Dau Lomavinaka, Yalomalumalumu, ka Yalodina

A dau yavutaki na bula nei Peresitedi Brigham Young e na ivakavuvuli rawarawa sara ka dina. Mai na veika a sotava e na nona se cakacaka voli vakamatai, ka dau saumi voli na nona cakacaka, a dau raica kina na bibi ni cakacaka yalodina, me ra dau viria na bai ka na dredre sara ni bale, era na vakacobara na katuba ka na tu dede, ka sega ni biuta mai na nodra vanua ni cakacaka, ni tiko voli ga e na nodra taga na iyaya ni cakacaka ka nona o koya na itaukei ni cakacaka. Me veivakaroti kina vei ira e na veitagede ni bula me ra dau “waqaca vakavinaka na matadra, me raica ka kila vinaka na itovo vinaka kei na yalodina” (DNW, 2 Tis. 1857, 4). E veivakauqeti tale ga o Peresitedi Young vei ira na Yalododonu e na gauna oya, ka ra sotava tu na veika dredre, me vaka na veivakacacani, na dravudravua, na viakana, ka dau yalovinakataka na nodra sotava na veileqa e vuqa oqori, e na yalomalua, ka ni sa dau veivakaukauataki vei ira na Turaga, e na gauna era sotava kina na drakidrakita ni bula e so. Sa dusimaki e na nona vosa kei na nona bula ni sa noda itavi ga me da dau yalodina ka vakavinavinakataka na veika oqori, e na noda vakavinakataka cake na veika e vuqa sa vakalougatataki keda kina na Turaga.

iVakavuvuli i Brigham Young

Eda na yavutaki e na bula vakavinavinaka, ni da kidava na ligaloloma ni Turaga e veigauna.

Au sega ni se kila se dua tale na ivalavala ca, e ca vakalevu cake mai na noda sega ni dau vakavinavinakataka na veika e baleti keda (DBY, 228).

Meu bau vakamacala mada me baleta na veika dredre eda sota kaya tiko. O ni kila vinaka na noqu ivakasala me baleta na veika e so oqo, ni kevaka e dua vei keda e rerevaka na mate e na viakana, me yalovinaka me lako, ki na vanua e vutuniyau tu kina na veika ni bula. Au sega ni vakasamataka rawa na kena leqataki tiko na viakana, ni kevaka sara eda sa kania na iotioti ni noda asa, mai na bati ni daligana ki na samosamo ni nona iroiroi ni lago, au na sega ni ririkotaka vakalailai na mate e na viakana. Era lewe vuqa sara era sega ni se cakacaka tiko e na gauna oqo, ia eda sa na tadolova yani na vulaitubutubu, eda na sega ni sotava tale na veika dredre e so, me vakavo ga na kena e na vinaka kina na noda bula. Au vakavinavinakataka vakalevu na ligaloloma ni Turaga, ka sa vakavatukanataki vakalevu vei keda; au sa marautaka vakalevu kina na veika dredre eda sotava oqo ka vakarautaka mai vei keda, me vaka ga na noqu dau marautaka na veika kece sara ni bula au sa dau donuya mai. Au a sa tukuna oti vei kemuni e na vica na yabaki sa oti, na noqu nanuma me baleta na nodra yalololoma na Yalododonu, na nodra vakabauta, nodra vakavinavinaka kei na yalomarau, kei na nodra dau vakadinadinataka na ligaloloma ni Turaga, kei na veitatabei ni nona veinanumi vei ira na nona tamata. Era lewe vuqa sara na tamata era sa dasilana yani na veika dredre e so oqori, ka voleka sara ni ra vosacataka na Kalou, o koya ka lomani ira mai. Era vinakata ga na koula kei na siliva, mai na witi kei na sila, kei na valawa qaqi, kei na veikakanadraudrau uasivi, ka se bau tubu mai e vuravura oqo. Era dasilana ga, ka vakawalena sara na isolisoli tale e vuqa ka sa vota vei ira na Turaga na nodra Kalou (DNW, 6 Fev. 1856, 4).

Eda marautaka vakalevu ga ni sa dau lomani keda na Turaga, ni da a buli mai e na malumalumu, me rawa kina ni da qai kaukaua cake sara ka bula uasivi. Me ra dau marautaka na Yalododonu na veika kece ga—e na nodra vakacacani, ni sa kilikili me ra vakasavasavataki vakayalo, me ra vakarautaki tale ga na ivalavala ca ki na nodra vakarusai; e na veimate kei na veika mosimosi, e dina ga ni dredre sara ni ra dau vosota, me da kila kina na veika rarawa e vuqa, na veika rarawa, kei na veika voravora kece ga e rawa ni ra sotava na tamata, ni da na qai vuli ga mai na kena vakavatukanataki ki na noda bula na veika dredre e vuqa. Sa dodonu kina me da marautaka sara vakalevu ni sa kadre tu e vuravura oqo na vakabauta, ka sa veiliutaki kina vakatui na Turaga, ka sa vakatulewa tiko vei ira na lewe i vuravura. O ni na vaqaqa beka seu dau marautaka na nona vakacolasau tiko na Tevoro, ka veivakamavoataki vakalevu vei ira na lewe i vuravura? Au na vakadonuya na tikina oqori, io, au marautaka vakalevu, au sa vakavinavinakataka vakalevu na tikina oqori, me vaka ga na noqu dau marautaka na veika kece ga. Au marautaka niu sa vakamavoataki tale ga mai vua. Au marautaka niu dravudravua tale ga. Au marautaka niu sa mai yalolailai vakalevu. E na vuku ni cava? Baleta ga niu na laveti cake tale e muri. Au marautaka na noqu dravudravua niu na vakavutuniyautaki tale; niu sa dau kune rarawa, niu na vakacegui, ka vakarautaki meu vakaivotavota e na talei ni bula marau tawayalani, ni na ka dredre sara me taleitaki na bula marau, me vakavo ga ni da sa kila ka vosota tiko mai na kena veibasai (DBY, 228).

Eda dau vakamacala me baleta na veivakatovolei kei na veika dredre eda sa mai sotava e na bula oqo; ia, mo vakasamataka mada ke o na rai ki na vica na milioni na yabaki e muri, e na nomu sa vakaraitaka na nomu yalodina ki na nomu vakabauta, mai na vica wale sara na yabaki o bula kina oqo, ka vakaivotavota kina e na bula tawamudu, ka vakaisalataki kina e na bula lagilagi e na iserau ni Kalou? Qai raica lesu tale mada na nomu bula e na vuravura oqo, mo ni raica na druka, na nomuni baini, na veika rarawa … ; o ni na bukani kina mo ni kailavaka, “e ka wale sara? Na veika e so oqori e baleta wale ga e dua na gauna lekaleka, ia eda sa mai tu oqo eke. Eda sa dau yalodina mai e na gauna lekaleka sara ni bula vakavuravura oqo, ia eda sa mai vakaivotavota tu oqo e na bula tawamudu kei na lagilagi, ka soli kina vei keda na kaukaua me da torocake tiko ga ki na vuku tawayalani, ki na itagede yadudua sara ni bula, me ra sotava kina na matamamarau ni veivakadonui ni Tamada ka noda Kalou, kei Jisu Karisito na tuakada” (DNW, 9 Nov. 1859, 1).

E dua tale na tikina meu na vakamacala kina vakalekaleka, ia ke da na sega ni vulica na veika e so sa tu, eda na sega sara ni laki rawata na Matanitu Silesitieli. Eda mai vakasoqoni oqo e na dua na inaki, me da kila kina na veika me da cakava e na bula oqo, me da vakaivotavota tale ga e na kena kalougata. Kevaka eda na sega ni kila rawa na veika oqo, me da qai laki vakaivotavota rawa beka vakaevei e na iyautalei na bula tawamudu; ni o koya ga sa yalodina e na veika e vica, e na laki lewa na veika e vuqa [raica na Maciu 25:21]. … Ni da sa kalougata mai na kena sa vakawa vakalevu na noda manumanu, ka vakawalena kina na isolisoli sa solia vei keda oqo na Turaga, eda sa na qai vakavuna na Nona cudru, me da na qai totogitaki kina. Na tama cava beka e vuravura oqo, e na dau solia na veivakalougatataki vua e dua na luvena tagane e na yalomarau, ni na vakasabusabutaka tiko o luvena, ka laki taurivaka wale e na veimauilavo? E na bureitaka vua o tama na nona isolisoli, ka na solia vua e dua tale na luvena, ka ganita me nona. E dauloloma cake na Turaga mai vei keda na tamata; ia e na laki tinia ga na Nona isolisoli, kevaka eda na sega ni dau marautaka, ka dau qarauna vakavinaka, ni da sa mai taukena. Me ra maroroya na tamata kece ga na nodra manumanu, na bulumakau kei na ose, ni rawa ni na lewai o koya e sega ni vakayacora vakakina, me vaka sa kena dodonu (DNSW, 29 Okt. 1865, 2).

Na cava beka na noda itavi? Sa noda itavi me da vakavinakataka tiko ga na isolisoli kece sa solia mai vei keda na Turaga. Ke solia vei keda na qele, mo teivaka; ke solia me da taravale, vakavinakataka sara; ke soli vei keda na watida kei na luveda, mo vunauci ira e na sala ni Turaga, ka laveti ira mai na bula vakavuravura ka butobuto, vakaloloma, ka sa luvuci tu. … E na nona ligaloloma, sa kacivi ira kina na Yalododonu e na Gauna Oqo mai na bula vakavuravura, ka vakasoqoni ira mai na veimatanitu, ka solia kina vei ira e dua na nodra itikotiko e vuravura. E nodra isolisoli beka na veika a vakayacora oqori? Io, e dua na isolisoli levu vei ira na tamata na nodra vagalalataki mai na nodra bula ivalavala ca o ira na tawadodonu, mai na veika voravora ka uetaki e vuravura. E na veivakalougatataki oqo, me da vakavatukanataka kina vua na Tamada mai Lomalagi ni da dauveiqaravi yalodina; ka me kena ikuri, ni da vakalougatataki tale ga e na noda vakasuka tale vua na veika sa vakaiyautaki keda kina. … Sa qai matata kina ni sega ni noqu na veika e tu oqo vei au, meu na vakasuka tale vua na Turaga e na gauna e vinakata kina; ni sa nona, ka na nona tiko e na veigauna kece ga. E sega ni noqu. Au sega ni a taukena mai (DN, 20 June 1855, 4).

E sega ni dua sara na ka e na bula oqo [se] na veika e sotavi e na loma ni dua na aua, ka na sega ni yaga vei ira era na dau vuli kina, me ra vakavinakataka kina na veika e so era sa sotava mai (DNW, 9 Julai 1862, 1).

Era dau vakararavi ga vua na Turaga o ira era dau yalomalumalumu.

Me da vakamalumalumutaka na yaloda me vakataki ira na gone lalai— me da yalomalumalumu me vakataki ira na gone, me vakalasikati kina vei keda na vatuka ni yalo ni Kosipeli, me da qai tubu rawa kina, me da vakaikuritaki e na kila ka, e na vuku, kei na yalomatua (DBY, 228).

Eda na sega ni rawata vakaikeda e dua na ka, na kena ga e solia vei keda na Turaga (DNW, 28 Okt. 1857, 5).

Ni dua e yalomatuataka na veika sa tu oqo, … ke raica ni vakayalovinakataka tiko na Kalou kei ira na tacina vakalotu, me vuabale kina e na marau, ka yalomalumalumu cake kina vakalevu, ka laivi koya ga ki na lewa ni Kalou. Ni dua e dau dokadoka ka viavialevu, e na vakasinaiti tiko e na veicavilaki kei na veika wale, me vakaleqai koya kina; ia e na sega ni yaco vakakina ke sa vakabauta tiko ga na Kalou (DBY, 228).

O cei beka e dodonu vakalevu sara me vakavinavinakataka na nona Kalou—o koya ga e sega ni tu vua na gagano vakatani, se na kusikusima ca me vorata, se o koya e dau saga e veisiga me vorata yani, me qai vakidacalataki e na ivalavala ca? Sa na vorati ga na nona kaukaua, na nona vakabauta, se na nona vakatulewa, ka na qai lasika kina na nona cala e na nona ivalavala ca, e dina ga ni sa dau saga tiko ga, e na veisiga kei na veibogi, me vorata rawa. O cei beka e dodonu me vakavinavinaka kina vakalevu? Me dau lako voli ga e na salatu ni bula yalomalumalumu o koya e sega vua na gagano ni yalo me veivorati kina, me kua sara ni boletaka na nona yalododonu vei tacina. Sa noda ilesilesi, mai na ivau vakaveiwekani vakatamata, me da veitokanitaki ira era dau caka cala. Me da dau vosota na veika oqo me yacova ni sa lewa na Turaga me wasei ira na witi vinaka mai na witi ca—ni ra sa vakasoqoni vata na ivalavala dodonu, ka ra vau me ra vakamai o ira na ivalavala ca [raica na V&V 86]—me ra wasei tani kina na sipi mai vei ira na me [raica na Macaiu 25:31–34]. O ira e sega na gagano vakayalo me ra veivorati kaya e veisiga, e na veiyabaki, me ra dau lako voli ga e na salatu ni bula yalomalumalumu, ke ra sa vakacalai e na ivalavala ca o ira na tacida se ganeda, mo vakasinaiti e na yalololoma—e na yalo ni veiwekani vakaveitacini, se yalo vakaagilosi—mo ni kakua kina ni kauai ki na nodra malumalumu oqo (DNW, 22 Oks. 1860, 1).

Era na vakasinaiti e na yalomarau o ira na yalomalua kei na yalomalumalumu, ka dau kune vakacegu e na veigauna (DBY, 228).

Era dina e na vukudra o ira sa yalodina, era dina vei ira na wekadra, kei koya na Turaga.

Me ra dau lomadina na tamata kecega, me ra yalodina e na mata ni Kalou, me ra doka na nodra ilesilesi, kei na inaki ni nodra mai bula e na vuravura oqo. O ni na taroga se rawa beka vakaevei oqori? Io, e na kautani na lomaqa mai na ivakavuvuli eda sa mai vakaivotavota kina oqo (DBY, 232).

E dodonu me da dau vuli, me da vakatovotovo, vakadidike, ka kila vinaka tu na ivakarau ni nodra veimaliwai na agilosi. Ni sa yacova e dua na gauna me ra bula dodonu ka yalodina na lewenilotu oqo, o ni na sega ni raica e dua na dravudravua; ni sega e na vakaloloma tu, ni sa tu vei ira na veika ni nodra bula. Na tagane, yalewa kei na gone yadudua, era na rawata na veika me baleti ira, ni ra sa qai yalodina. Ni ra dau lawaki e vuqa na noda lewenilotu, era sa na dravudravua kina o ira na yalodina, ni ra na dau qaravi ka vakaiyautaki ga na vutuniyau mai na veika e dodonu me nodra na dravudravua (DBY, 232).

Au sa dau tovolea meu tabonaka na nodra bula vakailawaki na lewenivanua, kau tovolea kina me ra yalodina e na nodra bula. Keu na sauma e dua na dautaravale ka saumi koya e na tolu na dola e na dua na siga, ka tara e na tolu na siga e dua na katuba ni vale, ka rawa ni dua ga na siga ke cakava e dua ka lomadina, se dua-veimama beka na katuba, au na sega ni via sauma vua na tolu na dola me baleta na nona cakacaka ni siga oya. Ia e so vei keda oqo era sega sara mada ga ni vakatulewa, se kila na veika dodonu se cala, me ra saumi kina e na cakacaka era sega ni cakava; ka ra nanuma oqori ni cakacaka e na yalodina; ia era sa butako tiko, me vaka sa takalevu tu oqo e vuravura (DNW, 2 Tis. 1857, 4).

Me ra tovolea mada na [tamata cakacaka kece ga] me ra vinaka cake tiko. … Sa laurai vakalevu sara vei ira na lewenilotu na veika vinaka ka torocake. Me da gadreva vakalevu sara vua na Turaga na vuku … me da vinaka cake tiko ga, me yacova na ivakatagedegede dina ni bula e na veika eda cakava kei na veivosa eda cavuta; me yacova niu sa na sauma e dua me tara na bai, e na cakava e na yalodina, ka na vakakina vei ira na daucakacaka taucoko. Ke dua e sega ni cakacakataka rawa na kena isau, e na sega ni kerea, se taura. … Era sega ni dau yalodina o ira kau vakamacalataka tiko oqo; e nodra inaki ga me ra maroroya vinaka na veika era sa taukena tu, ka qai binia tale vakalevu vei ira, se ra rawata vakailawaki se sega, era na masulaka tiko ga me vakalevutaki tale vei ira (DNW, 2 Tis. 1857, 5).

E na ca sara vei ira era dau tusanaka ni ra Yalododonu, ka sega ni dau yalodina. Dau yalodina taumada e na veika e baleti kemuni, o ni na qai yalodina rawa kina vei ira na tacida vakayalo (DBY, 231–32).

Me ra tuberi na luveda e na yalodina, me ra susugi cake tiko e na vakasama me kua ni ra dau taura vakailoa e dua na pini ka sega ni nodra; me kua ni ra biuta vakatani e dua na ka, me biu lesu vakadodonu na veika kece sara. Ke ra kunea e dua na iyaya, me ra qara sara na kena itaukei. Ke vakasabusabutaki tu e dua na nona iyaya na wekana, me vakayagataka vakavinaka, me kua ni vakasabusabutaki, ka me ra dau yalodina kina vakaveiwekani (DNW, 23 Okt. 1872, 5).

E taka ga mai vei ira era lomavinaka na veika vinaka e so e caka—ka na yaco ga na veicakacaka vinaka e vuqa mai na gagadre savasava. Dau vakamuria na nomu yalayala, ka dau goleva vakavinaka na veivosa e so o sa dau tukuna. Au sega ni via veiwekanitaka e dua ka na dau voroka na yalayala ka sa vakayacora mai. Ni ka rawarawa sara na veika rawarawa, e na kena matata vinaka, na yalodina, na ivalavala dokai, na ivalavala dodonu, na loloma vakalou, na veilomani, na yalovinaka, me da caka vinaka tiko ga, me kua kina ni da vakacala e dua! E rawarawa vakaudolu mai na bula lawaki! (DBY, 232).

E vinaka cake sara na yalodina; na bula dodonu, me da vakauai keda ka cata na ca, mai na bula lawaki. Na sala rawarawa duadua beka me muri e na vuravura oqo na bula e na yalodina,—me da tudei tu e na iserau ni Kalou; ni ra sa qai kila rawa o ira na tamata, era na vakamuria sara (DBY, 232).

Me iUlutaga ni Vuli

Eda na yavutaki e na bula vakavinavinaka, ni da kidava na ligaloloma ni Turaga e veigauna.

E vakarota o Peresitedi Young ni dodonu me ra dau marautaka tale ga na Yalododonu na witi kei na sila, kei na veikakanadraudrau, ka sega ni koula wale ga kei na siliva. Na cava beka e dodonu me da dau vakavinavinakataka yadudua? (Raica tale ga na V&V 59:7, 21.) O sa bau dau vakavatukanataka beka vakaevei na nomu vakavinavinaka vua na Kalou, vei iratou na nomu vuvale, kei ira tale e so na wekamu?
Na cava beka na vu ni nona vunautaka o Peresitedi Young vei ira na Yalododonu me ra marautaka na nodra sotava na veika dredre kei na veivakacacani, na veimate e so e tauvi ira, na mavoa, kei na veika rarawa? E rawa beka vakaevei na veika vinaka mai na noda sotava na dredre e so oqori? Me da vakalougatataki beka vakacava mai na noda sotava na veika dredre kei na rarawa? Me da dau vakavinavinakataka beka vakaevei, ka marautaka na drakidrakita e so ni bula eda dau sotava?
A kaya o Peresitedi Young, “Eda mai bula oqo e na dua na inaki, me da kila kina na veika me da cakava e na bula oqo, me da vakaivotavota tale ga e na kena kalougata.” Na cava beka e na yaco, ni da sega ni vakavatukanataka na noda vakavinavinaka, mai na noda tovolea me da vakayagataka vakavinaka na isolisoli sa tu oqo vei keda? (Raica tale ga na Mosaia 2:20–21.) Na cava beka e rawa ni da vakayacora, me da vakavatukanataka kina na noda yalovakavinavinaka, e na vuku ni noda isolisoli? Me “da vakavinakataka tiko [beka vakacava] na isolisoli kece sa solia mai vei keda na Turaga”?

Era dau vakararavi ga vua na Turaga o ira era dau yalomalumalumu.

A vakamacalataka o Peresitedi Young na kena bibi me da dau yalomalumalumu me vaka na gone, me “vakalasikati kina vei keda na vatuka ni yalo ni Kosipeli,” me qai tubu kina na kila ka, kei na vuku. Na ivakadinadina cava beka o sa raica e na nomu bula vakaiiko, kei na nodra bula na wekamu, me baleta na tikina sa vakamacalataki tiko oqo? Na itovo ni bula cava e tu vei ira na luveda, me da vakamuria na uabula, me da yalomalumalumu kina?
E vunautaka o Peresitedi Young, “Eda na sega ni rawata vakaikeda e dua na ka, na kena ga e solia vei keda na Turaga.” Me da kila rawa beka vakaevei na lewa ni Turaga me baleta na noda bula? Me dusimaki keda beka vakaevei na Turaga, mai na noda yalomalumalumu? (Raica tale ga na Mosaia 3:19.) Sa veituberi beka vakaevei na Turaga e na nomu bula, ka vukei iko mo vinaka cake?
E tukuna o Peresitedi Young, “Me dau lako voli ga e na salatu ni bula yalomalumalumu o koya e sega vua na gagano ni yalo me veivorati kina, me kua sara ni boletaka na nona yalododonu vei tacina.” Me vakavuna beka vakacava na yalodokadoka na noda boletaka na noda kaukaua ki na nona malumalumu tale e dua? Na isolisoli cava soti beka era na sotava o ira era sa yalomalumalumu? (Raica tale ga na Ica 12:27.)

Era dina e na vukudra o ira sa yalodina, era dina vei ira na wekadra, kei koya na Turaga.

Me ra idusidusi beka vakaevei na agilosi, e na itovo ni nodra veimaliwai na vuvale kei na veikorokoro?
A vakamacalataka o Peresitedi Young ni na sega ni raica e dua na dravudravua; ni sega e na vakaloloma tu, ni sa tu vei ira na veika ni nodra bula, ke ra yalodina na lewe ni itikotiko. E na dau yaco beka vakaevei na veika oqori? Me vakamawe beka vakacava e na noda itikotiko na lomadina? E na vakavatukana vinaka beka vakacava na bula e na lomadina?
Me da tuberi ira beka vakaevei na luveda me ra dau lomadina? Na cava na vuna e vinakati vakabibi kina me da dau lomadina e na veika kece sara ni noda bula?
Me vaka sa vakamacala kina o Peresitedi Young, na cava na vuna “e rawarawa vakaudolu [kina] mai na bula lawaki” na noda dau lomadina, ka “sala rawarawa duadua beka me muri e na vuravura oqo”?