Aoaoina Atu o Mataupu Faalelotu i le Autalavou ma le Autalavou Maututua - Saunoaga Tomua

Peresitene Dallin H. Oaks

Vaega I

O’u uso e ma tuafafine pele,

Ua ma mitamita lava i lo tatou mafuta ai i lenei tauaofiaga a faiaoga seminare ma inisitituti ma faiaoga o mataupu faalelotu i o tatou iunivesite ma kolisi. Ua ma fiafia ona o loo outou aufaatasi mai ma o outou taitoalua, o e e taua tele i o outou tiutetauave paia faafaiaoga. Ua lu’iina i ma’ua e lauga atu ia te outou i lenei taimi tulagaese ma le faigata—i le lotolotoi o le faama’i oti i le lalolagi atoa.

E pei ona sa fautuaina ai outou e Komesina Paul Johnson, i le mavae ai o sa’u tala puupuu na tatala ai, o le a lua a tatou talanoaga eseese mo le taimi o totoe o la tatou polokalama.

Sa ou amata i le talanoaina o le mana o le alofa. Ua avea i se ā le alofa o le Atua ma poloaiga sili muamua? Ua muamua ona e taua ia malamalama ai ma mulimuli i le fuafuaga a le Atua ma Ana poloaiga mo Ana fanau. O lo tatou alofa i le Atua ma Lona alofa mo i tatou o le mataupu faavae tutotonu o le talalelei, e taua i mea e tosina ai i tatou ma e taua i mea e tatau ona tatou manatua. E alofa le Atua ia te outou o Ana faiaoga. E alolofa Ona taitai ia te outou o faiaoga o Lana fuafuaga ma Lana upu. Ma e tou te alolofa ia outou tamaiti a’oga. Na aotele e Elder Gordon B. Hinckley lenei mea i se fuaiupu e tasi i se saunoaga i faiaoga i le tele o tausaga ua mavae: “E leai se ala e sili atu e faailoa atu ai le alofa i le Atua nai lo le faaalia o le alofa mo ana fanau, aemaise o i latou o e o mai … e aoao o ni a outou tamaiti a’oga.”¹

Na maliu lo’u tama i le silia ma le 80 tausaga talu ai. O le a se mea sili ou te manatua i la ma mafutaga? O ana aoaoga? O lona aoaoina o la’u amio pulea? E leai, ou te manatua sili o ia ona sa alofa ia te au.

E faapena foi, ou te talitonu o le tele o mea e sili ona manatua e tamaiti aoga o o latou lagona e uiga i ou lagona mo i latou. O le a latou manatua lou fesoasoani ma le alofa ia te i latou e aoao le talalelei, ia iloa uunaiga a le Agaga, ma faaaoga le talalelei i o latou olaga. O le alofa o le mana faaosofia lea i le aoao atu.

Pe tusa ua 70 tausaga talu ona avea au o se tamaitiiti aoga o le seminare. O le a se mea sili ou te manatua e uiga i o’u faiaoga seminare e toalua i Vernal, Iuta? Ou te le o mafai ona manatua le mataupu o vasega sa ou avea, ae ou te manatua sa alolofa i la’ua uma ia te au ma amana’ia a’u o se tagata.

E i ai le mana o le alofa: mana e malamalama ai i le Togiola a Iesu Keriso, mana e malamalama ai i le ata o le faaolataga, ma le mana e faamalamalama ai poloaiga a le Atua.

A tatou le malamalama i le alofa, e feteenai isi mea uma e uiga i le talalelei pe faavaivaia foi i faaosoosoga a le fili ma le mana o mea taua a le lalolagi ma tagata o loo vagaia i tatou.

O lau mataupu lona lua o la outou sootaga i mataupu o le talalelei o loo outou aoao atu.

I le aoao atu o mataupu faale-poto salalau, ua masani ai ma e tele ina mafai e faiaoga ona seti i latou lava o ni tagata popoto i le mataupu. E le faatagaina lena mea i le aoaoina atu o mataupu faavae faalelotu. E le o tatou o ni pule o le talalelei a Iesu Keriso. O le pule o le Agaga Paia, o se tasi o le Aigaatua, o le ua i ai le galuega o le molimau atu i le Tama ma le Alo i le taitaia o i tatou i le upumoni. Na te faamalamalamaina a tatou aoaoga. O le mea lea, e le pei o faiaoga o mataupu o le poto salalalu, e le tatau lava ona tatou faumalo mo se manatu e faamalosia ai upumoni sili o le talalelei. E le tatau ona tatou faia ni mea i potua’oga po o soo se isi lava mea e faalavefau i le foliga po o aoaoga a lo tatou Faaola o Iesu Keriso. E le tatau lava ona tatou lafoina se ata lafoia o le manatu faapito i luga atu o soo se mataupu o loo tatou faiaoga ai.

Tatou te aoao atu ona o le alofa mo lo tatou Tama i le Lagi ma Lona Alo o Iesu Keriso ma le alofa mo Ana fanau, o a tatou tamaiti aoga. E faaosofia i tatou e lo tatou naunautaiga e faateleina lo latou tomai e faalogo ma uai atu ia te Ia o lo tatou Faaola.

Ou te molimau atu i lo tatou Faaola o Iesu Keriso, ma tatalo mo Ana faamanuiaga ina ia faatasi ma i tatou a o tatou agai i luma, i le suafa o Iesu Keriso, amene.