Vakabauti Jisu Karisito na Turaga

E veivakataudeitaki e na bula i Peresitedi Brigham Young na nona vakabauta na iVakabula, kei na nona kosipeli ka sa vakalesuya mai, me ulabaleta rawa kina na veika dredre, kei na veivakatovolei e vuqa ka sa sotava mai e na nona bula. Mai na qaqaco ni nona vakabauta, a lakova kina e vuqa na ilakolako vakaulotu; a vosota kina na veika dredre ka sotavi e na Keba i Saioni; ka tudei tiko ga, ka yalodina e na kosipeli dina, kei Josefa Simici na Parofita, e na drakidrakita ni bula ka sotavi e na gauna oya mai Kirtland, e na nodra biuta na Lotu e le vuqa na Yalododonu. Mai na nona vakabauta tale ga, a tuberi ira kina na Yalododonu me ra yacova na Bucabuca ni Salt Lake, me laki tauyavutaki kina na matanitu ni Kalou. E a kaya kina: “Me ra yalodina vakayadua o ira era bula tiko e na Lotu oqo. Ni ra na sega ni cici tiko mai na veika ga era raica rawa e matadra, ia me ra dau vakavatukanataka na nodra vakabauta na Turaga o Jisu Karisito, me qai cilavi ira kina na veivakararamataki ni Yalo Tabu. Ni ra na yaraneketaka, sa na luvuci ira na yalo vakavuravura, me ra vakabatabatataki kina ka vakatawayagataki vakayalo, me ra vakasecudru yani ki na bula butobuto, me yacova sara na mate vakayalo” (DNW, 25 Epr. 1855, 2).

iVakavuvuli i Brigham Young

Sa lavaki e na imatai ni yavu ivakavuvuli ni kosipeli me da vakabauta na Turaga o Jisu Karisito, ka rawa ni da kila vinaka ga mai na cakacaka yaco ni Yalo Tabu.

Na kaukaua ni Kalou ka yavu ni noda vakabulai e na Kosipeli; ka imatai ni ivakavuvuli ni Kosipeli oqori na … noda vakabauta na Kalou, kei na noda vakabauti Jisu Karisito na Luvena, na noda iVakabula. Me da vakabauta kina ni o Koya ga ka tukuni tu e na kena ivakamacala e na iVolanikalou Tabu. … Me da vakabauta tale ga ni o Jisu ga oqori e a vakoti e na kauveilatai, me baleta na nodra ivalavala ca na kai vuravura (DBY, 153).

E rawa ni o na dau nanuma ni sega ni vakabetena na Turaga kei na nona Kosipeli, ka rawa tale ga ni o soli iko kina (DBY, 153).

Ke da vinakata me da kila vinaka na ivakavuvuli ni Kosipeli—me da kila vakavinaka sara, e dodonu me da vakavukui kina mai lagi; me veivakararamataki kina na Yalo Tabu; … me sa vakabulai rawa tu o koya, me rawa ni qai veivotai kina vei ira na tani (DBY, 152).

Sa isolisoli ni Kalou na veitiki ni ivakavuvuli dina ka taukena tu e dua vei keda. Me soli vei keda na yavu dina e so oqo, ka qai vakaikuritaki tale e na bula vakaiukuuku, … me da kila kina na veika kece sara, ka yaco me da Kalou, ka yaco me da Luvena dina na Kalou. Oqo o ira na bula vakasilesitieli. Oqo sara ga o ira ka sa digitaki ira na Turaga, e na vuku ni nodra talairawarawa. Era sega ni sabaya na veika dina, e na nodra rogoca. O ira tale ga oqo era a sega ni vakawalena na Kosipeli, ka ra sa vakadinati Jisu kei na Kalou, e na yavu ni bula rau bula kina; ka ra sa vakadinata tale ga na agilosi e na nodra bula. Oqo gona o ira ka ra na dau ogataka na nodra vakabulai na veivuvale vakatamata (DBY, 152).

E isolisoli ni Kalou na noda vakabauta na Karisito, mai na noda tudei tiko vua, noda talairawarawa, ka dau caka dodonu.

Ni o sa vakabauta na ivakavuvuli ni Kosipeli, ka tauyavutaka na nomu vakabauta, na isolisoli ni Kalou, sa na vakaikuritaka vei keda na noda vakabauta, me vakaikuritaki tiko ga na vakabauta. Sa solia kina na vakabauta vei ira na ibulibuli ni ligana, me nona i loloma; ia sa nodra ivotavota na ibulibuli ni ligana me vakabauta na Kosipeli, ni ka dina se lasu (DBY, 154).

Ke vosa vakaibalebale me baleta na vakabauta, sa i koya ga oqori na kaukaua ni Kalou ka buli kina na vuravura, ka isolisoli ni Kalou vei ira era vakararavi vua, ka dau muria na nona ivunau. Ia, me qai kena ikuri ga, ni sega sara ni dua na ibulibuli ni Kalou ka bula tiko oqo, se qarava tiko na Kalou se sega, e na sega ni vakamuria na nona vakabauta. Ia, me dau vakabauta ga na veika dina, me talairawarawataka na ivakavuvuli dina, ka dau vakatovotovotaka na veika dina e na nona bula, me qai rawata kina na kaukaua ni Kalou, ka vakatokai me vakabauta (DBY, 153).

Sa lavaki tu vei keda me da vakararavi vua na noda Kalou; oqo gona na yavu ni noda cau e na cakacaka (DBY, 154).

Ni o wilika na ivakatakila, se na gauna o rogoca kina na lewa ni Turaga me baleti iko, io, me rawa ni yaga kina vei iko, mo kakua ni ciqoma e na lomalomarua (DBY, 155).

E sega ni dau vakatakila vakamatailalai na Tamada Vakalomalagi vei ira na luvena na veika vuni me baleta na nona lewa ki na nodra torocake na luvena, ka sega tale ga ni vakavotuya vei ira na kena itinitini mai na kena ivakatekivu; ni sa kilikili me ra dau vakararavi Vua ka sa yalataka me vala e na vukuda, me qai vakaisalataki keda kina e na qaqa, me da yalodina sara me vakai Eparaama, na italai dau yalodina (DBY, 156).

Ni ra goleva vakavuku na tamata na veitikina ni ivakavuvuli, ka vakararavi ga ki na veivakasama vakatamata, era sa na dau lakosese kina vakalevu. Ia, ke dua na tamata e sotava e dua na ka dredre, ka lavaki kina vua, se vakaroti, me vakabauta na yaca i Jisu Karisito, me vukei koya kina, sa na qai rawa ni na kila vakaikoya; sa ka marautaki dina vei ira era sa dau rawa na veivakatovolei era dau sotava, ke ra yalodina tiko ga, ka dau vakabauta na nodra ilesilesi (DBY, 154).

E na vakavatukanataki, ka vaqaqacotaki na noda vakabauta mai na noda caka dodonu.

Me vakamatatataki kina na bibi ni kena lavaki vei keda me da dau vakabauta na Kalou, keu taurivaka beka kina e dua na vosa me ganita, au na kaya ga me da vakabauta vakatabakidua. Sa tu vei au na vakabauta na noqu Kalou, ka veisotari vinaka na vakabauta oqori kei na noqu cakacaka au qarava. Au sega ni duavata kei na vakabauta ka sega ni bunotaki (DBY, 155).

Ke ra dau caka vinaka tiko na tamata, au rawa ni vakadeitaka eke ni na soli vei ira na vakabauta, e na gauna era dau gadreva kina (DBY, 154).

Ni sa tovure mai lomada na vakabauta, sa na qai muria mai na caka vinaka, me qai vakaikuritaki tiko ga na noda caka vinaka mai na vakabauta savasava ka sa tu vei ira (DBY, 156).

Au vakabauta, ni da sa veiqaravi e na noda igu taucoko, sa qai namaki ni na vakayacora na Turaga na nona itavi, ka ra na nanumi kina o ira era sa dau yalodina; me ra qarava taucoko sara na veika e tu (DBY, 155).

Ni dua e sotava na leqa e na nona bula, ka na sega sara ni rawata e dua na ka me baleta na nona bula, sa na qai gadrevi kina me vakabauta ni na vakani koya na Kalou, ka na vakavuna me tomika na lewe ni manumanu e dua na reveni mai na vanua e tu kina vakalevu, ka me laki vakalutuma vua ka sa viakana tiko oqori. Keu sa na sega ni kana rawa mai na sala sa virikotora mai na Kalou meu rawata kina na noqu bula, sa na qai kena gauna me cakacaka yaco kina e na vukuda, e na sala veivakaburabuitaki, meu vukei kina. Ia ni tu vei keda na sala me da rawata vakavinaka kina na veika ni noda bula, sa noda itavi me da qarava vakakina (DBY, 155).

E le vuqa sara na tamata vinaka, ka sobuti ira tu na Yalo Tabu ni Turaga, era dau vakatitiqa tale ga, era sega ni dau qarava vinaka kina na veika e baleti ira, me ra lomatarotarotaka kina se ra Yalododonu dina, se sega. Era dau vakatitiqa vakawasoma, ni sega ni dodonu me vakakina. Me ra kakua sara ni dau vakatitiqa, ke ra sa bula yalomalumalumu tiko e na mata ni Kalou, ra dau talairawarawa ki na nona ivunau, ka goleva tiko ga na Nona cakacaka vakalotu, ka dau lomasoli vua na Karisito e na veika kece sara era taukena tu, ka gugumatua e na kena qaravi na nona Matanitu, ni na sega ni vakadinadina kina vei ira na Yalo Tabu, e na kena dina na cakacaka era qarava tiko oqori (DBY, 155).

Ke ra dau bula veiganiti na Yalododonu e na Gauna Oqo ki na isolisoli sa tu vei ira, ka dau vakavatukanataka na nodra vakabauta na yaca i Jisu Karisito, me ra bula kina e na kena sobuti ira na Yalo Tabu e na veisiga kece sara, ka na sega sara ni dua na ka e tu e delai vuravura oqo, ka ra na kerea, ka na bureitaki vei ira. Sa tu vakawawa na Turaga me vakavatukanataka na titobu ni nona loloma, me sovaraka kina vei ira na iyautalei e vuqa, me ra dokai, vakaiukuukutaki ka vaqaqacotaki kina e na nodra bula, me ra rawata rawa kina na veika kece sara ka sa yalataka mai vei ira na nona i Apositolo kei ira na Parofita (DBY, 156).

Me iUlutaga ni Vuli

Sa lavaki e na imatai ni yavu ivakavuvuli ni kosipeli me da vakabauta na Turaga o Jisu Karisito, ka rawa ni da kila vinaka ga mai na cakacaka yaco ni Yalo Tabu.

Me da vakanuinui beka vakaevei mai na noda vakabauta na Turaga o Jisu Karisito?
Na veika cava so e dusimaka o Peresitedi Young me yavu ni noda vakabauti Jisu Karisito?
Na cava na vuna e talaucaki kina e na imatai ni ivakavuvuli ni kosipeli me da vakabauti Jisu Karisito? (Raica tale ga na Moronai 7:33–34; Yavu ni Vakabauta 1:4.) Me vaka e vakamacalataka o Peresitedi Young, me da kila beka vakaevei ni imatai ni yavu ni kosipeli na bula veivakabauti vei Karisito?
O cei soti beka era dau “ogataka na nodra vakabulai na veivuvale vakatamata”?

E isolisoli ni Kalou na noda vakabauta na Karisito, mai na noda tudei tiko vua, noda talairawarawa, ka dau caka dodonu.

Me da vakaikuritaka beka vakaevei na noda vakabauti Karisito? Na cava beka na ibalebale ni “vakaikuritaki tiko ga na vakabauta”? (Raica tale ga na Alma 32:26–28.)
Na cava na vuna e lavaki kina ki na noda rawata na vakabauta, me da dau tudei, me da talairawarawa, ka vakatovotovotaka e na noda bula na veika dina? (Raica tale ga na Alma 32:21.)
Na cava na vuna e kaya kina o Peresitedi Young “lavaki tu vei keda me da vakararavi vua na noda Kalou”? (Raica tale ga na Ica 12:6–7.) Me da vakavatukanataka beka vakaevei na noda vakanuinui vua na Kalou? (Raica tale ga na Ica 3:11–12.)
Me vakaseva beka vakaevei na noda vakabauta na yalovakatitiqa, kei na vakasama vakatamata? Me da dui kila beka vakaevei na ivakatagedegede ni noda bula e mata ni Kalou? Me vakavatukana vakaevei vei keda na noda vakabauti Jisu Karisito?
A kaya kina o Peresitedi Young, “Sa ka marautaki dina vei ira era sa rawa oqori na veivakatovolei era dau sotava, ke ra yalodina tiko ga, ka dau vakabauta na nodra ilesilesi.” Me tudei beka vakaevei na noda vakabauta, se yalodina tiko ga, e na noda sotava tiko na drakidrakita e so ni bula? O dau rawa beka vakaevei na veika dredre o dau sotava, mai na kena tudei tiko na nomu vakabauta, ka dau yalodina tiko ga? (Raica tale ga na Ilamani 12:3; Alama 32:6.)

E na vakavatukanataki, ka vaqaqacotaki na noda vakabauta mai na noda caka dodonu.

E vakamacalataka beka vakaevei o Peresitedi Young na kena veiwekani na bula vakabauta, kei na cakacaka ni ligada?
Na cava beka e kaya o Peresitedi Young ni dodonu me da dau vakayacora, me qai vukei keda kina na Turaga? Na cava beka sa dau namaka na Turaga vei ira era “dau lomasoli vua na Karisito e na veika kece sara era taukena tu, ka gugumatua e na kena qaravi na nona Matanitu, ni na sega ni vakadinadina kina vei ira na Yalo Tabu”?
Na cava beka e a yalataka o Peresitedi Young vei ira era “dau vakavatukanataka na nodra vakabauta na yaca i Jisu Karisito, me ra bula kina e na kena sobuti ira na Yalo Tabu e na veisiga kece sara”? Ke sala vata kei na noda masu na vakabauta kei na veivakauqeti vaqori, e na vakaevei beka na kena itatase? (Raica tale ga na V&V 46:30; Ilamani 10:5.)

pioneers — Era a vakavatukanataka na Yalododonu mai liu na qaqaco ni nodra vakabauta na Turaga, e na nodra dui biuta na nodra veivale kei na nodra dui qele, me ra laki vakoro kina i Saioni, mai na veiliutaki nei Peresitedi Brigham Young.

wagons in Salt Lake City — Na itaba ni qiqi e Salt Lake City e na kena se qai dromu na veiyabaki muria na 1860.