Gadreva na Bula Vakarorogo

A lewa o Peresitedi Brigham Young na nodra biuvanua e vica na udolu na Yalododonu, me ra laki vakoro i Saioni, ka veidusimaki voli e na veika lalai sara, me vaka na nodra dau vakaisasa vata na manumanu bulabula, me kua ni ra vakaisa kei na manumanu malumalumu. Ia, sa vakarota tale ga vei ira na Yalododonu me ra dau ligakaukaua ka qarava vinaka na veika e baleti ira, ka dau digidigi vakamaqosa. A vakarota kina: “Se lavaki oqo vei keda yadudua sara, na veituraga, marama, kei ira na gone ka ra duavata e na cakacaka oqo, ka vakasoqoni tiko i Saioni, me ra dui qarava vagumatua na kena tosoi tiko ga i liu na cakacaka ni Kalou, me taracake kina o Saioni, kei na kena vueti vakayalo. … Ni da gugumatua e na ogaoga eda qarava kina … sa na qai soli kina na igu kei na nodra veiqaravi maqosa na Yalododonu, ka ra na sega beka ni rawata rawa, ke sega ni ra vakacolati ka nuitaki vakabibi e na nodra dui iyau” (LL, 220–21). E vunautaka kina o Peresitedi Young ni “solibula ga ka namaka na Turaga vei ira na nona tamata, na nodra muria vakamatailalai na nodra dui yalayala” (DBY, 225).

iVakavuvuli i Brigham Young

Sa tu vei keda na galala me da digia kina na veika vinaka, se na veika ca, sa sega ga ni qai digitaki na vua ni noda digidigi.

Sa soli tu ki na veitamata yalomatua kece na lewa ni nodra digidigi; ka ra na vakabulai se cudruvi mai na lewa oqori ni nodra digidigi (DBY, 62).

E rawa beka ni ra vakasamataka rawa na tamata ni sa dodonu me biu tale e matadra na veivakavuvuli veibasai e so, ke sega, e na sega ni okati me bula vakatovotovo na kena eda donuya tiko oqo, ni da na sega ni vakatovotovotaka kina na galala ni digidigi ka sa soli mai vei keda? Era kila li ni da na sega ni laki rawata na bula tawamudu, ke sega ni da se kila rawa yani, mai na veika e vuqa eda sotava e na noda bula, me baleta na ivakavuvuli ni veika dodonu, kei na ivakavuvuli ni veika ca, na rarama kei na butobuto, na dina, buladodonu, kei na yalosavasava,—ka vakakina na veika ca, na ivalavala ca, kei na veivakacacani? (DBY, 66).

E rawa ni kunekunetaka ga e lomana ka lewa na tamata na ka me cakava, ia e sega ga ni qai lewa na itatase ni nona ivalavala (DBY, 63).

E dravusakulukulu sara ni dua e se bula tiko oqo e delai i vuravura, ka sega ni tu vua na lewa me baleta na nona bula, se me vakarusai koya ga; ka sa vakaoqori e na veimatanitu kece ga (DBY, 67).

E vakaiyalayala na lewa ni digidigi, ki na veika kece kei na veika bula kece ga, me kua ga ni laki tagutuvi na lewa oqori. Me digidigi na tamata me baleta na bula se mate [raica na Ilamani 14:31], ke digia na mate, sa na yalani kina, ni sa na vesu kina, ka na sega ni vakatovotovotaka rawa tale me veisaqasaqa kina ki na lawa, ni sa na qai vakadodonutaki ka totogitaki mai vua na Kalou Kaukaua. (DBY, 63).

E rawa ni dua e solia tani na lewa ni nona digidigi, se na nona isolisoli ni bula oqo, se isolisoli vakaulumatua, me vaka e a vakayacora o Iso mai liu, ia ni sa solia tani, e na sega ni qai rawata tale, ka sa kilikili kina me da qaqarauni kina vakavinaka, me kua ni da vakayalia na noda lewa oqori ni galala, ka sa soli mai vei keda. Oqori ga na duidui ni buladodonu kei na ivalavala ca, na bula tawamudu se na mate, na bula marau se na rarawa, ni na sega ni vakaiyalayala vei ira era na bula vakalou na nodra isolisoli, ni na tomani tiko ga na veivakalougatataki era sa dui taukena tu, ka vakakina na nodra matanitu yalataki, nodra itikotiko vakaturaga, kei na nodra kaukaua kei na lewa ni veika kece ga, ni ra na vakaikuritaka tiko yani ki na vuravura tawamudu; ia o ira era na besetaka na veika sa soli tu oqori, ni ra vakawalena na loloma titobu ni Turaga ka sa solia mai, ka ra sa vinakata me ra biu tani mai na nona iserau, me ra laki veitokani voli ga kei ira na tevoro, sa na tagutuvi kina na nodra dui lewa ni digidigi, ka yalani kina na nodra dui bula (DBY, 63–64).

E sega ni dau veivakasaurarataki na Turaga me dua e ciqoma na Kosipeli, kau sega ni vakabauta ni na veivakasaurarataki tale ga e na kena bulataki tiko, ni ra sa ciqoma yani na kosipeli (DBY, 64).

Sa solia tu vei ira na lewa ni nodra dui digidigi, me vinaka se ca; ia e se tu ga e ligana na itatase ni noda digidigi (DBY, 62).

Sa virikotori mai e na ivakaro tawamudu ka sa bulataka tiko, kei ira e na nodra vuravura tawamudu na Kalou, me dau veivakadonui na tamata yadua, ni bera ni qai vakatulewa vakadodonu na Dauniveibuli (DBY, 65).

Au na sega ni veivakasaurarataki i lomalagi vua e dua na turaga se marama. Era nanuma tu e so ni rawa ni ra veitogolaki yani i lomalagi, ni sega ni na yaco vaqori, ni duiduiyavu na veika e baleti keda, me vaka ga na nodra dui bula ga na Kalou. Me kua ni ra dau togoraki na tamata, ni na kunekune na yaloka ni dilio o ira era yaco i lomalagi mai na nodra togoraki vei ira era veivakarerei e na bukawaqa kei eli (DBY, 64).

E rawa ni o kila se o sa dusimaki tiko ki na veika dodonu se cala, me vaka ga na nomu sa kila vinaka tu na nomu sala lesu i vale; ni oka vata kei na ivakavuvuli yadudua ni Kalou na kena yalo me vakadeitaki kina ki na vakasama ni tamata yadua na kena dina, ka sega sara ni dua na ilesilesi ni Kalou vei ira na lewe i vuravura, ka sega ni sala vata mai kei na kena ivakadinadina (DBY, 65).

E rawa beka ni da kaya ni na kautani mai vua na tamata na nona galala, e na nona sa lewa e lomana me vakayacora na lewa ni Kalou? Me bubuluitaki beka vei cei na tamata, me ivakadinadina ni nona galala ni digidigi? Meu kaya ga ni sega ni dua na betena na kena caka, ka sega tale ga na betena me butako se vakayacora e dua na ka cala. Au rawa ni vakadinadinataka i lomalagi, kei ira kece na lewe i vuravura niu kunekunetaki mai e na bula galala, ka sa tu na noqu galala e na mata ni Kalou, vei ira na agilosi kei ira na tamata, e na noqu tekiduru meu masu, ka vakavatukanataki tale ga, me vaka ga au lako ka laki bubului. Sa tu vei au na lewa meu kacivi iratou vata na noqu matavuvale e na so na gauna, me keitou masu vata kina, kau vakabauta ni vakavatukanataki kina na noqu bula galala, me vaka ga na noqu galala ni digidigi keu na laki butako, vosavosa ca, vosa lasu, se laki mateni (DBY, 65).

Eda vakabobulataki beka mai na noda talairawarawataka na veika matailalai sara? Sega, e sala duadua ga ka sa virikotori tu oqo e dela i vuravura me daru vagalalataki kina. … Ia e ka lasu sara ke tukuni, niu sega ni vakamuria na noqu lewa, me vaka na noqu dau masu, se vosavosa ca. … O koya e dau talairawarawa vakamatata ki na veika e lavaki mai Lomalagi, e vakamuria tiko na galala ni nona lewa, ka vakatovotovotaka tiko na nona galala, me vaka ga ke vakabobulataki tu ki na gagano ni lomana. … Na ka ga e lavaka vei keda na Turaga me da talairawarawa ki na lewa ni bula. Na solibula ga e namaka na Turaga vei ira na nona tamata, me ra dau vakamuria vakavinaka na yalayala eda sa vakayacora vua na Kalou, me da dau qaravi koya ga e na yalodina (DBY, 225).

Eda sa na cabeta na bula vua na Kalou Kaukaua, mai na noda talairawarawa ki na dina.

E ivakavuvuli matata na talairawarawa, e rawarawa, ka rawa ni dau vakatovotovotaki, ka rawa ni o kila rawa (DBY, 220).

Sa kalougata dina o ira era dau vakamuria na vosa e vakarota na Turaga vei ira, ia era kalougata vakalevu cake o ira era talairawarawa ki na veika e sega ni ra vakaroti kina (DBY, 220).

Ke da dau rogoca na ivakaro, eda na sa na uasivi cake duadua e vuravura; ni da na ramase kina me vaka na cina e na delana, ka sega ni tabonaki rawa, se vaka na kadrala e na kena itutu dina DBY, 219).

Ke o gadreva ka taleitaka na veitokoni nei Tamada Vakalomalagi, dau vakayacora na nona lewa (DBY, 223).

Ke da vakasinaiti tu e na Yalo ni Dina, kei na Yalo ni Turaga, se vakaevei sara na veivosa e voqa mai lagi, ni vosa ga na Kalou, me ra kailavaka ga na nona tamata, “Aleluya! me vakacaucautaki ga na Kalou! Keimami sa rawa ni ciqoma na veivosa oqori, ni ra vosa dina” (DBY, 219).

Au sa nuitaka tu meu raici ira na veitacini, e na kena sovaraki vei ira na dina, mai na nodra rogoca na veivosa oqori, ni veiwekani sara na veivosa oqori ki na dui lomadra, ka me ra vosa yaga vei ira, ni veisotari vinaka kei na veika ni lomadra, ka me kailavaka kina e lomadra, “E vakavatukana e na veivosa oqori na Yalo ka tu oqo e lomaqu; au marautaka vakalevu, me kequ kakana, ka mequ gunu; na mataniwai bula ki na vuravura tawamudu. Sa veisotari dina, ka sega ni veisaqasaqa kei na noqu nanuma (DBY, 219).

Ke o dau cegu vakalekaleka ka qai kaya, e sega niu na vakasala vei iko e na tikina oqo, e sega niu sauma rawa na nomu gagadre me baleta na iulutaga oqo, ni sega ni cakacaka yaco tiko i lomaqu na Yalo Tabu, meu kua ni tukuna kina i vuravura raraba na nomu lecaika tiko, ka o na vakavukui vakatotolo cake mai na nomu vakasala e na vukumu, ka sega ni veivakauqeti kina na Yalo Tabu dauvakatakila (DBY, 219).

O ira vakayadua sara na lewe ni Matanitu ni Kalou, era na duavata ga e na ivakasala me baleta e dua na iulutaga, ke na vosota me taura mada na lewa nei Karisito me baleta na tikina oqori. Me da na qai duavata kece kina e na vosa kei na lewa, me ra duavata kina na tamata kece ga (DBY, 219).

Me ra yalovata ka duavata kina o ira oqo. Me ra dau kila na lewa ni Kalou, ka dau vakayacora sara, ni dina ga eda sa kila tu na lewa ni Kalou, e vinakati vakakina me da vakaliuca na lewa ni Kalou ka da sa kila tu, e na veika kece sara e lomada, kei na noda ituvatuva (DBY, 221).

O ira vakayadua sara na Yalododonu Edaidai ka ra vakamuria na nona vosa na Turaga, ka sa vakavotui yani me baleta na nodra bula vakapolitiki, nodra bula vakaveimaliwai, kei na bula vakailavo, meu kaya kina, ka vosa kina vakadoudou, ni ra na vakavukui e na veika e cecere cake mai na nodra vuku na luve ni butobuto, se o ira na luve i vuravura. Au kila na veika oqo mai na ivakatakila e so ni Turaga o Jisu Karisito, kei na noqu sasaga ga vakaiau. O ira ka ra sa muria na ivakaro ka sa soli vei ira me baleta na nodra vakayago, era sa na toroyacake kina na nodra dui bula vakayago, ka vakayalo tale ga (DBY, 219–20).

O ira kece sara ka na rawata na bula tawamudu, ka vakabulai, era na rawata wale ga mai na nodra vakabauta na Luve ni Kalou, ka dau talairawarawa ki na ivakavuvuli e so ka sa virikotora tu. E rawa tale beka ni da tuva e dua na kena ilakolako vou, me yavu ni veivakabulai? Sa dredre dina sara (DBY, 223–24).

Na sala vinaka duadua me tauyavutaki kina na lotu kei Lomalagi, mai na noda dau bulataka tiko, ka sega ni bolemate kina. Au sa kila tu ni ra lewe levu sara na Yalododonu Edaidai era na bole mate me baleta na nodra lotu, ka sega ga ni rawa ni ra bulataka. E sega tale na ivakadinadina vinaka cake me soli vua na Kalou, vei ira na agilosi, kei ira kece ga na tamata, me vakavatukana ni nodra yalodina e dua na kawatamata ki na nodra lotu, mai na nodra sa veivutunitaka dina na nodra ivalavala ca, ra muria na ivakaro me baleta na papitaiso me ivakabokoci ni nodra ivalavala ca, ka qai dau caka dodonu tiko ga e veisiga (DBY, 221).

O vakabauta ni ra dau vakarorogo ki na dina o ira na tamata, e na vuku ni kena dina, ka ra sega ni dau taleitaka? Sega, e na sega ni ra vakayacora vakakina. Ni vakamuri ga na dina ke taleitaki. Ni ra na laki bula wale ga e na iserau ni Kalou Kaukaua mai na nodra vakamuria vakamatailalai na yavu dina (DBY, 220).

E tiko beka e dua na maqosa ka rawa ni ra vukici kina me ra talairawarawa? E duabau ga. Ke rawa wale ga ni o ni rawata na iTalatala Qase ni Isireli na maqosa ni kena vakadewai ki na lomadra na tamata, o ni sa qai raica kina na nodra talairawarawa. Oqo ga na maqosa e vinakati. Me vakavulici vei ira na veika dina, me vakavulici vei ira na ivakavuvuli dodonu; me vakavatukanataki vei ira ni na yaga vakalevu sara vei ira me ra muria na sala oqori, o nanuma beka ni ra na vakamuria na sala oqori? Era na goleva (DBY, 226).

Ni da sa bula e na Yalo ni Dina, eda sa vulica kina me da dautalairawarawa, ka vosota na veivunauci.

Era na vakaivotavota e na bula vakalou o ira na Yalododonu ka ra dau bulataka na nodra yavu ni lotu, ni ra na sega sara ni cakitaka na ivakatakila ni Turaga, ka sa solia tu, se se bera mai, io ke ra na sotava na ivakavuvuli vou ka ra sega beka ni kila vinaka, e na qai rogo ga vei ira, “Sa solia mai qo na Turaga me baleti au, au na masulaka ni na vakabulai au, ka karoni au, meu kua kina ni cakitaka e dua na ka e vu mai vua, me vakavurea tale ga vei au na yalovosota, me yacova na gauna au sa na qai kila rawa kina vakaiau” (DBY, 224).

Era na sega sara ni veicakitaki o ira vakaoqori, ni ra na dau laiva na veika era sega tiko ni kila vinaka, me tiko ga e na nodra vakasama, me yacova ni sa qai serauni na nodra vakasama. Oqo na sala au sa dau muria mai, ke dua na ka au sega ni na kila, meu masumasu tiko me yacova sara niu sa qai kila (DBY, 224).

Kua ni biuta tani e dua na ka, e na kena sa rui ka vou se duatani, kua ni dau yalovakabeka se veiwalitaka na veika e vu mai vua na Turaga, ni sa na rivarivabitaki vakalevu na noda vakabulai ke da vakayacora vakakina (DBY, 224).

Au vakabauta ni ka dredre sara vei ira e so, se matavuvale se vua e duabau ga, me saga me taura dei tiko na dina e na dua na ligana, ka tiko tale ga na veika lasu e na ikarua ni ligana, ka vakatusa ni talairawarawa tiko kina ivunau ni Kalou, ka qai veimaliwai vakaveicurumaki vei ira na ivalavala ca (DBY, 223).

Sa tala yani na Turaga na nona ivakaro, nona ivunau, kei na cakacaka vakalotu vei ira na luve ni tamata, ka lavaka kina me vakamuri sara vakavinaka, ka sega ni noda inaki me da voroka na veilawa e so oqori, me da dau vakamuria ga. E sega ni noda inaki me da veisautaka na nona cakacaka vakalotu, me da vakamuria ga; ka sega ni noda gagadre me da voroka na veiyalayalati tawamudu, me da vakamuria ga kei ira na noda qase, kei Jisu, kei Koya na Tamada Vakalomalagi, kei ira na agilosi, ka qai dau bula me vaka era sa veidusimaki kina (DBY, 220).

Me da kila rawa beka vakaevei ni da sa talairawarawa tiko vua? E dua wale ga na sala e rawa ni o kila kina, mai na veivakauqeti ni Yalo ni Turaga, me vakadinadinataka i yaloda ni da sa nona, eda sa lomana, ka lomani keda vakakina o Koya. Mai na yalo dauvakatakila ga e rawa ni da na kila kina. E sega ni tiko ga vei keda na noda ivakadinadina, ke sega na yalo dauvakatakila. E sega tale ga ni dua na ivakadinadina e na taudaku ni noda bula, mai na noda dau talairawarawa wale ga ki na cakacaka vakalotu sa virikotori mai (DBY, 224).

Na ka vakayadua ga e dukadukali, e na rusa kece ga, e na dua na gauna sa na vakakina; se vakaevei sara na nona vakabuta kei na nona dau cakava o koya ka dau vakayacora, se koro, vanua, se matanitu. Ni na takali yani, ka kawaboko dina na matanitu oya, se isoqosoqo, yavu se tamata ka sega ni lewai e na veivakavuvuli dodonu ka savasava (DBY, 227).

i soli mai vei au na veivakabulai, e rawa niu besetaka se ciqoma. Niu ciqoma, au sa na talairawarawataka sara vakamatailalai, kau vakamalumalumutaki au e na noqu gauna ni bula taucoko vua na kena iTekitekivu, kei ira vakayadua na nona italai ka na lumuti ira me ra mai vunauci au; ia keu besetaka, au sa na vakamuria ga na noqu lewa vakaiau, ka vakawalena kina na nona lewa o koya na noqu Dauniveibuli (DBY, 390).

Sa solia vei keda yadudua na Kalou na lewa, ka sa dodonu me da laiva me da liutaki tiko ga mai vua na Kalou Kaukaua (DBY, 264).

E na vunauci tiko na noda kawatamata, me yacova sara ni da sa qai vakamalumalumutaki keda vua na Turaga, ka nona lewenilotu Yalododonu dina (DBY, 226).

Au kila ni ka dredre na noda vunauci, ni sega ni ka marautaki na veivunauci e tau vei keda, ni ka mosimosi e na gauna eda sotava kina [raica na Iperiu 12:11]; ia, ke dua e ciqoma na veivunauci ka vakayacori vua, ka masulaka me sobuti koya kina na Yalo Tabu, me rawa ni tikori koya kina na Yalo ni Dina, me kukuva kina na veika e so e vakadonuya na Turaga, e na solia vua na Turaga na yalovinaka me vosota rawa kina na veivunauci, me qai vakamalumalumutaki koya ka ciqoma kina, e na nona sa qai kila ni yaga sara vua (DBY, 227).

Me iUlutaga ni Vuli

Sa tu vei keda na galala me da digia kina na veika vinaka, se na veika ca, sa sega ga ni qai digitaki na vua ni noda digidigi.

Na cava na vuna e biu “tu vei [ira na luve ni Kalou] na galala me [ra] digia kina na veika vinaka, se na veika ca,” me qai rawa kina ni ra “vakatovotovotaka kina na galala ni digidigi ka sa soli mai vei [ira]”?
E vunautaka o Peresitedi Young ni “sa tu vei keda na galala me da digia kina na veika vinaka, se na veika ca, sa sega ga ni qai digitaki na vua ni noda digidigi.” (Raica tale ga na V&V 101:78.) Era dau valataka vakaevei na nodra digidigi e so, ni ra saga tiko me ra levea na itatase ni nodra dui digidigi?
Na cava beka e vakamacalataka o Peresitedi Young me ibalebale ni “duidui ni buladodonu kei na ivalavala ca”? Me da yalana se vakataotaka na galala ni noda digidigi? E vunautaka o Peresitedi Young, ni sega ni yalani vei ira na “bula vakalou na nodra isolisoli.” E vakaikuritaki vakaevei na noda lewa galala mai na noda dau vakamuria na ivunau kece ga?
Na cava na vuna e na sega ni “dau veivakasaurarataki [kina na Kalou] me dua e ciqoma na Kosipeli, … ni ra sa ciqoma yani na kosipeli”? (Raica tale ga na V&V 88:22–25, 32.)
Na cava na vuna e vakamatatataka kina o Peresitedi Young ni vakatovotovotaki e na talairawarawa na noda lewa galala, me vakavatukanataki tale ga ni noda vakarorogo? Na cava na vuna e okati kina na noda dau “talairawarawataka na veika matailalai sara, … [me] sala duadua ga ka sa virikotori tu oqo e dela i vuravura me daru vagalalataki kina”? (Raica tale ga na Mosaia 2:22–24.)

Eda sa na cabeta na bula vua na Kalou Kaukaua, mai na noda talairawarawa ki na dina.

Na cava na vuna e okati kina na talairawarawa me “ivakavuvuli matata, e rawarawa, ka rawa ni dau vakatovotovotaki, ka rawa ni o kila rawa”? E vu vakaevei mai na noda dau talairawarawa na noda “taleitaka na veitokoni nei Tamada Vakalomalagi”?
Na cava na ibalebale ni da sa “yalovata ka duavata”? E veivuke beka vakaevei na talairawarawa ki na noda qarava rawa oqo?

Ni da sa bula e na Yalo ni Dina, eda sa vulica kina me da dautalairawarawa, ka vosota na veivunauci.

Me vaka sa vakamacala kina o Peresitedi Young, na cava beka e noda itavi, ni da sega ni kila vinaka e dua na ivakavuvuli, se ivakatakila? (Raica tale ga na Dauvunau 12:13; Joni 7:17; Ica 12:6; V&V 11:20.)
Eda na kila beka vakaevei ni sa talairawarawa tiko ki na lewa ni Kalou, ka dau vunautaka vakaevei na yalotalairawarawa?
E veivuke beka vakaevei na noda vakamalumalumutaki keda ki na lewa ni Kalou Kaukaua Sara, me da ucuya vakavinaka kina na noda iVakabula? Na cava na ibalebale ni noda “sa qai vakamalumalumutaki keda [sara] vua na Turaga”?
Ni da veivunauci, eda veivakadodonutaki ka veivuiyava. Na cava na vuna e dau ciqomi vakadredre kina na veivunauci? (Raica tale ga na Iperiu 12:11.) Na cava beka e vunautaka o Peresitedi Young me baleta na noda dau ciqoma ka vosota na veivunauci? E tasevu beka e vei na veivunauci?