Ko Hono Akoʻi ʻo e Lēsoni Fakalotú ki he Toʻu Tupú mo e Kakai Lalahi Kei Talavoú - Pēnolo Fealeaʻaki
Fealeaʻaki Konga II – Palesiteni Oaks, Chad Webb, Adam Smith
Palesiteni Dallin H. Oaks: Brother Webb, ʻoku fakafiefia ke tau kau fakataha mo koe. Brother Sāmita. Tau hoko atu.
Brother Chad Webb: Mālō. Mau fiefia he kau mo koe he ʻahó ni. Fakamālō atu he pōpoaki fakaʻofoʻofa ko iá. Moʻoní, ʻoku hanga heʻemau fanongo ki hoʻo akonakí ʻo faʻu ha ngaahi fehuʻi ʻe lelei ke tau talanoaʻi. Tau kamata ʻaki ʻeni, ʻi hoʻo lave ki he ʻofa ʻi he kau akó, ʻoku kau ʻi hono ʻofaʻi e kau akó ʻa hono akoʻi e ongoongoleleí mo tokoniʻi kinautolu ke nau maʻu e mahino ki he ngaahi meʻa ko ia ʻoku mahuʻinga tahá. Te tau fakapapauʻi fēfe ʻoku tau fakamuʻomuʻa ʻa e ngaahi meʻa ko ia ʻoku mahuʻinga taha ki heʻetau kau akó, ʻi he ngaahi meʻa kehekehe kotoa te tau lava ʻo akoʻí?
Palesiteni Oaks: Ko e meʻa ʻoku makehe ai ʻetau Potungāue Akó, ko hotau fatongia fakafolofola ke fekumi ki he ʻiló, ʻo ʻikai ngata pē ʻi he akó, ka ʻi he tuí foki.
Brother Adam Smith: ʻI heʻeku fakakaukau ki he ʻū meʻa mahuʻinga taha ko ia te tau lava ʻo akoʻi ki heʻetau kau akó, ʻoku fakahinohinoʻi au ʻe ha ako meia Palesiteni ʻAealingi, ʻoku ou loto ke vahevahe atu. Naʻe pehē ʻe Palesiteni ʻAealingi, “ʻI he ngaahi moʻoni kotoa ʻe lava ke fakamamafaʻi ʻi he ngaahi folofola kuo vaheʻí, ʻa ia te ne tokoniʻi ʻeku kau akó ke nau ofi ange ai ki he Tamai Hēvaní mo e Fakamoʻuí pea iku ai ki he fakamoʻuí?” Naʻá ne hoko atu pē, “ʻI hoʻo teuteu ko ia ha lēsoní, kumi ai ʻa e ngaahi tefitoʻi moʻoni fakauluí. … Ko e tefitoʻi moʻoni fakauluí ʻa ē ʻoku fakaiku ki he talangofua ki he finangalo ʻo e ʻOtuá.”1 Ko e meʻa ʻoku ou maʻu mei he ako mahuʻinga ʻa Palesiteni Aealingí, ʻe fakafehokotaki ʻa ʻetau kau akó ki he Tamai Hēvaní mo Sīsū Kalaisi, ʻe he ʻū meʻa ʻoku mahuʻinga tahá ʻi ha founga fakataautaha mo maʻongoʻonga. ʻOku fie maʻu ke tau akoʻi e ʻū meʻa ʻe tokoniʻi ai e tokotaha akó ke ne ongoʻi mo mahino ki ai ʻa e ngaahi moʻoni ʻo e ongoongoleleí, kae tautautefito ki he ngaahi moʻoni fekauʻaki mo e moʻoni ʻo Sīsū Kalaisí mo ʻEne Fakaleleí mo e Toetuʻu—pea tokoniʻi kinautolu ke nau ongoʻi, ʻoku maʻu ʻe Sīsū Kalasi ʻa e mālohi ke fakamoʻui mo tokoniʻi pea fakafiemālieʻi mo fakamaʻa kinautolu ʻi ha ngaahi founga mahino. ʻOku ou tui ko e ʻū meʻa mahuʻinga ʻaupito ia ke tau tokanga taha ki aí.
Palesiteni Dallin H. Oaks: Mālohi mo moʻoni.
Brother Webb: Mālō ʻaupito. Pea ʻoku fehokotaki lelei ia ki he fakakaukau ʻo e fakapapauʻi ʻoku nau ako ʻi he tuí—ke nau ngāue ʻi he tui pea maʻu leva e fakamoʻoni ko ia mei he Laumālie Maʻoniʻoní, ko e ngaahi meʻa ʻoku nau ako mo moʻui ʻakí ʻoku haʻu moʻoni mei heʻetau Tamai Hēvaní. Ko ia ai, fakamālō atu. Palesiteni, naʻá ke lave foki ki he fatongia ʻo e Laumālie Māʻoniʻoní ʻi heʻetau faiakó. Ko ia ʻoku ou loto ke fehuʻi atu ko e hā ha ngaahi moʻoni kehe fekauʻaki mo e Laumālie Maʻoniʻoní mo ʻEne tākiekina mo e fatongia ‘i heʻetau ʻū lokiakó, te ke fie vahevahe mo kimautolu.
Palesiteni Oaks: ʻOku ou fakakaukau ko e kī ki he ngaahi ueʻi ʻo e Laumālie Māʻoniʻoní, ko hono maʻu ʻo e sākalamēnití. Koeʻuhí ʻoku ʻi ai ha talaʻofa ʻi he ngaahi fuakava ʻoku tau fakahoko ʻi he taimi ʻoku tau maʻu ai ʻa e sākalamēnití, ʻe “iate [kitautolu] maʻu ai pē ʻa hono Laumālié.” Ko e meʻa tefitó ia.
Brother Webb: ʻOkú ke ʻilo, ʻoku ou saiʻia hoʻo lea ʻaki iá. ʻOkú ne fakamanatu kiate au ʻeku hoko ko ha faiako kei talavoú, naʻá ku ako ʻi ha ngaahi māhina ʻa e ngaahi tefitoʻi moʻoni ʻoku fakamalumalu ai ʻa e fakaafeʻi ʻo e Laumālie Māʻoniʻoní. Pea ʻoku ou fakakaukau ko ha faingamālie lelei ia ʻoku tau maʻu kotoa ke hoko atu hono ako iá. Ka ko e meʻa mahuʻinga taha naʻá ku ʻiloʻí ʻa ia ko e meʻa naʻá ke toki lea ʻakí: ‘oku tala ‘e he lotu ‘o e sākalamenití kapau te tau manatuʻi maʻu pē Ia, te tau maʻu Hono Laumālié ke ʻiate kitautolu. Pea ʻoku ʻikai ke ʻi he sākalamenití pē pe ʻi he Sāpaté, kae maʻu pē—ʻo kau ai ʻetau ʻū lokiakó. Kapau te tau tokanga taha ki he Fakamoʻuí—ʻi heʻetau manatuʻi Ia ko e sīpinga ʻo e moʻui ʻaki e ongoongoleleí pea maʻu ivi mei Hono mālohí mo ʻEne akonakí— ʻoku tau fakaafeʻi e Laumālie Maʻoniʻoní ke ʻi he aʻusia fakaakó ʻi he taimi ʻoku tau manatua ai Iá. ‘Oku ou fakakaukau ko e fatongia e Laumālie Maʻoniʻoní ko e fakamoʻoni ki heʻetau Tamai Hēvani ʻofá mo Sīsū Kalaisi, ko e uho ia ʻo e palani ʻa e Tamai Hēvaní. Ko ia kapau ʻoku tau fakaʻamu ke fakaafeʻi e Laumālie Maʻoniʻoní ki hotau ngaahi lokiakó, ʻoku tau tokanga taha he ʻū meʻa ko ia te Ne fakamoʻoni ki aí. ʻOku ou saiʻia ai. Mālō ʻaupito.
Palesiteni Oaks: Pea naʻe fakamamafaʻi ʻe Palesiteni Nalesoni ʻa e mahuʻinga ko iá he ngaahi leá ni. Naʻá ne pehē “ʻI he ngaahi ʻaho ka hokó, he ʻikai lava ke tau moʻui fakalaumālie taʻekau ai ʻa e tataki, fakahinohino, fakafiemālie, mo e ivi tākiekina pau ʻo e Laumālie Māʻoniʻoní.”2
Misa Webb: Mālō ʻaupito. ʻOku ou houngaʻia ʻaupito ʻi he meʻa kuo vahevahé, ʻokú ne tataki au ke fai e fehuʻí ni: Kuo tau lave siʻi fekauʻaki mo e meʻa ʻoku fakamuʻomuʻa ʻe he kau faiakó ʻi ha founga te ne fakaafeʻi mai ai ʻa e Laumālie Māʻoniʻoní. ʻE fēfē ʻetau tokoniʻi ʻetau kau akó ke fakamuʻomuʻa e meʻa mahuʻinga tahá heʻenau moʻuí?
Palesiteni Oaks: ʻI heʻeku fakakaukau ki ai he ʻaho ní, ʻi he lahi e ngaahi tākiekina fakamāmani ʻokú ne ʻākilotoa kitautolu mo ʻetau kau akó, ʻoku ou tui ʻoku fie maʻu ke tau manatuʻi ko e ngaahi meʻa ʻo e māmaní—ʻa e ngaahi meʻa ʻoku fakamahuʻingaʻi ʻe he māmaní, tatau ai pē pe ko e hā—ʻoku fakataimi pē. ʻI he hili ha ngaahi taimi, ʻoku fakaʻau ke siʻi ange honau mahuʻingá ʻi he ngaahi tefitoʻi moʻoni ʻoku fie maʻu ki hono ako ʻo e taumuʻa ʻo e moʻuí ni mo hotau ikuʻanga ʻi he taʻengatá. Ko e hā haʻo tānaki ki ai, Brother Sāmita?
Brother Smith: Palesiteni Oaks, lolotonga hoʻo akoʻi iá, naʻá ku manatuʻi ha veesi folofola ʻi he taimi naʻe ʻalu ai ʻa e Fakamoʻuí ki Ketisemani ke fai ha lotu tāumaʻú, naʻá Ne pehē, “Pea ko ʻeni ʻa e moʻui taʻengatá, ko ʻenau ʻilo koe ko e ʻOtua moʻoni pē tahá, mo Sīsū Kalaisi, ʻa ia naʻá ke fekaú.”3 ʻOku ou pehē kapau te tau tokoniʻi e kau akó ke maʻu e mahino ʻoku fie maʻu ke nau fakapapauʻi, ko e feituʻu ʻe fakamoleki honau taimí mo tuku ʻenau tokangá ki aí, ʻe tokoniʻi nai kinautolu ai ke ʻilo mo ʻofa he Tamai Hēvaní mo Sīsū Kalaisi? Fakakaukau ʻe taha ʻoku ou fakakau atu ki aí, ko e meʻa naʻá ke akoʻi mai ʻi ha konifelenisi lahi kimuí ni, Palesiteni ʻOakesi, ke fai e fehuʻi, “ Ko e fē ʻe taki ʻeni ki aí?” Pea ke fakakaukau ki he puipuituʻa ʻo e fehuʻí ʻi he “ʻE tataki nai ʻeni au ke u toe ofi ange ki he Tamai Hēvaní mo Sīsū Kalaisi? ʻE tataki nai ʻeni au ke fakahoko hoku tuʻunga fakalangí pe taumuʻá?” Pea ʻoku ou fakakaukau ʻokú ne ʻomai ha meʻasivi mālohi kiate kitautolu. Pea te tau lava ʻo tokoniʻi ʻetau kau akó foki ke mahino ʻa e meʻasiví ni ʻi heʻenau ngaahi fili pe ko fē te nau fakamoleki honau taimí ki aí, mo e hā te nau fanongo mo sio ki aí. Kuo pau ke nau fai ʻenau ngaahi filí. Ka ʻo kapau te tau lava ʻo tokoniʻi kinautolu ke fehuʻi, “ʻE iku nai ʻeni ki fē, mo e ʻe tataki nai au ke ofi ange ki he Tamai Hēvaní mo Sīsū Kalaisi?”
Palesiteni Oaks: Hono ʻikai mahuʻinga mo ʻaonga kapau ʻe mahino ki heʻetau kau akó kotoa ʻa e tefitoʻi moʻoni ko iá.
Brother Webb Pea ki he kau faiakó ke fakamamafaʻi ia pea fakamoʻoniʻi e ʻū meʻa ko iá ke fakaafeʻi e Laumālie Maʻoniʻoní ke fakapapauʻi e mahuʻingá—ʻo ʻikai ko hono moʻoní pē, ka ko e mahuʻinga e ʻū tefitoʻi moʻoni ko iá ʻi heʻenau moʻuí. Tuku ke u tānaki, kapau ʻe lava, ʻa e foʻi fakakaukau ʻo e fenāpasi leleí. ʻOku ou fakakaukau ko e meʻa kotoa te tau lava ʻo faí ko e tokoni ki hono fakaafeʻi e kau akó ke ʻiloʻi e fenāpasi lelei e ngaahi tefitoʻi moʻoni ko iá ʻi heʻenau moʻuí. Taimi ʻe niʻihi ʻoku tau talanoa ki he ngaahi meʻá ni ʻi he taimi ʻoku nau feʻauʻauhi ai ke maʻu hotau taimí pe tokangá. Pea taimi e niʻihi ʻoku fie maʻu ke tau fakamuʻomuʻa ʻa e ʻū meʻa ʻoku mahuʻinga tahá. Ka ʻoku ou fakakaukau te tau lava foki ʻo tokoni ke nau ʻiloʻi e fatongia ʻo e ongoongoleleí ʻi heʻenau moʻui fakaʻahó. Hangē ko ʻení, ʻi heʻeku kei akó naʻá ku ʻilo kapau te u tauhi e Sāpaté ke molumalu, pea kapau te u ako e ngaahi folofolá kimuʻa ʻi heʻeku akó, ʻoku ou hoko ko ha tokotaha ako lelei ange ʻi haʻaku feinga ke fakamavahevaheʻi ʻa e ngaahi meʻa ko iá mo pehē, “Te u tuku ha taimi ki he meʻa fakalaumālié, pea mo ha taimi ki he meʻa fakamāmaní.” Ka ʻi he tafaʻaki kehekehe ʻeku moʻuí, ʻi he taimi ʻoku ou fakakau ai e Tamai Hēvaní—fakaafeʻi hono Laumālié ke tokoniʻi au—ʻo aʻu pe ki he ʻū meʻa ngali fakataimi pē ki heʻetau kau akó, ʻoku nau sio ki he fenāpasi lelei ʻo e ongoongoleleí ʻi he ngaahi meʻa ʻoku nau feinga ke lavaʻi ʻi heʻenau moʻuí. ʻE ʻikai te nau feʻauʻauhi ki honau taimí, ka te nau fakatahataha mai.
Palesiteni Oaks: ʻOku tau manatuʻi naʻe akoʻi mai ʻe he ʻEikí kuo teʻeki ke Ne ʻomai ha ngaahi fekau fakataimi. ʻOku fakalaumālie ʻa ʻEne ngaahi fekaú mo e tatakí.
Brother Smith: Naʻe haʻu ha fakakaukau ʻe taha kiate au lolotonga hoʻo lave ki aí—ki heʻetau kau ako seminelí—ko e polokalama Fānau mo e Toʻu Tupu ʻa e Siasí. Ko ha founga mālohi ia ke ngaohi e ongoongoleleí ke ʻaonga mo fokotuʻu ha ngaahi taumuʻa ke fakaʻaongaʻi e ongoongoleleí ke ne tokoniʻi kitautolu ʻi ha faʻahinga tafaʻaki pē ʻo ʻetau moʻuí ke tau feinga ai ke hangē ange ko e Fakamoʻuí.
Palesiteni Oaks: Fakaʻofoʻofa ʻaupito. ʻOku ou fiefia ke ʻeke ha fehuʻi ki ha ongo tangata faiako lēsoni fakalotu taukei moʻoni: Ko e hā kuó mo ako mo hoʻomo kaungā faiakó ki hono akoʻi ʻo e ongoongolelei ʻo Sīsū Kalaisí lolotonga e mahaki fakaʻauha fakamāmani lahi kuo tau aʻusiá?
Brother Smith: ʻUluakí, te u pehē ʻi he meʻa kotoa kuo tau akó—kuo fakamanatu mai pea fakaʻilongaʻi—ʻa e kau faiako maʻongoʻonga ʻoku tau maʻú, ʻoku nau ʻofa moʻoni ki he ʻOtuá mo e kau akó, pea ʻoku mahulu atu ʻenau ngāué, pea ʻoku tau houngaʻia moʻoni ai. ʻOku ou tui foki kuo fakamamafa ʻe he mahaki fakaʻauhá e ngāue fakaetauhí ʻa ia ʻoku mahuʻinga ʻi hono akoʻi ʻo e ongoongoleleí. ʻOku ou pehē ʻoku tau fakaʻau ke lelei ange ʻi he fanongo ki he kau akó, ʻi he feinga ke ʻiloʻi ʻenau ngaahi fiemaʻú, ivi malavá, mo e feʻiloaki mo kinautolu, ofaʻi ʻi ha tuʻunga pē mo kumi e ngaahi founga lelei ke tokoniʻi ai kinautolu ke nau ofi ange ki he Tamai Hēvaní mo Sīsū Kalaisi. ʻOku ou tui foki ʻi he lahi e ngaahi faingataʻá ʻi he mahaki fakaʻauhá, kuo tau mātā e tokoni fakalahi ki he kau faiako ʻoku nau feinga moʻoni ke ʻofa ʻi he ʻOtuá mo ʻenau kau akó mo fakahoko honau lelei tahá.
Brother Webb: ʻOku ou ou pehē ko ha fakamatala lelei ia. ʻOku ou fakaʻamu ke u fakamālō mo tānaki atu ʻeku houngaʻiá. ʻOku mou ʻilo, ʻoku tau maʻu ha kau faiako ʻoku feinga ke akoʻi tonu ʻi lokiako mo ako ke faiako ʻi he ʻinitanetí. Kuo nau tui ha ngaahi meʻa maluʻi fofonga ʻoku ʻikai fakafiemālie he ngaahi taimi. ʻOku nau tuʻu laveangofua he ngaahi taimi mo fakahoko ia ʻi he ʻofa lahi ki heʻenau kau akó mo e Tamai Hēvaní ʻi he moʻui līʻoa moʻoni. ʻOku ou loto ke u fakamālō atu kiate kimoutolu ʻi he ngaahi feilaulau kotoa mo e ngaahi feinga ke ngāue lolotonga ha taimi matuʻaki faingataʻa.
Palesiteni Oaks: ʻOku ou kau fakataha ʻi hono fakafofongaʻi ʻa e Kau Palesitenisī ʻUluakí ʻi hono fakamālōʻia ʻa e meʻa kuó ke toki vahevahé. ʻOku mau ʻofa atu kiate kimoutolu ʻoku faiako ʻi heʻetau ngaahi semineli mo e inisititiuti fakalotú ʻi he ngaahi ʻunivēsití mo e kolisí.
Brother Webb: Mālō ʻaupito; ʻoku ongo moʻoni ia. ʻOku ai e fehuʻi ʻoku ou vēkeveke ke fai atu koeʻuhi ko ha ngaahi meʻa naʻá ke akoʻi ʻi ha ngaahi feituʻu kehe: Ko e hā ʻoku mahuʻinga ai ke tau akoʻi e ngaahi tefitoʻi moʻoní kae ʻikai ko e laó?
Palesiteni Oaks: ʻOku ou fiefia ʻokú ke fehuʻi mai ia. Ko ha fehuʻi ʻoku ou saiʻia ai. ʻI ha kōlomu ʻiloa ʻi he Church News, naʻe lea ai ʻa Teti R. Kālisitā, ko ʻetau palesiteni lahi mālōlō ʻo e Lautohi Faka-Sāpaté, fekauʻaki mo e kaveingá ni: “ʻUluakí, ʻoku faʻa fakangatangata ʻa e ngaahi lao ʻuluakí ki ha tūkunga pē ʻe taha pe niʻihi, ka ʻoku maʻu ʻe he ngaahi tefitoʻi moʻoní ha ngaahi founga ngāue ʻaki lahi. Uá, ʻoku faʻu ʻe he ngaahi tefitoʻi moʻoní ha ʻātakai ʻokú ne fakalahi ʻa e tauʻatāina ke filí, ka ʻoku faʻa fakasiʻisiʻi ʻe he ngaahi laó ʻa e tauʻatāina ke filí ʻaki hono fakangatangata, [pea] taimi ʻe niʻihi ʻoku aʻu pē ʻo tuʻutuʻuni pau mai ʻetau ngaahi filí.” ʻOku ou tānaki atu naʻe fetongi ʻe he Fakamoʻuí ʻa e Fono ʻa Mōsesé, ʻa ia naʻe makatuʻunga ia ʻi ha lao, ʻaki ʻa e fono māʻolunga ange ʻo Kalaisí, ʻa ia naʻe makatuʻunga ia ʻi he tefitoʻi moʻoní. Naʻe toe fakamahinoʻi e Brother Kālisitā e tefitoʻi moʻoní ʻo peheni. Naʻá ne pehē: “ʻOku fengāueʻaki fakataha ʻa e ngaahi tefitoʻi moʻoní mo e fono māʻolunga angé, kae fengāueʻaki e ngaahi laó mo e fono maʻulalo angé. ʻOku totonu ke tau tokanga maʻu pē ki hono akoʻi ʻo e ngaahi tefitoʻi moʻoni fakatokāteliné. Ko e hā e ʻuhingá? Koeʻuhí he ʻoku maʻu ʻe he ngaahi tefitoʻi moʻoní ʻa e ivi lahi ke hikiʻi hake kitautolu ki ha ngaahi tuʻunga fakasilesitiale, pea ʻi hono fakaʻosí—ʻoku ʻikai ko e ngaahi fonó—te ne puleʻi ʻa e puleʻanga silesitialé.”4 Ko e ngata ia e fakaleá.
Brother Webb: ʻOku ou houngaʻia foki ai. ʻOku ʻi ai mo ha toe lelei foki ki ai. ʻI ha feohi mo ha kau faiako kimuí ni mai naʻa nau talamai ʻoku hangē ʻoku lahi ange ʻi honau ngaahi lokiakó—ko e lea ne nau ngāue ʻakí ko e “fakafekiki” ʻi he ʻeke ʻe he kau akó ha fehuʻi lahi mo kehekehe ʻenau vakaí mo e fakakaukau ki ha ngaahi meʻa. ʻOku ou saiʻia he meʻa kuó ke akoʻi maí koeʻuhí ʻokú ne fakamanatu mai ʻa e fepōtalanoaʻaki ko iá mo tokoniʻi au ke u ʻiloʻi ko e taha ʻo e ngaahi founga naʻá ke ngāue ʻakí naʻe ʻikai ko hono akoʻi e founga ngāué, ʻa ia ʻoku nau fakakikihiʻi ʻa hono founga ngāue ʻaki ʻi honau tūkungá, ʻo hangē ko hono akoʻi ʻo e tefitoʻi moʻoni ʻo e ongoongoleleí. Tau ʻalu pē ki he tefitó—akoʻi e palani ʻo e fakamoʻuí, akoʻi e tokāteline ʻa Kalaisí, akoʻi e ngaahi tefitoʻi moʻoni ʻo e ongoongoleleí, mo fakaʻatā ke maʻu e founga ngāue ʻaki fakataautahá ʻi he tokoni mai ʻa e Laumālie Māʻoniʻoní.
Palesiteni Oaks: Fakamatala lelei ia.
Brother Webb: ʻOku ou fakakaukau ko e fakamatala feʻunga mo ʻaonga ia fekauʻaki mo e meʻa ʻoku tau feinga ke faí, Palesiteni. Mālō ʻaupito. Brother Sāmita, te ke fie tānaki ki ai?
Brother Smith: Kuó u fakakaukau ʻoku tatau mo e meʻa naʻá ke fakamahinó, Brother Webb. ʻI heʻetau akoʻi foki ʻa e tefitoʻi moʻoní kae ʻikai ko hono fakaʻaongaʻí, ʻoku tau fakaafeʻi ai ha tokotaha ako ke ngāue hangē ha fakafofongá ʻi he founga akó, ʻi heʻenau founga tupulakí—ʻa ia ʻoku nau ʻave leva ʻa e tefitoʻi moʻoní ʻo lava ke fekumi ki ha fakahā fakataautaha, ʻoku nau lava ʻo ako lahi ange fekauʻaki mo kinautolu pea fakapapauʻi ʻa e founga lelei taha ke nau fakahoko ʻi heʻenau fakaʻaongaʻi ʻa e tefitoʻi moʻoni ko iá ki he tūkunga fakataautahá.
Brother Webb: Mālō ʻaupito. Ko ha fehuʻi vakaiʻi anga maheni ʻe peheni ia. “ʻI he ngaahi tākiekina kotoa pē—ngaahi longoaʻa ʻi he māmaní—te tau tokoniʻi fēfē ʻetau kau akó ke nau fehangahangai mo e ngaahi ivi tākiekina ʻi he sōsaietí?”
Palesiteni Oaks ʻOku fie maʻu ke mahino kiate kitautolu ko e tēvoló ko e tamai ia ʻo e ngaahi loí—ʻoku talamai ʻe he folofolá, “ko ha tokotaha loi talu mei he kamataʻangá”.5 Ko ʻene founga loi olopoto tahá ko hono tuifio fakataha mo e moʻoní. ʻA ia, ko hono tohoakiʻi mo uesia e fekumi ʻa e kakai leleí ʻaki hono tuifio e moʻoní mo e loí. Ko hono ola fakataha mo e ngaahi meʻa lelei taha te tau feinga ke ako ʻi he moʻui fakamatelié, ko e akonaki ʻa e Laumālie Māʻoniʻoní ʻa ia ʻokú ne fakaʻatā kitautolu ke tau tokanga ki he meʻa ʻoku moʻoni—mo ʻikai—moʻoní.
Brother Smith: ʻI he founga tatau ʻi he tuifio ʻa e moʻoní mo e loí, ʻoku toʻo ai ʻe he filí ʻa e moʻoní mei hono ʻuhinga taʻengata ʻi heʻene tuʻu ʻi he palani ʻo e ʻOtuá. ʻOkú ne fakalahi ai e malava ke ngāue hala ʻaki pe fakaʻuhinga keheʻi e moʻoní. Hangē ko ʻení, he miniti siʻi kuo ʻosí, Palesiteni ʻOakesi, naʻá ke akoʻi lelei kimautolu ki he tefitoʻi moʻoni ʻo e ʻofá, mo hono tuʻunga he palani ʻa e ʻOtuá—ʻa e mahuʻinga e ʻofa ki he ʻOtuá mo hotau kaungāʻapí—ʻa ia ko e ʻofa ko iá ko e ivi fakalotolahi ia ʻoku makatuʻunga ai e finangalo ʻa e Tamai Hēvaní ke teuteuʻi kitautolu ki he moʻui taʻengatá, ʻa ia ʻoku tau ʻilo ko e meʻaʻofa maʻongoʻonga taha ia ʻa e ʻOtuá. Pea ko ʻetau ʻofa he ʻOtuá ʻokú ne fakaivia kitautolu ke ʻofa ʻikai siokita mo tauhi ki he niʻihi kehé. ʻI he taimi ʻoku lava lelei ai e filí ʻo toʻo ʻa e tefitoʻi moʻoni ʻo e ʻofá mei hono tūkungá, ʻoku faingofua leva ke fulihi ia ke kehe. Pea ʻe lava pē ha tokotaha ʻi he ʻikai mahino e ʻofá, ʻo muimui ʻi ha taʻumuʻa hala. ʻE lava foki ke nau tuʻu ko e fakafepaki ki he fono ʻa e ʻOtuá mo ʻEne kau palōfitá, koeʻuhí ko e fakamavaheʻi e moʻoní mei he ʻuhinga taʻengatá ʻe lava ke iku ki ha mahino loi pe moʻoni kuo toʻo mei he tūkunga tonú. Pea ʻoku fai ʻeni ʻe he filí he ngaahi tefitoʻi moʻoni lahi.
Palesiteni Oaks: ʻOku tau fakamoʻoniʻi ha ngaahi fakamoʻoni pehē ʻi hotau ʻātakaí, ʻikai ko ia? Brother Webb, ʻi hoʻo hoko ko e faiakó, ko e hā hoʻo founga lelei taha ke tali ai e ngaahi fehuʻi ʻoku lolotonga fakakaukau ki ai hoʻo kau akó hangē ko e ngaahi kaveinga faingataʻa ʻi he hisitōlia ʻo e Siasí, ngaahi palopalema LGBT, mo ha ngaahi fehuʻi fekauʻaki mo e founga pule ʻa e puleʻangá kau ki he mahaki fakaʻauha fakamāmani lahí, mo e alā meʻa pehē? ʻOku ʻikai hano ngataʻanga ʻo e ngaahi fehuʻí. ʻOkú ke fakafeangai fēfē nai ki he ngaahi fehuʻi ko iá ʻi he taimi ʻokú ke akoʻi ai ʻi he lokiako fakalotú?
Brother Webb Ko ha fehuʻi lelei ʻaupito ia pea mo ha meʻa ʻoku fetaulaki maʻu pē mo e kau faiakó. Te u kamata ʻaki ʻeku pehē ʻoku ou saiʻia ʻi hono fakahinohino mai ʻe he ʻAposetolo ko Paulá ke tau akoʻi pe lea moʻoni ʻi he ʻofa. Ko ia ai, ʻoku fie maʻu ke tau akoʻi ʻa e ongoongoleleí. ʻOku fie maʻu ke tau akoʻi ʻa e folofolá mo e ngaahi akonaki ʻo e kau palōfita ʻi he kuonga ní. ʻOku fie maʻu ke tau akoʻi ʻe moʻoní. ʻOku ʻikai ha tokoni ki ha taha ke akoʻi e ngaahi meʻa ʻoku ʻikai ke moʻoní; ʻe ʻikai tataki ia ki he fiefiá. Ka ko hono konga ʻe tahá—ʻoku ou pehē ʻoku matuʻaki mahuʻingá: ko e taimi naʻá Ne pehē ai ke fakahoko ia ʻi he ʻofa, ʻo hangē ko ia naʻá ke lave ki ai he pooní. ʻOku ou tui ʻe mahuʻinga ke kamata ʻaki e ngaahi vā fetuʻutakí. Kuo lahi ha fekumi kuo fai ʻokú ne fakahā mahino mai ai, ʻoku makatuʻunga ʻi he ngaahi vā fetuʻutakí ʻa e ako e kau akó. Pea kiate aú, ʻoku kamata e ngaahi vā fetuʻutaki ko iá ʻe ha kau faiako ʻoku nau loto-fiemālie ke fakafanongo—ke matuʻaki mahino kiate ia ʻa e kau akó mo honau ngaahi tūkungá peá ne maʻu e ongo ke feinga ke mahino kiate ia ʻenau ngaahi fiemaʻú. ʻOku ou fakakaukau ʻoku mahuʻinga foki ke tau fakatokangaʻi ʻoku maʻu ʻe he tokotaha kotoa pē ha meʻa ke vahevahe, ʻoku tau mahuʻingaʻia—pea ʻoku tau fie maʻu ʻetau takitaha aʻusiá ke tau ngāue ʻaki mo ako mei ai. Ko ia ʻoku lahi e meʻa fekauʻaki mo e fehuʻí ni, pea ʻoku ou saiʻia he fehuʻí. Ka kiate au, ko e lea ʻaki e moʻoní ʻi he ʻofá, pea ʻoku kau ki ai e ngaahi vā fetuʻutaki ʻoku tokoni ki he kakaí ke fakafalala pea ako fakataha mo fakaafeʻi fakataha ʻa e Laumālie Māʻoniʻoní ki he aʻusiá.
Palesiteni Oaks: ʻOku fakamanatu mai kiate au ʻe he meʻa naʻá ke lea ʻaki kau ki he vā fetuʻutakí, ʻeku lau ha lea fakaʻofoʻofa naʻe fai ʻe heʻetau Palesiteni Lahi ʻo e Kau Talavoú, Sitīveni J. Lani, ʻi ha Konifelenisi ʻa e Kakai Fefine BYU kimuí ni. Naʻá ne fakamatala—ko e ngaahi vā fetuʻutakí ko ha tākiekina fakalotolahi te tau lava ke ʻi he moʻui ʻa kinautolu oku feinga ki ha kau tā sīpinga mo tokoni-ofí. Naʻá ne pehē kuo ʻiloʻi heʻetau kau fakatotoló, ko e fakalakalaka fakalaumālie e toʻu tupu Siasí ʻoku fakafalala lahi ki he tuʻunga lelei ʻa honau vā fetuʻutakí, kau ai e ngaahi mātuʻá, kaungāmeʻá, mo e kau faiakó. Pea ko e ngaahi vā fetuʻutaki mo e kau taki ko iá, ʻoku lahi taha ʻenau fakalakalaká ʻi he seminelí, Lautohi Faka–Sāpaté mo e ngaahi kalasi fakakōlomú ʻa ia te nau fakaʻapaʻapaʻi ai mo ʻofa ʻi heʻenau kau takí mo e niʻihi kehe ʻi he Siasí.6 Ko e ngataʻanga ia e kupuʻi leá. ʻI heʻeku fakamāʻopoʻopo e ngaahi meʻá ni kotoa, ki ha fakaongoongolelei ʻo e mahuʻinga ke ʻofa mo ngāue fakataha ʻa e kau faiakó mo ʻenau kau akó. ʻE hoko e falala ʻe maʻu ʻi he foungá ni ko ha ivi tākiekina ia te ne fakamālohia kinautolu ke nau tali e ngaahi fehuʻi faingataʻa kiate kinautolú.
Brother Webb: Mālō ʻaupito. ʻIo, ʻoku ou tui ko e uho ia ki he meʻa ʻoku tau feinga ke fakahokó: ko hono fokotuʻu ha vā fetuʻutakí. Pea mei he meʻa naʻá ke toki vahevahe maí, te tau lava ʻo fai ha ngaahi meʻa ʻi he seminelí ke tokoni ke nau fakamālohia ha ngaahi vā fetuʻutaki kehe. Naʻá ke lave ki he polokalama fakalakalaka ʻa e toʻu tupú. Te tau lava ʻo tataki kinautolu ki heʻenau kau taki toʻu tupú, kau pīsopé, kau taki he Finemuí. Te tau lava ʻo tokoni ke fakamālohia honau vā fetuʻutaki mo ʻenau ngaahi mātuʻá ʻaki e founga ʻo ʻetau talanoa fekauʻaki mo e ngaahi fāmilí mo fakatafoki kinautolu ki heʻenau mātuʻá. ʻOku ou fakakaukau ki he meʻa kotoa ʻoku mahuʻingá—ʻo ʻikai ngata pē ʻi hono fakatupulaki ha vā fetuʻutaki mo kinautolú, ka ke fakamālohia ʻenau ngaahi vā fetuʻutaki mo e kakai te nau tataki kinautolu ʻi he hala totonú. Ko ia ai, mālō ʻaupito. ʻOku ou fifili pe te tau lava ʻo talanoa kau ki he founga ʻoku tau akoʻi ai e ngaahi meʻa tefito ko ʻení ʻi ha founga ʻe ʻikai ke ne fakaloto-mamahiʻi pe fakasītuʻaʻi ai e toʻu tupú mei he ongoongoleleí. Ko hono moʻoní, kapau ʻe lava ke u vahevahe ha kiʻi sīpinga ke ne fakamahino e fehuʻi ʻi hoku ʻatamaí. ʻI he uike kuo ʻosí, naʻe tā mai ha faiako ʻo ne fakahā mai ʻa e haʻu ha faʻē ke tukuange hono ʻofefiné mei he seminelí koeʻuhi naʻá ne akoʻi ha ngaahi tefitoʻi moʻoni fekauʻaki mo e fāmilí pea mo e mahuʻinga ʻo e fāmilí. Pea naʻe ʻongoʻi lavea e mātuʻá koeʻuhi ko e tuʻunga ʻoku nau ʻi aí pea naʻe ʻikai ke loto honau fāmilí ke akoʻi ki he tokotaha akó ʻa e fatongia tefito ʻo e fāmilí—naʻa mo ʻene mahuʻinga ki he palani ʻo e fakamoʻuí. Naʻe fuʻu loto mamahi e faiakó ke tukuange e tokotaha ako ko ʻení peá ne fehuʻi ange: “ʻE founga fēfē ʻeku akoʻi e moʻoní? ‘E founga fēfē ʻeku fehangahangai mo e meʻá ni ʻi ha māmani ʻoku ʻikai ke tau loto ke fakasītuʻaʻi e kakaí, ka kuo pau ke tau akoʻi e ongoongoleleí kakato ki heʻetau kau akó?”
Palesiteni Oaks: Ko ha sīpinga fakaʻofoʻofa ia. Brother Sāmita ko e hā haʻo vahevahe fekauʻaki mo e kaveingá?
Brother Smith Ne u toe fakakaukau ki ai—ʻoku ou ʻilo ne tau toki talanoá ni fekauʻaki mo e ngaahi vā fetuʻutakí. Ka ʻoku ou fakakaukau ʻe fakaava e loto ʻo ha tokotaha ako ʻoku falala ki ha faiako—pea ʻongoʻi hono ʻofaʻi ia ʻe heʻene faiakó. Taimi ʻe niʻihi ʻe ʻikai fie fanongo e tokotaha akó kapau te tau akoʻi ha fakakaukau ʻoku ʻikai hoko tonu ia he moʻui ʻo e tokotaha akó. Pea ko e meʻa te ne veteki e taʻefie fanongo ʻa e tokotaha akó kapau ʻokú ne ʻofa mo falala ki heʻene kau faiakó. Ko ia ai, ʻoku matuʻaki mahuʻinga moʻoni. ‘Oku ou loto ke fakafekefekaʻi e fakalea ki he fehuʻi ki muʻá—ke fakatupulaki e ngaahi vā fetuʻutaki ko ia mo e kau faiakó.
Palesiteni Oaks: Fakaʻofoʻofa ʻaupito. Pea ʻoku ou fakakaukau ʻoku fuʻu mahuʻinga kiate kitautolu ke ʻiloʻi ʻoku ʻikai fie maʻu ia ke tau loto ki he meʻa kotoa ʻe ʻomi kiate kitautolú—tatau pē mei ha tokotaha ako pe mei ha mātuʻa ʻo ha tokotaha ako pe mei ha niʻihi ʻi he sōsaietí. ʻOku ʻikai ko ha tau fatongia ke tali ʻa e ngaahi tui kotoa pē mei he ngaahi fakakaukau kehe kotoa pē ʻoku fokotuʻu mai. ʻOku fakafatongiaʻaki kitautolu ʻa hono akoʻi ʻo e moʻoní. Ka ʻi heʻetau fakahoko iá, kuo pau ke tau fuʻu tokanga ʻaupito ke ʻoua ʻaupito naʻa tau holomui mei hotau fatongiá ne tuku mai kiate kitautolu ʻe hotau Fakamoʻuí, ke ʻofa ʻi hotau kaungāʻapí. Ko e hā pē ha meʻa ʻoku tau fai, kuo pau ke tau fai ia ʻi he ʻofa koeʻuhí ke ʻoua naʻa tau fakakikihi ai mo ha taha, ka ʻoku tau ʻoatu ʻetau ngaahi akonakí koeʻuhí ko e ngaahi akonaki ia ʻokú ne fakatonutonu ʻa e ngaahi tui ʻoku fehalaakí. Naʻe fai e Pilikihani ʻIongi, ko ha tokotaha lea taʻeufi moʻoni, ha fakamahino ne u toki lau kimuí ni ʻi he ngaahi ako—pe ko e ngaahi akonaki ʻa Pilikihami ʻIongí. ʻI heʻene ako ʻe taha, naʻá ne pehē ai: “ Kuo teʻeki liliu hoku loto ki he kakai fakafoʻituituí, tatau pē ʻa tangata mo fafine, pe ʻoku nau tui ki heʻeku meʻa ʻoku faí pe ʻikai. Te mou lava nai ʻo hoko ko haʻaku ngaahi kaungāʻapi? Te u lava ʻe au; pea ʻoku ʻikai ko ha fuʻu meʻa ia ke u hohaʻa ki ai pe ʻokú ta tui tatau pe ʻikai.”7 Ko e ʻosi ia e kupuʻi lea ʻa Pilikihami ʻIongí. Ne u fakakaukau ko ha maʻuʻanga tokoni taʻeʻamanekina ke maʻu ha tala mahino e foʻi moʻoni te tau lava ʻo nofo he ʻofá mo kinautolu ʻoku ʻikai te tau loto tataú.
Brother Webb: ʻIo, ʻoku taimi lelei ia ki heʻetau kau faiakó he taimí ni. ʻOku ou ʻilo ko e ʻulungaanga mahuʻinga taha ia ʻo ha ākonga ʻo e Fakamoʻuí he ʻahó ni: ke kei hokohoko atu pē ʻa e ʻofá mo e feohi moʻoni ʻi he vā fetuʻutaki mo e kakaí neongo e ʻikai tatau he tuí.
Palesiteni Oaks: Ko e konga ʻe taha ko e fiemaʻu ke tau ngāue koeʻuhí ke ʻoua naʻa maʻu hala ʻoku tau tali lelei ʻi he taimi ʻoku tau ʻofa mo tali ai—naʻa mo hono poupouʻi ʻa kinautolu ʻoku tau feohi mo iá. ʻOku matuʻaki faingataʻa moʻoni ke fakahoko ia. Pea ʻoku tau ʻiloʻi ʻi he malaʻe ʻo e politikí mo e fetuʻutaki fakapuleʻangá, mei ha ngaahi maʻuʻanga tokoni kehekehe, ʻa e tōnounou ke tali iá. ʻOku faʻa lahi e fakakaukau ʻa e kakaí ʻoku tau tali ha meʻa koeʻuhí pē ʻoku tau ʻofa ki he kakai ʻoku nau kau he meʻa ko iá.
Brother Webb: ʻOku fekauʻaki fakataha e ʻū meʻá ni, ʻikai ko ia? ʻOku foki pē ki he ngaahi vā fetuʻutakí; ki he fakafanongó mo e ongoʻi ʻofá. Ka ʻoku toe foki pē ki hono akoʻi ʻo e tefitoʻi moʻoní. ʻOku tākiekina ia ki he ʻuhinga ʻoku tau tui ai ki he meʻa ʻoku tau fakahokó, ʻo makatuʻunga ʻi he palani ʻo e fakamoʻuí mo e tokāteline ʻo Kalaisí, mo hono fakafehoanaki fakataha e ngaahi meʻa ko iá pea fakahoko e meʻa faingataʻa kuó ke fakamatalaʻí.
Palesiteni Oaks: Pea ʻoku ou tui ʻoku fekauʻaki ia mo e fekau ʻuluaki mo lahi taha ke ʻofa ki he ʻOtuá, pea ʻi he folofola ʻa e Fakamoʻuí, “kapau ʻokú ke ʻofa ʻiate au, tauhi ʻeku ngaahi fekaú.”8 Pea ko e fekau hono uá leva ke ʻofa ki hotau kaungāʻapí. ʻOku ʻikai ʻuhinga ʻetau ʻofa hotau kaungāʻapí ke ʻoua te tau ʻuluaki ʻofa ki he ʻOtuá mo tauhi ʻEne ngaahi fekaú.
Brother Webb: Mālō ʻaupito.
Brother Smith: ʻOku ou fakakaukau ki ha tūkunga ʻo ha faiako ʻokú ne leaʻaki e moʻoní ʻi he ʻofa mo taukaveʻi loto-toʻa ʻa e tokāteline ʻo Kalaisí—ka ʻoku ʻofa foki ʻi heʻene kau akó, koeʻuhi ke lava ʻo ʻongoʻi malu ʻene kau akó, pea nau falala mo ʻofa ʻi he faiakó. Mahalo pē ʻoku ʻi ai ha tokotaha ako ʻoku ʻikai ke ne tali ha konga ʻo e tokāteline ʻa Kalaisí—pe mahalo ʻoku lelei ange hano fakalea ko ha tefitoʻi moʻoni ʻo e ongoongoleleí—ka ʻoku nau kei haʻu pē ki he kalasí. Pea ʻoku nau kei haʻu pē ki he ʻinisititiutí pe seminelí koeʻuhi ʻoku nau ongoʻi malu, pea ʻoku nau ongoʻi te nau lava ʻo langaki ʻenau tui kia Sīsū Kalaisí ʻi he ʻātakai ko iá. ʻOku ou tui ko e ngaahi meʻa ʻoku tau talanoa ki aí ʻoku mahuʻinga ke fakahoko: ke maluʻi loto-toʻa e moʻoní mo ofaʻi ʻakinautolu ʻoku ʻikai loto tatau mo e moʻoní koeʻuhí ke hoko ʻa e lokiakó pe ko e seminelí pe ʻinisititiutí ko ha feituʻu malu maʻá e tokotaha akó.
Palesiteni Oaks: ʻOku ou ongoʻi ko kinautolu ʻi he fakatahá ni ʻoku nau kau ʻi ha ʻinisititiuti mo akoʻi e lēsoni fakalotu ʻi he ʻunivēsití mo e kolisí, ʻoku nau maʻu ha pole lahi ange ʻi he kaveinga ko ʻení. Hangē ko ʻení, ʻoku tokolahi e kau ako matuʻotuʻa ʻi he kalasí ʻoku lahi ange ke nau fakakaukau maʻanautolu pea mo lea taʻeufi, ʻi he kau ako ʻi he seminelí. Ka ʻoku tatau pē ʻa e ngaahi tefitoʻi moʻoní. Ko hono fakahokó ʻoku kiʻi kehe ʻo fakatatau mo e feituʻu mo e matuʻotuʻa ʻo e fakafoʻituituí, ka ko e ngaahi tefitoʻi moʻoní ʻeni ʻoku tau talanoaʻí.
Brother Webb: Mālō ʻaupito.
Palesiteni Oaks: Ko ha fehuʻi ʻeni ʻokú ne afeʻi siʻisiʻi e kaveingá, ka ʻoku fuʻu ʻaonga ia ʻi hotau kuongá ni: ʻE founga fēfē ʻa ʻetau fakalotoʻi e kau akó ke tuku ki he tafaʻakí ʻenau telefoni toʻotoʻó lolotonga e taimi ʻoku akoʻi ai kinautolú?
Brother Webb: Ko ha fehuʻi lelei ia ʻoku kaunga moʻoni ki he lea taʻeufi ʻi he kalasí pe fakakikihi ʻi he kalasí, koeʻuhi ko e meʻa ia ʻokú ne fakatupu he taimi ʻe niʻihi, ko ia? Ko ia—Brother Sāmita?
Brother Smith: ʻIo, ʻoku ou fakakaukau ʻoku ʻi ai e taimi totonu ʻi he ʻātakai ʻo e akó ʻoku fie maʻu ke tamateʻi mo faʻo ʻe he kau akó ʻenau ngaahi telefoní. ʻOku ou tui ko e meʻa lelei taha te ne tokoniʻi kinautolú, ko e faiako ʻi ha founga ke fakakau mai kinautolu mo fakamānako. Naʻe talamai ki muʻa atu ʻe ʻEletā Pālati—pe Palesiteni Pālati—ke fakapapauʻi ʻoku fakamānako ʻemau faiakó. Ka ʻoku ou fakakaukau ʻoku ʻi ai ha ngaahi taimi te tau lava ʻo fakaafeʻi ai ha tokotaha ako ke ngāue ʻaki ʻene telefoni toʻotoʻó ʻi he aʻusia fakaakó. Te tau lava ʻo fakaafeʻi ha tokotaha ako ke kau atu ʻi he aʻusia fakaakó ʻaki hono ngāue ʻaki ha ngaahi maʻuʻanga tokoni ʻokú ne fakatupulaki e tuí mei he ChurchofJesusChrist.org ʻi heʻenau telefoní. Pea ʻoku ou tui ʻe lava pē ke hoko ia ko ha tāpuaki—pe ko ha tākiekina lelei maʻanautolu ʻi tuʻa he kalasí—koeʻuhi ke nau kamata vakai ki he telefoni toʻotoʻó ko ha meʻa ʻoku mahulu hake ʻi ha device pē ki he vaʻingá pe ko e mītia fakasōsialé—pe ko ha fakatupu ʻahiʻahi ki ha niʻihi. Pea ke nau ʻilo, ʻe lava ke ngāue ʻaki ʻa e meʻangāue tatau pē ko iá ki hono langaki ʻo e tui kia Sīsū Kalaisí ʻi ha taimi. ʻOku ou tui ʻe fiemaʻu ha tataki fakalaumālie ʻi he tafaʻaki ʻo e faiakó—mo e napangapangamālié. Ka ʻoku ou pehē ʻe tokoniʻi kitautolu ʻe he ʻEikí ke maʻu ha ngaahi faingamālie ke langaki e tuí ʻo fakafou ʻi hono fakaʻaongaʻi e meʻangāué ni pea mo ʻiloʻi e taimi e fie maʻu ke tamateʻi ai ʻo faʻó.
Palesiteni Oaks ʻOku fakamanatu mai ʻe hoʻo fokotuʻu ke ʻoua naʻa taʻofi fakaʻaufuli e telefoni toʻotoʻó, ha aʻusia kimuʻa atu—ʻi he taʻu e 10 pe 15 ʻapē—ʻi he taimi ne u ʻaʻahi ai ki ha kalasi Lautohi Faka-Sāpate ʻo ha toʻu tupu taʻu Semineli. Naʻá ku hū atu mo e tuʻunga fakakaukau ʻoku ʻikai ke u tali e telefoni toʻotoʻó. Ka ʻi heʻeku vakai ki ha fānau ako ʻe toko taha ua nai he kalasí, ne u fakatokangaʻi ko e tohi folofola pē ʻe taha ʻi he loki akó. Naʻe lau e tokotaha kotoa e folofolá mo muimui he lēsoní mei he ʻū telefoni toʻotoʻó. Ko e taimi ia ne u kamata ʻiloʻi ai ko e fehuʻí ʻoku ʻikai ko hono taʻofi ʻaupito ʻo e telefoni toʻotoʻó, ka ko hono fakapalanisi hono ngāue ʻakí.
Brother Webb: ʻOku moʻoni hoʻo laú, mālō. Palesiteni, ʻoku mau fiefia he kau mo koé, fakamālō atu ʻi hoʻo akonaki he ʻaho ní, pea ʻoku mau kole, fēfē kapau te tau taki taha ha miniti Brother Sāmita, kapau te ke kamata koe, ke vahevahe ha faʻahinga fakamoʻoni pē ʻokú ke loto ke fai, pea te u fiefia ke u fai pehē, pea tuku atu leva e toenga ʻo e taimí kiate koe.
Brother Smith: Mālō ʻaupito. ʻI heʻeku fakakaukau ki hotau faingamālie toputapu ke akoʻi e toʻu tupú mo e kakai lalahi kei talavou he Siasí, mo kinautolu ʻi heʻetau ngaahi ʻapiako ʻo e Siasí, ʻoku ou fakakaukau ki ha akonaki mei hotau palōfita ʻofeiná, Palesiteni Lāsolo M. Nalesoni. Naʻá ne pehē: “Ko e tokolahi ʻo e ngaahi laumālie fakaʻeiʻeiki taha ʻa e ʻOtuá—mahalo … ko ʻEne timi lelei tahá … ne tuku mai ki māmani he taimi pē ko ʻení. … ʻOku [nau] kau he lelei taha kuo tuku mai ʻe he ʻEikí ki he māmaní.”9 Pea ʻoku ou fie vahevahe pē ʻeku tui moʻoni ko e toʻu tupu ʻoku tau maʻu e faingamālie ke tau fengāueʻaki mo iá ko kinautolu totonu pe ia ʻoku akoʻi mai ʻe he kau palōfita ʻa e ʻOtuá ʻo kau ki aí. Ko ha faingamālie toputapu ke fakamoʻoni kiate kinautolu ki he moʻoni ʻo Sīsū Kalaisi, ʻEne Fakaleleí mo ʻEne toetuʻú. Pea ʻoku ou fakamoʻoni he ʻahó ni ki he moʻoni ʻo e Fakalelei mo e Toetuʻu ʻa Sīsū Kalaisí; ko Hono Siasí ʻeni; ʻoku tataki kitautolu ʻe Heʻene kau palōfita moʻuí, kau tangata kikite, mo e kau maʻu fakahā; pea ʻoku tau kau mo Ia ʻi heʻetau akoʻi e toʻu tupú he ngaahi ʻaho kimui ní. Ko ʻeku fakamoʻoní ia kiate kimoutolu ʻi he huafa ʻo Sīsū Kalaisí, ʻēmeni.
Brother Chad Webb: ʻĒmeni. ʻOku ou fie tānaki atu ʻeku fakamoʻoní mo e moʻoni ʻo ʻetau Tamai Hēvani ʻofá mo Sīsū Kalaisi ko hotau Fakamoʻuí mo e Huhuʻi ʻo e māmaní—ko Hono Siasí ʻeni mo Hono puleʻanga he Māmaní. Pea ʻoku ou houngaʻia ke fakamoleki e ʻaho kotoa ʻeku moʻuí ke fakamoʻoni kiate Ia mo akoʻi ʻEne ongoongolelei ki he niʻihi kehé. ʻOku ou houngaʻia ʻiate kinautolu ne nau akoʻi mo tāpuakiʻi au ʻi heʻenau tuí mo e fakamoʻoni ki he Fakamoʻuí, pea ʻoku ou houngaʻia lahi ke ngāue mo kimoutolu ʻi hono akoʻi e ongoongolelei ʻo Sīsū Kalaisi kuo fakafoki maí. Pea ʻi heʻeku fakakaukau ki he ʻofa ʻa ʻetau Tamai ʻi Hēvaní, ʻoku tau faʻa talanoa kau ki he ʻofa lahi ʻa e Tamai Hēvaní ʻi heʻetau kau akó. Ka ʻoku ou tānaki atu, ʻoku ou ʻiloʻi ʻoku ʻofa ʻa e Tamai ʻi Hēvaní ʻiate kimoutolu, pea ʻokú Ne houngaʻia ʻoku mou loto ke akoʻi ʻEne fānaú, pea ʻokú Ne ʻofa ʻi homou ngaahi fāmilí, pea ʻi hoʻomou hokohoko atu ʻi he tauhi faivelenga kiate ia ʻi hono akoʻi ʻEne fānaú, te ne tāpuekina kimoutolu mo hoʻomou fāmilí ʻi hoʻomou tāpuekina ʻEne fānaú ʻaki hoʻomou ngaahi akonakí mo fakamoʻoní mo e ngaahi tā sīpingá. Ko ia fakamālō atu kiate kimoutolu mo e ngāue ʻoku mou faí, ʻi he huafa ʻo Sīsū Kalaisí, ʻēmeni.
Palesiteni Oaks: ʻĒmeni. ʻOku ou fie tānaki atu ʻeku fakamoʻoní ki he fakamoʻoni e kau tamaioʻeiki leleí ni ʻa e ʻEikí. ʻOku ou fakamoʻoni ki he Tamaí mo e ʻAló, ʻi he mālohi ʻo e Laumālie Maʻoniʻoní, ko ʻEne ngāué ʻeni, pea ko ʻEne kau tamaioʻeiki kimoutolu, ko e kaungā faiako ʻo e ongoongolelei ʻo Sīsū Kalaisí. ʻOku ou lotua ʻa e ngaahi tāpuaki ʻo hēvaní kiate kimoutolu ʻi hoʻomou faifatongia maʻá e ʻEikí, mo hoʻomou laka ki muʻa mo homou fāmilí ki he ikuʻanga kuó Ne teuteu maʻa ʻEne fānau moʻui tāú: ʻa e moʻui taʻengatá. ʻOku ou fai ia ʻi he huafa ʻo Sīsū Kalaisí, ʻēmeni.
Kātoa: ʻĒmeni.