Aoaoina Atu o Mataupu Faalelotu i le Autalavou ma le Autalavou Maututua - Faatofala’iga a le Laulauafono
Talanoaga Vaega II – Peresitene Oaks, Chad Webb, Adam Smith
Peresitene Dallin H. Oaks: Uso Webb, lelei ua tatou faatasi. Uso Smith. Tatou faagasolo.
Brother Chad Webb: Faafetai lava. Fiafia lava ua tatou mafuta i le asō. Faafetai mo lena savali matagofie. O le, faalogologo i lau fautuaga ua tulai mai ai le mau fesili tatou te fia talanoa ai. Tatou amata i lea, a o e saunoa i le alofa mo a tatou tamaiti a’oga, ma o se vaega o le alofa i tamaiti o le aoao atu o i latou i le talalelei ma fesoasoani ia latou malamalama i na mea e sili ona taua. Faapefea ona tatou mautinoa mai mea uma e mafai ona tatou aoao atu, tatou te faamuamua mea o le a sili ona taua mo a tatou tamaiti aoga?
Peresitene Oaks: O le mea e tulaga ese ai la tatou Polokalama o Aoaoga a le Ekalesia o lo tatou tiutetauave faaletusipaia e saili e aoao e le gata i le suesue ae faapea foi i le faatuatua.
Brother Adam N. Smith: Pe a ou mafaufau i na mea e mafai ona tatou aoao atu ia tatou tamaiti aoga o le a sili ona taua, e taialaina a’u i se aoaoga mai ia Peresitene Eyring ou te fia faasoa atu. Fai mai Peresitene Eyring, “Mai upumoni uma e mafai ona faamamafa i lenei poloka mau, o le fea o le a fesoasoani i tamaiti aoga e latalata atili ai i le Tama Faalelagi ma le Faaola ma tau atu ai i le olataga?” Ona saunoa mai lea o Peresitene Eyring, “A o e saunia se lesona, tilotilo i ai mo mataupu faavae e liua mai ai. … O se mataupu faavae e liua ai, o lea e tata’i atu ai i le usitai i le finagalo o le Atua.”1 O le mea ua ou maua mai lenei aoaoga sili mai ia Peresitene Eyring e faapea, o mea e silisili le taua mo a tatou tamaiti a’oga o le a fesootai ai i latou i ni ala patino ma le maoae i le Tama Faalelagi ma Iesu Keriso. E tatau ona tatou aoao atu na mea o le a fesoasoani i se tamaitiiti ia lagona ma malamalama i upumoni o le talalelei, aemaise o upumoni e faatatau i le moni o Iesu Keriso ma Lana Togiola ma le Toetu—ma fesoasoani ia i latou ia lagonaina i ni ala moni, ua ia Iesu Keriso le mana e faamalolo, fesoasoani, faamafanafana, ma faamamā i latou. Ou te manatu o mea aupito taua na e mafai ona tatou taulai i ai.
Peresitene Oaks: E mamana ma e moni.
Brother Webb: Faafetai lava. E fesootai lelei foi i le manatu o le faamautinoa ua latou aoao e ala i le faatuatua—latou te galulue i le faatuatua ona maua lea o lena faamautuuga mai le Agaga Paia o mea latou te aoaoina ma ola ai, e mai le lo tatou Tama o i le Lagi. Faafetai lava. Peresitene, na e ta’ua foi le matafaioi a le Agaga Paia i lo tatou aoao atu. O lea la ou te fia fesili atu ai pe o a upumoni faaopoopo e tusa ai ma le Agaga Paia ma Lana tosinaga ma le matafaioi i o tatou potua’oga e te fia faasoa maia.
Peresitene Oaks: Ou te manatu o le ki i uunaiga a le Agaga Paia o le taumamafa lea i le faamanatuga. Ona e i ai se folafolaga i feagaiga tatou te faia pe a tatou aai ma feinu i le faamanatuga e faapea, o le a tatou “maua pea lona Agaga e faatasi ma i [tatou].” E taua tele.
Brother Webb: E te silafia, ua ou fiafia ua e ta’ua lena mea. Ua ou manatua ai a o avea au o se faiaoga talavou, sa tele masina na ou suesueina ai mataupu faavae e faafoe ai le valaaulia a le Agaga Paia. Ma ou te manatu o se avanoa lelei tele lena e tatau ai ia i tatou uma ona suesue pea lava i ai. Ae o le mea aupito taua ua ou maua o le mea tonu lea faatoa e ta’ua: fai mai le tatalo o le faamanatuga afai o le a tatou manatua pea o Ia, o le a tatou maua Lona Agaga e faatasi ma i tatou. Ma ua le na o le taimi foi o le faamanatuga i Aso Sa, ae o aso uma—e aofia ai ma totonu o o tatou potua’oga. Afai tatou te taulai i le Faaola—a tatou manatua o Ia o le faataitaiga o le ala e ola ai i le talalelei ma utuvai mai Lona mana ma Ana aoaoga—a tatou manatua o Ia, tatou te valaaulia le Agaga Paia ia i ai i aafiaga e aoao mai ai. Ou te manatu o le uluai tiutetauave po o le matafaioi a le Agaga Paia o le molimau mai lea i lo tatou Tama Faalelagi ma Iesu Keriso o le tamaalii tutotonu lea i le fuafuaga a le Tama Faalelagi. O lea la, afai tatou te mananao e valaaulia le Agaga Paia i totonu o o tatou potua’oga, tatou te taulai atu i mea o le a Ia molimauina. Ou te fiafia i lena mea Fa’afetai.
Peresitene Oaks: Sa faamautinoa mai foi e Peresitene Nelson le taua tele i le taimi nei o lena mea i upu nei. Na ia saunoa, “I aso a sau, o le a le mafai ona tatou ola faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.”2
Brother Webb: Faafetai lava. Ia, ua ou matua talisapaia lava mea ua saunoa i ai, ma ua tata’i mai ai au e fai le fesii lenei: “Ua tatou talanoa teisi e uiga i mea e faamuamua e faiaoga i ni ala o le a valaaulia ai le Agaga Paia. E faapefea ona tatou fesoasoani i a tatou tamaiti a’oga e faamuamua mea e sili ona taua i o latou olaga?
Peresitene Oaks: A ou mafaufau i lena mea i aso nei, ina ua tele naua tosinaga faalelalolagi ua siomia ai i tatou ma o tatou tamaiti aoga, ou te manatu e manaomia ona tatou manatua o mea o le lalolagi—o mea e faataua e le lalolagi, po o a lava na mea—e taua mo na o se taimi le tumau. E oo mai le taimi, e itiiti ai lo latou taua nai mataupu faavae e tatau ai e aoao le faamoemoega o le olaga ma lo tatou taunuuga i le faavavau. O le a se mea e te faaopoopo i ai, Brother Smith?
Brother Smith: Peresitene Oaks, a o e aoao mai lena mea, sa oo mai i lo’u mafaufau se mau, a o lei ulufale atu le Faaola i Ketesemane, na Ia faia se tatalo, ma faapea, “Ma o le ola e faavavau foi lenei ia latou iloa oe le Atua moni e toatasi atoa ma le ua e auina mai o Iesu Keriso lea.”3 Ou te manatu afai tatou te fesoasoani i o tatou tamaiti aoga ia malamalama e manaomia ona latou filima’otia pe o mea o latou faaalu ai o latou taimi a mea latou te avatu i ai la latou gauai, o le a fesoasoani ia i latou e iloa ai ma alolofa i le Tama Faalelagi ma Iesu Keriso? O se isi foi manatu ua ou tuufaatasia ma lena, o se mea sa e aoao ai i matou i se konafesi aoao talu ai nei, Peresitene Oaks, o le fai lea o le fesili, “Pe o fea e tau i ai lenei mea?” Ma ou te manatu i lena fesili i le matalalaga o le “Pe o faalatalata atili atu ai a’u i le Tama Faalelagi ma Iesu Keriso? Pe o tata’i atu ai a’u e lenei mea e faataunuu ai lo’u faasinomaga paia po o faamoemoega?” Ma ou te manatu ua tatou maua ai i lena mea se faamamā mamana mo soo se tasi o i tatou. E mafai foi ona tatou fesoasoani i o tatou tamaiti a’oga ia malamalama foi i lenei faamamā ia latou filifiliga o mea e faaalu ai lo latou taimi, ma mea latou te matamata ai pe faalogologo pe vaai i ai. E ao ona latou faia a latou lava filifilliga. Ae afai e mafai ona tatou fesoasoani ia latou fesili, “Pe o fea o le a tau i ai lenei mea, ma pe o le a faalatalata atili atu ai au i le Tama Faalelagi ma Iesu Keriso?
Peresitene Oaks: E ese le taua o lena mea, e taua tele foi pe a malamalama o tatou tamaiti aoga uma i lena mataupu faavae.
Brother Chad Webb: Ma mo faiaoga ia faamamafa lena mea ma tuu atu molimau i na mea e valaaulia ai le Agaga Paia e faamautu le taua—ae le na o le moni, ae o le taua o na mataupu faavae i o latou olaga. Ou te fia faaopoopo atu foi, pe a mafai, tau lava o le manatu o le tatau ai. Ou te manatu i mea uma e mafai ona tatou fai e fesoasoani ai i tamaiti aoga ia latou mauaina le tatau ai o na mataupu faavae i o latou olaga. O nisi taimi ou te mafaufau ai tatou te talanoa i nei mea i tulaga o le tauva mo o latou taimi po o le gauai. O nisi foi taimi e tatau ona tatou faamuamua mea e sili ona taua. Ae ou te mafaufau e mafai ona tatou fesoasoani ia latou vaai i le mea o faia e le talalelei i o latou olaga i aso faisoo. Mo se faataitaiga la, sa ou aoao, a o ou a’oga, afai ou te tausisia le paia o le aso Sapati, ma afai ou te suesue i a’u tusitusiga paia ae ou te lei suesue, sa avea a’u o se tama a’oga sili atu nai lo le taumafai e tuueseese na mea ma faapea, “O le a ou faaaluina se taimi i le faaleagaga, ma o le a ou faaaluina foi se taimi i le faalelalolagi.” Ae i tulaga uma o lo’u olaga, pe a ou faaaofiaina le Tama Faalelagi—pe a ou valaaulia Lona Agaga e fesoasoani ia te au—ona oo lava lea i mea e foliga mai i o tatou tamaiti aoga ua sili ona faalelalolagi i le natura, latou te vaaia le tatau ai o le talalelei i mea o loo latou taumafai e ausia i o latou olaga. Nai lo le tauva mo o latou taimi, latou te o mai faatasi.
Peresitene Oaks: Tatou te manatua foi na aoao mai tatou e le Alii e faapea Na Te le’i tuuina mai lava ni poloaiga e faaletino. O Ana poloaiga uma ma taitaiga e faaleagaga.
Brother Smith: Tasi le isi manatu ua oo mai i lo’u mafaufau a o e ta’ua lena mea—a itiiti e mo o tatou tamaiti seminare—o le polokalama a le Ekalesia mo Tamaiti ma le Autalavou. O se ala mamana lena e avea ai le talalelei ma mea e tatau ai ma faia ai sini e mafai ona faatino e faaaoga ai le talalelei e fesoasoani ia i tatou i soo se itu o o tatou olaga e taumafai ai ia avea atili faapei o le Faaola.
Peresitene Oaks: Ioe. Ia, ou te fia fai atu se fesili i ni alii se toalua o ni faiaoga faapolofesa o matauupu faalelotu: O a ni mea ua oulua aoaoina uso ma a oulua paaga e uiga i le aoao atu o le talalelei a Iesu Keriso i le taimi o le faama’i oti ua tatou iloa uma?
Brother Smith: Ou te fia muamua fai atu ua matou aoaoina—ua faamanatu mai ia i matou, ma ua faamamafaina—le matagofie o o tatou faiaoga, latou te alolofa moni i le Atua ma tamaiti aooga, ma ua latou o’o i luga atu ma ona talaatu, ma ua matou matua faafetai ai lava. Ua ou manatu foi o le faama’i oti ua faamamafa ai le elemene o auaunaga o loo se’ei i totonu o aoaoga o le talalelei. Ou te manatu ua tatou lelei atili i le faalogo atu i tamaiti aoga, i le filima’otia o o latou manaoga ma tomai ma taulima, ma le alolofa ia i latou i le mea o latou i ai, ma le sailia o auala fatufatua’i e fesoasoani ai ina ia latou latalata atili i le Tama Faalelagi ma Iesu Keriso. Ou te manatu foi o le taimi o le faama’i oti, i le tele ai o faigata, ua matou vaaia le faatasi mai o le fesoasoani mai le lagi i le faiaoga o loo matuai taumafai moni ia alofa i le Atua ma alofa ia latou tamaiti aoga ma faia le mea sili.
Brother Webb: Ou te manatu, ua matuai lelei tele lena faaupuga. Masalo o le a na ona ou fai atu faafetai ma faaopoopo atu lo’u talisapaia. E te silafia, e i ai faiaoga o loo taumafai e aoao atu faafesagai ma aoao e faiaoga atu i luga o le initoneti. Latou te faaaoga ufifofoga ia e faalemanuia i nisi taimi. Latou te tuu i latou lava i tulaga lamatia ma na ona faia ma le alofa tele mo a latou tamaiti aoga ma mo le Tama Faaelagi ma le tautinoga tele naua. Na ona ou fia fai atu faafetai mo osigataulaga uma ma taumafaiga e faia ai i se taimi faigata tele.
Peresitene Oaks: Ou te faaopoopo atu, e fai ma sui o le Au Peresitene Sili, la’u faafetai i mea ua faatoa oulua faaalia. Matou te alolofa ia te outou uso e ma tuafafine, o e o faiaoga i seminare ma inisitituti i aoaoga faalelotu i iunivesite ma kolisi.
Brother Webb: Faafetai; e taua tele lena mea. O se isi fesili ua ma fiafia e fai atu ona o nisi o mea sa e aoao mai i isi faatulagaga: Aisea e taua ai lo tatou aoao atu o mataupu faavae ae le o tulafono?
Peresitene Oaks: Ua ou fiafia ua fai mai lena fesili. O se mea e sili ona ou fiafia i ai. I se koluma iloga o le Church News, na ta’ua ai e Tad R. Cllister, lo tatou peresitene talu ai o le Aoga Sa, le mea lenei e uiga i lena mataupu: “Muamua o tulafono e tele ina fuapau i se tasi pe atonu foi o ni nai tulaga patino, ae o mataupu faavae e masani ona lautele atu le faaaogaaga. Lua, o mataupu faavae e fatua’i ai se siosiomaga e faateleina ai le faitalia a o tulafono e aga ina faaitiitia ai le faitalia e ala i faasa [ma], o nisi taimi e oo lava ina faatonu malosi ai a tatou filifiliga.” Ou te fia faaopoopo atu i ai, na suia e le Faaola le Tulafono a Mose, lea sa faaosofia e le tulafono, i le tulafono maualuga a Keriso, lea sa faaosofia i mataupu faavae. Sa faalautele e Brother Callister lena mataupu faavae e faapea: Na ia saunoa: “O mataupu faavae e fetaui lelei ma le tulafono maualuga, o tulafono e fetaui ma le tulafono maualalo. O la tatou taulai faifai pea, o le aoao atu lea o mataupu faaleaoaoga faavae. Aisea? Aua o mataupu faavae e i ai le mana aupito silisii e siitia ai i tatou i maualuluga faaselesitila, ma i le iuga, o mataupu faavae—ae le o tulafono—o le a pulea ai le malo selesitila.”4 O le faaiuga lena o le saunoaga.
Brother Webb: Ou te matua talisapaia foi lena mea. E i ai foi le isi aogā i lena mea. Sa ou i ai ma se vaega o faiaoga i se taimi lata mai, o e sa fai mai ia te au faapea, i o latou potua’oga e foliga mai e tele atu—o le upu sa latou faaaoga o le “finauga” pe a tele fesili a tamaiti ma esese na manatu ma ni vaaiga i mea. Ma ou te fiafia lava i le mea sa e faatoa aoao mai aua ua toe ave ai a’u i lena talanoaga ma sa fesoasoani ua ou iloa ai o se tasi o auala e te taulima ai lena mea, o le lē aoao atu o le faaaogaaga, i mea latou te felafolafoa’i ai i lo latou faaaogaaga i o latou tulaga, a o le aoao atu o le mataupu faavae o le talalelei. Tatou o i le faavae—o le aoao atu o le ata o le faaolataga, aoao atu o le mataupu a Keriso, aoao atu o mataupu faavae, ma faatagaina ai mo le faaaogaina patino faatasi ma le fesoasoani a le Agaga Paia.
Peresitene Oaks: Lelei tele.
Brother Webb: Ou te manatu, e mafai tele ona fai ma aoga i mea o loo matou taumafai e fai, Peresitene. Fa’afetai. Uso Ben, e te fia faaopoopo i lena mea?
Brother Smith: Ou te manatu e tutusa ma le mea sa e faamamafaina, Uso Webb. O le aoao atu foi o se mataupu faavae, nai lo o se faaaogaaga, tatou te valaaulia ai se tamaitiiti aoga e galue o se tasi i le faagasologa o le aoaoina, i a latou lava faagasologa o le tuputupu a’e—ona latou aveina ai lea o se mataupu faavae ma mafai ai ona sailia faaaliga a le tagata lava ia, mafai ona o e suesue atili i ai mo latou lava ma filima’oti ai le laasaga sili mo i latou e fai ao latou faaaogaina lena mataupu faavae i tulaga patino.
Brother Webb: Faafetai lava. O se fesili tulitatao masani o le, “Faatasi ai ma tosinaga uma—faatasi ai ma leo uma i le lalolagi—e faapefea ona tatou fesoasoani i o tatou tamaiti aoga e faatautaia le tele naua o tosinaga i le sosaiete?”
Peresitene Oaks: E manaomia ona tatou malamalama o le tiapolo o le tama o pepelo uma—”o se pepelo mai lava i le amataga,”5 ua fai mai ai tusitusiga paia. O lona faaaogaina ma le poto o ana pepelo e faafefiloi ma mea moni. O lea, na te faatosina ai ma faaaafia suesuega a tagata lelei e ala i lana suifefiloi o mea moni ma tala pepelo. O lea la, mai mea aupito taua e mafai ona tatou taumafai e aoao i le olaga nei o i ai aoaoga a le Agaga Paia lea e mafai ai ona tatou nofouta i mea e moni—ma mea e le—moni.
Brother Smith: I se ala faapena, o se paluga o upumoni ma pepelo, e aveesea ai foi e le fili le mea moni mai lona matalalaga e faavavau ma mai lona nofoaga i le fuafuaga a le Atua. E faateleina ai le ono tatau ai o se upumoni ua faaaoga sese pe o malamalama sese ai. Mo se faataitaiga, na o ni nai minute talu ai, Peresitene Oaks, sa matagofie lou aoao mai e uiga i le mataupu faavae o le alofa ma lona nofoaga i le fuafuaga a le Atua—o le taua o le alofa i le Atua ma le alofa i o tatou tuaoi—o lena alofa o le malosiaga faaosofia moni lea o loo i tua o le naunauga o le Tama Faalelagi e saunia ai i tatou mo le ola e faavavau, lea ua matou iloa o le meaalofa aupito sili o meaalofa uma a le Atua Ma o lo tatou alofa i le Atua o loo faaosofia ai i tatou e alolofa ma auauna atu i isi ma le lē manatu faapito. Pe a manuia le faate’aeseina e le fili o le mataupu faavae o le alofa mai lona matalalaga, e faigofie ona mafai ona milosia. Ma o se tasi e malamalama sese i le alofa e ono taamilomilo i le faamoemoega sese. Latou te ono maua foi i latou lava o tetee i tulafono a le Atua ma Ana perofeta, aua o lena tuueseesega o le upumoni mai lona matalalaga faavavau e mafai ona tata’i atu ai i se malamalama sese pe ua le ogatusa ma le matalalaga. Ma e faia e le fili na mea i le tele o mataupu faavae.
Peresitene Oaks: Ua matou vaaia le faamaoniga tele o lena mea i le lalolagi, a ea? Uso Webb, i le avea ai o ni faiaoga, le a se ala sili tatou te talanoaina ai fesili e uiga i atugaluga o i ai nei i mafaufau o au tamaiti aoga o ni mataupu faalavelave i le talafaasolopito o le Ekalesia, o faafitauli o le LGBT, fesii e uiga i le ala e ola ai i faafoega a malo e tusa ai ma le faama’i oti, ma isi mea? E le uma fesili. O le a se ala sili e te talanoaina ai na fesili i le matalalaga o o tatou potuaoga o mataupu faalelotu?
Brother Webb: O se fesili lelei tele lena ma o se mea e taulima e faiaoga e le aunoa. Ou te fia amata i le faapea atu ou te fiafia ona sa aoao i tatou e le Aposetolo o Paulo e aoao atu pe tautala atu i le mea moni i le alofa. O lea la e tatau lava ona tatou aoao atu le talalelei. E manaomia lo tatou aoao atu o tusitusiga paia ma aoaoga a perofeta o ona po nei. E manaomia ona tatou aoao atu mea moni. E le aoga mo soo se tasi le aoao atu o mea e le moni; e le tau atu ai i le fiafia. Ae o le isi vaega o lena mea—ou te manatu e matuai taua tele lena mea, ina ua Ia saunoa e faia lena mea i le alofa, e pei ona e toe ta’ua i le po nei. Ou te manatu e taua le amata i sootaga. Ua tele naua sailiiliga ua faia ua faaalia manino mai ai ia i tatou e faapea, ina ia aoao e tamaiti aoga, e matuai faalagolago lava i sootaga. Mo a’u lava ia, o nei sootaga e amata i faiaoga o e naunau e faalogo—ia malamalama moni i tamaiti aoga ma o latou tulaga ma ia i ai le loto malamalama e taumafai ai ia malamalama i o latou manaoga. Ou te manatu e taua foi le iloa e tofu tagata uma ma se mea e saofagā, tatou te faatauaina le—tatou te manaomia le tasi ma le isi ma o latou aafiaga e utuvai mai ai ma aoao mai ai. Ua tele naua mea e fai atu ai e uiga i lenei fesili, ma ou te fiafia i le fesili. Ae mo a’u, o le tautala ma le alofa, ma o lona uiga e mafai ona fesoasoani sootaga i tagata e faatuatuaina ai ma aoao faatasi ma valaaulia faatasi le Agaga Paia i le aafiaga.
Peresitene Oaks: O lau tala na fai e uiga i sootaga ua ou manatua ai se faitauga talu ai o se lauga matagofie a lo tatou Peresitene Aoao o Alii Talavou, o Steven J. Lund, i se Konafesi a Tamaitai o le BYU talu ai nei. Sa ia faamatala mai—e faasino i sootaga o se tosinaga faaosofia e mafai ona tatou i ai i olaga o i latou o sailia e matafaioi o ni tagata faataitai ma faiaoga faufautua. Fai mai a ia ua maua e o tatou tagata suesue o le atinaega faaleagaga o talavou LDS e tele ina faalagolago i le maualuga lelei o a latou sootaga, e aofia ai matua, taaga, ma faiaoga. Ma o na sootaga ma taitai e sili ona atiina ae i seminare ma vasega o Aoga Sa ma korama, lea o le a latou faaaloalogia ai ma alolofa i o latou taitai ma uso a au paia.6 O le faaiuga lena o le saunoaga. O nei mea uma, ou te faaiu atu, e taaofai i se faamaoniga uunaia o le taua o faiaoga ia alolofa ma galulue faatasi ma o latou tamaiti aoga. O le faatuatuaga e atia’e i lenei auala o le a avea o se tosinaga faafaiaoga faufautua o le a faamalolosia ai i latou e tali fesili faafitauli mo i latou lava.
Brother Webb: Faafetai lava. Ioe, ou te manatu e totonugalemu moni lena mea i mea o loo tatou taumafai ia ausia: o le fausia o sootaga. Ma mai mea faatoa e faasoa mai, e mafai ona tatou faia ni mea i le seminare e fesoasoani ia i latou e faamalolosia ai isi sootaga. Na e ta’ua le polokalama atia’e a le autalavou. E mafai ona tatou faasino atu i latou i o latou taitai o autalavou, i o latou epikopo, i o latou taitai o Tamaitai Talavou. E mafai ona tatou fesoasoani e faamalolosia a latou sootaga ma o latou matua i le ala tatou te tautatala ai e uiga i o latou aiga ma faaliliu atu i latou i o latou matua. Ou te manatu o na mea uma e taua tele—e le na o le fausiaina o a tatou sootaga ma i latou ae o le faamalolosia o a latou sootaga ma tagata o le a taitai atu ai i latou i le itu sa’o. Faafetai mo le ta’ua o lena mea. Faatasi ai la ma lena mea, ou te le iloa pe mafai ona tatou talanoa teisi e uiga i le ala tatou te aoao atu ai nei mea taua i se ala e le faatiga ai pe fulitua ai le tupulaga talavou mai le talalelei. O le mea moni, pe a mafai ona ou faasoa atu se faataitaiga vave e faavaa ai le fesili lea e i lo’u mafaufau. Le vaiaso na te’a nei, sa i ai se faiaoga sa valaau mai fai mai sa sau se matua e faaui ese lona afafine mai le seminare ona sa ia aoaoina ni nai mataupu faavae e uiga i le aiga ma le taua o le aiga. Ma sa tiga lenei matua ona o o latou sootaga patino ma lo latou aiga, ma sa lei manao e aoao lana tama i le matafaioi tupito o le aiga—e oo lava i le matalalaga o le ata o le faaolataga. Sa matuai faanoanoa lenei faiaoga i le mamulu atu o lenei teineitiiti aoga ma sa fesili mai: “E faapefea ona ou aoao atu upumoni? E faapefea ona ou taulimaina se lalolagi tatou te le mananao e tulei ese tagata, ae e tatau ona tatou aoao atu le talalelei ma le mama a’ia’i i a tatou tamaiti aoga?
Peresitene Oaks: Manaia tele lena faataitaiga. Uso Smith, o le a sau tala i lena mataupu?
Brother Smith: Ua ou toe mafaufau foi—lea faatoa tatou talanoaina talu ai i sootaga. Ae ou te manatu o se tamaitiiti aoga e faatuatuaina se faiaoga—ma lagonaina e alofagia e lo latou faiaoga—o le a tatala o latou loto. E mafai ona oso mai papupuni i nisi taimi pe a tatou aoao atu se mea taua e le o le mea moni o ola ai se tamaitiiti aoga. O se mea foi e faaliusuavai ai papupuni pe afai e alofa se tamaititi aoga ma faatuatuaina o latou faiaoga. O lea foi la, e taua tele. Ou te fia manao e faamamafa le manatu i le fesili ua avae—ia fausia na sootaga ma tamaiti aoga.
Peresitene Oaks: Ioe. Ou te manatu foi e taua tele mo i tatou le malamalama e le o se tatou matafaioi le ioe atu i mea uma e tuu mai i o tatou luma—pe mai i se tamaitiiti aoga pe o matua o se tamaitiiti pe o isi foi o le sosaiete. Tatou te le o faipisinisi ma le faamautinoaina o talitonuga i le maketi o manatu. Ua poloaiina i tatou e aoao atu le upumoni. Ae i le faia o lena mea, e tatau ona tatou matua faaeteete ia tatou le solomuli lava mai lo tatou tiutetauave, ua tuu mai ia i tatou e le Faaola, ia alolofa i o tatou tuaoi. Po o a lava mea tatou te fai, e tatau ona i totonu o le matalalaga, o le alofa ina ia tatou le feteenai ai ma le tagata, ae tatou te tuu atu a tatou aoaoga ina ia avea o aoaoga e faafetaia’ia ai talitonuga ma mea e sese. O Polika Iaga, o se tagata e fai lava si faatautee, na ia faia se eseesega lelei lea sa ou faitau talu ai nei i aoaoga a—po o lauga a Polika Iaga. I se tasi o ana lauga, sa ia fai mai ai—ma ou te sii maia: “E le’i fetuuna’ia lava i o’u lagona agai i tagata taitasi, o alii po o tamaitai, e latou te talitonu e pei ona ou talitonu pe leai foi. Pe mafai ona outou ola faatasi ma a’u o ni tuaoi? E mafai ona ou ola ma outou; ma e le o so’u popolega patino pe e te talitonu faatasi ma au pe leai.”7 O le faaiuga lena o le saunoaga mai ia Polika Iaga. Sa ou manatu o se punavai e lei faamoemoeina lena, o le i ai o se tautinoga matilatila o le mea moni faapea e mafai ona tatou ola ma le alolofa faatasi ma i latou tatou te le ioeina faatasi.
Brother Webb: Ioe, ua fetaui lelei tele lena mo o tatou faiaoga. O se tasi o uiga faaleatua sili ona taua, pe a, o se soo o le Faaola i aso nei: o le mafai ona le ioeina ma faaauau pea ona alofa i tagata ma ia faamaoni i lena sootaga ma tagata e ui i feeseeseaiga i talitonuga.
Peresitene Oaks: O se isi vaega o lena mea o le, e manaomia ona tatou galulue faapea o lo tatou alolofa ma le taliaina—e oo lava i le faaseloa o le vaai ia i latou tatou te mafuta—e le o malamalama ai faapea o se faamaoniga. O se laina tuaoi lelei lena. Ma ua tatou vaaia i le lalolagi o polotiki ma fesootaiga lautele, mai le tele o punavai eseese, se toilalo e faailoa aloaia lena mea. E tele taimi e manatu ai isi tagata faapea ua tatou faaseloa le vaai i se mea ona ua tatou alolofa i tagata o loo aofia ai i totonu.
Brother Webb: Ua sai faatasi uma ai lava, a ea? E toe foi lava i sootaga; e toe foi i le faalogo ma le lotomalamalama. Ae e toe foi ai foi i le aoao atu o le mataupu faavae. E toe foi i le faavae o le mafuaaga tatou te talitonu ai i mea tatou te fai, e faavae i le fuafuaga o le faaolataga ma le aoaoga faavae a Keriso, ma le fusia faatasi o na mea ma savavali i lena laina matagofie sa e faamatalaina.
Peresitene Oaks: Ou te manatu foi e toe foi i le poloaiga muamua ma le sili ia alofa i le Atua, ona fetalai ai lea o le Faaola, “afai tou te alolofa mai ia te au, tausi a’u poloaiga.”8 Ona sosoo lea ma le poloaiga lona lua ia alofa atu i o tatou tuaoi. O le mea moni tatou te alolofa i o tatou tuaoi e le faapea ai tatou te le alolofa muamua i le Atua ma tausi muamua Ana poloaiga.
Brother Webb: Faafetai lava.
Brother Smith: O lea ou te mafaufau i se tulaga o se faiaoga e tautala i le upumoni i le alofa ma puipuia le aoaoga faavae a Keriso ma le lototoa—ae e alofa foi i ana tamaiti aoga, o lea e lagona le saogalemu e ana tamaiti aoga, ma e faatuatuaina ma alolofa tamaiti aoga i le faiaoga. Atonu la e i ai se tamaitiiti aoga e le ioe i se elemene o le aoaoga faavae a Keriso—po o se mataupu faavae o le talalelei atonu o se ala sili lea e faaupu ai—ae e o mai lava i le vasega. Ma o loo o mai pea i le inisitituti po o le seminare ona latou te lagona o la e saogalemu, ma latou te lagona e mafai ona latou fausia le faatuatua ia Iesu Keriso i lena siosiomaga. O lea la ou te manatu ai o le paleni lea o loo tatou talanoa ai, e taua tele ona sunu’i: ia puipuia ma le lototoa le upumoni ma alolofa ia i latou atonu e le ioeina le upumoni ina ia avea se potuaoga po o se seminare po o le inisituti o se nofoaga saogalemu mo se tamaitiiti aoga.
Peresitene Oaks: Ou te lagona foi o i latou o loo i ai i la tatou tauaofiaga, o e o aofia ai i le inisitituti ma le aoao atu o mataupu faalelotu i iunivesite ma kolisi, ua i ai se lu’itau sili atu i lenei mataupu patino. O le tele o tamaiti aoga matutua e sili ona lilifa e mafaufau mo i latou lava ma ia faafetaia’ia nai lo tamaiti i le seminare, mo se faataitaiga. Ae o mataupu faavae lava e tasi. E eseese le faaaogaaga pe a e tusa ma le faatulagaga ma le matua o le tagata, ae o mataupu faavae o mea ia sa tatou talanoaina.
Brother Webb: Faafetai lava.
Peresitene Oaks: O se fesili lenei e suia teisi le mataupu, ae e fai lava si tatau ai i o tatou taimi: E mafai faapefea ona tatou faatauanauina a tatou tamaiti aoga e faataatia ese a latou telefoni i le taimi tatou te taumafai ai e aoao i latou?
Brother Webb: O se fesili lelei tele lena ua matuai fesootai tonu ma feteenaiga i totonu o vasega po o ni eseesega i se vasega, ona o nisi taimi o le mea tonu lena e fatua’ia, e sa’o? A—Brother Smith?
Brother Smith: Ioe, ou te manatu e i ai taimi patino i le siosiomaga e aoao ai pe a manaomia e tamaiti aoga ona momotu pe tuu ese a latou telefoni. Ou te manatu o le mea sili o le a fesoasoani ai latou te faia lena mea, o le faagauai ma le faafe’ilafi o le aoao atu. O Elder Ballard—po o Peresitene Ballard,—na ia ta’u mai ia i matou i se tasi taimi ia mautinoa e fe’ilafi lo matou aoao atu. Ae ou te manatu foi e i ai taimi e mafai ai ona tatou valaaulia se tagata aoao e faaaoga a latou telefoni i se aafiaga e aoao ai. Faatasi ma punaoa o i le ChurchofJesusChrist.org ma luga o le Gospel Library app e mafai moni lava i nisi taimi ona valaaulia se tamaitiiti aoga e gauai i le aafiaga e aoao ai e ala i le faaaogaina o anotusi e fausia ai le faatuatua i luga o a latou telefoni. Ou te manatu foi e mafai ona i ai se faamanuiaga i lena mea—se aafiaga lelei mo i latou i fafo atu o le vasega—e mafai ona latou vaai ai i lenei masini o se mea e sili atu nai lo le na o se mea taalo po o se masini o fesootaiga faaagafesootai—pe mo nisi, o se punavai o faaosoosoga. Ma e mafai ona latou aoao e i ai taimi e mafai ai e lena lava masini ona fausia le faatuatua ia Iesu Keriso Ou te manatu o le a ou faaaogaina musumusuga i le vaega o se faiaoga—ma le paleni. Ae ou te manatu foi o le a fesoasoani mai le Aii ia i tatou e sue avanoa e fausia ai le faatuatua e ala i le faaaogaina o le masini ona malamalama manino ai foi lea i taimi pe a manaomia ona tapē ma tuu ese.
Peresitene Oaks: O a lua fautuaga ia aua nei o tatou le fiafia i telefoni, ua faamanatu mai ai ia te au se aafiaga ua mavae—ou te toe foi i tua i le 10–15 tausaga—ina ua ou asiasi i se vasega o le Aoga Sa o le vaitausaga Seminare a alii ma tamaitai talavou. Ma sa ou alu ma se uiga le fiafia i telefoni feaveai. Ae a o ou tilotilo solo i le vasega pe tusa ma le sefulu ma ona tupu tamaiti aoga, sa ou iloa ai sa na o le tasi le fusi tusitusiga paia i le potuaoga atoa. Sa faitau tagata uma mai tusitusiga paia ma mulimuli i le lesona i telefoni feaveai. O iina na amata ai ona ou vaai o le fesili e le o se fesili e faasa ai ae o se fesili e faapaleni ai.
Brother Webb: Lelei tele, faafetai. Peresitene, ua matou fiafia tele tatou te mafuta, faafetai lava mo au fautuga i le aso, ma pe mafai ona tatou faaaogaina sina minute, Uso Smith, pe e te manao e muamua faasoa atu po o le a lava le faaupuga o se molimau e te manao ai, ona ou fiafia lea e faia lena mea, ona tuu atu ai lea po o le a lava le taimi ia te oe.
Uso Webb: Faafetai lava. A o ou mafaufau i lo tatou avanoa paia e aoao atu ai le autalavou ma le autalavou matutua o le Ekalesia, ma i latou o i faalapotopotoga a le CES, ou te manatu ai i se aoaoga a lo tatou perofeta pele, o Peresitene Russell M. Nelson. Na ia saunoa: “O le toatele o agaga sili ona tamaallii a le [Atua] —atonu … o Lana ‘au aupito silisili … na auina mai i le Lalolagi i lenei taimi patino. O outou o e aupito silisili ua auina mai e le Alii i lenei lalolagi.”9 Ma ou te fia manao e faasoa atu lo’u talitonuga maumaututu e faapea o tupulaga talavou ua ia i tatou, ua i ai le avanoa e fegalegaleai faatasi, o i latou tonu lava ia o loo aoao mai e perofeta a le Atua i tatou, o i latou na. Se avanoa ina a paia ua tatou maua e molimau atu ai ia te i latou i le moni o Iesu Keriso ma Lana Togiola ma Lona Toetu. Ma ou te molimau atu i le aso i le moni o le Togiola ma le Toetu o Iesu Keriso, o Lana Ekalesia lenei, o loo taitaia i tatou e Ana perofeta soifua, tagatavaai, ma talifaaaliga, ma ua tatou punouai i Lana galuega a o tatou aoao atu le autalavou i aso e gata ai. Ma ou te tuuina atu ai lena molimau ia te outou i le suafa o Iesu Keriso, amene.
Brother Webb: Amene. Na ona ou fia faaopoopo atu foi la’u molimau i le moni o lo tatou Tama Faalelagi alofa ma ia Iesu Keriso o le Faaola ma le Togiola o le lalolagi—o Lana Ekalesia lenei ma le malo i le Lalolagi. Ou te faafetai foi i le faaaluina o aso taitasi o lo’u ola e molimau atu ai ia te Ia ma aoao isi i Lana talalelei. Ou te faafetai mo i latou o e sa faiaoga ia te au ma ua faamanuiaina ai au i lo latou faatuatua ma molimau i le Faaola, ma ou te faafetai tele i le avea ai o se vaega o lenei galuega faatasi ma outou i le aoao atu o le talalelei toefuataiina a Iesu Keriso. Ma tau ina ou vave faapea atu, a ou mafaufau i le alofa o lo tatou Tama i le Lagi, e tele ina tatou talanoa i le tele o le alofa o le Tama Faalelagi i o tatou tamaiti aoga. Ae tau ina ou faaopoopo atu ou te iloa e alofa lo tatou Tama o i le Lagi ia te outou, e matua faafetai o Ia ona o lo outou mananao e faaalu o outou soifua e faiaoga ai i Ana fanau, ma e alofa o Ia i o outou aiga, ma a faaauau pea ona outou gaulue ma le faamaoni i le aoaoina o Ana fanau, o le a Ia faamanuia ia te outou ma o outou aiga ao outou faamanuiaina Ana fanau e ala ia outou aoaoga ma molimau ma faataitaiga. O le mea lea faafetai i e ua avea ai outou, ma mea o outou faia, i le suafa o Iesu Keriso, amene.
Peresitene Oaks: Amene. Ou te faaopoopo atu lau molimau i molimau na tuuina atu e nei auauna ofoofogia a le Alii. Ou te molimau atu i le Tama ma le Alo, e ala i le mana o le Agaga Paia, o Lana galuega lenei, ma o outou o Ana auauna, uso a faiaoga o le talalelei a Iesu Keriso. Ma ou te talosagaina faamanuiaga o le lagi i o outou luga a o outou auauna atu i le Alii ma a o outou fetuleni atu i luma ma o outou aiga i le taunuuga na mua’i tusia e le Atua mo Ana fanau agavaa, le ola e faavavau. Ou te molimau atu ai i le suafa o Iesu Keriso, amene.
Tagata uma: Amene.