Sa Tasereki na Kosipeli

E kilai tu e vuravura o Peresitedi Brigham Young ni dua o koya na dautawavanua, ka vakatulewa e na kena tara na veikoro mai na vanua lala ka dravuisiga tu, me vuki me itikotiko totoka. Ia, e vakasakiti ga ni kena nona irogorogo ni dua o koya na ivakavuvuli momona ni kosipeli i Jisu Karisito e na kena sa vakalesui mai, ka veivakauqeti vei ira na Yalododonu e na gauna e liu me ra bulataka tiko ga na ivakavuvuli ka sa virikotori vakamatata tu me yavu ni nodra vakabauta, ka vakadeitaki kina ki na tamata yadua ni rawa ni ra lesu tale i na iserau ni Kalou.

iVakavuvuli i Brigham Young

E oka e na kosipeli i Jisu Karisito na yavu ni ivakaro e so, kei na cakacaka vakalotu, me da vakabulai kina.

E okati na noda lotu me ivakarau ni lewa dina kei lomalagi, ka sega ni dua tale na ka—na yavu ni lewa ka vakarorogo kina na veikalou kei ira na mataisoqosoqo agilosi. Era vauci tu beka e na lawa? Io. Ni sega ni dua na ka bula e na gauna tawamudu, na kena ga e vauci tu e na lawa (DBY, 1).

Na Kosipeli ni Luve ni Kalou ka sa vakatakilai mai, e dua na yavu se ivakarau ni lawa kei na cakacaka vakalotu, ka na vakadeitaki kina na noda lesu tale ki na iserau ni Tamada kei na Luvena, mai na noda vakamuria vakadodonu. Na lawa ni Kosipeli, na ivakavuvuli ga kei lomalagi ka vakatakilai, me da lesu tale kina i lomalagi, ka da a lako mai kina (DBY, 1).

Ni da vakamacalataka na lawa vakasilesitieli ka sa vakatakilai mai lomalagi, se na Matabete, eda vosa tiko me baleta na yavu ni veivakabulai, na ivakarau uasivi ni bula vakamatanitu, ka oka kina na kena lawa kei na cakacaka vakalotu, me da vakarautaki kina me da curuma yani e dua na matamata ki na dua tale, mai na dua na kena ivakatawa ki na dua tale, me da yacova sara yani na iserau ni Tamada, ka noda Kalou (DBY, 130).

Eda na rawata kina na veika dina, me da kila sara mai na vu ni yaloda, ni kaukaua ni Kalou na Kosipeli, me da vakabulai rawa kina, sa i koya ga oqori na sala ki na bula tawamudu (DBY, 90).

E yavutaki na noda lotu e na ivakarau ni lawa kei na lewa, me vaka ga na veika kece sara sa tauyavutaka mai vei keda na Kalou. Sa virikotora tu na lawa kei na cakacaka vakalotu e so, me ra lewai ka vakalougatataki kina na luve ni tamata, me laurai kina se ra na talairawarawa kina, ka vakadinadinataka ni sa dodonu me ra rawata na bula tawamudu, e na yavu ni lewa ni vuravura vakasilesitieli (DBY, 1).

E sega ni virikotora mai na Turaga na lawa e so me lavaki kina meu daramaka ga e dua na mataqali ivava, Ni se sega ni solia mai e dua na lawa me virikotori kina me dodonu se momoto na ucu ni noqu ivava; se meu tokara ga na kote ka vakacerei na tolona ki na ruku ni kirikiriqu, ka me tara sara na kubukubu ni yavaqu na belena; se meu tokara ga na kote ka vaka na kena au tokara tiko qo. Ia, a soli mai na vuku, e na kena rai vakararaba, ki na Yalododonu kei ira na ivalavala ca, me ra dui vakayagataka vakaiira, ke ra sa kila tu na lawa ni Matabete, se sega, se ra sa bau rogoca beka vakadua, se sega (DBY, 63).

O sa kila tu ni dua na duidui ni noda vakabauta kei na noda lotu, ni da na sega ni kerea e dua na ka vua na Turaga, ka da na sega ni solia na noda igu me da vukei koya; me qai vakayacora na Turaga na veika e vo e lavaki kina. Au na sega ni kerea me vakayacora e dua na ka, au na sega ni via cakava (DBY, 43).

E oka e na kosipeli i Jisu Karisito na yavu ni veika dina kece ga.

E vakaibalebale na veika dina kece ga ki na nodra vakabulai na luve ni tamata—me yaga vei ira, ka me ra vuli kina—me vakaikuritaka na nodra yavu e na ivakavuvuli ni kila ka vakalou, ni ka dina kece ga e okati me kila ka vakalou—na itukutuku dina; ka virikotori na yavu dina mai na bula vakalou (DBY, 11).

Tovolea mo dau ciqoma na veika dina, veitalia ga se o cei e solia mai, e sega sara ni dua na kena duidui, se o cei e solia mai. Veitalia sara se o cei o ciqoma mai vua na Kosipeli, se o Josefa Simici se o Pita, o koya ka bula vata mai kei Jisu. E sega ni dua na ka se o cei o ciqoma mai vua. Ke sa lesia na Kalou e dua, ka tala me laki vunautaka na Kosipeli, sa rauta vinaka sara ga oqori; veitalia sara se o cei, niu sa vinakata meu kila na veika dina (DBY, 11).

Na “Vakabauta Vakamomani,” me vaka sa dau cavuti kina, e okati kina na ivakavuvuli kece sara me baleta na noda bula, kei na noda vakabulai e muri, e na gauna oqo ka tawamudu. Se o cei sara e tu vua. Ke tu na ivakavuvuli dina vua na tawavakabauta, e nona oqori na “Vakabauta Vakamomani.” Na ivakavuvuli dina kei na veika dodonu ka ra dau vunautaka na veimatalotu e so, me vaka sa dau rogo vakawasoma mai vei ira, e taukena vakadua na Lotu oqo. E na bula savasava, e vuqa sara vei ira era bula savasava tale ga me vakataki keda. Na veika kece ga e vinaka, e totoka, se rogorogo vinaka, e nona na Lotu, se na Matanitu oqo. Ni lewe ni “Vakabauta Vakamomani” na ivakavuvuli dina kece ga. E sega tale ni dua na ivakavuvuli dina, ka sega ni oka e na Kosipeli. Sa i koya ga qori na bula, na bula tawamudu; na marau uasivi; na taucoko ni veika kece ga ka ra bula kina na kalou, ka tu tale ga e na nodra gauna tawamudu na veikalou (DBY, 3).

Se me vakalekalekataki ga, keu sega ni bula e na “Vakabauta Vakamomani,” au na sega ni okata me bula na kena au oka kina. Au sega ni kila e dua tale na ka, sa ilutua ni veika vakavuli ka rawa ni vakasamataka na tamata. Ke sega ni okata na veika ni lomalagi kei vuravura, e na sega ni wili e na veika e tukuni kina (DBY, 2).

Meu kaya mada vei ira na noqu itokani ni da vakabauta na veika vinaka. Ke o rawa ni raica e dua na ivakavuvuli dina e lomalagi e cake, se vuravura, se mai eli, e tiki ni noda vakabauta. Eda vakabauta dina; ni noda; eda okata me noda (DBY, 2).

E oka ki na ivakavuvuli [ni kosipeli] na bula savasava, na yalosavasava, na veivakararamataki, na vuku kece ga, na veika cecere taucoko, kei na veika dodonu taucoko. Me tekivutaki kina na yavu ni lawa kei na cakacaka vakalotu (DBY, 3).

Me oka kina yavu oqori na ivakarau kece ga ni ivunau dina e vuravura, se ivunau vakalotu, se ivakavuvuli ni veimaliwai savasava, se vuku vakavuli, se na bula vakaitikotiko; ka oka kina na lawa kece sa virikotori mai na gauna i Atama ki na gauna qo; me vauca na lawa ni veimatanitu, ni siviti ira sara e na kila kei na kena savasava, ka oka kina na yavu ni ivakavuvuli ni noda gauna, ka semata vata na veika dina e na tai ruarua ni sala, ka mai vauca vata e na dua vata ga na yavu, ka laiva na qana me cagina vaka, ka vaka (DBY, 3–4).

Sa noda itavi ka noda ilesilesi, ni da sa italatala ni Kosipeli vata ga ni veivakabulai, me da vakasoqona mai na yavu dina vakayadua, ka biuta tani sara na lasu kece ga. Ke kunei beka na ivakavuvuli dina vei ira na tawavakabauta, vei ira ka ra vakabauta ni da na vakabulai taucoko, vei ira na Lotu Katolika, na Lotu Wesele, na Lotujaji, na Presbyterian, na Baptist, na Quaker, na Lotu Seka, (Shakers), se vei ira na duiduilotu se dui yavu ni vakabauta vakalotu, se na mataisoqosoqo, ka ra vakaivotavota tu e na veitikina e so ni ivakavuvuli dina, ka sa ilesilesi ni iTalatala Qase ni Lotu oqo (ni sa i Jisu na Tuakadra, ka uludra vakailiuliu) me ra vakumuna mai na ivakavuvuli dina kece ga e vuravura ka okati ki na noda bula ka me da laki vakabulai kina, me baleta na Kosipeli ka da vunautaka, … ka vakadidike vakavuli, ki na veivakasama vakavuli, kei na veivanua kece ga e rawa ni kunei kina e na veimatanitu, veimataqali, duivosavosa, kei ira na tamata, ka me kau lesu yani i Saioni (DBY, 248).

Na veika kece ga me vulici kei na vuku, kei na veika vinaka kece ga e rawa ni dau gadreva na tamata, e vauci tiko e na loma ni iwirini ni vakabauta ka da sa okati kina (DBY, 446).

Sa oka kina na veika dina ka dodonu e na veilomalagi e cake, kei na lomalagi e cake sara—na veika dina kece ka sobuti vuravura tu, e na titobu ni lomai vuravura, kei na lomalagi e cake; me vakalekalekataki ga, e cokotivata taucoko kina na veika dina kece e na veigauna tawamudu ni veikalou (DBY, 448).

E ivakarau na noda vakabauta, me lalawataki, ka cokotivata kina na vuku kece ga e vuravura—na veika kece ga sa vakatakila mai na Kalou vua na tamata. Sa vakatakila oti mai na Kalou na veika kece sara sa kila tu oqo o vuravura, se vuku vakavuli, se vakalotu. Me cava vua o vuravura e na veika kece sara era sa kila ka sotava tiko; ni sa soli wale me ra vakaivotavota e na veika kece oqori, kau sa dau vakavinavinakataka vua na isolisoli kece ga (DBY, 2).

Sa vakavotui ki na lotu na ka kece ga ni vakadidike ka sa kila tu na tamata, na agilosi, kei ira na veikalou. Ni sa tu ga na yavu dina ka kunei mai na vakadidike e na bula oqo; ni na tasevu ki na mate na veika kece sara. Ni soli na yavu dina oqori mai vua na Mataniwaitovure ni bula (DBY, 2).

Ni na tudei tu ga na dina, ni sa laki yali yani na lasu. Ni na tudei tu ga na bula, ni ra sa na tilomi e na mate o ira vakayadua era cata na vosa ni bula tawamudu. Niu dau vinakata ka taleitaka na dina, ni ka dina, ka totoka ka uasivi sara, ka rui vakalagilagi vakalevu, ka dodonu sara me dau qoroi, me ra vakabauta ka goleva na veika bula kece ga e lomalagi e cake, kei vuravura oqo e ra (DBY, 9).

Aui dau marautaka na veika qo, ni sa virikotori na dina me tokoni koya ga vakaikoya; ka yavutaki e na veika dina tawamudu, ka na sega ni cava rawa, ni ra vakarusai e na kena gauna na veika tale e so (DBY, 11).

O ira vakayadua ka ra bulataka na lawa ka sa virikotora mai na Turaga me baleti ira na nona tamata, ka sa vakaivotavota mai e na isolisoli ka sa vakarautaka tu me baleti ira era yalodina, sa dodonu tale ga me kila na veika ni Kalou, mai na veika e so ka sega ni vakalou, na rarama mai na butobuto, na veika e vu mai lagi, kei na veika tani e so. Oqo gona na vuna e taleitaki ka marautaki kina mai vei ira na Yalododonu e na Gauna Oqo na nodra dau bulataka na nodra vakabauta; me ra kila o ira ka sa rawata na veika ni bula vaqori (DBY, 35).

Sa ka rawarawa dina me da bula e na ivakavuvuli dina. O ni bau vakasamataka beka na wekaqu? O ni bau vakasamatataka beka, o kemuni na taciqu kei na ganequ? E na veigauna e so ni noda bula, se da bula kei ira na tamata wale, se vei ira na turaga, e idusidusi tudei ga na dina, ka sala rawarawa duadua me vakacokotaki kina na noda bula (DBY, 11).

Ni da lotu ga e na dina. E tukuni taucoko e na malanivosa e dua ga qo— ni cokotivata kina na veika dina kece ga, e na veivanua ga e tu kina, e na veicakacaka kece ni Kalou kei na tamata, ke vakavatukana e matadra na tamata, se sega (DBY, 2).

E yavu ni veivakabulai vei ira na luvena kece na Kalou na kosipeli, mai na kaukaua vakabete.

Na Kosipeli eda vunautaka tiko qo e Kosipeli ni bula kei na veivakabulai. E Lotu ka Matanitu ni Kalou na Lotu eda matataka tiko. Sa na dodoka tale mai na Turaga na ligana me vakalesuya tale na veika kece sara, me vaka a tu mai na kena itekitekivu, ka me vakabulai ira taucoko e rawa ni ra vakabulai, mai na veiqaravi ni nona Matabete, me savata tani mai vuravura na mawe ni Lutu tani, ka me solia tale na vuravura oqo ki na ligadra na nona Yalododonu (DBY, 4).

E uasivi sara … na lewa ni matabete, na ivakarau ni veiliutaki vakamatanitu, ka na rawa ni vakabula na vuvale ni tamata mai na veika dredre era sotava tu oqo na lewena, ka vakadeitaka vei ira na yalomarau, kei na marau tawayalani e na gauna sa bera mai (DBY, 130).

Sa virikotora mai [na Kalou] na Kosipeli kei na Matabete me ra vakabulai ka vakacerecerei kina na luvena talairawarawa, me ra laki taukena kina na lagilagi vata ga oya, kei na kena lewa, ka me ra vakaisalataki kina e na lagilagi, me ra vakatukatuka, ka rawata na bula tawamudu (DBY, 5).

Na veika kece sara eda vakayacora, e dodonu me vakarurugi e na veituberi ni Matabete (DBY, 133).

E sega sara ni dua na cakacaka vakalotu ka sa virikotora mai na Kalou e na voqa ni domona, e na veiqaravi ni Luvena o Jisu Karisito, se mai na nodra vosa e so tale na nona Parofita, i Apositolo, se Dauvunau, ka na sega ni vakabetena. Na veicakacaka vakalotu, na ivunau, kei na veika sa virikotori kina, e lavaki kina nodra vakabulai na matavuvale vakatamata (DBY, 152).

E na vuku ni veicakacaka ni Kalou, me da dau vakamacalataka ni da na vakayacora ga mai na nona sa dau lavaka vei keda; e na veika lalai kece sara sa dau lavaka vei keda, sa tu na ivakamacala ka vakavuna. … Ni na laki tasevu i na gauna tawayalani mai muri na ivakavuvuli oqori, ka yavu ni nodra vakabauta na Yalododonu e na Gauna Oqo. Na veimeremere ni dina ka sa votai mai vei ira e so, e isolisoli ni Kalou. Eda taura na veika dina oqori, ka na cavuikalawa tiko mai na lagilagi ki na bula lagilagi cake, mai na bula tawamudu, ka me tawamudu tiko ga, me da kila ka kina e na veika kece ga sa tu, me yacova ni da sa Kalou, io me da Luvena na Kalou (DBY, 152).

Sa dolavi tu ga na Kosipeli i Jisu Karisito me noda katuba—na matamata sa tadola tu na kena sala, na ilakolako mai vuravura i lomalagi, ka dau drodro mai kina na ivakatakila vei ira na luve ni tamata e na itutu e so ni nodra dui bula, me vaka era sa lesi kina, kei na nodra itutu era sa dui tawana e na nodra veivanua. E tiki ni lawa ni matanitu ka bula voli kina na Kalou na Kosipeli ni veivakabulai; ka ra na lakova rawa na luve ni tamata na sala ni nodra bula, mai na cakacaka vakalotu ka okati e na Matabete savasava, me rawa ni ra na tomana kina na nodra ilakolako, me ra yacova yani na iserau ni Tamadra na Kalou (DBY, 6).

Na veilawa kei na cakacaka vakalotu e so ka sa vakatakila mai na Turaga e na veisiga e muri oqo, e nakiti me vakabulai ira vakayadua na luvena tagane kei na luvena yalewa o Atama kei Ivi (DBY, 1).

Keitou sa kacivaka oqo ki na lewe i vuravura kece ga, mai na veibuca ki na veiulunivanua ni Turaga ni sai keda ga na Lotu i Jisu Karisito me baleti ira na Yalododonu e na Gauna Oqo … eda sa vakaivotavota tu e na ivakavuvuli ni bula kei na veivakabulai me baleti ira vakayadua era sa dau vosota ka yalodina tiko ga e vuravura kece (DBY, 7).

Me iUlutaga ni Vuli

E oka e na kosipeli i Jisu Karisito na yavu ni ivakaro e so, kei na cakacaka vakalotu, me da vakabulai kina.

Me vaka e tukuna o Peresitedi Young, e okati na kosipeli i Jisu Karisito me “kaukaua ni Kalou na Kosipeli, me da vakabulai rawa kina.” Me veidutaitaki vakaevei na itukutuku qo kei na nona vakamacalataka na iVakabula na kosipeli, e na 3 Nifai 27:13–14?
Na cava na inaki ni kosipeli i Jisu Karisito, e na nodra vakatukatuka ka bula tawamudu na tamata? (Raica tale ga na Mosese 1:39; Eparaama 3:25.) Na cava na vuna e gadrevi kina na yavu ni lawa kei na cakacaka vakalotu, me vakalesui keda tale i na iserau ni Kalou? E na veisala cava soti beka “eda sa lewai ka vakalougatataki kina na luve ni tamata” mai na lawa ni Kalou kei na nona cakacaka vakalotu e so? (Raica tale ga na 2 Nifai 2:13, 16 .)
E vunautaka o Peresitedi Young “vauci tu e na lawa” na Kalou. Me da vukei beka vakaevei e na noda sa kila ni vauci koya tale ga e na lawa na Kalou? (Raica tale ga na V&V 82:10.)
E vakamacalataka o Peresitedi Young ni yavu dodonu na kosipeli. E na veika cava soti beka e namaka kina vei keda na Kalou me da vakatulewa kina vakamaqosa? (Raica tale ga na V&V 58:26–29.)

E oka e na kosipeli i Jisu Karisito na yavu ni veika dina kece ga.

E veivakauqeti o Peresitedi Young me ra dau gadreva na veika dina na Yalododonu e na Gauna Oqo. Na cava beka na vuna e dodonu kina me da kila ni cokotivata e na kosipeli i Jisu Karisito na veika dina kece ga? Na cava beka na vuna e gadrevi kina vei keda me da dau ciqoma na veika dina mai vei ira kece ga ka tu vei ira? Na cava beka e rawa ni da vulica mai na itukutuku nei Peresitedi Young, ni “virikotori na yavu dina ki na bula vakalou”?
Na cava beka e vakavulici mai na itukutuku i Peresitedi Young, me da veiciqomi ka veilomani kina vei ira na lewe ni matalotu kece ga?
Me kila rawa beka vakaevei na veika dina, se lasu? (Raica tale ga na 1 Korinica 2:11, 14; Moronai 7:12–17.) Na cava na vuna e bibi kina vei keda e na veisiga e muri, me da dau “vakasoqona mai na yavu dina vakayadua, ka biuta tani sara na lasu kece ga”?
E na laki vakamawe beka vakaevei ki na noda bula na noda sa tuberi mai e na ivakavuvuli dina ni kosipeli? Na cava na vuna e okati kina me “idusidusi tudei ga [kina] na dina, ka sala rawarawa duadua me vakacokotaki kina na noda bula”? E na vakamawe vakaevei ki na noda bula, ni da yavutaka na noda bula e na lasu kei na lawaki? (Raica tale ga na V&V 88:86.)

E yavu ni veivakabulai vei ira na luvena kece na Kalou na kosipeli, mai na kaukaua vakabete.

Na isema cava e tu e na matabete kei na kosipeli i Jisu Karisito? E lavaki beka e na vuku ni cava na cakacaka vakabete e na yavu vakosipeli?
Na cava beka na inaki ni noda dui kuoramu vakabete, noda isoqosoqo, kei na veikomiti, e na kena vunautaki na kosipeli? Na cava na itavi ni iSoqosoqo ni Veivukei e na kena vakavulici na ivakavuvuli dina, ka me taracake kina na noda vakabauta e na kosipeli i Jisu Karisito? Na veika cava soti beka o sa donuya mai, e na nona vakavatukanataka e dua na nona loloma dina vakarisito? Sa veivakauqeti beka vakaevei vei iko na veika o sotava mai oqori?
E vunautaka o Peresitedi Young ni okati na kosipeli me “matamata sa tadola tu na kena sala, na ilakolako mai vuravura i lomalagi.” Na itavi cava beka sa vakacolati vei ira era sa ciqoma mai na kosipeli ka sa vakalesui tale mai, me ra vakatetea kina na nodra ivakadinadina me baleta na kena lawa, na cakacaka vakalotu, kei na kena dina? (Raica tale ga na Maciu 28:19–20; Vakaibalebale 22:6.)