Na Cakacaka Yaco ni Yalo Tabu

A vakamacalataka o Peresitedi Brigham Young: “Niu raica e dua ka sega ni vosamacala sara, se vakataledi me vosa vei ira na lewe vuqa, ka rawa ni kaya wale ga, ‘Au sa kila, mai na cakacaka yaco ni Yalo Tabu, ni sa ivolatukutuku dina na iVola i Momani, e Parofita dina ni Turaga o Josefa Simici,’ sa cilava sara na noqu vakasama na Yalo Tabu ka serauni koya tu, meu vakavukui kina, vakararamataki, vakalagilagi, ka vakavotui tale ga vei au na bula vakatukatuka.” E kaya ni a viribaiti ka vakasinaiti kina, me kila deivaki sara kina na dina ni nona itukutuku na turaga oya (DNW, 9 Fev. 1854, 4). E vunautaka o Peresitedi Young ni “isolisoli talei nei Tamada” na Yalo Tabu (DBY, 160), ka da rawata mai na noda yalodina, me qai tuberi keda e na veika kece sara, me kauti keda yani ki na bula uasivi.

iVakavuvuli i Brigham Young

E isolisoli ni Kalou na Yalo Tabu, ka da rawata mai na lewa vuku ni Kalou, kei na noda yalodina.

Me qai kilai vinaka kina na ivakavuvuli taumada ni Kosipeli—me kila vinaka sara kina, e dodonu me vakavukui e dua na tamata mai lagi; me vakararamataki mai vua na Yalo Tabu; me daurairai na nona vakasama; ka me sa sotava tu vakaikoya na isolisoli ni veivakabulai, me qai veivotai kina vei ira na tani (DBY, 152).

Na cava beka sa lavaki tu vei keda ni da sa vakayalo? Sa lavaki kina vei keda, ni sa ivakarau tudei vakalomalagi, ka daru sega ni kila na kena itekitekivu, mai na vuna levu ga, ni a sega ni tekivu, ni tawamudu mai na gauna e liu, ki na veigauna mai muri—sa lavaki gona kina vei keda me da sobuta yani na wai ni papitaiso. Oqo na vu ni waitovure se vuniveika, ka ivakarau savasava ni vuravura tawamudu. Sobuta yani na wai, mo laki papitaiso, me ivakabokoci ni ivalavala ca, ka me qai tabaki na uluda, me da lewena kina na Lotu i Jisu Karisito me baleti ira na Yalododonu e na Gauna Oqo. Ka qai ciqoma kina na Yalo ni Dina, se Yalo Tabu (DBY, 159).

E tukuni e na Veiyalayalati Vou kei na iVola i Momani, ni a vunautaki me ra vakabauta na Turaga o Jisu Karisito e na kena vakavulici na Kosipeli, me ra veivutunitaka kina na nodra ca, me ra papitaiso me ivakabokoci ni ivalavala ca, ka qai soli vei ira na Yalo Tabu e na veitabaki; me nona isolisoli kina vei keda na Yalo Tabu, ka nona italai. Sa na veivakavukui mai vei ira na agilosi, kei na nodra vakauqeti mai vua na Yalo Tabu, kei na kena dolavi na nodra vakasama na Yalododonu me tevuki kina vei ira e na raivotu na veika sa tu e na vuravura tawamudu. Ni dau cauraki mai na ivakavuvuli dina, e na vou beka vei ira era rogoca, ia sa dodonu vinaka sara na yavu e tu kina, ka rawa ni kilai vinaka, me matata vinaka sara vei ira, ka me ra nanuma kina ni ra sa dau kila tu ga mai. E yaco rawa oqori mai na cakacaka yaco ni Yalo ni Dina, ki na yalodra na tamata yadudua [raica na V&V 6:15]. Sa na dau veituberi voli ga vei ira na luve ni tamata na veivakavukui vakalomalagi (DBY, 160).

Sa solia mai na isolisoli ni Kosipeli, me vakataudeitaki ira kina era sa vakabauta (DBY, 161).

Eda vakabauta ni sa dodonu me noda na isolisoli na Yalo Tabu … me vakatau mai na nona lewa vuku na Kalou, kei na noda yalodina; na isolisoli ka na rawa ni na vakavulica vei keda na veika kece ga, na veika mai na gauna e liu, na gauna oqo, kei na veigauna sa bera mai, ka kilikili me da dui kila, ka rawa ni da dui kila talega na veika me baleta na Kalou, ka vakatakila mai o koya na nona iTalai oqori. E italai ni Kalou na Yalo Tabu, ka sa vakacolati me talevi ira vakayadua na luve ni tamata, na yalewa kei na tagane. Ni sa vakavulici na lewe i vuravura yadudua sara mai vua ga na ivurevure ni vuku (DBY, 160–61).

Ni na dusimaki keda yani ki na bula uasivi na noda dau rogoca ka vakamuria na veivakauqeti ni Yalo Tabu.

Au sa kila deivaki tu, ni kevaka o na dau talairawarawa ki na ivakavuvuli i Jisu Karisito kei ira na i Apositolo, me vaka sa volai tu e na Veiyalayalati Vou, sa na soli ki na veitamata yadudua sara, na tagane kei na yalewa, na Yalo Tabu. … Me ra kila kina na veika sa yaco tu oqo, na veika e na yaco mai muri, kei na veika sa yaco oti. Me ra kila kina na veika vakalomalagi, na veika e delai i vuravura, kei na veika e na ruku i vuravura, na veika ni gauna, kei na veika me baleta na vuravura tawamudu, na veika era sa dui lesi kina, kei na ka era na rawata (DBY, 161).

Ke o gadreva na lewa ni Kalou … , mo rawata vakaiiko, ni sa nomu isolisoli, me vaka sa dolavi tu vei ira yadudua na lewe ni Lotu, ka lewe ni Matanitu ni Kalou. Sa nomu isolisoli ka nomu itavi, mo kila sara ni o rogoca na vosa ni Turaga, ka vakatakilai tale ga vei iko na lewa ni Turaga. Meu kaya ga ni sa nomu itavi mo bula voli me rawa ni o kila kina na veika kece sara oqo (DBY, 163).

Mo bula gona kina me vaka sa tukuni tu e na veivosa kece ka rogo mai vua na Kalou, ka ra vakavoqataka o ira na nona italai e vuravura, me yacova sara ni da sa qai bula uasivi sara (DBY, 159).

Me iUlutaga ni Vuli

E isolisoli ni Kalou na Yalo Tabu, ka da rawata mai na lewa vuku ni Kalou, kei na noda yalodina.

Na cava beka me tua vua e dua, me “kila vinaka kina” na yavu taumada ni kosipeli? Na cava na vuna? (Raica tale ga na Aisea 55:8–9.)
Me vaka e vakamacala kina o Peresitedi Young, “vunautaki na Kosipeli” na ivakavuvuli cava soti beka e vakavulici kina? E vakaibalebale vakaevei ki na nomu bula na isolisoli e so oqori, e na kena sa vakavulici vei iko na kosipeli?
Na cava beka na itavi ni Yalo Tabu e na nomu bula? Na cava na ibalebale ni kena macala vinaka vei keda na ivakavuvuli vou e so, mai na veivakauqeti ni Yalo Tabu? Mo kila vakaevei ni nomu nanuma ga na veika o vakila, o vakasamataka, se veivakauqeti kina, se vu mai vua na Yalo Tabu?
Me vaka sa vakamacala kina o Peresitedi Young, e vakatau mai na cava na kena “soli vei keda na Yalo Tabu”? Na cava beka e rivarivabitaki mai na noda sega ni muria e na noda bula na veivakauqeti ni Yalo Tabu, me da vakamuria kina na ivurevure tani ni veivakavulici?
Na cava soti beka e vakaraitaka o Peresitedi Young, ka na veivuke kina na Yalo Tabu me da kila? Na cava beka e noda itavi, me da kila kina na veika oqori? Na cava beka e noda itavi, ni da sa vakavukui e na veika oqori?

Ni na dusimaki keda yani ki na bula uasivi na noda dau rogoca ka vakamuria na veivakauqeti ni Yalo Tabu.

Me da dau kila beka vakaevei na “lewa ni Kalou”? Na cava na vuna e bibi kina me kilai na veika oqori? Na isolisoli cava soti beka eda rawata mai na noda vakasaqara, ka qai vakamuria na veivakauqeti ni Yalo Tabu, kei na nodra veivakadreti na italai ni Kalou?
Na veika cava soti beka o sa sotava mai, se o ira tale beka e so, mo vakabauta kina ni sa na vukei iko na Yalo Tabu, mo dau kila ka vakamuria na lewa ni Kalou e na nomu bula? (Raica tale ga na 1 Nifai 22:2 kei na 2 Nifai 32:2–3.)