Wase 31: Mo Bula Manini, Dausasaga, ka Qarava Vinaka na Nomu Bula

Wase 31

Mo Bula Manini, Dausasaga, ka Qarava Vinaka na Nomu Bula

Sa kila tu o Peresitedi Brigham Young na bibi ni cakacaka vakaukaua, me ra cokonaki kina na Yalododonu e na kena tara na matanitu ni Kalou. A vakaroti ira kina na vuda vakalotu, “Me isosomi ni noda qara tiko ga na veika me vukei keda kina na Turaga, me da vakasamataka mada na ka e rawa ni da cakava ga me baleti keda” (DBY, 293). Rau dau cakacaka vata o Peresitedi Heber C. Kimball, na itokani vinaka, ka iVukevuke tale ga nei Peresitedi Young e na Mataveiliutaki Taumada, me vica vata na siga e na veiwere, ka qai dau vakananuma tale e muri na veigauna oqori e na nona kaya: “Keirau dau buno vata kei [Baraca] Brigham, ka dau cakacaka vata e veigauna, me keirau ya limasagavulu na sede na keirau isau e na dua na siga, ka keirau qai laki vaqara ga na vanua me keirau vakaitikotiko kina, keirau laki ya vitusagavulu-kalima na sede ke keirau laki musu co me kena na manumanu; keirau dau tekivu mai na matakacaca ka qai laki cegu ni sa laki dromu tale na siga, ka dau laki cegu sara e na ciwa na kaloko ke kilai ni na tau na uca. Keirau dau soqona vata na veicovuata ka laki vesuka e na kena ivau, me keirau saumi kina e na tolusagavulu-kalima na lita na witi, keirau dau kolabuka, ni yaco tu i toloi keirau na ucacevata, ka tinikawalu na sede dua na ibinibini levu, ka qai saumi ga e na sila, me vitusagavulu-kalima na sede na kena ivotavota ka rauta ni tolusagavulu na lita na kena levu” (DNW, 30 Julai 1862). A qai dau veivakadreti o Peresitedi Young me baleta na bibi ni bula manini, na ligakaukaua, kei na gugumatua, e na nona kaya: “O ira era na laki vakaivotavota e na bula tawamudu, era dau vakayacora sara na veivosa e so era rogoca” (DBY, 290).

iVakavuvuli i Brigham Young

Me da dau cakacaka vagumatua ka vakayagataka vakavinaka na noda gauna, e na noda veiqaravi ki na noda matavuvale, kei na kena taracake na matanitu ni Kalou.

Na cava beka na noda iyau? Na noda gauna. Mo lewa ga na kena vakayagataki. Sa soli vei iko na gauna; ia ke vakayagataki vakavinaka e na kena vakatetei na dina e vuravura, sa na wili tiko vei iko, o sa na vakalougatataki kina; ia ke da vakasabusabutaka na noda gauna, eda na laki tarogi tale kina e muri (DBY, 290).

Eda na laki vakamacalataka na veisiga eda vakasabusabutaka eke (DBY, 290).

Mai na gauna sa votai tu vua na tamata e vuravura oqo, e sega sara ni vinakati me vakatawayagataki se vakasabusabutaki. Ni da sa mai cegu vakalekaleka, se gade voli, e sega ni nakiti me da vakawelewetaka tale e dua na miniti, ni dodonu me da dau saga vagumatua tiko e na veiminiti ni veisiga me da vakavinakataka na noda vakasama, me vakaikuritaki vakalevu sara na noda vakabauta na Kosipeli savasava, e na loloma vakarisito, e na dauvosota, e na caka vinaka, me da tubucake tiko ga e na ivakavuvuli dina, me vaka sa parofisaitaki ka volai tu (DBY, 290).

E sega ni sala vata kei na ivakavuvuli kei lomalagi na vakawelewele kei na vakasabusabu. Mo vakamaninitaka na veika kece sara o rawata, me rawa ni o qai vukei ira kina na nomu itokani kei ira na kemu meca (DBY, 290).

E lavaki na cakacaka dredre e vuqa e na kena taracake o Saioni [raica na 2 Nifai 5:17]. E veivakalaboci wale ga ke da tukuna wale tiko ga na kena taracake o Saioni, ka sega ni ogataka; ni vinakati kina na noda sasaga e na veiwasewase yadudua sara ni mataisoqosoqo eda dui lewena, se ogaoga e na vakasama, se me bunotaki, se me ogataki vakayalo, oqori duadua ga na sala me taracake kina na Matanitu ni Kalou (DBY, 291).

E sega li ni lavaki e na kena taracake na Matanitu ni Kalou e vuravura me da ogataka tiko ga e veigauna? (DBY, 290–91).

Oqo ga na iyau levu duadua ka da vakaivotavota kina—na sala me da vagolea vakadodonu kina na noda sasaga, me vakayagataki sara vakavuku na veiaua taucoko ni noda bula, e na vukudra na watida kei na wekada (DBY, 290).

Me da laki kelia mai ulunivanua na koula, me mai ta kina na sala, ke da na vinakata me da butuka na sala ka ta e na koula. Era sa dau butuka tiko na veisalatu koula o ira na agilosi, ka teivaki tiko e loma ni nodra parataisi na kau ni bula, ia era a laki rawata mai na koula me mai biu kina. Ni ta na noda veisala e na koula, e dodonu me da laki saga mai vakaikeda, ka mai taya kina na gaunisala. Kevaka eda na laki marautaki Saioni, e na kena totoka kei na iukuuku, eda na rawata na kena marau oqori ni da a taracake mai. Kevaka eda na laki marautaka na Saioni ka da namaka tiko oqo, eda na rawata oqori e na noda sa laki vueta cake, ka cokonaka vakavinaka. Ke da sega ni vakacavara na cakacaka oqori o keda na tamata vakayadua, eda na tara kina na kena yavu me baleti ira na luveda, kei ira na nodra kawa na luveda, me vaka e a qarava mai o Atama. Ke da vinakata me da laki vakabulai e na waqa, me vaka na nodratou vakabulai o Noa kei na nona vuvale, e na rawa ga oqori mai na noda a taracake o keda. Ke vunautaki na Kosipeli ki na veimatanitu, e vakavu oqori mai na nodra vunautaka na iTalatala Qase kei Isireli … ki na veiyasa i vuravura kece ga (DBY, 291).

E sega ni tukuna vei au na noqu vakabauta ni na vakarautaka vei keda na Turaga na vuaka vavi, na madrai vakabata, kei na veika tale e so; e na cokonaki keda ga me da qai laki rawa ni tatamusuki e na veicovuata, me da laki betia na veta ni vuata kei vuravura, ni da laki tara na noda veivale, me da laki rawata mai na tiki ni kau me ta kina e dua na kisi, ia ni sa yaco mai na gauna ni tatamusuki, me da laki qoqona mai na soreniwiti se na sila, sa kena inaki me da mai maninitaka—me maroroi tiko ga na witi me yacova ni sa tawa tiko na noda lololo e na kakana ni dua, rua, lima, se vitu na yabaki, me yacova ni sa maroroi tu vakalevu na veimataqali sila, me ka ni bula vei ira na tamata kece ga, ka ra maroroya mai na wekada me buli kina na kedra madrai, kei ira tale ga era na mai vakaruru e na vanua oqo (DBY, 291–92).

Sa vakaiyautaki vuravura vakalevu na Turaga, me baleti keda.

Meu kaya ga vei kemuni na taciqu kei na ganequ vakalotu, me da vakasoqona mai na veivunika ka tu vakayauyau tu oqo me baleta na noda dui bula, ka vukica me noda gagadre ni bula kei na marau [raica naV&V 59:18–20]. Me kua ni da veilecayaki tiko, kei ira era lecaika tu, ia me da dusimaka ga vei ira na lecaika na sala me ra kunea kina na vuku (DBY, 294).

Sa qarava mai na Turaga na nona itavi; sa vakarautaka kina vei kemuni na veivunika ni witi, na lewe ni manumanu, na vauvau, na vutikanisipi, na silika, na veivuanikau, kei na veika kece ga me taracake kina, me ukutaki, ka vakalagilagi kina na Saioni ni gauna e muri oqo, ka sa noda itavi ga me da moica na veivunika oqo me rawa kina na veika eda gadreva, se vinakati me baleti keda, me vaka eda sa mai kila rawa edaidai, ka vakavukui kina mai lagi e na vuku ni noda yalodina. E na sala oqo e na vakalesui Saioni kina na Turaga i vuravura oqo, ka na sega ni kitaka e na dua tale na sala (DBY, 294).

Sa noda itavi ga me da qacoya tiko ga ka gumatuataka tiko na veika kece sara ni noda bula, me taracake kina na Nona Matanitu, me da tataqomaki kina mai vei ira na keda meca, me da lewa vakavinaka sara na noda bula, ka kitaka na veika kece sara e rawa ni tauyavutaki kina e vuravura na Matanitu ni Kalou, me da vakasavasavataki, ka vakarautaki kina, me da laki bula e na Nona iserau (DBY, 294–95).

Ni bulabula vinaka tu na qele e na veibuca oqo, ka tu vei keda na itei me teivaki ki na qele, e sega ni dodonu tale me da kerea vua na Kalou me mai vakani keda, se me surevaka tiko ga vei keda na kakana me da kania. E na sega ni vakayacora vakakina o Koya, au na sega tale ga ni vakayacora vakakina o au, ke a o au na Turaga. E rawa ni da na vakani keda ga eke; ia ke mani yaco e na dua na gauna me da leqa kina e na kakana, sa na qai kena gauna me vakani keda na Turaga e na mana (DBY, 294).

Era dau veiqati na tamata, era veiba, ka saga na veisala e so ni veileti, me ra kocova kina na iyau vakavuravura e vuqa. … Ia, vakacava mada ke da saga e na noda igu kece sara me da kelia mai loma ni qele, na kena iyau e vuqa, kei na kena e tu e delai vuravura, me da mai vakayagataka, eda leqa tale beka e na so na ka? Eda na sega ni leqa, e tu vakalevu na veika kece sara, e na rauti keda vinaka, ka vo tale. Me laurai ga na kena sa tu rawa oqo, o kemuni na Yalododonu e na Gauna Oqo, kei kemuni ka sega ni se okati me Yalododonu e na Gauna Oqo, ni raica mada na veika sa tu oqo e vuravura. Au nuitaka ka dau masulaki kemuni, o kemuni e na taudaku ni Lotu, ka vakakina vei kemuni ka dau okati kemuni mo ni Yalododonu e na Gauna Oqo, ni da na mai sotava vakalekaleka eke na sautu, me da tara kina na lovonibukawaqa, me da dolava na veiqara ni veivatu talei, me da taya na noda sala ni sitima, me cukiraki na qele, me da goleva ka sega ni vakataotaki tale e na veivoli; me da rawa ni qarava kina na bisinisi ni kena ukutaki o vuravura (DBY, 295).

Me da maninitaka na iyau vakavuravura sa vakarautaka vei keda na Turaga.

E sega ni vakaiyautaki e dua na matanitu se vanua mai na veika e tawa tu e na loma ni nodra valeniyau, mai na bulabula ga ni kena qele, kei na nodra ligakaukaua na lewena (DBY, 297).

E tina ni iyau ga ni vuravura oqo na gauna, kei na nodra gugumatua o ira na lewena, ka da sa vakavinavinakataka ga vua na Kalou e na vuku ni kena vakayagataki na gauna me yaga vei keda, ka na tarogi keda e na vuku ni noda vakayacora vakadodonu na tikina oqori; e na sega ni vinakata wale ga me da vakalesuya tale vua na itukutuku ni noda mai vakayagataka vakavinaka na maqosa oqo; ni na sega ni lavaka wale ga o koya me da vakalesuya vua na itukutuku ni veika eda mai cakava, e na vakadikevi vakakina na veivosa eda cavuta, kei na vakanananu ni lomada (DBY, 301).

Na yavu vakailavo ga e tu e vuravura oqo me baleti ira na tagane kei na yalewa cakacaka, na nodra sui kei na nave. … E cakacakataki na kena tara na veivalenilotu, na valetabu, na vale ni veilewai, na veivale talei e so ni sere kei na veivalenivuli vivinaka; e cakacakataki na nodra tuberi na luveda, me ra kila kina na veitabanivuli e so, me ra kila vinaka kina na nodra dui vosa kei na veivosa tale e so, e na veitiki ni kila ka e rawa ni ra vuli kina na luve ni tamata (DBY, 300).

Kua ni vakasabusabutaka e dua na ka. Dau bulamanini, maroroya na ka kece ga, ka qai kerei ira na wekamu me ra veivuke e na nomu kania na veika e so o sa rawata mai (DBY, 292).

Mo raica vakavinaka na ka kece ga, dau tomika na veika kece ga e lutu tu, me kua sara ni vakasabusabutaki e dua na ka (DBY, 292).

Kua ni nanuma, ni tu vakalevu na kemuni kakana, me ra vakasabusabutaka kina na luvemuni e dua na kubu, se meme ni madrai. Ke dua vei keda e tu vua e milioni vakamilioni na ivakarau witi kei na sila, e sega ni se vutuniyau o koya, me … taviraka kina e dua na kena ivakarau ki na buka me kama; me laukana mada na kakana taucoko mai na dua na ka bula, me dewa tale kina i na qele, me yaco kina na inaki ka teivaki mai kina. Mo daunanuma, kua sara ni vakasabusabutaka e dua na ka, dau maroroya vinaka na veika kece ga (DBY, 292).

Ni na yaga sara vei keda na noda dau vakamareqeta na isolisoli ni Kalou vei keda; ia keda goleva na kena veibasai, eda sa na tagutuva kina na kaukaua kei na lagilagi sa nakita mai na Kalou me noda. Mai na noda lewa maqosa, na noda manini, kei na vakatulewa me vaka sa vakalougatataki keda kina na Kalou, eda sa dau maroroya kina na keda kakana, na noda qele ni manumanu… noda veivale kei na qele, ka vakaikuritaka tiko ga, me da kaukaua ka rogo vakalevu kina, o keda na tamata yadua, ka me rogo vakakina na Matanitu raraba ni Kalou (DBY, 292).

Mo maninitaka sara na ilavo o dau rawata mo bula rawa kina, me ratou bula marau ka vakacegu tiko kina na nomu vuvale, ka dau maroroya na kena vovo (DBY, 292).

Ke o via vutuniyau, mo maroroya ga na veika o rawata. E rawa tale ga ni rawailavo na tamata yalowai; ia e na dau maroroilavo ga na yalomatua, ka dau vakayagataka me yaga ki na nona bula (DBY, 292).

Me da tara na veivale totoka kei na yavu ni itikotiko uasivi.

Me ra tara na noda lewenilotu na veivale vivinaka, me ra teivaka na veivaini kei na veimolimoli vivinaka, me ta na sala vinaka, me tara na veikorokoro totoka, ka tu kina na veika vivinaka me baleti ira na lewe ni vanua, na veisala rairai totoka ka viribai tu e na veivunikau vakarurugu, na veimataniwai tovure, na veiuciwai karisitala sese, kei na veikauvuata, kei na veikautei, kei na veikau se, ka na tubu ka bula vinaka e na draki eda sa mai donuya oqo, me parataisi sara na noda itikotiko e na veiulunivanua, me vakavinavinaka kina na yaloda vua na Kalou nei Josefa, ka dau vakasinaiti kina e na yalovakavinavinaka, me iwewe kina ni gusuda, “me kakua ni yaco na noqu lewa, me yaco ga na nomuni lewa, kemuni Tamaqu” (DBY, 302).

Mo ni ukutaka na nomuni veilomanibai, na nomuni veivale, kei na nomuni veiwere; mo ni ukutaka na nomuni koro. Me da marautaka, ka me da rawa ka kina vakalevu. E vuravura vinaka na vuravura oqo, e vinaka na veivunika ke da vakayagataka me yaga vei keda, e na lomadina kei na yalododonu. Me da marautaka ga, ka qai saga e na noda igu, me da bulabula vinaka tiko ga, me dau vakaiyau, ka totoka tu na keda irairai, me da taqomaki keda tiko vakavinaka e na veisala e so, me veiraurau kina na noda bula me vaka sa lewai mai, ka dau gugumatua e na veika vinaka kece ga (DBY, 302).

E na vakaikuritaki tale ga na noda iyau mai na veika vinaka kece eda sa rawata, ka sega wale ga ni baleta na noda tiko vinaka (DBY, 302).

E dodonu vei kemuni na marama vakawati, mo ni kerei watimuni me tea na kau rurugu kei na veikau vuata, me ukutaki kina na nomuni lomanibai e na veisenikau sala kei na veikau se, e na nomuni veiyasa ni vale; ia ke ra sa rui osooso vakalevu na watimuni, mo ni qara ga vakaikemuni, ka qai mai tea kina. Era na rairai kaya beka e so, “Sobo, e vakacevaceva wale ga na noqu vale, ka sega ni veiraurau meu teivaka kina.” Io; e kilikili sara me vakayacori vakakina. Mo qusia vinaka ka qai palasitataka tale, ka qai kauta mai na veisenikau sala me mai vakaruguta tu na nomu katuba, ni ra kaya kina o ira era lakosivita mai, “Sa dua na vale vakacevaceva vinaka!” Oqori sara ga na kena gauna, au nuitaka ga mo ni dau vakayacora na veika e dodonu mo ni dau goleva (DBY, 200).

Mo ni tara na veivale vivinaka; mo ni vulica na taravale; mo ni mekeniki se daunibisinisi vinaka, mo ni kila rawa kina na itaratara ni vale, na valeniyaya, na lololo, kei na kena teivaki e dua na were, se na susu manumanu, ka qai dau maroroya vinaka e na nomuni tara na kena vale kei na veika kece sara e vinakati kina, me bula rawa tiko me yacova ni sa laki dromu tale na vulaililiwa; mo ni vakadinadinataka kina ni sa dodonu ga me nomuni na veika vakaiyau sa vakarautaki tu e na bucabuca oqo, kei na veika e qai vakatakava mai (DBY, 302).

Au sa curuma na veivale e so ka sega ni vakarautaki kina na veika me baleti ira na marama itaukei ni vale, e sega ni bau dua na vata me ra vakatavara kina na yalewa na itakitaki ni wai, me ra qai dau biuta tu ga e na dela ni qele, ia era na vakawadrava tiko na watidra e na veiyabaki, ka sega sara ni bau nanuma me caka e dua na vata, me dau tava kina na itakitaki ni wai. E rawa ni ra cakava, era vakaweleweletaka ga (DBY, 198–99).

Me ra vakavinakataka na nodra valenikuro o ira na tagane vakawati, kei na imamaroroi ni iyaya, kei na nona rumu ni moce, me vinaka vei iratou na nona vuvale, me dau vakavinakataka na nona lomanibai, na sala e dau muria, me totoka cake kina na nomuni itikotiko kei na kena sauka, me caka vinaka kina na kena sala ka teivaki na veikau rurugu (DBY, 198).

Me da rawata vinaka na noda bula vakavuvale kei na noda bula vakaitikotiko.

Keitou vinakata e na gauna oqo mo ni dau rawata vakavinaka na veika e baleti kemuni [raica na V&V 78:14]. Mo ni rogoca sara na veika oqo o kemuni na kawa i Isireli! ni rogoca tale ga na wekadra, nodra itokani, kei kemuni na kedra meca, na veika oqo sa lavaka na Turaga vei ira na nona tamata (DBY, 293).

Oi kemuni na Yalododonu e na Gauna Oqo, mo ni raica na veisala e so mo ni qarava rawa kina na nomuni bula. Ke o ni sega ni rawata rawa nikua na veika o ni namaka kina, ni tovolea mo ni vakuai kemuni e na veika e so o ni na sega ni volia se sauma rawa; ka vakamalumalumutaka ga na yalomuni mo ni bula ga e na veika e so o ni rawata rawa (DBY, 293).

O cei beka e dodonu me vakacaucautaki? O ira ga era rawata vakavinaka na veika e baleti ira, se o ira ka ra dau vakararavi ga ki na loloma levu ni Turaga, me ra vukei kina? E sega ni veisotari ke da namaka vua na Turaga me solia vei keda na veivuata e so, ni da se sega ni tea mai na kauvuata; se me da vakabulai mai na viakana ni da se sega ni siviyara ka kakaburaki; me da qai cikeva kina vua na Turaga me da vakabulai mai na veika e so eda leqa kina, se me da kerei koya me vakabulai keda mai na noda lialia, talaidredre, se na noda vakasabusabu (DBY, 293).

Me vakavatukanataka na noda vakabauta na Kalou, ni daru saga vagumatua sara na veika me baleta na nodaru bula, me levei kina na leqa; ia na itikotiko ka ra dau cakacaka vata na lewena, e lomadra kei na ligadra, me ra qarava rawa kina na veika e so oqo, ni na vakavatukanataki kina na veika era saga (DBY, 293).

Kemuni na taciqu vakalotu, mo ni dau vuli. Sa dina ga ni sa vuqa sara na ka o ni sa vulica rawa mai; ia mo ni vakuria tiko ga na nomuni vuli; mo ni vulica mo ni rawata vinaka na veika me baleta na nomuni dui bula; mo ni maroroya ki na nomuni lololo na witi kei na valawa, mo ni vakarautaka ki na siga ni lauqa levu. Kemuni na marama wekada, ni kakua ni kerea vei watimuni me volitaka na iotioti ni ivakarau witi, me voli kina mai na sitoa na ka o gadreva tiko, mo ni vukei watimuni ga me maroroi ki na lololo na veika me baleti kemuni, me vakarautaki kina na lauqa levu mai muri, me sa tiko rawa ga vei kemuni na kakana ni dua se rua na yabaki (DBY, 293).

Ni kakua sara ni dau taroga na ka me vakarautaka vei keda na Turaga, me da vaqaqa ga se cava e rawa ni da rawata vakaikeda (DBY, 293).

Na veika kece sara era sa rawata mai na Yalododonu e na Gauna Oqo, era sa rawata mai na sasaga dredre, kei na yalodina ka sega ni guce rawa (DBY, 294).

Me iUlutaga ni Vuli

Me da dau cakacaka vagumatua ka vakayagataka vakavinaka na noda gauna, e na noda veiqaravi ki na noda matavuvale, kei na kena taracake na matanitu ni Kalou.

Na cava beka na ivakasala nei Peresitedi Young, me baleta na kena taurivaki na “veiminiti ni veisiga”? (Raica tale ga na Alama 34:33.) Na cava beka na vuna e isolisoli talei kina na gauna? Na ivakavuvuli cava beka e vakavuna mo dau taurivaka kina vakavinaka na nomu gauna?
Na cava na vuna e sega ni duavata kina kei na “ivakavuvuli kei lomalagi” na vakawelewele kei na vakasabusabu? (Raica tale ga na Vunau kei na Veiyalayalati 42:42.)
Na cava na vuna e lavaki kina na veimataqali cakacaka kece ga e na kena taracake o Saioni? E na veisala cava soti beka me da ogaoga kina e na vakasama, e na buno ni yadreda, kei na veika vakayalo, me da tokona kina na kena taracake o Saioni?

Sa vakaiyautaki vuravura vakalevu na Turaga, me baleti keda.

E na “vakalesui Saioni [vakaevei] na Turaga i vuravura oqo”? E na veisala cava soti beka, e rawa ni da vukea kina na kena taracake o Saioni?
A vakamacalataka o Peresitedi Young, ni rawa ni keli “mai loma ni qele, na kena iyau e vuqa, kei na kena e tu e delai vuravura, me da mai vakayagataka.” Na cava beka ga era dravudravua tu ga kina e lewe vuqa e vuravura oqo? Na cava beka e rawa ni da qarava e na noda veivuvale, e na isoqosoqo ni Lotu, kei na noda veikorokoro, me da veivotai kina e na veika e so sa vakalougatataki keda kina na Turaga? (Raica tale ga na Jekope 2:18–19; V&V 104:14–18.)

Me da maninitaka na iyau vakavuravura sa vakarautaka vei keda na Turaga.

Na cava na ibalebale ni kena tukuni vei keda me da “kua sara ni vakasabusabutaka e dua na ka, dau maroroya vinaka na veika kece ga”? Me da vakadadamuria beka vakaevei na ivakasala nei Peresitedi Young me baleta na iulutaga oqo, me tawa tiko ga na noda lololo, ka cokonaki keda vinaka tiko ki na leqa vakasauri eda na sotava e na gauna mai muri?
Eda na “tagutuva [beka vakacava] na kaukaua kei na lagilagi sa nakita mai na Kalou me noda”?
Me da vakadadamuria beka vakaevei na ivakasala nei Peresitedi Young, ni “Rawa tale ga ni rawailavo na tamata yalowai; ia e na dau maroroilavo ga na yalomatua”?

Me da tara na veivale totoka kei na yavu ni itikotiko uasivi.

Na cava beka e vakamacalataka o Peresitedi Young ni dodonu me ra vakayacora na Yalododonu, me rawa ni “parataisi [kina] na nod[r]a itikotiko e na veiulunivanua, me [vuabale kina e na] vakavinavinaka [na yalodra]”? Na cava beka me da cakava, me cokaidrauna cake kina na noda veivale kei na veikoro? (Raica tale ga na V&V 82:14.) E yaga beka vakacava na itikotiko savasava, ki na noda bula vakayago, kei na bula vakayalo?

Me da rawata vinaka na noda bula vakavuvale kei na noda bula vakaitikotiko.

Na cava beka e vakarota o Peresitedi Young, me katoa kina vakalevu na noda bula? Na cava beka na vuna e dau dredre kina e na so na gauna me vakamuri na ivakasala oqori? Na sala cava soti beka e rawa ni da cokonaka kina vakavinaka na noda bula?
Railesuva tale mada na ivakasala nei Peresitedi Young me baleta na noda dau qarava na noda bula, ka qai raica na veika o sa qarava mai, mo qaqarauni kina ki na nodratou bula na nomu vuvale e na gauna ni leqa. Mo vatavatairalagotaka na sala mo dou tiko vinaka kina vakavuvale, se tiko vinaka kina vakaitikotiko.
E vakavatukanataki beka vakacava na noda vakabauta, mai na noda cakacaka vagumatua? E veiwekani beka vakacava, ni veidutaitaki na noda qarava vinaka na noda bula, kei na noda vakanuinui ga ki na nona lomavinaka na Karisito?
E cikevi ira na Yalododonu o Peresitedi Young, me ra dau qarava vinaka na nodra bula, ka vakaroti ira tale ga me ra dau duavata e na nodra itikotiko. E duavata beka vakacava na noda sasaga me da qarava vakavinaka na noda bula, kei na kena taracake tiko na noda itikotiko? O sa bau tokoni beka vakaevei mai na nodra veivuke na wekamu, mo qarava vinaka kina na nomu bula?