Wase 30

Vakaikuritaka e na Nomu Bula na iTovo Vakarisito

Sa kila tudei mai o Peresitedi Brigham Young na yaga ni loloma vakarisito, “sa vu mai vei Karisito na loloma sa uasivi sara,” me matata kina na noda ilakolako ni bula. E vakavatukanataki e na veika e vakayacora vei Lucy Groves na nona yalololoma, kei na nona dauveiqaravi: E na ilakolako ki na muaira, a qaqi Lucy na yava ni nodratou qiqi, me ramusu sara kina na yavana, kei na vica na sui e bati ni saresarena. A qai vauca vinaka o Peresitedi Young na yavana ramusu, ka qai masulaka. E na vica ga na siga e muri, a qai ramusu tale vakarua na yavana, ni butuka o luvei Lucy. Ni sa vutugu yani o Lucy e na ikalawa kece ga ni bulumakau ka dreta voli na nodratou qiqi, a qai kerei watina me ratou lutu tani mai na ilakolako ni qiqi, ka me ratou tu laivi mada mai. A mani kaya o Peresitedi Young ni na sega ni biuti iratou tu mai e na tutu ni sala, e na vanua rerevaki oya. A mani veivakaroti vei ira e vica me ratou musuka na yava ni idavodavo nei Lucy, me lili tiko ga na idavodavo mai na duru ni vale ni qiqi, ka me galala vinaka tiko na kena lili na meteresi kei na sivirigi ni idavodavo, me vaka ga na yameke. A qai masulaki Lucy tale o Peresitedi Young, ka lako voli ga e na yasa ni qiqi me vica na siga, me raica kina ni sega tale ni dua na leqa e sotava. E qai vola e muri o makubui Lucy tagane, “Mai na nona ivakarau loloma oqori, a vakavuna kina na nona lomani me tawamudu mai vei Lucy, kei ira na nona kawa e muri” (HRF, 157–58).

iVakavuvuli i Brigham Young

Mo vakaisulutaki e na ivau ni loloma vakarisito.

Esega ni da mai tu taudua ga eke, se da buli mai na veika tani, mai vei ira na lewe i vuravura tale e so. Eda lewena, ka tiki ni vuvale vakatamata, o koya gona, sa tu kina na noda icolacola vakaikeda (DBY, 271).

Me ra kila na Yalododonu e na Gauna Oqo ni veika e baleti ira na tacidra vakalotu, e baleti ira tale ga, ke sega, era na sega ni laki vakabulai e na matanitu sileitieli ni Kalou (DBY, 271).

E na veivakalougatataki na Turaga vei ira era vakasinaiti tu e na loloma vakarisito, ka ra dauloloma ka caka vinaka (DBY, 280).

Loloma Vakarisito. E dua ga na ivalavala savasava, na itovo ni bula, se ivakavuvuli, kevaka e na dau vakamareqeti mai vei ira na Yalododonu, e na itakataka ni nodra vakabulai na udolu vakaudolu na wekada. Au na goleva vakalekaleka mada na loloma vakarisito, se na loloma, ka na vakavurea vei keda na yaloveivosoti, na vosota vakadede, na veilomani, kei na yalovosota (DNW, 11 Jan. 1860, 1).

Me tu vei keda na loloma vakarisito; ka dodonu me da solia na noda igu e na noda vueti ira mai na luvedrau tagane kei na yalewa, o Atama kei Ivi, ka me ra mai rawata na veivakabulai e na iserau ni Tamada na noda Kalou. Ke da na dau vakayacora tiko, e vakarabailevutaki na noda loloma vakarisito me vaka na loloma dina vakalou, me vakavatukanataki tiko e na nodra bula na lewenilotu (DBY, 273).

Mo lomana na wekamu me vaka na nomu lomani iko [raica na Maciu 22:39]; mo vakayacora na veika e so vei ira na wekamu, o vinakata me ra cakava vei iko [raica na Maciu 6:12] (DNW, 20 Maj. 1852, 3).

E ka lialia sara ni ra tukuna e so ni ra lomana na Kalou; ni ra sega ni lomani ira na wekadra [raica na 1 Joni 4:20] (DBY, 271).

Me tekivu na noda cakacaka ni loloma kei na veivukei mai na noda dui vuvale, ka da dui lewena, ka qai tosoya yani vei ira tale e so (DBY, 271).

Mo dau tudei, ka yavutaki tiko ga e na ivakavuvuli dina. Kua sara ni vakabukana e lomamuni na yaloca, se na veicudruvi; ka sega ni nona ivakarau e dua na Yalododonu (DBY, 273).

Au kaya tiko beka, Lomani ira na kemu meca? Io, e yavutaki mai na ivakavuvuli e so. Ia, e sega ga ni vinakati mo vinakata na veika ca era dau vakayacora; e dodonu ga mo lomani ira e na vakanananu ni o gadreva mo veisautaki ira mai na nodra ivalavala ca, me rawa ni ra vakabulai kina e na nodra talarawarawa ki na Kosipeli (DBY, 272).

Era dau caka cala beka e so na wekamu? Era dau cakava dina. Era lako mai na veiyasai vuravura na lewe vuqa, me ra mai vakavanua eke, ka ra namaka tu o ira na itaukei ni vanua me ra mai vakamuria sara na nodra itovo, na nodra ivakarau, kei na itovo vakavanua, ke sega, era na daunanuma ni sega ni dodonu me ra dau veitokani kei ira. Meu kaya tale, “ke ra sega ni cakava, vakasamataka, se raica na veika e so me vakai au o ira na tagane, na yalewa, se na gone, gone yadudua era tu oqo, era sa ivalavala ca.” Sa lavaki kina vei keda na loloma vakarisito, ka na dau ubia na ivalavala ca e so e tu (DNW, 11 Jan. 1860, 1).

E dodonu me ivakadinadina vinaka ni nomu sa lakova tiko na sala ni bula, kevaka o sa dau lomana na Kalou e na yalomu taucoko, kei ira tale ga na wekamu (DBY, 271).

Mo qarauna me lako tiko ga ki na bula tawamudu na sala o muria tiko, mo kauti ira kina e levu na kainomu. Kauti ira yani e na bula ga era dui bula kina, mo kilai ira vinaka e na bula era dui donuya tu, ka golevi ira me veiraurau vinaka kei na nodra bula, ka raici ira me vaka sa dau raici ira na Kalou (DBY, 274).

Yalololoma. Mo dauloloma me vaka sa dauloloma na Tamada mai Lomalagi. E vakatauca na uca vei ira na ivalavala vinaka, me vakakina vei ira sa dau ivalavala ca; ka vakacilava na siga vei ira na tamata ca kei ira era dodonu [raica na Maciu 5:45]. Me drodrovi ira na ibulibuli kece ga ni ligadra na yalovinaka, e na veigauna eda rawata kina; ia me kua ga ni o soro ki na yalo kei na ivalavala tawa dodonu (DBY, 272).

Kauta tani na yalo cacaveiwekani, ka dau yalololoma ga. Mo veivunauci, ni dodonu me yaco na veivunauci; ia mo dau saga taumada mo veisautaka na vakasama, ni bera ni qai tau na ikuita (DBY, 277).

Ke vinakati mo vunauca e dua, kua ni veivunauci vakasivia, me sivia na iwali loloma ni veivukei ka o taukena tiko, mo vauca kina na wekamu [raica na V&V 121:43] (DBY, 278).

E se sega ni veisautaka mai na lomaqu e na vukudra na tamata yadudua, era tagane se yalewa, e tautauvata beka na neimami vakabauta se sega. E rawa li ni o mai tiko kei au? E rawa niu na laki tiko yani kei iko; kau sega ni kauaitaka se o duavata e na noqu vakabauta, se sega (DBY, 278–79).

E na noda [veimaliwai] kei ira mai tautuba ni lotu—kua ni kaya vei ira ni ra Kai Veimatanitu Tani—me dau uasivi sara na noda ivakarau, me ra vinakata me ra dau vakadadamuria; ni o ira yadudua vei ira ka dau yalodina, era na dau kaya, “Au kila ni o dina, au vakabauta niu na laki tiko yani kei iko” (DBY, 279).

Ni da dau yalomalua ka yalololoma, itovo vinaka ka yalodina, ni da vakasinaiti tu e na vakabauta kei na lomadina, ka sega ni dau caka cala, eda sa bula tiko me vaka sa lavaka vei keda na Kalou; ni na veiovici na veika vinaka e na dau cakava na veitamata yadudua, me totoka kina na nona bula, me serau kina e na rarama na kedra ivatuka, ka taleitaki vakalevu sara na itabamata era bula donuya, mai na uasivi ni bula e kunei kina. Era na lomani mai vua na Kalou, mai vei ira na agilosi savasava, kei ira na tamata vinaka kece ga e vuravura, ia era na dau sevaki, qoroi, dokai, ka rerevaki mai vei ira na ivalavala ca (DBY, 280).

Daucaka Vinaka. E suitu ni noda lotu na yalololoma me baleti ira kece ga na tamata, me da daucaka vinaka vei ira na tamata kece ga, ni ra vinakata me da vukei ira e na veika vinaka e so (DBY, 272).

Me da dauveilomani, me ra veiqaravi o ira era kaukaua tu vei ira era sa malumalumu, me ra tokoni cake tale, ka me ra dauveituberi o ira era kila vinaka tu na sala, vei ira era se malumalumu tu vakayalo, me yacova ni ra sa qai raica vinaka tale na nodra ilakolako (DBY, 271).

Mo daumasulaki ira e rawa ni o vukei ira e na yalololoma vakalou (DBY, 279).

Ni o raica ni sa tekivu me sisi e dua na wekamu, mo masulaki koya, me lesuvi koya tale na Yalo ni Kosipeli, me vaka e a taukena mai liu. Ke o ni vakila e lomamuni na Yalo oqo, masulaka tiko me serau cake tiko na rarama o a cilavi kina e na Kosipeli, mo vakabulai iko kina kei na nomu vuvale (DBY, 272).

Mo vakasamataka mada ke ra lewe tini e na nodatou itikotiko era dau tevutavoi, se kere kakana e na veivalevale, ka le ciwa vei ira era tamata vucesa, ka dau kerekere ga me ra vakaliataka kina na nodra dui bunotaka na nodra bula, me ra veivakacolati ga vei ira era dau lomasoli ka yalololoma, me dua wale ga vei ira era cabe yani ki na nomu vale e dodonu me vukei; e vei beka e vinaka, me soli na kakana vei ira taucoko na le tini, me rawa kina ni vukei kina o koya e le duabau ga ka vakaloloma dina, se me ra vakuai taucoko na le tini, ni o sega ni kila se o cei vei iratou e vakaloloma dina? O ni na kaya taucoko sara, me soli taucoko sara vei iratou na le tini na nomu isolisoli, me kua kina ni bureitaki vua ka dodonu me vukei na nomu ka ni loloma. Ke o na dau vakayacora vakakina, e na sega ni vakatautaki na nomu kune kalougata, se o lomana e dua e dodonu me lomani, se sega ni dodonu me lomani, e na dua ga na vakanananu, me ra vukei tiko ga na vakaloloma (DBY, 274).

Kua ni veivakamelei; dau vakatulewa vakadodonu.

Kakua ni dauveivakadiloi, mo kua kina ni vakalewai [raica na Maciu 7:1]. Me kua ni dua e vakalewai wekana, me vakavo ga ke sa tu vua na vakasama vakarisito [raica na Moroni 7:16–18]. Me dau vakasamataka sara vakatitobu na tikina oqo; na kena dau rogo vakavuqa vei keda—”Sa cala mai o ka, sa sega ni dodonu kina me okati me Yalododonu, e na okati ga me Yalododonu ke sega ni vakayacora na veika oqori.” O kila beka vakaevei?… Mo kakua ni dau veivakalewai vei ira oqori, ni o sega ni kila tu na ituvatuva ni Turaga me baleti ira; mo kakua gona ni kaya ni ra sega ni Yalododonu. … Ni o koya e kaya ni sega ni Yalododonu e na Gauna Oqo e dua tani tale, e na vuku beka ni malumalumu e tu vua, ka vakaraitaki kina ni sega vua na Yalo ni Kalou. Ni vakasamataka vinaka na veika oqo, kemuni na wekada turaga kei na marama; ni dau vola sara, me matata tiko e na nomuni vakasama; ni dau kauta ka wilika tiko ga e veigauna. Keu dau vakalelewa vei ira na taciqu kei na ganequ, ka sega ni yavutaka na noqu veivakamelei mai na ivakatakila i Jisu Karisito, e sega mai vei au na Yalo i Karisito; ke a tu vei au, au na sega ni dau veivakadiloi vua e dua (DBY, 277–78).

E luvuca na lomaqu na rarawa niu raica e lewe vuqa na iTalatala Qase kei Isireli, ka ra lavaka me ra vakamuria na nodra ivakarau na tamata kece ga, me ra vakarautaki tale ga mai na nona ivakarau. Me kua ni da dau veivakalewai vei ira na wekada, ka lavaka me ra muria vakadodonu sara na noda ivakarau, se me ra mai davoca na nodra idavodavo [raica na Aisea 28:20], me ra vakalekalekataki se vakabalavutaki tale o ira, ke sega ni rauti ira vinaka na idavodavo (DBY, 279).

Ke ra raica e dua na tacida se ganeda ka cala tiko, ka sega ni lako vata kei na nodra ivakarau ni bula na nona ivakarau, era sa na nanuma sara ni sega ni dodonu me Yalododonu, ka ra sega ni via veitokani kaya e na nodra nanuma, ni kevaka era dodonu tiko o ira, me tautauvata vinaka sara kei ira na nodra vakabauta (DBY, 279).

Me da dau veirogorogoci. E duidui na noqu rai mai na nomu itovo ni rai. E sega ni duavata kei iko na noqu vakatulewa e na veika kece sara, ka duidui tale ga mai vei au na nomu lewa. Ni o veivakamelei vua e dua, mo vakatulewa vakadodonu me vakatau tiko mai na lomana. Me kua ni vakayacori e na vuku ni veika era tukuna, se na veika era cakava, me ra lewai kina na tamata kece ga e na nona siga namaki na Turaga; ia me nanumi kina na veivosa e cavuti kei na veika e cakava, na vakanuinui ni lomana, me ra lewai kina na wekada oqo [raica na V&V 137:9] (DBY, 273–74).

Me ra kila mada na Yalododonu e na Gauna Oqo ni sega ni ivalavala ca na nodra malumalumu na tacidra. Ni ra cakava na tacida se ganeda e dua na cala ka ra sega ni nakita, mo kua ni okata ni nodra ivalavala ca. Me da tovolea me da dau veilomani; me vakamalumalumutaka na yalocudrucudru se na noda levaleva na yaloveilomani se yalololoma, me da dauvosota tiko ga, ka yaga vakalevu e na noda bula vakaveiwekani (DBY, 273).

Mo qarava na Turaga, kua ni dau veivakadiloi vei ira na wekamu [raica na V&V 88:124]. Mo ni dau vakarautaka e na nomuni bula na ivakarau dodonu, me kua ni o ni vakadiloi kina, veitalia ga na nodra malumalumu na wekamu vakalotu, ni sa dui tu ga na veitikina me da qarava e na noda bula (DBY, 280).

O ni na rairai raica beka, se o ni nanuma ni o ni sa dau raica e udolu na nodra cala na wekamu vakalotu, ia era tautauvata vinaka ga kei kemuni; ni ra lewe ni lewemuni, ka sui ni suimuni; era nona tale ga na Tamamuni mai lomalagi; eda sa Luvena vakayadua sara, ka dodonu me da marautaka na tamata yadudua sara, e na ivakarau ni bula era dui bula kina (DBY, 271).

Mo ni dauveidokai; ni kakua sara ni vosabeca e dua. Era dau nanuma e so me ra bala i eli e so na wekada, mai na nodra levataki ira beka e na dua na ka, ka ra nanuma ni sega ni dodonu me ra vakaitikotiko e vuravura oqo. Oi kemuni na yalowai! o ni sega mada ni daunanuma ni ra ibulibuli ni Kalou o ira o ni vosabeci ira oqori, me vakataki kemuni ga! Sa dau rai baleta na nodra malumalumu na Kalou; ka ra sa dau vakadonui mai vua, ni ra dau vakayacora na veika dodonu e na veigauna e so. Me vakacaucautaki ga na Kalou e na nomu sa qai mai kila na veika dina e vuqa, mo ni vuabale tiko ga e na yalololoma kei na yalovinaka (DBY, 274).

Me veivakalougatataki na Kalou vei ira na yalomalumalumu kei ira na yalododonu, me dau yalololoma vakakina o Koya e na vukuda, e na malumalumu e so e tu e na noda bula. Ia ni da nanuma tiko na malumalumu vakatamata e tu vei keda, me da dauveilomani kina vei ira kece ga na tamata (DBY, 272).

O koya ga e dau loloma dina, e na lomani [raica na Maciu 5:7] (DBY, 273).

Au vakavinavinakataka ni sega ni noda ivotavota me da lewai vuravura, e na bula eda donuya tiko oqo; ke sega, eda vakacacana na veika kece ga. E se lailai sara vei keda na vuku, ni da sega ni kila ka tu vakalevu e na veika ni Kalou; me dau vakatulewa tiko na yaloda ki na veika vakayago, ne yacova sara ni da sa qai vakamalumalumutaka na gagano ni lomada, me taucoko kina na bula ni tamata, me duavata kei na vakasama kei na loma ni Kalou. Ka dodonu tale ga me tu vei keda na isolisoli vakalou ka taurivaka na Kalou me raica rawa kina na veika sa bera mai, me da vakadeitaka kina ka kila vinaka na itatase ni ka eda cakava, me yaco sara i na vuravura tawamudu, sa na qai dodonu kina me da veilewai se vakalelewa (DBY, 278).

Dou veitokoni e na vakabauta, kakua sara ni veileti.

Ke da dau veivakabauti ka veidinadinati vakaikeda, ka vakabibi vua na Kalou, sa na dau vakadeitaki vei keda na kena soli mai na veika eda kerea, ni da dau kere veivuke vua, me da dau vakayacora kina na veika e so eda vinakata me vakayacori vei keda, e na veika kece sara eda vakayacora, e na veigauna kece ga ni noda bula? Me vakavuna me da kitaka na veika e vuqa, ka sega ni kena wale ga ka vinakati. Ke gadreva vei iko na tacimu mo drau lako vata e na imatai ni maile, o na lakova vata kaya e na kena ikarua; ke saga vei iko na nomu kote, o na solia tale ga vua na nomu sote [raica na Maciu 5:40–41]. Me vakauqeti keda na ivakavuvuli oqo, me da dau saga vagumatua na veika e baleti ira na wekada, e na vukuna na Kalou e vuravura oqo, kei na veika kece ga e gadreva vei keda na Turaga; ka me da dau tu vakarau me da qarava e na veigauna kece ga (DBY, 275).

Ke da sega ni dau veivakabauti, ka dau veivuvutaki, sa na vakarusai kina vakadua na noda bula sautu. Kevaka eda yavutaki e na bula veivakabauti dina, sa na qai taucoko sara kina na noda marau (DBY, 275).

Na cakacaka daru sa mai lesi kina oqo me ra veivakabauti tale na tamata; ia niu dau rogoca ni sega ni ra dau vakayacora na wekada vakalotu na veika era sa dau yalataka, au na okata oqori me nodra rogo ca. E dodonu me da dau dina e na veika eda yalayala kina. Ke sa mai drakidrakita na noda veiwekani, se tu na veika e so e vakacacana na noda veiwekani, e dodonu me da veitalanoa kina, me veivosakitaki sara vakamatailalai, me da taqomaka ka veivosakitaka vakaikeda ga, ka da na raica ni na wali vakavinaka sara na noda leqa e na sala oqo, mai na kena sala tale e so; ka da na raica ni vu ni nodra veileti e na veigauna or ira e vuqa na lewe i vuravura, na nodra sega ni dau veirogorogoci vinaka; kevaka e tu e dua na inaki se na lewa cala, ke dau veivosakitaki sara vakasavasava, e dau vinakata o koya ka cala dina me vakadinadinataka (DBY, 276).

Ke duidui na nodrau lewa e rua na ito, me ra soqoni vata yani ka kauta yani me ra laki vakamatatataka na veika dredre e so era sotava oqo, ka me ra dau yalomalumalumu sara, ka kaya kina, “Baraca (se sista) au via vakadodonutaka; io meu vakacalai au sara, mo vakadodonutaki ga.” O kila beka ni na vakadonui e na bula dodonu o koya e dau vakayacora na ivakarau oqori vua na wekana? Sa na mai vakavinakataki kina na nodrau lewa, ka rau sa duavata kina, me qai kacivi ga e dua tale, me mai vakadeitaka vei rau na kena dodonu (DBY, 276–77).

E dau yaco na veiqati me vakavuveisei vei ira na tamata, ka ra na sega ni veivakabauti kina na wekada vakalotu, ni ra na siqe na ito e rua e na veika e yaco, e na nodra sotava beka e dua na veileti lailai, ni qaciqacia, se lecaika, ka ra qai vakalevulevuya tiko me ra muduki tani kina mai na Lotu. Sa dau kau vakawasoma mai vei au na veika vaqori. Ni o vakadikeva na tikina dredre oqori, ka qai raica ni a tekivu mai na dua na veileti me baleta e dua na ka lailai wale; sa yaco ga mai na leqa oqori mai na dua na tikina somidi wale. Mo kakua ni vakamanamana me laki yaco na veika dredre, mai na dua na veileti lailai wale sara (DBY, 277).

Ke ra vakauta na kemu vosa o ira e so na wekamu, ka o nanuma ni ra cala mai na nodra vosavakacacani iko, mo kua sara ni kaya vei ira ni o sa mai rogoca na nodra vosa, me kua sara ni lasika e na nomu bula na veika era a cakava, me vaka ga era a sega ni cakava vei iko na veika oqori (DBY, 277).

Me tekivu oqo, me da dau bula e na dua na kena ivakarau, me veivakadeitaki vei ira kece ga na tamata ka da veitaratara yani, ka veimaliwai kei ira; ka dau vakamareqeta na veivakabauti eda sota kaya, me isolisoli talei duadua, ka rawa ni vakaivotavota kina e dua vei keda. Ia keu vakavurea na nodra veivakabauti vei au o ira na wekaqu, mai na veika vinaka au dau cakava, sa na qaqa ni masu ga meu kua ni vakacacana tale e muri (DBY, 276).

Me iUlutaga ni Vuli

Mo vakaisulutaki e na ivau ni loloma vakarisito.

• Na “icolacola vakaikeda” cava beka e tu e matada yadudua na lewenilotu, se o keda na lewe ni vuvale vakatamata? Me yaga beka vakaevei na loloma dina vakarisito, me rawa kina ni da “vueti ira mai na luvedrau tagane o Atama kei Ivi, kei ira na luvedrau yalewa”?

• Na cava na vuna eda sega ni rawa ni lomana dina na Kalou, ke sega ni dalomani ira na wekada? Na cava na vuna e bibi kina me da dau “raici ira [na wekada] me vaka sa dau raici ira na Kalou”? Mo tomana beka vakaevei na ivakarau ni bula oqo?

• Sa dau vakamacalataki na loloma vakarisito, se “[na loloma sa] vu mai vei Karisito,” e na veisala e so (raica, me kena ivakaraitaki na Moronai 7:45–47). Na sala cava soti beka e vakabibitaka vei keda o Peresitedi Young, me da vakavatukanataka kina na loloma dina vakarisito e tu vei keda? E na sala cava beka e rawa ni o vakaraitaka kina vakalevu na loloma vakarisito vei ira o ni veimaliwai kei ira? E na sala cava beka era sa vakavatukanataka vei iko o ira na tani na nodra loloma vakarisito?

Kua ni veivakamelei; dau vakatulewa vakadodonu.

• Na cava beka e veivakadreti kina o Peresitedi Young me baleta na noda dau veivakamelei? Mo vakadadamuria beka vakaevei na ivakasala oqo e na nomu bula veimaliwai kei ira duidui vei iko e na vakasama, kei na veika era dau cakava?

• Na cava beka e na yaco mai na noda dau veivakalewai vakatawadodonu vei ira na wekada? Na cava beka e rawa ni vukei keda e na noda dau veivakamelei vakadodonu, ke da donuya e dua na gauna e dodonu kina me da vakamelea e dua tale? (Raica tale ga na Moroni 7:14–18.) Na cava beka na vuna e vakabibitaki kina vei keda me da dau vakavatukanataka na noda loloma titobu e veigauna?

• E na yaga beka vakacava na noda daunanuma ni da luve ni Kalou, me vukea na noda veiwekanitaki vei ira na noda dui vuvale, o ira na noda itokani, kei ira na noda veikilai?

Dou veitokoni e na vakabauta, kakua sara ni veileti.

• Me da taracake beka vakaevei na noda veivakabauti vakaikeda? Na cava beka e na qai rawata vei keda? Na cava beka e na yaco mai na noda dau sega ni veivakabauti vakaikeda?

• Na cava beka e dau vu ni veiqati? (Raica tale ga na 2 Nifai 26:32–33.) Na cava na veiqati, ka me da dau levea beka vakaevei? Na cava beka o sa dau vakayacora mai liu, mo levea rawa kina na veiqati? E veivakadreti beka vakaevei vei keda o Peresitedi Young, me baleta na noda ivakarau e na gauna eda sotava kina na veileti se na veiqati?

• Na cava beka e vu ni nona vakamacalataka o Peresitedi Young, ni “isolisoli talei duadua, ka rawa ni vakaivotavota kina e dua vei keda” na nodra veivakabauti vei keda o ira na wekada? Na cava beka e rawa ni o kitaka, me vakaikuritaka tiko ga na nodra veivakabauti vei iko o ira na tani?

A taurivaka na iVakabula na kena italanoa na Kai Samaria Vinaka, me vunaucikeda kina, me da dau lomani ira na wekada.

Era dau tokoni vakailavo na ilakolako e so ni qiqibiligi mai na nodra cau na Yalododonu ki na Perpetual Emigrating Fund, ka a tauyavutaka o Peresitedi Young me vukei ira na Yalododonu ka ra dravudravua sara, me ra toki rawa kina i Saioni.