Na Vuravura ni Yalo

Ni laki tauca na vosa e na lotu ni veibulu nei Elder Thomas Williams, a kaya kina o Peresitedi Brigham Young na veika oqo me baleta na vuravura ni yalo: “E na nodra sa dau vakasamataka vakawasoma na tamata na taro— ’Au diva meu kila mada ga na vanua au na lakova!’ E rawa beka ni o vakasaqara vei au? Io, o na lako ki na vuravura ni yalo, ka sa tiko kina e na gauna oqo o Baraca Thomas. Sa laki tiko e na gauna oqo e na bula ka cecere cake mai na bula oqo, au kaya oqori me baleta na yalona. ‘Na cava ga na vuna e tabogo tiko kina mai mataqu? Na cava na vuna keirau sega ni veitalanoa rawa kina kei na yalona? Au diva tu meu raica tale na mata i watiqu tagane, se na mata i tamaqu, ka veivosaki tale kei koya!’ E sega ni kena inaki mo vakayacora vakakina, e sega tale ga ni dodonu me dau yaco; ni rawa beka ni o na vagolei tani mai na inaki ni nomu bula oqo, ke soli vei iko na veika oqori, ni o na dau bula tiko ga e na vakabauta me ilutua ni nomu bula, me kua ni vakadredretaka na sala o muria e na nomu ilakolako, me kua tale ga ni waqawaqa sara na ivalu o na sotava, me kua ni vakacerecerei cake na nomu qaqa, ka rawa kina ni o butusevata na inaki dina ni nomu bula oqo. Sa dodonu ga me vakaoqo na veika eda sotava, me tabonaki keda kina na ilati sa tu oqo; me kua mada ni da se raica na Kalou, me kua ni da raici ira tale ga na agilosi, me kua tale ga ni da dau veivosaki, me vakavo ga mai na noda sa dau talairawarawa tiko ga e na veika sa lavaka vei keda, kei na noda vakabauti Jisu Karisito (DNSW, 28 Julai 1874, 1).

iVakavuvuli i Brigham Young

Era na lesu tale ki na vuravura ni yalo na yalodra era sa mate.

Ni sa mai davo tale na yago qele oqo, e vei beka o na lako kina? Ki na vuravura ni yalo (DBY, 376).

O ira kece na ivalavala ca era biuta na bula oqo ka lakova na vuravura ni yalo, era na laki ivalavala ca tale beka e kea? Io (DNW, 27 Oks. 1856, 3).

Ni ra biuta na yalo na dui yagodra, … era sa cokonaki tu me ra laki raica, rogoca, ka kila vinaka na veika vakayalo e vuqa. …O ni raica beka e na rumu oqo na yalo era tu kina? Sega. E vakacava beka ke tara na matamu na Turaga, mo qai raica rawa kina, o na raici ira rawa beka na yalo? Io, o na raica vakamatata sara me vaka ga na nomu raici ira tu oqo na tamata, me vakai koya na dauveiqaravi nei [Ilaisa] [raica na 2 Tui 6:16–17]. Ke na vakatara na Turaga, ni a vakayacori ga mai na nona lewa, o na rawa ni raica na yalodra ka ra sa takali yani mai na vuravura oqo, me ra laurai vinaka sara, me vaka ga na nomu raica tu e na matamu oqo na tamata ka ra veimaliwai tu oqo kei keda (DBY, 376–77).

A dolava o Jisu na veivakabulai vei ira e na vuravura ni yalo.

E a isevu o Jisu, vei ira ka ra laki vunau vei ira na yalo e na valeniveivesu, ka kauta tiko na idola ni Kosipeli ni nodra vakabulai. A soli vua na idola oqori e na aua kei na siga ka lako kina ki na vuravura ni yalo, ka laki dolava kina na katuba ni veivakabulai vei ira na yalo e na valeniveivesu (DBY, 378).

Me da dau solibula vakalevu ki na lewa ni Kalou, me ra tokoni kina o ira era se bera ni rogoca mai na Kosipeli e na nodra bula e na vuravura oqo, ni vuna duadua ga, ni ra na sega ni laki veiqaravi e na cakacaka tabu ni vale ni Kalou e na vuravura ni yalo. Era sa na sivita yani na kena veivakatovolei, ka ra na sega ni laki vakaitavi e na kena bokoci na nodra ivalavala ca, kei na nodra laki rawata na bula vakalou, me ra na qai vakanuinui ga vei ira na wekadra e so, se o ira na luvedra kei ira na nodra kawa me ra qai mai veiqaravi e na vukudra, me ra laki duri cake kina e na matanitu silesitieli ni Kalou (DBY, 406).

Mo qai vakatauvatani ira na lewe i vuravura ka ra sa ciqoma e na gauna oqo na Kosipeli, kei ira era se bera ni rogoca, se me soli vei ira na idola ni veivakabulai, o ni sa na qai kila kina ni tiko e dua na cakacaka vakaitamera me laki qaravi e na vuravura ni yalo (DBY, 377).

Mo vakasamataki ira mada na milioni vakamilioni na milioni era sa mai bula oti, ka ra sa mate tale, ka ra sega ni rogoca e vuravura na Kosipeli, ka sega tale ga vei ira na idola ni Matanitu. Era a sega ni ki na bula vakasilesitieli, ka ni se sega tu na kaukaua me veivakarautaki vei ira, e na kena se sega tu na idola ni Matabete (DBY, 378).

O Tamadratou na vuvale Simici [tama i Josefa Simici] kei Carlos [Smith] kei Baraca [Edward] Partridge, io, kei ira vakayadua na Yalododonu vinaka, era sa laki osooso vakalevu tiko e na vuravura ni yalo, me vaka ga na nodaru osooso tiko o kedaru e na bula oqo. Era dau raici keda, ia eda na sega ni raica o keda, ke qawa vinaka tu na matada. Na cava beka era laki cakava tiko oqori? Era laki vunau tiko, ka vunau tiko ga e veigauna, ka vakarautaka mai na sala vei keda, me da vakatotolotaka kina na noda tara na veivaletabu eke, kei na veivanua tale e so (DBY, 378).

Na nodra ogaoga na tamata yalodina yadudua, e na dede tale ga me vaka na cakacaka e a mai qarava o Jisu, me vueti kece sara na veika e rawa ni vueti, me qai vakacabori vua na Tamada. E cakacaka vakaitamera ka tu oqo e matada (DBY, 378).

Na yalo ka bula tu e na yago qele oqo e na noda vuravura, ni ra na qai veitalatala, era sa na curu sara ki na vuravura ni yalo. Raica! Me ra laki vakasoqoni tale vakalewelevu e kea na yalo, ka ra veimaliwai tale, me vaka era vakayacora tiko eke? Io, kemuni na taciqu, era laki tiko veivolekati tale e kea, ia ke ra na veimaliwai, ka dau kumukumuni vata, e na nodra dui yavusa kei na veimataqali me vaka era sa dau vakayacora eke, sa soli oqori vei ira. E sega ni vakatitiqataki ni ra rai tale tu ga, ra rogoca, ra veivosaki ka veimaliwai tiko vakaiira e na veika vinaka se ca. Ke ra laki vunau vei ira e na valeniveivesu vakayalo na iTalatala Qase kei Isireli e na veigauna mai muri, era na laki veimaliwai vata kina, me vaka ga era dau vakayacora na iTalatala Qase kei ira era dau ivalavala ca vakayago, ni ra laki vunau vei ira (DBY, 378).

E vuravura bula na vuravura ni yalo, ka rawa ni da torocake ka tubu tale kina.

Ni o tiko e na vuravura ni yalo, e na rawarawa vinaka sara na veika e qaravi kina, me vaka ga na kena o sotava tiko e na gauna oqo. Era na veikilai tale na yalo e na vuravura ni yalo—era na dau veitalanoa, raica, era na dau veitaratara tale vakaiira, me vaka ga na sala ni nodra veiwekani e na noda mai tu oqo e na yago qele. E kea tale ga, me vakataka eke, e na matata sara na veika kece, o na dau kila vinaka me vaka ga na nomu kila na veika dodonu eke. O ni na laki raica e kea ni ra bulabula tale ga na yalo ka da veivosakitaka tiko; era sega ni dau moce. O ni na qai kila kina ni ra saga tiko ga e na nodra igu—ni ra cakacaka ka bunotaka tiko na veika e baleti ira, me vakataki keda ga ka bula tiko e na vuravura oqo (DBY, 380).

Era veikilai tale vakaiira na yalo, me vaka ga eda veikilai vinaka tu oqo na tamata, e dina ga ni yavutaki na yago ni yalo e na veika talei ka sa raragi oti mai, ka sega ni vakavatukana ki na yagoda. Era dau lako, ra veivosaki, ka qarava tale ga na nodra dui soqoni; ka ra sa laki kumukumuni vata tiko mai na yalodra na turaga vinaka me vakataki Josefa kei ira na iTalatala Qase, era sa biuta yani na Lotu e vuravura me dua na gauna lekaleka, me ra laki bula e na dua tale na ivakatagedegede ni bula, me ra tokoni kina e na nodra lakova na veivanua ka laki vunautaka kina na Kosipeli, ka sa liutaki ira voli ga o Josefa, ka vakadreti ira tiko, dou lako yani na taciqu, ke ra vakalatilati ki na nomudou sala, dou lakovi ira yani ka laki vakaroti ira, dou dui lako. Sa tu vei kemuni na Matabete, o ni na rawa ni vakatalai ira tani, ia ke dua vei ira e via rogoca na Kosipeli, ni vunau vei ira (DBY, 379).

Meu bau kaya wale ga me baleta na noda veitalatala kei ira na wekada, kei na noda sa na bale tale ga o keda, au sa bau kila vakavoleka sara beka na veika ni bula e na vuravura tawamudu, kau dau vinakata vakalevu sara na veivuke vakayalo meu gadreva tiko ga meu tomana tiko na noqu bula, kau se bera ni bau vakayacora mai e na noqu bula, meu bula tiko ga. E sega ni vakamacalataki rawa na rarama kei na talei ni noda vale ka tarava. Eda sega ni laki vauci tale kina vakayago, me vaka eda sotava oqo, ni da na qarauna vinaka na veika eda butuka, ni da sa qase cake tiko, me kua kina ni da laki qiovuki kina, ka bale. Eda dau raica ni ra tatacake vakalevu o ira na noda itabagone, ka vakavuna na nodra bale. Ia, e kea, e duidui sara. Ni ra veilakoyaki vakarawarawa me vaka ga na liva ni siga. Kevaka eda via laki sikovi Jerusalemi, se na vanua oqo, se vanua oya—kau vakabauta ni na vakatarai vei keda ke da gadreva dina—eda na tu sara kina, ka laki sarava tiko na kena veisala. Ke da via raici Jerusalemi, e na gauna e bula voli kina na iVakabula; se da via raica na Were o Iteni e na gauna a se qai teivaki kina, eda na rawa ni raica, ni da na raica e na kena buli mai vakayalo; ni a buli vakayalo taumada, ka qai vakavatukanataki vakavuravura e muri, ia se tiko ga vakayalo edaidai. Eda na laki raica tale ga na vuravura e na itekitekivu ni veibuli, se me da laki sikova na veikorokoro ga eda via laki raica e na vuravura oqori. Kevaka eda na via kila na ivakarau ni nodra buli na veiyanuyanu e na muaira oqo, se mai Jaina, eda na laki tiko sara kina; e dina sara, ni da na vakatauvatani ki na cila ni rarama e na matakacaca. … Sa vakatakila mai na Kalou na veika lalai e so, me baleta na nona veilakoyaki kei na nona kaukaua, kei na kena vakayacori kei na lidi ni livaliva, e vakavatukanataki kina na veika e rawata o Koya Sa Kaukaua Sara (DBY, 380).

Ni da lako yani ki na vuravura ni yalo, eda na laki vakaivotavota e na iwase ni nona kaukaua. Eda dau vakaleqai vakawasoma eke e na mate kei na malumalumu e so vakayago. Eda sa na vagalalataki sara e na vuravura ni yalo mai na veika kece ga oqo, ka me da rawata kina na marau, na bula, na lagilagi, kei na vuku; ka sa na dau vosa kina vei keda na Tamada, e na vosa vei keda o Jisu, ka ra dau vosa vei keda na agilosi, me da sotava kina na nodra veiwekani na yalododonu, kei ira na yalosavasava, era sa na laki waraka oqo na tucake tale e na vuravura ni yalo DBY, 380–81).

Mo vakasamataka mada, ni dua e tamata yaloca e veigauna—sa dau ivalavala ca vakalevu sara, ka na laki mate ni tu ga e na ivakarau ni bula oqori, e na goleva tiko ga na veika ca na yalona, e na nona sa na curuma yani na vuravura ni yalo. Ia, e na dua tale na vakasama, ke da dau saga tiko ga e na veigauna, mai na kaukaua kei na isolisoli taucoko sara ka sa solia mai vei keda na Kalou, me da vakavinakataka kina na noda taledi, me da vakarautaki keda kina me da laki bula e na bula tawamudu, ka laki maroroya tiko na yagoda na ibulubulu e na noda saga tiko na veika oqori, e na vakaevei beka na ivakarau ni yaloda e na gauna e cabeta yani kina na ivakatagedegede ni bula ka tarava? Era na tovolea tiko ga me ra qarava na veika ni Kalou, ia e sa na qaravi vakavinaka cake—me vuli tiko ga, ka tubucake tiko, ka vakaikuritaki vakalevu sara e na yalo vakarisito, ka yalomatua cake e na ivakavuvuli dina (DBY, 379).

Ke da yalodina tiko ga ki na noda vakabauta, ni da tadu yani ki na vuravura ni yalo, e na sega tale ni vakayavalati keda rawa o ira na agilosi era sa cemuri tani mai—o Lusefa kei na ikatolu ni lewe i lomalagi ka ra lako vata mai, kei na yalodra na tamata ivalavala ca era a mai bula tu e vuravura, ke ra tovata me ra vakarusai keda. E sega li ni isolisoli vinaka vei keda oqori? Io. Ni ra sa qali tu vua o ira na kena vo ni luve ni tamata, ka ra laki qali tale ga vua e muri, me vaka ga na nodra qali yani vua e na bula vakayago oqo (DBY, 379).

Era na vakasosataki [na yalodina] ka ra vakasaqarai mai vua na vu ni ca; ia ni da na yaco yani i na vuravura ni yalo, eda sa na laki lewa e kea na kaukaua i setani, ka na sega tale ni vorati keda vakadua, sa rauti au vinaka ga na noqu kila oqori (DNW, 1 Okt. 1856, 3).

Ke dua e papitaisotaki e na veibokoci ni ivalavala ca, ka qai mate e na dua na gauna lekaleka i muri, e na sega ni vakarautaki vinaka me laki sotava na bula vakaiukuuku ka yalataki vei ira era yalodina e na Kosipeli; ni sa dodonu me vulica mada e na bula vakayalo, na veitabana bibi e so ni vale ni Kalou, me cavuikalawa ka vakaikuritaki tiko ga e na dina, me vuku cake tiko ga, me yacova ni sa qai soli tale vua na yagona ka sa vakarautaka mai, me laki bula tale e na iserau nei Tamada kei na Luvena. Eda na sega ni curu yani ki na lagilagi ni bula vakasilesitieli e na ivakarau ni bula lecaika kei na butobuto vakayalo ka da bula kina oqo (DBY, 378–79).

Era lewe levu cake na wekada e na tai kadua ni ilati, mai vei ira e na tai ni bula oqo, ka ra na dau marautaki keda vakalevu cake mai vei ira na wekamu voleka, mai vei rau na nomu itubutubu kei na itokani e na vuravura oqo; o ni na marautaka vakalevu cake na nomuni laki sotavi ira, mai na nomu dau marautaki ira na wekamuni e na bula oqo; eda na qai kalawa yani mai na dua na ivakatagedegede, ka vakaikuritaka tiko ga na marau, ka tomana na veika o sa kila, kei na kena isolisoli, me uasivi cake tiko ga na noda itovo ni noda marau, ka yalomatua cake ni da goleva tiko ga na vosa kei na kaukaua ni bula (DBY, 379–80).

Ni da sa sivia yani na bula oqo, ka curuma yani na bula ka tarava, eda na sega ni laki tu ga e kea. Eda na toso tiko ga, ka tudei tiko ga e na caka vinaka, me da veiqaravi ka veiliutaki kina vei ira sa soli mai me da veiqaravi ka veiliutaki kina, ka qai goleva tale yani na kena ka tarava, kei na kena ka tarava tale, me yacova ni sa laki vakaisalataki sara mai vua na Turaga o ira vakayadua era sa dau yalodina e na vuravura oqo, ka sa mai tase tale ga na cakacaka me baleta na vuravura oqo, ka sa vakacavara tale ga na iVakabula, o koya ka da vukea tiko mai, na nona itavi, ka me soli lesu tale vua na Tamada na vuravura oqo, kei na veika e baleta. Era na qai taura kina o ira na yalodina oqo na nodra isolisoli kei na nodra isala, sa na tauyavutaki tale ga vei ira na veika e nodra, ka soli sara vei ira, me ra qai toso tiko ga, ka vakaikuritaki tiko ga na nodra vuravura ka buli me baleti ira, me ra tosocake tiko ga ka tawamudu (DBY, 376).

Me iUlutaga ni Vuli

Era na lesu tale ki na vuravura ni yalo na yalodra era sa mate.

Ni sa mate na yago, e na lako beka e vei na yalo? (Raica tale ga na Alama 40:11–14.) Na cava beka na vuna, eda sega ni dau veiraicimata kina, se veivosaki kei ira e na vuravura ni yalo?

A dolava o Jisu na veivakabulai vei ira e na vuravura ni yalo.

Na cava beka na ibalebale ni “dolava o Jisu na veivakabulai vei ira e na valeniveivesu vakayalo”? (Raica tale ga na V&V 138; 1 Pita 3:18–19.)
Ni sa dolava oti na Karisito na katuba ni veivakabulai e na vuravura ni yalo, sa laki vunautaki beka vakaevei e kea na kosipeli? (Raica tale ga na V&V 138:30.)
Ke sega ni laki qaravi e na vuravura ni yalo na veicakacaka vakalotu ni bula vakayago, na cava ga na vuna e na laki vunautaki kina vei ira na yalo e kea na kosipeli? (Raica tale ga na V&V 138:58–59.) Na cava beka e rawa ni da qarava e na vukudra e na vuravura ni yalo, ka se sega ni vakaivotavota yani e na cakacaka ni veivakabulai? Me da dau qarava beka vakaevei e na yalodina na nodra vueti na mate, ke sega ni da tiko volekata na valetabu?
E na laki vakamawe beka vakaevei ki na nomu bula e na vuravura ni yalo, na ivakarau ni nomu bula vakayago oqo?

E vuravura bula na vuravura ni yalo, ka rawa ni da torocake ka tubu tale kina.

Na cava beka sa vunautaka mai o Peresitedi Young me baleta na bula e na vuravura ni yalo? E rawa ni vakatauvatani beka vakaevei na bula e na vuravura ni yalo, kei na bula oqo e vuravura? E na duidui beka vakaevei? Na ivakarau cava ni bula e na vuravura ni yalo o nanamaki vakalevu sara kina?
Na kaukaua cava beka e tu vei Setani e na vuravura ni yalo?
Na cava na vuna e se sega kina ni vakarau vinaka o koya ka se qai papitaiso ga, me laki vakaivotavota e na bula vakaiukuuku? Na cava beka e dodonu me vakayacora e dua, me vakarautaka kina na isolisoli oqo? E na laki rawata beka e vei veika oqori?

Christ preaching in Spirit World — E na loma ni gauna ni Nona mate kei na vakaturicake tale, a mani lako na iVakabula ki na vuravura ni yalo, me laki tauyavutaka kina na cakacaka ni veivakabulai e na vukudra era sa mate.