Taracake o Saioni

A yavutaki na bula nei Peresitedi Brigham Young me qarava na kena tauyavu o Saioni. A veiliutaki kina e na nodra vakasoqoni e rauta ni duanadrau na udolu vakacaca na Yalododonu e na Gauna Oqo, i na veibuca ni Rocky Mountains, me ra laki tawana kina e vanadrau vakacaca na koro. A mai tara kina na veivaletabu, kei na veivale tabanikau, ka tauyavutaka tale ga na veiiteki kei na tabana levu e na muaira ni vanua o Amerika, ka talai ira kina e vuqa na daukaulotu ki na veiyasa i vuravura e vuqa. Sega sara ni dua e bau kila vinaka na ibalebale ni solibula kei na sasaga e gadrevi vei ira, ia, me vaka e qai kaya, “eda na sega ni waraki ira na agilosi, … me da sa na tarai [Saioni cake o keda]” (DBY, 443).

iVakavuvuli i Brigham Young

E Saioni o ira na yalosavasava.

Meu vosa vakalekaleka mada me baleti Saioni. Eda dau tusanaka vakawasoma ni o Saioni o keda. Ke dau savasava na lomada, eda sa na okati kina, ni “oqo ko Saioni–KO IRA NA YALOSAVASAVA” [raica na V&V 97:21] (DBY, 118). E vei beka e tiko kina o Saioni? E na vanua ga e tauyavutaki kina na nona Lotu na Kalou. Me dau tiko e lomada vakayadua; ka me da bula e na kena itovo, me da bula kaya na yalo ni bula vakasaioni e veigauna kece sara! (DBY, 118).

Sa i koya ga oqo na Kosipeli; oqo na yavu ni veivakabulai; oqo na Matanitu ni Kalou; oqo na Saioni ka ra sa tukuna, ka volaitukutukutaka mai na Parofita mai na itekitekivu ni buli kei vuravura. Oqo na cakacaka kei Saioni, ka sa yalataka na Turaga ni na tauyavutaka (DBY, 118).

E na tete tiko ga o Saioni, me yacova sara ni sa roboti vuravura taucoko mai muri. E na sega ni dua na qakilo, se tutu ni vuravura oqo, ka sega ni okati me Saioni. Ni sa na Saioni vakadua tu (DBY, 120).

Sa inaki ga ni noda bula oqo me da vakasavasavataka na noda bula, ka taracake na Saioni ni noda Kalou.

E inaki ga ni noda bula, me da taracake kina na Saioni ni noda Kalou, me vakasoqoni vata kina na Mataqali i Isireli, ka me tekivutaki tale ga na nodra gauna waraki na Kai Veimatanitu Tani, me vakalesui ka vakalougatataki o vuravura mai na maqosa ni ligada, me vuki me vaka na Were o Iteni, me da kila ka vakalevu, ka vakavukui me da yalomatua cake sara, me savai kina na lomada, ka vakarautaki vua na Turaga, e na nona tadu lesu mai (DBY, 88).

E sega ni dua tale na noda bisinisi eke, me da taracake ga ka tauyavutaka na Saioni ni Kalou. Me caka me vaka na loma kei na lewa ni Kalou [raica na V&V 105:5], ka me qaravi me tautauvata kei na kena ivakarau kei na lewa ka a taracake o Inoke, me vakavinakataka tiko ga, ka qai kau bulabula i lomalagi, me vu ni kena qai dau cavuti e muri, ni sa yali o Saioni [raica na Mosese 7:69]. E na dua na gauna e muri, e na qai kau lesu tale mai, ka me da vakavakarau kina o keda, me vaka ga na veivakarautaki a vakayacora o Inoke vei ira na wekana, me da veitata kina kei Saioni e na kena vakalesui mai lagi, e na kena vakatikori tale e vuravura, me mai tiko kina e na kena iserau kei na kena iukuuku kece ga (DBY, 443).

Eda sa nanamaki ki na siga e na vakarautaka kina na Turaga na kena tara tale na Jerusalemi Vou, me vakarautaki kina na kena mai cokotivata kei na Koro i Inoke, e na gauna e na mai tauyavutaki kina e vuravura [raica na Mosese 7:62–64]. Eda namaka tu ni da na marautaka vakavinaka na siga oya, ke da sa waraka beka mai na ibulubulu, se bula voli ga e vuravura. Eda sa nanamaki kina, e na vakanuinui kei na yalodei ka tu vei ira na gone me baleti ira na nodra itubutubu, ni da na tu e kea e na siga e lesu mai kina o Jisu; ia ke da sega kina, eda sa na lako vata tiko mai: se vakaevei na noda ilakolako, eda na tiko ga kina e na nona tadu mai (DBY, 120).

Na inaki ni kena taracake o Saioni, me ra vakasavasavataki kina na luve ni Kalou, e na veicakacaka e so ni veivakabulai era na qarava.

Eda sa soqoni vata mai … me baleta vakatabakidua na noda vakasavasavataki, me da vatutalei sa lumilumisa e na valetabu ni Kalou. E noda inaki ni mai tiko eke, me da tauyavutaka e vuravura na Matanitu ni Kalou. Sa kilikili gona kina, me vakarautaki kina na cakacaka bibi oqo, me da laki vakasoqoni mai na veimatanitu kei na veivanua kece ga e vuravura [me soli kina vei keda] na veicakacaka kece ni Matabete tabu ni Luve ni Kalou, ka lavaki ki na nodra torocake vakayalo na Yalododonu, me ra vakarautaka kina na nona tadu mai (DBY, 121).

Me qaravi rawa eke na noda veivauci, vua na [gonetagane] vei [tamana], vua na marama vei watina, vei ira na gone vei rau na nodra itubutubu, ka vakayacori tiko vakakina, me yacova ni sa vinaka cake sara na isema ni veitabatamata, mai na cakacaka tabu ni veivauci, me yaco sara vei Atama na Tamada; o koya gona sa vakaroti kina vei keda me da vakasoqoni vata mai i Saioni, ka biuti Papiloni mai [raica na V&V 133:5, 7, 14], ka me da dau vakasavasavataki keda, me taracake kina na Saioni ni noda Kalou, e na kena taracake na veikoro kei na veivaletabu, me vueti kina na veivanua, mai na butobuto era sotava tu e na veilekutu ni bula oqo, me yacova sara ni sa savavuka vakadua sara o vuravura, ka cokonaki me itikotiko tabu ni Kalou, kei ira na nona agilosi (DBY, 407).

Sa vakarautaka mai na Turaga me ra tarai Saioni cake kina na Yalododonu.

Eda bau vakasamataka li, ni kevaka eda gadreva me da bula e Saioni me tawamudu, e dodonu me da rawata vakataki keda? Ni o ira vakayadua sara e tauyavu e na vuravura tawamudu ni Kalou na nodra Saioni, era a tuva, ra butuka na kena iyalayala, ra cokonaka, ka vakavinakataka ga vakaiira, ka sa nodra ivotavota beka me ra kena itaukei? (DBY, 118).

Ke da sa lewa me sa tauyavu o Saioni, eda sa na qarava ga o keda, ka na tekivu na cakacaka bibi oqo e lomada yadudua. Ni gadreva na tama e na dua na vuvale me Saioni na nona vuvale, me idusidusi o koya e na cakacaka yaga oqo, ka na sega ni qarava rawa ke sega ni yalona dina na kena tara o Saioni. Ni se bera ni vakavatukanataka na veivakasavasavataki e na nona vuvale, me savai koya rawa mada, e na qai vukei koya na Kalou me vakasavasavataka na nona matavuvale (DBY, 118).

Sa qarava mai na Turaga na nona itavi e na cakacaka oqo; sa mai biuta vakavolivoliti keda kina e na veivunika, e na witi, lewe ni manumanu, na vauvau, na vutika ni manumanu, na silika, vuanikau, kei na veika kece sara me taracake kina, me ukutaki ka vakalagilagi kina o Saioni e na veisiga e muri, ka sa noda itavi ga me da moica na veivunika oqo me qaravi kina na noda gagadre, me vaka eda sa kila tu oqo, kei na veivakavukui mai lagi, ka na takavi keda e na noda dau yalodina. Oqo na sala e na vakalesui Saioni mai kina na Turaga, ka sega ni dua tale na sala (DBY, 294).

E sega ni qai dua tale na ka e vinakati, e na veicakacaka kece ni liga ni Kalou e vuravura, me tauyavutaki kina o Saioni, ni ra sa lewa mai na tamata me ra tauyavutaka. E vakatau tiko ga vei keda na noda tauyavutaka e vuravura na Saioni ni Kalou, e na yavu vata ga ka tauyavu kina na loga ni witi, se me tara ka tawani kina na vale. E sega ni dau yali kina na veika me rawa kina na sila, witi, kei na veikauvuata tale e so, ka na taracake rawa ga e vuravura na Saioni ni Kalou mai na kena taurivaki vakamanini na veiyaya e so sa tu rawa oqo (DBY, 118).

Lavaki na solibula, kei na sasaga vagumatua, e na kena taracake o Saioni.

Sa gadrevi tu me ra kila vakayadua na Yalododonu e na Gauna Oqo na sala me taracake kina o Saioni. E na uasivi cake sara na Koro o Saioni, e na kena totoka kei na talei, mai na veika kece ga sa yaco e dela i vuravura. Ni na kautani mai vuravura na kena cudruvi, ka na taviraki mai matada na veika ca kece ga sa tu kina. O cei beka e na qarava na cakacaka dredre oqo? E na tukuna beka na Turaga ni na vueta na iTeki e lomadonu i Saioni, me ukutaka ka sega ni vakaitavi e na nodra biu kina? Sega. E na sega ni mai tara Valetabu eke, se Valetabanikau, se Vakatunuloa ni soqo, se me teivaki na veikau vuata, me cula na itatara draunikau se kote vutinimanumanu, se me tulituli e na parasa se kaukamea, ka ni da sa kila rawa tu na veika oqo. … Me da tarai Saioni tiko ga, ke da dau vakayacora na noda itavi (DBY, 120).

Au rawa ni raica e na noda ivavakoso na turaga kei na marama e so—o ni sa le vica wale—o ni a cemuri mai na iTeki e lomadonu i Saioni [e Jackson County, Missouri; raica na V&V 57:2–3]. Tarogi ira mada se ra sa bau sotava mai na rarawa se na leqa; qai kerea me ra wanonova mada na vanua totoka oqo ka sa yalataka vei ira na Turaga, ke ra dau yalodina e na nona ivakaro, ka dau muria na nona sala me vaka sa lavaki vei ira; ka qai tarogi ira me baleta na veivakalougatataki ka dodonu beka me nodra. Ke ra tusanaka mai na nodra dui vakasama, era vakalasikata kina ni rairai mamada cake na ivua i Jisu, ka rawarawa na nona icolacola, ka na ka talei sara na nodra dau talairawarawa ki na nona ivunau, me da dau lomavata ka duavata kina; ia mai na nodra qaciqacia e so vei keda, ka okati me qaravi kaloulasulasu, e na nodra yalokocokoco, ka rau tautauvata vinaka, kei na gagano ni lomadra, era a biutani kina ka vakacemuri mai na nodra veivale (DBY, 113–14).

Me da vakavinakataka mada na noda vakasama, me yacova ni sa taleitaki ga vei keda na veika vinaka, na veika domoni ka savasava, ka dau gadreva tiko ga na noda kila ka, ka na yaga vakalevu sara e na kena taracake o Saioni, ka na oka kina na kena tara na veivale, veivaletabanikau, veivaletabu, veisalatu, kei na veika kece sara e dau gadrevi ka kilikili e na vakasama vakavuli ka rawa ni buli vakaukamea, ka dau gadreva tiko ga me kila na inaki cecere kei na yavu ka buli kina na veika kece sara, me da kila rawa kina na ibalebale ni noda bula,. kei na veisala e so me vakaikuritaki kina na veika e so sa tu volekati keda oqo (DBY, 247).

Eda sa mai tu oqo me da tarai Saioni cake. Me da cakava beka vakaevei? … Me da dau duavata e na noda sasaga. Me da duavata e na noda vakabauta na veika kece eda cakava, me vaka na lomana e duabau ga; ka me vakayacori e na yaca ni Turaga na veika kece sara eda vakayacora, me da kune kalougata kina e na veika kece sara eda vakayacora. Sa tu e matada na noda cakacaka, ka sega ni vakamacalataki rawa na kena dredre (DBY, 284).

Era nanuma e so na Yalododonu e na Gauna Oqo ni sa cava na cakacaka e na nodra sa muria na Kosipeli, ra sa solibula e na dui nodra biuta na nodra vuvale, se na nodra itubutubu beka, na watidra, na luvedra, na nodra iteitei, nodra dui qele, se na veika tale e so era dau vakamareqeta; se qai kena itekitekivu ga oqori. Na noda vakasavasavataki keda ka cokonaka na kena taracake na Saioni ni Kalou … e se qai tekivu sara ga e na noda sa yacova mai na tikina oqori (DBY, 444).

Nsa veika kece sara ka okati me baleta na kena taracake o Saioni, e vinakati kina me da qarava na veicakacaka dredre, ka bibi. E okati me ka lialia sara na noda nanuma me da tara cake e dua na matanitu, ka da sega ni buno kina; sa gadreva vakalevu kina na nodra oga o ira na noda lewe ni isoqosoqo yadudua, e na veika ni vakasama, na kena bunotaki vakayago, se na veika vakayalo, sa i koya duadua ga oqori na sala me taracake kina na Matanitu ni Kalou (DBY, 291).

Ke da vinakata me da taracake na Matanitu ni Kalou, se tauyavutaki Saioni e vuravura, me buno sara kina na yadreda, e na cakacaka ni ligada, ka vakatulewataka e lomada, me tuvai kina na veika kei na veisala e so me qaravi rawa kina na vatavatairalago oqori (DBY, 291).

Sa dau tu ga e mataqu na veika e baleti Saioni. Eda na sega ni waraki ira na agilosi, se na ilawalawa i Inoke me ra mai tarai Saioni cake, me da sa na taracake sara ga o keda. Me da teivaka kina na witi, da tara na noda veivale, da vakabaitaka na noda veiwere, me da teivaka na veiloganivaini kei na veimoli, ka me da rawata kina vakaikeda na veika kece sara me tiko vinaka ka marau kina na noda ilawalawa, me taracake kina o Saioni e vuravura, me savai ka vakavinakataki mai na kena dukadukali. Me vakalougatataki kina na veika e drodrova yani na veika kece sara eda qarava; e na qele eda teivaka, e na veivale eda tara, kei na veika kece sara eda taukena tu; ia kevaka eda na tagutuva na noda veiwekani kei na veika e so e dukadukali tu, ka qarava ga na kena tauyavu na Saioni ni Kalou e lomada, e na noda veivuvale, e na noda koro, kei na noda matanitu raraba, eda na vorata rawa kina na vuravura oqo, ni sa i keda dina ga na turaga ni vuravura oqo; ka na kadre ka tubu mai kina na veikau vuata ka rawa ni da kania, me ukutaka ka isalusalu talei ka tubu mai kina, ka na sega na cogadrogadro kei na co ca (DBY, 443–44).

Sa vakalougatataki au vakalevu na Turaga; sa dau vakalougatataki au e veigauna; me tekivu mai na gauna au tekivu tarai Saioni cake kina, sa noqu vakalevu mai na kena kalougata. Au rawa ni talaucaka vei kemuni na veika e vuqa, me vakavatukanataki kina na nona lomani au na Kalou, ka so era na rairai kaya beka e lomadra na wekaqu, “Au sega ni vakabauta na veika e so oqo” (DBY, 452).

Meu rawata e na noqu bula na noqu yalomatua vakayalo, ia e na laki tiko vakacegu sara kina na noqu itikotiko, kei na noqu marau vakaiau, e na noqu duavata kei ira, ke ra dui bulataka na nodra lotu na turaga kei na marama yadudua, me ra serauni ka vakaiukuuku kina e na Kosipeli, me ra gugumatua, ra yalomalumalumu ka yalodina; ka dau marau voli ga e na mata ni Turaga, me ra qarava tiko ga na veika sa vakacolati vei ira, ka me kua sara ni dua na tikina me ra butusevata (DBY, 119).

Sa na qai rawa kina na sautu, na marau, na vakacegu, e na veisauka ni koro kei na noda veivuvale. Sa na oti na veibeitaki vakaveilewai, e na sega ni dua na ka dredre me lasika ki na Matabose e Cake se na Veilewai Vakabisopi; se na mataveilewai, sa na sega tale ga ni basika na veicati, na veiqati (DBY, 119).

Eda sa na qai taukeni Saioni kina, ni da sa na yalosavasava kece sara (DBY, 119).

Sa yavutaki mai lomaqu na kena qaravi na loma ni Kalou, me taracake kina e vuravura na nona Matanitu, me tauyavutaki kina o Saioni kei na kena ivakaro, ka me ra vakabulai kina na tamata kece ga; kau rawa ni kaya kina, e na vosa dodonu ka dina, ni sega ni bau vakalasikati e na noqu vakasama na veika au na rawata mai na veika au dau qarava, seu na levu se lailai na veika au na vakaisalataki kina, keu na rawata rawa, seu na vutuniyau, seu dravudravua. Au sega mada ni dau vakasamataka vakabibi na veika oqo, se meu kauai kina vakalevu. Na veika kece sara au sa mai vakayacora, au qarava ga ni noqu itavi meu cakava na lewa ni Kalou, meu ogataka na kena tauyavu na Nona Matanitu e vuravura … ni ka savasava, tabu ka vakalou na ivakavuvuli e so ni Kalou sa vakatakilai mai vei keda, me baleta na nodra vakabulai na lewe i vuravura kece ga. E na kunei kina na veika dokai ka na tokona na kakavaka yani na bula vakalou, me veituberi mai na rarama ki na rarama, mai na qaqa ki na bula qaqa cake, mai na bula vakaiukuuku ka vakaiukuuku tiko ga, me da kila ka, ka kila ka tiko ga vakalevu, mai na kena soli vei keda na lewa, ka qai vakaikuritaki tiko ga na noda lewa (DBY, 452).

Me iUlutaga ni Vuli

E Saioni o ira na yalosavasava.

Na cava beka e vakamacalataka o Peresitedi Young ni ibalebale ni Saioni? (Raica tale ga na V&V 97:21.)
O cei soti beka e dodonu me ra vakaitikotiko e Saioni, ka kunei beka e vei o Saioni? (Raica tale ga na Same 102:16; 4 Nifai 1:15–17; V&V 109:39.)

Sa inaki ga ni noda bula oqo me da vakasavasavataka na noda bula, ka taracake na Saioni ni noda Kalou.

E vunautaka o Peresitedi Young, “E inaki ga ni noda bula, me taracake kina na Saioni ni noda Kalou.” Na cava beka e dodonu me da qarava na lewenilotu raraba, me baleta na taracake kei Saioni? Me da cau yadudua beka vakaevei e na cakacaka oqo?
Na cava beka na “ivakarau kei na lewa” ka taurivaka mai o Inoke e na kena taracake ka vakavinakataki o Saioni? (Raica tale ga na Mosese 7:10–11, 17–21.) Me da dau taurivaka beka vakaevei na kena ivakarau oqori e na noda dui vuvale, e na tabana levu se tabana e na gauna oqo?
Me ra dui tara beka vakaevei na veivuvale na nodra Saioni?

Na inaki ni kena taracake o Saioni, me ra vakasavasavataki kina na luve ni Kalou, e na veicakacaka e so ni veivakabulai era na qarava.

Me da vakasavasavataka vakaevei na noda dui bula, kei na nodra bula na noda dui vuvale?
Na cava na vuna “sa vakaroti kina vei keda me da vakasoqoni vata mai i Saioni, ka biuti Papiloni”? (Raica tale ga na V&V 44:4–6; 133:14.) Na cava beka e vakaibalebaletaki ki na Papiloni vakayalo, ka da biuta rawa beka vakaevei?
E vakaibalebale beka vakaevei na kena taracake o Saioni, kei na veicakacaka e so ni matabete tabu?

Sa vakarautaka mai na Turaga me ra tarai Saioni cake kina na Yalododonu.

Na cava beka sa vakarautaka vei keda na Turaga, me rawa ni da cau kina e na kena tauyavutaki o Saioni?
E tauyavutaki taumada o Saioni “e lomada yadudua.” Na isolisoli se taledi cava soti beka sa tu oqo vei iko, me veivuke e na nomu tarai Saioni cake?

Lavaki na solibula, kei na sasaga vagumatua, e na kena taracake o Saioni.

A vakatakilai e na gauna e se qai tekivu vou kina na Lotu, na vanua me tara kina na iteki e lomadonu (raica tale ga na V&V 57:2–3). Me vaka e vakamacalataka o Peresitedi Young, na cava beka e vakalatilati ki na nodra rawata na nodra ivotavota o ira na Yalododonu, ka me tauyavutaki Saioni kina e na gauna oya?
E na vakarautaka beka vakaevei na Turaga, na kena tauyavutaki o Saioni? (Raica tale ga na V&V 105:5–6.)
Na cava na vuna e rui bibi kina me da “vakavinakataka mada na noda vakasama” e na kena ogataki na tara nei Saioni?
E vunautaka o Peresitedi Young, ni dodonu me da sasagataka vata na kena tara o Saioni. Me da rawata beka vakaevei na duavata vakaoqori e na noda veivuvale, veikuoramu, na tabana levu se veitabana?
Na cava beka na vuna e lavaka kina na Turaga “me da qarava na veikacaka dredre, ka bibi” e na noda gadreva me da tauyavutaki Saioni?
Me vaka a vakamacalataka o Peresitedi Young, “Sa vakalougatataki au vakalevu na Turaga; … me tekivu mai na gauna au tekivu tarai Saioni cake kina, sa noqu vakalevu mai na kena kalougata.” Na isolisoli cava beka sa virikotori tu me baleti ira era dau maroroya na nodra veiyalayalati e na kena tauyavutaki o Saioni? (Raica tale ga na Aisea 51:11.)

Manti Temple under construction — A rogo vakalevu o Peresitedi Brigham Young e na nona tawavanua ki na Veiulunivanua ki na Muaira (Amerika). A mai vakatabuya e na yabaki 1877 na vanua me duri kina na Valetabu e Manti (ka tabaki tu oqori e na kena se qai tara tiko).

Salt Lake Temple under construction — Na itaba ni kena se qai tara tiko na Valetabu e Salt Lake. A solibula mai o Peresitedi Young e na kena tauyavutaki o Saioni, ka vunautaka kina ni “inaki ga ni noda bula, me da taracake kina na Saioni ni noda Kalou” (*DBY*, 88).