Siganisucu sa ka ni Loloma

Peresitedi Thomas S. Monson

iVakatakilakila

Kemuni taciqu kei na ganequ, ko ni sa rairai totoka dina. Sa ka talei vei au meu mai tekivutaka vata kei kemuni na draki ni Siganisucu ena gauna ni Lotu ni Siganisucu ni Mataveiliutaki Taumada. Au vakaraitaka vei kemuni na noqu lomani kemuni, ko ni tiko eke se ko ni vakarorogo tiko mai na so tale na gaunisala.

Na draki ni Siganisucu kei na kena ibalebale e dau kauta mai na turu ni wainimata, vakauqeta na vakavoui ni dina vua na Kalou, ka solia na—ni tauri mai na ka e tukuna na sere totoka na “Kalivari”—“vakacegu vua sa bikai kei na sautu ni yalo.”

Ia, dau rawarawa na noda rawai ena draki eda donumaka ka na yali sara ga kina na yalo ka dodonu meda sasagataka meda na rawata. Eda dau saga me da cakava tu vakasivia e so na ka. Na vuna ni da daulakova e levu na soqo ni Siganisucu, levu na kakana e laukana, levu na ilavo e vakayagataki, levu na ka e namaki, ka levu na tubunidra. Dau vaka o ya na draki ni Siganisucu ni dau vakatubura na dra, vakavuna na ceguoca, kei na dadaga ni yago, ni oqo na gauna meda marautaka kina na nona mai sucu na iVakabula.

Na sotavi ni yalovakacegu ni Siganisucu ena sega ni yaco mai ena vakatotolo ka vakariri me levu na ka mena caka, se na kena voli na iloloma. Ena sotavi na vakacegu ni da sa vakanamata kina vu ni nona mai sucu na iVakabula. E rawa ni da vakananumi Koya tikoga ena noda vakasama ni da lako voli ena kena qaravi na cakacaka ena gadreva o Koya me da qarava e vuravura. Ena gauna sara ga oqo, vakabibi, meda sa vakamuria na Nona ivakaraitaki ena noda lomani ira ka qaravi ira na wekada.

E dua na iwase ni tamata era gadreva tiko na kena vakavotukanataki na loloma, sai ira na sa qasecake, vakabibi ni ra sa tu duadua voli ga ka ra dau galili sara vakalevu. Na tatadra ni draki batabata ni vakanuinui kei na kena sa seyavu yani ena nodra bula na sa qase cake ni ra sa volekata tiko yani na icavacava ni nodra bula.

E a kaya o Elder Richard L. Evans ena vica na yabaki sa oti: “ Na ka era gadreva ena galili ni nodra sa qase sara mai, sa ikoya na, ka eda a gadreva ena veilecayaki ni noda yabaki ni gauna ni gone: na kena gadrevi meda taleitaki, kei na noda na lomani ka tuberi ena yalololoma—sega walega ni o ya na itavi, se me na qaravi walega ena dua na rumu ni dua na vale, ia ena dua na rumu ni yalona e dua, ena nona bula. …

Sa na sega ni rawa meda na kauta lesu mai na auwa ni veimataka ni gauna ni gone. Ia ena rawa ni da vukei ira mera na bulataka na totoka ni kena sa kala na matanisiga ena noda na vakalomavinakataki ira, ena noda yalosolisoli, kei na noda loloma sega ni vakaiyalayala.”¹

Kemuni na taciqu kei na ganequ, na loloma dina sa ikoya na bulataki ni nona loloma na iVakabula. Eda vakatoka ena Tiseba ni veiyabaki me yalo ni Siganisucu. Ko na rawa ni rogoca. Ko na rawa ni raica. Ko na rawa ni vakila.

Au se qai vakananuma tikoga oqo e dua na ka mai na gauna ni noqu gone—e dua na ka au a sa wasea oti ena dua se rua na gauna. Au a yabaki 11 voli. Na neitou peresitedi ni Lalai, o Melissa, e dua na marana ulu sika ka sa qase sara ka dau loloma. Ena dua na siga ni sa oti na kalasi e qai kerei au o Melisa meu tiko tale mada ka veitalanoa kei koya. Keirau taurua sara ga ena valenilotu. E a tarai au e tabaqu ka tekivu tagi. Ena noqu kurabui, au qai tarogi koya se cava e tagicaka.

Qai kaya cake mai, “Au sega ni rawa ni cakava e dua na ka me rau dau rokova kina na veitacini na Trail Builder na itekitekivu ni Lalai. Tommy, ena rawa beka ni ko vukei au?”

Au yalataka vei Melissa niu na kitaka vakakina .Au a kurabui sara, ia e sega ni vakakina vei Melissa, ni sa mai cava sara ga e kea na leqa oqori mai na Lalai. E a sa lako sara ga o koya kina ivurevure ni leqa—o au. Na iwali sa ikoya na loloma.

Sa vuqa sara na veiyabaki sa sivi. Na marama taleitaki o Melissa sa yabaki 90 vakacaca, nikua sa curu tiko ena dua na vale ni veiqaravi vaka-nasi ena vua-i-ra kei Salt Lake. Au nanuma meu laki sikovi noqu peresitedi ni Lalai ni bera na Siganisucu. Au rogoca ni lagati tiko ena retio na sere “Agilosi era sere, sucu tu na Tui Sau!”² Au sa qai vakasamataka na nodratou laki veisiko na tamata vuku ena vica vata na yabaki sa oti. Eratou a kauta na iloloma koula, veika boi vinaka kei na drega me vakamai. E a noqu ikaukau walega na loloma kei na noqu gagadre meu laki vakavinavinaka vua.

Au a sotavi Melissa ena valenikana. E a vakaraica toka na kena veleti kakana ka tokia toka ena icula ni kana ka taura toka na ligana ka sa rairai qase sara. Sega sara ga ni kania e dua na ka. Niu vosa yani vua, e sega sara ga ni kauwai mai kina ni sa wadra balavu tu ga. Au taura na icula ka tekivu vakani koya, ka vananuma lesu tiko vua na nona a dau veiqaravi tu ena isoqosoqo ni Lalai. Sega sara ga ni dua na ivakaraitaki ni kasami e laurai vua sa sega sara mada ga na vosa. Erau raici au mai ena lomatarotaro e rua tale na marama e rau curu tu e kea. Dua vei rau qai kaya mai, “Kua ni vosa vua. Sa sega ni qai kila tale o koya e dua—o ratou sara mada ga na nona matavuvale. Tekivu mai na gauna e curu mai kina eke, sa sega ni bau tukuna rawa tale e dua na vosa.”

Ni cava na ivakasigalevu, sa vakaotivi talega kina na veiwasei, kau tucake meu sa lesu. Au taura na ligana ka raici koya yani ena totoka ni kena irairai ni sa qase sara, ka kaya yani, ‘Me vakalougatataki iko na Kalou, Melissa. Me nomu na marau ni Siganisucu.” Sega sara ga ni namaki ni sa kaya cake mai, “Au kilai iko. O iko o Tommy Monson, na noqu gone mai na Lalai. Au sa lomani iko dina.” E a reguca na ligaqu ena yalo ni loloma, drodro vakayauyau na wai ni matana ka turuma sara na ligai keirau ruarua ni keirau lululu tu. Na liga o ya ena siga o ya sa vakalougataki mai na liga ni Kalou. Era a lagasere dina na agilosi. Vakilai ena gauna oqori na ibalebale dina ni nona vosa na iVakavuvuli ena nona a kaya, “Yalewa, raica na luvemu!” Ka kaya lesu vua na Nona tisaipeli, “Raica na tinamu!”³

E a voqa lesu mai Peceliema na vosa:

Sa vakanomodi, sa vakanomodi
Na noda iyau talei!
Sa mai wasea na Kalou
Na nona kalougata.
Sa sega ni kilai;
Na nona lesu mai,
Yalo malumu ra sotava
Na Karisito.4

Kaya o Peresitedi David O. McKay: “Na marau dina ena yaco ni da vakamarautaki ira na tani. … Na [yalo ni] Siganisucu … ena serauna na yaloda meda veilomani vaka na veitacini ka na uqeti keda meda caka vinaka vei ira na tani.O ya na yalo ni kosipeli i Jisu Karisito.”⁵

Sega tale ni dua na gauna vinaka cake me vaka nikua, ena Siganisucu oqo, meda sa vakacokotaki keda kece sara ena ivakavuvuli e vakatavuvulitaka o Jisu Karisito. Sa gauna ni lomani ni Turaga, na noda Kalou, ena yaloda taucoko, kei ira na kai noda me vakataki keda. Sa dodonu mada dau nanuma tiko ni o koya e solia na ilavo e solia vakalevu, o koya e solia na gauna e solia vakalevu cake, ia, o koya e solia na nona bula e solia taucoko.

Meda cakava me sa ka dina na Siganisucu. Me kua ni ka e tatalivaliva se vakareveni, vakavo kevaka meda sa cakava vaka o ya vakai keda. Na Siganisucu na gauna ni noda solia ka sega ni namaka me saumi lesu mai. Sa ka ni yalomarau baleta ni da raica na nodra marau na tani. Sa gauna ni noda guilecavi keda ka vakaliuci ira na tani. Sa gauna ni kau laivi na ka e sega ni vakaibalebale ka namaka na veika e vakaibalebale. Sa gauna ni vakacegu baleta ni da sa sotava na vakacegu mai na ivakavuvuli ni iVakabula. Sa gauna ni kena kidavi ni levu ga ni wasei yani ni loloma, na kena levu noda sotava na kena na bulataki baleti ira na tani.

Sa tiko na Siganisucu ena lotu kei na vuvale,
Sa tiko na Siganisucu ena sitoa;
Ia, o na sega ni kila na cava na Siganisucu
Vakavo ga ke sa tiko e yalomu.

Taqiri na lali e dela ni uca vulavula,
Era marau na veika bula,
Oilei, ena calati sara ga na kena marautaki
Vakavo ga ni sa Siganisucu e kea6.

Ni sa solegi keda na draki ni Siganisucu ena kena lagilagi taucoko, meda sasaga, me vakataki ira na tamata vuku, meda vaqara e dua na kalokalo serau me kauti keda yani kina dua na gauna ni kena na bulataki na draki ni Siganisucu vei ira na kai noda. Meda sa sasaga yani ki Peceliema vata kei na yalo ni veiqaravi me noda iloloma vua na iVakabula. Meda sa vakasinaiti yadua ena yalo ni Siganisucu. Ena yacatabu ka veivakalougatataki nei Jisu Karisito, emeni