Aoaoina Atu o Mataupu Faalelotu i le Autalavou ma le Autalavou Maututua - Faamae’a le Faatofala’iga
Vaega III: Faatofala’iga/Talanoaga—DHO/KMO
PERESITENE OAKS: Ua ou fiafia lava e faatasi ma Kristen mo la tatou talanoaga faaiu. O ia o se faiaoga poto masani faapolofesa—e aofia ai se tausaga i le BYU—o se faifeautalai ua taliu mai, o se faletua, ma se tinamatua. O le a saunoa atu o ia mai na aafiaga o se faletua o se auauna a le Alii. O le faamoemoega o lo ma i ai iinei, o le fesoasoani atu lea ia te outou o faiaoga o mataupu faalelotu ma ia fesoasoani foi i o outou taitoalua i la latou matafaioi lagolago.
SISTER OAKS: Peresitene Oaks, ua ou matua faafetai i le mafuta ai ma oe i le po nei. Ou te faafetai foi i le mafuta ai ma faiaoga. Ua avea outou ma sui o i latou ua na aoao maia le talalelei ma faamanuia ai lo’u aiga. Manatu e tulagaese tele outou. Toatele a tatou uo ma aiga sa momoo i galuega o tou faia nei, ae latou te lei maua le avanoa. O le mea moni, matou te vaai atu ia te outou na fili lava outou e le Alii e avea ma faiaoga i Ana fanau. O se taimi faigata lenei e faiaoga ai, ma atugaluga o lesitala, faafitauli faaagafesootai, ma faafeagai moni e faasa’o mataupu faavae ma upumoni.
PERESITENE OAKS: Tou te manatua na tatou amata i le talanoaina o le mana o le alofa ia tatou sootaga, alofa o le Atua, Lona alofa i Ana fanau, lo tatou fealofani, ma le mea sili ona taua mo lenei faamoemoega, o lo tou alofa i tamaiti a’oga. Na tatou o i le vaega II, le uluai talanoaga, ma sa tatou talanoa e uiga i mea e pei o le “E mafai faapefea ona ou aoao atu mea o le a silisili ona taua?” ma le “Aisea e sili ai ona taua le aoao atu o mataupu faavae nai lo le aoao atu o tulafono?” ma le “E faapefea ona tatou fesoasoani i o tatou tamaiti aoga e faatautaia manatu faalelalolagi ma mea e faataua?”—i le lotolotoia o nei mea uma, o le faasoa atu o le alofa i tagata uma.
SISTER OAKS: Ou te iloa ua outou i ai i le po nei iinei, e avea o faiaoga aupito sili e mafai ona outou i ai, ma o se ata lenei o se tautau ki na tuu mai ia te au. Fai mai, “Tumau pea oe lava. Ua ave uma isi.” O se upusii a Oscar Wilde. Ina ua ou mauaina, muamua, ou te le’i manatu moni o se faamalo. Ae o le mea moni, o se tasi o faamalo pito sili ua ou maua, ma ou te avatu foi ia te outou.
A oo mai i le aoao atu o le talalelei, o outou o le au filifilia a le Alii. E tasi lava outou, e i ai o outou uiga auaumama, malosiaga, ma taleni e tulagaese. Ua tou i ai foi i se tulaga e tulagaese e faatoilalo ai le tetee faalelalolagi ma aoao atu upumoni faavavau. I le avea ai o se matua, tinamatua, po o se tina o le tina o le tinamatua nei, ou te faatuatuaina outou. Ma ou te matua faalagolago ia te outou e aoao lo’u aiga i mataupu faavae tonu e puipuia ai faalenatura i latou mai le pogisa o loo siomia ai. Tou te ofoina atu se talita e faasaga i le leaga, ma o outou o se tali i tatalo a lo matou aiga.
PERESITENE OAKS: Ma te talisapaia i taimi uma o la outou fesoasoani i lo matou aiga ma le autalavou o le Ekalesia ia malamalama ma opomau lo latou faasinomaga moni o fanau a se Tama Faalelagi alofa. O la tou meaalofa silisili ia i matou uma o le aoao lea o le autalavou ma tupulaga talavou i mataupu faavae sa’o ma upumoni faavavau e manuia ai o latou olaga—upumoni e mafai ona pipii i ai pe a na o i latou e faia faaiuga. Matou te talitonu o le mea sili lea e faaaupegaina ai i latou e fetaiai ma le lalolagi.
SISTER OAKS: E faafesagai lo matou fale ma le Malumalu o Sate Leki. Taimi nei, o loo faia a latou galuega tetele naua. Ua tumu i fatamanu, loli, ma masini mamafa. E foliga mai ua faalafi le malumalu. O loo galueaiina, e faapei foi o i tatou i le taimi nei o le KOVITI-19. Ua ufitia le malumalu ae o loo faia ia malosi atu ma sili atu le matagofie. O aso taitasi, e faaopoopo teisi ai e le aufaigaluega mea e faamalosi ma puipuia ai le malumalu. I le tolu tausaga, o le a alia’e mai ua atili ona matagofie, sili ona atoatoa, ma sili ona mafai ona tu i ona tulaga uma.
PERESITENE OAKS: E mafai ona faapei i tatou ma tatou tamaiti a’oga o le malumalu: e faia faafouga i aso taitasi ia tatou malolosi atili ai, atili ona tuuto atu, atili ona faamaoni—e oo lava i tulaga faigata. A o tatou toe fausiaina, faatasi ai ma faamanuiaga folafolaina, e mafai foi ona avea i tatou o se Maota o le Alii.
O se tasi mafuaaga ua ou fiafia ai i le i ai o Kristen i o’u autafa i lenei aoaoga, ona e taua tele o ia i le aumaia o le Agaga i lo matou fale. E pei ona saunoa Peresitene Nelson i le konafesi ia Aperila, “O se tasi o nofoaga aupito paia i le lalolagi o le fale.” E tatau ia i tatou uma ona faia nisi mea ia avea moni ai o tatou fale o se nofoaga paia. “Afai ua e faaipoipo, fefautuaai faatasi ma lau avā [po o le toalua] o lau paaga tutusa i lenei galuega taua. “I le va o le taimi nei ma le taimi o le a toe afio mai ai le Alii, tatou te manaomia uma o tatou aiga ina ia avea ma ni nofoaga o le filemu ma le puipuiga.”1 E taua tele a tatou ava i le faatupuina o lena mea.
SISTER OAKS: I le avea ai o se toalua o se tasi e manaomia le Agaga e galue ai i lona valaauga ma le galuega—pei foi o outou uma—ou te faia taumafaiga uma ia avea ai lo matou fale o se nofoaga paia ma se nofoaga o le alofa. Ma e leai lava se taimi na manaomia ai le Agaga Paia ia i ai i lo matou fale po o totonu o potuaoga. Ua fesoasoani moni lava le KOVITI-19. Ua tele atu taimi ma te faatasi ai. O lo’u toalua, pei o outou foi, e sili ona galue lelei i se siosiomaga faaleagaga. E taua tele mea ou te matamata ai ma faitau ma aumai i lo matou fale. E le mafai foi ona iai se finauga i lo matou fale, ma ou te taumafai e vaai i le itu lelei ma lagolagoina. Ou te iloa e taua la’u lagolago i le tuufaatasia o mea mo lo’u aiga ma mo la’u tane, ma o loo ou matua taumafai lava, ma ou te taumafai i aso uma.
PERESITENE OAKS:Faafetai, la’u pele. E feagai tou tamaiti a’oga ma faafeagai ogaoga mai mea taua faalelalolagi ma faaosoosoga. Ua valoia e le Tusi a Mamona lenei mea. Ua tatou ola i se taimi lea “o laueleele uma o le lalolagi … o le a onana i latou i le amioletonu ma ituaiga uma o mea inosia eseese.”2 Ua lapata’ia i tatou mai faiga a Satani i le taimi nei.
Mo se faataitaiga, i le 2 Nifae 28:20 ua tatou faitau ai faapea o Satani o le a “sasao o ia i loto o le fanauga a tagata, ma faaoso i latou ia feita e faasaga i mea lelei.” O mea uma mai le feitaga’i i le alatele, o solotetee, ma misa a aiga ua foliga faateleina. E mafai ona avea lau vasega o se lagi o le filemu ma saogalemu mai nei mea. E mafai ona maua ai se faataitaiga o aga faatamalii e foia ai lagona o au tamaiti a’oga.
SISTER OAKS: O a tou vasega e mafai ona avea ma o latou nofoaga saogalemu. O mataupu faavae e aoao atu i au vasega—aemaise o molimau e tuu atu iina, ma le Agaga e lagona ai—e mafai ona faafailele ma puipuia au tamaiti a’oga.
PERESITENE OAKS: I le fuaiupu 21, fai mai Satani o le a ia “faaoleole” isi ma “faamoemoe malie ese atu i latou” ma le mafaufau “ua lelei mea uma i Siona.”3
SISTER OAKS: Sa tautalagia lenei mea, ae e leai se ituaiga o tekinolosi faaonaponei ua faamoemoe malie ese atu ai i tatou pe matuai tosina ai la tatou gauai e pei o le telefoni feavea’i. Sa ou fia faasoa atu le tala lenei a se tasi faiaoga inisitituti—e lua tausaga na le mafai ai ona galue. Ma sa ia fai mai ina ua toe foi mai, sa faate’ia o ia. O faailo faifaipea, tesi, ma isi mea, na faalavelavea ai le gaua’i atu o tamaiti aoga mai le mafaufau ma aoao i le vasega. O le mea e sili ona leaga, na ia fai mai ai, o le tavavaeeseina o i latou mai le tasi ma le isi ma mai le Agaga. Ae ou te talitonu e i ai le faamoemoe, ma o loo taoto i lo tatou fesili atu i e o siomia i tatou e tuu a latou telefoni i lalo. Pe afai e mafai, e mafai ona tatou fautuaina se talatalanoaga e uiga i aogā ma matautia o telefoni mo e tatou te alolofa ma aoao atu—ma tuu ia tatou tamaiti a’oga e ta’u mai o latou atugaluga ma sue ni vaifofo e i latou lava, i le faafitauli o telefoni feavea’i. I le avea o ni matua, tatou te fiafia i ai. E tatau.
PERESITENE OAKS: O le faataitaiga faaiu, o loo maua i le 2 Nifae 28:22, o le a faase’e e Satani isi i le “[fai atu] e leai se seoli; ma … e le o a’u o se tiapolo, ona e leai se tiapolo.” O a outou aoaoga o le a fesoasoani ia tou tamaiti a’oga e iloa ai taufaase’e o Satani ma talapepelo e feteena’i ma poloaiga a le Atua. E i ai taunuuga o le amio musuia a Satani, ma o a tou aoaoga o le a maua ai le faamoemoe tatou te maua mai le alofa mutimutivale o le salamo ma le faamagaloga paia.
SISTER OAKS: Manaia tele. Ua ou faaipoipo i se Aposetolo ma ou te mataituina lelei isi Aposetolo. Ou te iloa o auauna a le Alii e matuai usitai a’ia’i, ma latou te sailia le Agaga o le Alii e taiala i latou. Ua ou iloa foi o loo avanoa le taiala faaleagaga mo i tatou taitasi, ma e mafai ona outou aoao a tou tamaiti aoga ia maua lena mea ma ia usiusitai.
PERESITENE OAKS: O le mea mulimuli, i le 2 Nifae 28:32, ua tautino mai e le Alii o le a Ia “alofa mutimutivale” ia i latou uma o e “salamo ma o mai ia te [Ia].” E aapa mai lava o Ia e le aunoa e siitia ma laveai i tatou. O outou na o loo aoao atua lena faamautinoaga ma lena faamoemoe i a tou tamaiti a’oga. Ta’u atu ia latou iloa o le salamo o se tasi o meaalofa silisili ua tatou maua. Tou te nafa ma le fesoasoani i au tamaiti aoga ia taunuu i lo latou gafatia atoa ma le taunuuga o fanau a le Atua.
SISTER OAKS: Ma aua lava nei galo le auupega silisili tatou te faaaogaina e faatoilalo ai na mea leaga. I le Alema 31:5 ua aoao ai i tatou e faapea “o le talaiga o le upu [a le Atua] ua aoga tele i le taitaiina o le nuu e fai mea tonu—e moni, sa sili ona aoga ai i manatu o le nuu ai le pelu”—po o le telefoni feavea’i. O outou o faiaoga o lena upu, ma ua ia te outou lena mana ma le folafolaga.
PERESITENE OAKS: Tuu le Faaola i le totonugalemu o au aoaoga o au tamaiti aoga, ona e maua lea o lena mana. I le avea ai o faiaoga o le talalelei, faatasi ma le taitaiga a le Agaga Paia, o loo e faia lenei mea, ma e mafai ona atili ai ona aoga. A outou latalata atili ia Keriso, o le a latalata atili atu foi a tou tamaitai aoga ia te outou ma ia te Ia. O le a faateleina lou gafatia e aoao atu mea moni latou te manaomia, ma o le a lautele lou gafatia e alofa ia i latou ma iloatino o latou manaoga.
Ou uso e ma tuafafine pele, e faaopoopo atu i mea na ou fai atu ai muamua, ou te molimau ia Iesu Keriso—lo tatou Faaola, lo tatou Togiola, o le ao o lenei Ekalesia. O outou o Ana auauna. Ua tatou soofaatasi e aoao atu mataupu faavae moni o le talalelei a Iesu Keriso. Ou te faamanuia atu ia te outou—o Ana auauna, o Ana faiaoga, ma o tama ma tina i Siona, o ni auauna agavaa a le Alii o Iesu Keriso—e faataunuu o outou tiutetauave, e tausia Ana poloaiga, ia avea ma faaa’oa’o sili o le amiotonu ma le aoao atu o mataupu faavae moni. Ma ou te faamanuia outou i lena faamoemoega a o ou molimau atu i le moni o mea sa aoao ai outou i le asō, i le suafa o Iesu Keriso, amene.