Na Veisiga e Muri

E na gauna e vakatikori kina o Brigham Young me i Apositolo, a soli vua na ivakaro me “lako yani ka laki vakasoqoni ira era sa digitaki, ni bera na siga namaki oya, sa na lako mai kina na Turaga” (HC, 2:188). E na nona kaulotu i Igiladi, eratou laki tavoca kina kei ira na wekana na i Apositolo na sasaga ni veivakalotutaki, me tabaki vakaitukutuku, ka ra cokonaki na lewenilotu ki na nodra ilakolako vakabiuvanua ki na itikotiko liu ni Lotu e Amerika. E na nona ripote vei Josefa Simici na Parofita ka vakamacalataka kina na nodratou sasaga, a kaya kina o Elder Young: “Sa tete tiko ga na Kosipeli, era sa qolou tiko ga na tevoro e na domobula levu, na itukutuku ga au sa rawa ni tukuna, … era sa vau tiko ga na witi ca, sa vakasoqoni tale mai na witi, era sa sautaninini tu na veimatanitu, ka sa vakatoboicu tale ga na veivanua: ‘e na kani na yatedra na tamata e na rere, ni ra sa waraka na veika sa voleka ni yaco e vuravura’ “ (HC, 4:114). Ni veiliutaki tiko e na Lotu me rauta e vasagavulu na yabaki, a vunautaka o Peresitedi Young vei ira na Yalododonu me ra tomana tiko ga na nona cakacaka ni veivueti na Turaga, me kua ni ra dau yalolailai e na vuku ni veika rarawa e vuqa ka sa parofisaitaki me baleta na veisiga mai muri.

iVakavuvuli i Brigham Young

E na veilecayaki sara o vuravura e na gauna mai muri.

Na veika kece sara eda sa rogoca ka sotava mai, e sega ni okati me ikau ni itukutuku ka na vunautaki. Ni sa na laki cagutu na nodra ivakadinadina na iTalatala Qase, me tukuna kina vei ira na Turaga, “Ni lesu mai vei au; meu sa na vunautaka ga na noqu itukutuku vei ira na veimatanitu e vuravura,” na kena o ni sa rogoca tu oqo e na sega ni vakatauvatani mada ga me kena ikau, ki na ivunau ka na vunautaka e na yameyame bukawaqa kei na veivaluvaluti, na voravora ni draki, na uneune, na cagikaukaua, na uca, na vadugu ni kurukuru se na lidi ni yaseyase, kei na veivakarusai vakadomobula ka na yaco. Na cava beka na betena na kena vakarusai wale ga e vica na qiqi ni sitima ni vanua? O ni na rogoca na kena lutudromu i loma ni qele e vica na koro vakairogorogo era sa tu oqo, ka ra dau qoroya vakalevu na tamata, ka ra buluti vakadua kina o ira na lewena. E na vadugu na ua mai takali ka tubu me ulabaleta na kena iyalayala, me luvuca kina na veikoro lelevu e vuqa. Sa na dewa i na veimatanitu na lauqa, ka ra na veibolebolei na veimatanitu mai vanua tani; me ra veiraravui ka veivakarusai sara, ka ra sega ni kauai ki na dra sa dave ka taladrodro tu, se na nodra bula na wekadra, se o ira na nodra dui vuvale, ka ra sega ni dui kauai tale ga ki na nodra dui bula (DBY, 111–12).

E se sega mada ni dua na gauna e na veitabayabaki e vuqa, me tekivu mai na kena vakarusai na lotu dina e na nodra sa mai bale na i Apositolo, ka gadrevi vakalevu kina na vakabauta kei na nodra gugumatua na veituraga kei na marama vakalou, kei na maqosa, me sala vata kei ira na vuku kei na kaukaua nei Koya sa Cecere Sara, me vaka na kena era sa gadreva tu o ira na wekada e na gauna oqo. A sega ni se bau lavaki vakadua mai kina; ni se sega vakadua ni dua na gauna mai na kena buli na vuravura oqo, mai na kena sa vakarusai na Lotu, ka kau tani kina mai vuravura na Matabete, ka rarawa vakalevu sara kina na kaukaua ni tevoro, me rarawa kina na kaukaua vakavuravura kei eli, ka vakacudrui, ka levaca vakalevu na Kalou, kei na bula ni Kalou e vuravura, me vaka sa vakayacori tu edaidai (DBY, 112).

Se veisaqasaqa tiko ga na Tevoro vei Jisu me vaka e a vakayacora e na gauna oya ka yaco kina na veileti mai lomalagi. Ni vakalevutaka tiko ga na Tevoro na kedra iwiliwili na nona tamata, mai na nona veivagolei me ra ivalavala ca na nona tamata, sa tosoya tale ga o Jisu Karisito na nona iwiliwili, kei na nona kaukaua, e na nona vukei ira na nona me ra dau yalomalumalumu ka yalododonu. Ni sa veidigidigi tiko ga na noda kawa tamata, ka ra saga tiko me ra kila se isoqosoqo cava e na qaqa (DBY, 112).

E na qaqa ga na dodonu e na gauna e laki cava kina o vuravura.

E na yaco mai na gauna me ra tekiduru kina na duru vakayadua, ka vakatusai koya na yame kece ga, me ra vakadinadinataki koya kina, ni ra na laki davo e na mata madua kei na yalomalumalumu o ira ka ra sa bula oti yani e vuravura, ka sega ni duavata kei na vakasama ni bula tiko o Koya Sa Cecere Sara, kei na nona dau solia mai vei keda na ivakatakila, era na davo vakatoboicu kina e na matamadua, me ra yalomalumalumu sara vua, era na kaya kina, “E tiko dina na Kalou! Kemuni na Kalou, keimami dau vakanadakui kemuni, ka beca na nomuni vosa, ka yalosesewa ki na nomuni ivakaru, ia keimami sa qai mai tekicuva qo e na madua, ni keimami sa qai mai vakadinadinataka ni dua dina tiko na Kalou, ni sa i Jisu tale ga na Karisito.” E na yaco dina mai na gauna oqori, ni sa na vakakina. Eda sa vakabauta na Kosipeli ni Turaga o Jisu (DBY, 112–13).

Na cava beka me ra qai cakava? Era na qai rogoca ga na vuku nei Saioni kei ira na tui kei na iliuliu ni veimatanitu ka ra na cabe yani i Saioni, me ra laki taroga kina na sala ni Turaga, ka vakadidike e na vuku tawayalani kei na nodra yalomatua na nona Yalododonu o Koya sa Cecere Sara (DBY, 113).

Me ra na tekiduri kina ka vakatusa ni sa i koya na Kalou, ka sa noda Dauveivueti o Jisu Karisito, o koya ka sa vakararawataki e na vuku ni ivalavala ca kei vuravura; e na nona vakadavea na nona dra, sa vueti ira kina na turaga, marama, gone, na manumanu yavaiva, na manumanu vuka, na ika, kei na vuravura tale ga, kei na veika kece sara ka a raica ka rogoca mai o Joni ni ra veivakacaucautaki tiko mai lomalagi [raica na iVakatakila 5:13] (DBY, 113).

E na dua na gauna, e na vakatoboicutaki o vuravura me vaka sa tukuna mai na parofita, ka da raica na kena sa tekivutaki na nodra veiliutaki na yalododonu, me lako tani kina na ivalavala ca kece ga. Ia na kaukaua kei na yavu ni tevoro, ke rawa ni vakatokai me ivakavuvuli, e na sega sara ni soro vakalailai ki na nona cavuikalawa mai na iVakabula, me qai biligi lesu tale vakalalai, me da taura tale vakaukaua na vanua era sa kalawaca mai. Io, e na kaukaua ga ni vakasama ni vakabauta, kei na cakacaka vinaka, e na totolo cake ka tete vakalevu tiko ga na toso ni Kosipeli, me tubu ka bulabula cake, me yacova sara ni ra sa qai duavata na veimatanitu e vuravura ni sa dodonu me veiliutaki vakatui o Jisu, vei ira na kena tui, me vaka ni sa i koya ga na nodra Tui na Yalododonu (DBY, 113).

O ni sa vakasamataka beka ni sa iotioti ni gauna oqo ni nona veiliutaki e vuravura o Setani? Sa na lesu tale mai o Jisu me mai veiliutaki tale vakatui, mo ni kakua tale ni dau rere se yalolailai oi kemuni ka dau rere ka sautaninini e na vukudra na kemuni meca, ni kakua ni dau rerevaki ira, mo tovolea ga mo kakua ni dau vakacudruya na Kalou, mo rere ni voroka na nona ivunau, mo rere ni caka ca vua na wekamu, se vua e dua tale na ka bula e na dela i vuravura oqo, mo kakua tale ga ni dau rerecaki Setani kei na nona kaukaua, se o ira ka rawa ni vakamatea na yago, ni na veitaqomaki na Kalou vei ira na nona tamata (DBY, 114).

Ni sa cavuikalawa tiko na yabaki eda bula tiko kina, eda sa mai raica rawa oqo na kena vakayacori rawa na veika e vuqa ka sa dau parofisaitaki mai, kei na kena vakarautaki na nona lako tale mai na noda Turaga ka iVakabula, me mai bula e vuravura. Eda namaka me sa na taviraki tani na itikotiko lasu, kei na koro, vanua, matanitu se veiliutaki ka sega ni qarava na Kalou, ka sega ni vakamuria na ivakavuvuli ni dina kei na lotu, me vakarusai sara vakadua (DBY, 114).

E na yaco na duavata, na vakacegu, kei na veiqaravi ni valetabu e na ikatolu ni yabakiudolu.

E yaco e na Yabakiudolu na veika oqo—na nodra lomavata na lewe ni Lotu se Matanitu ni Kalou; na kena tubucake na Matanitu me voroka na veika kece sara e na veisaqasaqa kei na lewa mai lomalagi, na nona vesuki o Setani, ka na sega ni sereki vakailoa tale. E na tautauvata tu ga na veika taucoko tale e so, me vaka sa yaco tiko edaidai, ni da na dau kana, gunu, ka vakaisulu (DBY, 115).

Me ra bula savasava tiko ga na tamata, me qai savasava vakakina na qele era butuka tu. Me ra savasava na tamata, ka vakasinaiti e na Yalo ni Kalou, ka vakakina na veimanumanu yavaiva kei na kena era qasi e na dela ni qele, me ra vakasinaiti e na sautu; e na tubu bulabula na veika kece e teivaki e na qele, ka na kana na tamata mai na vuana. Na levu ga ni noda bula savasava, na lailai ni veiqati; na levu ga ni noda lomani ira na manumanu, na kena vakaikuritaki tiko ga na sautu, me yali vakadua sara na ivalavala vakamanumanu e dau vakavatukanataki ki na veimanumanu e vuqa. Ke ra sega ni via qarava tale na Tevoro na tamata e na gauna lekaleka ni nodra bula oqo, ke sa tu ki na ivavakoso oqo na kena yalo oqori, kei na kena vakatulewa, sa tiko rawa e na noda itikotiko oqo na Yabakiudolu. Me tu e lomadra na lewe ni koro oqo na yalo oqori, me ra vakaivotavota kina na lewe ni vanua oqo, sa na vakadinadinataki kina edaidai na Yabakiudolu. O ira taucoko sara na tamata … me ra vakaivotavota e na yalo oqori, me lasika kina na Yabakiudolu, me qai vakatetei kina e vuravura raraba (DBY, 115–16).

E na Yabakiudolu, ni sa tauyavu tu na Matanitu ni Kalou e vuravura e na kena kaukaua, lagilagi, kei na kena uasivi, ka sa mai vakamalumalumutaki kina na tubu ni ivalavala ca, ka sa veivakaleqai tu mai vakadede, sa na qai kena gauna me ra tara valetabu na nona Yalododonu na Kalou, me ra qai dau curuma tale ga, me yaco kina me ra duru ni valetabu ni Kalou [raica na iVakatakila 3:12], me ra qai veiqaravi e na vukudra na wekadra era sa mate yani. Eda na qai raica kina na nodra duri cake mai o ira na wekada, eda rairai a veikilai vinaka beka eke. … Sa na soli kina vei keda na ivakatakila, me da kilai ira tale na tubuda me yaco sara yani vei Atama na Tamada, kei Ivi na Tinada, me da qai laki curuma kina na veivaletabu, ka laki veiqaravi e na vukudra. E ra na qai vauci kina [na luvedra] vei ira na nodra [itubutubu] me yaco vinaka sara na kedra isema vei Atama, me maucokona kina na kedra isema ni Matabete mai vei Atama kei na ivakataotioti.

Oqo na nodra itavi na Yalododonu e na Gauna Oqo e na Yabakiudolu (DBY, 116).

E dodonu me da sava rawa na noda bula, ni se bera ni qai yaco mai o Jisu Karisito, e na iKarua ni Nona Lako Mai.

Mo kakua ni lomaleqa e na nanuma me vakatotolotaka na Turaga na nona cakacaka. Me tokadei ga na noda lomaleqa ki na vakasavasavataki ni lomada, na kena vakasavasavataki na noda gagadre, na noda vakarautaki ki na veika sa voleka ni yaco, ka sa toso vakavoleka tiko mai. Oqo ga na ka me da dau lomaleqa kina, oqo na iulutaga ni noda vuli, me lewe ni noda masu e veisiga, me da kakua ni nanuma me vakatotolotaki na nodra vakadrukai na ivalavala ca (DBY, 117).

Ke na vakamai beka o vuravura e na loma ni yabaki-dua mai oqo, se na loma ni yabaki-udolu, e sega ni dua na betena oqori, vei iko kei au. Sa tu oqo vei keda na vosa ni bula tawamudu, sa tu vakakina vei keda na sala ki na bula lagilagi, bula vakatukatuka, se na bula tawamudu, o na vinakata li mo vakaivotavota kina? (DBY, 117).

E dodonu me da vakaduria na Matanitu ni Kalou, me vueti o Saioni; me da vakasavasavataki keda me rawa ni da qai cokonaki kina me da qai kau cake ki na o me da laki duavata kei ira na nona Lotu na Ulumatua, kevaka eda na vinaka cake tiko ga e veisiga kei na veiaua, me da qai vakadonui kina ni da sa mate. Ia ke da bula tiko, e dodonu me da Yalododonu dina, e na veika eda cakava, me kua kina ni da taura sirita na lagilagi dina ni Kalou ka sa na vakatakilai mai (DBY, 444).

E sega ni noqu ivotavota meu kila na gauna ni Turaga; ni sa dau loloma dina o koya, sa dau vosota vakadede, ka dau veinanumi, ka na yaco galugalu tiko ga na nona cudru, me yacova ni sa qai mai oti vakadua sara na nona loloma, me qai tau mai na lewa vakaveilewai. Au na sega beka ni kila na kena sala, kau sega tale ga ni via kila e na gauna oqo. Sa kilikili ga me da kila na sala me da qarava kina na noda Kalou, ka dau bulataka na noda lotu, me da vakadonui tiko kina vua na Kalou (DBY, 117–18).

Me iUlutaga ni Vuli

E na veilecayaki sara o vuravura e na gauna mai muri.

Me vaka sa vakamacala kina o Peresitedi Young, na veivakatovolei cava soti beka e yaco e na veisiga mai muri? Na cava beka na vuna e na tau kina e vuravura na lewa oqori?
Na cava beka e kaya o Peresitedi Young ni vuna duadua e na tarovi kina na kena vakacacani na Lotu?
E se caucaudre beka vakaevei e vuravura e na gauna oqo na ivalu mai lomalagi? Na cava beka e lavaki e na veisiga e muri vei ira na “na veituraga kei na marama vakalou”?

E na qaqa ga na dodonu e na gauna e laki cava kina o vuravura.

Na cava beka era na cakava na ivalavala ca ni ra sa “rogoca ga na vuku nei Saioni”?
Na cava beka e dodonu me da ririkotaka, e na gauna oqo, na “iotioti ni gauna oqo ni nona veiliutaki e vuravura o Setani”? Me kua beka vakaevei ni da dau rerevaka na meca ni yalododonu?
E vakamacalataka o Peresitedi Young ni ra na “biligi lesu” na ivalavala ca, ka na “totolo cake ka tete vakalevu tiko ga na toso ni Kosipeli” mai na “kaukaua ga ni vakasama ni vakabauta, kei na caka vinaka.” Me rawa beka vakaevei ni “kaukaua ni vakasama” na vakabauta”? Me veivorati beka vakaevei na caka vinaka ki na ivalavala ca? Me da tovaka beka vakaevei na kena cavuikalawa na kosipeli, me “tete vakalevu tiko ga [na toso ni Kosipeli], me tubu ka bulabula cake”?

E na yaco na duavata, na vakacegu, kei na veiqaravi ni valetabu e na ikatolu ni yabakiudolu.

Me vaka sa vakamacala kina o Peresitedi Young, na cava beka na ikatolu ni Yabakiudolu? (Raica tale ga na V&V 43:30–31; 88:110.)
Me savai beka na vuravura kei ira na lewena, ka me kune sautu tale ga?
Na cava beka na nodra cakacaka na Yalododonu e na Gauna Oqo, e na gauna ni Yabakiudolu?

E dodonu me da sava rawa na noda bula, ni se bera ni qai yaco mai o Jisu Karisito, e na iKarua ni Nona Lako Mai.

A vakamacalataka o Peresitedi Young ni dodonu me da vakasavasavataki keda e na noda vakavakarau ki na iKarua ni Nona Lako Mai o Jisu Karisito. Me da savai beka vakaevei? (Raica tale ga na Ilamani 3:35; V&V 20:31.)
Na cava beka na vuna me kua ni da lomaleqataka kina na iKarua ni Nona Lako Mai?