Na Dauciqociqo Vinaka ka Dauvakavinavinaka

Peresitedi Dieter F. Uchtdorf

iKarua ni Daunivakasala ena Mataveiliutaki Taumada

iVakatakilakila

Sa dua na gauna vakasakiti ni yabaki! Niu rogoca na ivakatagi rogo vinaka, raica na cina, ka vakila na batabata ni cagi, e lesu na noqu vakasama ki na veika e vuqa sa dau yaco ki na noqu bula ni dau vakalomavinakataki na yaloqu ka laveti au cake na yalo ni Siganisucu.

Me vaka e vuqa vei kemuni, au sa raica ni so na balolo ni vakanananu taleitaki ka makare vinaka ni Siganisucu e baleta na noqu gauna ni gone. E dina niu a tubu cake ena ituvaki ni bula dravudravua, erau dau vinakata na noqu itubutubu me gauna ni reki ka taleitaki na Siganisucu vei ira na luvedrau. Erau dau sasaga vagumatua me gauna taleitaki ena neitou matavuvale na Siganisucu.

Keitou dau caka ka ni iloloma na gone me keitou veisolitaka vakataki keitou. Ena dua na yabaki, au nanuma niu a droinitaka e dua na iyaloyalo me noqu iloloma ni Siganisucu vei ganequ. E sega soti ni maqosa sara, ia e vaka ga ni dua na iyautalei na nona vakamareqeta. Sa dua na ka na noqu taleitaki koya vakalevu ena vuku ni ka oqori! Ena dua tale na yabaki a solia veiau o tuakaqu, ka qase vei au ena 12 na yabaki, e dua na iloloma taleitaki. A kunea e dua na kau ena rara ni gade voleka i neitou vale qai ceuta mai kina e dua na isele ni vakatatalo lailai. E rawarawa walega, sega ni ukutaki, ia isa, sa dua na ka na levu ni noqu vakamareqeta na iloloma oya baleta ni solia mai o koya!

E sega beka ni dua na reki levu ena Siganisucu na matadra nanamaki na gonelalai ni ra taura e ligadra e dua na ioloolo iloloma me nodra ga?

Ni da sa qase cake, sa vaka e malumu sobu na yalonanamaki kei na vakanuinui ni ciqo iloloma. Ena so na gauna sa dau basika na madua vei keda ka sega ni rawa ni da taura ena yalogalala na iloloma, ni dau basika na vakasama ni da sa dinau tiko vei koya e solia vei keda na iloloma. Sa dau yaco kina na vakasama cala, ni sala dodonu duadua ga ni ciqo iloloma sai koya me da solia lesu e dua na ka e levu cake na kena yaga. Eso era sega sara ga ni dau raica na bibi ni dua na iloloma—sa laurai tikoga na kena irairai e taudaku se na kena yaga ka sega ni via kilai na kena ibalebale titobu vua a solia mai ena yalodina.

Au nanuma lesu kina e dua na ka a yaco ena iotioti ni bogi ni nona bula na iVakabula. A vakasoqoni ira wavoki mai na Nona tisaipeli lomani, dovi madrai vata kei ira, ka solia vei ira na iotioti ni veidusimaki vakamareqeti. O ni nanuma tiko li ni sa toso tiko na kana, a tucake mai na teveli ko Jisu, sova na wai ena dua na beseni, ka tekivu me savata na yavadra na Nona tisaipeli?

Ni yaco yani ko Koya vei Saimoni Pita, a bese na gonedau, ka kaya, “Kemuni na sega sara ni vuya na yavaqu.” A vakadodonutaki koya vakamalua na iVakabula: “Kevaka kau sa sega ni vui iko, ko sa sega ni rawata e dua na ka vei au.”¹

Au kila ni a nanuma o Pita ni ka dokai na nona besetaka na iloloma oqo ka nanuma ni sa dodonu tiko na ka e cakava. Ia ena gauna oya a sega dina ni kila o koya na kena bibi vakayalo na ka e solia tiko vua o Jisu.

Ena gauna ni Siganisucu eda dau veitalanoataka vakalevu na soli-ka, ka da sa kila taucoko tiko ni sa “ka ni veivakalougatataki vakalevu na soli-ka, ka vakalailai ga me taura na ka,”²ia au dau vaqaqa voli de so na gauna eda dau sega ni kauwaitaka se da vosabeca sara mada ga na kena bibi me da dauciqociqo vinaka.

Ena dua na Siganisucu ena vuqa na yabaki sa oti, a ciqoma e dua na goneyalewa e dua na kato totoka ni iukuuku. A vakatura na tamai goneyalewa me cakava e dua na ka vua e dua na wekana e yaco mai ki na dua na soqo vakamatavuvale.

A waqa na matai goneyalewa ka tekivu me cakava e dua na ka e nanuma o koya ni na dua na iloloma uasivi. A digitaka na tamata e vinakata me na cakava vua—e dua na nei qase matacudrudru qai quraqura nona itovo.

“Kevaka beka au cakava e dua nona itaube,” e vakasamataka na goneyalewa lailai, “ ena vakamarautaki koya sara.”

Sa mani digitaka vakamatau sara na iukuuku ka solia nona vinaka duadua me cakava e dua na iloloma uasivi me baleti nona nei.

Ni sa caka oti, a gole yani vei nona nei, solia vua na itaube, ka tukuna vua ni a bulia ka cakava me baleti koya sara ga.

A vakadigagalu na loma ni rumu ni taura cake o nei ena nona idusidusi kei na idovidovi ni kakana na itaube me vaka beka ni taura toka e dua na banuve dravidravia. A raica cake na iloloma, sokidi na matana ka se na ucuna, ka vakalutuma tale na itaube e ligana na goneyalewa lailai. Qai vuki tani yani ka sega ni bau tukuna e dua na ka, ka tekivu talanoa tale vua e dua.

E damudamu na matana na goneyalewa lailai ena madua. Ena rarawa bibi, a lako yani vakamalua ki tuba.

Erau tovolea na nona itubutubu me rau vakayalovinakataki koya. Erau tovolea me rau vukei koya me kila ni rairai totoka na itaube—veitalia na nona itovo sega ni veinanumi ni vugona. Ia a rarawa tu ga na lomana na goneyalewa lailai ena veigauna kece e vakasamataka kina na veika oqo.

Sa sivi yani e vicasagavulu na yabaki, se dau nanuma voli ga na goneyalewa lailai oqori—sa vakavugoni tale—ena yalorarawa vakalailai, na siga oya a sega ni ciqomi kina na nona iloloma vagone.

Na iloloma kece e dau soli vei keda—vakauasivi na iloloma e dau soli mai vuniyalo—sa dua na madigi me vaqaqacotaki kina na ivau ni loloma. Ni da dauciqociqo vinaka ka dau vakavinavinaka, eda sa dolava e dua na katuba me vakatitobutaka na keda isema vei koya e solia na iloloma. Ia ni da sega ni vakaraitaka na noda vakavinavinaka se da sega sara mada ga ni ciqoma e dua na iloloma, eda sega walega ni vakamosia na yalodra o ira era soli ira mai vei keda, ia eda sa vakamavoataki keda talega ena veisala eso.

E vakavuvulitaka na iVakabula kevaka eda “sega ni yaco me vaka na gonelailai, [eda] na sega sara ni curu ki na matanitu vakalomalagi.”³

Ni da sarava na nodra nanamaki kei na nodra taleitaki na gonelalai ena gauna oqo ni yabaki, ena rawa beka ni da vakananumi keda me da vakila tale ka taura me noda e dua na ivakarau taleitaki ka lagilagi ni bula vagone—me da ciqociqo ena loloma kei na vakavinavinaka.

E sega ni vakurabuitaki, ni sa noda ivakaraitaki vinaka sara, sega walega ena soli-ka ni yalodina ia ena ciqociqo talega ni lomasoli na iVakabula. Ni tiko voli mai Pecani, ni sa voleka me cava na Nona veiqaravi vakalotu ena bula oqo, a gole yani vua e dua na marama ka kauta voli yani e dua na kisi waiwai kunei dredre ka isau levu. A vakatarai vua me lumuta na Uluna ena isolisoli talei oqo.

Eso era raica na veika oqo era a cudru. Era kaya ni “sa dua na vakalusi ilavo levu.” Sa rui sau levu na waiwai. E rawa ni volitaki ka soli yani vei ira na dravudravua na kena ilavo. Era raica walega na kena yaga vakayago na isolisoli ka ra calata vakadua na kena bibi cecere vakayalo.

Ia na iVakabula e kila na ivakatakarakara kei na ivakaraitaki ni loloma ena isolisoli o ya, ka ciqoma ena yalo lomasoli.

“Laivi koya ga,” sa kaya ko Koya vei ira sa vosakudrukudru. “Dou sa sāga ena vuku ni cava? … Sa kitaka ko koya na ka sa rawata: sa lako mai e liu ko koya me lumuta na yaloqu me bulu.”⁴

Kemuni na taciqu kei na ganequ, kemuni na noqu itokani lomani, eda dauciqociqo beka vakaca o keda? Eda vakataka beka na iVakabula, eda raica na isolisoli ni ivakaraitaki ni loloma?

Ena noda gauna oqo, sa kaya na iVakabula ni o ira era “… sa vakavinavinakataka na ka kecega sa soli vua, ena vakalougatataki …,”⁵ ia “ena soli me kena ikuri vua na veika kecega e vuravura.”⁶

Au nuitaka ena Siganisucu oqo kei na veisiga kecega ena loma ni yabaki eda na raica, vakabibi, na isolisoli e vuqa sa soli vei keda mai vua na Tamada Vakalomalagi dauloloma. Au nuitaka ni da na ciqoma na veisolisoli oqo ena yaloreki, na vakavinavinaka, kei na nanamaki me vaka e dua na gone.

E malumalumu ka raragi na yaloqu niu vakasamataka na veisolisoli sa solia vei keda na Tamada mai Lomalagi dauloloma ka lomasoli: na isolisoli sega ni tukuni rawa ni Yalo Tabu, na cakamana ni veivosoti, na ivakatakila yadua kei na veituberi, na nona vakacegu na iVakabula, na veivakadeitaki kei na yalovakacegu ni sa vakadrukai o mate—kei na vuqa, vuqa tale.

Ia e cecere duadua, sa solia vei keda na Kalou na isolisoli ni Luvena Le Duabau Ga, ka a solia na Nona bula “me kakua ni rusa ko ira yadua sa vakabauti Koya, ia me ra rawata ga na bula tawamudu.”⁷

Eda sa ciqoma li na isolisoli oqori ena yalo e vakavinavinaka kei na yalovakacegu? Se da dau sega ni ciqoma ena vuku ni qaciqacia kei na vakalevulevui koya se na vakasama lasu ni bula vakataki koya? Eda dau vakila beka ni vakaraitaki ena veika ni loloma oqori na Nona loloma na Tamada? Eda dau ciqoma beka ena dua na ivakarau ena vakatitobutaka na keda isema vei Koya e solia? Se da sa rui dau ogaoga beka vakalevu ka sega mada ga ni raica rawa kina na veika e solia tiko vei keda na Kalou e veisiga yadua?

Eda kila ni “ko koya sa solia ena marau sa vinakata na Kalou,”⁸ ia e sega beka ni dau taleitaka talega o Koya na dauciqociqo vinaka, dauvakavinavinaka, ka dau mamarau?

“A cava na kena yaga vua na tamata kevaka sa vakarautaki tu na isolisoli me nona, ka qai sega ni taura? Raica, sa sega ni vinakata na isolisoli sa soli vua, io sa sega talega ni vinakati koya sa solia.”⁹

Se da sotava oti mai e 9 se 90 na Siganisucu, eda se gonelalai kecega—eda luvena kece na Tamada Vakalomalagi.

O koya, me da na sotava kina na Siganisucu oqo ena yaloreki kei na qoroqoro me vaka e dua na gone. Me da kaya, “Sa vuabale na noqu marau ka sa reki vakalevu na yaloqu, ia au vakacaucautaka tikoga na noqu Kalou”¹⁰—o koya sa Solia na isolisoli vinaka kecega.

Vei kemuni, kei ira kecega era gadreva me ra muria na Karisito ivalavala malua, au laveta na domoqu ka vakacaucautaka na Kalou kaukauwa ena vuku ni isolisoli talei ni Luvena.

Ena gauna ni Siganisucu oqo kei na veigauna kecega, au masuta ni da na raica na isolisoli vakasakiti ni nona sucu mai na Luve ni Kalou ena matana veivakalougatataki ni dua na gonelailai. Au masuta me ikuri ni kena soli na isolisoli vinaka, eda na segata me da dauciqociqo vinaka ka dauvakavinavinaka. Ni da vakayacora vakakina, ena vakalevutaka na yaloda na yalo ni gauna oqo ka vakarabailevutaka na noda reki me sega ni yalani rawa. Ena yaca tabu i Jisu Karisito, emeni.