Yalomatua ki na Veisorovaki i Jisu Karisito

A vola na veika e so e muri qo me baleta na Veisorovaki o Peresitedi Brigham Young, vua na luvena tagane: “Me laki takiveiyaga vei keda na veisorovaki vakalou, sa dolavi vei keda na yaga ni veika a qarava oqori na noda Turaga ka noda iVakabula—me da vakaivotavota kina—me da taukena vakadua, ka taucoko sara, ia, e rawa ga oqori mai na noda yalodina e na noda vakamuria na noda veiyalayalati kei na noda itavi, me da vakayacora tiko na ivunau vakalou sa virikotori mai vei keda” (LBY,259). A vunautaka o Peresitedi Young ni yavutaki na vakanuinui kece ga me baleta na noda qai vakabulai, mai na nona Veisorovaki na iVakabula, o Jisu Karisito.

iVakavuvuli i Brigham Young

A vakacabora o Jisu Karisito na veisorovaki vakalou e na vukuda na lewe i vuravura.

E yavu ni nodra vakabauta na Yalododonu e na Gauna Oqo na isoro a vakacabora na iVakabula, kau gadreva tale ga me ra kila na iTalatala kei Isireli na yavu ni ivakavuvuli, me baleta na kena vakacabori na isoro me baleta na noda kawatamata e vuravura, me rawa ni ra qai vakamacala kina (DNSW, 18 Oks. 1874, 2).

A lako mai o Jisu me mai tauyavutaka na nona matanitu vakayalo, se na bula vakaivakarau, me da na laki bula vakacerecerei kina vakalou, ni da sa Kalou, na yalo ni veitamata yadua, me rawa ni ra vakaivotavota kina e na isolisoli ni veivakaturicake mai na mate, kei na itutu vakaveiliutaki e vuravura, e na gauna e veisautaki kina me nona na Kalou kei Karisito na veimatanitu e vuravura oqo. A lako mai me mai vakaraitaki koya kina ni sa i koya na iVakabula kei vuravura, me vakadavea na nona dra e na icabocabo ni veisorovaki, ka dolava na sala ni bula vei ira vakayadua sa vakabauti koya (DNW, 13 Oks. 1862, 1).

A mai tukuna vei keda o Josefa [Simici] ni Karisito o Jisu—na Dauveisorovaki me baleti keda na tamata vua na Kalou—ka iVakabula kei vuravura. A tukuna mai vei keda ni sega ni dua tale na yaca e na lomalagi e cake, se ruku i lomalagi, ka na sega sara ga ni qai dua tale, me veivakabulai vei keda na kawatamata kece ga e vuravura, me da laki bula rawa kina kei koya na Tamada, e na vukuna wale ga, kei na nona veiqaravi o Jisu Karisito, kei na veisorovaki ka sa vakayacora mai Dela i Kalivari. A vakamacalataka tale ga o Josefa ni lavaka na iVakabula na talairawarawa vakamatailalai ki na ivunau kece sara, na veicakacaka vakalotu kei na ivakaro ka sa virikotori tu me baleta na nona matanitu, ia ni da vakayacora na veika e lavaki oqori, eda na vakaivotavota sara e na isolisoli talei sa yalataki tu e na nona Kosipeli (DNW, 22 Okt. 1862, 1).

Na gauna e vakawaleni kina na veisorovaki ni noda iVakabula, e na gauna sara ga oqori, e na kena caka ga e dua na ka oqori, sa na vakarusai tale ga kina na vakanuinui ni veimatalotu vakarisito me baleta na nodra vakabulai, ka na vorolaka tale ga na yavu ni vakabauta, ka na sega na tikina me ra duri rawa kina. Ia ni sa yali, sa na vakatawayagataki tale ga na ivakatakila taucoko ni Kalou ka vakacadrava mai ki na matanitu vakajiu, vei ira na veimatanitu tani, kei na kena e vakatakilai mai vei keda, ka sa na mai taqusi tani e na gauna vata ga oqori na noda vakanuinui kece (DBY, 27).

Mai na isolisoli oqori ni Veisorovaki, ka rawa ni qarava duadua ga na Karisito, sa dolavi kina vei ira na luve ni Kalou na bula e na nona matanitu vakaiukuuku.

Eda vakabauta na Yalododonu e na Gauna oqo na nona Kosipeli na Luve ni Kalou, ni yavutaki e na dina. Eda vakabauta na papitaiso e na veivakabokoci ni ivalavala ca, ni da papitaiso vakaikeda, se vakaveisosomitaki; eda vakabauta ni iVakabula kei vuravura o Jisu; eda vakabauta ni o ira vakayadua era na laki vakaivotavota e na bula vakaiukuuku e na veimatanitu sa virikotori tu, era na rawata ga mai na nona sa sauma o Jisu, e na nona veisorovaki (DBY, 30).

A digitaki o Jisu, mai na ivakatekivu, me sorovaki keda mai na mate, ka sotava kina na veika rarawa e vuqa e na nona mate e na kauveilatai (DBY, 27).

Meu kaya kina me baleti Jisu kei na veisorovaki (ni sa volai vakakina, ka tudei tu na noqu vakabauta), ni sa mate mai na Karisito e na vukuda kece ga. Sa mai sauma taucoko kina na noda dinau, ke o votai e na nona isolisoli se sega. Ia ke da valavala ca tiko ga, da dau vosalasu, butako, se vakaucaca se kakase, me da veivutunitaka ka biuta tani sara na ivalavala ca oqori, me takiveiyaga kina vei keda na dra ka vakadavea oqori na Karisito. Ke sega, e na sega wale ga ni vakabetena vei keda; me da veivutuni rawa mada, me qai vakavatukana kina vei keda na yaga ni veisorovaki. Me ra tarovi ira sara mai na caka cala o ira ka ra se ivalavala ca tiko; me ra kua sara ni ra valavala ca e na nodra bula, e na caka cala lailai ka ra se cakava tiko; ka me ra bula e veisiga e na ivakatakila ka sa soli mai, me ra qai vinakata kina na wekamu me ra vakadadamuria na nomu ivakarau. Me da nanuma tiko ga ni sega ni da na ulabaleta na iyalayala ni noda vakabauta, ni veika kece sara e tu e namaki me da vakamuria!(DBY, 156–57).

E na veivakaturi o Jisu, mai na veisorovaki sa qarava mai, ki na luvei Atama yadudua, na luvena tagane kei na yalewa, me vakavo ga vei ira na luvena na dauveivakarusai, ka ra na biu i eli. … E dina ga ni da na sega ni vakasabusabutaka na loloma vakalou e na noda ivalavala ca, me da oka kina me agilosi ni Tevoro, me da vakaturicake kina me noda na matanitu vakaiukuuku (DBY, 382).

E isevu ni veivakaturi cake o Jisu mai na luvena vakayago na Kalou, me vaka o ni sa kila rawa tu. A sega tale ni dua mai na gauna e liu e vakaturicake mai na mate, me oka kina o Inoke, Ilaija, o Mosese, se dua tale ka sa bula oti e vuravura, se vakaevei sara na uasivi ni nona bula eke, me yacova sara ni sa laki vakayadrati na yago i Jisu Karisito e na ibulubulu mai vua na agilosi. Ni sa i koya sara ga na imatai ni mate ka vakaturicake tale. Sa i koya ga na iTaukei ni tucake tale—na imatai ni tamata ka a bula tale e vuravura, ni sa vakaivotavota e na lagilagi ni veivakaturicake tale (DBY, 374).

E sega ni veivakurabuitaki vua na kena yaco. Ni sa tu ga e na qeteqete ni ligana na lewa me baleta na bula kei na mate; e tu vua na lewa me vakadavora na yagona e na ibulubulu, ka tu tale ga vua na lewa me tucake kina mai na mate. Oqo na ka e a mai tukuna, ka dodonu me da dau vakabauta kevaka eda vakabauta na itukutuku me baleta na iVakabula, kei na nodra vosa na i Apositolo, me vaka e volai tu e na Veiyalayalati Vou. E tu ga vei Jisu na lewa oqo, me lewai koya tiko ga; a solia mai vua na Tamada; me vakaiyautaki kina, ka sa tu ga vua na lewa me davo sobu kina e na ibulubulu, ka qai tucake tale mai na mate (DBY, 340–41).

Sa qai yaco rawa na veivutuni mai na Veisorovaki nei Karisito, vei ira era vakabauta, ka veivutuni, ka talairawarawa vua na Kalou.

A soli me curu mai i vuravura na yalobutobuto kei na ivalavala ca. Sa qai kania na tamata na vuanikau tabu, me vaka sa virikotori mai e na lewa ka sa virikotori mai na vuravura tawamudu, me rawa kina ni vakavolekataki na lewe i vuravura ki na yavu ivakavuvuli kei na vakamawe ni vuravura ni butobuto, me rawa ni ra kila kina na bula wiwi, kei na kamica ni bula, na veika vinaka kei na veika ca, me rawa ni ra kila kina na rarama kei na butobuto, me ra qai vukei kina e na nodra serauni tiko ga e veigauna (DBY, 61).

E na veivakabulai na Kosipeli oqo ki na matavuvale ni lewe i vuravura kece ga; ni na sorovaki na noda ivalavala ca mai na dra nei Jisu ka a vakadavera, kevaka eda na goleva na veika sa virikotori mai me da qai rawata kina; ia me da vakamuria na veika sa lavaki kina, ke sega, e na ka wale ga e na noda bula (DBY, 7–8).

Ni da sa Yalododonu, sa lavaki me vakamalumalumutaki sara na ivalavala ca e tu vei keda yadudua, me yacova sara ni sa bokoci vakadua na veigagadre ca kece ga ni yaloda, me vakalou kina na veika kece ni lomadra, ka vakarorogo ki na loma i Karisito (DBY, 91).

Ni vakatau ga mai na noda yavutaki tudei tiko e na veisorovaki i Karisito, na loloma titobu nei Tamada, kei na yalololoma ni agilosi kei na loloma cecekia ni Turaga o Jisu Karisito e na veigauna kece sara, me da qai cakava kina na noda igu e rawa ni da rawata, me vakatikitikitaki kina mai lomada na veika tawakilikili e so oqori, me da vakamoce vakadua kina mai na vuravura oqo, ka goleva yani na matanitu silesitieli (DBY, 60).

Me iUlutaga ni Vuli

A vakacabora o Jisu Karisito na veisorovaki vakalou e na vukuda na lewe i vuravura.

Na cava na vu ni nona a lako mai i vuravura o Jisu, me mai tauyavutaka kina na Nona “matanitu vakayalo”? Na cava tale na vu ni Nona lako mai i vuravura? E “dolava vakaevei [o Jisu] na sala ni bula vei ira era sa vakabauta”? Me da dau veituberi beka vakaevei vei ira na noda veivuvale, me rawa kina ni da “na laki bula vakacerecerei kina vakalou, ni da sa Kalou, na veiyalo ni tamata yadua”?
Me da “vakabulai [vakaevei] na kawatamata kece ga e vuravura, me da laki bula rawa kina kei koya na Tamada” me ra “vakaivotavota kina e na isolisoli kece ga ka sa soli tu e na Kosipeli”?
Me vaka e tukuna o Peresitedi Young, na cava beka e na yaco ki na veimatalotu vakarisito e vuravura, ke sa vakawaleni na Veisorovaki nei Jisu Karisito? (Raica tale ga na 2 Nifai 9:6–9.)
Mo railesuva tale na veitikiniivola e so oqo ni ivolanikalou, me ra kila kina na yavu bibi e so ni Veisorovaki: Mosaia 13:28, 32–35; Alama 7:11–12; 34:9–12; Moronai 8:8–12; V&V 88:6.

Mai na isolisoli oqori ni Veisorovaki, ka rawa ni qarava duadua ga na Karisito, sa dolavi kina vei ira na luve ni Kalou, na bula e na e na nona matanitu vakaiukuuku.

A digitaki ni se bera ni buli o vuravura, me mai [mate o Jisu, mai veisorovaki e na vukuda.” A vueti keda mai na mate vakayago, kei na veitawasei mai vua na Kalou. E vakatokai kina me Veisorovaki. A vakamacalataka o Peresitedi Young ni a “sauma vakadua na noda ivalavala ca kece ga [na Veisorovaki nei Karisito], se o na laki vakaiv otavota e na isolisoli se segai.” (Raica tale ga na Ilamani 14:15–18.) Na cava beka me da vakayacora, me rawa ni yaga vakalevu kina e na vukuda na Veisorovaki?
A vunautaka o Peresitedi Young ni ra na laki vakaivotavota wale ga e na nona matanitu vakaiukuuku o ira na lewena, mai na Nona sa volia vei ira o Jisu, e na Veisorovaki a qarava. A sa sauma beka vakaevei na ivalavala i Atama? E sauma beka vakaevei na noda ivalavala ca? (Raica tale ga na 2 Nifai 2:8–10.)
A qarava beka vakaevei o Jisu, me vakatokai kina me “iTaukei ni tucake tale”?

Sa qai yaco rawa na veivutuni mai na Veisorovaki nei Karisito, vei ira era vakabauta, ka veivutuni, ka talairawarawa vua na Kalou.

Na cava na vu ni kena “curu mai i vuravura na yalobutobuto kei na ivalavala ca”? Na cava e yaco mai na Lutu nei Atama? (Raica tale ga na 2 Nifai 2:22–25.)
Eda vueti e na vuku ni Veisorovaki, mai na noda ivalavala ca, mai na lewa sa “virikotora mai” na noda Dauveisorovaki. Na cava soti beka e lavaki kina? (Raica tale ga na 2 Nifai 2:26; V&V 18:44.)
Na veivuke vakalou cava beka me da na qara, me rawa kina ni da na “vakamoce vakadua kina mai na vuravura oqo, ka goleva yani na matanitu silesitieli”? Na cava beka e lavaki kina vei keda?

Jesus in Gethsemane — A dau vunautaka o Peresitedi Brigham Young, ni “o ira vakayadua era na laki vakaivotavota e na bula vakaiukuuku e na veimatanitu sa virikotori tu, era na rawata ga mai na nona sa sauma o Jisu, mai na nona veisorovaki” (*DBY*, 30).