Veivakabulai e na Vuku i Jisu Karisito

A taroga o Peresitedi Brigham Young, “Era na mate vakayalo beka e so na wekada? O na levea beka vakacava na cudru nei Koya sa Kaukaua Sara? E na veigauna mai liu, me vaka au sa dau kaya kina, me vaka au sa dau vakavoqataka mai e veigauna e na noqu bula, e na veivanua kece ga au dau vunau kina, au sega ni dau vakarerei ira e na veika me baleti eli, kei na nodra sa na cudruvi. Au sa dau saga mai vakavuqa—au a tovolea e na siga ni Vakacecegu (Sabato), kau tovolea tale ga nikua meu goleva na tikina oqori—na rarawa era na sotava o ira na ivalavala ca. Era na sotava dina na veika rarawa; ia au na sega ni goleva tale e dua na ka, na nodra vakabulai wale na tamata” (DBY, 388). Sa dau vunautaka o Peresitedi Young ni “ra na tucake tale na tamata kece ga” (DBY, 391). A dau vakamacala me baleta na veivakabulai, ka na “tarai ira na tamata kece ga” (DBY, 389). Ka dau vosa tale ga me baleta na nodra rawata na bula tawamudu o ira era dau “vakamuria vakadodonu na veika sa lavaki tu e na [lawa] ni Kalou, ka dau sasaga voli ga e na yalodina” (DBY, 387).

iVakavuvuli i Brigham Young

Ni na drodrova yani na tamata kece ga na veivakabulai nei Jisu Karisito.

Mo ni raica mada na nona yalovinaka, na nona vosota vakadede, na lomavinaka, kei na qaqaco vinaka ni nona itovo ni veiwekani vakaitubutubu ni Tamada, ka noda Kalou, e na kena vakarautaki na sala, ka cokonaki mai na yavu me ra vakabulai kina na luve ni tamata—e sega ni o ira wale ga na Yalododonu e na Gauna Oqo—e sega tale ga ni o ira wale ga ka ra vakavulici mai e na yavu taumada ni lawa vakasilesitieli, me ra vakabulai kina na tamata kece ga. E veivakabulai ka oka kina na tamata kece ga—me ra vueti kina na tamata taucoko (DBY, 388).

Era na lewevica li era na taqomaki? O ira ga e na sega ni vakalasuya se cakitaka na kaukaua kei na nona bula na Luve ni Kalou—o ira kece ka ra sega ni vakacala na Yalo Tabu (DBY, 387).

E na vakaivotavota na veimatanitu kece ga e na isolisoli oqo; sa okati taucoko ki na nona Veivueti na iVakabula. Sa mai sotava kina na mate e na vuku ni tamata yadua; era sa na tu vakadua ki na qeteqete ni ligana, ka na veivakabulai vei ira yadudua, me vaka sa tukuna mai, me vakavo ga o ira na luve ni veivakarusai; ka sa tu e na qeteqete ni liga i Tamada na ibulibuli kece ga ni ligana. Sa na veivueti o koya ki na noda vuravura, na tamata kece ga era bula kina, na veimanumanu e tu e delana, na ika e loma ni wasawasa, kei na veimanumanu kila, na ika e wasawasa, kei na veimanumanu vuka e lomalagi, na veimanumanu lalai, kei na veika qasi kece ga, kei na veika kece ni vuravura moqimoqili oqo,—sa tu taucoko e na qeteqete ni ligana na iVakabula (DBY, 388).

Sa volai tu e na nona iVola ni Bula na Lami na yacadra na luvena tagane kei na luvena yalewa o Atama. E na dua beka na gauna me ra kau tani mai kina? Io, ni ra yaco me ra luvena na veivakarusai, ka sega tale ni dua na gauna. Sa soli tu ki na tamata yadua me ra biuta tiko ga e kea me tawamudu. Ke ra vakawalena na isolisoli oqori, e na bokoci tani mai kina na yacadra, ia e na sega ni yaco rawa e liu. Sa volai tu kina na yaca ni vuvale vakatamata, ka na biuti ira tiko ga e kea, me yacova sara ni ra sa kila yadudua na ivakavuvuli dina, ka rawa ni ra na saqati koya tale, ka rawa tale ga ni vakacala na Yalo Tabu; me ra qai bala sobu sara kina i eli, me qai boko kina vakadua na yacadra mai na nona iVola ni Bula na Lami (DBY, 387–88).

E na ka taleitaki sara me da kila ni da sa vakabula kece na ka sa solia mai vei keda na Tamada na kena [lewa]. A kaya o Jisu ni sega ni lakosese mai vua e dua na tacina, o ira ga na luve ni veivakarusai. Me da vakabula sara na veika bula kece ga sa biu mai i ligada (DBY, 388).

E virikotori mai na noda lotu me baleti keda yadudua na lewe ni vuravura oqo. E na sega ni totogitaka e dua na kena iwase me ra laki tagiyaso voli me tawamudu, e dodoliga ga yani ki na nodra vakabulai na luvena tagane kei na luvena yalewa o Atama kei Ivi, me vueti ira tani mai na valeniveivesu, me dolava na katuba, ka sereka na dali era sa vesuki kina, me ra laveti kina na tamata yadudua era na laki rawata na bula tawamudu (DBY, 389).

A waraka tu o lomalagi na nodra vakabulai na tamata. Sa dau tagi na lomalagi e na vukudra na tamata, ni ra sa rui domodomoqa, ka yalokaukaua, e na nodra tawa vakabauta, ka dau lokuyara vakalevu e na vakabauta kei na cakacaka (DBY, 388–89).

Ni vakatakila mai na Kalou vei Josefa Simici kei Sidney Rigdon, ni sa vakarautaki tu na nodra tikina na tamata kece ga, me vakatau tiko mai na rarama era sa cilavi kina, kei na nodra vakuai ira mai na ivalavala ca, ka dau vakatovotovotaka tiko ga na veika vinaka, era vakacauoca kina na lewe vuqa, ka ra vukitani sara e so mai na lotu, ni na sega ni cudruvi ira na Kalou na tawalotu kei ira na gone, ka vakarautaka ga na nodra vakabulai, e na kena gauna dodonu, vei keda na tamata kece ga, me lomani ira vakalevu kina na yalodina kei na yalosavasava, kei ira era sa lomadina, se ra lewena e dua na matalotu se sega. Sa ivakavuvuli vou ki na itabatamata oqo, ka lewe vuqa era a vakatarabetaki kina (DBY, 390–91).

E sega li ni vakanananu lagilagi ni sa virikotori tu na veimatanitu, na veitikina vakaiukuuku, ka nodra ivakavakacegu na luvena tagane kei na luvena yalewa o Atama, me vakavo ga o ira na luve ni veivakarusai? Era na sega ni vakaitavi e na imatai ni tucake tale na tamata kece ga, ka vuqa tale beka ga era na calata tale na kena ikarua, ia era na vakaturicake yadudua sara (DBY, 391).

E na vuku ni Veisorovaki i Karisito, era na vakabulai vakayadua e na matanitu silesitieli o ira ka ra dau yalodina e na cakacaka vakalotu ni kosipeli.

Sa dolavi na [bula vakalou] vei ira era sa bula mai liu, kei ira era bula tiko e na gauna oqo. Sa yaco mai na Kosipeli. Sa vakatetei yani i vuravura na itukutuku dina, kei na rarama, kei na yalododonu, ka ra vakabulai wale ga e na matanitu silesitieli ni Kalou o ira era vakabauta na kena ivakavuvuli. E vuqa vei ira ka ra na sega ni vakabauta, e na vuku ni nodra lecaika, e na ivakavuvuli ni nodra qase, vakasama vakatevoro, kei na ivakavuvuli lasu ni tubudra, era na laki rawata ga na matanitu vinaka ka talei, ka ra na sotava na veika talei e vuqa, ni ra na ciqoma tale ga na veika e vuqa, ka uasivi cake mai na kena e vakasamataka tu na tamata, ke sega ni vakatakilai vakayalo mai vua (DBY, 389).

Sa talaucaki tu na veimalanivosa oqo [raica na V&V 88:21–24] na vosa ka a tauca o Jisu e na nona kaya, “Sa vuqa na tikina e na vale nei Tamaqu” [Joni 14:2; V&V 98:18]. Au sega ni na tukuna rawa ga na kena levu; ia e sa tukuni vakamatata ga na kena e tolu oqo: na matanitu silesitieli, na kena ka cecere duadua; na teresitieli, na kena e rukuna; kei na tilesitieli, na kena ikatolu. Ke da saga vagumatua me da dau wilika na veika sa tukuna mai na Turaga vei ira na nona tamata e na veisiga e muri oqo, eda na qai raica kina ni sa vakarautaka na veika e baleti ira kece sara na lewe i vuravura; na veitamata yadua ka sa dau gadreva ka saga mai, me vorata na ivalavala ca, ka saqata na veika tawa savasava e na nona bula, me bula kina e na sala, me veidonui kina e na lagilagi ka na laki soli vua. Oi keda kece eda sa vakaivotavota mai e na ivakavuvuli taucoko ni nona Kosipeli na Luve ni Kalou, se na Matanitu vakalomalagi ka sa yaco mai oqo i vuravura, era sa na vakaivotavota tu e na lawa oqori, na veicakacaka vakalotu, na ivunau kei na ivakatakila ka na vakarautaki, mai na noda dau talairawarawa kina, ka me da laki taukena kina na matanitu silesitieli, me da cabeta yani na iserau nei Tamada kei na Luvena (DBY, 391).

Se vakaevei sara na kena irairai—keu sa rawa ni kila e dua na dina ni sa vakarautaki na lomadra na tamata me ra vakayacora na lomana na Tamada mai Lomalagi, e dina beka ke ra qai laki butusevata tale, ka tarabe beka, e na vuku ni malumalumu ga vakatamata, era na vakabulai ga (DBY, 389).

Ke da rawata na veivakabulai e na kena sala sa vakarautaki vei keda, sa dodonu me da dau yalodina e na noda vakasama kei na vakanananu ni lomada, e na noda veimaliwai vakaveiwekani, e na sasaga eda dau goleva, e na veika eda sa dau tukuna, e na veigacagaca kece sara ni noda bula, ka sega ni dau ririko ka kauai ki na ivakavuvuli lasu kece ga, na itukutuku lasu eda na dau sotava (DBY, 389).

E dina ni duavata ga na noda gagadre vakatamata, ia me nanumi ga ni ka ni tamata yadua na veivakabulai; me da dui saga vakaikeda na tamata. E vakaibalebaletaki na veika au tukuna oqo ki na veika tale e so, kau na sega ni vakamacalataka rawa eke, ia meu tukuna mada ga e dua na kena idusidusi. Era lewena tu oqo na Lotu e so era dau nanuma me ra laki vakabulai mai na nodra yalododonu e so tale na tamata. Era na dau butusevata e so na nodra ilakolako. Era na tadu yani e so e na gauna e sogo kina na matamata, e na tasogo kina vei iko na katuba; mo qai kerea kina e dua ka sa dau yalodina mai, e na loloma levu nei Jisu Karisito, ka ra sa curuma yani na matamata silesitieli, me ra laki dolava vei iko na matamata; ia e sega ni nodra itavi me ra cakava oqori. Sa na vakaoqori na ka e na yaco vei ira ka ra dau vakanuinui ni ra na laki vakabulai e na vuku ni nodra yalododonu, kei na nona sasaga o Baraca [se Sista] Oya. Meu kaya tale mada vei kemuni, mo ni dau vakabulabulataka e na nomuni bula na yalododonu kei na yalodina, ka pasipote duadua ga ki na marau vakasilesitieli (DBY, 390).

Ke muri cala beka o Baraca Brigham, me sogolati kina vua na katuba ni Matanitu vakalomalagi, e na sega ni dua tale e bilitaki kina, o Baraca Brigham duadua ga. O au duadua ga na tamata e vuravura oqo, se lewe i lomalagi, se na lewe i eli ka na bilitaki kina (DBY, 390).

E na yaco vakakina vei ira yadudua na Yalododonu e na Gauna Oqo. E ka ni tamata yadua na veivakabulai. O au beka ga e rawa niu saga na noqu vakabulai. Ni sa soli mai na veivakabulai, au rawa ni na besetaka se ciqoma. Ia, niu sa ciqoma, au sa na goleva vakatabakidua e na yalomalumalumu na Vuna, e na noqu gauna taucoko ni bula, kei ira tale ga era sa lesi mai me ra vunauci au; ia e na noqu besetaka, au sa na muria ga na lewa ni lomaqu, ka biuta vakatikitiki na nona lewa o koya na noqu Dauniveibuli (DBY, 390).

E sega tale ni dua e na laki vakabulai tale vakasivia; o ira vakayadua era na vakabulai, se vakabulai e na gauna mai muri, era na rawata ga na bula, ka na qai sagai tale tiko ga me rawa na veika kece sara, ka vinakati me vakatovotovotaki kina na igu ni tamata yadua (DBY, 387).

E na vanua e rau vakaitikotiko kina na Kalou kei Karisito, oqori sara ga na matanitu—na matanitu silesitieli (DBY, 388).

O ira vakayadua na tagane kei na yalewa, era na vinakata me ra laki vakaidabedabe e na matanitu silesitieli, era na raica, ni ra na dau sotava na veika dredre e na veisiga kece ga (DBY, 392).

Ia, e na vukuna o koya ka na laki vakabulai e na matanitu silesitieli ni Kalou, ka sega ni se vakarautaki e na nona laki vakaitikotiko e na vanua savasava ka vinaka, e ka lialia sara ka sega ni dodonu; kevaka e dua beka e bula tiko ka nanuma ni na laki bula rawa e na iserau nei Tamada kei na Luvena e na na nona dau valataka ga, ka sega ni bulataka na nodra vakabauta vakalotu, era na vakacalai kina, o koya gona, mai na kena totolo ga ni da lewa rawa na veika e so me vinaka cake kina na noda lotu, na kena vinaka cake vei keda (DBY, 392).

Sa ivakarau ga kei lomalagi me vakasoqoni na ka kece ga; me ra vakabulai o ira vakayadua sara e rawa ni ra vakabulai (DBY, 387).

Me ra kila vakavinaka tiko na tamata ni rawa ni ra na vakabulai o ira vakayadua sara na tamata e vuravura oqo, me ra laki rawata kina na bula e na Matanitu ni Kalou, kevaka e gadreva me yaco vakakina (DBY, 387).

O ira kece ga era sa mai bula oti e na vuravura oqo, se me ra qai mai bula e muri, e na soli vei ira na galala me ra ciqoma na ivakavuvuli ni Kalou. Era na tiko kei ira o ira na i Apositolo, Parofita, kei ira na italatala e kea, me vaka era sa tu oqo vei keda edaidai, me veidusimaki vei ira e na veisala ni dina kei na yalododonu, ka me dusimaki ira lesu tale vua na Kalou. Era na rawata vakayadua na veivakabulai kei na bula tawamudu (DBY, 387).

Kevaka eda sa duavata e na noda vakabauta, ka da sa duavata vakakina e na noda laki rawata na noda inaki me da rawata na matanitu silesitieli, kau na laki rawata beka o au, e na noqu sasaga ga, na matanitu oqori, e na yavu vata ga oqori, o ni sa na rawata tale ga o kemuni, kei ira kece ga era sasaga kina (DBY, 387).

E na laveti ira na Luvena yalodina o Tamada Vakalomalagi, me ra laki bula e na nona iserau, e na kaukaua kei na lagilagi.

Era sa votai vakatautauvata beka e na isolisoli e vuqa o ira na tamata yadua? Sega, e sega sara ni dina? Eda na laki tautauvata beka e na matanitu silesitieli? Sega [Raica na V&V 131:1–4.] Era vakaturaga cake e so na yalo mai vei ira tale e so; ka sa dodonu me ra votai vakalevu cake e so mai vei ira na kena vo. E na laki tu tale ga na duidui e na vuravura ni yalo me vaka o ni sa raica tu eke, ia e duavata ga na nodra itubutubu, o koya na Tamada duadua ga, na Kalou duadua ga (DBY, 391).

Sa inaki, na gagadre, na lomana, kei na vakasama ni Turaga me ra bula vakalou na lewe i vuravura kece ga, me laki tawana na itutu vakatui, na veimatanitu, na veitikina, kei na itutu ka dodonu me nodra. … Me ra vakavolekati mada ki na ivalavala ca, kei na ualoka ni bula vakayago, me ra vakadinadinataki ira kina; sa na qai tokoni ira kina na Kosipeli, me laveti ira, ka vakaduavatataki ira, me cilava na nodra vakasama, ka vakaduavatataki ira ga e na vuku i Jisu na Turaga, me duavata kina na nodra vakabauta, masumasu, vakanuinui, nodra sasaga kei na gagadre (DBY, 391–92).

Na kedrau duidui na yalododonu kei koya na ivalavala ca, na bula tawamudu se na mate, na marau se na rarawa oqo, vei ira era sa na laki bula vakalou e na sega tale ni vakaiyalayala na veika e nodra, e na laki vakurivi tiko ga na nodra isolisoli, ka sega ni mudu na nodra matanitu, nodra itutu vakatui, nodra veiliutaki, nodra ivotavota, kei na kaukaua sa lesi vei ira, ka ni ra na torocake tiko ga me tawamudu (DBY, 63).

O cei beka e rawa ni vakamacalataka na nona bula vakalou na tamata? O ira ga era kila vinaka tu na ivakavuvuli dina ni vuravura tawamudu—na ivakavuvuli ka baleta na bula kei na veivakabulai. E na sega ni yali mai vua na tamata na nona isolisoli ka taukena tu oqo, e na nona sa vakaturicake ki na bula vakalou; ia, ni goleva tiko ga na sala ni bula, e na qai vakaikuritaki tiko ga na nona kaukaua, me vinaka cake tiko ga na nona bula e na ikalawa yadudua sara ka na kalawaca yani (DBY, 392).

E oka ki na matanitu Silesitieli na matanitu eda bula kina oqo na lewenilotu; eda vakarautaka e na matanitu oqo na bula e na kedrau iserau o Tamada kei na Luvena. Me da bula kina e na kena ivakarau, me da laki rawata kina na kena lagilagi. Sa yalataka mai vei iko na Kalou. Sa yalataka mai vei iko o Jisu, kei ira na i apositolo kei na parofita e na gauna mai liu, kei ira e na noda gauna oqo, ka ra sa yalataka mai vei iko ni o sa na laki saumi e na veika kece ga o gadreva e na yalododonu e na mata ni Turaga, ke o bula tiko me veidonui kei na isolisoli e so oqori (DNW, 31 Okt. 1860, 1).

Sa icavacava ni nona bula na tamata na nona laki rawata na veivakabulai, ka vakakina vei ira na agilosi, kei ira na Kalou; oqori na bula tawamudu— na bula edaidai, na bula mai liu, na bula tale ga e muri. E rawa ni da laki vakaivotavota e na bula oqo o keda na tamata, kevaka eda na dau vakamuria sara vakadodonu na veika sa lavaki mai e na lawa ni Kalou, ka dau gugumatua tiko ga (DBY, 387).

Ke tu vei iko na koula kei na siliva, me kua ni vakataotaki iko, kei na nomu itavi. Au na tukuna vei kemuni na veika mo ni vakayacora, mo ni laki rawata kina na bula vakalou, o na sega ni rawata, ke o sega ni muria na sala oqo. Ke dau vagolei vakatani na lomamu mai na veika e so, ka vakataotaka sara na nomu vakacabora vua na Turaga, mo vakacabora mada e liu na veika oqori, me rawa ni qai taucoko kina na veika taucoko o sa vakacabora. … Ke se sega ni yaloqu taucoko tiko na qarava na cakacaka qo, au na solia taucoko na noqu gauna, noqu taledi, na noqu buno, kei na noqu iyau, me yacova sara ni sa qai yaco na lomaqu meu bula vakakina; meu raica ni na vakayagataki na ligaqu ki na cakacaka ni Kalou, me yacova ni sa qai muria yani na yaloqu. … Au sa mai kaya qo vei kemuni na sala mo ni muria, mo ni laki bula kina vakalou. Me liu ka cecere tiko na noda vakananuma na Turaga; na kena qaravi tiko ga na nona cakacaka kei na matanitu, ka lavaki kina me da dau vakaliuca tiko ga (DNW, 5 Jan. 1854, 2).

E na sega ni laki vakabulai e dua na tamata ka lako yani ki na iserau nei Tamada, e na vuku ga ni Kosipeli i Jisu Karisito—ka tautauvata kina kei ira tale na kena vo. Sa tu na yavu ni nona veiqaravi na Turaga, na nona sala, kei na nona cakacaka; e na qai vakacavara sara. Sa saga tiko ga e na nona igu o Jisu me vakasavasavataka ka vueta na vuravura, me vakalesui ira tale na tacina kei na ganena ki na iserau ni Tamada. Me da saga vata kei koya na kena vakasavasavataki na lewe ni vuvale yadudua ni tamata, me da vakarautaki kina e na bula e na nona iserau na Kalou e na nona Matanitu (DBY, 389).

Me iUlutaga ni Vuli

Ni na drodrova yani na tamata kece ga na veivakabulai nei Jisu Karisito.

E na sala cava beka e vakatokai kina na veivakabulai mai vei Jisu Karisito me “veivakabulai ka oka kina na tamata kece ga—me ra vueti kina na tamata taucoko”? E vakavatukanataki beka vakaevei e na nodra vakabulai kina na tamata kece ga, “na itovo ni veiwekani vakaitubutubu” ka tu vei Tamada Vakalomalagi vei ira na Luvena? O kune marau beka vakaevei mai na nomu kila na veika oqo?
A vakamacalataka o Peresitedi Young ni ra a vukitani e le vuqa, e na nona vakatakila na Kalou vei Josefa Simici kei Sidney Rigdon, ni rawa ni ra na vakabulai na tamata kece ga. Na cava beka na vuna e dredre sara kina vei ira na lewenilotu e so na ivakavuvuli oqori? Me da qaqarauni beka vakaevei e na gauna oqo, e na nodra ivakavuvuli e so na noda parofita kei na i apositolo?

E na vuku ni Veisorovaki i Karisito, era na vakabulai vakayadua e na matanitu silesitieli o ira ka ra dau yalodina e na cakacaka vakalotu ni kosipeli.

Na cava beka o nanuma ni ibalebale ni nona vosa o Peresitedi Young e na nona kaya ni “ka ni tamata yadua na veivakabulai”? Na cava beka na vuna e lavaki kina me “vakatovotovotaki kina na igu ni tamata yadua”? (Raica tale ga na 2 Nifai 25:23.)
Me veidutaitaki mada na veika e vosa kina o Peresitedi Young, me baleti ira oqori, ka ra “era dau nanuma me ra laki vakabulai mai na nodra yalododonu e so tale na tamata,” kei na nona italanoa vakaibalebale na iVakabula me baleti iratou na goneyalewa vuku kei iratou na goneyalewa lialia. (Raica tale ga na Maciu 25:1–13; V&V 33:17; 45:56–57.) E kaya tale ga o Peresitedi Young ni da sa “saga vata kei koya na kena vakasavasavataki na lewe ni vuvale yadudua ni tamata.” Ni da sa mai kila ni “ka ni tamata yadua na veivakabulai,” me da veivuke beka vakaevei vei ira na wekada e so me ra lako yani vei Jisu Karisito, ka laki vakaivotavota e na bula tawamudu?
Na cava beka na vuna era na gadreva tale ga na tamata yalodina na loloma i Jisu Karisito, me vakakina o keda yadudua sara, me da qai laki rawata kina na matanitu silesitieli?
Me vaka sa vakamacala kina o Peresitedi Young, na cava beka na ibalebale ni kena tukuni me da ciqoma na veivakabulai ka sa vakarautaki mai vei keda? Na cava beka na kena ibalebale ni da besetaka na noda vakabulai? Na veika cava soti beka o sa sotava mai, o sa mai kila kina na kena bibi me da dau vakamalumalumutaki keda tiko ga ki na lewa ni Kalou?
Na cava beka na vuna e ka “lialia kina ka sega ni dodonu” kina me da dau nanuma ni rawa ni da na laki vakaitikotiko e na iserau ni Kalou, ka sega ni vakarautaki vakavinaka kina? (Raica tale ga na Momani 9:4.) Eda na vakarautaki vakavinaka beka vakaevei, e na noda dau veiqaravi e na yalodina e na Lotu i Jisu Karisito me baleti ira na Yalododonu e na Gauna Oqo, me da laki rawata kina na matanitu silesitieli? E lavaki beka vakacava e na vakavakarau oqo me da “dau sotava na veika dredre e na veisiga kece ga”?

E na laveti ira na Luvena yalodina o Tamada Vakalomalagi, me ra laki bula e na nona iserau, e na kaukaua kei na lagilagi.

Na cava beka na ibalebale ni nona vosa o Peresitedi Young, e na nona kaya ni rawa ni “vakaduavatataki ira ga e na vuku i Jisu na Turaga” na kosipeli? (Raica tale ga na Joni 17; 4 Nifai 1:15–17; V&V 38:27.)
Sa dau vunautaka o Peresitedi Young ni “sa saga tiko ga e na nona igu o Jisu me vakasavasavataka … me vakalesui ira tale na tacina kei na ganena ki na iserau ni Tamada. Me da saga vata kei koya.” E na veisala cava soti beka eda saga vata kina kei Koya na “kena vakasavasavataki na lewe ni vuvale yadudua ni tamata”?