Bula e na Kosipeli

Ni dua o koya na dautawavanua vakairogorogo, na iliuliu vakaitikotiko kei na Lotu, ka qarava tale ga na bula ni nona matavuvale, a dau idusidusi uasivi o Peresitedi Brigham Young e na kena bulataki, ka vakatovotovotaki na kosipeli. E a dau vakavatukanataka e na nona ivakavuvuli kei na nona bula, ni sala ki na bula tawamudu na kosipeli i Jisu Karisito, me baleti keda vakayadua na lewe i vuravura, ka lotu e “vakatovotovotaki rawa, ka ni oka kina na itavi kei na vakanananu ni noda bula e veisiga” (DBY, 12).

iVakavuvuli i Brigham Young

E dau vakaikuritaki ga vakalalai, na noda yalomatua e na kosipeli, mai na vosa ki na vosa, ni da bulataka tiko na ivakavuvuli eda vulica.

Eda … goleva yadudua sara na ivakaro, ivunau, cakacaka vakalotu, se veika sa virikotori tu e na iVolanikalou, ka dau vakatovotovotaka kece e na veika e rawa ni da goleva kina, ka qai vakaikuritaka e na noda vuli ka torocake tiko ga, me yacova ni da sa rawata me da vakamuria na veivosa kece sara ni Kalou (DBY, 3).

Sa tu oqo vei keda na Kosipeli ni bula kei na veivakabulai, me ra vinaka cake kina o ira era se malumalumu tu, ka me ra vinaka cake sara o ira sa vinaka rawa tu (DBY, 6).

Ni rau veitalanoa e liu kei koya e dua ka se qai lesu mai na veiyasana i Natuicake kei Amerika, a tukuna kina vua, “O ni nanuma ni o ni sa vinaka vakaoti?” “E sega;” au kaya yani vua, “au sega ni rawa ni kaya qori. … Na yavu ni vunau ga keimami sa ciqoma e vinaka vakaoti; ia ke ra laurai na lewena, se tu tale ga na veimalumalumu e so e rawa ni da raica. Keimami se sega sara ni vinaka vakaoti; ia sa nakiti me veivakavinakataki na Kosipeli ka keimami vunautaka, me torocake kina na nodra bula na lewena, me rawa kina ni ra vakaivotavota e na veivakaturicake lagilagi, ka curuma yani kina na iserau ni Tamada kei na Luvena” (DBY, 7).

Ni ra na sega ni [ciqoma rawa na tamata na ivunau] e na kena taucoko; ia e rawa ni ra tuberi ka vakaikuritaki vakalalai, e na veigauna e so, me vakalailai nikua ka vakalailai ni mataka, me qai vakalailai tale e na macawa ka tu mai, me vakakina e na kena qai vakaikuritaki tale e na yabaki ka tu mai, ke ra ciqoma vakayalomatua na veika lalai era sa vakararamataki kina; ke sega, era na tu ga vakaveilecayaki, ka na butobuto tiko ga vei ira na rarama sa veiserauni kina na Turaga, ka na kalawaci ira kina o lomalagi, ka ra biu tu mai me ra vakayayamo. O koya gona, ke da vinakata me da cakacakataka na taucoko ni kila ka sa lewa na Turaga me vakatakila mai, ka vakaikuritaki tiko vakalalai, ki na lewe i vuravura kece ga, e dodonu me da cokonaka vakavinaka na veika lalai sa vakatakila mai vei keda (DBY, 4).

Au … vinakata meu cikeva tikoga vei ira na Yalododonu e na Gauna Oqo me ra dau vakamuria vakamaqosa na yavu ni Kosipeli e na noda dui bula, noda ivakarau kei na noda veivosa eda cavuta; ka na namaki me vagolei na bula raraba ni tamata, me cokonaki vinaka, me rawa ni qai kila kina na veika dina sa tu vei Jisu Karisito. Qori gona na sala e na cokonaki kina na tamata me vinaka vakaoti. Ka yavutaki mai na nona ivakarau na iVakabula; e dina ga ni vakalailai sara na tikina e vakavatukanataki vei ira, ni ra na sega ni kila rawa na kena ibalebale. A solia ga na ivunau ka rawa ni ra yalomatuataka. Sa dau solia mai vei keda na Turaga na veika e rawa ni da ciqoma; ni sa solia ki na veimatanitu na veika kece ga e rawa ni ra ciqoma (DBY, 11–12).

E tukuni e na iVolatabu ni vakasirovi koya sobu sara na iVakabula, me rawa kina ni ulabaleta na veika taucoko sara. E sega li ni vinakati vakakina vei keda kece sara? Sa dodonu me vakakina. Sa dodonu gona kina me da vakasirovi keda vakayadua, me da na qai cabe rawa kina e na dua na gauna mai muri, me da vuli rawa kina vakalalai, ka me da qai vakavukui vakaikuritaki mai “na vunau e na vunau kei na vosa e na vosa [me vakalailai tiko ga]” [raica na Aisea 28:9–10; V&V 98:12] (DBY, 60) me yacova sara yani na bula tawamudu, ka laki rawata taucoko kina na nona lagilagi, nona uasivi kei na lewa (DBY, 3).

Sa umanivata ga na tikina vakayalo kei na veitikina vakayago ni kosipeli.

Vua na Kalou, kei ira vakayadua ka ra kila vinaka na ivakavuvuli ni bula kei na yavu ni veivakabulai, na Matabete, na parofita ni veika dina kei na isolisoli kei na ilesilesi ni Kalou vei ira na na luve ni tamata, ni sega ni duidui na icolacola vakayalo kei na kena vakayago—ni sa duavata ga. Keu goleva tiko na noqu itavi, au sa na qarava na lewa ni Kalou, keu vunau beka; masumasu, se ogataka e ligaqu na noqu bula vakaiau; seu dauteitei beka, se volau ni caka motoka, se qaravi bisinisi tiko ni veivoli, se vanua cava ga e tiko kina na noqu itavi, au na qarava tale ga na Kalou e na veivanua ga au cakacaka kina; sa na vakakina vei keda vakayadua sara, e na noda dui vanua ni veiqaravi, e na kena gauna ga (DBY, 8).

E na vakanananu ni Kalou, e sega ni tawasei na veika vakayalo mai na veika vakayago, se na vakayago mai na vakayalo; ni rau duavata ga vua na Turaga [raica na V&V 29:34–35] (DBY, 13).

Na veika yadudua e baleta na kena taracake na matanitu ni Turaga e vuravura, e na kena vunautaki na Kosipeli, se na kena tara na veivaletabu e na vukuna, eda sa vakavulici me da okata ni cakacaka vakayalo, e dina ga ni lavaki kina na kaukaua ni yagoda, me qaravi rawa kina (DBY, 13).

Eda na sega ni curuma yani na valetabu e na gauna e tara kina, ka laki qarava rawa kina na veicakacaka vakalotu me vakavurea vei keda na isolisoli vakayalo, ka sega ni qarava kina na cakacaka vakayago. Me qaravi na veicakacaka vakayago me da laki rawata kina na isolisoli vakayalo e so sa vakarautaka tu o Koya na Kalou Kaukaua, me baleti ira na luvena yalodina. Na cakacaka kece sara e caka, e sega ni cakacaka vakayago ga. A tukuna kina na i Apositolo, sa rawa na vakabauta e na vakarorogo [raica na Roma 10:17]. Na cava beka e dodonu me rogoci, me laki vakavurea na vakabauta? Na vunautaki ni Vosa. E dodonu kina me dua e vunau; e na sega ni yalo ka na sega ni laurai rawa e matada, e dua ga vakataki keda, ka vakayago tale ga, ka vauci tale ga e na yavu ni ivakaro ka da bula kina. E itavi vakayago na kena vunautaki na Kosipeli, ka na laki vakavatukanataki e na cakacaka ni bula vakayago qori na kena qai vakabauti na Turaga o Jisu Karisito. E cakacaka vakayago tale ga na papitaiso, vua ka papitaiso, kei koya e veipapitaisotaki. Au ivakadinadina bula me baleta na itukutuku oqo, ka ni sa mai wawale vakalevu kina na yavaqu e na vica na gauna, e na levu ni noqu veilakoyaki ka vunau, me rawa ni ra votai e na noda vakabauta o ira era rogoca na Kosipeli. Ni na takavi keda mai na isolisoli eda gadreva vakalevu e na noda vakayacora na cakacaka vakayago e lavaki kina, ka me da vakarautaki kina e na veika kece ga sa lavaki kina, me da laki vakaivotavota kina e na veivakalougatataki nei Jiova, sa sega ni laurai votu, me baleti ira na luvena (DBY, 13–14).

E idusidusi ni bula e veisiga na kosipeli—na lotu ka cakacakataki.

Na lotu i Jisu Karisito e lotu ka vakatovotovotaki rawa, ka ni oka kina na itavi kei na veika e nanumi ni noda bula e veisiga (DBY, 12).

E na sega ni yaga vei keda na yavu ni bula tawamudu, kei na bula vakalou, me vakavo ke vakarawarawataki me da kila, ka dau vakatovotovotaka e na noda dui bula (DBY, 14).

Meu vakarawarawataka na Kosipeli ki na gauna oqo, ki na kena ivakarau kei na nodra bula na tamata (DBY, 8).

Na yavu vinaka ga me da vakamuria, na kena eda kunea kina na sautu kei na vakacegu, ka kena bula ga ka vinaka me da laki mate kina; na kena ka vinaka duadua me da qarava kina na noda itavi; ka vinaka duadua me da qarava kina na noda veiwere, me tara kina na veikoro kei na veivaletabu, na yavu oqori na ivunau ni Kalou. E lavaki ga kina na vakarorogo ka talairawarawa. Na lewa ka yavutaki e na dodonu, na laini ka sa vakarautaka na Kalou me ra kalawa kina, e na vakavuna na sautu, na yalovakacegu, kei na marau e na gauna oqo kei na lagilagi tawamudu kei na bula vakalou; ia e na rawa wale ga mai na kena vakamuri vakadodonu sara na ivakaro ni Kalou (DBY, 8).

E na noqu dau nanuma e na so na gauna meu vosa vei kemuni, ni ra na rairai marautaka beka e so e na ivavakoso meu vunau e na veiulutaga e so me baleta na gauna sa bera mai, se na kena railesuvi tale na itukutuku ni veigauna kei vuravura; ia, au sa nanuma ga mai na noqu vakatulewa, kei na yalomatua kau sa vakavukui kina, ni ra na sega ni dusimaki kina e na nodra itavi e veisiga, keu vakayacora me vakakina. E na vuku ni ka oqori, au nanuma kina ni sega ni yaga meu veidusimaki vei kemuni e na nomuni itavi e na duanadrau na yabaki mai muri, meu veivakaroti ga e na veika ni gauna oqo, e na noda ilakolako kei na ivosavosa e veisiga, me yaga tiko vei keda e na kena toso tiko na gauna, kei na isolisoli sa tu oqo vei keda, me da vakarautaka kina na nodra yavu ni marau e na gauna sa bera mai (DBY, 12).

Ni sa noqu ilesilesi ga me veivakavulici e na veika me baleta na noda bula e veisiga. Au vakabauta ni levu vei kemuni oqo o ni sa rogoca na noqu a kaya, e na vica na yabaki sa oti, niu sega ni kauai e na veika e na yaco ni sa oti na ikatolu ni Yabakiudolu. Era na rairai vunau kina vakabalavu na italatala qase me baleta na veika e a yaco e na gauna i Atama, na cava e a yaco ni se bera na veibuli, kei na veika e na yaco e na vica na udolu na yabaki mai na gauna oqo, ni ra veivosakitaka na veika sa yaco, se bera ni yaco, ka ra lecaika kina vakalevu, me ra vakani ira ga e na veika macawa; ia e sega ni noqu ivakarau ni veivakavulici oqori. Au gadreva ga meu vakavulici ira na lewenilotu e na veika e so e dodonu me ra sa kila tu e na gauna oqo, me qai veitalia na ikatolu ni Yabakiudolu. Ni sa noqu ilesilesi meu vakavulici ira me ra dau qarava na Kalou, ka taracake na nona Matanitu. Au sa veivakavulici mai me baleta na vakabauta, veivutuni, papitaiso me baleta na veivakabokoci ni ivalavala ca, kei na veitabaki me soli kina na Yalo Tabu. Me da vakavulici e na veika me baleta na noda bula e veisiga, mai na rai vakayago (DBY, 8–9).

da sega ni dau lako i na were me da laki siviyara, ka biuta laivi tu mai na noda lotu; eda na sega ni lako i na valenivolavola, se kaude ni veivoli, ki na valenivolavola ni daunivika vakailavo, se na vanua cava eda na laki caka bisinisi kina, ka sega ni kauta tiko kei keda na noda lotu. Ke da vodositima voli, lako vagade e na waqa, me tiko ga kei keda na noda Kalou, kei na noda vakabauta (DBY, 8).

Eda sa dau gadreva me ra vinaka cake vakalevu na Yalododonu, me yacova ni ra sa vinaka cake o ira na noda mekeniki, e na nodra yalodina ka gugumatua, me kaya kina vei ira na Kabani ni Sitimanivanua qo, “Me dua mai na Elder ‘Momani’ me mai idinia, ni ra na sega vakadua tale ni ra ririko na noda lewenivanua na vodositima, e na nona sa kila deivaki tu na italatala oqori me na solia na nona igu taucoko, ka me qarauna vakavinaka na nodra bula o ira era sa vakanuinui tu vua.” Au via raica ni sa dau yalodina na noda Elder, me ra na dau vakasakiti ka vinakati vakalevu mai na Kabani qo, me ra laki bulia na nodra idini, me ra wajimani, idinia, vunivola, ka manidia e na nodra bisinisi. Ke da dau bulataka na noda vakabauta, ka kilikili me da vakaitokani me da Yalododonu e na Gauna Oqo, sa i keda sara ga ka dau gadrevi e na veibisinisi oqori, me da nuitaki e na itavi oqori e na yalovakacegu; ke sega ni ra vakanuinui kina vei keda, sa na vakadeitaki kina ni da sega ni dau bulataka na noda vakabauta vakalotu(DBY, 232–33).

E okati e na noda lotu na veicakacaka kei na vosa yadua vakatamata. Me kua ni dua e voliavolitaka na veiyaya e so, ke sega ni vakayacora tiko e na veitokoni ni Kalou; me kua ni dua e laki teitei se cakava tale e dua na bisinisi, ka sega ni qarava e na yaca ni Turaga. Me kua ni dua na lewe ni matabose me laki lewai ira na tamata, me lewa tauamada e na yaca ni Turaga, me rawa ni kila kina vakadodonu na veika dina kei na veika cala, na dina kei na lasu, na rarama kei na butobuto, na lewa dodonu kei na kena e baleca (DBY, 9).

Ni da dikeva vakavinaka na Veiyalayalati Makawa kei na Veiyalayalati Vou, eda rawa ni raica kina ni iwiliwili levu ni ivakatakila e soli mai vei keda e na itabagauna kei vuravura, e baleta vakatabakidua na noda itavi ka da qarava e veisiga; eda vakamuria tiko edaidai. Me idusidusi vei keda na ivakatakila ka lewena tu na iVolatabu kei na iVola i Momani, ka lewe ni Vunau kei na Veiyalayalati na ivakatakila me baleta vakatabakidua na Lotu oqo; me veituberi vei keda, ka sega ni da gadreva me da gole tani mai kina; ka sega ni noda gagadre me ka mate, ka me biu tani. Eda gadreva me da vakaikuritaka tiko ga na ivakatakila ni Turaga o Jisu Karisito e veisiga, me tiko kina kei keda na nona Yalo Tabu. Ke rawa ni da vakayacora vakakina, eda na serauni tiko kina e na noda ilakolako, ka na sega ni lako voli e na butobuto (DBY, 12).

Kevaka eda vinakata me da sotava na yalo ni bula vakasaioni, me da sasagataka tiko e na noda bula. E sega ni lotu wale ga ni vakasama na lotu qo; e lotu vakacakacaka; me vakatakava ki na lomada e na gauna qo na marau (DBY, 12).

Na kena taracake o Saioni e ka vakacakacaka; e sega ni ka ni vakasama wale ga. Ni na sega ni vakabetena na lotu e na vakasama wale ga, ni na sega ni yaga vua e dua. Ke da na laki vakaivotavota wale ga e na veika ni vakasama me da vakaiyautaki kina e Saioni se Jerusalemi —e na vakanananu wale ga—e na sega ni vakavatukanataki kina na noda vakaiyau. Sa na lavaki me vakadeitaki na noda taukena, me vakavatukana kina na ka eda vakaiyau kina, me laurai ka vakalevu. Me kua ni da vakawelei e na lotu wale ga ni vakasama, me lotu vakatovotovo, me veisavai ka tudei, me vakamareqeti kina e lomada na loloma ni Kalou, ka me da bula e na yavu ni ivakavuvuli, kei na ivakaro, kei na veivosa yadudua ka sa soli mai vei keda (DBY, 12).

Keu na qarava nikua na ka au sa vakauqeti kina, ka qai vakayacora tale ga na veika au sotava yani ni mataka, ka vaka tiko oqori, au sa na rawa ni goleva na veika vakalomalagi, e na kena sa yaco mai na matanitu vakalomalagi. Ia, au na sega ni vakarautaka na bula ekeri, keu na sega ni qarava rawa na veika au donuya tu qo. Mo ni vulica taucoko na veika qo (DBY, 11).

Sa inaki sara ga ni noda bula me da rawata kina na veivunika vakavuravura, ka vakamalumalumutaka na vuravura, ka vakatubura na veika bula e tubu mai na qele, kei na manumanu, ka sa solia mai na Kalou me ra mai bula kina (DBY, 15).

E baleti keda na bula, ka sa kena lewa me da taukena edaidai, ka sega ni waraka na ikatolu ni Yabakiudolu. Da muria na kosi me da laki vakabulai kina, ni sa laki dromu na siga, me da railesuva tale na veika eda vakayacora mai e na siga oya, ka veivutunitaka sara na noda ivalavala ca, ke tu e so na ivalavala ka dodonu me da veivutuni kina, ka qai cabora na noda masu; me da qai laki davo ka moce e na yalovakacegu me yacova yani na kida ni mataka, ka duri cake mai e na yalovakavinavinaka vua na Kalou, ka tekivutaka na itavi sa tu me baleta e dua tale na siga, ka saga mo bula e na siga taucoko oya vua na Kalou, me kua tale ni dua o vakaliuca (DBY, 16).

E dua na kena vakatovotovotaki vakabibi na kosipeli, na kena vakacolati vei keda na icolacola ni noda dui bula, kei na nodra qaravi na noda matavuvale.

Au sa tovolea tiko ga meu vakauqeti ira oqo me ra goleva e dua na sala, me ra rawati ira kina vakavinaka, ka qaravi ira era vakaloloma tu e na kedra maliwa, o ira na lokiloki, na gera kei ira na mataboko, me ra laveti kina na lecaika mai na vanua era sega ni vakayalomatuataki kina e na veika ni bula vakavuravura, se na vanua era sega ni votai kina na kila ka ka ra sa vakaivotavota kina na luve ni tamata, ka me ra vakacokotivata mai na iwasewase ni vuravura e va, me ra vakavukui kina, me ra bula manini, ka dau rawati ira tiko vakavinaka (DBY, 16).

Na noqu sasaga ga, me vaka au sa qarava e na vica na yabaki, me vakavulici ira na tamata ni kevaka era na sega ni qaravi ira vakaiira, era na sega ni qaravi rawa; ke da sega ni vakadavora yani na yavu me da vakani ka vakaisulutaki ka vakavaletaki keda kina, eda na mate e na viakana kei na liliwa; e rawa ni da na laki cilavisiga tale ga e na vulaikatakata, e na todra ni siga, ni da vakaisulu tu vakaca (DBY, 16–17).

O cei beka e dodonu me qoroi? O ira era dau qarava rawa mai na veika e baleti ira, se o ira era dau vakanuinui ni ra na taqomaki mai vua na Turaga? E sega ni dodonu me da namaka ni na solia mai na Turaga na vuanikau, ke da sega ni teivaka na vuna; ke da sega ni siviyara ka kakabu-raki, ka vagalalataki mai na oga ni tatamusuki, me da qai tagica kina na Turaga me vakabulai keda mai na veika eda gadreva tu, se me da kerea na nona veivakabulai mai na veileqa e so eda sotava mai na noda yalowai, noda vakadrecike kei na vakasabusabu (DBY, 293).

Me kua ni da qaqa se cava e na vukei keda kina na Turaga, me da taroga se cava e rawa ni da qarava vakaikeda (DBY, 293).

E na kena tu e na bucabuca oqo na qele bulabula, kei na sorenikau me da teivaka, e sega tale ni gadrevi me da kerea tale na Kalou me vakani keda, se me muri keda tiko ka kauta voli na ibuli madrai, ka vakamasuti keda voli me da kania. E na sega ni cakava vaoya o Koya, kau na sega ni vakayacora vakakina o au, keu a Turaga o au. Eda na vakani keda rawa eke; ia ke da donuya e dua na gauna me da sa na sega ni vakani keda rawa kina, sa na qai kena gauna oqori me cakacaka mana na Turaga me vakani keda (DBY, 294).

Ke o ni sega ni dui qarava rawa na nomuni bula, mo namaka beka vakaevei me tu vei iko na vuku, mo laki rawata kina na bula tawamudu? Sa solia mai vei iko na Kalou na nomu bula—na yagomu kei na yalomu, ka solia mai vei iko mo rawata na kena cakacakataki, me yavu ni kila ka, vuku, kei na yalomatua, kei na lagilagi kece ga kei na bula tawamudu. Ke o se sega ni qarava rawa mai na veika ni nomu bula oqo, kei na bula nei watimu kei na luvemu e vica, na cava mo laki vinakata kina na veika vakalomalagi? (DBY, 13).

Mo ni raica ga na nomuni itavi e na iSoqosoqo ni Veivukei e na koro oqo, kei na noda itikotiko e veidelana. Mo raica mada na ituvaki ni nomu bula. Mo raica mada ga vakaiiko, se mo cavutu ka lesuva na veika o rawata, ka qai vakayagataka na veika o rawata oqori e na kena caka na veika vinaka, ka me ra vukei na dravudravua era bula maliwai keda tu (DNW, 17 Oks. 1869, 3).

Me iUlutaga ni Vuli

E dau vakaikuritaki ga vakalalai, na noda yalomatua e na kosipeli, na vosa ki na vosa, ni da bulataka tiko na ivakavuvuli eda vulica.

Na cava na vuna e vakavulica kina vei keda na Turaga na ivakavuvuli dina ni kosipeli, “me vakalailai nikua ka vakalailai ni mataka”? (Raica tale ga na Aisea 28:9–10; 2 Nifai 28:30; V&V 98:12.) Na cava beka e dodonu me da vakayacora me da votai vakalevu kina e na ivakavuvuli dina ni kosipeli? (Raica tale ga na Alama 12:9–11.) Na cava e na yaco ke soli vakalevu vei keda na dina, ka da se bera ni yalomatua kina?
Na cava na vuna e lavaki kina me da bulataka sara na ivakavuvuli e da vulica tiko? (Raica tale ga na Joni 7:17; V&V 93:28.)
Eda yalana vakaevei na veika e rawa ni vakavulici keda kina na Kalou?

Sa umanivata ga na tikina vakayalo kei na veitikina vakayago ni kosipeli.

E kaya kina o Peresitedi Young, “e sega ni tawasei na veika vakayalo mai na veika vakayago.” Me muadonu vakaevei na noda rai me baleta na noda itavi e veisiga, mai na noda kila na ibalebale ni itukutuku oqori?

E idusidusi ni bula e veisiga na kosipeli—na lotu ka cakacakataki.

E vunautaka o Peresitedi Young vei ira na Yalododonu me ra dau vakatovotovotaka na kosipeli e na kena sala me cakacakataki kina e na nodra dui bula e veisiga. Me laki vakamawe vakaevei na kosipeli e na noda vakatulewa me baleta na noda vuvale, noda cakacaka, kei na noda itavi tale e so?
Na cava beka e vakaibalebaletaka o Peresitedi Young, e na nona kaya ni sega ni dodonu me da lako ki “na vanua cava eda na laki caka bisinisi kina, ka sega ni kauta tiko kei keda na noda lotu”? Me da kauta beka vakaevei na noda lotu e na veivanua eda lakova, ka dau veinanumi tiko ga ki na nodra vakabauta na tani? Me da vakararavi vakalevu cake beka ki na Yalo Tabu, me da kauta rawa kina na noda lotu e na veivanua eda na lakova?
Me ikuri ni kaulotu kei na veiqaravi e na Lotu, na cava beka e noda itavi ki na vanua eda vakaitikotiko kina?

E dua na kena vakatovotovotaki vakabibi na kosipeli, na kena vakacolati vei keda na icolacola ni noda dui bula, kei na nodra qaravi na noda matavuvale.

Na cava beka e a vunautaka o Peresitedi Young me baleta na noda dui itavi, me da dui qarava na veika e baleti keda yadudua? Me da rawati keda beka vakavinaka e na veika ni bula vakayalo, vakavuli, vakayago, e na veika ni vakasama, kei na veika vakailavo? Me da cau beka vakaevei me ra qarava rawa kina na wekada?
Na cava na vuna e okati kina me yavu bibi ni kosipeli na noda rawati keda vakaikeda?
A vakamacalataka o Peresitedi Young na ivakarau savasava ni bula, kei na kena nakiti me da dau qarava ga na noda dui bula. Na veivakalougatataki cava beka e na takavi keda kina? E na gauna cava ga, me vaka e vakamacalataka o Peresitedi Young, ni na “cakacaka mana [kina] na Turaga me vakani keda”?