iVakamacala Taumada

Sa dau veituberi o Brigham Young na parofita e na kosipeli i Jisu Karisito ka sa vakasukai mai, e na yavu rawarawa, ka kilai rawarawa kina, me ivurevure ni veivakauqeti kei na vakanuinui vei ira na Yalododonu ka ra laki tawavanua e na veibucabuca ka ra na lakova. E dina ni sa mai sivi tale oqo e dua vakacaca na senitiuri, se tudei ka bula tu ga na nona vosa vei keda edaidai, e na noda qarava tiko na kena taracake na matanitu ni Kalou.

A tukuna o Peresitedi Young ni da sa vakaivotavota na lewe ni Lotu i Jisu Karisito me baleti ira na Yalododonu e na Gauna Oqo, e na “yavu ni bula kei na veivakabulai me baleti ira vakayadua era sa lomadina kina” (DBY, 7). Sa yalataka ni o ira era na ciqoma na kosipeli e na lomadra dina, e na vakabulabulataki “e lomadra na gagadre me ra kila ka yalomatua e na veika ni Kalou, me vinaka cake sara mai na kena era sa sotava mai e na nodra bula” ka me ra na tekivu “vakasaqaqara, wilivola, ka vakadidike, ia ni ra torova yani na Tamadra e na yaca i Jisu, e na qai solia vei ira na kena ivakadinadina” (DBY, 450).

E vakadeitaki e na ivola oqo na nodratou gagadre na lewe ni Mataveiliutaki Taumada, kei na Kuoramu ni i Apositolo Le Tinikarua, me vakatitobutaka na nodra yalomatua vakalotu na lewe ni Lotu, ka me ra vakayadrati kina ki na kena gadrevi vakalevu cake me ra dau kila na veika ni Kalou. E na veivakauqeti ka veivakabulabulataki ki na lewenilotu yadudua, kei na veikuoramu ni matabete, kei na veikalasi ni iSoqosoqo ni Veivukei, me ra taroga, wilika, vakadidike, ka qai masuta na Tamada mai Lomalagi, me solia vei ira na ivakadinadina ni ivakavuvuli e so oqo.

E wasei rua na wase ni ivola yadudua—”iVakavuvuli i Brigham Young” kei na “Me iUlutaga ni Vuli.” E lewe ni imatai ni wasewase na veimalanivosa e so mai na vunau nei Brigham Young vei ira na Yalododonu e na gauna oya. Sa dusimaki e na itukutuku yadudua sara na kena ivakamacala mai na ivola tale e so, ia e na dredre sara ni laurai na ivola e so e cavuti oqori vei ira na lewenilotu. E sega ni lavaki sara me laurai mai na ivola e so oqori, me vulici se vakavulici kina vakavinaka na ivola oqo. E sega ni gadrevi tale ga me ra volia tale na lewenilotu na ivola tale e so ka cavuti tu, kei na kena ivola vakamacala tale e so, me vulici se vakavulici kina na veiwase ni ivola oqo. Sa rauta vinaka sara me vakavulici mai na lewe ni ivola oqo, ka sala vata kei na ivolanikalou. Me ra wilika e na masumasu ka vakadidike na lewenilotu mai na ivakavuvuli nei Peresitedi Young, me ra vakararamataki kina e na ivakavuvuli ni kosipeli, me ra raica rawa kina na kena vakaibalebale na veivakavuvuli oqori e na nodra bula e veisiga. Ni ra vulica e lomadra dina kei na masumasu na itukutuku sa digitaki eke, era na qai vakavukui na Yalododonu e na Gauna Oqo e na yavu ni kosipeli, ka ra na marautaka vakalevu cake na titobu kei na vakalou ni nona ivakavuvuli na parofita dokai oqo.

E tarogi e na ikarua ni iwase ni ivola e so na taro, ka na gadrevi me dau vakasamataki vakatitobu, me moici kina na nodra bula, me veivosakitaki na ivakavuvuli i Peresitedi Young. Me ra dau lesuva tale ka wilika vakawasoma na lewenilotu na nona ivakamacala me baleta na ivakavuvuli ka veivosakitaki tiko. Ni ra na vakauqeti na lewenilotu me ra tudei tiko, mai na nodra vakadidike kina vakatitobu kei na masumasu, ka me ra vakatulewataka kina me ra dau vakamuria na ivakavuvuli nei Jisu Karisito, na iVakabula.

Ke ra vakamuria na lewenilotu yadudua kei na veivuvale na ivakavuvuli e so ka sa vakamacalataki tu e na ivola oqo, era na kunea kina na nodra kalougata, ka vakauqeti me ra yalodina ka yalomatua cake vakayalo, me vakataki ira na Yalododonu e na gauna e liu, era a rogoca na veivosa oqo mai vua na “Laione ni Turaga” (HC, 7:434)—o koya na parofita, daurairai, ka dauvakatakila, o Peresitedi Brigham Young.

iDusidusi kina Qasenivuli

E na lavaki me vakadikevi mada e liu na veilesoni eke ni bera ni qai vakavulici, ka me yavutaki e na masumasu. Me vakataukeitaki iko ki na ivakavuvuli e so, ka lewa na veisala e so me vakamacalataki ka vakavulici kina na ivakavuvuli e na kalasi. Me veivuke ki na lewe ni kalasi na veilesoni e na ivola, me ra raica kina na kena vakaibalebale ki na nodra bula e veisiga. Me vakauqeti ka veivosakitaki na veisala e so e vakavatukanataki kina na ivakavuvuli e so oqo na lomada me baleti Tamada mai Lomalagi, se o Jisu Karisito, se na veika me baleti keda, na noda veivuvale, kei ira na wekada. Sureti ira na lewe ni kalasi me ra dau bulataka na yavu ivakavuvuli ka ra sa tuberi kina oqo.

Me ra vakaitavitaki vakalevu sara na lewe ni kalasi e na gauna ni veivakavulici, ni o sureti ira me ra wilika e cake na veivosa e so, me ra soli vakasama e na dua na taro, se me ra wasea mai na veika era sa sotava mai. E rawa ni o solia vei ira na ilesilesi e so e na nomu vakarautaka tiko na lesoni, ka mo veinanumi e na vuku ni nodra dau mamadua e so e na veiitavi e so era vakacolati kina. Dau vakayawaka se vakatikitikitaka na veika e so ni veileti. Mo vakanuinui ga ki na ivolanikalou, me tokoni ka vakamatatataki kina na veika e so e dau tarogi. Mo gadreva e na yalomalumalumu na Yalo Tabu ni Turaga, ni ra na kune kalougata kina na tacida kei na ganeda o veituberi kina. Me vaka sa yalataki mai vua na Turaga, “Raica ko koya sa vunau kei koya sa vakabauta, erau sa veikilai yalo; io erau sa veivakavulici ka marau vata” (V&V 50:22).