Vakabauta ka Doka Tiko ga na Lewetolu Vakalou

Eratou oka me Lewetolu Vakalou na Kalou na Tamada, o Jisu Karisito na Luvena, kei na Yalo Tabu. E vunautaka o Peresitedi Brigham Young me ra dau vakacabora na nodra masu vua na Kalou na Tamada, ka dau qaravi koya e na yaca i Jisu Karisito. E dau vunautaka tale ga ni a bula mai vakatamata e liu na Kalou na Tamada e na dua tale na vuravura, ka sa “vakacavara mai vakavinaka na veika eda sotava tiko oqo; ka donuya kina na veika oqori ni vuli, me sotava kina na veika rarawa kei na marau, ka sa kila vakavinaka tu na veika eda kila tu oqo me baleta na cakacaka, na veika rarawa, na bula kei na mate e na bula vakavuravura oqo” (DBY, 22).

iVakavuvuli i Brigham Young

Sa buliya na Kalou na Tamada, ka lewa mai na veivuravura e vuqa, bulia na kawatamata, ka sa bula tu oqo, ka rawa ni da veikilai kaya, ka masuta tale ga.

Eyavu ni noda vakabauta e dua ga na Kalou, e dua na Dauveisorovaki, ka dua ga na Yalo Tabu [raica na Yavu ni Vakabauta 1:1]. Ni sega ni noda ivakarau ni vakabauta ni sega ni vakavatuka vakatamata na Kalou, sega ni vakayago, se sega ni dau vakila e lomana na veika ni bula, se vakaivakarau. Ni vakavatukanataki ga na bula vakaivakarau vua e dua ka sa yavutaki vinaka na nona bula. Sa tu vua na ivakarau kece ga oqori, ka ivatuka ni bula vakayavu (DBY, 23).

Era gadreva e so me da vakabauta ni sa tu e veivanua kece ga na Kalou. E sega ni vakakina. Ni sega ni rawa me tu e veivanua kece ga o Koya, me vaka ga e rau duidui bula o Tamada kei na Luvena (DBY, 23–24).

Ni sa dau nanumi ni sa tu e veivanua kece ga na Kalou, e na dua vata ga na gauna; me cavuta kina na Daunisame, “Me’u lako [beka] kivei me’u yali kina mai na [kemuni iserau]?” [Same 139:7]. Sa dau volekati ira na nona ibulibuli mai na nona lewa, nona veiliutaki, na yalona kei na nona kaukaua, ia e vakaisulu o koya e na yago vakatamata, ka da buli mai o keda me da ucui koya (DBY, 24).

Era vakabauta e so, se vakasamataka ni da na vakalolovirataka sara na Kalou, mai na noda kilai Koya; ia meu kaya ga, keu na vinakata meu kila e dua na ivakavuvuli se tamata, e vuravura se mai lomalagi, e na sega niu na vakawalena kina, ni na yaco na kena veibasai, ka niu na vakacerecereya sara vakalevu; niu kila vakalevu cake tiko ga na Kalou, na kena talei ka vakamareqeti cake tiko vei au, kei na kena vakaikuritaki na noqu lomani koya (DBY, 18).

Laiva me ra veiwekani kece kei na Kalou na veitamata yadua [raica na Jemesa 2:23] (DBY, 18).

Ni tabogo sara mai matada vakayago o koya ka lewa mai na cakacaka oqo, o koya na kena manidia ka superitedi, o koya na kena iliuliu ka lewa vakadua [lewa vakaikoya]. Ni bula voli o koya e na dua tale na vuravura; e na dua tale na ivakarau ni bula; ka sa vakacavara mai vakavinaka na veika eda sotava tiko oqo; ka donuya kina na veika oqori ni vuli, me sotava kina na veika rarawa kei na marau, ka sa kila vakavinaka tu na veika eda kila tu oqo me baleta na cakacaka, na veika rarawa, na bula kei na mate e na bula vakavuravura oqo, ni sa rawata vinaka vakadua, ka sa vakaisalataki kina e na kena lagilagi kei na bula cecere vakalou, ka sa taukena tu oqo na kena idola kei na lewa ni nona Matanitu; ni na vagolea na nona lewa, ka vakayacora na lomana vei ira na luve ni tamata, vei ira na Yalododonu kei ira na ivalavala ca, me rawa kina na nona inaki, me baleti ira na veimatanitu kei na veivanua, veimatanitu cokovata, me vakavatukana ki na nona lagilagi kei na kena qaravi vakavinaka sara na nona cakacaka (DBY, 22).

E vakatulewa o koya ki na veivuravura e vuqa, ka ra serauna tu na vuravura lailai oqo, kei na milioni vakamilioni na vuravura e tabogo mai matada; ia e dau nanuma na veibulibuli kece ni ligana ka somidi sara; ni sega ni dua na ibulibuli oqori e na lecava; ka sa buli na veika yadudua oqori mai na nona vuku kei na nona kaukaua (DBY, 20).

Ni tama ni veiyalo kece ga na Tamada mai Lomalagi, o ira ka ra sa bula mai, kei ira era sa bera mai, ki na vuravura oqo [raica na Iperiu 12:9]; ka ra sucu vakayalo mai i na vuravura tawamudu. Sa qai qarava na Turaga mai na nona lewa kei na vuku, na nona vakaisulutaki vakayago na tamata. Ni da a bula taumada vakayalo, ka qai bula vakayago i muri (DBY, 24).

Ni sa volai, sa kila na Kalou na veika kece ga, ka tawayalani na nona kaukaua [raica na 1 Nifai 9:6] (DBY, 20).

Sa i koya na Daulewa Cecere ni veivuravura kece ga. Sa maca na wasabula mai na nona vunauca, ka vukica me talasiga na veiuciwai. Sa vakarautaka na titobu ni wasawasa e na qeteqete ni ligana, ka dedeka na nona iqaqalo me vakarautaka kina na lomalagi, sa taqeya rawa kina ivakarau na qele e vuravura, ka vakarautaka e na ivakarau bibi na veiulunivanua, ka goleva vakakina na veidelana; ni sa somidi sara vua na veivanua, e na kena lutu ki na itakitaki ni wai, ka lalai sara vua na veiyanuyanu; e kila vinaka sara na iwiliwili ni drauniuluda, ka sega ni na lutu i na delaniqele, me sega ni kila na Tamada; ni sa dolavi tu vua na noda vakanananu kei na gagadre ni lomada, ka bula tiko oqo, ni sa vakavatukana e na veiyasana kece ga na nona Yalo Tabu—o koya na nona italai, na Yalo Tabu. Sa i koya na Tamada kece sara, sa cecere mai na veika kece sara, ni curuma na ka kece ga, ka tiko e [lomamudou] kece ga [raica na Efeso 4:6]; sa kila na ka kece ga me baleta na noda vuravura, ka sa kila tale ga na veika kece sara me baleta na veivuravura vakamilioni me vaka na vuravura oqo (DBY, 19).

Sa ukutaka, me tosoya ka bula tiko kina na vuravura vakaiukuuku oqo; ka sa bulia mai na veirarama lelevu ka lalai ka robota tu na qakilo levu kei lomalagi e cake; ka sa duivota vei ira na nodra dui gauna kei na kena ivakarau, ka sa virikotora rawa mai na nodra dui tikina. Sa vakavuna mai na kena tawani e na veika bula na lomalagi e cake, kei na wasawasa, ka ubia na veidelana kei na veibuca e na manumanu kece ga, ka sa lewa kina me vakatulewa na tamata ki na ibulibuli kece ga ni ligana (DBY, 18).

Sa i koya na Kalou na itakataka, na waitovure ni noda vuku, veitalia mada se o cei e taukena tiko, se tu vua na tamata e na dela i vuravura, se vei ira na yalo e na vuravura ni yalo, o ira na agilosi e na vuravura tawamudu ni Kalou, se o ira era bula vakaloloma, mai vei ira na tevoro mai eli. Era sa dui rawata mai vua na Kalou na vuku, rarama, kaukaua ka bula kina—mai vua ga ka da rawata kina o keda. Ni sa itakataka ni isolisoli vinaka ka uasivi na Kalou [raica na Jemesa 1:17]. Na veika kece ni vuli e dikevi mai na sainisi kei na cakacaka ni liga, ka na tudei ka yaga vakalevu vei keda na tamata, e rawa oqori ni vakatakila mai na Kalou, e dina ga ni ra kila na veika oqori e le vica wale. E soli vata mai na vakasama me cokonaki kina na sala, me laki qaqa ga kina e muri na dodonu, kei na kena vueti o vuravura mai na voravora ni ivalavala ca, kei na lewa nei Setani (DBY, 18).

Era lewe vuqa era sa saga mai me ra kila vinaka na Yavu Taumada ni veika kece ga; ia, e na rawarawa cake beka ki na qasikalolo me wilika na mataninuku e dela i vuravura. E sega ni rawa vua na tamata, ni rabailailai tu na nona vuku, me kila rawa na veika e vuqa e na bula tawayalani . … E na rawarawa cake ki na lago me lesuva tale na itukutuku ni bula ni tamata, mai na vanua a vu mai kina, ka dredre ki na tamata me kila na Yavu Taumada ni veika kece ga, me cereka yani na ilati ni vuravura tawamudu, me vakalasikati kina na veika vuni ka ra dau gadreva tu na vuku, mai na gauna eda qai bula kina e vuravura oqo. Na cava tale beka, me nodra ilesilesi ka itavi na luve ni tamata? Me kua ni da via kila na vanua era vu mai kina na Kalou—me da vakadikeva ga na titobu ni bula e na vuravura tawayalani mai liu, e na gauna oqo, kei na gauna sa bera mai, me da kua ga ni viaviakila na iyalayala ni vuravura tawavakaiyalayala, me ra gadreva ga me ra kila na inaki ni nodra bula oqo, kei na sala me ra vakayagataka kina e na nodra bula kei na nodra vakabulai, na vuku era sa votai tu kina oqo. Laiva vei ira me ra dau gadreva ka ra kila vakavinaka kina na veika rawarawa e so sa tu vakavolivoliti ira e na gauna, me ra veikilai ka vakavukui kina e na inaki dina ni nodra mai bula tu oqo, e na nodra dau gadreva na kaukaua levu cake sara, me baleta na kena itukutuku, kei na nodra vulica vagumatua na ivola e so (DBY, 25).

A veisorovaki o Jisu Karisito, na Luvena e Duabau ga na Tamada ka mai bula vakayago, e na vuku ni nodra ivalavala ca o ira vakayadua era sa veivutuni.

Era vakabauti Jisu Karisito na Yalododonu e na Gauna Oqo, o koya duadua ga na Luvena vakayago na Tamada [me bula mai i vuravura], ka sucu mai e na iyalayala ni gauna, me mai qarava na nona cakacaka, vosota na itotogi e sotava, me sauma kina na isau ni caka cala ka vakayacori taumada e na nona soli koya, a qai vakabulai tale mai na mate, ka lako cake vei Tamana; me vaka ga na nona vakasirovi koya sobu sara o Jisu, me rawa kina ni ulabaleta na veika kece ga. Eda vakabauta ni na lesu tale mai o Jisu Karisito, me vaka sa volai mai me baleti koya: “Ia ni ra sa rai matua ki lomalagi, ni sa lako yani ko koya, raica, e le rua na tamata sa tu voleka vei ira erau vakaisulu vulavula; a rau sa kaya, Oi kemudou na kai Kalili, dou sa tu ka rai matua ki lomalagi e na vuku ni cava? ko Jisu oqo ko koya sa kau tani cake vei kemudou ki lomalagi, ena lako tale mai vakakina me vaka dou sa raici koya ni sa lako ki lomalagi [Cakacaka 1:10–11]” (DBY, 26).

E vakatabakidua na noda vakabatuta vua na Luve ni Kalou, ka qai vakabauta na Tamada e vukuna (DBY, 26).

O ira na Yalododonu e na Gauna Oqo, kei ira kece ga ka na vakaivotavota e na veivakabulai, kei ira tale ga na kena vo, me vakavo ga o ira era sa ivalavala ca ki na Yalo Tabu, e rawa tale ga ni ra kila ni sa i Jisu ga na Karisito, e na sala vata a kila kina o Pita [raica na Maciu 16:13–19]. Era na sega ni kila na veika oqori na tamata mai na cakacaka mana, e dina ni na veitokoni kina, me vakadeitaki koya kina ka sa vakabauta. Era sa kila taucoko tu na Jiu na cakacaka mana nei Jisu, ia era a laveti koya ga me mate, e na nodra nanuma ni dauveivakaisini vei ira na tamata, ka dau curumitevoro (DBY, 28).

A sa saga o Jisu me tauyavutaka e vuravura na Matanitu ni Kalou. A vakatikora kina na veivunau kei na cakacaka vakalotu ni Matanitu (DBY, 29).

E sega ni kitaka vakaikoya e dua na ka. A vakayacora na veicakacaka mana ka qarava e dua na cakacaka vinaka e vuravura; ia e sega ni cakava vakaikoya e dua na ka. A kaya kina, “Ia na veika sa kitaka ko [na Tamada], sa kitaka vaka talega kina na Luvena” [raica na Joni 5:19]. “Ni’u sa sega ni muria na lomaqu, a loma i Tamaqu ga, ko koya ka talai au mai” [raica na Joni 5:30]. E rawa ni da kila kina ni a sega ni veivakaturi kina na Luve ni Kalou, se me lewa e dua na ka, cakava, se me vakavatukanataka na nona kaukaua, na nona itutu, se na nona ilesilesi e vuravura, na kena wale ga e drodro mai na vakasama kei na lewa ni Tamana (DBY, 26).

“Keirau sa dua bauga kei Tamaqu,” [Joni 10:30] a kaya o Jisu; se vakacava, e dua vata ga na yagodrau? Sega. … Me vaka keirau sega ni yagovata kei koya na luvequ. Ke veivakavulici vua na luvequ, kei rau na lakova vata na salatu au sa virikotora tu me lakovi, ke tautauvata ga na neirau vakabauta, sa na duavata tale ga na neirau inaki, me dau qarava kina na cakacaka nei tamana, me vaka e a qarava o Jisu na cakacaka nei Tamana, keirau sa na duabau ga kina kei luvequ, me vaka sa talaucaki oqori e na ivolanikalou (DBY, 28).

Sa vakatakila mai vei keda na Turaga na ituvatuva me da vakabulai kina eke, kei na gauna sa bera mai. Sa vakayacora mai na Kalou na veika kece ga eda kerea, ka sivia sara na veika eda kerea yani vua. Sa itavi ga nei Jisu e vuravura me kauti ira na tacina kei na ganena ki na iserau ni Tamada; sa mai vakacavara na nona cau e na itavi oqori, ka sa qai vo tiko ga me da vakayacora o keda na noda itavi. E sega ni dua tale na ka me cakava na Turaga e se vo tiko, me baleta na nodra vakabulai na lewe i vuravura; ka sa qai vo ga me ra ciqoma se besetaka na luve ni tamata na dina; na veika taucoko sara me baleta na nodra vakabulai, ka sega ni namaki vei ira, sa vakacavara mai na iVakabula. … Sa yaco kina me nodra Tui na tui, ka nodra Turaga na veituraga kece ga, ka sa roro tiko mai na gauna me ra na tekiduru kina vua na veiduru vakayadua, ka vakatusa na yame kece ga [raica na Mosaia 27:31], me vakalagilagi kina na Kalou na Tamada, ni sa i Jisu na Karisito [raica na Filipai 2:10–11]. O koya ga oqori ka a okati vakaisi, ka sega ni ra vakabauta me iVakabula, ka a vakoti e tikidrau na daubutako, ka vakalialiai ka vakasewasewani, ka na qai cerevi mai vei ira na tamata kece ga, me o Koya, na tamata duadua ga ka na rawata vei ira na veivakabulai (DBY, 27).

E vatuka vakayalo na Yalo Tabu, ka dau tukuna na veika dina.

Eda vakabauta ni Yalo Tabu, e dua vei iratou na lewe ni Lewetolu Vakalou … na Yalo Tabu. E sega ni dua e na tolu, se le tolu e na dua na tamata; o koya ga na Tamada, Luvena, kei na Yalo Tabu, ka ratou dua vata e na nodratou inaki, me vaka na lomadratou na le tolu ka ratou duavata e na veika kece ga. E dua o koya vei iratou ka da dau vakabauta, ka nona itavi me veiqaravi ki na veivuvale vakatamata, ka ra gadreva na veika dina. Au sa vakamacalataka mai ni ratou duabau ga, me vaka na duabau ni yalodratou e le tolu. Ia mo ni kakua ni vakadewataka cala na veika au vakamacala tiko kina oqo, meu kaya ga mo ni kila vinaka ni vakavatuka tale ga na Yalo Tabu, me vaka ga na Tamada kei na Luvena; ia e italai ni Kalou o koya, ka tasereka na lomana e na veika kece sara e cakava o Koya na Kalou Kaukaua (DBY, 30).

E italai na Yalo Tabu, mai vei [Tamada kei na Luvena], e na kena vakavulici na dina, me vakatakila vou tale vei keda na dina sa soli mai vua, me veidusimaki, me veituberi, ka vakatulewataka na kosi ni yaloda yadudua, me yacova sara ni da sa bula uasivi, ka sa veiraurau me da lesu tale i na noda vale mai lomalagi, me da laki veitata ka veitalanoa kina kei na Tamada mai Lomalagi (DBY, 26).

Au sa vakadinadinataka mai, kau sa vakacegui kina me vaka au sa vakavukui kina, ni rawa ni vakacalai e na veika e raica e matana na tamata, kei na veika e rogoca na daligana, kei na veika e vakila mai na ka e tara e ligana; ni rawa dina ni vakacalai e na veika kece ga, mai na kilakila ni bula vakayago ka tu vua. Ia, e duabulu na ka eda na sega ni vakacalai rawa kina. Na cava beka oya? Oqori na cakacaka yaco ni Yalo Tabu, na Yalo Tabu ka ligaimatau ni Kalou vua na veitamata yadua. E na dusimaki koya ki na veika vakalomalagi; e na tuberi koya e na veisala e so ni bula; ka na vakaraitaka vua na idola, me vakatovotovotaka kina na veivakasama vakatamata kece ga, ka na surevaka tiko na veika ni Kalou. Era na sega ni okati wale kina na Yalododonu ka ra bula tu oqo, ka ra vakasoqoni tiko i Saioni, o ira tale ga na veimatanitu, na veivanua, se veiyanuyanu, ka ra bulataka tiko na vakabauta ka vunautaka mai na iVakabula kei iratou na nona i Apositolo, kei Josefa Simici tale ga; era vakadinadinataka vata e dua ga na itukutuku, ni sa vukici ka vakararamataki na matadra mai na Yalo Tabu ni Turaga, ka duavata kina na nodra rai, ka sa vakararamataki tale ga na lomadra, me ra vakaduavatataki kina e na nodra nanuma kei na nodra kila, ka sega ni basika e na kedra maliwa na veileti me baleta na ivunau ni iVakabula (DBY, 31).

Ke sega na cakacaka yaco ni Yalo Tabu, e rawa ni vagolei ki na imatau se imawi e dua, mai na sala dodonu vakaveiqaravi; e rawa ni ra vakayacora kina na veika e so me ra laki rarawataka tale e muri; ni rawa tale ga ni ra cala; ia ni ra sa dau saga me ra solia na nodra igu taucoko, raica era sa vakayacora tale na veika e so era sega ni vinakata (DBY, 31).

Au vinakata meu raica ni ra ceguvi vakayalo na turaga kei na marama, e na nodra icegu yadudua ni bula, ka dau vakavatukanataka tiko na iserau ni nona rarama na Kalou (DBY, 31).

Me iUlutaga ni Vuli

Sa bulia na Kalou na Tamada, ka lewa mai na veivuravura e vuqa, bulia na kawatamata, ka sa bula tu oqo, ka rawa ni da veikilai kaya, ka masuta tale ga.

Na cava beka e vunautaka o Peresitedi Young, ni bibi kina me da kila vinaka na Kalou na Tamada? (Raica tale ga na Joni 17:3.) Me yaga vakaevei e na nomu veiwekani, na nomu kilai koya vakavinaka na wekamu qori? Na cava soti beka o sa vukei kina, mo veikilai vinaka kina kei na Kalou na Tamada?
E rawa beka vakaevei me “tu e veivanua kece ga na Kalou, e na dua vata ga na gauna” na cakacaka yaco ni Kalou”? E vakavatukanataki beka vakaevei na cakacaka ni Kalou “ka somidi sara [e na cakacaka ni ligana]”?
Na ivakavuvuli, ni a bula vakatamata tale ga na Kalou, ka sa yaco me qai Kalou e muri, e vunautaki ga e na Lotu oqo. E vakaevei beka na nomu nanuma, e na nomu sa qai kila, ni a “kila vakavinaka tu [na Kalou] na veika eda kila tu oqo me baleta na cakacaka, na veika rarawa” ni bula vakavuravura,” mai na Nona sotava vakaikoya na veika oqori?
A vunautaka o Peresitedi Young ni veika vinaka kece sara e laurai vakavuli e na sainisi kei na cakacaka ni liga, a “rawa oqori ni vakatakila mai na Kalou.” E tosoi tiko beka vakaevei na cakacaka ni Kalou mai na veivakauqeti vakayalo e na veika oqori?
Na cava beka e tukuna o Peresitedi Young ni “ilesilesi ka itavi ni luve ni tamata”? Me da kila vakavinaka cake beka vakaevei na veika sa dolavi tu oqo e matada, me da yalomatuataka kina na inaki ni noda bula mai vuravura? Me qarai beka e vei na yalomatua vaqori?

A veisorovaki o Jisu Karisito, na Luvena e Duabau ga na Tamada ka mai bula vakayago, e na vuku ni nodra ivalavala ca o ira vakayadua era sa veivutuni.

Na cava beka e tukuna o Peresitedi Young me baleti Jisu Karisito kei na Nona ilesilesi vakavuravura?
E imatai ni yavu ni kosipeli na vakabauta na Turaga o Jisu Karisito. Me laki veisautaka beka vakaevei na noda bula na noda vakabauta na Luve ni Kalou? (Raica tale ga na Jekope 4:10–11 kei na Moronai 7:41–42.)
E vunautaka o Peresitedi Young ni rawa ni ra na kila yadudua na Yalododonu e na Gauna Oqo ni sa i Jisu na Karisito, e na sala vata ga a kila kina o Pita na i Apositolo (raica tale ga na Maciu 16:13–19). Me da kila rawa beka vakacava ni sa i Jisu ga na Karisito? Na cava beka e vuna, e na sega kina ni yavutaki e na cakacaka mana na kila ka, me da qai vakabauta kina ni sa i Jisu na Karisito? Na cava na vuna e rui bibi kina me baleta na noda laki vakabulai e na bula tawamudu, na veika me da kila oqori?
Na ilesilesi beka nei cei a laki vakayacora oqori o Jisu e na Nona mai vunau ki na lewe i vuravura? Na cava e rawa ni da kila mai na veika a cakava qori o Jisu, ka me da qai vakayacora e na noda dui bula? Me da vulica ka vakad-inata beka vakaevei na noda dui ilesilesi mai vua na Turaga?
A dusimaka vei keda o Peresitedi Young ni na “tekiduru vua ko ira na tamata kece ga, ka na vakatusa vua na yame kece ga” ni sa i Jisu na Karisito (Mosaia 27:31; raica tale ga na Filipai 2:9–11). E vuqa tale na ka e okati e na bula vakatisaipeli i Jisu Karisito, mai na noda vakatusa ga ni sa i Jisu na Karisito. Na cava beka e na totaki iko vakalevu, mo bulataka tiko kina na kosipeli, mo tisaipeli yalodina kina vua?

E vatuka vakayalo na Yalo Tabu, ka dau tukuna na veika dina.

Na cava beka na ilesilesi ni Yalo Tabu? E cakacaka beka vakaevei e na nodra bula na luvena na Kalou?
E duidui beka vakaevei na vatuka ni Yalo Tabu mai vua na Kalou na Tamada kei na Luvena o Jisu Karisito? (Raica tale ga na V&V 130:22.) E na sala cava beka eratou “duabau” ga kina na Lewetolu Vakalou?
E italai beka vakaevei na Yalo Tabu, mai vei rau na Tamada kei na Luvena?
Na veika cava soti beka o sa sotava mai, ka vakadinadinataki kina vei iko na cakacaka yaco ni Yalo Tabu, me dau veivakavulici ka veituberi vei iko?