Na Yavu ni Veivakabulai

E na nona itutu vakaparofita ka ivakavuvuli o Peresitedi Brigham Young me baleta na ivakavuvuli ni bula tawamudu, a vunautaka kina ni “inaki kei na gagadre [ni] noda iLiuliu Cecere” (DBY, 49), me dolava vei ira na Luvena na sala me ra rawata kina na marau tawamudu. Ni yavu ni “[ituvatuva ni bula marau]” oqo, [Alama 42:16], vei keda na luvena na Kalou ka da bula vata kei Koya, ni bera ni da qai mai cadra e na bula oqo, ka vakaisulutaki keda kina e na yago, ka me da digia kina vakaikeda me da muria na ivakaro ni Kalou. E na qai vueti keda o Jisu Karisito ki na matanitu vakaiukuuku, me vakatau mai na noda dau yalodina.

iVakavuvuli i Brigham Young

Sa lewa na Kalou me da dau tubu tiko ga e na rarama, e na dina, kei na marau.

Na bula ka daru vakaivotavota kina oqo, e baleta vakatabakidua na vuravura tawamudu. Mo vakasamataka mada na vakasama ni kena sa na soli e na nomu edaumeni, na lewa kei na isolisoli e vuqa ka daru sa taukena tu oqo, ka me qai bokoci tani vakadua mai vei kedaru, ka vakawabokotaki kina, ka vakamatei kina vakadua, mo qai veidutaitaka kei na noda nanuma, kei na bula eda bula voli kina edaidai. E na sega sara ni vakayacora e dua ka tawa tu na uluna. Ia, eda na rawa ni kila ga na bibi ni veika oqori, mai na Yalo Tabu dauvakatakila [raica na 1 Korinica 2:11]. Eda na qai yalomatuataka na veika kece sara sa yaco, ka sa vakavotui mai vei keda e liu, mai na ivakatakila sa sovaraka vei keda na Turaga o Jisu; na veika e so ka yavu ni noda bula oqo, kei na veika e na yaco mai muri [raica na V&V 93:24], e na sega ni vakatakilai vakamatailalai sara beka, na veika beka ga sa lewa mai na Turaga ka dodonu me da kila vinaka tu, me rawa ni yaga vei keda, me da vakaiyautaki kina e na noda tuberi e na bula oqo, me da vakacokotaki, ka laki rawata e muri na bula tawamudu (DBY, 47).

Ke da kila vinaka tiko na veivakavuvuli dina me baleta na noda a buli mai, kei na vuna eda a buli kina—inaki kei na gagadre [ni] noda iLiuliu Cecere, me lewa kina na kena tuvai ka vakatuburi na veika kece sara, kau sa mai raica tu oqo edaidai, me da kila kina ni sega ni vakarusai vakadua na veika kece sa buli tu oqo—ni sa ilutua ni ituvatuva sa qaravi mai, se na bula veilecayaki; me da kila kina ni rawa ni tuvai na veika me bula, ka yalomatua vakayalo, ka vakavukui tiko ga; me kila rawa kina na ivakavuvuli e so ka vakatuburi kina na veika oqori me laki manumanu bula, me kakana draudrau, se me tamata bula; me ra kila kina na vakatovotovo vakalou, na cakacaka ni ligana, kei na yavu, ka veisau me vakavatuka sara, ka vu mai kina na tamata bula, me rawa kina ni ra laki vueti e muri—me baleta na cava? Me ra kune marau kina. E na dua tale beka na ka e rawa ni laki tasevu kina na sasaga sa tu e na yalo ka sa dui tu qo vei keda? Sega [raica na V&V 131:7] (DBY, 49).

Eda luvena vakayalo na Kalou.

E sega sara ni dua na tamata bula e tu vua na kaukaua, me lewa kina vakaikoya na nona bula mai. Ni sa bula tu oqo e dua ka Cecere cake vei keda. Eda dui taukena beka na yagoda? Eda dui lewa beka na dui yaloda? Eda sega ni dui lewai keda. Eda nona na vuda, o koya na Tamada ka noda Kalou [raica na Cakacaka 17:29] (DBY, 50).

A yaco taumada na veibuli vakayalo; me Tamada kina vakayalo o Koya na Tamada [raica na V&V 76:24], ka ra cadra kina ka tubu voli kei Koya. A qai qarava na veibuli ki na veika vakayago, me vaka ga a vakavatukanataka tu o Koya, me vukica kina na veika sa tu rawa tu, ka tawana tu oqo na vuravura, … me tuvai ka buli kina na luvena yadudua mai na veika sa buli rawa tu oqo e vuravura (DBY, 50).

Au rogoca na veivosa a cavuta o Mr. [Henry Ward] Beecher, e dua na lewe i Brooklyn rogolevu, e na nona kaya ni kalouca vakalevu na tamata, e na nona sucu mai oqo i vuravura; ia, meu kaya kina, ni kalougata levu duadua beka e rawa ni sotava e dua na tamata, na nona sucu mai i vuravura, ni sa na qai vakavolekataki kina vua na katuba, me bula rawa kina, me qai laki rawata rawa na bula tawamudu; me rawa tale ga ni ra vorata na ibulubulu, ka butuqaqia kina na ivalavala ca kei na veika tawasavasava, ka dau vakavatukanataka e na nodra dui bula e veisiga na ivakavuvuli ni bula kei na bula tawamudu, kei na ivakarau ni bula veimaliwai kei na Kalou e na bula tawamudu (DBY, 51).

Ni ra savavuka me vaka na savasava kei lomalagi o ira na yalo ka ra mai vakaisulu oqo e na yago, e na gauna era tekivuna kina na bula vakayago. Sa mani mai dukadukali na yago oqori e na veika vakatamata, e na nona lutu na tamata. A seretaka kina na Daunisame, “Raica, ka’u a sucu vata kei na ca, ka sa kunekunetaki au ko tinaqu e na ivalavala ca” [Same 51:5]. E yavutaki e na malanivosa oqo mai na iVolanikalou na nodra nanuma na tamata e so, me ra vakavelavelataka kina na veika dodonu—ni na dredre sara me curumi ira e dua na vakasama vinaka, ni ra sa rui ivalavala ca vakalevu, ka ni ra sa ca vakalevu, e sega ni dua na ka e kilikili vei ira, ka ra mate tale ga vakayalo. E ka lasu oqori, e dina ga ni dau buebue voli e lomada na veivaluvaluti. Ka da veisaqasaqa kina ki na gagano ca, se na sore ni ivalavala ka kaburaka vakayago, mai na noda sa lutu tani. Ni ra na vakayavalati vakavuqa na veiyalo savasava ka vakaisulu tu e na yago ka ra sa curuma oqori, ka sa dodonu sara me bibi tiko ga na nona lewa o koya ka talai ira mai ki na vuravura vakayago, me veivotai kina e na Yalo Tabu vu ni veika dina, me veivakauqeti ki na yalodra na tamata, me rawa ni ra bula qaqa, ka me ra tudei tu ga e na dui yagodra, o koya na noda Kalou, ka Turaga e na veika kece ga ni vakatovotovo (DBY, 51–52).

Sa vagalalataki vei keda me da digia na veika dodonu mai na veika ca, me da na laki vakaivotavota e na marau vakalou, se me noda ga na rarawa tawamudu.

[A taroga na Tamada,] “O cei me laki veisereki i vuravura, o cei me laki vakacabora na isoro e na vuku i vuravura, kei na veika kece sara e vakasinaiti kina?” A qai tukuna mai na Nona Ulumatua Tagane: “O i au oqo”; ka tomana tale, “Mo ni talai au.” Me qai kaya kina o koya na kena ikarua, o “Lusefa, na luvena Kalokalo ka iVolasiga,” “Turaga, o i au oqo, mo ni talai au, kau na laki vueti ira vakayadua mai na luvedrau o Atama kei Ivi, ka sucu mai i vuravura, se o ira vakayadua na kai vuravura.” “Ia,” a qai kaya mai o Tamada, “e na sega ni rauta oqori. Au sa solia yadudua vei ira kece sara na tamata na galala ni nodra dui digidigi; ka me ra dui saga kina na bula vakalou e na noqu matanitu; ia, ni soli tiko vei ira na galala ni digidigi, me ra vakayagataka na lewa oqori. Era luvequ yadudua sara; na ivakarau vakayadua ga o raica tu vei au, sa tu tale ga vei ira na luvequ, ka me ra dau vakayagataka yadudua na nodra galala ni digidigi. Ke o sa vinakata mo veivakabulai vakararaba, mo vakabulai ira mai na veika tawadodonu, kei na nodra ivakarau vakatani” [raica na Eparaama 3:23–28; Mosese 4:1–4] (DBY, 53–54).

Ni yaco na veisaqasaqa mai lomalagi, a dikevi vakamatailalai sara na veika era dui vakayacora na yalo oqori, ka ra cemuri tani kina o ira era kunei ni ra cala (DBY, 54).

A sotava kina na Turaga na veitawasei levu mai lomalagi, e na kena laurai na veika e so me ra vakatovotovo kina na nona tamata, ni bera ni ra qai biu mai i vuravura (DBY, 54).

Ia, sa kilikili ga me ra sa biuti lomalagi mai o ira [na yalo vakadrecike], ni sa sega tale ni dua na nodra tikina e kea, ka me ra bala sobu mai i vuravura me ra mai qarava na nodra vakatovolei na luve ni tamata, ka me ra qarava na veika e so me veibasai kina ka kece sara, me soli kina na sala vei ira vakayadua na lewe i vuravura, me ra vakaikuritaka na veika era sa kila mai, me ra veivorati kina ki na ivalavala ca, ka vulica kina na ivakavuvuli e so ni vuravura tawamudu, me rawata rawa kina na bula vakalou (DBY, 54).

E na sega ni rawa ni o solia vua e dua na bula vakalou, me yacova ga ni ra sa kila na veika ca, na ivalavala ca, na lolosi, kei na yalorarawa, ni sega ni dua e na kila, me nanamaki, ka qai marautaka vakalevu na bula vakalou, e na dua tale na kena ivakavuvuli (DBY, 55).

O nanuma beka ni dau wanonova na lewe vuqa na Turaga? … Au sega sara ni vakabauta ni sega ni dua e bula tu oqo e vuravura e sega ni kila mai o Koya, se o ira sa bula mai liu, se na mai bula e muri. Sa kilai ira rawa mai na nona ilumuti; ni sa dau wanonovi ira tu ga e veigauna, me vaka e a dau wanonovi Mosese, Fero, Eparaama, Melikiseteki, kei Noa, na nona ibulibuli digitaki, ka a digitaki me taya na waqa, me ra vueti kina e dua na iwase e na Waluvu (DBY, 55).

E vakasama cala ni sa qisia mai na Kalou na veika kece ga e yaco, ni sa galala dina tu na veitamata yadudua, me vaka ga na liwa galala ni cagi. E rawa ni o taroga se da vakabauta ni sa virikotori rawa mai na veika e dui baleti keda; eda vakabauta, me vaka ga na kena qaqaco ni nodra vakabauta o ira na lewe i vuravura na ivakavuvuli oqori. Eda vakabauta kina ni sa virikotora rawa mai o Jisu me iVakabula kei vuravura, ni se bera ni tauyavu o vuravura, ka lesi kina me noda iVakabula na kai vuravura, ia ni a lia tamata mai, a soli tu ga vua na galala, me vakamuria, se me kua ni muria na lewa nei Tamana. Ke a talaidredre vei Tamana, ke a yaco me dua vei ira ka dodonu me rusa. Eda sa galala vakakina me da vakamuria se talaidredre ki na ivakavuvuli ni bula tawamudu. Sa qisia mai na Kalou, ka virikotora e vuqa na ka sa yaco oti, ka yaco tiko ga me vakakina; ia ke sa qisia na veivakalougatataki talei ki na dua na matanitu, se vua e dua na tamata, e vakayacori oqori e na so na kena ivakaro. Ni sa qisia na veimate dewa e vuqa, kei na veika e so ni veivakarusai ki na veimatanitu, se vei ira na matatamata, e na yaco ga na veika sa lewa oqori, e na nodra domodomoqa na veimatanitu kei ira na itabatamata oqori, ka ni ra na sega ni biuta tani na nodra ivalavala ca, me ra gole kina vua na Turaga. Sa qisi mai me vakarusai e na bogi vasagavulu o Ninive, ia e a qai tarovi na veika sa yalataki oqori, mai na nodra veivutuni na lewe i Ninive. Sa dau lewa ka veiliutaki ga na Kalou, ka sa vagalalataki ira na luvena, me vaka ga na nona galala o Koya, me ra dui digia vakaiira na veika dodonu se na veika cala, me da qai lewai kina me vaka na noda ivalavala yadudua (DBY, 55).

E na kauti keda ki na matanitu vakaiukuuku o Jisu Karisito, me vaka na noda dau yalodina.

Oqo na yavu ni veivakabulai. Ni na sega ni tasevu na cakacaka i Jisu, me yacova sara ni da sa kau cake vakayadua sara ki na noda dui matanitu e na veivale nei Tamana, ka levu tu kina na matanitu kei na kena iukuuku, me veiraurau kei na noda cakacaka kei na yalodina na veitamata yadua, ka sa bula oti mai e vuravura. Era na talairawarawa e so ki na ivakaro vakasilesitieli, me ra votai kina e na kena iukuuku, ka so era na bula e na bula teresitieli, ka so e na bula tilesitieli, ka so era na sega ni bula vakaiukuuku (DBY, 56).

Era sa mai bale kina e vica na milioni na lewe ni vanua, e na veivanua e so sa lotu tu, kei ira na tawavakabauta, vei ira era dau gugumatua ka ivalavala savasava, ka dau caka dodonu me vakai ira e so era bula tiko edaidai. Era kaya kina na veimatalotu vakarisito ni ra sa lakosese; ia e na laki vakabulai ira na Turaga, se o ira beka ga ka ra sa ciqoma na nona Kosipeli. E vunautaki na yavu ni veivakabulai ka sa vakatakila mai o Jisu, ka da mai vunautaka tiko edaidai, e na rawa ni veivueti tale ga vei ira na luve i Atama, ka ra vakaloloma ka ivalavala ca sara vakalevu (DBY, 60–61).

Me iUlutaga ni Vuli

Sa lewa na Kalou me da dau tubu tiko ga e na rarama, e na dina, kei na marau.

Me da kila rawa beka vakaevei ni “baleta vakatabakidua na vuravura tawamudu [na bula daru vakaivotavota kina oqo]”? E yaga beka vakaevei na nomu kila ni ka tawamudu na noda bula?
Na cava beka na “inaki kei na gagadre” ni Kalou e na nona tuva mai na vuravura?
A vunautaka o Peresitedi Young, ni inaki taumada ni bula oqo me da “yalomatua [kina] vakayalo, ka vakavukui tiko ga.” E veiwekani vakaevei na tubu cake vakavuku, se na noda vakaikuritaka na noda rarama kei na dina (raica na V&V 93:36; 130:19), me da vakaivotavota kina e na marau tawamudu? O sa vakadinadinataka beka vakaevei na veika oqo e na nomu bula?

Eda luvena vakayalo na Kalou.

E vakaevei beka na nomu nanuma e na nomu sa qai kila ni o luvena dina vakayalo na Tamada Vakalomalagi? E yaga beka vakaevei ki na nomu bula na nomu kila na tikina oqori?
Na cava na vuna, e okati kina me “kalougata levu duadua beka e rawa ni sotava e dua na tamata,” na “nona sucu mai oqo i vuravura”? Mo wilika ka vakananuma vakatitobu na Vunau kei na Veiyalayalati 93:33. Na isolisoli cava soti beka sa virikotori mai, me baleta na yalomu, kei na yagomu, e na kena sa na semati tu me tawamudu?
Me vaka na ivakamacala nei Peresitedi Young, na cava e qai yaco mai na nona Lutu tani mai na tamata? Na ivakavuvuli lasu cava soti era sa dau tukuna tu e so me baleta na Lutu tani? Na cava beka na itavi ni Yalo Tabu vu ni veika dina, e na nodrau tavusoya e “lomada na veivaluvaluti,” na veika vinaka kei na ca? Me kaukaua beka vakaevei e na noda bula, na vakavatukanataki ni Yalo Tabu vu ni veika dina?

Sa vagalalataki vei keda me da digia na veika dodonu mai na veika ca, me da na laki vakaivotavota e na marau vakalou, se me noda ga na rarawa tawamudu.

Me vaka na ivakamacala nei Peresitedi Young, na itavi cava e qaravi mai na noda galala ni digidigi, e na noda laki rawata e muri na bula vakalou? Na cava na vuna e besetaka kina na Kalou na Tamada na vakatutu nei Lusefa me baleti keda yadudua? (Raica tale ga na 2 Nifai 2:15–16.)
Na cava beka na vuna e vakalaiva kina na Turaga me yaco na “veitawasei mai lomalagi”? Na cava beka me ra “qarava” o ira era sa cemuri mai na iserau nei Tamada? Na cava na vuna me dau “veibasai kina na ka kece sara”? Na cava na vuna me da kila rawa kina vakavinaka na “veika ca” kei na kena vakaibalebale na “ivalavala ca, na lolosi, kei na yalorarawa”, me da laki rawata kina na bula vakalou? (Raica tale ga na 2 Nifai 2:11.)
Na cava beka o rawa ni cakava mo vakayacora kina na veika sa gadreva na Turaga, mo vakaikuritaka tiko na nomu bula vakayalo, me uasivi cake sara?
Me qisia rawa beka vakaevei na Kalou, se me virikotora rawa mai, ka sega ni kauta tani mai vei keda na galala ni noda dui digidigi?

E na kauti keda ki na matanitu vakaiukuuku o Jisu Karisito, me vaka na noda dau yalodina.

E na tasevu beka evei na cakacaka ni veivakabulai i Jisu Karisito?
Mai na Veisorovaki i Karisito, eda sa na qai “kau cake vakayadua sara ki na noda dui matanitu e na veivale nei Tamana,” me vakavo ga o ira era na vakarusai. A vakamacalataka tale ga o Peresitedi Young, ni sa “levu tu kina na matanitu kei na kena iukuuku.” Na cava na vuna e sa rui levu kina na matanitu? O cei e vakatulewa ki na matanitu me lakova e dua?
E yaga beka vakaevei na nona Veisorovaki na iVakabula, me ra vakabulai kina o ira era “vakaloloma ka ivalavala ca sara vakalevu,” kei ira tale ga era “dau gugumatua ka ivalavala savasava”?