Wase 32

iYau Vakavuravura kei na Matanitu ni Kalou

E turaga maqosa o Peresitedi Brigham Young, ka sega ni dau vakasabusabu, ni dau saga vagumatua me qarava na veika e gadrevi e vale, kei na veika me baleti ira na wekana. A dau taravale, tauyavutaki bisinisi, ka teivaka na veiwere. Ia a sega ni dau vakaliuca e lomana na veika vakavuravura, ka vakarota kina ni “sa rui vakaliuci e lomada na veika e sega na betena, ka cacawale” (DNW, 16 Julai 1856, 2). “Au kila vinaka sara ni veika vakavuravura kece ga, mai na ivakatekivu, ki na ivakataotioti, … e sega ni vakabetena ki na nodra marau na tamata yadua” (DNW, 11 Jan. 1860, 1). E vunautaka o Peresitedi Young ni dodonu me dau soli na noda iyau vakavuravura, me taracake kina na matanitu ni Kalou.

iVakavuvuli i Brigham Young

Me tiko ga e lomada na veika ni Kalou, me da kakua ni vakaliuca na veika vakavuravura.

Niu wanonovi ira yani na lewe i vuravura, ka raica na nodra malumalumu, au rawa ni kaya beka ni vakavatuka ni nodra lialia na tui, o ira na iliuliu, kei ira na vakaitutu cecere, ka vakakina o ira e dodonu me ra yalomatua cake, ka vinaka ka vakaturaga; ia niu raica na nodra dau vakayacora na veika lialia e vuqa; ka ra dau gadreva, vinakata se diva vakalevu ka veiqatitaka na veika ni bula oqo, au dau vakasamataka ga, Ni yavu lialia, ni o ni dau vakaliuca na veika vakavuravura! … O koya ga e dau vakaliuca na iyau kei vuravura oqo, kei na veika e so ka vakaiyalayala wale ga na kena yaga, mai na veika ni Kalou, kei na yalomatua ni vuravura tawamudu, se tagane se yalewa, e sega nni rai tiko na matana, me raica rawa kina, ka sega tale ga na daligana, me rogoca rawa, se na vakasama, me kila sara na veika bibi ni bula oqo (DBY, 306–7).

Au dau vakadikeva na vuravura vakatamata, ka raica ni ra veikocokoco, veisugusugu, veiqati, ka ra dui sasagataki ira yadudua na lewena, me ra dui vakacerecerei ira ga vakaiira, ka qarava wale ga na veika e baleti ira, ka dau biuta vakatikitiki na veika e so me baleta na vanua, ka dau dasilana kina na uludra na wekadra—era saga, lalawataka, ka dau vere lo tiko e na nodra yadra tiko e veisiga, ka qai tatadrataka ni ra sa laki moce, “Meu rawa beka vakaevei na wekaqu? Meu butakoci koya beka vakacava, meu toso cake kina ka dokai vakalevu?” Sa dua dina na ka lialia. … O koya ga ka dau saga me butuki ira na wekana, me rawa ni dokai kina ka vakalagilagi, e sega ni dodonu me okati vata kei ira na matatamata yalomatua (DBY, 307).

Eda na sega ni kune marau duadua ga mai na iyau, e dina ni da na logalogavinaka kina, ni dodonu me da volia ga kina na veika yaga ni noda bula. Ni da rawata na noda iyau e na butako, se na veisala tawadodonu tale e so, e na vakataotaka wale ga na noda yalomarau, me da ririkotaka tiko ga ni da na tobo ka totogitaki. Ni dua na tamata e rawata vakailawaki na nona iyau, e na vakamosiyalo ga vua ka nona, ni na dau vakasamataka ni rau na veikalikali tale e na nona sa na mate, ka na dua tale e na taukena. Na cava beka me ra vakanuinui kina e na kena sa na laki cava na nodra bula e vuravura oqo ni rarawa? Era na lecaika dina me baleta na vuravura oqo; ni ra sega ni raica rawa e dua na ka, na mate wale ga, kei eli? Era sega sara ni kila na bula vakacegu kei na marau tawavakaiyalayala (DBY, 314).

E sega ni vakamamautaka na yalo ni tamata na nona taukena taucoko na koula kei na siliva kei vuravura. Nai isolisoli wale ga ni Yalo Tabu ni Turaga, e na vakatakava vei keda na yalovinaka kei na yalovakacegu, ka vakamamautaka na noda vakasama. Me kua ni da saga na koula kei na siliva, dau rai ga i lomalagi ka qara na vuku, me rawa ni o vukica kina na veivunika sa tu oqo me yaga vei iko, e na gauna ga oqori, o sa na qai taukena kina na iyau taleitaki dina (DBY, 305).

Sa tu na iyau kei vuravura, na koula kei na siliva e loma ni qele kei na dela i vuravura, me vakatau vua na Turaga na nona solia vua e dua oqo, se o koya oya—o koya ka dau ivalavala ca se yalododonu—me raica mada na nodra laki vakayagataka, ia e nona taucoko ga. Sa vota vakalevu mai vei ira na lewenilotu oqo, eda sa rawata kina na veivale lelevu vivinaka e na vanua oqo, ka vuqa sara era sa vakaiyautaki vakalevu cake. Ia, e sega ga ni noda, me da dau tovolea tiko ga me da raica na sala e virikotora na Turaga me da taurivaka kina na noda iyau, ka qai dau saga me da vakayacora vakakina. Ke da basuka yani na iyalayala, se gole vaka ki na imawi se na imatau, eda sa butuka yani na sala ni bisinisi tawadodonu. Sa noda bisinisi ga me da kitaka na veika sa virikotora na Turaga me da qarava mai na iyau sa votai vei keda, ka vakayagataka me vaka sa nona lewa, se da vakalesuya taucoko tale vua, se dua ga na kena ikatini, se na meramera ni noda iyau ka dau vo tu (DBY, 305).

O ira vakayadua sara era dau qara na marau mai na nodra iyau, se na nodra itutu, era na butusevata na kena sala dina, ni ra na kune vakacegu na lewe i vuravura mai na nona Kosipeli duadua ga na Luve ni Kalou, ka me ra sotava tale ga na marau vakalomalagi e na gauna oqo, kei na gauna tawamudu sa bera mai (DBY, 315).

Eda na sotava na rarawa mai na noda dau vakaliuca na ilavo, me takali kina vei keda na Yalo Tabu.

O kila beka ni nomu taukena na nomu iyaya e vaka ga na vakaturubuto ni bogi, se na tegu ni matakacaca, ni se bera ni cilava mai na siga ni sigalevu tutu, o na sega ni lewa rawa, e na dua ga na gauna lekaleka sara! Me vaka ga ni Kalou ke sega ni vakavatuka mai, ka soli kina na kena lewa (DBY, 305–6).

Eda sega ni vakanuinui kina tudei ni veika vakavuravura; ni sa dau veiveisau tu ga, ka na vakavureyalorarawa ga vei ira era dau vakararavi kina (DBY, 306).

Sa duatani na veivagolei nei Setani, vua ka vakalou ki na ilavo! (DBY, 306).

Au domobulataka vakalevu cake na nodra yalokocokoco na iTalatala Qase, mai na noqu dau rerevaka na lewenilovo kei eli (DBY, 306).

O ira na yalokocokoco era dau vinakata me ra rawati vuravura, ia era dau yaloririko vakawasoma, ka dau vatavatairalagotaka e veigauna na sala me ra rawata kina na veika oqo, na veika oya, se na kena tale kadua (DBY, 306).

Sa daukocova na tamata na veika e vuravura, ka sega wale na betena. Era kocokoco vakalevu sara e lomadra. Sa dina ga ni a buli mai na veika kece sara e na vuravura oqo me veivakacegui vei keda, ka ra sa dau marau vakalevu kina e so, ia era na sega ga ni vakamarautaki kina na Yalododonu e na Gauna Oqo. E sega ni vakatakavi mai me iyau wale ga na marau, e rawa wale ga oqori mai vua na Yalo mai Lomalagi (DBY, 306).

O ira vakayadua na Yalododonu e na Gauna Oqo, ka ra vagolea na nodra vakasama ki na sasaga ni rawailavo, e na batabata e lomadra na veicakacaka tabu e na vale ni Kalou. Era na dau vakawalena na nodra masu, ka sega kina ni via solia na nodra isolisoli; sa na vakacauocataki vakalevu na nodra saumi ikatini; ka me ra vakanadakuya kina na nodra Kalou, me tabogo kina vei ira na isolisoli vakalomalagi e vuqa—e yaco ga na veika oqori mai na nodra dau garova e lomadra na veika vakavuravura, ka na dau kavoro ga e ligadra, ni na takali vakadua e na noda taurivaka (DBY, 315).

Eda na vakaiyau e na noda dau vosota na cakacaka, me da vakaivotavota tale ga e na iyau vakalomalagi.

Eda sega ni vutuniyau dina mai na noda taukena tu na iyau vakavuravura, e sega ni nakiti me da vutuniyau kina, ni sa votai vakatautauvata kina na tamata, o ira sa lotu kei ira na ivalavala ca; o koya na Yalododonu kei koya na tawadodonu. Sa dau vakacilava na matanisiga vei ira na ivalavala vinaka, kei ira na ivalavala ca; sa dau vakatauca tale ga na Turaga na uca vei ira na tamata vinaka kei ira na tamata ca [raica na Maciu 5:45]; sa dau vakavatukanataki na veika oqo e matada, kei na veika eda dau sotava e na noda bula e veisiga yadudua. A kaya kina na Tui o Solomoni mai na gauna mai liu, o koya ka sa dauqoroi e na nona vuku, ni sega ni tauca na cere o ira na daucici, ka sega ni kaukaua e na ivalu o ira na qaqa, ka ra sega tale ga ni dau vutuniyau o ira na yalomatua [raica na Dauvunau 9:11]. Eda sa dau raica na dina ni veivosa oqori e na veika eda dau sotava e veisiga. Era dau qaqa e na ivalu o ira na malumalumu, o ira ka dau sautaninini tu e na rere, kei ira tale ga na mamadua; ni ra na suguta na nodra iyau o ira na lecaika, na yalowai, kei ira na lialia (DBY, 308).

E okati me vutuniyau dina o ira era ligamaqosa me ra rawata na veika vinaka me baleti ira, mai na veivunika sa tu rawa oqo. E vakaturubuto wale ga na kaukaua kei na yalovakaturaga, e vakaturubuto wale ga na veika e solia na iyau, e na laurai ga na iyau e suidra kei na nodra sala ni dra na milioni vakamilioni era dau cakacaka e na nodra igu. Me ivurevure dina ni kaukaua na cakacaka vagolei vakadodonu ka na laki qaravi rawa kina na veika e gadrevi me baleta na noda bula. Era na vakacerecerei kina vakatui na iliuliu era vuli, me veivakalougatataki vei ira na italatala vakalotu, kei ira na iliuliu vakapolitiki, me ra qarava kina na nodra bula na milioni vakamilioni na luve i vuravura gonetagane, se goneyalewa (DBY, 309).

E na veirauti vinaka na ikatolu, se dua na ikava ni isolisoli me baleta na bula oqo, ke vagolei vakadodonu na buno ni yadremu. Era nanuma e so ni ra na vakavutuniyautaki mai na nodra cakacaka vagumatua—ka dau cakacakataka ga e tinikaono mai na ruasagavulu-kava na aua; ia e sega ni dau yaco vakakina. E vuqa sara vei ira na wekada dina era na sega ni lakova rawa na nodra soqoni. Sa rauti keda vinaka na siga ono ni dua na macawa me da cakacaka kina (DBY, 311).

Oqo na noqu ivakasala vei ira na Yalododonu e na Gauna Oqo edaidai. Tu vakadua mada, kua ni dau wariri. Au sega ni vakabauta niu rawa ni raica e dua e na noda itikotiko ka sega ni gadreva na iyau, ka na dau vinakata me tu vua na veika kece sara me vakacegu ka marau kina. O kila li na sala mo rawata kina? “Ia,” e kaya mai e dua, “keu sega ni kila, au diva tu ga meu kila; ia e sega ga niu kune kalougata tiko—keirau veimecaki sara qori.” Au na vakamacalataka na vu ni kena yaco qori—o sa rui dau vakusakusa wale ga; o sega ni dau vakasamataka vakabibi vakaivolatabu, ka rui osooso vakalevu ka sega ni lakova kina na soqoni vakalotu, o sega kina ni dau masu e veigauna mai na nomu wariri, ka sega ni dau wilika kina e veigauna na iVolanikalou. E sega ni sala dodonu oqori me da rawata kina na noda iyau. Au cavuta tiko ga me “vutuniyau,” me tubera yani na nodra vakasama, me yacova ni da sa qai rawata na iyau ni vuravura tawamudu, e na matanitu silesitieli ni Kalou. Eda dau diva me da vakaiyautaki e na veika vakavuravura, me da rawata kina na veika vinaka e so me baleta na bula oqo. Ke da gadreva dina, me da vakadeitaka sara na sala me da laki rawata kina. Meu cavuta mada e na kena ivakamacala rawarawa duadua—na kena ka rawarawa duadua sara, ka matau tale ga vei keda—”Dau vukica i cake na nomu veleti,” me rawa ni tawa kina na nomu ivotavota, ni vakatauci mai lagi na veivakalougatataki me baleti iko (DBY, 310).

Ni ra cakacakataka [na tamata yadua] na yavu ka na dolava vei ira na katuba ni bula tawamudu, sa macala vakasigalevu tu ni ra na rawata tale ga na gagadre vuni ni lomadra, e na kena gauna ga; ke sega ni ra rawata nikua, e na qai rawa beka ni mataka; ke sega ni rawa e na gauna oqo, e na qai nodra beka e na nodra gauna ni bula mai muri (DBY, 309).

Me da rawati keda vinaka, ka veinanumi vei ira na dravudravua e na veika eda rawata.

Era tamata ni Kalou na dravudravua, ka na soli me nodra na vuravura oqo (DBY, 316).

Sa dodonu me kania na kequ o koya ka viakana se vakaloloma, ka dodonu me dau marautaka na neirau veiwekani; ka tamata yalovinaka, me vaka ga na noqu dokai ira ka tu vakalevu vei ira, se o ira na ravouvou kei vuravura. Meu dau rokovi ira vakatautauvata, me vakatau mai na ivakarau ni nodra bula, ka sega ni baleta na itutu era tawana (DBY, 317).

Era sega ni dau guilecava na nodra veiyalayalati o ira na dravudravua, ia era sega ni kauai na dravudravua nei Setani e na veika era sa yalataka (DBY, 317).

Me ra dau yalodina na dravudravua, me ra yalosavu na vutuniyau, ka me ra lalawataka na sala me ra veivuke kina vei ira na dravudravua, me ra taracake na Matanitu ni Kalou, e na gauna vata ga oqori, era na vakaiyautaki ira kina, ni oqori ga na sala me taracake kina na matanitu ni Kalou (DBY, 317).

Ke soli vei ira na dravudravua na nodra iyau na vutuniyau ka sega tu ni vakayagataki, era na vakasabusabutaka ga e na veika vakasisila e so, ka ra na vakaleqai ga kina. Oqo gona na vuna e sega ni dau lavaka kina na Turaga me ra solia taucoko na vutuniyau na nodra iyavu vei ira na dravudravua. A lako dina vei Jisu e dua na cauravou, me taroga vua se cava me cakava me vakabulai kina, a qai tukuna ga vua, “mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi; ia mo lako mai, mo muri au,” era nanuma kina e vuqa ni a kaya vua na cauravou me solia na veika kecega e nona, ka ni a sega ni lavaka o Jisu me kitaka oqori, a sega tale ga ni kaya me cakava vakakina, a kaya ga me “solia vei ira sa dravudravua” [raica na Luke 18:18–23] (DBY, 317–18).

E ka vakamadua sara, vua na tamata yadua, na tagane se yalewa ka tu vinaka tu na nona bula, ka qai sega ni vukei ira na wekana, na wekana dravudravua, me ra qai raica na veika e so me yaga vei ira (DBY, 318).

Me da solia na noda iyau me taracake kina na matanitu ni Kalou.

Na cava beka e betena na iyau? Me veivakalougatataki, me da rawata kina na veika vinaka. Me da vakayagataka sara na veika sa tu oqo vei keda, me taracake kina na nona Matanitu, me vakatetei kina e vuravura na ivakavuvuli dina, me vakavatukanataki kina vei keda e vuravura, na talei ni isolisoli ni Saioni ni Kalou (DBY, 307).

Ia, ke o rawata na udolu se milioni, e na nomu ligakaukaua kei na veisala dodonu, se lailai se levu, sa nomu itavi mo dau taurivaka vakadodonu na veika e soli vei iko, mai na nomu kila, me taracake kina na Matanitu ni Kalou e vuravura (DBY, 313–14).

Ke da sa rawata e vica na drau na milioni na tikinisiliva, ka qai solia me taracake kina na Matanitu ni Kalou, ka me ra vukei kina na ibulibuli ni ligana, me vakalagilagi na Kalou, eda sa na votai vakatautauvata kina e na veivakabulai kei koya na tamata vakaloloma, ka dau kere veivuke e veivale; na vutuniyau yalododonu ka vakaivotavota vata e na ivakatakila nei Jisu Karisito, kei koya na dravudravua yalododonu (DBY, 314).

Me da vakatawa ka masumasu, ka lewa vakavinaka na veika eda cakava, se na veivosa eda cavuta, ka bula vakavoleka tiko ga vua na noda Kalou, me kua ni kinoca kina na sore ni ivakavuvuli dina sa tu vei keda na noda lomana na vuravura oqo, me da cokonaki keda tiko ga, me da solia na noda iyau kece ga, kei na noda bula, e na vuku ni Matanitu Vakalomalagi (DBY, 314).

Dou qarauna, o kemuni na noda tagane e Isireli, ni qarauna mo ni kakua ni lomani vuravura, se na veika vakavuravura e na ivakarau era tu kina oqo, mo ni vakanadakuya kina na Turaga na nomuni Kalou, e na nomuni viavialevu kei na dokadoka. Me kua ni da dau kauai ki na siliva kei na koula, se na iyau ka dau vakasaqara na vuravura ivalavala ca oqo, mai na qele kei na veivatu eda butuka tu (DBY, 314).

Keu taukena beka e milioni na ilavo kei na iyau vakavuravura e so, e na sega ni vagalalataki au mai na ka e dodonu meu qarava, ni se tu vei au na kaukaua meu qarava rawa kina, me vaka e lavaki vua ka dravudravua duadua e na nodra itikotiko, ka sega ni vagalalataki kina. Na isolisoli ga e soli vei keda, e soli vata mai kei na kena icolacola; ni soli vakalevu vei keda na vuku kei na rawa ka, sa vakacolati vata kina me da vakayagataka na vuku kei na rawa ka oqori, me vakatetei kina na ivalavala dodonu, me vakamalumalumutaki na ivalavala ca kei na rarawa, ka me vakatorocaketaki na nodra bula na tamata. Rau sa vakaicolacola vata o koya ka soli ga vua e dua na taledi, kei koya ka votai e na lima na taledi [raica na Maciu 25:14–30]. Ke sa vakasinaiti tu o vuravura e na noda kalougata, sa vakasinaiti vakakina e na kena icolacola (DBY, 315).

Me iUlutaga ni Vuli

Me tiko ga e lomada na veika ni Kalou, me da kakua ni vakaliuca na veika vakavuravura.

• Na cava beka na vuna eda na okati kina me da lialia, ni da dau vakaliuca na veika vakavuravura? Me da vakaliuca beka vakaevei na veika ni Kalou?

• Me vaka e vakamacala kina o Peresitedi Young, na cava beka na vuna e soli kina vei ira e so me ra vakaiyau vakalevu? Na cava beka na kedra itatase o ira era sega ni dau “kitaka na veika sa virikotora na Turaga me [ra] qarava mai na iyau sa votai vei [ira]”? O kila beka vakaevei ni o sa vakamuria tiko e dua na “sala ni bisinisi tawadodonu”? Na cava beka o sa sotava mai, ni o dau tovolea mo vota na nomu iyau, e na nomu saga mo bulataka tiko na kosipeli?

Eda na sotava na rarawa mai na noda dau vakaliuca na ilavo, me takali kina vei keda na Yalo Tabu.

• Na cava beka na vuna, eda na laki kune rarawa kina, mai na noda dau vakararavi ga e na iyau vakavuravura? Na ivakadinadina cava beka o sa rawa ni raica, ni dodonu me da kauai tale ga me vakataki Peresitedi Young, me baleta na nodra yalokocokoco na tamata? Me da levea vakacava na leqa e so vaqori?

• Na cava beka e na yaco vei ira era “vagolea na nodra vakasama ki na sasaga ni rawailavo”? Me veivakacalai beka vakaevei vei keda na noda matailavo, me da vakayawaka kina na valetabu, na masumasu, se na saumi katini?

Eda na vakaiyau e na noda dau vosota na cakacaka, me da vakaivotavota tale ga e na iyau vakalomalagi.

• Na cava beka na “vutuniyau dina”? (Raica tale ga na V&V 6:7.)

• Na cava beka e vakarota o Peresitedi Young vei ira ka dau vakaotia na nodra gauna, e na nodra dau qara na iyau vakavuravura?

• Na cava beka me da cakava me da rawata kina na “iyau ni vuravura tawamudu, e na matanitu silesitieli ni Kalou”?

• A vakamacalataka o Peresitedi Young: “Tu vakadua, kua ni wariri. … E sega ni sala oqo mo vutuniyau kina.” Na cava beka na ibalebale ni nona vosa? Mo vakadadamuria beka vakaevei na nona ivakasala e na nomu bula?

Me da rawati keda vinaka, ka veinanumi vei ira na dravudravua e na veika eda rawata.

• Me vakaevei beka na noda itovo ni rai, me baleta na noda veivuke vei ira na dravudravua? Na cava e a lavaka na Turaga mai vei ira na dravudravua? mai vei ira na vutuniyau? (Raica tale ga na Mosaia 4:16–28.)

• Na cava beka na vuna, e bibi kina na nomu bula vakaivakarau, mai na iyau vakavuravura?

• Na cava beka na noda itavi me baleti ira na wekada ka ra dravudravua tu?

Me da solia na noda iyau me taracake kina na matanitu ni Kalou.

• Na cava beka na nodra icolacola o ira era vutuniyau vakavuravura?

• Me ra cau vata beka vakaevei na vutuniyau kei ira na dravudravua, e na kena taracake na matanitu? Na isolisoli cava beka sa vakarautaki tu me baleti ira era cakava vakakina?

A dau vunautaka o Peresitedi Brigham Young me dau vakacabori na nodra iyau vakavuravura me taracake kina na matanitu ni Kalou.