WASE 43

Noda Qara na Dina kei na Yavu ni Noda iVakadinadina

A qai laki muridonu na nona vaqaqara o Peresitedi Brigham Young me baleta na ivakavuvuli dina ni Kalou, mai na nona ivakadinadina e dua na “tamata dravudravua vakavosa … ka kaya wale ga vua, ‘Au kila, mai na veituberi ni Yalo Tabu, ni dina na iVola i Momani, ka Parofita dina ni Turaga o Josefa Simici.’ “ A kaya o Peresitedi Young, “E na cilava na noqu vakasama na Yalo Tabu ka vakavatukanataki vua e dua, meu volekata kina na rarama, na bula vakaiukuuku, kei na bula vakatukatuka” (DNW, 9 Fev. 1854, 4). E na nona gauna ni bula taucoko, a dau saga vakaukaua sara me dau vakamuria na ivakavuvuli dina ni kosipeli, me kaya kina, “Niu qase cake tiko ga, au vinakata vakakina meu tudei dina sara e na noqu kila na Kalou, kei na ivakarau ni nona bula. Meu vakaikuritaki vakakina e na nona kaukaua o Koya sa Cecere Sara, ka me mana vakalevu kina e na kena vakatetei i vuravura na bula sautu kei na bula vakacegu, ka me ra kau vata mai … o ira era vakarorogo ki na ivakavuvuli dina, me ra kila vakaiira na Kalou kei na ivakarau vakalou, kei na nodra veiwekani kei lomalagi, kei ira na lewena. … Au masulaka niu sega ni na oka taudua ga e na tikina oqo, kei ira tale ga na Yalododonu, me da veiuasiviti cake na loloma vakalou, ka kila ka vakavinaka cake ka uasivi cake sara na noda bula e Matana” (DNW, 10 June 1857, 3).

iVakavuvuli i Brigham Young

Era gadreva e vuqa na ivakavuvuli dina, ia era na vakamuria ga e vica wale.

Era sa dau gadreva na iwase levu cake ni tamata e vuravura me ra dau caka dodonu. Sa dina sara oqori. Sa tiko ki na tamata yadua na sala me raica kina, me dei tiko kina e veigauna, ke soli me yaco vakakina, me rorovi ira kina na dina kei na bula savasava [raica na Moronai 7:15–17] (DBY, 423).

O ira na tamata yalodina e vuravura taucoko era dau vinakata me ra kila na sala dodonu. Era sa dau vakasaqara mai, ka dau vakasaqara tiko ga. Era sa dau tu e vuravura e na veigauna kece o ira era dau gadreva dina e lomadra me ra kila na nona ivakavuvuli na Turaga. Era sa dau vakaraitaka mai o ira oqori na veika vinaka, ni ra sa rawata me ra vakayacora vakakina (DBY, 421).

Me yacova sara na siga era na vakayacora kina na ivalavala ca e na siga era dau lomani kina, e kila na loma ni tamata yadua na vakasama ka na gadreva dina me duri ka saqata na ivalavala ca ka dau vakamuria ga na ivakavuvuli dodonu. E sega ni dua e vuravura oqo, me ivalavala ca sara, me sega ni rokova na tagane se yalewa vakalou ni vakadikeva e lomana—na veika savasava ka dodonu—ka me dau vakanadakui ira na wekana e na ivalavala ca, ka ra ucui koya ga. E sega tale ni dua e vuravura oqo, e na tai oqo ni veivakabulai loloma, ka se sega mada ni ivalavala ca mai, me veisaqasaqa kina vua na Yalo Tabu ni Turaga ka me vakararamataka sara na nona vakasama, ka dau taleitaka wale ga na veika vinaka, na ivakavuvuli dina, kei na veika savasava (DBY, 421).

Sa volai tu ni rawa ni da raica rawa e matada, ka sega ga ni kila; ni tu na daliga me da vakarorogo, ka sega ga ni rogoca rawa, ka tu na yalodra ka sega ga ni kila rawa. Vei kemuni ka dau bula vakayalo, ka sa dolavi tu na matamuni vakayalo, … ka rawa ni kila, ni kaukaua ka sa solia mai vei kemuni na veika vakayago, e kaukaua vata ga ni Kalou mo ni kila kina na ivakavuvuli dina [raica na V&V 88:11–13]. E ka ni lomada na kaukaua ka muri vei rau. … Era sa kila tu na udolu vakaudolu, mai na veika ni lomadra, na veika ni gauna sa oti mai, na veika ni gauna oqo, kei na veika e so se bera tiko mai, ka tautauvata ga na nodra kila na roka ni tiki ni isulu mai na matadra vakayago, se na rai ni matadra. Ni kau tani mai vei ira na rarama oqo ni lomadra, era sa na butobuto sara me vaka ga mai liu, era na sega kina ni kila na ivakavuvuli dodonu, me ra gole tani sara kina mai na veika ni Kalou (DBY, 421–22).

E gadreva dina tu na ivakavuvuli dina na yalo ka tiko e loma ni yago qele oqo, sa dau vinakata vakalevu na rarama, kei na vuku, e dau taleitaka vakalevu na yalo savasava, na Kalou kei na ivakarau vakalou; me vaka sa rui dau duavata vakavoleka sara kei na yago, sa vakacokovatataki sara na yaloda, ka vinakati vakabibi sara na duavata oqori me rau rawata ruarua kina na taucoko ni bula marau [raica na V&V 93:33–34], sa qali dina na yalo ki na ivalavala ca ni yago, ka na vorati kina kei na kaukaua ni Tevoro, me vakavo ga ke sa dau vakararamataki tiko e na yalo, ka sa daucilava na tamata yadua ka sucu mai i na vuravura oqo, kei na kaukaua ni Yalo Tabu, ka da votai kina e na Kosipeli (DBY, 422–23).

E na veivanua kece ga ka sa vunautaki mai kina na Kosipeli i Jisu Karisito, e na gauna beka oqo se na gauna mai liu, sa dau vakasoqoni ira mai na veimataqali tamata ka ra taleitaka sara na ivakavuvuli dina, ka vakalou, ka ra dau vakauqeti kina vakayalo me ra vakamuria; ia era sa raica ni ra sa vakalolomataki sara e na kedra isema vakavuravura, ka ra leqataka vakalevu na veika vakavuravura e so era na vakayalia ke ra na vakamuria na kena ivakavuvuli, ka me ra nanuma kina ni sega ni ganiti ira, sa yaco sara kina na veisaqasaqa ni vinaka kei na ca. Era na lewe vica era na vorata na vakasama vakatamata, me ra muria ga na veidusimaki vakayalo; ka ra na lewe vuqa sara vei ira oqo era vukici tani mai na veika vakasisila era dau nanuma, ka ra kubeta matua tiko ga na veika vakavuravura era dau gadreva (DBY, 434).

Sa itavi ni tamata yadua me ra dui qara na vuku kei na ivakavatuka ni ivakavuvuli dina.

Na cava beka na inaki ni noda mai bula eke? Me da tovolea me da mai marautaka e vuqa na ka, ka me da vakaikuritaka na noda vuku kei na noda yalomatua (DNW, 27 Sept. 1871, 5).

E na sega ni cavuka rawa na noda vuli, me yacova beka ni da sa vukitani. … O rawa beka ni vakasamataka oya? (DNW, 27 Fev. 1856, 2).

Ke soli vei keda na kena sala, eda na vakasinaita na noda vakasama e na kila ka, ka vakatawana na yago qele oqo e na iyautalei, na vuku vakalomalagi (MS, Okt. 1862, 630).

Na veika tale e so eda na qai goleva e na noda veiqaravi vua na Kalou, ni sa kena inaki taudua ga me virikotori kina e vuravura na dina, me da vakaikuritaki kina e na kila ka, e na vuku, e na yalomatua mai na kaukaua ni vakabauta kei na vuku vakalou, me qai rawa kina ni da bula cecere cake, ka vuku vakalevu, mai na kena eda bula kina e na gauna oqo (DNSW, 25 Okt. 1870, 2).

E rawa vua e dua ka dau vakaliuca na bula vakavuravura, me veisautaka na veika e lomana oqori e vuravura, me saga kina na vuku kei na yalomatua vakayalo, me yacova ni sa qai kila vakaikoya na ibalebale dina ni veika sa tu oqo e vuravura, me kua kina ni dau malele ki na veika vakavuravura, me vakadodonutaka sara na nona itovo ni rai (DNW, 28 Nov. 1855, 2).

Me da vaqara kina na Turaga e na lomada dina, me da kali tani mai vuravura; ni sega ni dua na tamata e taleitaka oqo, oya, se na cava tale e tu, me vakavo ke nakita me goleva kina na veika dodonu; me tosoya tiko ga na bula ni tamata ki na vuravura tawamudu, me cokonaki ira me ra rawata na bula vakalou e na yagodra vakatukatuka. … Sa nodaru itavi gona, o iko kei au, me daru vuli ka vakavukui, me cokonaki kedaru kina ki na bula vakalou, kei na bula tawamudu e na veimatanitu ka sa vakarautaki tu oqo e na vuravura tawamudu (DNW, 14 Me 1853, 3).

O koya na tagane se yalewa ka gadreva dina na ivakavuvuli vakalou, e na nona sa rogoca na ivakavuvuli ni nona Kosipeli na Luve ni Kalou, e na kena vunautaka e na dina kei na ivakavuvuli matata, e dodonu me kerea vua na Tamada, e na yaca i Jisu, se dina na veika oqori. Ke ra sega ni vakamuria na sala oqori, era na tovolea tiko ka veileti ga vakaiira e na vakabauta ni ra tamata yalodina me vakataki ira kece ga e vuravura; ia, era sa lasutaki ira ga, era dau vakawalena na veika bibi e baleti ira (DBY, 430).

Mo waraka sara na gauna o sa vakasaqaqara, ka sasaga dina sara mo kunea na dina, mo yalomatuataka kina na veika keimami sa vunautaka tiko. … Ke cakacaka dina ni Kalou, e na tudei tu ga [raica na Cakacaka 5:38–39] (DBY, 435).

E nodra itavi ka isolisoli na Yalododonu e na Gauna Oqo me ra kila ni dina na nodra lotu (DBY, 429).

Me ra dui saga vakaira me ra kila, ni dina na cakacaka eda qarava tiko oqo. E sega ni vinakati mo ni tukuna ga ni dina, mo ni vakadinadinataka sara vakaikemuni; ia, ke o ni sa kila rawa, sa na isolisoli vakamareqeti sara vei kemuni na veika o ni sa vakadeitaka oqori vakaikemuni, me tautauvata ga ni a mai vakavulica vei kemuni na Turaga, e na nona lako sobu mai (DBY, 429).

Sa isolisoli talei dina, ka veivakadeitaki ni Kosipeli kivei ira na vakabauta dina, me ra dui kila vakaiira na dina (DBY, 429).

Au sega ni vinakata me ra lakovi au mai na tamata, se lako vei ira tale e so na tacida vakayalo, me ra laki rawata kina na nodra ivakadinadina ni cakacaka oqo; me ra dau goleva ga na iVolanikalou ni ivakavuvuli dina, ka dusimaki vakamatata kina vei ira na sala, me vaka ga na kena dusimaki vua na vulagi sa wawale tu na yaca ni koro. Era na dusimaki kina, me ra lako sara vua na Tamada e na yaca i Jisu, ka sega … ni dusimaki vua e dua tale na i Apositolo, se iTalatala Qase i Isireli, me ra laki rawata mai kina na itukutuku era gadreva tu. E rawa li ni ra na laki rawata na dina o ira yadudua era lakova yani na ilakolako oqo e na yalodina? E na vukitani beka na Turaga mai na lomadina ka vaqara tiko na dina? Sega, e na sega sara ni kitaka vakakina; e na qai vakadinadinataka ga vei ira, e na veidusimaki vakayalo ni nona Yalo Tabu, na ivakamacala dina ni tikina oqo. Ni dau dolava na vakasama ki na ivakatakila ni Turaga, sa na kila vakatotolo, ka vakamatata cake na veika e so e tukuni mai, ka vinaka cake mai na veika e dau raica na mata. E sega gona ni bibi na veika eda dau raica e matada—e rawa ni vakasesei na mata—ni sa tudei ka dina na veika e vakatakila mai lomalagi na Turaga, ka na dau tu dede sara vei keda (DBY, 429–30).

Me tu vei keda na ivakadinadina ni Turaga o Jisu me da kila vinaka kina na veika dodonu kei na lasu, na cakacaka ni rarama kei na butobuto, o koya sa talai mai vua na Kalou, kei koya ka sega ni lako mai vua na Kalou, ka me da qai kila kina na veika e vinaka se ca. … E sega tale ni dua na sala e tu, se na kena ilakolako, me dua e vuli kina me qai laki Yalododonu se Kalou, ka me cokonaki kina ki na bula silesitieli; me tiko mada e lomana na ivakadinadina ni yalo ni Kosipeli (DBY, 429).

Me tiko e lomadaru, o iko kei au, na ivakadinadina i Jisu, ke sega, e na sega wale na betena na nodaru vakalecalecava tiko ni daru italai ni Kalou. Me bula caucaudre tiko e lomadaru na ivakadinadina bula oqori (DBY, 430).

E na veivakadeitaki na dina vua ka yalodina, se vakaevei sara na kena itukutuku, ni na taudonu sara ki na noda bula e na gauna e ciqomi kina, me vaka ga eda sa veiwekani kaya mai e na noda gauna taucoko sara ni bula. Sa i koya oqori na nodra ivakadinadina na lewe vuqa na Yalododonu e na Gauna Oqo, ni ra se qai rogoca vakadua na kena vunautaki na Kosipeli, … e dina ga ni ka vou sara vei ira, sa vaka era sa kila rawa tu mai e na nodra bula, ka rairai era sa yavutaki mai e na “Vakabauta Vakamomani” mai na kena itekivu ni nodra bula [raica na Joni 10:27] (DBY, 432).

Sa isolisoli ni Yalo Tabu me da kila na ivakavuvuli dina.

Era na duri e na veivanua o ira e so, ka ra na dau vunautaka ni oqo na cakacaka ni Kalou, e parofita dina o Josefa, ka vakadinadinataka tale ga na iVola i Momani, ka kila tale ga na dina ni ivakatakila e so ka soli vei Josefa Simici, ka sa i koya oqo na iotioti ni itabagauna ka icavacava ni gauna, sa dodoka tale mai na Kalou na ligana me vakasoqoni Isireli e na iotioti ni gauna, me vueti ka taracake tale ga o Saioni. … Era sa kila beka vakaevei na veika oqo? Sa dau vakavulici na tamata e veigauna mai na cakacaka ni Yalo Tabu, ka sega ni kila rawa mai na nona vakasama vakayago. E vuqa sara na itukutuku bibi sa dau dewa mai na kaukaua kei na ivakadinadina ni Yalo Tabu. … Oqo duadua ga na sala e rawa ni vakadewai kina me da kila na veika vuni ni Kalou [raica na 1 Korinica 2:9–14; 12:3] (DBY, 430).

Na Yalo Tabu duadua ga … e rawa ni vakadinadinataka vei iko ni cakacaka dina ni Kalou oqo. E na sega ni vakalasuya rawa na tamata mai na nodra vuku vakavuravura, se veisaqasaqa kaya; era na sega ni kila mai na nodra vuku wale ga, me ra vakadinadinataka kina vakaiira, se vei ira tale ga na wekadra. E na sega ni vakadeitaki mai na nodra sega ni rawa ni veisaqasaqa kaya ni sa i koya oqo na Matanitu ni Kalou, ni sa vuqa tu na yavu kei na vakasama e vuravura, ka sega ni na cakitaki rawa mai na vuku vakavuravura, ka lasu kece ga. E na sega ni vakavatukanataki rawa na ivakavuvuli lagilagi ki na vakasama ni tamata, mai na nona kaukaua ga o Koya sa Cecere Sara, me veivakararamataki ki na vakasama ni tamata (DBY, 430–31).

Me da kila rawa beka vakaevei na domona o koya na iVakatawa Vinaka, mai na voqa ni domona e dua tani tale? E rawa ni dua beka me sauma vei keda na taro oqo? E rawa niu na sauma ga. E ka rawarawa sara. Vei kemuni yadudua na tamata vuku e vuravura oqo, meu kaya ga, e rawa ni vakacalai na matamuni, kei na mataqu tale ga; e rawa ni vakacalai na daligamuni, kei na daligaqu; e rawa ni vakacalai na ligamuni e na veika o ni tara, kei na ligaqu tale ga, ia, e ka dredre sara me veivakacalai na Yalo ni Kalou, e na nona sovaraka mai vua na tamata na nona ivakatakila, kei na rarama ni vuravura tawamudu—e sega ni dau veivakacalai na ivakatakila ni Kalou. Ni dua na tamata e tasereka na ivakavuvuli vakalomalagi, ni cakacaka vua na Yalo Tabu, era na rogoca na nona qele ni sipi [raica na V&V 29:7], e na coka na lomadra na tamata na Yalo ni Turaga, e na cinavi kina e lomadra na ivakadinadina ni Yalo Tabu, me ra raica ka kila kina vakaiira na ivakavuvuli dina (DBY, 431).

E duabulu ga na ivakadinadina—dua ga na ivakadinadina, e na vakadeitaki kina na nona Kosipeli na Luve ni Kalou, sa i koya oqori na Yalo ka veilaveti kina vei ira na nona tisaipeli. Mo vakayacora ga na lomana, eda na qai kila kina se veivakaroti o koya e na lewa ni Tamada, se na vukuna ga [raica na Joni 7:16–17]. Eda na qai kila ga na veika ni Kalou e na kena vakatakilai mai vua na Yalo Tabu (DBY, 431–32).

Dau gugumatua ka masumasu voli ga. Sa soli vei kemuni mo ni dui kila vakaikemuni ni bula dina tiko na Kalou, ka sa qarava tiko e na gauna oqo na nona cakacaka, ka sa kacivi keda me da Nona italai. Mo bulataka tiko ga na veika o sa kila oqo, o na qai vakaivotavota sara kina. Mo daunanuma na masu, ka me katakata tiko na yalomudou (LBY, 245).

E yavu ni noqu ivakadinadina na veika au sa sotava mai, e na noqu bula, me baleta na veika au raica e na nodra bula na wekaqu. … Sa dau veivakadeitaki na ivakavuvuli vakalomalagi ki na nodra dui vakatulewa yadudua na tamata, ka vakakina e na nodra vakabauta, me vakabibi sara vei ira era dau gadreva me ra dina tiko e na veika e vuqa me baleti ira, me baleti koya na nodra Kalou, kei na veika e baleti ira na wekadra. … Ke rawa ni ra ciqoma vakalalai na tamata na veika e vakavulici vei ira, sa kena ivakaraitaki oqori ni rawa ni vakaikuritaki tale ga na veika era ciqoma. Ke ra sa na ciqoma vakadodonu e lomadra na ivakavuvuli taumada, kei na kena ikarua, era na qai ciqoma tale ga na kena vo (DBY, 433).

E ka dina na noqu ivakadinadina. … au kila kina ni cila tiko na siga, au kila niu bula tiko vakatamata, ka vakadinadinataka tale ga ni tiko dina na Kalou, ka bula tale ga o Jisu Karisito, ka iVakabula kei vuravura. O sa bau lesu beka mai lomalagi ka vulica kina e so na ivakavuvuli ka veikasai kei na kena e so oqo? Au kila ni Parofita dina ni Kalou o Josefa Simici, ka a soli dina mai vua e vuqa na ivakatakila. O cei beka e rawa ni vakalasuya na ivakadinadina oqo? E rawa ni na veiletitaki, ia e sega ga ni dua e na vuravura oqo e rawa ni vakalasuya. Sa mai soli kina vei au e vuqa na raivotu; au sa raica ka rogoca vakaiau, ka vakadinadinataka tale ga na veika oqo, ka na sega sara ni dua tale e vuravura e rawa ni vakalasuya. Ni rawa ni vakalasui na mata, na daliga, na liga, kei na kilakila kece sara ni noda bula, e sega ga ni na vakalasui rawa na Yalo ni Kalou, ni na vakasinaiti sara na loma ni tamata e na vuku e na nona vakauqeti mai na Yalo oqori, ni sa na qai rai kina e na matana vakayalo, ka na raica rawa kina na veika e so ka na sega ni vakalasuya rawa na tamata. Na veika au sa mai kila tu oqo me baleta na Kalou, me baleti vuravura, kei na veiliutaki vakamatanitu, au sa vakauqeti kina mai lomalagi, ka sega ni rawata wale ga e na noqu kaukaua vakatamata, meu vakasuka ga vua na Kalou na lagilagi kei na veivakacaucautaki (DBY, 433).

Ni da sa kila na dina, e dodonu me da qarava na veika dodonu e na matanitu ni Kalou.

E dua na yavu taumada ni ivakavuvuli ni veivakabulai, me da kilai koya rawa mada na Tamada ka noda Kalou. E vakavulici e na iVolanikalou, ni sa i koya oqo na bula tawamudu, “me ra kilai kemuni na Kalou dina duaduaga, kei Jisu Karisito ko koya ko ni a tala mai [raica na Joni 17:3];” ka sa tukuni tale ga eke ni sega tale ga ni da na laki rawata na bula tawamudu ke da sega ni kila tu na veika oqo (DNW, 18 Fev. 1857, 4).

Sa tu vei keda na yalayala, ni na soli me vakaikuritaki vei keda na veika kece ga, kevaka eda na vakasaqara taumada na matanitu ni Kalou kei na kena yalododonu [raica na 3 Nifai 13:33]. Me kua kina ni da dau lomatarotaro, me da kila rawa mada na sala me da vakadonui kina mai vua na Tamada na Kalou; me da gadreva tale ga na sala me da vueti kina mai na veicala e vuqa ni vuravura oqo, mai na yalobutobuto kei na yalovakatitiqa, mai na yalowele kei na veika vakatani e vuqa sa takalevu tu oqo, me da kila rawa kina na sala me da taqomaki kina e vuravura oqo, ka dau vunautaka kina na kosipeli, me da taracake na matanitu, me tauyavutaki kina na Saioni ni noda Kalou (DNW, 11 Jan. 1860, 1).

Au … sa dau taleitaka vakalevu meu vakananuma vakawasoma, ka dau vakamacala me baleta na ivakavuvuli ni vuravura tawamudu. Me yavu ni noda vakabulai na noda sa kila tu na veika oqori, ka virikotori mai me veivakayalomarautaki ka veivakacegui vei keda. Na tikiqu beka ka tawamudu na nona bula, ka dau vakadeitaki mai na ivakavuvuli ni vuravura tawamudu, e a bula me mai vakarusai? E na laki cava koso beka na tikina oqori e na kena yavutaki tiko ga e na ivakavuvuli dina? Sega. … Mo vakatakerea na Yalo Tabu vua na Turaga, ka mo kua ni dau guce kina, me yacova ni sa mai bula e lomamu na nona Yalo Tabu, tawamudu na kena talei. Me caucaudre tawamudu e lomamu na cina ni Turaga, me vaka sa kena dodonu (DNW, 11 Jan. 1860, 2).

Sa tu oqo vei keda na vosa ni bula tawamudu, sa noda vakakina na isolisoli ni lagilagi, na bula vakatukatuka kei na bula tawamudu sa bera mai, ia o na dau saga beka mo rawata na isolisoli talei oqori? E rawa li ni o bula e na kena ivakarau, mo laki rawata kina na nomu idabedabe e na matanitu ni Kalou, se mo dau davo ga ka moce, ka qai laki tasevu sara i eli? (DNW, 1 Okt. 1856, 3)

Tovolea mo dau bula dodonu, me kua ni yavutaki e na yalotarotaro, ni sa rui ka talei ga, savasava, uasivi, e rairai vinaka ka daumaka sara, ka veivakabulai vakayalo; sa nakiti tu me mai vakamarautaka sara na lomada, me vakalevutaka na marau ni lomada, ka me vuabale sara kina na tamata, e na kena soli vua na rarama, lagilagi, kei na nona vakavukui (DBY, 428).

Me iUlutaga ni Vuli

Era gadreva e vuqa na ivakavuvuli dina, ia era na vakamuria ga e vica wale.

• Me vaka sa vakamacala kina o Peresitedi Young, na cava beka e vakavuna me ra “dau gadreva na iwase levu cake ni tamata e vuravura,” me ra dau caka dodonu,`ka vakasaqara na ivakavuvuli dina?

• Na cava beka na vuna e dau laki vagolei vakatani kina ki na ivalavala tawadodonu na nodra bula na lewe vuqa, ni ra sa mai kila rawa na dina? Na cava beka sa yaga vakalevu vei iko, e na nomu bulataka tiko na ivakadinadina o sa qarava mai?

Sa itavi ni tamata yadua me ra dui qara na vuku kei na ivakavatuka ni ivakavuvuli dina.

• Na cava beka e dodonu me noda sasaga vakavuli? Na cava beka me da vakayacora, me kua kina ni da domona na veika vakavuravura?

• Me da kila beka vakaevei na ivakavuvuli dina ni Kalou? E na vukei keda beka vakaevei na noda ivakadinadina me baleti Jisu Karisito, me da kila kina na ivakavuvuli dina se lasu?

Sa isolisoli ni Yalo Tabu me da kila na ivakavuvuli dina.

• Na sala cava beka eda na kila kina na dina ni kosipeli, ni sa i Jisu ga na Karisito, ka da sa mai vakaitavi tu oqo e na cakacaka ni Turaga? Na veika cava soti beka o sa vulica kina ni rawa ni veituberi ki na nomu bula na Yalo Tabu, ke o dolava kina na katuba ni nomu bula?

• Na cava beka na vuna, e na sega ni vakadinadinataka se vakalasuya rawa kina na vuku vakatamata ni bula dina tiko na Kalou, kei na dina ni kosipeli? Mai na noda kilakila vakayago, e rawa ni da vakacalai tale ga, ia me vaka e vakamacalataka o Peresitedi Young, na cava beka e na “dredre sara me veivakacalai”?

• E rawa beka vakaevei me qaqaco kina vakaoqori na ivakadinadina nei Peresitedi Young? Me da vaqaqacotaka beka vakacava na noda ivakadinadina? Na cava beka mo dau vakayacora, mo ivakadinadina qaqa cake ni nona bula dina tiko na Kalou?

Ni da sa kila na dina, e dodonu me da qarava na veika dodonu e na matanitu ni Kalou.

• Na cava beka e yalataka na Turaga vei ira ka ra “vakasaqara taumada na matanitu ni Kalou kei na kena yalododonu”?

• Me vukei keda beka vakaevei na veika vakalou me da laki rawata kina na veivakabulai? Me da laki rawata beka vakaevei na “idabedabe e na matanitu ni Kalou”?

E qai kerea vakabibi o Josefa Simici, ka dau wilika vakavinaka sara na iVolatabu, me vukei koya na Kalou.