Na Gauna ni Duavata, na iVakadinadina, kei na Lomasoli

Ni se tubucake tiko o Brigham Young, a dau vaqara voli na lotu ka na vakaceguya na nona lomatarotaro vakayalo, ia a sega ni raica rawa e dua. Ia, ni sa soli oti vua na iVola i Momani e na yabaki 1830, tekivu vulica kina na kosipeli ka sa vakalesui mai e na loma ni yabaki-rua e liu, sa mai vakadeitaka kina e lomana ni sa i koya oqo na lotu dina. A papitaiso sara ki na Lotu, ka tekivu mai na gauna oya, e a sega tale ni bau luluqa vakadua na nona ivakadinadina me baleta na kosipeli, ka vakamacalataka kina ni, “okati kina na ivakavuvuli dina kece sara e lomalagi e cake kei na vuravura oqo e ra. … E na veivanua kece ga e kune kina na ivakavuvuli oqo, e na kedra maliwa na ibulibuli ni Kalou, na kosipeli i Jisu Karisito, kei na Nona lewa kei na Matabete, mo vakamuria sara” (DNSW, 5 Me 1866, 2). E veivakauqeti na qaqa ni nona ivakadinadina kei na nona gugumatua ki na Lotu, vei ira na Yalododonu mai liu, me ra vosota kina na drakidrakita ni bula e na nodra veivale e na veilekutu, me ra duavata kina e na nodra vakamuria na ivakaro ni Turaga, me ra taracake na Nona Lotu ka vunautaka na Nona kosipeli e vuravura raraba. A tukuna kina: “Ni tu e tikiqu me vukei au na Kalou, o ira na agilosi, kei ira na wekaqu, au na sega sara ni vakacauoca e na noqu veisaqasaqa e na veikalawa yadua, me yacova sara ni da sa laki yacova na vanua eda vinakata, me da laki taukena kina na Matanitu. Oqori na nomu nanuma kei na noqu vakabauta, eda na rawata dina. Meu na parofisai tiko ga e na yaca ni Turaga o Jisu Karisito, ni da na taukena na Matanitu ni Kalou e vuravura raraba” (DBY, 453). E se veivakauqeti tiko ga edaidai na ivakadinadina nei Peresitedi Brigham Young, vei keda eda mai bula e na gauna oqo, ni da saga vata tiko na kena taracake na Matanitu ni Kalou.

iVakavuvuli i Brigham Young

Era dau saga na tisaipeli dina nei Jisu Karisito me ra dau duavata tiko ga—me ra yalovata ka tautauvata na nodra vakasama.

Eda sa mai tu oqo me da tarai Saioni cake. Me da cakava beka vakaevei? … Me da dau duavata e na noda sasaga. Me da duavata e na noda vakabauta na veika kece eda cakava, me vaka na lomana e duabau ga; ka me vakayacori e na yaca ni Turaga na veika kece sara eda vakayacora, me da kune kalougata kina e na veika kece sara eda vakayacora (DBY, 284).

E inaki ni noda vakabauta na Kosipeli i Jisu Karisito me vakaduavatataki keda na tamata, me da lesi tale ka vauci vata e na vakabauta kei ira era sa vakabauta mai liu na Kosipeli, me da rawata kina na bula lagilagi (DBY, 283).

Sa noqu masu, kemuni na taciqu vakayalo, kemuni na Bisopi, na iTalatala Qase, na Vitusagavulu, na i Apositolo, io, oi kemuni vakayadua sara na turaga kei na marama kei ira na gone, era sa vakayacani mai e na yaca i Karisito, me ra lomavata ka yalovata, ni da na butusevata kina na sala ke da sega ni lomavata ka yalovata [raica na Mosese 7:18] (DBY, 281).

Era na vakabulai na tamata ke ra na duavata, ni ra na sega ni dau yalovata na tamata, me vakavo ga ke ra dau goleva na ivakavuvuli ni bula tawamudu. Era na goleva vata beka na tamata ivalavala ca na veisasaga ca e vuqa; ia sa dau kena ivakarau ga, ni na lekaleka sara na nodra sasaga oqori. Na yavu sara ga ka ra vauci vata kina oqori, e na burorotaki tale kina na veiqati, kei na veisei (DBY, 282).

Era na lomavata na tamata mai na vakabauta vakalomalagi, me ra duavata sara kina. E rawa ni o vakasoqoni ira vata mai e so, se vakaevei beka na nodra duidui vakapolitiki, era na duavata ga mai na Kosipeli i Jisu Karisito, ke ra lewena tale ga o ira na lewe ni ilawalawa vakapolitiki ni vanua oqo (DBY, 285).

E sega ni tu vei keda na ilawalawa vakaturaga. Se dua na noda baraca e vakaisala e na kuli ni manumanu, se na isala cava tale, e sega ni duidui vei keda. Ke dua e dau yalodina vua na Kalou, eda na sega ni saqata na nona mai Lotu, ke vakaisala wale ga e na dua na tiki ni kuli ni bafalou. Me da mai vakaivotavota vata kei koya e na sakaramede, me da vakabula vua vakaveitaicini e na noda sotavi koya e tautuba, me da veitalanoa kaya, me da veisotari e na soqoni lelevu e so ka kidavaki koya vakaveiwekani, ka sega ni veibeci vua (DBY, 283–84).

A dau saga e veigauna na iVakabula me vakalasikata e na nodratou vakasama na Nona tisaipeli, ni vakavatukanataki e veigauna vei ira na lewe ni vuravura silesitieli na duavata sa uasivi sara—ni rau a duavata na Tamada kei na Luvena kei koya na nodra iLiuliu, na Yalo Tabu, e na veiqaravi mai lomalagi kei ira na lewe ni vuravura oqo. … Ke ra sega ni duavata na lewe i lomalagi, sa sega sara ga ni dodonu me ra bula kina … kei koya na Tamada, ka Daulewa na veivuravura kece ga (DBY, 282).

A dau masulaka o Jisu … vua na Tamada, me ra duabau ga na Nona tisaipeli, me vaka rau sa duabau ga o Koya kei Tamana. Ni sa kila rawa tu ni ra na sega ni laki rawata na Matanitu silesitieli ni Kalou ke ra sega ni duavata na nona tisaipeli. Ke ra sega ni raica na tamata na veika e so sa raica mai e na nona mai bula tu vakayago, ka rogoca na veika a rogoca mai, me ra kila tale ga na veika sa mai kila, ka me ra ucui Koya vakavinaka sara, me vaka na duidui ni nodra itavi kei na nodra ilesilesi, era na sega, sega sara ni laki bula vata kei Koya kei Tamana [raica na Joni 17:20–21; 3 Nifai 19:23] (DBY, 281).

Na cava beka na vuna e dau tautauvata kina na nodra nanuma se vakasama na Yalododonu e na Gauna Oqo, ka ra dau lomavata ka yalovata, veitalia ga se ra ciqoma e vei na ivakavuvuli ni Kosipeli, mai na vuaicake, se na ceva, e na tokalau se na muaira, se na veiyasa i vuravura cava tale? Era na ciqoma na veika sa yalataka mai na iVakabula, e na nona vakarau me biuti vuravura, sa i koya oqori na Dauveivakacegui, ka iloloma talei mai lagi ka tukuna voli ni dua ga na Kalou, dua ga na vakabauta, ka dua ga na papitaiso [raica na Efeso 4:5], ka nona vakasama tale ga, ka nona lewa, na loma ni Kalou na Tamada, ka kunei kina na duavata e na vakabauta kei na veiqaravi, ka na sega ni kunei vua na veisei se na veilecayaki; ni ra sa ciqoma tale na veivakararamataki oqo, sa sega ni bibi tale se ra sa veiraici mai liu se sega, era sa na duavata vakaveitacini ka veiganeni, ni ra sa qali ki na vuvale i Karisito e na vuku ni veiyalayalati tawamudu, me ra qai laki tukuna vata kina, me vaka sa talaucaka mai vakamatata o Ruci, “Na kai nomu era na kai noqu, na nomu Kalou tale ga ena noqu Kalou”! [Ruci 1:16] (DBY, 282–83).

Ke da sa duabauga, eda na qai vakadinadinataka kina i lomalagi, vua na Kalou na Tamada, vei Jisu Karisito na Tuakada, vei ira na agilosi, ki na veika vinaka sa tu oqo e vuravura, kei ira na lewe ivuravura kece ga, ni da nona tisaipeli o Jisu Karisito na Turaga. Ia, ke da sega ni duavata, eda na sega ni okati me da tisaipeli dina i Jisu na Turaga, me vaka sa dodonu [raica na V&V 38:27] (DBY, 281).

A dau vakadinadinataka vakawasoma o Peresitedi Young na kosipeli i Jisu Karisito.

Sa virikotori vakatabakidua na kosipeli ni veivakabulai me ra veisautaki kina na ivalavala ca me ra Yalododonu, me butuqaqi kina na ivalavala ca mai na veika vinaka, me ra tamata savasava ka lotu o ira na tamata ivalavala ca, ka me ra tamata vinaka cake sara o ira era sa vinaka rawa tu. E na veika kece sara eda ivalavala ca kina, e na veika kece sara eda gagano kina vakatani, sa na tokoni keda na Kosipeli me da vorata na veika ca kece ga. Me solia vei keda na kaukaua, na lewa, na kila ka, na vuku, kei na yalomatua me da vorata kina na noda malumalumu, ka me da vakasavasavataki keda e na mata ni Turaga na noda Kalou (DBY, 448–49).

E vakavulici keda e na dina na noda vakabauta vakalotu, me da ivalavala savasava, da bula vakalotu, me da vakabauta na Kalou kei na Luvena o Jisu Karisito. E na vakatakilai kina na veika vuni e so, me vakalasikati kina ki na noda vakasama na veika mai liu kei na gauna oqo—me tevuki vakamatata kina vei keda na veika sa bera mai. Sa yavu oqori ni noda cakacaka; na yalo ka vakavukui kina na veika bula kece ga e vuravura. Na yavu kece ga e dina e drodro mai na waitovure ka da rawata kina na vuku, kila ka, na dina kei na kaukaua. Na cava beka e dau vakavulica vei keda? Me da dau lomana na Kalou kei ira na wekada; me da dau yalololoma, ka vakasinaiti sara e na loloma vakalou, me da dauvosota vakadede, ka vosoti ira era na talaidredre, kei ira na lecaika. Sa lagilagi tu na noda lotu, ka sega ni laurai e na dua tale na lotu ka sa mai tauyavu oqo e vuravura, ka segai kina na matabete dina, e na kena sa mai yali tu—Sa i koya oqori na waitovure ni bula; me kau mai kina i vuravura na lomalagi, ka laveti cake i lomalagi o vuravura, me ra vakarautaki na tamata kece ga, ka sa mai vakarautaka na Turaga e lomadra na luve ni tamata, me ra mai veimaliwai kina kei koya oqori mai lomalagi, me laveti kina na vakasama mai na veika e sega ni vakabetena, ka tawayaga ni bula vagauna, ka na laki cava ga e na rusa. Me sereki kina mai na butobuto na vakasama ni tamata, kei na bula lecaika, ka vakavukui koya e na yavu sa taladrodro mai Lomalagi, ka vakarautaki koya me kila na veika kece ga (DNW, 1 June 1859, 1).

Era na kune vakacegu mai na noda vakabauta na tamata kece ga, ka ra na veisaututaki tiko ga na lewe i vuravura. Me dau vukei ira ka ra vakamuria vakadodonu na kena ivakavuvuli me ra cokonaki e na ivalavala dodonu kei na vakacegu; me ra tiko sautu e na nodra veivuvale; me ra vakacaucautaka na Turaga e na veimataka kei na yakavi; me ra daumasu vakavuvale, me ra vakasinaiti kina e na yalovakacegu, era na sega kina ni vakacacana se vunauca e dua, me vakavo ga ni sa dodonu me ra vakayacora vakakina. Era na dauyadra mai e veimataka ka cegu vinaka sara na yalodra me vaka ga na siga ka se qai cabe tiko mai, me solia kina na bula kei na katakata i vuravura; me malumu ka malua mai me vaka na mudre ni cagi e na kena karobo sobu na vanua e na yakavi ni vulaikatakata. E sega na cudru, na rarawa, na yaloca, na veileti se veiqati (DBY, 449–50).

Ni ra sa ciqoma na Kosipeli oqo na tamata, na cava beka era na vakacacabo kina! Na cava beka na kena ibalebale, ni da mate me da bula kina. Oqo gona na veika era na vakacabora mai: na butobuto e na vuku ni rarama, na lasu me baleta na dina, na vakatitiqa e na vuku ni kila ka, kei na veivakadeitaki e na veika ni Kalou (DBY, 450).

Era sa taqomaki na Yalododonu e na veitabagauna kece ga, era na dau tokoni ka vueti e na veika dredre era sotava mai na Kaukaua Sa Cecere Sara, ka sa dau vukei ira tiko ga na kaukaua ni lotu i Jisu Karisito (DBY, 450).

Au sa okata mai me kana magiti na noda vakabauta vakalotu. Au via kacivaka kina na Lagilagi! Aleluya! Vakavinavinaka vua na Kalou! ka sega ni kunei kina na yalorarawa kei na lomabibi. Mo solia vei au na kila ka, kaukaua, kei na isolisoli ka rawa niu ciqoma, au na sega kina ni via kila se vu mai vei na Tevoro, se na veika e baleti koya; au vinakata ga na vuku, kila ka, kei na kaukaua ni Kalou. Mo solia mai vei au na lotu ka rawa ni laveti au cake e na ivakatagedegede ni bula—meu vorata kina na veika dredre e vuqa—niu sa na laki yacova rawa na bula sautu kei na vakacegu ka sa vakarautaki tu me baleti ira na yalododonu, meu na laki vakaivotavota kina e na bula kei ira sa savasava (DBY, 451).

Au sa vakila na noqu marau. Sa mai vukei au na “Vakabauta Vakamomani” e na bula au sa mai donuya tu oqo, kei na loloma, kei na kaukaua, kei na vuku ni Kalou, ka na tovaka na noqu laki yacova na bula au vakanuinui kina, e na bula oqo, se na bula e na vuravura tawamudu sa bera mai (DBY, 451).

Sa vakalougatataki au mai na Turaga; sa dau veivakalougatataki vakavuqa vei au; me tekivu mai na gauna au tekivu vakaduri Saioni kina, au sa kunekalougata vakalevu sara. E rawa niu na vakamacalataka na veika vakurabuitaki e vuqa me baleta na veivakalougatataki ni Kalou e na vukuqu, era na rairai kaya lo beka kina na taciqu kei na ganequ, “Au sega ni vakabauta na veika oqo.” Ia sa tudei tu ga na yaloqu, meu dau vakayacora ga na loma ni Kalou, ka taracake na nona Matanitu e vuravura, me vakaduri o Saioni kei na kena lawa, ka veivakabulai vei ira na tamata. … Au sega ni lomana, meu qarava se rerevaka na Turaga meu levea kina na veivakarusai, se meu rawata kina na isolisoli e so se na veivakalougatataki ki na vuravura tawamudu, me baleta wale ga na savasava ni ivakavuvuli ka sa vakatakila mai na Kalou e na vuku ni nodra vakabulai na lewe i vuravura, ka sa rui ka talei ka veilaveti e na kena yavu. Sa kunei kina na vakarokoroko kei na bula vakaikuritaki tiko ga, me veituberi kina mai na rarama e na rarama, me tudei na veika sa tudei, na lagilagi e na lagilagi, na kila ka e na kila ka, ka vakaikuritaki na kaukaua e na kaukaua (DBY, 452).

Au sa rui marautaka vakalevu … ni rawa meu mai veimaliwai vata kei ira na Yalododonu, meu mai lewena tale ga na Matanitu ni Kalou, kau vakaveiwekani voleka sara e na nona Lotu na Kalou Bula (DBY, 452).

Sa vukei au vakalevu sara e na noqu bula na “Vakabauta Vakamomani,” ka rawa ni qaravi rawa e na vuravura oqo; sa itakataka ni noqu marau; … ka vakasinaiti au tiko e na yalovinaka, e na marau kei na veika vinaka. Ia, mai liu, niu se bera ni vakaivotavota e na yalo ni Kosipeli, au sa dau yalobibi vakawasoma e na noqu rogoca na nodra vosa kudrukudru oqo, e na nodra yalolailai, me ra rarawa ka lomaleqa vakalevu; e na veika e so kau nanuma ni yalorarawataka vakalevu sara (DBY, 452).

Ia mai na noqu sa mai vakamuria na ivakavuvuli ni Kosipeli, e na veimama mada ga na miniti, kau se nanuma rawa tiko oqo, niu sega sara ga ni bau yalolailai kina vakalailai (DBY, 453).

Ni ra vakavolivoliti keimami tu na dauvakacaca, ka tu voleka sara na mate kei na leqa e vuqa, au vakabauta niu dau yalomarau tu ga me vaka au sotava tiko oqo. E na rairai tu beka e liu na veika dredre e so sa laurai rawa yani, ia au sa dau sotava mai e na Kosipeli oqo na veika e so au sa kila deivaki tu ni na yaga vakalevu sara ki na dina, kei ira ka dau taleitaka na ivakavuvuli dodonu, kau sa dau marautaka ga vakalevu meu tusanaka na liga ni Turaga e na veika kece ga (DBY, 453).

Ni veitokoni kina na Kalou, o ira na agilosi, kei ira na ivalavala dodonu, au na sega sara ni soro e na noqu na dau sasaga tiko ga, e na veikalawa yadudua sara, me yacova ni sa qai noda na Matanitu. Oqo na noqu nanuma kei na noqu vakabauta, eda na rawata dina. Au na dau parofisaitaka e na yaca ni Turaga o Jisu Karisito, ni da na taukena dina na Matanitu ni Kalou e vuravura raraba, me da taukeni vuravura kina (DBY, 453).

A dau yalataka o Peresitedi Young ni ra na vakalougatataki vakalevu o ira na Yalododonu yalodina.

Kemuni na wekaqu, na turaga kei na marama, me vaka sa soli vei au, e na Matabete, au sa vakalougatataki kemuni oqo e na yaca ni Turaga, ka kaya kina vei kemuni, mo ni vakalougatataki tale ga. Oqo na nomu nanuma me baleti ira na Yalododonu e na Gauna Oqo, ka vakakina ki na tamata yadua sara e vuravura, ke ra vinakata na noqu isolisoli (DBY, 456).

Me veivakalougatataki na Kalou vei ira na tamata vinaka kece ga. Sa dau vakalougatataka na Kalou na veika bula, sa vakalougatataka na Kalou na nona cakacaka, me vuaviritaka na veika ca ka tawa vakalotu, kei ira ka dau veivakarusai vei ira na tamata, me tababokoci kina e vuravura na veivaluvaluti kei na veiqati. Kemuni na Turaga, mo ni kauti ira tani oqo mai na veitutu lelevu e so, ka biuta me ra veiliutaki ki na veimatanitu o ira na tamata vinaka, me kua tale ni ra sukava na veivaluvaluti, ka me ra dau goleva ga, ni ra tamata bula ka yalomatua tu, na veisaututaki e vuravura, me ra dau veilomani kina na tamata kece ga [raica na Aisea 2:4] (DBY, 456).

Sa dau lomaqu meu dau vakalougatataki kemuni vakawasoma; ni se tu ga eke na noqu bula, na veika au dau taleitaka, na noqu lagilagi, na veika au dau doka, kei na noqu vakacegu, ka sa tu tale ga eke na veika kece sara au taukena, kau namaka tale ga meu taukena, me yaco ni sa lewe ni Lotu oqo na veika ni vuravura tawamudu (DBY, 456).

Ke tu vei au na kaukaua, au na dau vosavakalougatataki ira na tamata, e na veika kece ga e gadreva tu na lomadra, ke ra na sega ni dau ivalavala ca. … Ia, ke tu vei au na kaukaua, au na vosavakalougatataki ira tale ga na lewe ivuravura taucoko, me rawa ni ra vakalagilagia tiko kina na Kalou, ka vakasavasavataka tiko ga na lomadra (DBY, 457).

Ke ra bula voli e vuravura na matatamata ka dau vakanuinui kina na Turaga, e na sega tale ni dua na veivakalougatataki e na vuravura tawamudu ni Kalou era na sega ni se vakaivotavota rawa kina e na bula vakayago oqo, me sovaraka vei ira. E na sega ni vakatusa rawa na yame na isolisoli sa vakarautaka tu na Turaga vei ira era sa vakadinadinataki ira oti e matana [raica na 1 Korinica 2:9–14] (DBY, 455).

Era na sega ni vauci vaqaqaco na yalododonu, ni ra na vagalalataki tiko ga, ni ra yalodina vakalevu cake, me vakaikuritaki kina vei keda na kaukaua kei lomalagi, kei na kaukaua ni Kalou. Me da qara vagumatua yani na Turaga, me yacova ni da sa laki vakabauti Jisu vakavinaka, ni ra na vagalalataki kina o ira era sa vakaivotavota e na veika oqo (DBY, 455).

Au nuitaka ni ra na dau vakasamataka na tamata ni ra dau lako, ka bula, ka tikotiko ga e na iserau nei Koya Sa Kaukaua Sara. Era dau raica na yalodina na veika e so me vaka era sa laurai tu kina, mo ni qai raica kina ni o bula tiko e na maliwa ni vuravura tawamudu, ka tiko maliwai ira na yalosavasava, me rawa kina vei kemuni eke mo ni laki sotava na nodra veiwekani, kei na ivakarau ni nodra bula. O ni sa kalougata dina sara (DBY, 454–55).

Mo ni dau solia na nomuni igu e na veika kece sara, kua sara ni o ni vakayacora e dua na ka, me vakavo ni sa tokoni iko kina na Yalo Tabu ni Kalou [raica na Mosese 6:60]. Ia ke o ni bula tiko me vaka na rarama serau, kei na yalomatua sa tu vei kemuni, ka vakalagilagia tiko ga na Kalou, na Tamada Vakalomalagi, me vaka o ni sa kila rawa tu, au sa yalataka oqo vei kemuni na bula tawamudu e na Matanitu ni Kalou (DBY, 455).

Me vakalougatataki kemuni tiko na Kalou! Mo ni sautu tiko ga! Me bulabula sara na nomuni bula vakayalo, mo ni yalomalumalumu, dau vakarorogo, ka masumasu, mo ni dau qarava tiko na veika me baleti kemuni, mo ni saga tiko ga mo ni rawata na bula, ka vakakina o ira era vakararavi tu vei kemuni, sa noqu qaqa ni masu oqori e na vukumuni, e na yaca i Jisu. Emeni (DBY, 456).

Me iUlutaga ni Vuli

Era dau saga na tisaipeli dina nei Jisu Karisito me ra dau duavata tiko ga—me ra yalovata ka tautauvata na nodra vakasama.

Na cava beka na kena ibalebale na kena tukuni me baleti ira na tisaipeli i Karisito me ra dau “duavata,” se me ra “lomavata ka yalovata”? (Raica tale ga na Joni 17:20–21.)
Na cava beka na vuna e lavaki kina vei ira na Yalododonu me da duavata, e na kena taracake na matanitu ni Kalou? Na cava na vuna eda na sega ni laki rawata kina na matanitu silesitieli, ke da sega ni dau duabau kei ira na wekada?
E veitokoni beka vakaevei vei ira na lewe ni Lotu na kosipeli, e na duidui e so e tu e na nodra bula veimaliwai, e na bula vakailavo, vakapolitiki, kei na bula vakavanua, me ra tudei tiko ga e na cakacaka ni Turaga?
Me da rawata beka vakaevei me da “lomavata ka yalovata” kei ira na wekada Yalododonu kei na iVakabuka o Jisu Karisito?

A dau vakadinadinataka vakawasoma o Peresitedi Young na kosipeli i Jisu Karisito.

Na cava beka e vakamacalataka o Peresitedi Young me baleta na veika e yaco mai na kosipeli? O sa bau raica beka vakaevei na kena yaco na veika e so oqo e na nomu bula, se na nodra bula o ira era tu volekati iko?
E na veisala cava soti beka e na vukei keda kina na kosipeli, me “kau mai kina i vuravura na lomalagi, ka laveti cake i lomalagi o vuravura”?
A vakamacalataka o Peresitedi Young nona vakabauta vakalotu ni “kana magiti.” Me da kana magiti beka vakaevei e na kosipeli? Na ivakavuvuli cava soti beka nei Peresitedi Young e na vuli oqo sa yaga vakalevu sara vei iko, mo kila ka marautaka vakalevu cake kina na kosipeli?
Sa vakasinaiti beka vakaevei na kosipeli i Jisu Karisito, e na marau kei na veika vinaka?

A dau yalataka o Peresitedi Young ni ra na vakalouga tataki vakalevu o ira na Yalododonu yalodina.

Me ra vakadinadinataki ira beka vakacava na lewe ni Lotu vua na Turaga, ka vakaraitaka kina ni sa dodonu me nodra na veivakalougatataki sa vakarautaka tu vei ira?
Me vukei keda beka vakaevei na noda “yalodina vakalevu cake,” me da qai laki “vagalalataki tiko ga,” ka vakaukauataki cake? Eda na vagalalataki beka vakacava mai na noda talairawarawa kei na noda vakabauta?
E rawa beka vakaevei ni o na “bula tiko me vaka na rarama seserau, kei na yalomatua sa tu vei kemuni”?
Sa dau veivakadeitaki vakaevei ki na nomu bula na ivakadinadina tudei nei Peresitedi Young, kei na nona gugumatua?