Saumi Katini ka Dau Bula Sausauvi

Veitalia sara na veika dredre sa dau sotava mai o Peresitedi Brigham Young, sa dau kila tu ga, “ni sega ni dua na ka” e solibula kina (DNW, 24 Oks. 1854, 1) ni veika kece sara e nona ga na Kalou, ka na veivakalougatataki e na veika kece sara eda solia se vakacabora vua, ka vakarautaki keda kina ki na bula vakalou. A dau nanuma tu ni veika kece sara eda okata tu oqo ni solibula, e sala wale ga me da solia kina e dua na tikina ka “sega soti ni vinaka sara, me da rawata kina e dua na ka uasivi cake” (DNW, 24 Oks. 1854, 1). E vunautaka o Peresitedi Young ni rawa ni da vakaitavi e na cakacaka ni Turaga mai na noda dau vakamuria ga na ivakaro me baleta na ikatini kei na sausauvi—ka da vakadinadinataka kina ni nona ga na Tamada mai Lomalagi na veika kece sara eda taukena tu oqo, ka da vakasuka ga vua e dua na iwase ni noda iyau.

iVakavuvuli i Brigham Young

Ni da saumi katini, e soli kina vei keda na sala me da cau kina ki na cakacaka ni Turaga, e na noda vakasuka tale vua e dua na iwasewase lailai ni nona iyau.

Au vakabauta ni sega tale ni dua vei keda e na Lotu qo me se sega ni kila vinaka tiko na noda itavi e na saumi katini, ka sega kina ni lavaki tale na ivakatakila e na veiyabaki e muri oqo me baleta na tikina oqori. Sa tu ga na iVunau—sauma na ikatini (DBY, 174).

Sa levu sara na kena vakatarogi mai, ka rui vakatuburarawa vakalevu: sa ivakaro me da sauma na noda ikatini … me tara kina na Vale ni Kalou, me vakatetei kina na kosipeli, ka me vukei kina na cakacaka ni matabete. Ni so era curu vou mai e na lotu, sa dau vakataroga se wili tale ga na nona isulu, nona idinau, nona qele, kei na veika tale e so. Sa ivakaro ga me da solia … na ikatini ni kena isau, se ilavo e rawata [raica na V&V 119:4] (HC, 7:301). E lawa ni vuravura tawamudu na saumi katini. E sega mada ni dua na gauna e vakatikora kina na Turaga sa Kaukaua Sara na nona Matanitu e vuravura, ka sega ni vakatikora vata me ivakaro vei ira na lewena me ra saumi ikatini, ka na sega ni na vakayacora tale ga e na dua na gauna mai muri. E ivunau ni vuravura tawamudu, ka sa vakatikora na Kalou e na vukudra na tamata, me ra vakabulai ka rawata kina na bula vakalou. E virikotori na ivakaro oqo e na Matabete, ia eda na sega ni vinakata me dua e vakayacora, me vakavo ga ni sa qai lomadra dina (DBY, 177).

E sega ni vakasaurarataki na tamata me ra saumi ikatini, me ra vakamuria ga na lomadra e na ivakavuvuli oqo, ka ra sa cikevi wale ga kina ni sa ka dodonu me ra dau qarava e na vukudra na nodra Kalou (DBY, 177).

Eda sega ni kerea vua e dua me saumi ikatini, me vakavo ga ke sa lomadra dina; ke o sa vinakata mo saumi ikatini, mo vakayacora e na yalodina (DBY, 177).

E dodonu me da dau sauma vakayadua na noda ikatini. Me sauma na yada dravudravua na ikatini ni nona toa, ke vinakata me vakatinitaki tale vua na kena isau, me qarava rawa kina na nona bula (DBY, 178).

Sa dina sara ni ra dau sauma vakadodonu cake na nodra ikatini o ira na dravudravua, me veidutaitaki vata kei ira na vutuniyau. Eda na vutuniyau vakalevu sara kevaka era na saumi ikatini na vutuniyau. Era sa dau yalodina ka sauma e na kena gauna dodonu na nodra ikatini o ira na dravudravua, ia, era sega ni dau sauma rawa na nodra ikatini o ira na vutuniyau—sa rui tu vakalevu vei ira. Ke tiko wale ga vua e tini na dola, e na sauma rawa na dua na dola; ke tiko ga vua e dua na dola, e na sauma rawa na tini na sede; e na sega sara ni mosi vua. Kevaka e sa rawa e duanadrau na dola, e na rairai sauma beka e tini na dola. Ia ke sa tu vua e duanaudolu na dola, sa na vakadeuca toka ka kaya, “Au sa na sauma beka ga; ni dodonu ga me saumi;” ka sa na sauma sara na nona tini se duanadrau na dola. Ia, vakasamataka mada ke dua na vutuniyau o koya oqori, me na sauma kina na tininaudolu, e na vakadeuca tiko vakavica ka kaya, “Au sa na waraka beka ga me yacova ni sa na qai so tale mai na kena ikuri, meu na qai sauma vakalevu sara.” Me ra qai waraka, ka waraka tiko, me vakaikoya na wekada mai Natuicake; ka a wawa ka wawa, me waraka tiko ga, me yacova na siga sa kacivi yani mai na vuravura oqo, ni sa vakaoqo na nodra ilakolako na lewe vuqa sara vei keda. Era wawa ka wawa tiko ga, me yacova sara, ni sa tadu mai o koya ka vakatokai me yacana o Mate, ka lako sara yani i tikidra, ka kauta tani na nodra icegu, ka ra sa takali sara kina ka sega ni rawa tale ni sauma na nodra ikatini, era sa rui bera vakalevu sara, sa vakaoqori ga na ka e dau yaco (DBY, 175).

E sega ni noqu itavi meu na duri ka kaya ni rawa niu na solia vua na Turaga na noqu iyau, ni sega ni dua na ka au na rawa ni solia Vua, ke da raica sara vakadodonu. Sa rairai tu beka vei au e so na ka. Na cava beka na vuna? Ni sa raica mai na Turaga ni kilikili me vakasucumi au mai ki na vuravura oqo, ka sa dau wanonova na noqu vakaiyautaki au e na veika e so au dau gadreva, ka vakatokai me noqu (DBY, 176).

Ni lako mai na noqu Bisopi me mai fikataka vakailavo na noqu iyau, a qai taroga se me cava me noqu ikatini. Au a mani kaya ga vua me taura ga e dua na ka e tu vei au, ni sega ni ka bibi vei au na veika oqori; na noqu ose, bulumakau, vuaka, se na cava ga e via taura; ni ka bibi ga vei au na cakacaka ni noqu Kalou, e na yaga raraba ni nona Matanitu cecere (DBY, 176).

Ke da dau bulataka na noda vakabauta vakalotu, sa dodonu me da dau saumi ikatini (DBY, 176).

Eda sega ni da taukena ga na noda bula, ni da sa voli oti e na keda isau, eda sa nona na Turaga; na noda gauna, noda taledi, noda koula kei na siliva, noda witi kei na valawa, noda waini kei na waiwai, noda bulumakau, kei na veika kece sara eda taukena ka tu oqo e vuravura, e nona taucoko na Turaga, ia e vinakata e dua na kena ikatini, me taracake kina na nona Matanitu. Se levu beka na noda iyau, se lailai, e dodonu me da dau sauma vua na noda ikatini (DBY, 176).

Ni dua e vinakata me vakaiyau, me solia mada na veika vinaka duadua ka tu vua. Sa solia mai vei au na Turaga na veika kece au taukena tu oqo; ni sega ga ni dua na ka e noqu, e sega ni dua na tiki ni ilavo lailai sara e noqu. O ni na rairai taroga beka, “O tauca beka na vosa oqori mai na vu ni yalomu?” Io, e vaqori sara ga na lomaqu. Na kote kau tokara tu oqo e sega ni noqu; au a mai taukena ga e na nona solia mai vei au na Turaga e na sala dodonu, kau daramaka kina; ia ke gadreva me taura tale, kei na veika kece sara e tu e loma, sa soli tu vua me vakayacora vakakina. E sega ni dua na noqu vale, e sega na noqu vanua ni teitei, na ose, na asa, na kena qiqi … na veika kece ga sa nona, ka sa solia mai vei au, ia ke vinakata tale, me qai lewa ga na gauna e taura kina, ke mai kerea, se taura ga e na gauna e vinakata kina (DBY, 175).

Sa nona kece ga na Turaga, eda sa veiqaravi ga vua na tamata vakayadua (DBY, 178).

Au na sega ni namaka na siga meu sa na qai lewai au ga vakaiau, me yacova sara niu sa laki vakaisalataka e na matanitu silesitieli nei Tamaqu mai Lomalagi. Au se sega mada ni taukena e dua na ka, kau taukena sara ga vakaiau, kau sega ni namaka niu na lewai au vakaiau, me yacova niu sa qai lewai au dina vakaiau, ni veika kece sara ka tu oqo vei au e soli wale ga meu qarava (DBY, 177).

Sa noda itavi me da saumi katini, ka veitokoni vei ira na ivakatawa ni ilavo mai na ikatini.

Oqo gona e dua—na tamata—ka sa bulia mai na Kalou, sa tuva, tauyavutaka, ka bulia,—na veitiki kei na iwasewase yadua ni noqu bula, mai na doka ni uluqu ki na qeteqete ni yavaqu, sa vakarautaka mai na Tamada mai Lomalagi; ka vinakata wale ga na ikatini ni noqu mona, ni utoqu, noqu sala ni dra, na ua, kei na sui ni yagoqu, me taracake kina na veivaletabu, me vakatetei kina na nona cakacaka, kei na nodra tokoni na kaulotu kei na nodra dui vuvale na kaulotu, me ra qaravi kina na dravudravua, kei ira era sa qase sara, o ira na gera kei na mataboko, kei na nodra vakasoqoni lesu mai na veimatanitu, ka me ra laki maroroi tiko e na nodra sa vakasoqoni tale. A sa kaya oti kina, “I luvequ-tagane, mo solia wale ga na ikatini ni nomu bula ki na cakacaka vinaka ni nodra qaravi na wekamu, e na kena vunautaki na Kosipeli, kei na nodra vakacurumi mai ki na Matanitu na lewe i vuravura; mo vakadavora rawa na nomu lewa me baleta na nodra qaravi o ira na vakaloloma; me liutaki kina na nodra cakacaka o ira e rawa ni ra cakacaka; ka sa rauta vinaka sara na ikatini ni veika e rawa oqori, ke qaravi vakamaqosa, ka lewai vakavinaka ka maninitaki, e na kena vakatetei tiko ga e vuravura na noqu Matanitu” (DBY, 176).

Ke lavaka na Turaga na ikatini ni ka au rawata me vagolei ki na kena tara na veivaletabu, na veivalenilotu, valenivuli, e na nodra vuli na luveda, nodra maroroi mai na veiyasa i vuravura o ira na vakaloloma, ka vakakina o ira na qase, o ira na lokiloki, na gera kei ira na mataboko, ka mai tara kina na veivale me baleti ira, me ra vakacegu kina e na nodra sa yaco i Saioni, ka me ra tokona kina na Matabete, e sega tale ni noqu ilesilesi meu taroga na lewa sa virikotora mai o Koya sa Cecere Sara e na vuku ni veika oqo, se meu taroga na nodra lewa na nona italai, era sa veiliutaki kina. Ke sa lavaki ga meu sauma na noqu ikatini, sa noqu itavi meu vakayacora vakakina (DBY, 174).

Au taleitaka vakalevu na kena cavuti me [saumi ikatini], ni vakaivolatabu na kena ibalebale qori, ka vinaka cake vei au meu vakayagataka, mai na dua tale na vosa. Sa virikotora mai na Turaga na saumi ikatini; a dau vakayacora e na gauna i Eparaama, kei Inoki kei Atama, ka sega sara ni ra dau guilecava na nodra ikatini o ira na nona tamata, se na nodra isolisoli e so ki na lotu. E rawa ni o ni dui wilika ga vakaikemuni na veika sa lavaka tu na Turaga. Meu kaya ga vakalekaleka, vei kemuni vakayadua sara o ni vakatokai tu me Yalododonu e na Gauna Oqo—ke da dau vakaweleweletaka na noda saumi ikatini, se na isolisoli tale e so, eda na vakaweleweletaka tale ga na veika tale e so ka na vakavuna na noda tubu tiko vakayalo, me yacova ni sa yali vakadua sara mai vei keda e na dua na gauna na yalo ni Kosipeli, me da sa bula tale tu vakabutobuto, ka sega ni kila tale na sala me da muria (DBY, 174).

Sa gadreva na Turaga na ikatini ni ka kece ga sa soli mai vei au; sa noqu itavi gona meu sauma na ikatini ni ka au rawata mai na noqu manumanu kei na veika kece tale e tu vei au, ka dodonu me ra cakava vakakina na tamata kece ga. E na rairai lasika beka na taro, “Me vakayagataka ivei na ikatini?” Me tara kina na valetabu ni Kalou; me vakatetei kina na iyalayala kei Saioni; me ra vakau kina na iTalatala Qase e na ilakolako ni kaulotu, me ra laki vunautaka kina na Kosipeli, ka me ra qaravi tiko kina na nodra dui vuvale. Ni oti e dua na gauna lekaleka, eda sa na qai rawa ni laki curuma na veivaletabu, me da laki vakaivotavota kina e na veivakalougatataki e vuqa, na isolisoli vakalomalagi, ni da talairawarawa tiko ki na ivakaro me baleta na saumi ikatini. Ni na duri na veivaletabu e na veiulunivanua oqo, e na veibuca ni Yasana kei na veibuca ni Yasana ka tarava, me yacova sara ni sa na robota yani na veibuca ni veidelana oqo. Eda namaka tiko me tara na veivaletabu e so e na vuqa sara na veibuca. Eda na lakova beka na Endowment House, ia, me da rawata rawa mai vua na noda Bisopi na noda ivolatara, ni da sa sauma tiko mai na noda ikatini (DBY, 178).

Sa noqu itavi meu vakatulewataka vakavinaka na kena vakayagataki na ilavo ka kumuni e na nodra saumi ikatini na Yalododonu, ka sega ni ra vosa kina o ira vakayadua na iTalatala Qase ni Matanitu, ka ra nanuma ni ra taukena na umailavo mai na ikatini (DBY, 178).

Kevaka o ni laiva me vakacilava na tevoro ina nomu vakasama niu sega ni veiliutaki tiko vakadodonu vei kemuni, ka o ni laiva me tiko ga kei kemuni na veivakasama oqori, au yalataka ga vei kemuni ni na vakavuna na nomuni vukitani na vakasama oqori. O ni vakalaiva tiko mo ni dau vakatitiqataka na veika sa vakatakila mai na Kalou, o ni sa na luluqataka na masu e na dua na gauna i muri, ka besetaka na Saumi iKatini, ka dau veivakadiloi tiko vei ira na vakaitutu e na Lotu. O ni na tukuna tale tiko na veika e so era dau cavuta na vukitani, “Sa sega ni dau vakayagataki tiko vakadodonu na umailavo ni Saumi iKatini” (DNSW, 29 Oks. 1876, 1).

Ni da bula sausauvi, eda lomasoli me da solia kece na veika e noda, ka vakadeitaka tale ga ni nona na Tamada mai Lomalagi na veika eda taukena tu oqo.

Au sa dau raica mai e na raivotu na isoqosoqo lewenilotu Yalododonu vakalomalagi, ka dui qarava yadudua na lewena na nodra itavi e so e na mamakutu, me ra saga tiko na kena yaga ki na isosoqoso raraba, ka sega ni nanuma ga na nodra dui rogo se dokai vakayadua kina; ka sa rui totoka sara vakalevu na veika e so au sa raica rawa, me vakalasikati e na vakasama vakatamata, kei na veika uasivi e yaco e na kena taracake na Matanitu ni Kalou, kei na kena drodrovi vuravura na ivalavala dodonu. Eda na rawata beka na veika talei oqori? Eda sa vakarautaka beka e na e na Gauna Oqo, ka raica ni ra sa vakarautaki me dua na vuvale levu gauna oqo, me da laki vakamuria na ivakarau ni lewa vakapeteriaki, ka ra na bula kina o ira era yalodina, ni bera ni ra qai okati me ra nona na Kalou? Eda sa vakadinadinataka vata mai ni sa na takali na bula vakavuravura oqo, ka na takali vata kei na kena ogaoga, vakanuinui, yalokocokoco, vakaliuci ni iyau, dokai ni itutu, kei na bula veilecayaki vakayago, ka sa na lesu tale na yalo vua na Kalou, ka a solia mai, eda sa na vakamuria ga na veika kece sara e lavaka mai vei keda, me rawa kina ni da laki bula vata e na noda vuvale levu; ni na raraba sara na gagadre ni lomada, ka na duavata ga na lomada. Na cava beka na vuna eda na sega ni bula kina vaqori e na vuravura oqo? (DBY, 181).

Eda na donuya beka na gauna, me da vakarautaki ka tuvai kina me dua ga na noda vuvale? E na yaco vakakina. Eda na kila rawa beka na kena sala? Io. … O ni nanuma beka ni da na duavata rawa? Ni da sa lesu tale vua na Tamada ka noda Kalou, eda na laki diva li me da vakavuvale vata kina? E sega li ni na ulu ni noda sasaga, ka noda gagadre, me da okati me da luvena tagane na Kalou, se luvena yalewa o Koya sa Kaukaua Sara, me da vakaivotavota e na nona vuvale, kei na yavu ni vakabauta ni nona vuvale, me da vakaivotavota e na veika e nona na Tamada, me da vakaiyautaki kina, e na veika sa taukena, e na nona kaukaua, e na nona itutu cecere, e na nona kila ka kei na vuku? (DBY, 179).

Ni da sa duavata kina, eda na duavata vua na Turaga. Ni na duidui tiko na kedra irairai. Ka so vei keda e na roka dravu, se karawa me vaka na roka ni takali, se butobuto tale ga na yalokanimatada. E na duidui na keda ibulibuli yadudua, e na veika eda dau cakava, e na noda ivakarau kei na noda sasaga me da vakumuna, veivotayaka, se vakayagataki ni noda gauna, noda taledi, noda iyau kei na veika kece sara sa solia mai vei keda na Turaga e na noda ilakolako e na bula oqo, ni na duidui tiko ga na veika e baleti keda, me vaka ga na duidui ni keda ibulibuli. Sa vinakata ga me dusimaka vei keda na Turaga me da dau muria na nona ivakarau, ka talairawarawa ki na nona vosa. Me vauci keda kina vakayadua me da laki vuvale vata (DBY, 180).

Eda via raica taucoko na kena sa tauyavutaki na noda itabatamata, ka ra na gugumatua, ka yalodina, ka bula manini na lewena yadudua (DBY, 180).

Kua ni dau diva e dua na ka o na sega ni rawata, mo bula manini ka lewa vinaka na veika ni nomu bula (DBY, 180).

Ni solia na Turaga na nona ivakatakila, ka dusimaka kina na noda itavi, me da dau sausauvi e na veika e noda, me rawa ni ra kila kina na ibalebale ni veika kece sara, ni ra sa vakamuria tiko na veivosa ni ivakatakila oqori, ni na lavaki kina me ra solia na veika kece sara e sega ga ni nodra, vua na kena itaukei dina. Sa vakakina na kena ilakolako edaidai (DBY, 178).

Sa tukuna mai na Turaga na lomana, me ra veiyalayalati vua o ira na nona tamata, me vaka e a vakayacora o Inoke kei ira na wekana, ka lavaki taumada vei keda, ni bera ni da qai raica na kena tauyavu na iTeki ni Lomadonu kei Saioni, ka ni na vakavatukanataki kina na kaukaua kei na lagilagi ni Kalou, ka ra vakaivotavota ga kina, ka sotava na kena marau o ira na yalosavasava (DBY, 178).

E dua tale tiko na ivakatakila [e rairai beka ni Vunau kei na Veiyalayalati 42] … ka vakamacalataki kina ni namaki vei ira yadudua era lako i Saioni, me ra sauva na nodra iyau kece ki na Lotu i Jisu Karisito ni Yalododonu e na Gauna Oqo. E dua na ivakaro taumada na ivakatakila oqo … ka a soli mai vei keda e na noda sa tauyavu rawa mai vakalotu, me dua na isoqosoqo, me Matanitu ni Kalou e vuravura. Au a se raica rawa mai na gauna oya, ka nanuma tale ga edaidai, ni dua oqo na ivakatakila ka na soli mai muri, me ra tugana i lomadra ka kila vinaka sara na lewenilotu, kevaka era vinakata mai vu ni yalodra, ka okata me baleti ira, ka nodra isolisoli, me ra vakalougatataki kina, me ra dau nanuma ka vakamareqeta sara (DBY, 179).

Sa vakaiyautaki tu vakalevu na vuravura, na koula kei na siliva e na loma kei na dela ni qele, ka veivotayaka na Turaga vei ira na tamata yadudua— vei ira na tamata ivalavala ca, ka vakakina vei ira na ivalavala dodonu—me vakadikeva ga na sala era na taurivaka kina, ia e nona kece ga. Sa solia tu vei keda e dua na kena iwase levu. … Ia, e sega ni noda, me da tovolea ga me da kila na sala e vinakata na Turaga me da vakayagataka kina, na veika sa soli tu oqori vei keda. Ke sivia tale na ka eda cakava, me da malele ki na imatau se na imawi, eda sa na kalawaca yani na ivakarau tawadodonu ni bisinisi. Sa noda bisinisi ga me da qarava ga na veika sa gadreva tu na Turaga me da vakayacora, mai na veika sa solia tu vei keda, ka me vakayagataki e na sala sa virikotora mai, se da solia taucoko sara, se na kena ikatini, sa na kena tubu ga (DNW, 23 Epr. 1873, 4).

Se vakaevei sara tale na dede ni noda bula, me da qai kila rawa ni sega ga ni dua na ka eda taukena tu me da qaravi koya kina na Turaga—ni sa nona ga na Tamada mai lomalagi na veika kece ga; ni Nona na veiulunivanua oqo; na veibucabuca, na veikaulelevu, na veiuciwai, na qele; me vakalekalekataki ga, na vuravura kei na ka kece sara sa tu kina, e na kena lagilagi? [raica na V&V 104:14–18, 55] (DNW, 20 June 1855, 5).

Na cava ga eda sa bau solia vakatabakidua vua? E sega sara ni dua na ka. Eda sa solia ga na veika e so, me da rawata kina e dua na ka vinaka cake, e na veigauna kece sara eda sa vakauqeti kina; eda sa solia vua na noda lecaika me da rawata kina na vuku, kei na noda yalowai, me da rawata kina na veika vakayalomatua (DNW, 24 Oks. 1854, 1).

Me da vakasamataka mada ke sa tukuni mai vei keda me da biuta tani na veika kece sara eda taukena tu oqo, eda na okata beka oqori me solibula? E na maduataki vakalevu o koya ka kaya ni vakakina; ni sa i koya ga oqori na sala me rawata kina na kila ka, na yalomatua, na kaukaua, kei na lagilagi, me cokonaki koya ki na nona laki vakaisalataki, me rawata na nona matanitu, nona itutu vakatui, kei na lewa vakamatanitu, me laki vakaiukuukutaki kina e na lagilagi kei ira na Kalou ni vuravura tawamudu. Ke sega oqo, eda na sega sara ni rawata na veika eda nanamaki tiko kina (DNW, 3 Oks. 1854, 2).

Meu kaya vei kemuni na ka mo ni cakava, mo ni laki rawata kina na bula cecere vakalomalagi, ka na dredre sara ni o na laki rawata, me vakavo ke o vakamuria na sala oqo. Ke tu e so na ka o ni dau taleitaka, ka na vakalatilati mai na nomuni solia vakatabakidua vua na Turaga, mo vakatulewataka mada na ka oqo e na kena itekivu, me rawa ni taucoko kina na veika o qarava tiko (DNW, 5 Jan. 1854, 2).

Na cava beka e vakataotaka tiko na noda bula savasava me vakataki ira na lewenilotu i Inoke? Meu vakamacalataka vakalekaleka ga vei kemuni. E vu ga ni o ni sega ni tomana tiko na nomuni bula, mo ni laki rawata kina: oqo ga na vuna taucoko. Ke se sega ni yaloqu taucoko tiko na qarava na cakacaka qo, au na solia taucoko na noqu gauna, noqu taledi, na noqu buno, kei na noqu iyau, me yacova sara ni sa qai yaco na lomaqu meu bula vakakina; meu raica ni na vakayagataki na ligaqu ki na cakacaka ni Kalou, me yacova ni sa qai muria yani na yaloqu (DNW, 5 Jan. 1854, 2).

Au sa mai kaya qo vei kemuni na sala mo ni muria, mo ni laki bula kina vakalou. Me dau liu ka cecere tiko na noda vakanananuma na Turaga; na kena qaravi tiko ga na nona cakacaka kei na matanitu, ka lavaki kina me da dau vakaliuca tiko ga (DNW, 5 Jan. 1854, 2).

Me iUlutaga ni Vuli

Ni da saumi katini, e soli kina vei keda na sala me da cau kina ki na cakacaka ni Turaga, e na noda vakasuka tale vua e dua na iwasewase lailai ni nona iyau.

Mo raica mada na iyatuvosa yadudua ka vakayagataka kina o Peresitedi Young na malanivosa “ikatini,” ka qai vola na veika kece ka cavuta me noda icolacola e na saumi ikatini. Na cava beka e okati me ikatini, ka sa lavaki beka vei cei na kena saumi? (Raica tale ga na V&V 119:3–4.)
Na cava beka na vuna e kaya kina o Peresitedi Young ni sega ni dua e na rawa ni solia? (Raica tale ga na Mosaia 2:19–24; V&V 104:14–18, 55.) O cei beka na ivurevure ni veika taucoko sara eda taukena tu oqo, me wili tale ga kina na veika eda sauma me noda ikatini? Me vakaevei na noda itovo ni rai, me baleta na ciwa na ikatini ni veika e taukena na Turaga, ka sa soli tale ga me da qarava? (Raica tale ga na Jekope 2:17–19.) E na yaga vakaevei beka na itovo ni rai oqo, me da kila vinaka kina na ibalebale ni Malakai 3:8–12?
Ni wilika vakavinaka na 2 Veigauna 31:5–6. E na gauna cava beka era dau sauma kina o ira oqori na nodra ikatini? Me vakaevei beka na noda itovo ni rai me baleta na ikatini?

Sa noda itavi me da saumi katini, ka veitokoni vei ira na ivakatawa ni ilavo mai na ikatini.

Na cava beka na ibalebale ni nona kaya o Peresitedi Young ni sa vinakata na Turaga na “ikatini ni … iwasewase ni noqu bula”? E na veisala cava soti beka e rawa ni o “solia kina na ikatini ni nomu bula” me taracake kina na matanitu ni Kalou? O sa kune kalougata beka vakaevei e na nomu sa solia mai na nomu gauna kei na nomu taledi, me tara cake kina na matanitu ni Kalou, me ikuri ni nomu dau saumi ikatini?
Na cava beka eda na laki sotava, me vaka e vakamacalataka o Peresitedi Young, ni da sega ni dau saumi ikatini? E na vakamawe vakaevei ki na Lotu kei ira na lewenilotu yadudua na kena sega ni saumi na ikatini?
Na cava beka e kaya o Peresitedi Young ni vakayagataki kina na umailavo ni saumi ikatini? O cei soti beka e dau qarava na kena vakayagataki na ilavo mai na ikatini? (Raica tale ga na V&V 120.) E vakaevei beka na itovo ni rai nei Peresitedi Young me baleta na noda via taroga na lewa ni kena vakayagataki na umailavo ni ikatini?

Ni da bula sausauvi, eda lomasoli me da solia kece na veika e noda, ka vakadeitaka tale ga ni nona na Tamada mai Lomalagi na veika eda taukena tu oqo.

Na cava na kena ibalebale ni da “vakaivotavota e na veika e nona na Tamada,” o keda “na isoqosoqo lewenilotu Yalododonu e na Gauna Oqo”?
Na cava na vuna e tukuni kina me baleta na ivakavuvuli ni bula sausauvi e “ivakatakila ka na soli mai muri, me ra tugana i lomadra ka kila vinaka sara na lewenilotu, kevaka era vinakata mai vu ni yalodra, ka okata me baleti ira, ka nodra isolisoli, me ra vakalougatataki kina, me ra dau nanuma ka vakamareqeta sara”?
Na cava beka na vuna e solia kina na Turaga i ligada me da taukena na iyau? Na cava beka na ka e lavaki vei keda, ni da dau qarava na iyau ni Kalou? Me vaka e vakamacalataka mai o Peresitedi Young, na cava beka e tukuni ni “noda bisinisi,” e na vuku ni ikatini kei na veika me da sauvaka? E na tukuni beka vakaevei ni cala tale ga na noda vakayacora vakasivia, me vaka ga na noda dau vakayacora vakalailai ga?
Na cava beka e dodonu me da sauva vua na Kalou, ke da namaka me da vakaivotavota e na veika taucoko e nona? Na cava beka na vuna? (Raica tale ga na V&V 84:38.) Mo vakamacalataka vakamatata na veisala e so e rawa ni o sauva kina na veika o taukena, se na veika e baleti iko, vua na Tamada mai Lomalagi? Mo qai rawata kina vakacava na kena kalougata, kei iratou e na nomu vuvale, o ira na lewenilotu, kei ira na nomu veikilai?