kei na taledi e nomu duadua ga o iko. O ni sa tiko ena dua na itutu digitaki mo ni vorata kina na veisaqasaqa vakavuravura ka vakatavulica na dina tawamudu. Me vaka niu dua na itubutubu, ka budra na gone, kei na gauna qo au sa budra vakarua na gone, au sa nuitaki kemuni. Au sa nuitaki kemuni mo ni na vakavulica na noqu matavuvale ena ivakavuvuli dina ka me ra na taqomaki mai kina ena butobuto ka wavoliti ira. O ni na vakarautaka na isasabai mai na vunica, o ni sa isau ni noqu masu.
PERESITEDI OAKS: Keirau vakavinavinakataka na veigauna kece o ni vukei iratou kina na noqu matavuvale kei ira na itabagone ni Lotu me ra kila ka ciqoma ni ra sa luvena lomani na Tamada Vakalomalagi. Na iloloma levu duadua o ni na rawa ni solia vei keimami sa ikoya na nomuni vakatavulici ira na itabagone ena ivakavuvuli donu kei na dina tawamudu ka me na vakalougatataka na nodra bula - na dina era na rawa ni tautauri kina ni ra vakayacora e so na digidigi vakataki ira. Keirau vakabauta ni o koya oqo ena vakaiyaragi taki ira vinaka me ra sotava na bolebole vakavuravura.
SISTER OAKS: Na neirau vale e tiko veibasai kei na Valetabu e Salt Lake. Ena gauna oqo, e caka tiko na taravale. E ra bini ena veiyasana na iyaya ni kaba vakamatai, na lori lelevu, kei na misini balavu me vakarewa-taki yaya. Na valetabu esa voleka ni sega ni laurai rawa. Ia e cakacakataki tiko, me vakataki keda ga ena gauna oqo ni COVID-19. E ubi tiko na valetabu ia e vakaukauwataki tiko ka vakarairaivinakataki tiko vakalevu. E na veisiga yadua, era cakava toka vakalalai na dau cakacaka me vakaukauwataki ka vakataudeitaki. E na loma ni tolu na yabaki, ena basika mai ka totoka cake, vakasakiti sara, ka rawa ni tucake tu ena ituvaki cava ga.
PERESITEDI OAKS: O keda kei ira na noda gonevuli e rawa ni da vaka na valetabu: eda lako curuma tiko na veisau ena veisiga me vakaukauwataki keda, vakadinati keda vakalevu, vakaqaqaco ivakadinadina - ena ituvaki dredre cava ga. Ni da lako curuma tiko na veisau, vata kei na veivakalougatataki ni iyalayala, e rawa talega me yaco me da vaka na Vale ni Turaga.
E dua na vuna au vakavinavinaka kina ni tiko vata kei au o Kristen ena veivakavulici oqo ni o koya e sa tiki bibi ni kena tiko na Yalotabu ena neirau itikotiko. Me vaka e a tukuna o Peresitedi Nelson ena Koniferedi ni Epereli, “E dua na vanua tabu duadua e vuravura sa ikoya na nomu itikotiko.” E gadrevi me da sasaga vakalevu cake me vanua vakatabui vakaidina na noda itikotiko. Kevaka o sa vakawati, veivakasalataki vata kei watimu ni drau sa itokani vata ena cakacaka bibi oqo. Ena maliwa ni gauna oqo kei na gauna ena lesu tale mai kina na Turaga, e gadrevi na noda itikotiko me vanua ni vakacegu kei na veitaqomaki.1 O ira na watida e ra bibi ena kena vakayacori na veika oqo.
SISTER OAKS: Me vaka niu watina e dua ka gadreva na Yalotabu me qarava kina na nona veikacivi kei na cakacaka, me vakataki kemuni yadudua, au dau sasaga ena noqu igu taucoko me vanua tabu na neitou itikotiko. Ka sega tale e dua na gauna me vakaoqo e gadrevi sara kina vakalevu cake me tiko na Yalo Tabu ena noda dui itikotiko se ena noda rumu ni vuli. E veivuke saraga na COVID-19. E sa vakavuna me levu cake na gauna me keirau wasea vata. Na watiqu, me vaka na watimu, e dau cakacaka vinaka sara ni vakila na kena vakatabui na vanua e wavoliti koya. Na veika au sarava, wilika ka kauta mai ena loma ni neitou vale e ka bibi sara. E sega ni rawa ni keirau veicudruvi ena loma ni vale, au qai dau tovolea meu dau mamarau ka veitokoni. Au kila ni bibi sara na noqu veitokoni ena kena cokonaki tiko na matavuvale vakakina vua na watiqu, kau sasaga tiko, ena veisiga.
PERESITEDI OAKS: Vinaka, noqu daulomani. O ira na nomuni gonevuli era lako curuma tiko e vuqa sara na veisaqasaqa vaka vuravura kei na veitemaki. E parofisai taka na veika oqo na iVola i Momani. E da bula donuya e dua na gauna “na veivanua kecega e vuravura … era na mateni ena caka cala kei na veimataqali itovo vakasisila kecega.”2 E vakasalataki keda me da saqata na iwalewale nei Setani ena gauna oqo.
Me kena ivakaraitaki, ena 2 Nifai 28:20 e da wilika ni o Setani ena “cakacaka kaukauwa ko koya e lomadra na luve ni tamata, ka vakayavalati ira me ra cudruva na ka vinaka.” Na veika taucoko me vaka na cudru ena gauna ni draiva, veisaqasaqa, na veivala vakamatavuvale e sa vaka me sa qai levu tikoga mai. Na nomu kalasi ena rawa ni vanua ni vakaruru kei na veitaqomaki mai na veika oqo. E rawa ni vanua me ivakaraitaki ni ivakarau ni vakarokoroko me wali kina eso na yalo dregadregata ni gonevuli.
SISTER OAKS: Na nomu rumu ni vuli ena rawa ni nodra vanua taqomaki. Na ivakavuvuli e vakatavulici ena nomuni kalasi—na ivakadinadina e wasei kina, kei na Yalotabu e vakilai kina ena vakania ka taqomaki ira na nomu gonevuli.
PERESITEDI OAKS: Ena tikina e 21, a tukuna o Setani ni na “vakacegui” ira ka “veidabuitaki ira ena sautu vakavuravura” ka ra na kaya kina “sa vinaka tu na ka kece e Saioni.”3
SISTER OAKS: Sa veitalanoataki tiko oqo ni, sega tale ni dua na mataqali tekinoloji ena gauna oqo me vakayalia tu na yaloda se me veidabuitaki keda me vaka na talevoni veikauyaki. Au wasea mada e dua na italanoa baleta e dua na qasenivuli ni inisitute—e vakaleqai tu na nona ituvaki ena 2 na yabaki. Ena gauna e lesu mai kina, e kidacala sara vakalevu. Na tagi ni talevoni ena levu ni itukutuku e ciqomi, na vakau itukutuku ena talevu e latia na nodra vuli ka na gonevuli ena kalasi E kaya o koya, ni leqa sara vakalevu ni tawasei ira vakataki ira ka vakakina mai na Yalo. Ia au vakabauta ni tiko dina na inuinui, ka tiko ena noda na dau kerei ira ka ra tiko wavoliti keda me ra biuta sobu na nodra talevoni. E rawa talega, ena so na gauna, me da vakauqeta e dua na veitalanoa me baleta na veika yaga kei na rerevaki ni talevoni veikauyaki vei ira eda lomana ka vakatavulica—ka solia vei ira na noda gonevuli na gauna me ra wasea na nodra kauwai kei na iwali ni leqa ni talevoni veikauyaki. Me vaka ni da itubutubu, eda marataka na veika oya. Vakai dina sara.
PERESITEDI OAKS: Na iotioti ni vakaraitaki, e tiko ena 2 Nifai 28:22sa ikoya ni o Setani ena veitemaki vei ira ka “kaya vei ira ni sega ni dua na eli; vata kei na … au sega ni tevoro, ni sa sega ni dua na tevoro.” Na nomu veivakavulici ena vukei ira na nomu gonevuli me ra vakila na veicavilaki nei Setani kei na lasu e veisaqasaqa kei na ivakaro ni Kalou. E tiko na revurevu ni kena vakayacori na itovo eso ka vakavuna mai ko Setani, na nomu veivakavulici ena solia na inuinui eda na ciqoma mai na loloma ni veivutuni kei na veivosoti vakalou.
SISTER OAKS: Kamica dina. E watiqu e dua na iApositolo kau dau vakadikevi ira vakavoleka sara na iApositolo tale eso. Au kila ni o ira na italai ni Kalou era talairawarawa sara, ka ra dau vakasaqara na Yalo ni Turaga me dusimaki ira. Au kila talega ni veidusimaki vakayalo e tiko me baleti keda yadua, ka rawa ni o vakatavulici ira na gonevuli me ra vakasaqara mera talairawarawa.
Na kena iotioti, ena 2 Nifai 28:32a kaya na Turaga ni na “yalololoma” kivei ira kecega era na “veivutuni ka lako mai vei [Koya].” E dodoka tu ga na Ligana me tuberi ka vakabulai keda. O ikemuni saraga o ni na vakavulica na dina kei na inuinui oya ki vei ira na nomuni gonevuli. Tukuna vei ira me ra kila ni veivutuni e dua na isolisoli cecere e tiko vei ira. E sa vakatautaki vei kemuni na nodra vukei me ra yacova na veika e rawa ni ra rawata kei na nodra icavacava vaka luve ni Kalou.
SISTER OAKS: E tiko vei keda e dua na iyaragi me da valuta kina na vunica oqori. Ena Alama 31:5 eda vakavulici kina “na vunautaki ni vosa [ni Kalou] e vakayarayarataki ira na tamata me ra vakayacora na ka e dodonu - io sa [kaukauwa sara na vosa ni Kalou] ki na nodra vakanananu na tamata ka mucu na iseleiwau” - se ena talevoni veikauyaki. Oi kemuni na qasenivuli ni vei vosa oqo, ka tiko vei kemuni na kaukauwa kei na kena iyalayala.
PERESITEDI OAKS: Biuta na iVakabula me iusutu ni nomu veivakavulici ira na nomu gonevuli, ka na tu vei iko na kaukauwa oya. Me vaka ni o ni qasenivuli ni kosipeli, ena veiliutaki ni Yalo Tabu, o ni sa vakayacora tiko na veika oqo, e rawa mo ni vinaka cake sara vakalevu. Ni o toro voleka yani vei Karisito, era na toro volekati kemuni kei Koya o ira na nomuni gonevuli. Na vakalevutaki na nomuni gagadre mo ni vakavulica na dina, ena vakalevutaki na nomu rawa ni lomani ira ka kila na nodra gagadre.
Kemuni na taciqu kei na ganequ, me ikuri ni veika au sa vakaraitaka oti, au vakadinadinataki Jisu Karisito—noda iVakabula, noda Dauveivueti, na iliuliu ni Lotu oqo. Ko sa Nona italai. Eda sa duavata ena kena vakatavulici na ivakavuvuli dina ni kosipeli i Jisu Karisito. Au vakalougatataki iko—me vaka ni ko sa Nona italai, ka vakakina ni ko ni sa tina ka tama e Saioni, na italai kilikili ni Turaga o Jisu Karisito—mo ko rawata na nomu itavi, ka muria na Nona ivunau, ka ivakaraitaki vinaka ni yalododonu ka vakatavulica na ivakavuvuli dina. Au vakalougatataki iko ena vakavotukana ni veika oqori kau vakadinadinataka na dina ni veika kece ko ni vakavulici kina nikua, ena yaca i Jisu Karisito, emeni.