Wase 47: Na iVakadinadina nei Peresitedi Brigham Young me baleti Josefa Simici na Parofita

Wase 47

Na iVakadinadina nei Peresitedi Brigham Young me baleti Josefa Simici na Parofita

E na dua na nona vunau, mai na vunau e vuqa ka tauca vei ira na Yalododonu me baleti Josefa, na veika a mai qarava kei na nona ilesilesi, a tukuna kina o Peresitedi Brigham Young: “Au via qolou e na vakaaleluya, e veigauna kece, au vakasamataka kina ni keirau veikilai vinaka sara kei Josefa Simici, na Parofita, ka sa vakatubura mai na Turaga, ka vakatikori koya ki na nona cakacaka, ka solia tale ga vua na idola kei na lewa, me taracake e vuravura na Matanitu ni Kalou, ka me qarava tiko” (DBY, 458). E na nona gauna ni bula taucoko vakailiuliu e na Lotu, a dau talaucaka na nona loloma kei na nona dokai Josefa Simici na Parofita: “Meu kaya vakaidina vei kemuni, niu a mai raica ni dua o koya na parofita dina, me vaka era dau namaka na tamata me ivakarau ni parofita, ni na sega ni dua e na laurai me parofita vinaka cake mai vua, e dina ga ni a tu vua na nona malumalumu; se o cei tale beka e na dela ni vuravura oqo e sega ni tu na nona malumalumu?” (Brigham Young vei David P. Smith, 1 June 1853, BYP). A qai mai vakadeitaki tale na nona yalodina o Peresitedi Young e na ivakadinadina me baleti koya na Daurairai oqori e na nona vakarau me mate, ni qai laki talaucaka kina e na iotioti ni gauna na nona yalodina vua, kei na nona vakanuinui, e na nona kaya: “Josefa, Josefa, Josefa” (LSBY, 362).

iVakavuvuli i Brigham Young

A vakadavora o Josefa Simici na Parofita na yavu ni Lotu i Jisu Karisito e na iTabagauna Oqo.

A lewai mai na vakatulewa ni vuravura tawamudu, ni se bera ni vakadavori na yavu ni vuravura oqo, ni sa i koya ga, o Josefa Simici, me qarava na veika sa virikotori mai, e na iotioti ni itabagauna kei vuravura oqo, me vakalasikati tale vei ira na tamata na nona vosa na Kalou, me soli vakakina vua na idola taucoko kei na kaukaua ni Matabete ni Luve ni Kalou. A dau wanonovi koya mai na Turaga, ka vakakina vei tamana, kei na tama i tamana, kei ira na tubudrau me yacovi Eparaama, ka tekivu vei Eparaama ki na waluvu, mai na waluvu vei Inoke, mai vei Inoke me yaco sara vei Atama. A dau wanonova mai o koya na matavuvale oqo, kei na dra ka drodrovi iratou mai na waivure ka a sucu mai kina o Josefa Simici. A digitaki rawa mai na vuravura tawamudu me mai veiliutaki e na iotioti ni itabagauna oqo (DBY, 108).

A lesi Josefa Simici, Jr. [na Turaga] me nona italai e na nona a se gonetagane voli ga, me vakadavora na yavu ni nona Matanitu e na iotioti ni gauna. Na cava beka na vuna e lesi Josefa Simici kina me vakayacora? Ni a sa vakarautaki ga mai me mai vakayacora. O Josefa Simici duadua beka ga e bula tiko e vuravura oqo, me rawa ni qarava na cakacaka oqo? Era a tu tale beka e so, ka ra na qarava rawa na cakacaka oqori e na veituberi ni Turaga; ia a digitaka ga na Turaga o koya e vakadonuya vakalevu, sa na tini kina (DBY, 460).

Era sa dau vosacataki vakalevu na iTalatala Qases, e na nodra dau vunautaka tu e veivanua tani, ni o Josefa Simici, ka a tauyavutaka na nodra Lotu kei na vakabautaka vakalotu, e dua ga na gonetagane vakaloloma ka tabuvuli mai. E dua oqori na ile ka dau rogo vakawasoma, ka rawa ni dau rogo me veiletitaki kina na ivakavuvuli ni bula tawamudu, mai vei ira na kila ka, ka vuku vakavuravura, e dina ni sega sara ga ni dua na ka me veiletitaki kina. Sa dodonu me vakatakilai koya mai na Turaga vei ira na bete vuku, se o ira na tamata yalomatua e na gauna oqori, era dau tukuna, ka ra na vakavatukanataka sara ka na tosoya tiko i liu na kosipeli, mai na nodra veiwekani kei na yalomatua, ka sega ni vakayacora rawa e dua na itabagone ka vakaloloma, lecaika, ka sega ni se vuli mai. E sega sara ni ra lesi o ira na vuku, o ira na vakaitutu lelevu, se o ira na kawavakaturaga, e na rai vakatamata; ia sa digitaka ga na Kalou na veika lialia vakavuravura me vakalasui ira na vuku, o ira na tamata wale e vuravura oqo me ra vakamalumalumutaki ira na tamata qaqa; kei ira na tamata lolovira e vuravura—o ira ka ra dau vakasewasewani mai vei ira na tamata, era sa digitaki mai vua na Kalou e na nona vuku; io, kei ira era na sega wale ga ni vakarusa na veika sa tudei; me kua kina ni dua na tamata e dokai koya e na mata ni Kalou [raica na 1 Korinica 1:26–29] (DBY, 321–22).

Au se vakila mai liu [ni bera na noqu mai curu i na Lotu], ni kevaka au na raica rawa na matana e dua na parofita, me vakataki ira ka a bula mai liu, o koya ka soli mai vua na ivakatakila, ka tadola mai vua na lomalagi, ka kila vinaka na Kalou kei na nona itovo, au na qasi wavokiti vuravura wale, e duruduru ni ligaqu kei na yavaqu; au kila ni na sega ni dredre na veika au na goleva oqori, keu na raica rawa na tamata ka kila na Kalou, na vanua e vakaitikotiko kina, kei na nona ivakarau, kei na ibalebale ni vuravura tawamudu (DNW, 8 Okt. 1856, 3).

Na cava beka na ilakolako kei na uasivi ni itavi nei Josefa? … Niu se qai rogoca vakadua me vunau, sa vakamacalataka dina vakamatata na bula vakalomalagi kei na bula e vuravura oqo (DBY, 458).

Sa mai tauyavutaka kina o Josefa Simici na yavutu ni Matanitu ni Kalou e na veisiga e muri oqo; me ra qai laveta na uluna o ira na kena vo (DBY, 458).

Au se bera mada ni raica mai e dua, me yaco sara mai vei Josefa Simici, ka rawa ni mai vakamacalataka vei au na itovo, na nona ivakarau ni bula, se na nona itikotiko na Kalou, se na dua tale na tikina talei me baleti ira na agilosi, me na nodrau veiwekani na tamata kei koya na nona Dauniveibuli. Ia, au sa dau saga mai vagumatua meu kila vakaiau na veika e so oqo (DBY, 458).

Me kena ivakamacala vakatautauvata ga, ni a tauri lomalagi mai, ka qai toki sobu mai i vuravura; ka a qai tauri vuravura, ka kauta cake tale, me dolava e na kena rawarawa na veika ni Kalou, sa i koya oqori na talei ni nona ilesilesi. Sa tu rawa vei au na kena ivakadinadina ni se bera mai na gauna oqori, ni sa i koya ga na Parofita ni Turaga, sa talei sara vei au oqori. A sega li ni vakavuna vakakina o Josefa ki na nomu vakasama? A sega beka ni dau cega na iVolanikalou ka vakamacalataka sara vakamatata, e na kena rawarawa sara, me ra kila taucoko sara na tamata? Era na kaya taucoko ga na tamata, “Io, sa rui dau vakasakiti sara; ni dau vakaduavatataka na lomalagi kei vuravura,” me baleta na gauna, e ka wale sara, me da mai vulica ga kina na bula e na vuravura tawamudu (DBY, 458–59).

Au sa dau qoroya ka doka vakalevu na yaca i Josefa Simici. Au marau niu rogoca; kau taleitaka vakalevu. Au dau taleitaka na nona ivakavuvuli (DBY, 458).

Na veika kece sara au sa rawata mai vua na Turaga, a solia mai vei au o Josefa Simici; a mai vakayagataki o koya me liganicakacaka. Ke na yali mai o koya e na noqu vunau, e na yali vakakina na ivakavuvuli e so oqo; ni se bera ni vakatakilai mai, se vakaraitaki, se vakamacalataki mai vua e dua tale na tamata, me tekivu mai na gauna era a bula voli kina na i Apositolo. Keu sega ni vakabauta na iVola i Momani, au sa na vakalasuya vakakina ni Parofita o Josefa; keu na sega ni vakabauta na ivakavuvuli ka sega ni vunautaka na kena vakasoqoni tale o Isireli, kei na kena vakaduri o Saioni, meu kua tale ga ni vakabauta na iVolatabu; sa vinaka cake ga meu lesu tale i vale, keu sega ni laki vunau e na tolu na tikina oqo (DBY, 458).

E sega mada ni dua na tamata, ka se rogoca mai na sala ni bula kei na veivakabulai ka sa tukuni vua me vaka sa volai tu e na Veiyalayalati Vou, kei na iVola i Momani, kei na ivola na Vunau kei na Veiyalayalati, mai vua e dua na Yalododonu e na Gauna Oqo, me qai tukuna ni bula tiko o Jisu, ka dina na nona Kosipeli, me qai cakitaka tale ga ni a Parofita ni Kalou o Josefa Simici. E vosa kaukaua sara oqori, ia e ka dina. E na sega sara ni dua me kaya ni dina na ivola oqo (me tara sara na iVolatabu), ka nona vosa na Turaga, ka sala, ka idusidusi ni sala, me yavu ka da vulica kina na loma ni Kalou; me kaya tale ga ni lasu na iVola i Momani; ke sa wilika oti mai, se rogoca na kena wiliki, ka vulica kina na ivakavuvuli e loma. Ni sega sara ni dua e na dela i vuravura oqo, ka sa vulica mai na Kosipeli i Jisu Karisito mai na ivola e rua oqo, me qai kaya tale ni dua e dina, ka lasu na kena ikarua. Ni na sega ni dua na Yalododonu e na Gauna Oqo, se tagane se yalewa, me tukuna ni dina na iVola i Momani, ka qai vakalasuya ga na iVolatabu. Ke dua vei rau e dina, e rau na dina ruarua; ke dua vei rau e lasu, e rau lasu ruarua. Ni se bula tiko o Jisu, ka iVakabula kei vuravura, e Parofita dina ni Kalou o Josefa Simici, ka bula tiko edaidai e na lomasere i Eparaama. E dina ga ni ra sa vakamatea na yagona, e se bula tiko ga ka raica tiko ga na mata i Tamana Vakalomalagi; sa savasava tiko ga na nona isulu, ni ra tiko volivolita na itikotiko vakatui ni Kalou o ira na nona agilosi; ka na sega tale ni dua e vuravura me kaya ni bula tiko o Jisu, ka qai cakitaka, e na gauna vata ga, na noqu itukutuku me baleti Josefa na Parofita. Oqo na noqu ivakadinadina, ka sa tudei tu (DBY, 459).

A veivakavulici na Turaga vei Josefa Simici, na Nona iTalai, e na ivakatakila, “me vakaikuritaki na dina e na ivakavuvuli dina.”

Me tekivu mai na siga ka taura kina o Josefa na peleti, kei na gauna ni se bera ni yaco oqori, a dau soli vakasala vua na Turaga. A dau dusimaki koya e na veisiga, kei na veiaua (DBY, 461).

A soli tiko ga vei Josefa na ivakatakila, me ikuri ni ivakatakila sa soli oti, kei na cakacaka vakalotu, me kena ikuri, ka vakaikuritaki tale ga na ivakavuvuli dina ka sa soli oti mai, me yacova sara ni sa mai soli taucoko vua na yavu ni veivakabulai me baleti ira kece na lewe i vuravura (DBY, 461).

Era sa lesi mai vua na Kalou na lewe i vuravura kece ga; era sa vakaroti me ra veivutuni ka papitaisotaki me ivakabokoci ni ivalavala ca (DBY, 461).

Eda sa sivia mai e dua na ka, ki na dua tale, kau rawa ni kaya ni dua na ivakatagedegede ni vuku ki na kena ka tarava. Ni sa mai tukuni vei Josefa na itukutuku me baleta na peleti ka a bulu tu e na delana o Kumora, a sega ni soli vata vua na idola ni Matabete i Eroni, e a tukuni wale ga vua na itukutuku ni tiko e kea na peleti, ka na qai vakalasikata cake mai na Turaga. … A mai tukuni vua ni a tu tale ga vei ira [itaukei e liu kei Amerika] na ivakavuvuli ni Kosipeli, me tekivu kina, ka qai toso tiko ga, e na veikalawa yadudua, me yacova ni sa laki taura na peleti, kei na Urimi kei na Cumimi, ka sa soli mai vua na kaukaua me vakadewataka kina na peleti. E sega ni mai oka kina me i Apositolo, ka soli kina vua na idola ni Matanitu, se me lesi kina me iTalatala Qase kei Isireli. A parofita dina o koya, ka tu vua na yalo ni parofisai, ka sa tu taucoko vua na veika oqo ni bera ni qai vakatikori koya na Turaga. E na gauna e qai tukuna kina vua e na raivotu na Turaga me lako i Pennsylvania, a mani gole, ka laki vakacavara kina na vakadewa ni iVola i Momani; ia ni qai vakarota tale na Turaga e na ivakatakila me lesu tale, me lako i na Yasana o New York, me lako ki na vale ni qase o Whitmer, ka tiko veibasai kei Waterloo, me laki cegu kina vakalekaleka, a vakayacora vakakina, me laki soqoni ira vata kina e na vunau, ka kauti ira mai e vica ka ra vakabauta na nona ivakadinadina [raica na HC, 1:48–51]. A qai soli vua na Matabete i Eroni, ka qai solia tale ga vua e muri na lewa ni Matabete i Melikiseteki, ka vakaduria sara na Lotu [raica na V&V 13; 20; 128:20]. A soli taumada vua na kaukaua me veipapitaisotaki kina, ka sega ni se kila na veika e muri e na soli mai vua, me yacova ni sa qai tukuna mai na Turaga ni se vo tiko na isolisoli me baleti koya. A qai soli vua na lewa ni Matabete i Melikiseteki, ka soli vua na lewa me veivakadeitaki e na nona sa veipapitaisotaki oti, ka sega ni se soli vua mai liu. Ke rau a tautauvata ga kei Joni na Dauveipapitaiso e na nodrau isolisoli vakalotu, ke a sega ni talai iratou na lewe tolu na Turaga, o Pita, Jemesa, kei Joni, me ratou mai vakatikori Josefa ki na Matabete i Melikiseteki. … Keimami sa qai mai taura kina na cakacaka vakalotu tale e so (DBY, 461–62).

E na gauna oqo [1840] a soli mai kina e dua na ivakatakila ni rawa ni keimami na papitaiso e na vukudra na weka i keimai era sa mate, ka sega ga ni vakatakila mai me vakaleweni tiko na kedra itukutuku o ira era sa papitaiso; ia ni sa qai mai tauri na ivakatakila me baleta na tikina oqori, a qai mai vakayacori me vakakina (DBY, 462).

A veivakavulici vakamatata o Josefa Simici na Parofita mai na ivakavuvuli dina ni kosipeli.

A ka wale ga me cakava o Josefa Simici, me vunautaka ga na itukutuku dina—na Kosipeli me vaka sa vakatakila mai vua na Turaga—me vakamacalataka kina vei ira na tamata na sala me ra kunea kina na bula, era a soqoni yani e tikina o ira na tamata yalodina, ka taleitaki koya vakalevu, me vaka ga na nodra dui taleitaka na nodra dui bula. E rawa wale ga vua me vunautaka na ivakavuvuli dina, ka na veivakasoqoni na ivakavuvuli oqori vei ira na Yalododonu, ka ra lomadina kina. O ira vakayadua era vakabauta ka vakamuria na ivakavuvuli ni Kosipeli i Jisu Karisito, era okati me ra nona ivakadinadina ki na itukutuku oqo (DBY, 463).

Na uasivi ni lagilagi ni nona bula o Baraca Josefa Simici, ni rawa ni moica me ra kila o ira ka yalani ga na veika era kila, na veika talei vakalomalagi. Ni dau vunau vei ira na tamata—e dau vakatakila na veika ni Kalou, na loma ni Kalou, na yavu ni veivakabulai, na inaki nei Jiova, na noda veiwekani kei koya kei ira na lewe i lomalagi, ka dau vakarawarawataka na nona vunau me ra kila rawa kina na tamata kece ga, na tagane se yalewa, kei ira na gone, me vakamatatataka sara, me vaka na dodonu ni sala sa caramaki tu e matada. E dodonu me ra kila kina na tamata kece ga na nona ilesilesi kei na kaukaua vakalou, ni sega tale e dua me veivakavulici mai me vakataki koya, ka sega tale ga ni dua e vakatakila mai na veika ni Kalou, mai na ivakatakila ga nei Jisu Karisito (DBY, 463).

E sega sara ni dua na tamata me laurai ka rawa ni veivakavulici e na veivutuni kei na papitaiso me ivakabokoci ni ivalavala ca, ka tu vua na lewa me qarava na cakacaka vakalotu, me yacova ni sa qai lesi Josefa Simici na Kalou, ka talai koya yani e na ivakaro vei ira na tamata. Ni se bera oya, au sa dau vakadidike mai me baleta na veimatalotu kece sara; au dau vakasaqaqara e na veivanua kece ga, e na noqu saga meu kunea na lotu savasava e vuravura; au vakasaqara tale ga na tamata ka rawa ni tukuna vei au na veika vakalou, na veika vakalomalagi, me baleti ira na agilosi kei na bula tawamudu. Au vakabauta dina na Kalou na Tamada, kei Jisu Karisito, ia au sega ga ni vakabauta ni sa duri tu e vuravura na Lotu i Karisito (DBY, 463).

Keu na tomana tiko beka na noqu vulica na iVolatabu kei na ivola ka sa volai tu, ia ke sega na ivakatakila mai vua na Kalou, au vakatauvatani beka ga ki na kaukamea sa rorogo, se na lali sa tataqiriqiri, ka sega ni kila tu na Kalou, se na lotu dina, na nodra vueti na bula se o ira na mate; keu a bula ka mate tale e na lecaika; ka sa vaka oqo na nodra bula e vuqa na lewe i vuravura (DBY, 463).

A tarogi vakawasoma vei Josefa Simici na taro oqo, mai vua e dua na turaga ka mai sikovi koya kei ira na nona tamata, “O rawata beka vakaevei mo lewai ira tu vakarawarawa na nomu tamata? E kena irairai, ni ra sega ni vakayacora tale e dua na ka, ka dau vakamuria ga na nomu vosa; e rawa beka vakaevei ni o lewai ira tu vakarawarawa?” A qai kaya mai o koya, “Au sega ni dau lewai ira. Sa vakatakila mai na Turaga na ivakavuvuli e so mai lomalagi, ka nakiti me da vakamuria e na veisiga e muri oqo. Sa roro voleka sara na gauna me vakasoqona kina na Turaga na nona tamata mai vei ira na tamata ivalavala ca e na vakalekalekataka tale ga na nona cakacaka e na yalododonu, kau sa vunautaka tiko vei ira na tamata na ivakavuvuli sa vakatakila mai, ka ra sa saga tiko me ra dau vakamuria, me ra qai lewai ira ga.”

Kemuni na wekaqu, oqo ga na noqu ivunivuni e na nodra lewai o ira na lewenilotu. Sa dau nanumi ga niu dau lewai ira, ia e sega ni vakakina. Me vaka ga au sa dau lewa vakavinaka sara na noqu bula, ka muria vakadodonu tiko, ka veivakavulici tale ga e na ivakavuvuli me ra dau vakamuria na tamata (DBY, 470).

Au vakasamataka e vuqa na gauna me dau vakananuma kina o Baraca Josefa na kedra iwiliwili era na curu mai i na Matanitu ni Kalou, ka qai lesu tale, me kaya kina, “Kemuni na taciqu, au se bera tiko ni vukitani, ka sega tale ga ni nanuma meu na vakayacora.” E na levu beka vei kemuni o ni rawa ni nanuma tale na veivosa oqori ka a cavuta. Me dau masu e veigauna o Josefa, me vakavatukanataka tiko ga na nona vakabauta, me dau bulataka na nona vakabauta, ka qacoya tiko ga na nona ilesilesi vakalotu, me vakavatukanataka votu mai vua na Turaga, me vakadeitaki koya tale ga e na vakabauta (DBY, 469).

Ia, me vaka keimami malumalumu vata ga kei ira na taciqu vakalotu, ni keimami sa rui yawa sara mai na bula eda nanamaki kina, kei na veika talei eda sa mai sotava tu, ke a raica mada ga o Josefa Simici, Jr., na Parofita na nodra talairawarawa vua o ira e na nona gauna, me vaka era sa talairawarawa tiko e na gauna oqo vua na nodra Peresitedi, ke a marautaka sara vakalevu. Ni a bula ka ogaoga mai, me cakacaka ka buno; e a yalodei sara me vaka na yalodei ni agilosi, ka lomana tu na veika e lomana o Koya Sa Cecere Sara, ka ogaoga voli ga e na kena cakacaka, me yacova sara na nona mate (DBY, 464).

A dregata o Josefa Simici na Parofita na nona ivakadinadina e na kena vakadaveri na nona dra.

Era sa mai vakadeitaka e vuqa na parofita na nodra ivakadinadina e na kena dave na nodra dra, me momona tiko ga na nodra itukutuku e na kena kaukaua. … Me vaka e na gauna mai liu, sa vakakina e na gauna oqo. Ni qai dregata o Josefa Simici e na nona dra na nona ivakadinadina, sa tudei ka laulau tu kina na nona ivakadinadina mai na gauna oya, me ra rogoca kece ga na kai vuravura; raica e na ca vakalevu sara vei ira era saqata (DBY, 467).

Ni lako [o Josefa Simici] i Carthage, e a kaya, “Au sa lakova na mate; au sa lako me vaka na lami sa laki vakamatei; au sa na laki sotava na veika sa lokuci tu” (DBY, 467).

O cei beka e vakabulai Josefa Simici mai na ligadra na nona meca [me yacova] na siga ni nona mate? O koya na Kalou; e dina ni voleka sara ni mate e na vuqa na gauna, ka rairai vakatamata ni na sega ni vueti mai kina, ni sa na sega ga ni vakabulai rawa. Ni tiko e valeniveivesu e Missouri, ka sega sara ni dua e namaka ni na drovaki ira rawa, sa tu vei au na vakabauta nei Eparaama, kau kaya kina vei ira na mataveitacini vakalotu, “Me vaka sa bula tiko na Turaga, e na dro rawa o koya mai na nodra veivesu. E dina ga ni sa parofisaitaka oti ni na sega ni yacova na yabaki vasagavulu, eda nuitaka taucoko tu ni na cala na vosa ni parofisai ka voqa oqori, ka na tiko ga o koya e na keda maliwa; ni da vakabauta ni na kaukaua cake na noda vakabauta, ia, e sega ni mani yaco me vakakina—a qai laki bale o koya me maritire ni nona vakabauta. Au kaya kina, “Sa rauta vinakal; sa na qai momona eke na nona ivakadinadina; ni sa mai dregata e na nona dra” (DBY, 469–70).

E sega ni se kau tani mai vua na nona itutu, sa lako ga me laki veiqaravi e na dua tale na taba ni nona cakacaka o Koya sa Cecere Sara. E se i Apositolo tiko ga, se Parofita tiko ga, ka qarava tiko na itavi ni i Apositolo kei na Parofita; sa cavuta yani e dua na ikalawa i liu, ka laki vakaisalusalu kina e na qaqa, ka daru se bera ni se rawata o kedaru (DBY, 468).

Au kila ni a kacivi mai vua na Kalou [o Josefa Simici], kau kila oqori mai na nona vakatakila vei au o Jisu Karisito, kei na ivakadinadina ni Yalo Tabu. Keu sega ni se kila mai na veika dina oqori, au na sega ga ni okati meu “Momani,” kau na sega tale ni mai tu eke edaidai (DNW, 22 Okt. 1862, 2).

Me iUlutaga ni Vuli

A vakadavora o Josefa Simici na Parofita na yavu ni Lotu i Jisu Karisito e na iTabagauna Oqo.

Na itavi cava beka eratou a veivakarautaki kina vei Josefa Simici o ira na nona itubutubu, me mai isevu ni parofita ni itabagauna oqo? Sa veivakadeitaki beka vakaevei na nodra vakabauta na tubumu, me tudei tiko kina na nomu ilakolako? Na cava beka e rawa ni o cakava, me vakavatukana vinaka kina na nomu bula vei ira na nomu kawa?
Na veika vinaka cava soti beka e yaco, mai na nona lesia na Turaga e dua na gonetagane wale ga, me tauyavutaka na nona matanitu e na veisiga e muri oqo? E veitokoni beka vakaevei na tikina oqo, me vakavatukanataki kina vei ira na nona sa dodoliga mai na Turaga e na nomu bula?
A vakamacalataka o Peresitedi Young ni a tauyavutaka o Josefa Simici na Parofita na Lotu i Jisu Karisito e na gauna e muri oqo, me qai so tale era tara e muri na dokana? Na cava beka na kena yavu? (Raica tale ga na V&V 5:9–10; 135:3.) Na cava beka na dokana? Na ivakadinadina cava beka o sa raica mai, ni sa taracake tiko na doka ni Lotu? Me da cau beka vakaevei ki na cakacaka oqo?
Na cava beka e vakamacalataka o Peresitedi Young ni “ilakolako kei na uasivi ni itavi nei Josefa”? Me da vakamuria beka vakaevei na imoimoi ni nona veivakavulici o Josefa Simici na Parofita, e na noda vunauci ira na luveda?
E vunautaka vakacava o Josefa Simici na Parofita na inaki ni bula oqo, me da “vulica ga kina na bula e na vuravura tawamudu”? E vakaibalebale beka vakacava na ivakavuvuli oqo ki na noda bula vakavuravura oqo?

A veivakavulici na Turaga vei Josefa Simici, na Nona iTalai, e na ivakatakila, “me vakaikuritaki na dina e na ivakavuvuli dina.”

Na cava beka na vuna e dau vakalasikata kina na Turaga na Nona ivakavuvuli dina, me solia “na ivakatakila, me ikuri ni ivakatakila sa soli” mai, ka sega ni solia ga mai vakadua? (Raica tale ga na V&V 93:11–14.) E vakavatukanataki beka vakacava na ivakavuvuli oqo e na bula nei Josefa Simici na Parofita? Sa dau yaco beka vakacava e na nomu bula?

A veivakavulici vakamatata o Josefa Simici na Parofita mai na ivakavuvuli dina ni kosipeli.

Na cava beka na vuna sa dau oka kina o Josefa Simici na Parofita me ivakavuvuli vinaka ka momona? Na cava beka na “nona ivunivuni” me baleta na nona dau veiliutaki vei ira era sa nona na Turaga? Me da vakayagataka beka vakacava na ivakavuvuli oqo e na noda dui itavi e vale, e na cakacaka, kei na Lotu?
E rawata beka vakaevei o Josefa na Parofita “me vakavatukanataki votu mai vua na Turaga, me vakadeitaki koya tale ga e na vakabauta”? Me da kila beka vakaevei na lewa ni Turaga me baleti keda? Na cava na vuna e vinakati kina me da yalodina tiko ga, me qai tudei kina na noda ivakadinadina ni kosipeli?

A dregata o Josefa Simici na Parofita na nona ivakadinadina e na kena vakadaveri na nona dra.

Na cava na vuna e bibi kina me rau dregata o Josefa kei Hyrum Smith na nodrau ivakadinadina e na nodrau dra ka dave kina? (Raica tale ga na V&V 135; 136:39.)
A kaya o Peresitedi Young, “Au kila ni a kacivi mai vua na Kalou [o Josefa Simici], kau kila oqori mai na nona vakatakila vei au o Jisu Karisito.” Na cava beka na nomu nanuma me baleti Josefa Simici na Parofita? Mo dau veiwasei beka vakaevei e na sala e ganita, kei iratou e vale, na nomu itokani, kei ira na wekamu? Mo vola na nomu itukutuku me baleta na nomu nanuma e na vuku ni nona bula na Parofita, me baleti ira na wekamu mai muri.