Na Veirogorogoci ni Kalou kei na Tamata

A vunautaka o Peresitedi Brigham ni noda “itavi taumada, ka bibi duadua sara, me da dau qarava na Turaga me yacova ni da sa na dolava tale na noda veitaratara vakayadua kei na Kalou.” Ni oti e dua na gauna lekaleka mai na nona mate o Josefa Simici na Parofita, a qai vakamacalataka o Brigham Young na nona raici Josefa e na tadra, ni mai veisiko vua, ka tukuna: “A qai kalawa mai vei keitou o Josefa, ka wanonovi keitou mai vakamatua, ka qai tukuna mai e na yalomarau: ‘Vakamacalataka ga vei ira me ra dau yalomalumalumu ka gugumatua tiko, ka qarauna me ra na vakamareqeta tiko na veitokani ni Yalo Tabu ni Turaga, ni na dusimaki ira tiko ki na veika dina. Mo kakua sara ni vakawalena na domo malumu ka rogolailai; ni na qai vakavulica vei ira na veika kece sara me ra cakava, kei na veivanua me ra lakova; me ra vuataka kina na vua ni Matanitu. … Tukuna vei ira na mataveitacini ni ra lako tiko vakadodonu, ke ra dau vakaliuca na Yalo Tabu ni Turaga’ “(JH). Sa isolisoli ki na luvena vakayadua sara na Kalou, me ra dau vakararamataki mai na Yalo i Karisito, ka dui rawata kina na ivakatakila mai na cakacaka yaco ni Yalo Tabu, ni ra qara tiko vagumatua na Turaga.

iVakavuvuli i Brigham Young

Sa soli na Yalo i Karisito ki na luvena yadudua na Kalou, me veivakararamataki vei ira, ka me ra kila rawa kina na veika vinaka kei na veika ca.

Eveivakararamataki na Yalo Tabu ni Turaga, vei ira kece ga ka sucu mai i vuravura. Ni sega ni dua e na mai bula e vuravura, ka na sega ni vakararamataki mai na Yalo Tabu ni Turaga o Jisu. Sa vakamacalataki kina, ni sa i koya na rarama kei vuravura. E na veivakararamataki vei ira yadudua era sucu mai i vuravura, ka sa na vakaivotavota kina na tamata yadudua sara e na ivakatakila ni Yalo Tabu vu ni ka dina [raica na Joni 1:9; 8:12; Moronai 7:16; V&V 84:46] (DBY, 32).

Au na sega sara ni vakabauta ni se sega sara ni dua na turaga se marama ka sucu mai i vuravura, me tekivu mai na gauna i Atama ki na gauna oqo, ka sega ni vakararamataki, tuberi, ka vakavulici mai na ivakatakila i Jisu Karisito. “Na cava! o ira tale ga na tawavakabauta?” Io, o ira vakayadua sara ka ra sa bula ka yalomatua mai. Au sega sara ni vakabauta ni bureitaki vei keda na luve ni tamata, me da vakaivotavota e na Yalo Tabu ni Turaga, me vakavulici keda kina e na veika dodonu kei na veika lasu (DBY, 32).

Au vakabauta … dina ni sega ni dua na ka e tukuni vei keda, se da vulica, ka sega ni vakayacori mai na ivakatakila ni Turaga o Jisu Karisito, se na vuli vakalotu, na sainisi, se na cakacaka ni liga (DBY, 38).

Era sa tu na wekada e vuqa ka ra vakataledi, era vuku, ka ra dau vakadidike, ka kila ka e na veika vakamisini; era kena dau na veika oqori, e dina ga ni ra sega ni kila na ivurevure ni noda vuku. Se bera ni mudu na veileti kei ira na Yalo Tabu ni Turaga, e na kena dolavi vei ira na kila ka kei na vuku; me dau vakatakila vei ira, vakavulici ira, tuberi ira, ka qai dusimaki ira e na veika dina (DBY, 33).

Sa bula tiko oqo na Kalou: me cakacaka yaco kina e vuravura kei lomalagi. Era sa tu na nona italai, e na kedra maliwa na ibulibuli ni ligana. Ni sa dau wanonovi ira vakayadua na nona ibulibuli; ka sa kila vinaka tu na veika era vakayacora, na gagano, kei na vakanananu ni lomadra; ni sa robota tu na veitikina kece ga na nona vuku kei na nona lewa [raica na V&V 88:6–13]. E sega ni vakayacora vakaikoya e dua na ka, ni sa vakayacora na nona Yalo Tabu; ka sa mai veivakavulici, veituberi, ka veidusimaki ki na veimatanitu e vuravura (DBY, 32).

Dau vosa na Kalou e na ivakatakila vei ira yadudua na Luvena.

Era vakabauta o ira oqo na ivakatakila. Era a vakabauta mai, ka se vakabauta, ka vakayacora tiko ga na veika e tukuna mai lomalagi na Turaga. Era sa vakabauta mai, ka vakabauta tiko ga, ni sa talai ira mai na agilosi na Kalou, me ra mai vunautaka na ivakavuvuli tawamudu ni Kosipeli, me vaka e tukuna o Joni e na nona itukutuku [raica na iVakatakila 14:6–7] (DBY, 38).

Eda sa dau rogoca vakawasoma na kena cavuti, ni dodonu me ra tiko e na Lotu o ira na parofita bula, se matanivanua vakalou, me tauyavu rawa kina na Matanitu ni Kalou, me talekatoa tiko kina e vuravura. Meu na tukuna tale na vakasama oqo e na dua na kena icavucavuti. Meu kaya kina ni dodonu me da oka yadudua sara me da parofita bula, se matanivanua vakalou, se me da vakaivotavota yadudua e na Yalo Tabu dauvakatakila, me da qai kila rawa kina na yavu ni veivakabulai, ka me da muria tiko ga na sala, me da laki tasevu tale kina i na iserau ni Kalou (DBY, 38).

E sega ni tu e na veitikina kece ga na Turaga; ia era sa veiqaravi ka vosa tiko e na vukuna o ira na nona mata. Era sa digitaki na nona agilosi, na nona i apositolo, kei ira na nona italai, ka vakadonui me ra veiqaravi e na vukuna. Era sa vakadonui tale ga na nona italai me ra veivakaroti ka vakat ulewa e na veika bibi sara, kei na veika wale e so, me ra veivakavulici, veidusimaki, ka veituberi kina vei ira na nona Yalododonu (DBY, 41).

Ni na sega ni dua e na vakavatukana na nona veiqaravi e na Matanitu oqo, ka me tudei tiko kina, me qacoya tiko ga na nona ilesilesi, ke sega ni veitokoni kina vua na kaukaua ni Kalou. Me ra vakadodonutaka ga na nodra ilakolako, me ra vakaivotavota kina e na Yalo Tabu, me ra tudei tiko kina e na nodra veiqaravi, e na nodra vakabauta, kei na nodra Kalou, me kua kina ni ra na vukitani kina mai na nodra vakabauta (DBY, 33).

E a taroga e dua na turaga seu dau veituberi vakaevei e na cakacaka yaco ni Yalo Tabu vei ira na wekada. Au dau tasereka ga vei ira na sala me ra na vakavukui kina mai na Yalo Tabu dauvakatakila, e na nodra itavi, e na veisiga yadudua, me rawa kina ni ra lewai ira tiko kina vakaiira. E dodonu me ra bula savasava tiko me vaka ga na drauniveva savasava ka se qai vakarau me vakayagataka e dua [na dauvolavola], ni se bera ni se toqai kina e dua na ka (DBY, 41).

Ni sega ni dua na ile vakavuravura, se vakasama vakavuravura, me tadola kina na nodra vakasama na tamata, me ra raica kina na veika vakalomalagi; e rawa wale ga na veika oqori mai na cakacaka ni Yalo Tabu dauvakatakila [raica na 1 Korinica 2:9–14] (DBY, 37).

Na ivakatakila vakayadua ni Turaga o Jisu Karisito, se na Yalo Tabu vu ni ka dina, e na kila vinaka sara na veika kece ga, me ra kila kina o ira era vakaivotavota kina na veika dina mai na lasu, na rarama mai na butobuto, na veika ni Kalou mai na veika e so e sega ni vakalou. Na iyaragi duadua ga ka da na kila vinaka kina na nona Kosipeli na Luve ni Kalou, kei na sala me da na vakabulai rawa kina. Mo vakamuria, ka ni na laki tasevu sara vua na Kalou, na Matanisiga vu ni rarama, me laki tadola kina na kena matamata, me vakararamataki kina na noda vakasama me rawa kina ni da raica, me da kila ka yalomatuataka na veika sa yaco tu oqo (DBY, 34).

E na sega sara ni dua e na kilai Jisu na Karisito, ke sega ni vakatakilai vua mai lomalagi [raica na 1 Korinica 12:3] (DBY, 37).

Ke sega ni vakatakilai mai lomalagi, e na ka dredre sara me da kila na yavu ni veivakabulai (DBY, 38).

Ke sega ni vakatakila mai na Kalou, eda na sega ni kilai keda, na vanua eda vu mai kina, se o cei e bulia na vuravura eda bula kina, eda yavala kina, ka rawata mai kina na noda bula (DBY, 37).

Ni veivakauqeti vua e dua na Yalo Tabu dauvakatakila mai vua na Kalou, sa na qai tadola na nona vakasama me raica rawa kina na kena totoka, na kena maqosa, kei na lagilagi ni kena buli mai na vuravura, kei ira na lewena vakayadua, na inaki ni kena buli, kei na nona vakatutu o koya na Dauniveibuli, e na nona vakatikori ira kina me ra lewena o ira na luvena. Sa na qai matata cake kina vua ni inaki wale ga ni noda mai bula tu oqo e vuravura, me da rawata kina na bula vakalou, me da laki vakatikori rawa kina e na iserau ni Tamada, na noda Kalou (DBY, 37).

E na veitikina kei na iwasewase yadudua ni ivakatakila ka soli vei ira na luve ni tamata, se vua e dua ga e lomalagi se na dela i vuravura, me rawa ni kila kina vakavinaka, sa na gadrevi vakalevu sara kina na cakacaka yaco ni Yalo Tabu, ka solia mai vei keda—na Yalo Tabu ga ka vakatakila na veika oqori ki na noda vakasama, me matata sara kina vei keda (DBY, 39).

Me da bula tiko ga, e na ivakarau ni bula, me rawa ni vosa kina vei keda na Yalo Tabu dauvakatakila, ka vola sara ki lomada, ka tukuna vei keda na veika dodonu na Yalo Tabu dauvakatakila, me da vakanadakuya kina na nodra ivakavuvuli makawa na noda qase, kei ira na noda qasenivuli. E na veika oqori, e ganita kina me da vakataki ira na gone; ka sa tukuna kina vei keda o Jisu, kevaka eda na sega ni vakataki ira, eda na sega ni curu rawa i na matanitu vakalomalagi. E ka rawarawa sara! Mo kua ni dau yalokocokoco, cacaveiwekani, cudrucudru, dauveiqati, yaloca, se veivakacacani, e na noda veivuvale, kei na noda itikotiko, vei ira na wekada, kei ira vakayadua na lewe i vuravura, e na veivanua ga era tiko kina. Me da bula galala e veisiga, ni da vakadodonutaka na ivakarau ni noda bula, me da savasava ka dodonu vinaka tu na noda ilakolako (DBY, 36).

Ke o ciqoma e dua na raivotu, se ivakatakila mai vua na Kalou Kaukaua, ka solia mai na Turaga me baleti kemuni yadudua, se o ira na wekada, ia e vakaroti mo kakua ni vakatakila, ka ni sega ni nomu itavi mo vakayacora vakakina, ka sega beka ni kena inaki me se vakavotui e na gauna qo, e dodonu mo galuvaka sara, ka sogota tiko vakadua, me lokataki sara vakadua, me vaka na kena dau tasogo na lomalagi, me maroroi ka vunitaki me vaka na ibulubulu. E sega ni dau veivakabauti na Turaga vei ira era vakalasikata na veika vuni e so, ni na sega ni vakatakilai koya vakavinaka vei ira vakaoqori (DBY, 40–41).

Eda kila beka vakacava ni ra vola mai na parofita na nona vosa na Turaga? E na ivakatakila. Eda kila beka vakacava ni a lesi mai vua na Kalou o Josefa Simici, me tauyavutaka na nona matanitu e vuravura? E na ivakatakila. Eda kila beka vakaevei ni ra veivakavulici e na veika dina o ira na noda iliuliu? E na ivakatakila (DBY, 38).

Mo kila beka vakaevei na dina ni cakacaka sa qaravi tiko Edaidai? O na kila rawa ga mai na yalo dauvakatakila, ka soli sara ga mai lomalagi. Na cava beka e vakadinadinataka vei iko na cakacaka oqo … ? A sega li ni yaco, mai na yalo dauvakatakila, ka cakacaka yaco vei iko? … Mo dau vakaikuritaka tiko e veisiga yadudua; mo qai tomana tale ni solia mai vei iko na Turaga— me vakaikuritaka vakalailai eke, ka vakalailaitaka tale e muri, ka mo taqomaka tiko na ivakavuvuli dina e na nomu vakabauta ka yalomatua vakayalo, me yacova sara ni sa daumaka sara na nomu bula e na mata ni Turaga, ka sa dolava tu na nomu vakasama, me vakaikuritaki tale vei iko na ivakavuvuli ni Matanitu ni Kalou (DBY, 36).

Ni o sa sasaga tu mai vakadede, o sa na qai raica rawa na ivakavuvuli dina oqo—ke sa davodonu tu na gagadre ni lomamu, ka talairawarawa tiko ga, qarava tiko na Kalou, ka masumasu tiko, e na waitovure i lomamu na Yalo Tabu dauvakatakila, me vaka na mataniwaitovure ki na bula tawamudu [raica na V&V 19:38; 63:23]. Me kua sara ni dua vei keda e guce e na masu, ni sega ni yalona me masu, me kua ni dua tale na ka e vakasugusugu, se vakawariritaki kina na nomu itavi bibi oqo. Ni o tekiduru vua na Turaga, ka kerea kina na nona veivakalougatataki, o na sotava kina na veika oqo—e na vakalevutaka na Kalou na nomu kalougata, mo vakaiyautaki ka yalomatua kina vakayalo (DBY, 46).

Sa itavi bibi duadua ni tamata yadudua me da kila na lewa ni Turaga mai na noda masu e veisiga.

Keu na veidutaitaka beka na itavi taucoko sara ka na vakacolati vei ira na luve ni tamata, mai na kena e liu, ki na kena e muri sara, au biuta me kena ilutua na noda dau vakasaqara na Turaga na noda Kalou, me yacova sara ni sa dolavi vei keda na sala ni veitaratara mai lomalagi i vuravura—mai vua na Kalou, ki na noda dui bula yadudua. Me da vakasavasavataka sara na sala ki na dui lomada, me dodonu tu e matana (DBY, 41).

Ke da toro voleka yani vua, e na qai toro volekati keda mai o koya; ke da vakasaqarai koya rawa, eda na raici koya; ke da dau vakasama vakadodonu ka yalodina, e na veisiga kece, me da kila kina, ka vakavukui e na lomana na Kalou, e ka rawarawa cake sara, io, au na kaya eke ni rawarawa cake mai na noda dau kila na veika era vakasamataka tu na wekada (DBY, 42).

Me dau dau yalomalua kina, me da qacoya, me da dauvakarorogo, ka talairawarawa kina ki na loma ni Turaga, ka sega ni dua na tikina e rivarivabitaki kina, ni na dauveituberi voli ga vei keda na nona Yalo Tabu. Ke da dolava na gusuda me da kerekere vua na Tamada Vakalomalagi, e na yaca i Jisu, sa na qai yaloda kina na masu (DBY, 44).

Sa kaya na Turaga, era na qarai au na noqu tamata, e na vuku ni veivakalougatataki era gadreva. Me kua kina ni da okata vakaitavi na masu, me ikuri ni icolacola sa lavaki vei keda na Yalododonu e na Gauna Oqo, e dodonu me da bula e na dua na kena ivakarau, ka na okati me isolisoli talei duadua ka sa votai vei keda; ke sega ni dau vakavatukanataki na yaga ni masumasu, na cava beka eda na sotava vakatamata, se sotava yadudua? (DBY, 43).

Sa itavi ni Yalododonu e na Gauna oqo me ra dau masumasu tiko ga ka tawamudu, ka vakavinavinakataka na veika kece ga, ka tusanaka kina na cakacaka ni liga ni Turaga, ka vakarorogo ki na veika e lavaka vei keda (DBY, 42).

Me ra dui masu yadudua na turaga kei na marama vua na Turaga, ka vakayacora oqori e na yalosavasava, ni ra qarava tiko, me vakakina na nodra dui qarava e na nodra veitikina vuni; ni ra tu e matadra na lewe vuqa, kei na nodra veitikina vuni, ka ra kerea kina na Tamada e na yaca i Jisu, me vakalougatataki ira, me ra taqomaki ka tuberi, ka vakavulici, e na sala ni bula kei na veivakabulai, me ra yavutaka kina na nodra bula, me ra laki rawata kina e muri na bula tawamudu, ka da gadreva vata tiko (DBY, 43).

E sega gona kina ni bibi na nodaru vinakata, se sega, me daru daumasu, ni sa gauna ni masu, mo masu. Ke sega ni se lomada, me da masu tiko ga me yacova sara ni sa qai yaloda mai na masu (DBY, 44).

Era lakovi au mai e so na wekada, ka ra mai kaya vei au, “Baraca Brigham, meu dau masu beka, ke sega ni yaloqu tiko na masu?” Sa dina ga, ni na so na gauna, era na kauai ka vakaleqai tu e na veika tani e so, me vaka na kena ca tu na nodra isiviyara, kei na iyaya tale e so ni cakacaka, se lakosese tu na nodra manumanu, ka ra lomaleqataka vakalevu na veika tale e so; ia sa tukuni tu ga mai na noda vakatulewa ni noda itavi me da daumasu, ke lomada tiko na masu, se sega. Sa noqu ivakavuvuli ga, ni sa nomu itavi mo dau masu; ni sa kena gauna me cabori na masu, me kaya ga o Jone, “Me cabori eke na masu, ka sa kena gauna sara ga oqo; me loveci kina na duru ki na vuloa, ka me vakayacori sara e na kena gauna totolo.” Ia e kaya tale o Jone, “Au sega ni dau via masu; au sega ni vinakata.” Me lutu sobu na duru, au vakadreti kemuni tiko; ka me loveci sobu sara na duru, ka me vakasama sara, ka vakanananu lesu. Na cava beka me kainaki? E rawa beka ni tukuni, ni lomani au na Kalou, au sa ivalavala ca? Io, e rawa ni cakava vakakina, ke rawa ni duri ka rukaki koya na wekana e na vuku ni cala e cakava. Ia, Jone, mo dalaga ka cavuta, Turaga, ni lomani au mai. “E sega tiko ni yaloqu na masu.” O na sega ni vakaiulubale kina, ni o sa kila vinaka tu na nomu itavi (DBY, 45).

Ke tukuna vei iko na Tevoro ni sega ni dodonu mo masu ni o cudru tiko, tukuna vua ni sega kina na nona lewa, ka masumasu tiko ga me yacova sara ni sa tabogo na itovo ni vakasama lialia vaqori, ka vakalesui tale mai vei keda na yalovakacegu (DBY, 45).

Ni o duri e veimataka, ni bera mada ni o gole mo laki saumama, kacivi iratou vata mai na watimu kei ira na luvemudrau, dou tekiduru vua na Turaga, kerea me vosota na nomudou ivalavala ca, me karoni kemudou tiko e na siga oya, ka taqomaki kemudou mai na veitemaki kei na veika ca kece ga, me tuberi kemudou mo dou cavuikalawa vakadodonu, mo qai vakayacora kina e na siga oya, e dua na ka yaga ki na Matanitu ni Kalou e vuravura. O dou galala beka mo dou vakayacora na tikina oqo? Kemuni na italatala qase, kemuni tale ga na marama, o dou rawa beka ni masu? (DBY, 44).

Dau masu e na veigauna ni se bera ni o tekivuna na nomu cakacaka. Mo kakua sara ni guilecava. Me kakua sara ni calata e dua na tama—na iliuliu ni vuvale—me kacivi iratou vata mai na nona matavuvale, ka vakacabori koya, kei iratou na nona matavuvale, vua na Turaga ni Lewe Vuqa, ka kerea kina na veituberi kei na veidusimaki ni nona Yalo Tabu, me liutaki iratou tiko e na siga oya—e na siga sara ga oya. Me liutaki keda nikua, tuberi keda nikua, karoni keda nikua, ka vakabulai keda, me kua ni keimami valavala ca kina vei kemuni, se dua mai lomalagi se vuravura e na siga oqo! Ke da cakava tiko e veisiga, eda sa na vakarautaki e na iotioti ni noda siga e na bula oqo, me da laki vakaivotavota kina e na bula lagilagi cake (DBY, 44).

O ni sa kila tu ni dua na ka e duatani kina na noda vakabauta, kei na noda lotu, ni da sega ni dau kerea vua na Turaga e dua na ka, ka sega ni da na vukei koya kina e na veika kece eda rawata; me qai qarava na Turaga na kena vo (DBY, 43).

Au na sega ni kerea vua na Turaga na veika e so e na sega ni vinaka meu qarava ga vakaiau (DBY, 43).

Keu kerea vua me vakavukui au mai e na veika e lavaki e na bula oqo, se na veika me baleta na noqu ilakolako, se me baleti ira na wekaqu, na noqu matavuvale, na luvequ, se o ira au veiliutaki tiko vei ira, ka sega ni rawata mai vua na kena isau, ka qai vakayacora ga e na noqu maqosa duadua na veika dodonu, me vaka au sa nanuma, sa okati o Koya me ciqoma ka doka na itavi au sa qarava oqo, ka na vakayacora kina me vaka sa kilikili kaya (DBY, 43).

Me kerekere vua na Kalou na Yalododonu yadudua sara e na nodra masu, me baleta na veika e gadreva tu, me toroya cake kina na bula dodonu e vuravura oqo. Ke o sega ni kila na ka mo masulaka, meu kaya vei iko na kena sala. Ke o masu vuni kei iratou na nomu vuvale, ka sega ni kila na ka mo dau kerea, vakacabori iko vua na Tamada mai Lomalagi, ka kerei koya me vukei iko e na veivakauqeti ni Yalo Tabu, ka me tuberi ira kina oqo, ka vakatulewa ki na cakacaka ni Nona Matanitu e vuravura, ka sa rauta vinaka sara oqori. Kerei Koya me biuti iko e na vanua ga e nanuma ni kilikili me biuti iko kina, ka qai vakaraitaka na ka mo vakayacora, mo kila kina ni o sa tu voleka kina, ka mo qai vakayacora (DBY, 45–46).

Me ra qacoya na masu na tamata kece ga, me yacova sara ni ra sa dui kila vakaiira na veika vakalou, ka vakadeitaka vakaiira ni ra sa muria voli na sala, ka na laki tini e na bula tawamudu; me kautani sara kina na kocokoco, ka vakavuna na lecaika, me kua kina ni dua e nanuma ni vinaka cake mai vua e dua tale; ni sega ni ivakarau oqori ni bula vakalomalagi. E sega ni vinakata o Jisu Karisito me duidui mai vei Tamana. Rau duabau ga mai liu, kei na gauna oqo. Ke ra tuberi mai na ivakatakila nei Jisu Karisito e dua na itabatamata, ka ra sa kila vinaka tu mai na nodra dau yalodina, me kua ni ra yalotaqaya kina, ni ra na duabau ga kei Jisu Karisito, ka duabau e na nodra rai (DBY, 42).

Me iUlutaga ni Vuli

Sa soli na Yalo i Karisito ki na luvena yadudua na Kalou, me veivakararamataki vei ira, ka me ra kila rawa kina na veika vinaka kei na veika ca.

Vakasamataka mada na veika e dau cakava na Rarama i Karisito, se na Yalo Tabu ni Turaga. (Raica tale ga na Bible Dictionary, “Light of Christ,” 725; V&V 88:6–13; Moronai 7:12–19.) Na cava na ibalebale ni “veivakararamataki na Yalo Tabu ni Turaga o Jisu”?
Me da kila beka vakaevei na ivakarau ni bula tawamudu ni “veika dodonu kei na veika lasu”?
Me vaka na vosa nei Peresitedi Young, e dau “veileti [beka vakaevei] kei ira na Yalo Tabu ni Turaga”?
Na kaukaua cava beka sa “cakacaka yaco kina e vuravura kei lomalagi” na Turaga, me tuberi ira kina na Luvena e vuravura? E na vakasama cava, e rawa kina ni tukuni ni yawa na Kalou mai vei keda yadudua? (Raica tale ga na Cakacaka 17:27.) Na ivakadinadina cava o sa raica ni dau yaco na lewa ni Kalou e na veika kece sara e sotavi e vuravura?

Dau vosa na Kalou e na ivakatakila vei ira yadudua na Luvena.

O cei beka sa vakadonuya na Kalou, me ciqoma na ivakatakila, e na vuku ni Lotu raraba? (Raica tale ga na V&V 21:4–5; 28:2; 43:3–4; 90:3–5.) O cei e okati me “matanivanua vakalou”? Na cava beka na nomu itavi me baleti ira na matanivua vakalou?
E vakamacalataka o Peresitedi Young, ni rawa ni kilai wale ga na ivakavuvuli e so me baleta na bula tawamudu. Na ivakatakila me baleti cei beka e na solia mai vei keda yadudua na Turaga? (Raica tale ga na 2 Nifai 32:5; Tiko Voli mai na Lekutu 11:29.)
Me vaka sa vakamacala kina o Peresitedi Young, me da kila beka vakaevei, ni da sa liutaki tiko me vaka sa lewa mai na Kalou? E na gauna cava beka e na soli kina vei keda na veituberi, mai na ivakatakila, “e veisiga yadudua” sara ni noda bula?
Na yalayala cava beka sa tukuni tu me baleti ira era sa dau veiqaravi ka “sasaga tu mai vakadede” e na masumasu, talairawarawa, kei na veiqaravi? Na veika veivakauqeti cava beka o sa sotava mai e na masumasu, me dau sobuti iko kina na Yalo Tabu ni Turaga, e na veigauna ni nomu bula?

Sa itavi bibi duadua ni tamata yadudua me da kila na lewa ni Turaga mai na noda masu e veisiga.

Me vaka e vakamacala kina o Peresitedi Young, na cava beka na noda itavi “[taumada ka bibi duadua sara]” na nona lewe ni Lotu?
E na veigauna cava soti beka e na dau volekati keda, ka “dauveituberi voli kina vei keda na nona Yalo Tabu”? (Raica tale ga na 3 Nifai 19:9, 24.)
Na ivakasala cava beka sa cavuta mai o Peresitedi Young me baleta na masu?
Na veivunauci momona cava beka e solia o Peresitedi Young, me baleti ira ka sega ni dau yalodra na masu?