Veivutuni kei na Papitaiso

A papitaiso o Brigham Young e na dua na siga liliwa, ni vula o Epereli ni yabaki 1832, ni qeqera tu na ucacevata, e na batiniwai e yasa ni nona volau, mai vei Eleazer Miller, ka se qai vula-va ga na nona lewenilotu. Me qai vakamacalataka e muri, “Au sotava kina na yalomalumalumu, ka vaka na yalodra na gone, ka vakadinadinataka vei au ni sa bokoci na noqu ivalavala ca” (MHBY-1, 2–3). A vunautaka ni sega e na wai na “kaukaua me savai kina na ivalavala ca,” (DBY, 159) ni sa qai yaga ga na papitaiso ni qarava e dua ka sa tu vua na kena lewa, ka ra sa lesi kina, ka me muria yani na veivutuni, kei na sasaga e na yalodina me da dau rokova na noda yalayala e na papitaiso.

iVakavuvuli i Brigham Young

Ni da yalomatua cake tiko, sa na levu vakakina na ka eda nuitaki kina, kei na itavi me da qarava.

Eokati me ivalavala ca na noda caka cala, ni da sa kila tu ni rawa ni da caka vinaka, ka na tau kina na kena itotogi dodonu, e na gauna sa lewa na Turaga (DBY, 156).

E dina beka ni sa uasivi sara tu edaidai na noda veiqaravi, e rawa li ni na vinaka cake? E rawa. Ke da caka cala e na dela ni noda lecaika, sa noda itavi me da vakuai keda sara vakadua mai na cala oqori, e na gauna ga eda sa qai kila kina na kena cala (DBY, 156).

Me da vakavatukanataka e na noda bula na yaga ni Veisorovaki, mai na noda sa veivutuni dina.

Keu na vakamavoataka e dua, sa dodonu meu na vakatutusa vua, ka vakadodonutaka na veika au cala kina (DBY, 158).

Au dau vakabauta me da dau doudou ka vosa vakadodonu, ka me da dau yalododonu e na veika me kilai raraba, ka me maroroi ga na veika e dodonu me dau taqomaki. … Me cauraka vei ira na le vuqa na veika e dodonu me ra kila na le vuqa. Ke o cala vei ira e vuqa, mo vakatusa sara vei ira. Ke o cala ki na dua na matavuvale, se dua na koro, mo cabeti ira ka laki vakatutusa vei ira. … Ke o caka cala vua e le dua ga, mo kauti koya vakatikitiki, ka laki vakatutusa ga vua (DBY, 158).

Ni ra veivutuni dina, ka veivutuni e lomadra dina na tamata, ka vakavatukanataka i lagi na nodra sa veivutuni dina, mai na nodra vakamuria na veika era kila ni sa lavaki vei ira e na ivakaro ni Kosipeli, era sa na qai votai kina e na veivakabulai, ka na sega sara ni dua tale na ka e na tarova vei ira na kena yalo vinaka (DBY, 156).

E vakavulici vei keda e na nodra ivakavuvuli na noda qase ni rawa ni vakabulai e na veivutuni e dua ka sa vakayacora mai na ivakarau vakamanumanu ka laba, e na nona sa vakarau me kukuna; me voqa kina e na nona sa kuna na kena tukuni, “Me vakalougatataki kina na Kalou! sa gole o koya i lomalagi, me laki vakaisala kina e na lagilagi, e na nona veivueti o Karisito na Turaga.” Oqori na ka lialia dina. Ni na sega sara ni bau raica na o lailai kei lomalagi o koya qori. Era na masulaka e so, “Sobo keu a bau kosova mada ga na ilati e na bogi au saumaki kina!” Me qai laurai kina na veivakasama lasu e so, kei na nodra dui nanuma, o ira era sa lotu vakarisito tu (DBY, 157).

E cakacaka vakalotu lavaki na papitaiso, me da rawata kina na veivakabulai.

Eda vakabauta taucoko na Yalododonu e na Gauna Oqo, na papitaiso e na veitabadromuci me bokoci kina na noda ivalavala ca, me vaka ratou sa vakadinadina kina na tisaipeli nei Jisu, ka tukuni tale ga e na nona ivakatakila sa solia mai na Turaga e na veisiga e muri oqo. Era savasava vuka sara na gone lalai, ni sega ni ra yalorarawa, ka sega na ivalavala ca me ra veivutunitaka ka biuta tani, ka sega ni namaki kina me ra papitaisotaki, me ivakabokoci ni nodra ivalavala ca. Ke da sa ivalavala ca, sa dodonu me da sa kila rawa na veika vinaka, se na veika ca; e sega ni se kila na gone na veika oqori, ni yalowaitaka sara vakalevu; se bera ni yalomatuataka na vakanananu ki na veika vinaka kei na veika ca; e sega ni yalomatuataka na veivakavulici ni nona itubutubu se qasenivuli, se o koya na bete ka na tukuna na veika dodonu kei na veika cala, kei na veika rerevaki e so; ka na sega ni papitaiso me ivakabokoci ni ivalavala ca e dua na tamata, me yacova ni sa yalomatuataka na veika oqo [raica na Moronai 8] (DBY, 158–59).

E sega sara ni dua na cakacaka vakalotu, ka sa vakataka mai na Kalou e na nona vosa, mai vua na Luvena o Jisu Karisito, se mai na gusuna e dua na nona Parofita, i Apositolo se Dauvunau, me ka wale. Ni sa virikotori na veicakacaka vakalotu, na ivakaro, kei na veika sa lavaki tu, me vakabulai kina na vuvale vakatamata (DBY, 152).

Ke o sa dau ivalavala dodonu mai na gauna o sucu kina ka yacova mai qo, ka se sega ni vakayacora e dua na ivalavala ca se voroka na ivunau, mo papitaiso me vaka sa virikotori mai, me vaka sa vakayacora o Jisu, me vakayacori kina na ivalavala dodonu kece ga. Ke rawa ni o tukuna ni sega na nomu ivalavala ca mo veivutunitaka, mo biuta tani ga na ivakavuvuli lasu e so o dau muria mai, ka qarava na Kalou e na yalodina (DBY, 159).

Era sa na oka e na veiyalayalati vou ka tawamudu na Yalododonu kece ga e na Gauna Oqo, mai na nodra sa curu ki na Lotu oqo. Era sa yalataka kina ni ra sa na sega ni veitokoni, taracake se vakaliuca na nona matanitu na Tevoro, kei na veimatanitu e so ni vuravura oqo. Era oka ki na veiyalayalati vou ka tawamudu, me ra tokona kina na Matanitu ni Kalou, ka sega ni veitokoni ki na dua tale na matanitu. Ni ra bubului kina vakabibi, e na mata i lomalagi kei vuravura; ka ra vakayacora oqori, me ra vakadeitaka kina na nodra rawata na bula tawamudu, ni ra na dau tokona ga na veika dina kei na ivalavala dodonu, ka sega ni tovaka na ivalavala ca kei na ivakavuvuli lasu, me ra taracake tiko na Matanitu ni Kalou, ka sega ni malele ki na veimatanitu vakavuravura (DBY, 160).

Se vakaevei sara beka na noda vunautaka na noda duavata kei na Kalou, kei na nona cakacaka, eda na sega ga ni vakaivotavota e na veivakalougatataki, kei na veisolisoli, ni nona Matanitu, me yacova sara ni da sa lewena. Me da rawata beka vakaevei? Mai na noda veivutunitaka na noda ivalavala ca, ka talairawarawa ki na ivakaro sa lavaki e na nona Kosipeli na Luve ni Kalou, ka sa soli mai vei keda. Era sa lewe vuqa sara era vakabauta na Turaga o Jisu Karisito, ka veivutunitaka na nodra ivalavala ca, ka sa vakadinadinataka vei ira na Yalo Tabu, ni sa dauloloma na Kalou, ni ra sa dau lomani Koya, ka sa dau lomani ira o Koya, ia era se sega ga ni curu ki na nona Matanitu. Ni ra se bera ga ni vakayacora na veika e so e lavaki, ka ra se sega kina ni curuma yani na katuba (DBY, 152–53).

E sega ni tu vei kemuni na kaukaua mo ni dui papitaisotaki kemuni ga, ka sega tale ga ni rawa ni o ni dui vakaturi kemuni cake; ka sega tale ga ni rawa ni o na veipapitaisotaki me bokoci kina na nona ivalavala ca e dua tale, mo papitaisotaki taumada, ka vakatikori iko ki na itutu vakabete oqori mai vua e dua ka tu vua na kena lewa (DBY, 160).

E tu beka e na wai na kaukaua me savai kina na ivalavala ca? E dravusakulukulu sara; ia sa kaya ga na Turaga, “Raica sa tautauvata sara na tabadromuci e wai ka vakamatari cake tale, me vaka era sucu—ke vakayacora e na yalodina, e na savai na nona ivalavala ca.” [Raica na V&V 128:12–13.] E rawa beka ni veisavai na wai wale ga? Sega; e na veisavai wale ga ki na duka ni ivalavala ca na noda dau talairawarawa ki na ivunau ni Kalou (DBY, 159).

Me iUlutaga ni Vuli

Ni da yalomatua cake tiko, sa na levu vakakina na ka eda nuitaki kina, kei na itavi me da qarava.

Na cava beka e vakamacalataka o Peresitedi Young me baleta na ivalavala ca? (Raica tale ga na Jemesa 4:17.)
Na cava beka e vunautaka o Peresitedi Young me baleta na noda itavi, ni da vakaikuritaka tiko na noda kila na ivalavala dodonu, se ivalavala ca? (Raica tale ga na 2 Nifai 9:25–27.)
Me vakaevei beka na noda itovo ni rai me baleta na noda vakavinakataka tiko na noda bula? (Raica tale ga na Alama 34:33.) Na cava beka e vakavulici kina vei keda me baleta na noda vula kila ka, na noda sa nuitaki, kei na itavi me da qarava?

Me da vakavatukanataka e na noda bula na yaga ni Veisorovaki, mai na noda sa veivutuni dina.

Na cava e na yaco mai na noda veivutuni dina? Na cava na vuna, e lavaki kina me tiki ni veivutuni na noda talairawarawa ki na ivakaro ni kosipeli?
Na cava beka e a veivunauci kina o Peresitedi Young me baleta na veivutuni bera?

E cakacaka vakalotu lavaki na papitaiso, me da rawata kina na veivakabulai.

Na cava e vakaibalebale ki na papitaiso, e na noda ilakolako vei Karisito? (Raica tale ga na Moronai 8:25–26.)
Na cava beka e vunautaka o Peresitedi Young, e na vukudra ka dodonu, se sega ni dodonu, me ra papitaiso? Na cava na vuna e sega ni kilikili kina me ra dau papitaiso, o ira na yalowai? (Raica tale ga na Moronai 8:9–14.) Na cava beka e a tukuna o Peresitedi Young vei ira era sa yalomatua tu, ka ra kaya ni sega ni ra dau valavala ca?
E vunautaka o Peresitedi Young ni lavaki ki na noda vakabulai na veicakacaka vakalotu ni kosipeli, me oka kina na papitaiso. O sa kune kalougata beka vakaevei e na nomu bula mai na veicakacaka e so ni kosipeli?
E vunautaka o Peresitedi Young ni ra okati vakayadua ki na “veiyalayalati vou ka tawamudu na Yalododonu kece ga e na Gauna Oqo, mai na nodra sa curu ki na Lotu oqo.” Ni da papitaiso, na cava beka eda yalataka me da dau vakayacora? Na cava beka eda sa yalataka me da kakua ni cakava? (Raica tale ga na Mosaia 18:8–10.)
Na cava na vuna e sega ni vinakati wale ga me da vakabauta na Turaga o Jisu Karisito, ka daulomani Koya tiko, me da curuma rawa kina na katuba ni Nona matanitu?
Na cava na vuna e bibi kina me dua e “vakatikori … ki na ilesilesi” me veipapitaisotaki?
Me vaka e vakamacalataka o Peresitedi Young, na ka bibi cava e vakaibalebaletaki ki na papitaiso? (Raica tale ga na Roma 6:3–6, 11; Mosese 6:58–60; 1 Joni 5:7–8.) E vakamacalataka o Peresitedi Young ni “[sega ni tu e na] wai na kaukaua me savai kina na ivalavala ca.” Na cava beka ga e na savai keda mai na ivalavala ca?