Noda Vukei mai na Veivakatovolei, Veivunauci, kei na Veivakacacani

E kila tu o Peresitedi Brigham Young na inaki ni Kalou, ka qai vakayagataka na veika sa kila oqo, e na veika rarawa e so e sotava mai, kei ira na Yalododonu. A kaya kina o Peresitedi Young: “Au sa rogoca na nodra vakamacalataka na veika e so era sa sotava e na vuku i Karisito. E ka ni marau ni sega ni dau soli vei au na gauna meu vakamacala kina. Sa vuqa sara na ka au sa sotava mai, ia, e na vuku ni veika rarawa au sotava e na vukuna, au dau vakatauvatana e lomaqu na veika rarawa au sa sotava mai, vei ira na ivavakoso, ni vakataki koya ka daramaka voli e dua na kote makawa, sa kadresu ka duka tu, me qai lako mai e dua ka mai solia vua e dua na kote vou, na kote vinaka cake ka totoka. Oqo gona na noqu vakatauvatana na veika au sa sotava mai e na vuku ni Kosipeli—au sa mai luvata kina na noqu kote makawa, ka daramaka sara e dua na kote vou” (DBY, 348).

iVakavuvuli i Brigham Young

E dau veivakatovolei na Turaga me da vakadinadinataki keda kina vua, ni sa dodonu me da vakaivotavota e na matanitu silesitieli.

Edodonu me ra vakatovolei na nona tamata na Kalou sa Cecere Sara. Sa volai tu ni ra na vakatovolei e na veika kece ga, me vaka ga na nona a vakatovolei o Eparaama [raica na V&V 101:1–4]. Ke lavaki vei keda e na ulunivanua o Moraia me da vakacabora kina e so na noda Aisake, e sega ni ka dredre oqori; ni ka rawarawa sara oqori ka rawa ni da vakayacora. Au kila ni sa soli beka vei ira na Yalododonu, me soli vei ira na veivakatovolei kece ga era na gadreva. Ia, ke tu vei kemuni na rarama ni Yalo Tabu, o ni na qai raica vakavinaka kina ni sa dodonu ga me da sotava na veivakatovolei vakayago (DBY, 346).

Eda bula donuya tiko oqo na gauna ni veivakatovolei, me da vakadinadinataka kina ni kilikili, se sega ni kilikili kei keda na bula sa vakarautaki mai muri (DBY, 345).

O ira vakayadua sara na tamata era na laki vakaisalataki e na lagilagi, e na bula vakatukatuka, kei na bula tawamudu, e dodonu me ra sa lakosivita yani na veika dredre kece ga sa lavaki tu me ra na vorata o ira na tamata kece ga, me ra qai laki rawata kina na nodra bula lagilagi kei na bula vakalou. Na veika dredre kece ga ka rawa ni da dau sotava na tamata, e na soli vei ira e vica, me cokonaki ira ki na bula mai muri, e na iserau ni Turaga. Ke soli vei keda na lagilagi ka a rawata o Eparaama, e dodonu me da rawata e na sala ka a rawata kina o koya. Ke da vakarau tu me da laki sotava na kawatamata i Inoke, Noa, Melikiseteki, Eparaama, Aisake, kei Jekope, se o ira na luvedra yalodina, kei ira tale ga na Parofita yalodina, kei na i Apositolo, e dodonu me da sotava tale ga na veika kece ga era sa sotava yani, me da kila kina, ka vakavukui, ka qarava rawa na noda edaumeni, ka na cokonaki keda me da laki rawata kina na matanitu silesitieli nei Tamada na Kalou. … E bibi sara ki na nomu laki rawata na veivakabulai na nomu sotava rawa yani na veivakatovolei kei na veika dredre e so (DBY, 345).

Ke vakabalavutaki na noda bula me laki yacova sara na duanaudolu na yabaki, e rawa ni da na bula ka vuli tiko ga. Na bula veiveisau ka da sotava yani, eda na vuli kina, ka dusimaka vei keda na ivakarau dodonu ni bula, ka me veivakarautaki tale ga ki na noda laki vakaivotavota vata kei ira na yalododonu (DBY, 345).

Ke a sega ni cala mai o Atama, ke ra bula tiko ga e vuravura o ira na nona kawa, era na sega ni dau kila na ivalavala ca, se na veika ni bula wiwi mai na kena kamikamica, era na sega ni kila vakakina na ivalavala dodonu, ni vu duadua ga mai na kena ivakarau dodonu, ni sega ni dua na ka eda na laki rawata, ke sega ni vakavatukanataki rawa vei keda na kena veibasai. Ke ra dau yalomatuataka na veika oqo na Yalododonu ni ra sotava yani na veika dredre e vuqa, me okati me nodra solibula, era na qai kila ni isolisoli talei duadua beka ka rawa ni soli vei ira. Ia, ke soli vei ira na ivakavuvuli talei e vuqa, kei na marau dina, ka sega ni vakavatukanataki vata kei na kena veibasai, era na sega ni kila kina na bula marau, e na sega tale ga ni vakavatukanataki vei ira na marau dina. Ni ra na sega ni kila na rarama mai na butobuto, ni ra sega ni se kila na butobuto, ka me ra vakuai kina e na nodra kila na rarama dina. Ke sega ni ra na tovolea rawa na veika wiwi, me ra qai kila vakaevei na veika kamikamica? Era na sega sega sara ni kila [raica na V&V 29:39] (DBY, 345–46).

Eda na mamarau vakalevu cake sara ni da sotava tiko na veivakatovolei; ka ni na dau votai vakaiyauyau sara na Yalo Tabu ni Kalou vei ira era sa dau yalodina [raica na 1 Pita 3:14] (DBY, 347).

Meu kaya ga vei kemuni na Yalododonu e na Gauna Oqo, ni vinakati wale ga me da vuli mai e na veika ni Kalou. Laiva me ra lasu tiko ga na tamata lasulasu, me ra veirukaki voli ga o ira sa dau veirukaki, ni ra na yacova kina na veivakarusai. E vinakati wale ga me da toso ki liu, ka cabe cake tiko ga, ka dau doka na ivunau ni Tamada na Kalou; ka na vakasesei ira na keda meca o koya (DBY, 347).

Eda sa sotava mai na veika e vuqa, ka rawa ni da vakatoka, ni veivakatovolei, kau vinakata me ra kila vakakina o ira vakayadua sara na taciqu vakalotu, ni sa ka talei ka marautaki dina vei au na veika au sa sotava mai; ia eda sa rairai solibula beka e na veika e vuqa, ka sotava mai na veivakatovolei kei na veitemaki e vuqa, ka sega ni vakatitiqataka sara oqori. Ni da sa mai sotava na veitemaki, ka da yalovinaka ga e na kena sa mai vakacacani na noda iyau e vuqa. Ni o au tale ga, e na lima na gauna au lakova mai kina na veibuca oqo, au sa biuta tu yani na veika sa solia vei au na Turaga, e na iyau vakavuravura, kau rawa ni kaya, me vakatauvatani kei ira au bula kaya mai noqu vanua, e sega ni iyau lailai wale (DBY, 347–48).

Ia, e na veika me baleta na veivakatovolei, ni vosoti au kina, e sega ni dauvakatovolei o koya na tagane se yalewa ka tu vua na yalo ni noda lotu; ia o koya ga na tagane se na yalewa, ka saga tiko me veiraurau na nona ivakarau ni bula kei na ivakavuvuli ni Kosipeli ni Luve ni Kalou, ka tovolea tale ga me kubeta tiko na yalo vakavuravura, e na dau sotava na veivakatovolei kei na rarawa, ka rui momoto sara ka mosimosi, ka na dau sotava tiko ga e veigauna (DBY, 348).

Mo kakua ni soro vua na tevoro, ka mo vakaivotavota e na icolacola i Karisito, o ni na qai kaya kina ni sa rui rawarawa na nona ivua ka mamada na nona icolacola. Na veika oqo au sa mai kila e na veika au sotava mai e na noqu bula (DBY, 347–48).

E dau veivuke na Turaga me ra yalomalumalumu kina o ira era dau domodomoqa, e na nona veivunauci e na nodra sotava na veivakacacani.

Ni da raici ira na Yalododonu e na Gauna Oqo, eda na rairai taroga kina, e dua beka na yaga ni veivakararawataki era sotava tiko? Io, ke ra na dautalaidredre. E yaga beka na nona vunauci na luveda tagane se yalewa? Io, kevaka era dautalaidredre [raica na V&V 105:6]. Ia, vakaevei ke ra dau talairawarawa ki na veika kece sara rau dau vinakata na nona itubutubu, e dodonu beka me dau vunauci tiko ga? Ke tiko beka na kena inaki, au sega ni kila mada na kena ibalebale. Au se sega ni raica na vuna e dodonu kina me vunauci e dua na gone talairawarawa, kau sega tale ga ni se raica na vuna me vunauci kina mai vua na Turaga o ira na nona tamata dautalairawarawa. Era sa dau vunauci beka na noda lewelnilotu? Io, sa vakayacori vakavinaka vei ira (DBY, 350).

O ira era na vakanadakuya na ivunau savasava ni Kalou, era na dau sotava na veivakatovolei, ka rui dredre dina sara. E na vakila kina na nona rarawa o Koya sa Kaukaua Sara. O ira na yalomalua, ka ra luvena vinaka, era na vakaivotavota e na isolisoli talei e vuqa nei Tamada na Kalou. Mo dau yalomalua, ka me vagolei tiko ga na nomu vakabauta vua na Turaga sa Kaukaua Sara [raica na V&V 101:16] (DBY, 351).

Eda na vakalougatataki vakalevu cake mai na veivakararawataki, kei na veika voravora eda sa dau sotava, me uasivi cake ke da a vakaitikotiko ga e na noda dui koro ka da cemuri mai kina—me vinaka cake sara mai na kena a soli ga vei keda me da laki tawana na noda dui veiwere, iteitei, sitoa, iqaqi, veimisini kei na veika kece sara eda a taukena tu mai liu (DBY, 346).

Era na vakacacani na yalododonu mai vei ira era dau ivalavala ca, e na dau veitovaki na Kalou vei ira era sa Nona, me toso tiko ga na Nona cakacaka.

Mo kakua ni rere, ni kevaka e dina na nona vosa na Turaga, o sa na dau vakatovolei e na veika kece sara; se mo ni dau marau, ka masumasu me kakua sara ni mudu, ka dau vakavinavinakataka na veika kece sara, ka vakakina na kena butakoci na nomuni iyau, ni sa tuberi keda tiko ga na liga ni Turaga, ka dautuberi keda tiko ga. Me ra vakasavasavataki ira yadudua na tagane kei na yalewa e na iserau ni Turaga, kei na veika kece sara sa vakarautaka mai o Koya sa Kaukaua Sara, e na yaga vakalevu sara vei ira (DBY, 347).

Sa tuberi ira na nona tamata [na Kalou] ki na veiyasa i Amerika, ka ra sa dau dusimaki vakalevu e na veivakasewasewani. … Sa lewa tiko na Turaga. O ni na rairai taroga beka se cava na nona inaki kina. O ni sa kila taucoko tu ni dodonu me ra vakasavasavataki na Yalododonu, me ra qai rawata kina na matanitu silesitieli. Sa volai tu ni a sa vakavinakataki tu na bula i Jisu mai na veika dredre e a sotava [raica na Iperiu 5:8–9]. Na cava beka na vuna eda vakasamataka kina e na so na gauna, ni da na laki vakaivotavota e na nodrau matanitu kei koya na Tamada, ka sega ni se sotava na veivakatovolei oqori? (DBY, 346).

E na sega ni vakavinakataki na bula nei Josefa, ke a bula tiko me yacova yani na yabaki udolu na dede ni nona bula, ke a sega ni sotava na veika dredre e vuqa. Ke a bula tiko me udolu na nona yabaki ni bula, ka liutaki ira kina na nona ilawalawa, ka qai sega ni vakacacani e na nona vunautaka na Kosipeli, e na sega ni vakavinakataki sara na nona bula, ke a se yabaki [tolusagavulukawalu]. E rawa ni o na qai vakasamataka, ni ra sa sotava mai na noda lewenilotu na veika dredre e vuqa, kei na veika rarawa, me ra vakasevi kina mai na nodra veivale, ka buturaki, ka duiveiseyaki, ka vakamavoataki, ka vakaluvaiwaletaki, mo ni kila kina ni sa tosoya tiko ga o Koya Sa Kaukaua Sara na nona cakacaka, ka na vakatotolotaka tiko ga (DBY, 351).

Ni o veivakararawataki ki na “Vakabauta Vakamomani” o sa na caqeta tiko ga i liu, e na sega ni vakacacani mai kina. Sa lewa vakakina o Koya na Turaga Sa Kaukaua Sara (DBY, 351).

Ke da sotava na veivakararawataki me vaka na kaukaua ni liga kaukamea, era na guta mai vakalevu na noda ivakavuvuli vakalotu o ira na udolu vakaudolu era na curu mai i na lotu, ka ra na lakova mai na tamata vinaka, kei ira na tamata ca e vuravura, ka ra duivosavossa kina, ka vakavurea tale ga na nodra dui vakabauta, ka ra na mai ciqoma na udolu vakaudolu ka ra sega ni se kauai kina oqo (DBY, 351).

E na veigauna ga era na veivakacacani ka veisaqasaqa kina kei ira na noda lewenilotu, era na vakacerecerei keda kina, me vakamalumalumutaka kina na ligadra na Yalododonu e na Gauna Oqo. E na veigauna kece tale ga era na saga kina me ra vakalailaitaki keda, era na qai vakuria tiko ga. E na veigauna kece ga era na saga kina me ra voroka na nodra vakabauta, kei na nodra ivakarau savasava na noda lewenilotu, e na veivakaukauataki na Turaga ki na duru ni yava malumalumu, ka veivakadeitaki vei ira ka tu veilecayaki tu na nodra vakabauta, kei na nodra kaukaua mai vua na Kalou, e na rarama, kei na vuku. Era na vakaikuritaki tiko ga na noda lewenilotu e na yalododonu kei na kaukaua vakalou, mai na kaukaua ga ni sasaga ni Tevoro me vakarusa (DBY, 351).

Ke o ni biuti keimami tu ga, era na talai yani na iTalatala Qase ki na veiyasa i vuravura kece ga, me ra laki vakasoqoni mai na kawa i Isireli e na veivanua era dui tu kina; ia ke o ni veivakacacani tiko ga vei keimami, keimami sa na rawata kina vakatotolo cake, ni keimami na yalo dadaga vakalevu sara ni keimami tu wale, ka na dau kedru beka, se moce vakalekaleka, me keimami cegu kina. Ke o ni vakalaivi keimami vakalekaleka, me keimami wele tiko kina; ia ke o ni vakacacani keimami, keimami na duri mai e na veibogi me keimami laki vunautaka kina na Kosipeli (DBY, 351).

Me iUlutaga ni Vuli

E dau veivakatovolei na Turaga me da vakadinadinataki keda kina vua, ni sa dodonu me da vakaivotavota e na matanitu silesitieli.

Na cava beka na vuna e vakatoka kina o Peresitedi Young na bula oqo me “gauna ni veivakatovolei”? (Raica tale ga na Eparaama 3:22–26.) Eda na cokonaki beka vakaevei, mai na veika dredre eda dau sotava, me da laki rawata kina na matanitu silesitieli?
Na cava beka na vuna e lavaki kina na bula veibasai, na veika vinaka, kei na veika ca? (Raica tale ga na 2 Nifai 2:11–14.)
Na cava beka na vuna e rui taleitaka kina o Peresitedi Young na veika dredre e a donuya mai, kei ira na Yalododonu e liu? Sa bau vukei iko beka vakaevei na veika dredre o sa sotava, me vakataudeitaki kina e na nomu sa mai Yalododonu e na Gauna Oqo?
Na cava na ibalebale ni noda “vakaivotavota e na icolacola i Karisito”? (Raica tale ga na Maciu 11:28–30.) Me vukei keda beka vakaevei na noda vakaivua e na icolacola i Karisito, me da yalomamarau tiko ga e na gauna eda sotava kina na veika dredre? (Raica tale ga na Mosaia 24:13–15.)

E dau veivuke na Turaga me ra yalomalumalumu kina o ira era dau domodomoqa, e na nona veivunauci e na nodra sotava na veivakacacani.

Na cava na vuna e dau vunauci keda kina e na so na gauna na Turaga? (Raica tale ga na V&V 101:2–8.) Na cava e bibi me baleta na noda vunauci? Me yaga beka vakaevei na ivakavuvuli oqo, vei ira na itubutubu kei na gone me ra tauyavutaka na veivuvale vinaka?
A kaya o Peresitedi Young ni ra na “vakalougatataki vakalevu cake [na Yalododonu] mai na veivakararawataki, kei na veika voravora [era] sa dau sotava, … ke ra vakaitikotiko ga e na [nodra] dui koro ka [ra] cemuri mai kina—me vinaka cake sara mai na kena a soli ga vei [ira] me [ra] laki tawana na [nodra] … veika kece sara [era] a taukena tu mai liu.” Na cava na kena ibalebale e vinaka cake kina na noda totogi e na vuku ni noda talairawarawa, mai na noda dui wele tu ga e na noda ivakarau tawadodonu?

Era na vakacacani na yalododonu mai vei ira era dau ivalavala ca, e na dau veitovaki na Kalou vei ira era sa Nona, me toso tiko ga na Nona cakacaka.

A vakamacalataka o Peresitedi Young ni ra na vakacacani o ira na talaidredre, ia a tukuna tale e vica na ka me baleti ira na talairawarawa— me vakataki Jisu Karisito, Josefa Simici, kei ira na daukaulotu—era sa dau vakacacani mai. Me vaka e vakamacala kina o Peresitedi Young, na cava beka na vuna e dau laiva kina na Kalou me ra veivakacacani na ivalavala ca vei ira na yalododonu?
A kaya o Peresitedi Young ni “na vakatotolotaka tiko ga” na cakacaka ni Turaga na veivakacacani ki na Lotu. Na cava beka na itovo ni noda rai me baleta na veivakacacani eda sotava e na vuku ni ivakavuvuli dina? Na cava beka e rawa ni da cakava me da tuberi ira kina na luveda, me ra dau rawa na veivakacacani?