Noda Kila na iBalebale ni Mate kei na Tucake Tale

E na lotu ni veibulu vei Elder Thomas Williams e na ika 13 Julai 1874, a vakamacala kina o Peresitedi Brigham Young me baleta na mate: “E butobuto loaloa na loma ni buca, ka vakaturubuto dina sara o mate! Ni da takali mai na bula oqo, ka da vakatoka me bula vakayago, me da cabeta yani na bula qalala, eda sa na laki vulagi sara kina vakalevu. Sa rui buca loaloa ka butobuto! E ka vou vakalevu na sala oqo, ka da na dui curuma vakaikeda. Meu kaya ga vei kemuni na noqu itokani kei kemuni na taciqu, ke rawa wale ga ni dolavi me da raica na veika kece ga, ka vakakina na noda laki sotava ka kila na veika e vuqa e muri, ni ka wale sara na vakaturubuto loaloa kei na buca butobuto, ni da na dau laki raica tale e muri, ka vakasamataka ni da sa kosova oti, na cava beka na vuna e rui yaga kina vakalevu ki na noqu ilakolako ni bula oqo, niu sa lakova mai na bula rarawa, na momosi ni yalo, na lolosi, na mavoa, kei na cudru kei na bula drakidrakita, meu lakova yani na bula kau na laki marautaka vakalevu sara, me vaka e rawa mai na bula ka sega ni vakavatukana, se vakayago. Sa galala tu na yaloqu, au sa sega tale ni viagunu, au sega tale ni viamoce, sa oti tale ga na viakana, ka sega na wawale ni yago, niu cici, seu taubale, cakacaka, meu lako, se lesu tale mai, niu cakava oqo, seu cakava oya, se cava tale e lavaki vei au, au sega tale ni bau vakila na oca kei na rarawa, niu bula vinaka tu, kaukaua vinaka tu na noqu icegu, kau marautaka tiko na iserau nei Tamada vakalomalagi, e na kaukaua ni nona Yalo Tabu. Au via tataunaka ga vei ira na wekaqu, ke o ni vinakata mo ni dau bulataka na nomuni vakabauta vakalotu, mo bula tiko mo vakasinaiti tiko ga e na vakabauta na Kalou, me cilavi iko tiko ga na rarawa ni vuravura tawamudu, mo ni raica ka kila kina vakaikemuni na veika e so oqo” (DNSW, 28 Julai 1874, 1).

iVakavuvuli i Brigham Young

E duidui sara na marau vakavuravura, mai na “marau, lagilagi kei na vakacegu kei na talei ni bula” ka vakanadakui kina na bula e vuravura oqo, e na yalovakacegu kei na sautu.

Sa ivurevure ni marau levu vei ira na wekana kei ira na nona itokani, na nona sa bale e dua e na vakacegu, ka rawata kina na lagilagi e na nodra sa tucake tale. E sega ni vakatauvatani rawa na vuravura oqo, kei na veika kece ga sa tu kina, kei na veika kece ga vakavuravura ka baleta na vuravura oqo, kei na lagilagi, reki, na vakacegu, kei na marau ka na sotava na yalo ka gole yani e na yalovakacegu (DBY, 370).

Na nodra lolositaki na mate ka ra yalododonu, e vu mai na lecaika kei na malumalumu ka teivaki tu e loma ni yagoqele, ka tauyavutaki kina na vale oqo, ka vakaitikotiko kina na yalo. Se vakaevei sara beka na momosi ni yaloda, se na veika dredre eda sotava mai, eda dau malele vakalevu ki na noda bula e vuravura, ka besetaka sara ni biuti keda e dua vei ira na lewena. Eda dau taleitaka me da vaqaqacotaka tiko ga na noda ivau ni veiwekani vakavuvale eda bula kina oqo, ka sega sara ni vinakata me da veitalatala (DBY, 370).

E ka dina sara ni ka mosimosi sara me da veitalatala kei ira na noda itokani. Eda tamata ga, ka vuabale tu e na veika vakayalo, me da dau veinanumi, ka yalololoma, ka rui mositi keda sara na noda sa na veikalikali vakadua kei koya e dua na noda itokani. Eda vinakata me ra tiko ga e na bula vakayago oqo, e dina ni ra na sotava kina na veika rarawa e vuqa. E sega li ni da na okati e na vakasama oqori ni da sega ni dau veinanumi? Se me da na marau ga e na nodra sa mai talaci na wekada voleka e so, ka ra sa dau cakavinaka mai e na nodra bula, me yacova sara ni ra sa laki qase sara (DBY, 371).

Ia, ke da kila wale ga na veika sa baleti keda, me da titiro yani ki na vuravura tawamudu, ka vagalalataki kina mai na malumalumu vakayago, na mataboko, kei na yalovakawelewele ka da ologi kina oqo vakayago, eda na sega tale ni nanuma me da tagi se lolosi (DBY, 370).

Mo bula tiko e na kena ivakarau, ni o sa na laki yadra mai na moce e na vuravura ni yalo, mo na qai kaya dina ga, “Au na sega ni vakavinakataka tale na noqu bula, ke a soli vei au me laki bula tale.” Au kaya gona kina vei kemuni, e na vuku ni Yavusa o Isireli, e na vuku i Saioni ka da na taracake tiko, mo ni dau bula e veisiga mai na gauna oqo, me yacova yani na ivakataotioti ni nomu bula, me vinaka tiko ga na nomu ivakarau, me rawa ni ra na laki marautaka vakalevu o ira na italai savasava era na vakadikeva. Mo ni bula vakalou, ka na sega ni o ni na rawata rawa, ke o ni sega ni bula savasava (DBY, 370).

Ni gauna eda sa na mate kina, sa na veikalikali na yalo mai na yagoda, me lesu tale i na qele na yagoda, ka lesu tale na yalo ki na vuravura ni yalo.

Na veitamata yadudua sara era vakaivotavota tu e na ivakavuvuli ni bula tawamudu, me dau okata na yagona, me vakavuravura me vaka ga na veika kece e vuravura. Ni na suka tale na yagoda ki na qele, e vuravura ka tinada. Sa dina ga ni ka dredre sara vei ira e so me ra vakasamataka ni na veikalikali vakalekaleka na yaloda mai na yagoda, ka ra sotava mai na milioni vakamilioni na vakasama vakaoqo e na nodra bula. Ke ra kila wale ga na inaki ni gauna vakatovotovo oqo, kei na ivakavuvuli dina ni bula tawamudu, e ka wale sara na veika rarawa e sotava na yago, ka yacova me mate (DBY, 368).

Sa ka talei sara vua na Turaga na nona vakarautaka mai na yago qele eke, ka vakacuruma kina na yalo, me qai yaco me tamata. Ni oti ga e dua na gauna lekaleka, sa na suka tale na yago oqo, ka vakavatuka tu oqo ki na kuvu ni qele e vuravura na tinana, na yago oqo o rawa ni vakatara, raica, se taura. E na mate li na yalo? Sega. … E na bula tiko ga na yalo, ni sa kakaseresere na yago oqo ki na qele, ka lesu tale i na vuravura ni yalo na yalo ka solia mai na Kalou ki na yago qele (DBY, 368).

E lewe ni yagoda na veika e laurai ka vakavatuka tu, me vaka o ni sa kila kece; o ni kila tale ga ni a sucu mai i vuravura na yagoda. Era na vakaivotavota kina e na veivunika ka vakarautaki mai me baleti ira, me ra tubu cake kina, me yacova sara ni ra sa uabula, ka qase cake sara, ka ra na laki vuca tale me lesu tale me kuvu ni qele. Ia, me kena itekivu, e dina niu sa vakamacalataka mai vakawasoma, ni itovo ni bula na mate, ka veiganiti kei na yago malumalumu oqo, ka me laki vuca tale e na kena sa takali mai na yago na yalo. Ke a sega oqori, e na tawamudu tale ga na yago oqo, e na gauna e rau veikalikali kina kei na yalo, ka sega ni vuca rawa, e na kena sa biuta mai na yalo (DBY, 368).

Sa isevu ni tucake tale o Jisu Karisito.

E isevu ni veivakaturi cake o Jisu mai na luvena vakayago na Kalou, me vaka o ni sa kila rawa tu. A sega tale ni dua mai na gauna e liu e vakaturicake mai na mate, me oka kina o Inoke, Ilaija, o Mosese, se dua tale ka sa bula oti e vuravura, se vakaevei sara na uasivi ni nona bula eke, me yacova sara ni sa laki vakayadrati na yago i Jisu Karisito e na ibulubulu mai vua na agilosi. Ni sa i koya sara ga na imatai ni mate ka vakaturicake tale. Sa i koya ga na iTaukei ni tucake tale—na imatai ni tamata ka a bula tale e vuravura, ni sa vakaivotavota e na lagilagi ni veivakaturicake tale (DBY, 374).

E sega ni veivakurabuitaki vua na kena yaco. Ni sa tu ga e na qeteqete ni ligana na lewa me baleta na bula kei na mate; e tu vua na lewa me vakadavora na yagona e na ibulubulu, ka tu tale ga vua na lewa me tucake kina mai na mate. Oqo na ka e a mai tukuna, ka dodonu me da dau vakabauta kevaka eda vakabauta na itukutuku me baleta na iVakabula, kei na nodra vosa na i Apositolo, me vaka e volai tu e na Veiyalayalati Vou. E tu ga vei Jisu na lewa oqo, me lewai koya tiko ga; a solia mai vua na Tamada; me vakaiyautaki kina, ka sa tu ga vua na lewa me davo sobu kina e na ibulubulu, ka qai tucake tale mai na mate (DBY, 340–41).

Na dra ka vakadavea mai na Ulunivanua o Kalivari, e a sega ni curu lesu tale i yagona. E a sovaraki mai vua, ka laki sosomitaki na dra oqori e na dua tale na vunika, e na nona vakaturicake tale. E na vakakina vei ira na tamata yadua ka na vakaivotavota e na tucake tale; e na sega ni vakaturicake mai na dra e na yago, ka nakiti me rawa ga kina na bula e na yavu ni bula oqo. Ia ni sa laki waicala oqori, eda sa na qai rawata tale na yagoda e na kaukaua ni tucake tale, ka da vakatoka tu oqo me vu ni bula ni yagoda, ka vakaikuritaki mai na kakana eda kania kei na wai eda gunuva, e na qai sosomitaki e na dua tale na vunika; ni na sega ni laki vakaivotavota e na Matanitu ni Kalou na lewe kei na dra [raica na 1 Korinica 15:50] (DBY, 374).

E na vakarautaki keda na noda yalodina, me da laki vakaturicake kina e na lagilagi, me cokotivata tale na yago kei na yalo.

Sa vakatakila mai na Kosipeli ni bula, me da vakabulai kina, ki na tamata yadua ka na ciqoma ni da mai tu vakawawa ga e na vuravura oqo, me da mai bula kina vakalekaleka, ka sotava kina na veivakatovolei. Na kena ivakarau kei na kena inaki e baleta wale ga na veisiga e vica wale, ni da a buli mai me da bula me tawamudu. Era na sega ni raisivita na veika ni vuravura oqo o ira na tamata ivalavala ca. Ia eda sa kila vinaka tu ni na taluva mai vei keda na yago ka tu vei keda oqo, eda sa na qai vakarau kina me da tokara kina na yagoda vakatukatuka—ni da biuta tani mai na yago oqo, eda na tokara kina na yagoda vakatukatuka [raica na Alama 11:43–44]. E na lesu tale na yago oqo ki na kuvu ni qele, ia e noda yavu ni vakanuinui kei na vakabauta ni da na taukena tale na yago oqo mai na kena veivunika—ni na vakasukai tale vei keda na ivakarau ni bula eda sa donuya tiko oqo, ia ke da na yalodina tiko ki na yavu ni [kosipeli] bula sautu, eda sa na cokonaki kina me da bula tiko ga me tawamudu (DBY, 372).

Ni sa biuta na yagoda na yalo, e na sega tale ni vakayago vakaoqo e na vuravura ni yalo, me yacova sara na gauna sa vakarautaka tu na Turaga, e na nona lewa, me ra vakaturicake kina na mate [raica na V&V 93:33–34]. Ni sa na uvuca na nona davui o koya na agilosi ka taukena tu na idola ni tucake tale, sa na cokotivata tale na veitikiniyagoda yadudua, ke da dau vakarokorokotaka mai, ke ra duitutu sara beka, e na boto ni wasaliwa, ka tu tale e dua na tikina i na vualiku, ka dua tale i natuicake, ka dua tale e na muaira, era sa na vakaduavatataki tale e na gauna lekaleka sara, me vaka ga na sauriva ni mata, me qai tawana tale na yaloda. Eda sa na qai vakarautaki kina me da laki vakaitikotiko kei Tamada kei na Luvena, ka na sega ni da rawata mada, ke sega ni yaco e liu na veika oqo. E sega ni laki vakaitikotiko kei Tamada kei na Luvena na Yaloda e na gauna e veikalikali mai kina kei na yagoda, ni ra na laki tiko mada e na vuravura ni Yalo, ni sa vakarautaki tu kina na tikina me nodra. O ira ka dau doka na yagodra qele, ka dau lomana ka vakabauti Jisu Karisito na Turaga, me ra na luvata tani mada na yagodra vakatamata oqo, me ra qai tokara rawa kina na yagodra vakatukatuka. Me veisautaka rawa kina na yago oqo, me vakarautaki keda kina ki na noda laki bula e muri e na lagilagi nei Tamada (DBY, 372).

Ni rau sa laki veikalikali e na mate na yagoda kei na yaloda, na ka vakavuravura cava beka eda na laki rawata taumada? Na yagoda; oqori ga na imatai ni ka e gadreva vakalevu tu na yaloda, ni da sa kalawaca yani na ibulubulu. Me da laki rawata taumada na yagoda. Na yalona [na turaga se marama yalododonu] sa na rawa tu na yagona, ni sa na vakamalumalumutaki tu na yagona e na veitikina yadua ni yavu vakalou ka sa teivaka mai vua na Kalou. Ni sa savasava ka talei dina sara na yalo oqori, ka na lesu tale vua na Kalou e na savasava kei na lagilagi, me laki vakaitikotiko e na vuravura ni yalo e na savasava kei na lagilagi, ia, e na dua na gauna tale i muri, sa na qai soli vua me lesu tale ka laki vakaitikotiko tale e yagona. O [Jisu Karisito] ga, ka taukena tu na idola ni tucake tale, ka sa sotava tale ga na veika dredre oqori, e na qai lesi me vakaturacake na yagoda, ka sa na waraka kina na yaloda me laki curuma tale na yago[da]. Ia, ni da sa cokonaki vinaka me da laki taukena tale na yagoda, sa na qai vakavatukanataki kina na veika vakalou ka tu vua na tamata. Ni na mate wale ga na yago; sa bula tu ga na yalo (DBY, 373).

Eda sa mai vakarautaki tu eke me da buluti ira na wekada era sa mate me vaka na ivakarau ka sa virikotori kina e na Matabete. Ia, e so vei ira na wekada era dau laki bale mate tu e loma ni wasabula; era na sega ni maroroi rawa kina e na ibulubulu, ka ra na ologi beka ga e na laca ka luvuci yani i wai; ka na rairai tiko sara e na loma ni qio e na loma ga ni rua na miniti i muri, ia e na duri cake ga mai e na gauna ni tucake tale, ka vakaivotavota tale ga e na lagilagi taucoko ka dodonu me nodra, me ra vakaisulutaki tale na yago talei ka nodra na Yalododonu era sa vakaturicake tale mai na mate, me vaka ga era a maroroi e na ibulubulu, e na kisinimate koula se siliva, e na ibulubulu ka sa vakarautaki tu me baleti ira na mate (DBY, 373–74).

E na sega ni laki rawa e dua na nona iukuuku vakasilesitieli e na matanitu silesitieli, me yacova ni sa vakaturicake tale na yagona mai na mate (DBY, 375).

Na iyau talei duadua ga ka rawa ni daru rawata e na gauna oqo, o iko kei au, na nodaru vakadeitaka rawa oqo na nodaru sa na laki vakaturicake tale e na lagilagi (DBY, 372).

Me iUlutaga ni Vuli

E duidui sara na marau vakavuravura, mai na “marau, lagilagi kei na vakacegu kei na talei ni bula” ka vakanadakui kina na bula e vuravura oqo, e na yalovakacegu kei na sautu.

E dina ga ni ka mosimosi sara na nona sa takali mai na keda maliwa e dua na wekada voleka, na cava beka na vuna e dodonu kina me da marau ga, ka kune vakacegu mai na nodra mate?
Na cava beka e a vakasalataka o Peresitedi Young me baleta na noda bula vakatovotovo tiko oqo e vuravura? A vunautaka tale ga ni dodonu me da dau bula e na kena ivakarau dodonu, “me rawa ni ra na laki marautaka vakalevu o ira na italai savasava era na vakadikeva.” Me da vakataudeitaki beka vakaevei, ni na ka marautaki vakalevu sara vei keda na Siga ni Veilewai Levu?

Ni gauna eda sa na mate kina, sa na veikalikali na yalo mai na yagoda, me lesu tale i na qele na yagoda, ka lesu tale na yalo ki na vuravura ni yalo.

Na cava beka na vuna e okati kina na mate me “itovo ni bula”?
Na cava beka e dau vunautaka o Peresitedi Young me baleta na yago, ni rau sa veikalikali kei na yalo?

Sa isevu ni tucake tale o Jisu Karisito.

Na cava beka e vukea na nona vakaturicake tale o Jisu?
Na cava beka e tukuni vei keda me baleti ira era sa vakaturicake mai na mate, mai na nona Tucake Tale na Karisito? E veisautaki vakaevei na yagoda e na noda vakaturicake tale?

E na vakarautaki keda na noda yalodina, me da laki vakaturicake kina e na lagilagi, me cokotivata tale na yago kei na yalo.

Me vaka sa vakamacala kina o Peresitedi Young, e na yaco vakaevei na veivakaturicake tale mai na mate? (Raica tale ga na Alama 11:43; Filipai 3:21.)
Na cava beka na ibalebale ni noda dau doka na yagoda qele?
Na cava na vuna e okati kina na “iyau talei duadua ga ka rawa ni [da] rawata e na gauna oqo” na “nodaru sa na laki vakaturicake tale e na lagilagi”?