Na Veilewai ki na Vuravura Tawamudu

“Au sa qai mai vakadinadinataka oqo,” e vakamacalataka o Peresitedi Brigham Young, “ni na lewai e na veika kece sara eda vakayacora e na bula vakayago oqo, me vakatau mai na noda vakanananu, kei na gagadre ni lomada (DNW, 17 Aug. 1869, 2; raica tale ga na V&V 137:9). E vunautaka tale ga ni ra na lewai vakayadua sara na tagane kei na yalewa: “E na lewai vakayadua sara na tamata kece ga … me vakatau tiko mai na veika e cakava, na nona vakabauta, na gagadre ni lomana, kei na nona yalodina, se lawaki e na mata ni Kalou; na itovo yadudua sara ka dau vakayacora e na laki vakadonui, se cudruvi kina, ka na tau vua na lewa me vaka na yavu vakalomalagi” (DNW, 12 Sept. 1860, 2).

iVakavuvuli i Brigham Young

Eda na lewai mai na veika eda cakava, na veika eda tukuna, noda vakanananu, kei na noda goleva na dina.

Me da mai vakadinadinataki keda e vuravura oqo. E gauna ni vakatovotovo na bula ni tamata, me vakadinadinataka kina vua na Kalou, mai na noda lecaika, se malumalumu, ka vakacolasau kina o koya na tevoro, eda veiwekani dina kei Tamada, ka da dau cilavi mai na nona rarama, me rawa kina ni da veiliutaki vei ira na luveda—me yaco me da laki turaga ni veituraga, ka nodra tui na tui—me da veiliutaki vakadodonu sara ki na iwase ni noda vuvale, me da laki vakaisalataki kina e na lagilagi e na matanitu silesitieli, ka bula vakatukatuka, e na bula tawamudu (DBY, 87).

Au sega mada ni kila na gauna daru na veilewai kina; se na dede ni noda vakadavora tu na yagoda qele oqo me da lakova yani na vuravura ni yalo. Au sega mada ni kila ni da sa na waraka ga na noda lewai ni da sa laki davo oqori, ni sa vakaoqori na vosa mai na ivolanikalou; “na yasana sa bale ga kina na kau, sai koya ena no ga kina” [raica na Dauvunau 11:3], se meu cavuta e na dua tale na kena itukutukuni, eda na laki sotava na veilewai, e na vanua sa laki biuti keda kina o mate (DBY, 382).

E veivakatautauvatataki tale o mate, me rau tautauvata vinaka ga na tui vakairogorogo, kei koya na vakaloloma ka dau kerekere, ni rau na laki duri ruarua e na mata ni itikotiko ni veilewai nei Karisito, me rau laki sauma kina na nodrau ivalavala vakayago (DBY, 445).

Me ra dui vakabauta ga na tamata na veika e so era vinakata me ra vakabauta, ka dui goleva ga na lomadra, ni da sa galala tu me da digia na veika e so ni noda bula, se me da besetaka e dua na ka; sa tu na galala ki na tamata yadua me ra qarava na Kalou, se me ra vakanadakui koya. Sa tu vei keda na iVolanikalou, na dina vakalou, sa tu vei keda na galala me da vakabauta, se me vakalasuya. Ia, eda na kau cake e na dua na gauna me da laki lewai vua na Kalou, me baleta na veika kece sara oqo, ka me da laki vakaraitaka kina vua na noda veiqaravi, vua ka dodonu me lavaka vei keda na itukutuku ni noda bula vakayago (DBY, 67).

E tina ni iyau ga ni vuravura oqo na gauna, kei na nodra gugumatua o ira na lewena, ka da sa vakavinavinakataka ga vua na Kalou e na vuku ni kena vakayagataki na gauna me yaga vei keda, ka na tarogi keda e na vuku ni noda vakayacora vakadodonu na tikina oqori(DBY, 301).

Era na lewai yadudua na luve ni tamata, me vakatau mai na veika era sa dau cakava, se vinaka se ca. Ke vakasinaiti e na nona bula e dua na tamata na veika vinaka, e na saumi kina vua. Ia, ke vuabale e na nona bula na ivalavala ca, e na saumi vua na veika ca e dau cakava oqori. … Ni naica li, me ra qai kila kina na tamata, ni dodonu me ra yavutaka yani e na bula oqo na nodra qai laki bula vakalou e muri, me tawamudu sara, sa kena gauna oqo me ra lalawataka kina, ka vuataka mai na yavu ni lomada, me dokai ka vakalagilagi kina na Kalou, me vaka a vakayacora mai o Jisu (DNW, 13 Epr. 1854, 1).

O ira vakayadua sara era sa dau vakabauta, era tamata lomadina, ni ra dau vuataka e na nodra bula na ivalavala dodonu, ka ra sa digitaki ni Kalou, me ra na taukena na veika kece sara. O ira ka ra talaidredre ki na ivunau savasava ni Turaga, kei na cakacaka tabu ni nona vale, era na lewai e na veika era sa dau tukuna, ka ra na coko ga e na gusudra, me vaka sa dauyaco tiko oqo, ka na sega ni veiganiti kaya, ni na sega ni vakaivotavota kei ira na yalododonu (DBY, 383–84).

“Sa dina,” e na kaya beka e dua, “e na sega tale ni dua na ka meu ogataka e na noqu bula, keu sa vakadeitaka rawa na bula lagilagi ka vinaka cake mai na kena oqo.” Io, tovolea mada, de o koya beka qori na ka o gadreva tu, sa soli tu oqori me galala ni tamata yadua. Ni vunautaki na Kosipeli, sa tadu mai na vosa ni vunau, ka sa bula tale na ca, ka so sara era veivala kei [na kosipeli]—era na ciqoma e so, ka so era na besetaka; ia e nodra malumalumu oqori na tamata—sa tasereki ga vei ira na ivakavuvuli dina, ia era a sega ga ni duavata kina. Oqo na ivalavala ca ni vuravura. “Sa lako mai na rarama ki vuravura, a ra sa vinakata na butobuto o ira na tamata, ka cata na rarama, ni sa ca na nodra ivalavala” [raica na Joni 3:19]. A kaya vakaoqori o Jisu e na gauna a mai bula kina eke. Eda na rairai kaya beka, oqo ga na Kosipeli ni bula kei na veivakabulai, ni o ira vakayadua era na vakabauta, era na vakaivotavota e na lagilagi, e na dokai, e na bula vakatukatuka, kei na bula tawamudu; ia ke ra na vakanadakuya, era na rivarivabitaki sara kina (DBY, 384).

Ni cilava e dua na tamata na rarama ni vuku mai vua na Kalou, ka qai vakawalena, sa na tau kina vua na kena itotogi (DBY, 383).

Sa mai vakavotui vei keda na ivakavuvuli ni bula tawamudu, ka nakiti me da vakaukauataki ka taqomaki kina, me kua kina ni da vuca. Ke na goleva na kena veibasai, ka vakavatukanataka na yavu ka na laki tini e na mate, eda sa na bilitaki ga kina. Ke da sega ni rawata na veivakabulai ka da gadreva tiko, eda sa na vakadinadinataka ga ni da sa rawata vakaikeda na isolisoli ka veiraurau kei na noda ivalavala, ka da qarava oqori mai na galala ni digidigi ka sa soli mai vei keda, ni da na lewai ga mai na veivosa eda cavuta, se da na vakadonui kina, se tau vei keda na kena itotogi (DNW, 17 Aug. 1859, 1).

Eda na lewai mai na noda dui ivalavala “mai na ramase ni [noda] rarama.”

Sa kena irairai vei au, me tekivu mai na noqu se gone me yacova mai na gauna oqo, ni rui ka lialia sara, me da dau tukuna ni ra lakosese vakadua na lewe i vuravura—meu vakamacalataki tamaqu tiko, kei tinaqu, kei rau na nomu itubutubu, se o ira na tubudaru, era sa dau bula mai vakadodonu e na veivakararamataki vakayalo sa cilavi ira mai; ia, ni sega ni ra oka tu e na veiyalayalati tawamudu, se na Matabete savasava, me ra na lako kina i eli ka laki kama kina me tawamudu. E ivakavuvuli lasu vei au oqori; se dau lasu ga mai liu, ka se lasu tiko ga oqo (DBY, 384).

Me ra kila na tagane se yalewa yadudua na itovo ni Kalou, ni bera ni ra qai okati me ra tawalotu. E rawa ni ra daucaka cala; era na tawadodonu, se ivalavala ca sara, ka se bera ni rogoca mai na yavu ni veivakabulai, era se sega tale ga ni kila vinaka mai na itukutuku ni Luve ni Tamata, se ra bau rogoca mai na yacana na iVakabula, se na itukutuku ni nona mai bula vakavuravura, ka ra vakavulici ga me ra tawalotu, e na ivakavuvuli ni nodra qase kei na vuli e koronivuli; ia, ke tauri sara vakavosa, ni dua e tukuni ni ra tawalotu, sa dodonu me ra sa kila vinaka tu na veika vakalou (DBY, 384).

Ia, e na bula vakavuravura, era le milioni vakamilioni e na vuravura oqo era bulataka tiko vakavinaka, na veika era sa vakararamataki kina—me vaka era sa kila vinaka tu e na nodra bula. Au sa dau tukuna vakawasoma vei kemuni, ni na veiraurau vinaka ga na ka era na laki sotava, mai na veika era sa vakayacora yani; ni o ira vakayadua sara, era dau bula me vaka era sa vakavulici kina vakavinaka, ka rawa ni ra na kila vakaiira, era na rawata na sautu, na lagilagi, na vakacegu, na marau kei na isala sa vakarautaki tu me baleti ira, ka uasivita sara na veika era sa namaka yani. Era na sega sara ni laki lutu vakayalo (DBY, 384).

Ke tu na lawa vei ira [e so na tamata], se o cei beka e a virikotora mai, me ra dau saga tiko e na nodra igu taucoko, era na laki rawata kina na kena lagilagi ka sega ni ra namaka, mai na kena ivakamacala au na solia vei ira; o ni sega ni kila rawa na veivakalagilagi ni Kalou e na vukudra, o ira na ibulibuli ni ligadra (DBY, 385).

Meu kaya ga vei ira yadudua na bete e dela i vuravura oqo, au sega ni kauaitaka se ra lotu vakirisito, se tawalotu, se Muselemani, e dodonu mo dau bula me vaka o sa vakararamataki kina; kevaka o ni na vakayacora vakakina, o ni na vakaivotavota e na lagilagi kece sara o sa namaka mai (DBY, 384–85).

O ira vakayadua na luve ni veivakarusai, era na vakaivotavota tale ga e na nodra matanitu lagilagi.

A nakiti me ra bula vata kei Jisu o ira na nona tisaipeli. Me ra qai lako i vei na kena vo? Ki na veimatanitu ka sa vakarautaki tu me baleti ira, ka ra na laki bula ka tiko kina. E na veivakaturi o Jisu, mai na veisorovaki sa qarava mai, ki na luvei Atama yadudua, na luvena tagane kei na yalewa, me vakavo ga vei ira na luvena na veivakarusai, ka ra na biu i eli. Era na sotava na kena vo na cudru ni Kalou—me ra sotava kina na veika sa lavaka vei ira na Turaga, se me vaka sa dodonu me ra sotava; ia ni ra sa laki sotava na cudru ni Kalou, me yacova ni ra sa sauma vakaoti sara na nodra ivalavala yadudua, era na sereki tale mai na valeniveivesu. E rerevaki beka na kena vunautaki na ivakavuvuli oqo? Era nanuma e so ni ka rerevaki; ia sa na yaco dina ga, ni o ira yadudua ka sega ni dau caka ca e na gauna sa lomani kina, ka sega ni oka kei ira na agilosi ni Tevoro, e na vakaturicake mai me soli vua na nona matanitu vakaiukuuku (DBY, 382).

Era na lewe levu cake era na dau yalodina, ka lewe lailai o ira era na vukitani mai vua. E dua na iwase vei ira oqo era na laki rawata na matanitu silesitieli, ka ra na sega ni rawata o ira na kena vo, ni ra sega ni vakarautaki yani ki na matanitu silesitieli, ia era na laki vakaivotavota ga e na matanitu e rauti ira, ka ra dau gadreva ka goleva yani e na nodra bula (DBY, 383).

Sa lesi mai na ivotavota ni bula vakaiukuuku oqori me veiraurau kei na nodra dui bula na tamata (DNW, 13 Aug. 1862, 2).

Eda wilika e na iVolatabu ni dua tiko na lagilagi ni matanisiga, dua tale na lagilagi ni vula, ka dua tale na lagilagi ni veikalokalo [raica na 1 Korinica 15:40–42]. E na ivola Vunau kei na Veiyalayalati [raica na V&V 76], e vakatokai na bula lagilagi e so oqori me tilesitieli, teresitieli, kei na silesitieli, ka cecere duadua. E duidui na vuravura ka ra tiko kina oqori, ka duidui tabana, se duidui na tikina, e na vale nei Tamada. Ia, o ira vakayadua na turaga ka ra na sega ni kila tu na kaukaua ni Kalou, kei na cakacaka yaco ni Yalo Tabu, me ra dau dusimaki tiko ga mai vua e dua tale, ka ra vakamocera kina na nodra dui vakasama, ka vakabira ga na nodra dui vakabauta e na nona liga ni kote tale e dua, era na sega ni laki vakaivotavota e na matanitu silesitieli, me ra vakaisalataki kina me vaka era na nuitaka yani; ia e rawa ni ra na yaco tale ga me ra Kalou. Ni ra na sega ni lewai ira rawa vakaiira, me ra qai lewai ira tale na wekadra, me dau tukuni tiko ga vei ira na veika kece sara, me vaka na gone. Era na sega ni vakatulewa rawa e na veika me baleti ira, ni na lewai ira tiko ga o Jemesa, o Pita, se dua tale. Ni ra na sega ni Kalou, ka na sega ni ra na vakaisalataki e na nodra iukuuku lagilagi, ka sega ni rawata na bula vakatukatuka, kei na bula tawamudu. Era na sega ni vakaititoko kina vakailiuliu e na matanakilagi, e na itutu vakatui, kei na kaukaua ki na matanitu silesitieli. O cei ga e na rawata? O ira ga era sa dau yalodina ka vakauqeti e na yalomatua vakalomalagi, ka ra cavukalawa tiko ga vakaveiqaravi e na vukuna na nodra Kalou, ka biuti ira vakaveitalia tu mai na kena vo, ka dina tiko ga e na veika era qarava, e dina ga ni ra na lako vakatani ki na kena veibasai o ira na kena vo (DBY, 382–83).

Ke ra namaki tale ga me ra lako yani ki na iserau ni Tamada kei na Luvena o ira na ivalavala ca, ka ra caka ca tiko ga, me ra veitauriliga yani kei ira era sa vakabauta ni ra na vakabulai—ka sega ni na veivakuai kina o Jisu vua e dua, era na laki sotava kina na veika rarawa sara, ka mosimosi cake, mai na nodra sotava na rarawa ni drano bukawaqa kei na sulifure. O koya ka dau nanuma tu ni na vakarusai ga na gone ka mate ga ni se gone lailai, ka sa dodonu me biu i eli, ia na laki vakabulai o koya na dauveibutakoci, ka dau ivalavala vakasisila, na daubutako, na lasulasu, na daububului vakailasu, na daulaba, kei ira tale ga ka dau vakayacora na veika dukadukali e so, mai na nodra sa veivutuni ni se bera ga ni mate, e na okati e na yavu vata ga oqori me ra vakasaurarataki yani ki na iserau nei Tamada kei na Luvena, ka na laki tautauvata ga kei eli vei ira, ke ra mani curuma rawa yani (DBY, 385).

E vakalou na cudru ni Kalou. E na sega ni yalani rawa, ni na sega ni vagalalataki e na dua na gauna o ira na tamata ka dodonu me ra cudruvi, ka me vakarautaki tiko ga na nodra eli. E na vakaevei beka na dede ni gauna era na laki tiko kina e eli, au sega sara ni kila, se na caucaudre ni rarawa era na laki sotava. Ia ke da fikataka mada na ivalavala ca era sa bilitaki kina, eda na qai kila rawa kina na ivakatagedegede ni rarawa era na laki sotava. Ni na laki saumi ga vei ira na veika tawadodonu era a cakava e na nodra se bula voli. E ka tawamudu na itotogi ni Kalou, ia e sega ni kena ibalebale ni na tawamudu sara na cudruvi ni dua na tamata ka sa totogitaki e na nona ivalavala ca (DBY, 383).

Me iUlutaga ni Vuli

Eda na lewai mai na veika eda cakava, na veika eda tukuna, noda vakanananu, kei na noda goleva na dina.

E vunautaka o Peresitedi Young ni “gauna ni vakatovotovo na bula ni tamata.” Na cava beka me da “vakadinadinataka [tiko] vua na Kalou” e na noda gauna ni bula?
Na cava beka eda na lewai kina e na gauna ni veilewai? (Raica tale ga na Alama 12:14; 41:3.)
O cei beka era sa cavuti ni ra tamata digitaki ni Kalou?
A tukuna o Peresitedi Young ni da “na lewai ga mai na veivosa eda cavuta.” Me da kila rawa beka vakaevei ni da na “laki vakadonui, se cudruvi kina”?
Sa dau vunautaka o Peresitedi Young ni da na lewai e na vuku ni noda vakayagataki gauna. Na cava beka na vuna e rui bibi kina na kena vakayagataki vakadodonu na noda gauna? Mo lewa beka vakaevei na nomu vakayagataka na nomu gauna e na gauna oqo? Na cava beka o sa bau raica me baleta na nodra vakayagataka vakadodonu na gauna, o ira na lewe ni Lotu, o ira na nomu itokani, se o ira na wekamu?

Eda na lewai mai na noda dui ivalavala “mai na ramase ni [noda] rarama.”

Na itovo cava ni nodra bula na tamata, e na vakamalumutaka na lewa ni Turaga me baleti ira? Me da taurivaka beka vakaevei na ivakavuvuli oqo, me da veilaveti kina vei ira ka duidui sara mai vei keda na nodra vakabauta?
Me vaka sa vakamacala kina o Peresitedi Young, era na rawata beka vakaevei na tamata e na bula mai muri na “sautu, na lagilagi, na vakacegu, … ka uasivita sara na veika era sa namaka yani”?

O ira vakayadua na luve ni veivakarusai, era na vakaivotavota tale ga e na nodra matanitu lagilagi.

Na cava na vuna era na sega ni laki rawata kina o ira era mate ga e na nodra ivalavala ca, me ra laki vakaitikotiko kei Tamada kei na Luvena? (Raica tale ga na Momani 9:3–4; V&V 88:22.)
A vakamacalataka o Peresitedi Young ni ra na “na laki vakaivotavota ga [na luvena na Tamada Vakalomalagi] e na matanitu e rauti ira, ka ra dau gadreva ka goleva yani e na nodra bula.” Me da kila beka vakaevei ni sa veidonui tiko na noda bula kei na matanitu eda gadreva tiko?
Sa dau vunautaka o Peresitedi Young ni o keda vakayadua sara na tamata, me vakavo ga o ira na luvena na veivakarusai, era na laki vakaivotavota kece sara e na matanitu ni lagilagi. Na cava beka e vakavatukanataki eke me baleta na nona tudei na Tamada Vakalomalagi e na lewa dodonu kei na loloma vakalou? Na cava beka e tukuni kina me baleta na nona lomani ira na luvena?