Na Qaravi ni Kaulotu

Era le vica wale, era a cau vakalevu ki na cakacaka ni kaulotu, me vakataki Peresitedi Brigham Young. E vakaciriloloma dina na italanoa ni nona lesu tale yani i Kirtland, e Ohio—mai na nona yabaki-dua e na kaulotu—me talaucaki kina na dredre ni nona veiqaravi, kei na nona solibula ki na cakacaka oqo: “Ni keimami vakasoqoni mai i Kirtland [e na vula o Sepiteba ni 1833], kevaka e dua tale e dravudravua cake vei au—sa na sega sara ga ni tu tale vua e dua na ka. … Rau wili tiko vei au na luvequ e rua kau qaravi rau tiko—sa kena levu sara ga oqori. Au dawai tale ga. ‘Baraca Brigham, e tiko beka na nomu ivava?’ Sega; au sega ni vakaivava tiko, au dara tiko oqo na ivava kerei. E sega tu na noqu isulu ni liliwa, e dua ga na kote cula e vale, kau sa daramaka tiko e na tolu, se va na yabaki. ‘E tiko na nomu tarausese balavu?’ Sega. ‘Na cava o qai cakava? O sega ni dau daramaka?’ Sega; au a kerea mai na kena meu mai daramaka, ni bera niu qai volia e dua na noqu. Au sa veilakoyaki mai ka dau vunau, ka solia vakadua na noqu iyau. E lailai sara na noqu iyau e na noqu se qai tekivu vunau. … Au sa veilakoyaki ka vunau me yacova sara niu sa dravudravua sara e na isulu meu daramaka e na noda laki vakasoqoni; ia a kaya mai o Josefa: ‘lako cake mai’; kau sa lako cake e na kena totolo duadua” (DNSW, 9 Maj. 1867, 2).

iVakavuvuli i Brigham Young

E na vunautaki na kosipeli vei ira kece ga na tamata.

Sa kacivi au na Turaga ki na cakacaka oqo, kau sa kila tiko niu na laki qarava. Ni da na vakadewa yani na Kosipeli ki na veimatanitu; ni sa vukitani e dua na matanitu, eda na goleva tale na kena ikarua, ka laki vakasoqoni ira mai na yalododonu, ka sega ni lomaleqataki ira na kena vo, me yacova na noda sa cabeta yani me iVakabula e na Ulunivanua o Saioni, me da qarava kina na cakacaka tabu e so ni vale ni Kalou e na vukudra [raica na Opetaia 1:21] (DBY, 319).

Me vunautaki ga na Kosipeli i vuravura raraba, me kua ni ra qai vakaiulubale kina na tamata ivalavala ca (DBY, 319).

Sa dodonu gona kina me ra qai ciqoma ga, se besetaka, na ivakavuvuli tawamudu, me ra vakarautaki kina me ra vakabulai, se me ra vakarautaki ki na nodra vakarusai (DBY, 319).

Eratou sa veisureti tiko vei keda na Tamada mai Lomalagi, kei Jisu na Tuakada ka iVakabula kei vuravura, kei na lewe i lomalagi kece ga, me ra veivueti ki na veimatanitu e vuravura, kei ira na milioni vakamilioni era sa moce tu, ka ra se sega ni ciqoma na ivakavuvuli ni kosipeli (DBY, 319).

Sa vakalesuya tale mai na Turaga na Matabete e na noda gauna, me baleta na veivakabulai vei Isireli. Sa lewa beka me vakabulai ira tale e so? Io; e na vakabula na Yavusa i Iso, kau nuitaka tu niu na donuya e na bula oqo na kena tauyavu na Ulunivanua o Saioni, me ra cabe kina o ira na ivakabula me ra veivakabulai vei ira na dravudravua, kei ira na vakaloloma ka ra dau vakararawataki keda—o ira ka sega ni ivalavala ca ki na Yalo Tabu. Me da saga ga me da vakabulai keda mada, me da vakabula na Yavusa i Isireli, na Yavusa i Iso, kei ira na Veimatanitu Tani—o ira kece ka rawa ni da vakabulai ira (DBY, 319).

Au na marautaka sara niu sa kila ni … o ira vakayadua na lewe ni veiyanuyanu, kei na veivanua lelevu, o ira na turaga kei ira na tamata wale, na lecaika kei ira na yalomatua, era sa vulica na ivakavuvuli ni bula tawamudu, ka sa soli vei ira na lewa e na Matabete tawamudu ni Luve ni Kalou (DBY, 320).

E na yaco mai na gauna ni ra na vakavulici na tui kei ira na ranadi, kei ira na vakaitutu lelevu e vuravura; ia e na duatani na sala ni kena vakavulici vei ira na vutuniyau, mai na sala e vakavulici kina vei ira na dravudravua, ia e duavata ga na Kosipeli. Eda na sega ni vakavulica e dua tale na Kosipeli; e duadua tiko ga e na gauna tawamudu mai liu, ki na gauna tawamudu mai muri (DBY, 320).

Era sa vunau tale ga na iTalatala Qase e na veimatanitu e Iurope, ka sa dolavi vei ira na kena katuba. E sogo vei ira e so na matanitu, ni sega ni vakadonui tu vakalawa; ia e na vakavuna na Turaga na veisau e so e na veimatanitu oqori, me yacova ni sa tadola tale na katuba, me vunautaki kina na kosipeli vei ira kece ga na tamata (DBY, 320).

Eda na vakasoqoni ira vata na tamata dravudravua, na tamata wale, kei ira e vica era sa vuli vinaka tu; ia me ra vakasoqoni mada ga o ira na dravudravua ka ra gadreva me ra vueti mai na ca; ka sa vakamawe tu vei ira na nodra veivakatotogani na vakaitutu lelevu ka dokai; era sa gadreva tu na veivakabulai, ka sa dolavi kina na daligadra me ra rogoca na ivakavuvuli dina. Ke o vakasamataka na veika e so e baleti ira era sotava vakalevu tu oqo na bula sautu, sa tabonaki tu na daligadra; era na sega ni rogoca e dua na ivakavuvuli dina (DBY, 321).

Ni o kacivi mo laki vunautaka na Kosipeli ki na veivanua tani, sa dolavi kina na kaulotu, mo tovolea na sala mo vakabulai ira kina na tamata yadudua. Sa dodonu ga me ra vakabulai kece sara o ira era sa vauci vata e na ivau ni loloma veivakabulai. E sega sara ni dua na tamata me vakuai kina, e na nona sasaga taucoko sara na iTalatala Qase e na bula oqo, me vakabulai koya ki na Matanitu ni Kalou, o ira beka ga ka sa ivalavala ca vua na Yalo Tabu (DBY, 321).

Me ra vakamatatataka e na nodra vakasama kei na lomadra na daukaulotu na ilesilesi era na qarava, ka dau saga vagumatua me ra veisureti mai vei Karisito.

E sega tale ni dua na tagane se yalewa e na Lotu oqo, e se sega tiko ni qarava na nona ilesilesi. Me ra qarava tiko ga na ilesilesi oqori e na nodra gauna taucoko ni bula, me dau caka vinaka tiko, me vakatetea sara na veika dodonu, me dau vunautaka na ivakavuvuli dina, ka me ra dau dusimaki tiko ga, e na nodra bula se na nodra bula o ira era tu tikivi ira, me ra dau bulataka tale ga na ivakavuvuli oqori, me ra rawata kina na bula tawamudu (DBY, 322).

Niu curu mai na Lotu qo, au a tekivu kaulotu sara, kau kauta kina na noqu lewe ni vunau, ka tekivu veilakoyaki e veivalenilotu. E noqu lewe ni vunau na ivakavuvuli dina, ka noqu iulutaga na Kosipeli ni veivakabulai, me noqu valenilotu o vuravura raraba (DBY, 322).

E sega ni vinakati me dua e kaulotu, me vakavo ga ke sa yalona dina (DBY, 322).

O ira na tacida ka ra sa lesi ki na veitabana ni kaulotu mai vanua tani, e dodonu me ra goleva e na yalomarau (DBY, 322).

Dou lako yani ki na veivanua kece ga, ka laki vunautaka kina na Kosipeli, mo vuli vakalevu mai na veika o sa dau qarava, ni o vakavukui kina, ka yalomalumalumu e na iserau ni Kalou, mo qai rawata kina na Yalo Tabu, me veidusimaki ka liutaki iko, ka vakavulici iko e na veika mai liu, na veika ni bula e na gauna oqo, kei na veika e so sa bera mai na kena gauna (DBY, 322).

Dau vakanuinui ga vua na Kalou, ka me da vakanuinui tiko ga vua, me dolava kina vei iko na sala, ka sovaraka vakayauyau mai vei iko na veivakalougatataki, me marautaka na yalomuni na ivakavuvuli dina. Au na sega ni yalataka na veika vinaka ke o ni muria na sala tawadodonu; me idusidusi ga na nomuni bula e na veika vinaka (DBY, 322).

Meu vakamatatataka mada e na nodra vakasama na tacida vakalotu, ni o koya e cavuikalawa yani e na yaca ni Turaga, ka dau vakanuinui tiko ga vua e lomana taucoko, e na sega sara ni lailai vua na vuku, me sauma rawa kina na taro e tarogi vua, se me soli ivakasala ka kilikili me baleti ira na tamata, e na veisala ni bula, kei na nodra vakabulai, ka na sega sara ni vagalui rawa, me tawamudu. Mo lako e na yaca ni Turaga, mo ravi vua na Turaga, ka dau masu vagumatua vua na Turaga, mo kua ni vakacauoca kina, mo kakua ni kauai i vuravura. E na dolavi vei iko o vuravura—ka na dau dolavi tu ga e matamu—ia, ke o dau bula me sala vata voli kei iko na Yalo Tabu, o na kila vakalevu cake kina e levu na ka, e na dua na siga ka drau sala vata kina ki na tinikarua na siga drau na veikalikali kina, mo ni kila sara kina na duidui ni vuku vakatamata, kei na vuku ni Kalou, mo veidutaitaka rawa kina e vuqa na ka, mo dau kila vinaka sara na veika e bibi dina (DBY, 323).

Ke sega ni ra lako yani na iTalatala Qase e na liga savasava kei na yalosavasava, e vinaka cake me ra kua mada ga ni lako. Mo ni kakua ga ni nanuma ni o ni na qai laki vakasavasavataki kemuni e na nomuni yaco i na Uciwai na Missouri, e na Mississippi, e na Ohio, se na matavura ni Wasawasa Atalanitika; mo ni lako yani eke e na liga savasava kei na yalo savasava, mo ni savasava mai na doka ni ulumuni ki na qeteqete ni yavamuni; me qai vaqori tiko na ivakarau ni nomuni bula e na veiaua [raica na Same 24:4]. Mo ni lako yani e na yavu oqori, ka cakacaka tale ga e na yavu oqori, ka qai lesu mai e na savasava, me vaka na tikiniveva vulavula savasava. Oqo na ivakarau ni nomuni lako; ke o ni sega ni vakayacora vakakina, e na laki momosi ga na yalomuni (DBY, 323).

Era na vakavolekataki sara na iTalatala Qase vua na Turaga mai na nodra veilakoyaki, kei na sasaga me ra kaulotu. E dodonu me ra dau bulataka na nodra vakabauta vakalotu, me ra qai cavutu kina e na yalosavasava kei na liga savasava, me ra qai laki vunautaka na kosipeli e na kaukaua ni Kalou ka sa vakalesui mai lomalagi. Me kua ni ra tara, se tovolea na ivalavala ca, ia ni ra lesu tale mai, me ra kauta lesu tale mai na nodra yalosavasava, me vakarautaki ira e na nodra mai veisotari tale kei ira na Yalododonu e na yalo dina ni veilomani (DBY, 325).

Ke o lako e na ilesilesi mo laki vunautaka na Kosipeli e na wele kei na veiwali e lomamuni, mo ni raica na veika oqo se na veika oya, mo qai raica kina na veika e so e na vuravura oqo, ka sega ni davo donu tiko na nomuni vakasama—io, meu kaya ni davo donu—e na kauveilatai i Karisito, o ni na lako ga ka lesu wale mai. Mo ni lako yani ka tagi tiko ga, ka kauta voli yani na kosipeli savasava oqo, ka vuabale tu e na kaukaua ni Kalou, ka vakasinaiti tu e na vakabauta na veivakabulai vei ira na tauvimate, ke o ni tara wale ga e ligamuni, me vakasevi sara ka cemuri na yalovelavela e so, me ra mamarau tale kina na vakaloloma, o na suka vata tale mai kei na nomu ivauvau, o ira o ni sa rawata ki na matanitu [raica na Same 126:5–6]. Me vakaliuci tiko ga e na nomuni vakasama na veivakalotutaki, mo ni cakacaka vagumatua sara, me ra lesu kina vei Karisito na tamata kece ga (DBY, 325).

Mo vakaacabori ira [na wekamu dina] vua na Turaga na Kalou kei Isireli, qai biuti ira tu ga e vale; ni o sa yaco i Igiladi, ki na veimatanitu, se na vanua cava tale o lesi kina, ni o masulaki iratou na nomu vuvale, dau masulaki ira sara … kua ni kauti ira vakavoleka mai, me vaka o na tawana e na nomu kato. Dau masulaki ira e na veivanua ga era dui tu kina. Mo nanuma tiko ga— kevaka era na bula tale, sa vinaka sara; ia ke ra qai mate, sa vinaka tale ga; keu na mate, sa ikoya; ia, keu na bula, sa rauta vinaka; ni da sa nona kece ga na Turaga, eda na veisotari tale e na dua na gauna lekaleka mai muri (DBY, 324).

Ni ra marautaka dina na yalo ni kaulotu, me ra vakayacora rawa kina na nodra ilesilesi, na itavi e matana na Turaga, kei ira na tamata, sa na qai vakavatukanataki vei ira na gauna talei duadua ni nodra bula (DBY, 328).

E veisautaki keda ga na Yalo Tabu, e sega ni rawa mai na ivakamacala se na ituvatuva vakavosa, me ra ciqoma kina na kosipeli i Jisu Karisito.

Au se qai lakova ga vakalekaleka na noqu ilakolako ni vunau vei ira na tamata, sa qai vakadeitaki vei au na yavu dina oqo, se da na vakadinadinataka beka na ivunau mai na iVolatabu, me yacova sara na siga ni lewa, me ra kila kece na tamata, e na sega ga ni veisautaki ira. Se mo wilika beka na iVolatabu mai na iVakatekivu ki na iVakatakila, ka vakadinadinataka vakaivolatabu na veitiki ni vunau o vakaraitaka vei ira, e na sega ga ni veisautaki ira rawa na tamata. Ni na cilava ga na nodra vakasama na ivakadinadina mai na kaukaua ni Yalo Tabu, me ra kila rawa kina na dina—me veisautaka mai na yalodra me ra veivutuni. E sega tale ni dua na kena sala takoso. Sa dau iwewe ni gusuqu niu vinakata cake meu iTalatala Qase ga, e na vanua qo, se na veivanua e so, ka qai cavuta ga e lima na vosa ka veitokoni kina na Yalo Tabu, ni na vakabetena cake, mai na noqu talimagimagi e na vunau, ka sega ni veitokoni kina na Yalo Tabu. E dina oqori, ka da sa kila vinaka tu (DBY, 330).

Me cavutu o koya e dua ka na vakadinadinataka vakavinaka na veivosa e cavuta, mai na veivoqa ni vosa e vuqa sa cavuti tu e na ivakatakila, me qai tomani koya ka na cakacaka yaco na Yalo Tabu e na nona vosa. Oqo na nona vosa na Turaga, “qai tukuna vei ira na veika me ra vakabauta—na veika e dodonu me ra kitaka—na ivakarau dodonu ni bula, ka veivakabulai,—e dina beka ni na sega ni cau rawa mai vakaveivosaki, se na kena vakavatukanataki vua na nona malumalumu, me vakararavi kina ki na kaukaua ni Turaga, me vaka sa dau vakadinadinataki vei ira vakaoqo, o na qai raica rawa kina ni o koya e vakatusa na nona ivakadinadina e na kaukaua ni Yalo Tabu, e na veisautaki ira, ka vakacurumi ira mai ki na lotu e le vuqa cake na lewenilotu yalodina ka yalododonu, mai vua ka dau vakamacala wale vakaivunau (DBY, 330).

E sega e na veiba se na veileti na kaukaua me veivakabulai, me vaka na kena vakatusai na dina ka vakatakila mai na Turaga vua na iTalatala Qase e na veituberi ni Yalo Tabu. Au kila ni o ni na duavata kei au e na tikina oqo; me vaka au sa raica rawa mai. Au sega ni via vakalatilati vei ira na iTalatala Qase, ni ra tugana e lomadra na veika e so me tokoni ira e na nodra taqomaka na nodra vakabauta, au sega tale ga ni via vakataotaka na nodra vulica na ivakavuvuli e so me baleta na Lotu, kei na itutu vakaveiliutaki. Na levu ni nodra kila ka na iTalatala Qase, na kena vinaka vei ira (DBY, 330).

E vakabetena cake na yalo dina, e na nodra cilavi e na rarama kei na kila ka, mai na veivosa ukutaki vakamaqosa (DBY, 333).

E dodonu me tokoni mai vua na Yalo Tabu na dauvunau me veivotai kina ki na loma ni tamata yadudua e na vosa ka veirauti kaya, ka na gadreva ga na Yalo Tabu o koya ka vuavuaivinaka e na vosa ni vunau ni Kalou, me lagilagi kina na Kalou [raica na V&V 50:17–22] (DBY, 333).

Ni sega sara ni dua sa dauvunau e na kosipeli, e talai mai lomalagi, ka sega ni vakayacora e na kaukaua ni Yalo Tabu. Ke sega na kaukaua oqo, e na sega ni veivakararamataki na vunau (DBY, 333).

Ke dua na iTalatala Qase e vunau e na kosipeli, ka sega ni kila e lomana ni tu vua na kaukaua me vunau kina e na sala me da rawata kina na bula kei na veivakabulai, me qarava na veicakacaka vakalotu me vaka sa vakadonui tu, ka me qarava e na kaukaua ni Kalou, e na sega ni dokai vakalevu mai na nona ilesilesi, ka na sega tale ga ni yaga vei ira na tamata, kei na kena tosoi tiko ga ka vakarokorokotaki cake na cakacaka ni matanitu ni Kalou. Mai na ivakamacala au sa wilika e na ivakatakila ni Kalou vei keda na tamata, kei na ivakatakila ni Yalo Tabu vei au, e na sega ni dua e vunautaka vakavinaka na Kosipeli, me taukeni, vakalougatataki, ka dokai mai lomalagi, ke sega ni vunau e na kaukaua ni Kalou, me vakatakila kina na nona ivakavuvuli vei ira na tamata (DBY, 336).

Mo gumatua tiko ga e na nomu veiqaravi, me tiko ga vei kemudou na yalo ni vunau kei na kosipeli.

Au kerea mada na veika oqo: me ra vakasamataka tiko na iTalatala Qase, ka ra sa suka mai e na kaulotu, me ra kila ni ra se kaulotu tiko ga eke, me vaka ga na nodra a tiko mai Igiladi, se na duatale na yasa i vuravura (DBY, 328).

Eda sa dau kacivi ira na tacida vakalotu me ra lako ka laki vunautaka na Kosipeli, me ra lako ka laki qarava vagumatua sara e na kena yalo, e na masumasu, e na veitabaki, e na nodra vunau ka veivakavulici vei ira na tamata me ra vakabulai kina mai muri. Ni oti e vica na yabaki, ni ra lesu tale i vale, era na luvata ga na nodra isala kei na nodra kote ni vunau, ka kaya, “Biu vakatikitiki mada eke na lotu, au sa na saga mada e na gauna oqo na veika e baleta na neitou bula vakavuvale.” Oqo e dua na vakasama lialia sara. Ni dua e suka mai na kaulotu, ka laki vunautaka kina na Kosipeli, e dodonu me tu vakarau tale ga me cabeta mai na itutu ni vunau oqo me mai vunau, me vaka ga e a tiko mai Igiladi, Varanise, Jamani, se na veiyanuyanu e na wasabula. Ni sa mai tiko tale e vale me macawa dua, vula dua, yabaki dua, se yabaki tini, e dodonu me bula tiko ga e lomana na yalo ni vunau kei na yalo ni Kosipeli, me taladrodro yani vei ira na tamata na veika vinaka e cakava, na ivakavuvuli, na ivunau, kei na nona idusidusi. Ke sega ni yaco vaqori, e sega ni vakayacora tiko na nona ilesilesi (DBY, 328–29).

Mo yalodei e na nomu lesu tale i vale. Mo qarauna me savasava tiko ga na nomu bula, me tekivu sara mai na doka ni ulumu ki na qeteqete ni yavamu, mo dau yalosavasava,—ke sega, o ni na lesu tale e na yalolailai, kei na yalorarawa, o nanuma ni o na sega ni via rai cake tale e na yalodei (DBY, 328).

O ira vakayadua na iTalatala Qase yalodina ka ra sa vakatusa mai na dina ni cakacaka oqo vei ira na udolu vakacaca na tamata e na veivanua lelevu, kei na veiyanuyanu e na wasabula, era na raica na vua ni nodra buno, se ra cavuta ga e lima na vosa, se vica na udolu. Era na sega beka ni raica na vuana e na gauna oqo, ka vakavuqa era na sega ni raica rawa, me yacova yani na ikatolu ni Yabakiudolu; ia na talei ni noda ivakadinadina, e na vakadewai sobu tiko ga mai vua na tama, ki na luvena tagane (DBY, 329).

Me iUlutaga ni Vuli

E na vunautaki na kosipeli vei ira kece ga na tamata.

A vakamacalataka o Peresitedi Young, ni sa vunautaki na kosipeli vei ira na tui kei na ranadi, e na “e na duatani na sala ni kena vakavulici vei ira na vutuniyau, mai na sala e vakavulici kina vei ira na dravudravua.” Na cava beka na kena ibalebale e duidui kina na nodra vakauqeti na tamata mai na duidui ni imoimoi ni veivakavulici? Me da moica beka vakaevei na ivakarau ni noda veivakavulici, e na nodra tuberi na veitamata e so, ka sega ni vakatanitaki kina na ivakavuvuli dina ni kosipeli?
A vakamacalataka o Peresitedi Young ni “na vakavuna na Turaga na veisau e so e na veimatanitu,” ka sega ni vakatarai vakalawa kina na kena vunautaki na kosipeli. Sa mai yaco beka vakaevei na parofisai oqori?
Me vaka e vakamacala kina o Peresitedi Young, o cei beka e “dodonu ga me ra vakabulai”? (Raica tale ga na V&V 18:10–16.)

Me ra vakamatatataka e na nodra vakasama kei na lomadra na daukaulotu na ilesilesi era na qarava, ka dau saga vagumatua me ra veisureti mai vei Karisito.

Me vaka e vakamacala kina o Peresitedi Young, sa tu na ilesilesi ni tagane kei na yalewa yadudua e na Lotu oqo. Na cava beka na noda ilesilesi? Na cava beka me caka, me talekatoa kina na sasaga ni kaulotu? Na cava beka o sa qai raica mai na nomu sasaga ni kaulotu, ka na yaga vakalevu e na nomu veisureti me ra lako vei Karisito na tamata kece ga (Raica tale ga na Moronai 10:32.)
A vunautaka o Peresitedi Young ni dodonu me dau yalodra na kaulotu na cakacaka ni kaulotu. Mai na veika sa vakamacalataki tu e na iwase ni ivola oqo, na cava beka e lavaki kina?
Na cava beka e yalataka o Peresitedi Young vei ira era na laki vunautaka e na yalodina na kosipeli, ka dau vakararavi vua na Kalou? Na cava na vuna me da dau gadreva kina na veitomani ni Yalo Tabu e na noda veiwasei e na kosipeli?
Na cava na vuna e vakabibitaki kina me ra dau savasava vinaka tu na daukaulotu, ni se bera ni ra qai tekivutaka na nodra veiqaravi vakatabakidua vakaulotu? Na cava beka e vakasalataka o Peresitedi Young, me baleta na nodra bulakilikili tiko na kaulotu e na nodra veiqaravi, kei na nodra suka tale i vale?
Na cava na vuna e lavaki kina me dau “donu tiko” vua na iVakabula, o Jisu Karisito, na nodra vakasama na daukaulotu? Na cava beka na ivakasala nei Peresitedi Young me baleta na nodra bulakilikili na kaulotu e na nodra dau kaulotu, kei na nona vakasama me baleta na nodra dau vakanananu i vale na daukaulotu?

E veisautaki keda ga na Yalo Tabu, e sega ni rawa mai na ivakamacala se na ituvatuva vakavosa, me ra ciqoma kina na kosipeli i Jisu Karisito.

Na cava na vuna era dau katoa vakalevu cake kina na daukaulotu ka ra vakatusa na ivakavuvuli ni kosipeli e na kaukaua ni Yalo Tabu, mai vei ira ka ra dau veivakavulici ga e na ivakavuvuli vakaivunau, ka vakamacala e na veika era kila vakaiira? Na cava na vuna e sega ni dau vinaka kina na veiba e na veiwasei vakosipeli?
Na cava na vuna e sega ni ra vakararamataki kina o ira era dau vunau, ka sega ni sala vata kei ira na Yalo Tabu?
Na cava beka e yalataka o Peresitedi Young vei ira era dauvunau “na kaukaua ni Kalou, me vakatakila kina na nona ivakavuvuli,” ka dau vakanuinui Vua?

Mo gumatua tiko ga e na nomu veiqaravi, me tiko ga vei kemudou na yalo ni vunau kei na kosipeli.

Na cava beka na vuna e “vakasama lialia sara [kina]” na nodra dau biuta vakatikitiki na nodra lotu o ira na daukaulotu, ni ra sa lesu tale i vale?
Ni da sa vakacegui mai na noda ilesilesi, me da dau vakabulabulataka beka vakacava na “yalo ni vunau kei na yalo ni Kosipeli, me taladrodro yani vei ira na tamata e na veika vinaka e cakava, na ivakavuvuli, na ivunau, kei na nona idusidusi”?
Na cava beka e yalataka o Peresitedi Young vei ira na daukaulotu yalodina, ka ra vakadinadinataka mai na cakacaka ni Turaga?

Na itaba kei Elder Thomas C. Griggs, ka a kaulotu i Peritania e na yabaki 1880.

church missionaries — O ira na kaulotu mai Echo Canyon, e Utah, e na yabaki 1867. Era vunautaka taumada na kosipeli na kaulotu e Igiladi, Iurope, kei na veiyatuyanuyanu ni Pasifika.