Vakaivaqataki ki na iLakolako Tawacava ni Bula Vakayalo

Sa dau gadreva o Peresitedi Brigham Young me vuli e na veika kece ga. Ni a tekivu me vuli e na ta iyaya ni vale, ka yaco e muri me qarava vakamaqosa na cakacaka ni daukaulotu, me dau tawavanua, kovana, ka parofita tale ga. A raica kina ni dodonu me da saga e na bula oqo me da tubu cake sara ka uasivi, me da vakacokotaki keda kina ki na vuravura tawamudu, ka sega ni gauna, me waraki ga kina na mate. Sa dau vakauqeti ira kina na Yalododonu me ra dau goleva na veicakacaka yaga, me rabailevu ka vakatitobutaka na nodra bula yalomatua, me ra vakamareqeta kina na ivakavuvuli dina, ni ra kakavaka yani na bula sa uasivi sara. Ni ra vakayacora na veika oqori, era na cavuikalawa kina e na nodra curuma yani na vuravura ni yalo, ka tudei tiko ga e na ilakolako vakaiukuuku e na nodra sa vakaivaqataki ki na bula vakayalo tawa vakaicavacava.

iVakavuvuli i Brigham Young

Eda vakacokotaki ki na bula tawamudu mai na noda vuli e veisiga, me vakacokotaki, ka tara cake tiko na matanitu ni Kalou.

Na cava eda mai cakava eke? Me da vuli ka marau vakalevu cake, ka vakaikuritaki kina e na vuku. kei na veika ni bula eda na sotava (DBY, 87).

Na inaki ga ni bula qo na vuli, ni rawa ni na vakaikuritaki kina vakalalai vei keda (DBY, 87). E bula vakatovotovo ga na bula vakavuravura ka da mai sotava oqo na tamata, me vaka sa nakiti me baleti ira era na bula tawa cava, me soli kina vei ira na vanua me ra vakavinakataki ira kina, ki na bula uasivi sa tu mai muri (DBY, 87).

Na imatai ga ni ivakavuvuli ka dodonu me vakaogai koya kina na tamata, me ra kila na gone kei ira na uabula, me wakatu ni noda cakacaka kece ga, na yavu ni bula torocake me tawamudu, se da kila vinaka se sega. Na yavu ni bula torocake, ni bula vakalou, na kena vakaikuritaki tale na veika eda sa taukena tu, e yavu cecere ka da na tosoi tiko kina, ka vu ni nodra cakacaka kece ga na tamata. Se vakaevei na veika era qarava tiko e na nodra bula, e na veivanua cava ga era sucu mai kina, se o ira ka ra veimaliwai mai, se vakabauta era qarava voli, se vakasama vakapolitiki era dina kina, oqori ga na wakatu ni veika kece sara era dau goleva, ka vauci kina na kaukaua kece sara ka qaravi rawa kina na itavi ni bula oqo (DBY, 87).

Eda mai biu e na vuravura oqo me da vakadinadinataka kina se sa dodonu me da curu yani ki na vuravura vakasilesitieli, na vuravura teresitieli, se vuravura tilesitieli, se me da curu i eli, se matanitu cava tale e veiraurau kei keda, ka sa soli vei keda na kena gauna e na bula oqo me da vakayacora rawa kina (DBY, 87).

Me da mai vakadinadinataki keda e na vuravura oqo. Me da vakadinadinataka vua na Kalou e na noda gauna ni bula vakatovotovo oqo, e na noda butobuto, e na noda malumalumu, kei na vanua e dabe vakatui kina na meca, ni da veiwekani voleka kei koya na Tamada, ka da dau serauni mai vua, ka sa kilikili me da veiliutaki vei ira na luveda—me da nodra turaga na turaga, ka nodra tui na tui—me da vakatulewa vakadodonu ki na iwasewase ni noda vuvale ka ra na laki vakaisalataki e na lagilagi e na matanitu silesitieli, na bula vakatukatuka, ka na tawamudu (DBY, 87).

Mo ni rogoca sara na Yalododonu e na Gauna Oqo! Mo ni na vakatawayagataka beka na gauna ni nomuni bula vakatovolei oqo, me vakasesei kina na nomuni bula? O ni a vakarautaki vakavinaka mai, ni bera na nomuni qai mai sucu eke, me baleta na bula tawa vakaiyalayala, kevaka o ni vakayacora na inaki o ni a buli kina, mo muria donu tiko na sala, ka dau nanuma na veika e lavaki e na lawa vakasilesitieli, mo dau talairawarawa ki na ivunau ni noda Kalou (DBY, 87).

Sa namaki mai vua na nodra Dauniveibuli na tamata, me ra na dauqarava na veika dodonu e na veisiga ni nodra bula, me ra vuku cake kina, se bulabula cake kina vakayago, se me baleti ira na wekadra (DBY, 88).

Ni da mai bula eke, me da vakatetea na itukutuku dina ka veivakavulici vei ira na tamata kece ga. Au sa mai tu oqo me baleta na nodra vuli na taciqu, meu vakavulici iratou na noqu vuvale e na veika ni bula, meu vakatubukawa, meu bula tiko, keu na rawata me vakakina, me yacova ni sa vakawabokotaki mai vuravura na ivalavala ca, na veika dukadukali, na ivalavala tawakilikili, kei koya na Tevoro, ka vakasavi tani mai vuravura na veimataqali ivalavala kece ga ka sega ni dodonu. Oqori sara ga na vakabauta, kei na inaki ni noqu mai bula e na vuravura oqo. Eda sega ni mai vakarautaka tiko na noda mate, ka qai mate; ni sa inaki ni noda bula oqo me da mai taracake tiko na Matanitu ni Kalou e vuravura—me tosoya tiko i liu na Matabete, ka veivorati kei Setani, ka tuberi ira na luve ni tamata— ni sa tu vei ira na ivurevure ni vuku kece ga. Oqo gona na kena itekitekivu—na yavu sa virikotori tu me baleta na bula ni tamata, me rawata kina na veivakavukui tawamudu kei na lagilagi. Me da laki rawata beka na veika oqori e na noda sa mate? Sega; me da tosoya sara tiko ga e na vuravura oqo (DBY, 88).

O ira vakayadua sara na Yalododonu e na Gauna Oqo e na veibucabuca ni veidelana oqo, kei vuravura raraba, e dodonu me ra qarava tiko na veika e dodonu me ra mai vulica e na vuravura oqo. Ni ra sucu mai eke me ra mai vakaikuritaka e na nodra isolisoli, ka me ra vakawa, me ra vakalevutaka, me ra vakasoqona na Vuvale i Isireli, me ra vueti Saioni, me ra taracake na Saioni ni noda Kalou, ka tosoya na veivakavukui vakayalo me baleta na vuravura tawamudu, ka nodra era sa Kalou, ka me ra tekivu teivaka e vuravura oqo, ka saga me vakawakana vakatitobu ka vuavuaivinaka, e na lagilagi ni Kalou, me yacova ni sa vakarusai mai na loma ni tamata yadua na vakanananu butobuto, me vakalesui tale o vuravura ki na kena itutu vakaparataisi, me mai bula vata tale kei ira na nona tamata na Turaga, me toso ka veitalanoa vata kei ira, me vaka a dau vakayacora mai vei Tamana kei Atama. Qori sara ga na ka me da qarava, me kua ni da vakaogai wale ga me baleta na noda mate (DBY, 89).

Me inaki ni noda bula oqo me taracake kina na Saioni ni noda Kalou, me vakasoqoni vata na Vuvale i Isireli, me tekivutaki kina na nodra gauna na Veimatanitu tani, me vakalesui ka vakavatukanataki e vuravura na veicakacaka ni ligada, me yaco me Were o Iteni, me da vakayalomatuataki e na kila ka, ka vakavukui me da kila kina na veika e vuqa, me savai kina na noda bula, ka vakarautaka na kawatamata ka na veitata vata kei na Turaga, e na nona lesu tale mai (DBY, 88).

Eda na torocake mai na veivakavukui kei na veika eda sotava e na noda bula.

E na tosoi tiko ga na cakacaka qo, e vakalou na ivakavuvuli ka vakavulici oqo vei ira na Yalododonu e na Gauna Oqo, ka vakaikuri, ka rabailevu ka tosoi tiko ga me yacova ni da sa qai kila na veika eda sa kilai kina, ka raica tale ga me vaka era sa raica vei keda na tamata kece ga (DBY, 90).

Eda sa qarava tiko qo na vuli, ka da vuli tiko ga, ka sega ni da namaka me cava na noda vuli ni da se bula tiko oqo e vuravura; ka namaka me da laki tomana tale na noda vuli, ni da sa curuma yani na ilati, me vakaikuritaki kina na veika eda sa kila tu. E na rairai vakavuvuli vou beka vei ira e so na veika au tukuna qo; e na vuku ga ni inaki sa virikotori mai, ni da na sega ni kila vakadua na ka kece ga e na dua ga na gauna. Me da rawata vakalalai, me qai vakaikuritaki tiko ga (DBY, 91).

Sa dau solia vakalalai o Koya vei ira na nona tisaipeli yalodina edaidai, ke ra na vakaikuritaka tiko ga, e na qai kuria vakalailai tale vei ira ni mataka, ka vakakina e na siga ka tarava yani. E na sega ni tomana vei ira na veika era sega ni laki vakaikuritaka tale, ia sa lavaki ga vei ira me ra vakavinakataka tiko na veika era sa kila rawa tu, me levu sara kina na ka era vakavukui kina (DBY, 90).

Ke da muria na sala sa virikotori tu e na Kosipeli, mai vei ira era solia mai vei keda na yavu ni veivakabulai, eda na taura vakakina na sala ka na laki tasevu e na bula tawamudu, ki na bula ka na tubu tiko ga; eda sa na butuka kina na sala ka na sega ni laki kau tani kina mai vei keda na veika eda taukena, me da laki vakasoqona, ka vakumuna vata, me kurivi tiko, me vakatetei tale yani, ka vakurivi tiko ga me tawamudu. O ira era na saga na bula tawamudu, era na vakaivotavota e na isolisoli me levu cake na ka era na vakamamautaki kina. Ni na veivakacegui wale ga ki na yalo vakatukatuka, na bula ka ra na torocake kina me tawamudu (DBY, 93).

E rawa ni da na vinaka cake tiko, ni da a buli mai e na inaki oqori, sa soli tu vei keda me da vinaka cake e na noda dui bula, me yacova ni da sa kila kina na veika ni bula vakasilesitieli, ka vakavukui tiko, me da bula tiko ga, e na veivuravura tawamudu (DBY, 90).

Me da vuli beka ga ka sega ni kila rawa na ivakavuvuli dina? [raica na 2 Timoci 3:7.] Sega, meu kaya ni na sega ni vakakina; ni da na kila rawa na ivakavuvuli dina. Oqo na ka au sa vakanuinui ka nanamaki kina, ka ivurevure ni noqu marau (DBY, 90–91). Sa tu e dui lomada na ivakavuvuli, me vakakina vei ira kece sara na lewe i vuravura, me ra toso ka tomani tiko kina, me ra kurivi ka votai ka vuabale kina e na ivakavuvuli dina, me yacova na noda sa uasivi cake sara (DBY, 91).

Eda sa vakarautaka na veika e so, ka da na laki vakaivotavota e na veika e so eda sa vakavakarau kina (DBY, 95).

Me kua kina ni da kerea tale vua na Turaga me solia vakalevu tale mai vei iko, mo kerei iko ga mo ni tudei e na veika e baleti kemuni, mo ni dau yalododonu, ka lewa vinaka na veigauna mo ni vosa kina, kei na veika mo ni tukuna, na veika e so mo ni vakalasikata, kei na nomuni ilakolako e matana na Turaga. E na kena totolo ga ni nomuni vakadinadinataka vua ni o ni na dau maroroya na veika kece sara e dodonu me vunitaki—ni o ni na solia ga vei ira na wekamuni na veika sa dodonu me soli vei ira, ka sega ni vakaikuritaka tale, ka kila tu na sala me ra votai kina na nomuni veivuvale e na kila ka, me vakakina vei ira na nomuni itokani, na wekamuni, kei ira na mataveitacini, sa na tau kina vei kemuni na isolisoli ni Turaga, ka solia vei kemuni, ka qai vakatauca tale mai, me yacova na gauna sa qai kaya kina, “O na sega ni lutu tale; sa dregati me nomu ivotavota na bula tawamudu, mai na nomu yalodina” (DBY, 93).

Eda na torocake ka vakaisolisoli e na bula tawamudu.

Oqo na isolisoli cecere duadua ka rawa ni soli vua na tamata, me bula tiko ga, ka sega sara ni mate (DBY, 96).

Ni sa volai tu, sa isolisoli cecere duadua ni Kalou ki na tamata, na bula tawamudu. Na ka bibi duadua e rawa ni da rawata vakaikeda, me da dui rawata ka maroroya tiko na noda bula me tawamudu, ka veimaliwai kina kei ira na kai lomalagi. Eda sa vakaivotavota e na ivakavuvuli ni bula tawamudu e na Kosipeli, ke da na talairawarawa kina, sa na rawata vei keda na isolisoli talei oqori (DBY, 96).

Ke tini dole na noqu bula, sa ka rarawa dina; ka sega ni vosoti rawa. Meu bula tiko ga e na bula oqo, ke laki veisau beka na vanua au bula tale kina. Keu muria na sala dodonu ka taqomaka na kena inaki ka tauyavu kina, au sa na rawata me noqu na bula tawamudu (DBY, 96).

Eda na vakaivotavota e na taucoko ni Matanitu ni Kalou, kei na cecere kei na titobu ni kena lagilagi, na kena lewa, ka da na kila sara; ni da na veiqaravi tale kina vakatama, se vakatina, ka na vakawati ka vakaluveni (DBY, 97).

Mo vakatayaloyalotaka mada ni sa soli vei iko na bula tawamudu—mo bula ka taukena vakadua na isolisoli e so oqo; o na kaya kina ni sa isolisoli cecere duadua oqo ka sa soli vei iko. … Na isolisoli cava tale beka e rawa ni vakatauvatani kaya? Na isolisoli cava beka e na tautauvata rawa kei na bula ka sega ni yalani—me da bula tiko ga? (DBY, 96).

Sa isolisoli ni Turaga vei keda na sala me da laki bula rawa kina kei ira na Kalou, ka sa okati oqo me isolisoli levu duadua ni Kalou. Na isolisoli ni bula tawamudu, ka sega ni da vakaluveni kina, me da agilosi ga, e isolisoli levu dina sara, ka rawa ni soli vua e dua; ia sa solia tu vei keda na Turaga na isolisoli vakatama, me baleti ira e so. Na cava e okati me tama e na iVolanikalou? O koya ka solia me tawamudu na bula ni luvena. Oqori ga na isolisoli ka soli vei Eparaama, ka marautaka sara vakalevu. A yalataki vua me tamadra na lewe vuqa (DBY, 97).

Ke ra dau yalodina na tamata, … era na duavata tiko ga kei koya na nodra Dauniveibuli, a ra sa yalovata ka duavata, me ra cakacaka ka veiqaravi vata; ni veika kece ga e vakayacora na Tamada sa vakayacora vakakina na Luvena, me rau veiqaravi tiko vakakina me yacova yani na vuravura tawamudu (DBY, 97).

Sa gadreva na Turaga me da muria na kosi ka na laki tasevu e na matamata qiqo, me da vakaisalataki kina e na itutu cecere ni da sa qisi me da luvena na Kalou, ni sa i ira wale ga oqori era na laki vakatubukawa tiko ga, ka torocake tale mai lomalagi. … Era na laki bula e rukudra o ira na kena vo, ka na laki sogo vei ira na isolisoli oqori. … Sa noda kina edaidai me da lewa rawa na bula eda na gadreva, me da laki luvena, ka vakaivotavota vata kei Jisu Karisito, se sa rauti keda na ivakatagedegede ni bula e ra (DNSW, 8 Oks. 1876, 1).

Me iUlutaga ni Vuli

Eda vakacokotaki ki na bula tawamudu mai na noda vuli e veisiga, me vakacokotaki, ka tara cake tiko na matanitu ni Kalou.

Na ivakavuvuli dina cava soti eda sa vulica, mai na veivakatovolei eda sa sotava e na vuravura oqo, ka na vukei keda me da toso tiko ga i liu me tawamudu? (Raica tale ga na V&V 122:7–8.) Na cava beka e vakamacalataka o Peresitedi Young, me baleta na ivakarau ni “dauvosota tiko ga me tawamudu”? (Raica tale ga na V&V 121:7–8; 3 Nifai 15:9.)
Me da tauyavu beka vakaevei e na noda “dauqarava na veika dodonu e na veisiga,” me da laki “rawata kina na veivakavukui tawamudu kei na lagilagi”? (Raica tale ga na Alama 5:41; 26:22; V&V 58:26–29.)
Me vaka sa vakamacala kina o Peresitedi Young, e dua na inaki ni noda bula oqo me da mai vuli kina. Na cava beka e rawa ni vakalatilati e na noda dau vuli? Me dau katoa beka vakaevei na noda vuli mai na ivakavuvuli ni kosipeli? Me da vuli beka vakaevei mai na veika eda sa sotava e na noda bula? Na ivakavuvuli dina cava o sa bau vulica e na veika e so o sa dau sotava, se na veivakauqeti ni Yalo Tabu?
E vakamacalataka o Peresitedi Young e vica na vu ni noda mai bula oqo e vuravura. Me da rawata beka vakaevei na inaki e so oqori? (Raica tale ga na V&V 81:5.)
Na veisala cava soti beka me da “vakarautaka [kina] na kawatamata ka na veitata vata kei na Turaga”? Mo veivuke beka vakaevei e na kena vakayacori na tikina qo?

Eda na torocake mai na veivakavukui kei na veika eda sotava e na noda bula.

A vakamacalataka o Peresitedi Young ni da na vakaikuritaka na noda kila ka, me “vakalalai, me qai vakaikuritaki tiko ga.” Me vakaibalebaletaki vakaevei na kena ivakarau oqo e na noda yalomatua vakosipeli, na noda veisusu vakaitubutubu, kei na noda veiqaravi e na Lotu? (Raica tale ga na 2 Nifai 28:30; V&V 130:18–19.)
Na cava beka e vunautaka o Peresitedi Young me baleta na kena vakaikuritaki tiko ga na noda bula me tawamudu? (Raica tale ga na V&V 93:12–14.)
A vakamacalataka o Peresitedi Young ni sa tu e “lomada na ivakavuvuli, … me ra toso ka tomani tiko kina, me ra kurivi ka votai, ka vuabale kina e na ivakavuvuli dina, me yacova na noda sa uasivi cake sara.” Eda vakacokotaki beka vakaevei ki na bula vakalou, mai na noda sasaga vakavuli? (Raica tale ga na V&V 50:40; 93:24, 26–30; 130:18–19.)

Eda na torocake ka vakaisolisoli e na bula tawamudu.

A vakamacalataka o Peresitedi Young, ni “isolisoli cecere duadua ka rawa ni soli vua na tamata, [me] bula tiko ga, ka sega sara ni mate.” Na cava beka e tukuna ni “ka bibi duadua e rawa ni da rawata vakaikeda,” kei na sala cava beka me da rawata kina? (Raica tale ga na V&V 14:7; 130:20–21.)
Na cava beka e kena ibalebale me da “vakaivotavota vata kei Jisu Karisito”? (Raica tale ga na Roma 8:17.) Na isolisoli cava beka era na votai ga kina o ira era sa vakaisalataki, ni ra “sa luvena na Kalou”?