Me Daudokai na Siga ni Vakacecegu (Sabato) kei na Sakaramede

Ni ra sa laki bogi-dua oti e na Bucabuca ni Salt Lake, A qai vosa vakalekaleka o Peresitedi Brigham Young ki na itikotiko ni vuda vakalotu me baleta na kena dau vakatabui na siga ni Vakacecegu (Sabato). Ni tu mai matadra na veikauloa me ra vorata yani, me teivaki na kedra kakana, kei na cakacaka bibi tale e so sa tu e matadra, a qai “tukuna vei ira na veitacini vakalotu … me kua ni ra vakacegu mai na cakaca dau qarava na nodra cakacaka oqori e na veisigatabu, ni kevaka era na vakayacora tiko ga, e na vakalimataki vei ira na ka era na vakayalia kina, mai na veika e dodonu me ra rawata, ka me ra kua ni vakasasa manumanu se siwa e na siga oya.” A vakamacalataka tale ga ni “na vakayacori na nodra soqoni e na veisabato, e na vanua era donuya oqori, kei na veivanua kece ga era na vakacegu tiko kina” (WWJ, 25 July 1847). A veivunauci tiko ga e veigauna o Peresitedi Young vei ira na Yalododonu, me ra vakatabuya tiko na Sabato, me “dauvakananumi kina na noda Kalou kei na noda vakabauta savasava” (DBY, 165).

iVakavuvuli i Brigham Young

Kunei na kalougata vakayago kei na isolisoli vakayalo mai na kena vakatabui na siga ni Vakacecegu (Sabato).

Mo ni goleva mada na ivola oqo (na ivola na Vunau kei na Veiyalayalati), o ni na wilika kina ni dodonu me ra dau soqoni vata na Yalododonu e na siga ni Vakacecegu [raica na V&V 59:9–16]. … O ira vakayadua ka sa vakatokai me ra Yalododonu e na Gauna Oqo, era sa vakaroti mai na ivakatakila ka sa virikotora mai na Turaga, ni dodonu me ra soqoni vata e na siga oqo. Sa lavaki vei keda me da vakasoqoni vata e na siga oqo, me da veivutunitaka ka vakatusa tiko na noda ivalavala ca, ka laki vakayagataka na [sakaramede], me ivakananumi ni nona mate ka vakararawataki na noda Turaga ka iVakabula (DBY, 164).

Ni ra soqoni vata na tamata me ra sokalou, e dodonu me ra biuta tani mada na lomaocaoca vakavuravura e na kena vanua dodonu, me davo dodonu kina na nodra vakasama, me ra qai qarava kina na Turaga, me ra kacivi koya e na yaca i Jisu, ka me ra votai kina e na nona Yalo Tabu, me rawa ni ra rogoca ka vakasamataka kina na veika ni vuravura tawamudu, me ra kila tale ga na sala me ra vakavukui kina e na loloma ni noda Kalou. Sa nakiti me tadola e na gauna oqori na nodra vakasama, me ra raica kina na veika ni Kalou sa dau tabogo tu, ka dau vakatakila e na cakacaka yaco ni nona Yalo Tabu (DBY, 167).

Me ra vakadirorogo na lewe ni ivavakoso yadudua, ni da mai soqoni vata oqori me da qarava kina na Kalou. Mo dau nanuma mo dau vakadirorogo, kua ni vakasolokakana, veivosaki, se yamasamasa e na nomu idabedabe (DBY, 167–68).

Ni da biuta mada vakalekaleka na noda veiwere, e na noda laki soqoni vata, me da qarava kina na noda Kalou, au rawa ni vakadeitaka eke vei kemuni ni na vuavuaivinaka cake kina na nodra veiwere, ka vinaka cake mai na kena vua, ke da tiko ga e na noda veiwere. E rawa beka ni da na suisui kina ka teitei ka ogataka tiko, me kua ga ni da guilecava ni Kalou ga e na vakatubura na noda itei; ia ni da soqoni vata tiko, eda na bulabula cake vakayago ka vakayalo tale ga, eda na mata bulabula cake, ka na cokaidrauna mai na veika kece sara e tu volivoliti keda oqo, me da yalomatuataka cake na kena yaga (DBY, 167).

Me vakatabui [na Sabato] me yaga vakayago vei keda, ka me baleta tale ga na noda bula vakayalo. Ni da raica na nona vakusakusa e dua na dauteitei, me qarava na nona tatamusuki, me vakumuna tiko na kedra kakana na manumanu, me birika na nona bai, se me vakasoqona tale na nona manumanu e na siga ni Vakacecegu, au okati koya ni malumalumu sara e na vakabauta. Sa takali sara mai vua na yalo ni lotu. E rauta vakavinaka me da qarava ga na noda cakacaka e na ono na siga [raica na Lako Yani 20:9–11], ia, ke da via qito, me da qito e na loma ni dua na siga e ono oqori; ke da via vakatakakana se sarasara, mo lako e na dua na siga e ono oqori, ka mo tiko ga e na sokalou e na ikavitu ni siga (DBY, 165).

Me da vakacegu mai na cakacaka, … me kua tale ni da lomaocaocataka na ka me da cakava e na Sabato; ke sa vinakati me saqa na kakana, mo vakasaqara; ia, e na uasivi cake me kua ni da lomaleqataka tiko. Ia, e na kena vakamareqeti na Sabato me vaka sa virikotori tu e na ivunau i Mosese, au na sega ni na vakayacora rawa me vaka sa virikotori oqori; ni ka dredre dina sara. Ia, sa lavaki e na veiyalayalati vou, me da dau nanuma me vakatabui e dua na siga e na loma ni macawa, me siga ni noda vakacegu— me ivakananumi ni nona vakacegu na Turaga, kei ira tale ga na Yalododonu; me yaga tale ga vei keda, ka ni a virikotori mai e liu me yaga vakatabakidua vua na tamata. Ni sa volai tu e na ivola oqo (na iVolatabu), ni a buli na Sabato me baleta na tamata. Me yaga vua. Me vakalailaitaki sara na cakacaka e na siga oya; ka me maroroi me siga ni vakacegu, me da soqoni vata kina e na veivanua ka sa vakarautaki vei keda, me vaka sa lavaki e na ivakatakila [raica na V&V 59:10–12], me da vakatusa kina na noda ivalavala ca, me da kauta kina na noda ikatini kei na isolisoli kece sara, ka soli keda kina vua na Turaga (DBY, 164).

Mo ni nanuma vinaka sara na taciqu vakalotu, o ira era dau vakatasisisi, se gade e na tolili se lako vakasarasara e na siga ni Vakacecegu—ka sa takalevu sara tiko edaidai na veika oqo—era malumalumu sara e na vakabauta. E na dua na gauna lekaleka e muri, sa na drodro laivi vakalalai na yalo ni lotu e tu vei ira, ka me ra dau veivakalewai vei ira na tacidra vakalotu, e na malumalumu e so ni ivakavuvuli ni Lotu, na leqa lalai ni nodra isoqosoqo, ka ra na biuta sara kina na Matanitu ni Kalou e na dua na gauna e muri, ka tini sara ki na rusa. Au nuitaka tu ni o ni na nanuma na veika oqo, ka mo ni laki vakaraitaka vei ira na wekamuni (DBY, 165).

Ke da dravudravua se vutuniyau, kevaka eda dau luluqa e na noda qarava na noda masu kei na lotu ni sakaramede, eda sa na vakaweleweletaka kina na Yalo ni Turaga, ka na qai luvuci kina e na yalo butobuto (DBY, 170).

Sa kena dodonu me da mai soqoni eke e na veisiga ni Vakacecegu vakaveitaravi, kei na soqoni ni Tabana Levu, … me da veivakavulici, me da vosa, cabo masu, lagasere, ka veivunauci. Na cava beka na kena inaki? Me da nanuma kina na noda Kalou, kei na noda lotu savasava. E bibi sara beka na ivakarau e so oqori? Donu; ni ka rawarawa sara me da dau lecava—ka rawarawa sara ni da lako vakatani, ni dodonu me dau voqa tiko ga e daligada na Kosipeli, me vakarua, se vakatolu e na veimacawa, raica, me kua ni da lesuva tale na noda kaloulasulasu (DBY, 165).

Sa teivaka tu e lomada na Turaga na tikina vakalou, ka gadreva na yalo vakalou ka tawavuca rawa oqori me dau vakani tiko. E na vakamamautaki rawa beka e na kakana vakavuravura? Sega; ni na bula tiko kina na yago oqo ke tiko kina na yaloda, me vakarautaki kina vei keda na sala me da dau caka vinaka. Na tikina vakayalo oqori ka tiko e lomada, e gadreva na kakana mai na kena iVurevure ka vu mai kina. E sega ni ka vakavuravura, se vakayago, e vu mai lomalagi. E na veivakamamautaki wale ga ki na tikina vakayalo ka tu e lomana na tamata na veiyavu ni bula tawamudu, se ivakavuvuli ni Kalou kei na veika vakalou, me vakacegu kina (DBY, 165).

Ni da lako mai ki na Tabernacle e na dua na siga e veimacawa, me da mai sokalou ka goleva na veika sa vinakata na Kalou, ka muria na veika eda gadreva e yaloda e na so na gauna; ka muria tiko ga na yaloda e na veigauna tale e so, e ka wale sara; e sega sara na betena, ka veiqaravi veicavilaki ga vua na Kalou. E dodonu me da dau vakamuria ga na lewa ni Kalou, ka qarava e na veigauna na kena vakayacori na nona inaki, se qaravi e na Tabernacle, se dua tale na vanua (DBY, 166).

Na siga Monite, Tusite, Vukelulu, Lotulevu, Vakaraubuka, se na Vakarauwai, e dodonu me vakalagilagi kina na Kalou, me vaka ga na veika e dau vakayacori e na Sigatabu, me kua ni da taququ kina e na veika eda goleva [raica na V&V 59:11] (DBY, 166).

Me da vakataudeitaki ka veivakaukauataki e na noda soqoni vata.

Sa qai rawa edaidai [e na Sabato] me da soqoni vata ka mai veivosaki, me da vakataudeitaki ka veivukei kina (DBY, 167).

Ni soli tu oqo vei keda na gauna me da dau veivosaki kina, me da dau cavuta ga na veivosa e veivakacegui ka veitovaki. Ni o vakauqeti mai na Yalo sa savasava ka dodonu, me cila tale ga na nomu rarama; ia ke o veretaki ka vorati mai vei Setani, mo katona tiko ga e lomamu na nomu vakanananu— mo qamugusu tiko ga; ni vakavuana na vosa, se vinaka se ca (DBY, 166).

Ni [dua na tamata] e tekivutaka se tinia na soqoni e na masu, me ra vakamuria tiko na veivosa kece sara e cavuta o ira na turaga, se marama, se gone e na ivavakoso, ka ra tukuna ni ra Yalododonu, me kua sara ni dua tale na vosa e na tebenigusudra, se i lomadra, na kena ga ka cavuti tiko e na nona masu o koya ka masu tiko, e na vukudra na ivakavakoso (DBY, 170).

Ke dua vei kemuni e nanuma ni sa rui matemate na nomuni soqoni, me vaka era sa dau vakavoqataka vakavuqa na tacida vakalotu, sa nomuni itavi mo ni vakabulabulataka na soqoni oqori, vakayacora na veika e so me cakacaka yaco kina na Yalo kei na kaukaua ni Kalou e na veisoqoni e na nomuni vanua (DBY, 170).

Au kerea meu vakasala kina vei ira na taciqu vakalotu ka ra dau vosa vei ira na ivavakoso vakalotu e na so na gauna me ra dau vunau ga vakalekaleka, ke sega ni sobuti ira tiko na bula kei na yalo ni soqoni, me lekaleka sara na nodra vunau, ni sega na gauna e na noda Lotuvakayabaki me ra talimagimagi vakayadua na italatala qase era vunau kina, ni soli vakalailai ga na gauna me da vosa kina vakalekaleka e na noda wasea na noda ivakadinadina, ka vunau kina vakalekaleka, me ra vakayaloqaqataki kina na Yalododonu, me ra tokoni kina na wekada malumalumu, me da saga me ra vakataudeitaki kina o ira era sotava tu na bula veilecayaki, me ra tosoya tiko ga na Matanitu ni Kalou (DBY, 167).

Kemuni na tacida kei na ganeda, me bau dua ga na noqu kerekere vei kemuni. Ni o ni dau vosa, mo ni tovolea me rogoci ka kilai na veika o ni via tukuna. … Ke sega ni dua na ka yaga mo ni tukuna, ni yalovinaka ka rogoca na noqu vosa, ni dabe toka ga. Ke sa dodonu mo ni vosa, ni tukuna sara; ia ni sa laki oti, mo ni tinia sara. Me lewai vakavinaka tu na dui yalomuni e na ivakavuvuli ni bula tawamudu, me vaka o ni Luve ni Kalou, ka dau gadreva na veika dina ka dodonu (DBY, 167).

Sa noqu gagadre ga vua na Tamaqu ka noqu Kalou, ni na dau ciqoma o Koya na noqu vosa e na veigauna au vosa se vunau kina, me yaga tale ga vei ira era rogoca tiko na noqu vosa (DBY, 168).

E na veigauna meu vunau kina vei ira e na ivavakoso, au … dau kerea ga vua na Kalou na Tamaqu Vakalomalagi, e na yaca i Jisu Karisito, me solia mai vei au na nona Yalo Tabu, me vakadeitaka kina i lomaqu na veika e so e vinakata meu vunautaka (DBY, 168).

u dau vinakata me ra vakarorogo vinaka na ivavakoso, kei na nodra veitokoni e na vakabauta; au gadreva tale ga na vuku ni Kalou kei na nona Yalo Tabu, me vakadeitaka i lomaqu na nona vosa, meu qai veivakavukui rawa kina vei ira na lewe ni ivavakoso. E dina beka niu sa dauvunau vakawasoma mai e na tolusagavulu-kavitu na yabaki sa oti, e vakavudua sara meu sega ni madua me vaka na gone, e na noqu duri e matadra na ivavakoso; au na sega ni kila na gauna e na qai yali kina vei au, keu na bula tiko ga meu yacova sara yani na yabaki i Mecusela. Au sa kila vinaka tiko na vuna e so. Niu dau raici ira yani na wekada yalomatua, sa dau votu sara mai vei au na mata ni Kalou kau qarava tiko. E sega sara ni dua vei keda e vakuai mai na isolisoli vakalou; e dina ni da mai vakaisulutaki e na yago qele, eda sa ivakatakarakara ga ni noda Kalou, ia e na sasanuki sara na yago qele oqo mai na ivotavota ni bula vakalou eda sa rawata mai vua na Tamada. Oqo gona na vu ni noqu dau madua (DBY, 168).

Ni dua e vunau tiko vei ira na ivavakoso, ke vica wale sara na iyatuvosa e cavuta kina, ka rairai yakusurasura sara beka na veika e so e cavuta kina, ia ke sa savasava tu vua na Kalou na yalona, e na yaga vakalevu cake sara na veika e vica wale ka cavuta oqori, mai na vosa madila ka sega ni sala vata kei na Yalo ni Turaga, ka na yaga vakalevu tale ga e na iserau ni Kalou, vei ira na nona agilosi, kei ira vakayadua na ivalavala dodonu. E na kena cabori na masu, ke vica wale sara na vosa e cavuti me qaqa ni masu ka rairai cacavukavuka vakavosa beka, ia ke sa savasava tu ga vua na Kalou na lomana, e na yaga vakalevu cake sara na masu ka cabori oqori mai na gusu madila nei Cicero [e dua na kai Roma, ka dauserekali mai na imatai ni senituri B.K.]. E dau vakabibitaka beka na Turaga, na Tamada taucoko, na itautau ni noda vosa? E vakadonui cake vua na Turaga na vosa rawarawa ga ka cabo me qaqa ni noda masu, ka sega ni vakaliuci na vosa vakaiukuuku, na dokadoka, na vosa madila ka ra dau cabora na tamata. Ni dau raica o koya na yalovinaka, na yalodina, kei na yalomalumalumu me vaka na gone, sa vakavatukana ki na ivakavuvuli tudei—”Oqori na yalo ni bula e na noqu matanitu—kau sa solia vei ira na luvequ” (DBY, 169).

Au vakabauta ni sa noda itavi me da vakadadamuria na veika vinaka kece ga, na ivalavala totoka, na itovo vakaturaga, na ivakarau dau qoroi. Me da dau vakadadamuri ira ka dau momona na nodra vosa, ka vakadikeva vinaka vakaikeda na veivakasama e so, e na kena vosa rakorako, me vakabibiki sara ni da veivotai tiko e na ivakavuvuli bibi ni Kosipeli ni sautu vei ira na tamata. Au dau vakayagataka e na noqu vosa na veivosa rakorako au rawa ni cavuta (DBY, 169).

[Ia,] au vakabauta ga … ni vakaevei sara beka na noqu maqosa vakavosa ka rawa ni ra cavuta o ira era sa vuli vinaka tu, e na rekitaka vakalevu ga na lomaqu na vosa e so me vaka era dau cavuta na gone, e na vosa rawarawa sara, ka sega ni taleitaka na matuavosa ka ra dau cavuta e so vei keda. Na kena e talei duadua vei au, me da dau cavuta ga na veivosa rawarawa (DBY, 169).

Sa soli na siga ni lolo me ra vukei kina na vakaloloma, ka me vaqaqacotaka tale ga na ivakadinadina.

O ni sa kila vakavinaka tu ni da dau lolo e na imatai ni Lotulevu e na veivula [sa qai veisau oqo ki na imatai ni Sigatabu]. E vica tu beka vei keda e na gauna oqo eda kila vinaka mai na itekitekivu ni siga oqo? Ni se bera ni dau saumi na ikatini, era dau vukei ga na dravudravua mai na ilavo e so era solia. Era a cabeti Josefa e na nodra gadreva na veivuke, mai Kirtland, sa vakarota sara me dua na nodra siga ni lolo, ka sa lewa tale ga na kena siga. Me dau vakayacori e na veivula, me vaka ga sa caka tiko e na gauna oqo, ka ra kauta kina ki na lotu ni lolo na kakana ka dodonu me ra kania e na siga oya, me vaka na valawa, se lewenimanumanu, se bata, se vuanikau sara, kei na kakana tale e so, me ra laki solia vua ka sa digitaki me qarava, me qai veisoliyaka vei ira na dravudravua (DBY, 169).

E na gauna ni lotu ni lolo, era qai soqoni yani na Yalododonu me ra laki talaucaka kina na lomadra, e na nodra vakabauta na Kosipeli savasava (DBY, 169).

O ni sega li ni vakaivotavota e na yalo veivakavukui, e na yalo ni kila ka, kei na vakavatukana ni veivakacegui ni Yalo Tabu, me ra dau duri kina na wekada ka vakatusa na veika vakalou era sa vakadinadinataka vakaiira? E sega li ni vakavurea ki na nomuni vakasama na veika e so oqori na nona loloma uasivi na Turaga, me vakatakila kina vei kemuni na yavu e so ni Kosipeli? E sega li ni vakadeitaki kina na nomuni vakabauta, mo ni vakataudeitaki sara kina, ka ivakadinadina tale ga ni o ni luvena dina na Kalou? Sa dau yaco me vakakina. O koya gona, ke dua e vakatusa na veika vakalou, e na veivakaukauataki tiko vei ira na tacida vakalotu, me vaka ga e a dau yaco mai liu, ni ra vakamuria na ivakaro me ra dau, “Veivakavulici wasoma kina vakaikemudou,” “veivakaukauataki tiko vei ira na tacida vakalotu,” kei na veivosa tale e so (DBY, 170).

Ni da vakayagataka na sakaramede, me da vakananuma kina na iVakabula, ka vakavouia na noda veidinadinati ka vakayacori vua na Tamada Vakalomalagi.

Meu kaya kina vei kemuni na tacida kei na ganeda, sa noda itavi ka sa lavaki tu vei keda, mai vua na Tamada mai Lomalagi, me vaka na yalo ni noda vakabauta, e na veidinadinati eda sa vakayacora vua na Kalou, kei na noda veiyalayalati vakatamata, me da dau qarava na veicakacaka ni vale ni Kalou, me vakabibi sara e na siga ni Vakacecegu (Sabato), me da dau vakayagataka na Sakaramede ni iVakayakavi ni Turaga. Ka qai tiko tale ga e na soqoni ni Tabana Levu kei na soqoni ni Kuoramu (DBY, 171).

E na cakacaka vakalotu [sakaramede] eda qarava eke … , eda vakaraitaka kina vua na Tamada ni da daunanumi Jisu Karisito, na Tuakada; eda vakatusa vua ni da vinakata me da taura na yacana. Ni da qarava tiko na veika oqori, au gadreva me vagolei kina na vakasama kei na noda bula. Au vinakata me qarava na bula taucoko ni tamata, e na nomu tiko e na soqoni (DBY, 171).

Au vakauqeti kemuni kina na taciqu kei na ganequ, mo ni dau vakaiv-otavota e na veisiga Sabato e na cakacaka vakalotu oqo, ni [o ni] soqoni vata mai. … Au masulaka vakabibi tale ga, kemuni na wekaqu, mo ni dau vakasamataka sara vakatitobu na cakacaka vakalotu oqo, ka gadreva tiko na Turaga e na yalomuni taucoko, mo ni qai rawata kina na kena veivakalougatataki, ni o ni vakamuria tiko e na veidokai. Mo ni tuberi ira na luvemuni me ra dau doka; ka me ra kila tale ga na kena bibi me dau qaravi e veigauna. Ni da na laki rawata na bula tawamudu mai na noda dau qarava e na yalodina, me vaka ga na ivakavuvuli tale e so kei na cakacaka vakalotu ka sa virikotori tu me veivakasavasavataki kina na tamata kece ga, me ra vakalougatataki kina mai vei Jisu, ka vota vei ira na yalona, me dau tuberi ira ka vukei ira e na nodra laki rawata na bula tawamudu. Me dau vakamatatataki vei ira na luvemuni na bibi ni cakacaka vakalotu oqo (DBY, 171–72).

Eda [vakayagataka na sakaramede] me da daunanuma kina na nona mate na iVakabula; sa dau lavaki na veika oqori vei ira na nona tisaipeli, me yacova na nona lesu tale mai, veitalia sara na dede ni nodra wawa. Veitalia na iwiliwili ni itabagauna era sa mai bula kina, ka sa lako tale yani, sa lavaki tu vei ira era vakabauti koya me ra kana madrai ka gunu waini [se gunu wai edaidai] me ra dauvakananuma kina na nona mate, kei na veika rarawa e a sotava, me ra vakayacora tiko ga me yacova na nona lesu tale mai. Na cava beka na vuna e lavaki kina vei ira na veika oqo? Me ra dau vakadinadinataka vua na Tamada, vei Jisu kei ira na agilosi, ni ra sa vakabauta ka dau gadreva me ra dau muri koya e na nodra sa mai sucu vou, me ra dau muria tiko ga na nona ivunau, me ra taracake na nona Matanitu, me ra dau doka na yacana ka qaravi koya vakatabakidua, me veiraurau kina me ra laki kania ka gunuva vata tale kei koya e na Matanitu ni Tamana. Oqo na vuna era dau vakayagataka kina na Yalododonu e na Gauna Oqo na sakaramede ni iVakayakavi ni Turaga (DBY, 172).

Sa isolisoli bibi sara vei keda me da torova yani na Turaga, kei ira na agilosi, kei ira na wekada, ka vakadinadinataka vei ira ni da daunanuma tiko ni a mai mate e na vukuda o Jisu Karisito na Turaga. Me vakavatukanataki kina vua na Tamada ni da daunanuma na noda veiyalayalati, ni da dautaleitaka na nona Kosipeli, ka da daugadreva me da muria tiko ga na nona ivunau, ka doka tiko ga na yaca ni noda Turaga o Jisu e vuravura (DBY, 172).

Me iUlutaga ni Vuli

Kunei na kalougata vakayago kei na isolisoli vakayalo mai na kena vakatabui na siga ni Vakacecegu (Sabato).

Na cava beka na inaki ni nona vakarota vei keda na Turaga me vakatabui kina na siga Sabato? Na cava beka na yaga ni noda dau vakatabuya na Sabato? (Raica tale ga na V&V 59:9–16.)
A vakamacalataka o Peresitedi Young, “Sa kena dodonu me da mai soqoni eke.” Na cava beka e tukuna me da vakayacora ni da “soqoni vata na tamata me ra sokalou”? Na veika cava soti beka e rawa ni na dau vagolei keda vakatikitiko, mai na noda dau soqoni vata e na Sabato me da qarava kina na Kalou?
Me vaka sa vakamacala kina o Peresitedi Young, na cava beka e dau yaco “vakalalai” ni da talaidredre e na ivunau, ka sega ni dau vakatabuya na Sabato? Ke da vakamuria na itukutuku oqori nei Peresitedi Young, na taro cava soti beka me da dau tarogi keda kina, me da qai kila kina na rakorako ni veika e so eda na qarava e na Sabato? (Me kena ivakaraitaki: E qaravi beka e na itavi oqo me baleta na noda bula vakayalo? E susugi cake beka kina na noda vakabauta? E veitokoni beka ki na noda vukei ira na wekada?)
Na cava beka na vuna e vakabibitaki kina vei keda me da dau sokalou vua na Turaga e na veisiga kece, ka sega ni qarava wale ga e na Sabato? (Raica tale ga na V&V 59:11.) Me duidui se vakatauvatani beka vakaevei na noda sokalou e na loma ni macawa, mai na noda sokalou e na Sabato? Me da qarava beka vakaevei e na veisiga na veika e so ka “vakalagilagi kina na Kalou”?

Me da vakataudeitaki ka veivakaukauataki e na noda soqoni vata.

Na cava na vuna e bibi kina na noda soqoni vata e na Sabato, me da sokalou kina? Me vakaevei beka na inaki ni lomada e na noda veikidavaki, me da veivosaki, se veituberi e na noda veisoqoni e so ni siga ni Vakacecegu? (Raica tale ga na V&V 43:8–9.) Sa dau vukei iko beka vakaevei na nomu veimaliwai kei ira na Yalododonu e na Gauna Oqo?
Na ivakasala cava beka sa solia tu o Peresitedi Young vei ira era sa dau sureti me ra dau vosa e na soqoni ni Lotu? E bibi cake beka vakacava na veivakauqeti ni Yalo Tabu, mai na gusumadila? Na cava beka e dau lavaka vei ira na lewe ni ivavakoso? Me da “vakabulabulataka” beka vakaevei na noda soqoni? (Raica tale ga na V&V 50:21–24.)

Sa soli na siga ni lolo me ra vukei kina na vakaloloma, ka me vaqaqacotaka tale ga na ivakadinadina.

Me vaka e vakamacala kina o Peresitedi Young, na cava beka na vu ni kena virikotori mai liu na siga ni lolo?
Na veika cava soti beka eda na rawata mai na noda daulomasoli e na isolisoli ni lolo?
Sa soli vei keda na sala me da dau soli ivakadinadina e na Sigatabu. Na cava beka na ibalebale ni noda soli ivakadinadina? Na cava beka e bibi kina me da dau wase ivakadinadina, ka rogoca tale ga na nodra ivakadinadina na wekada? E dau yaga vakaevei vei ira na wekada na noda dau vakatusa na veika vakalou? Me dau yaga beka vakacava vei keda na veika oqori? Sa vakataudeitaka beka vakaevei na nomu vakabauta, mai na nodra ivakadinadina na tani?

Ni da vakayagataka na sakaramede, me da vakananuma kina na iVakabula, ka vakavouia na noda veidinadinati ka vakayacori vua na Tamada Vakalomalagi.

Na tikina beka ka bibi duadua, eda dau vakayacora e na lotu ni Sigatabu, na noda dau vakayagataka na sakaramede. Na cava beka na vuna e dau lavaka kina na Turaga me da dau doka na sakaramede? (Raica tale ga na V&V 27:2.)
Na cava beka eda dau yalataka, e na noda vakayagataka na sakaramede? (Raica na qaqa ni masu ni sakaramede e na V&V 20:75–79, se na Moroni 4; 5.) Na cava beka na ibalebale ni noda taura na yaca i Karisito? Na cava beka sa yalataka na Turaga vei ira era dau doka na sakaramede? Me da vakaivotavota beka vakaevei e na veivakalougatataki oqori?
Me vakataudeitaka beka na noda yalodina tiko e na veisiga ni loma ni macawa vua na iVakabula, na noda sa vakayagataka mai na sakaramede? (Raica tale ga na V&V 59:9–12.)

Jesus instituting sacrament — Sa dau lavaki vei keda me da qarava na cakacaka vakalotu oqo na sakaramede, “me da dau vakadinadinataka [kina] vua na Tamada … ni [da] sa vakabauta ka dau gadreva me da dau muri koya … vakatabakidua” (*DBY*, 171).

13th Ward Relief Society Presidency in 1875 — Laurai tu oqori o Rachel Ridgeway Grant (e liu e matadratou), na peresitedi raraba ni iSoqosoqo ni Veivukei, kei iratou na nona ivukevuke kei na liganicakacaka e na yabaki 1875.