Presen we I Stret Evriwan

Presiden Henri B. Aering

Fas Kaonsela long Fas Presidensi

Long taem blong Krismes, yumi selebretem presen ia blong Papa long Heven we i stret evriwan we i Pikinini blong Hem we I Lavem, Jisas Kraes, Sevya blong wol. Blong plante long yumi, Krismes sisen i wan taem we yumi glad blong presen long ol narafala man we i rimaenem yumi long presen ia we i moa bigwan long evri presen.Yu mo mi i bin lanem tru eksperiens olsem wanem samting ia i wan jalenj.

Long 1970, mi bin papa blong tri yang boe. Olsem plante paren we i nogat eksperiens yet, mi bin wokhad blong save sapotem wan famle we i stap gro. Tu dei afta Krismes mi bin save se mi nidim blong tekem wan longfala bisnis trip, lego waef blong mi Katlin blong stap wetem ol boe long taem blong spel blong olgeta long skul. Wetem save ia se hapines blong olgeta ating bae i dipen gud long ol gudfala Krismes presen blong pleple, mifala i bin jusum gud ol presen. Long bigfala boe blong mitufala we i gat seven yia, mitufala i givim wan baromita, wan masin blong save trakem weta.

Mifala i bin faenem se i gat sam pat we i rili nidim. Mi mo boe blong mi i bin sidaon blong putum tugeta niu mo naes baromita ia. Mitufala i putumdaon plante pis pat blong masin ia mo stadi gud long infomesen buk blong masin ia.

Afta sam aoa, i bin kam klia long mi se iven sipos mitufala i putum stret evri pis blong masin ia, wan samting i rong yet wetem masin ia blong mekem wota insaed long masin ia i ron i go antap mo daon. Mi traem blong haedem long boe blong mi tu tingting we mi gat, be long let naet, afta we hem i go long bed, mi bin harem nogud mo mi yusum jenol blong mi blong raetem wan komplen leta i go long kampani we i mekem masin ia. Hemia pat blong leta ia, we mi glad se mi neva sendem:

“Boe blong mitufala i bin glad long masin ia. Hem i gat seven yia mo gat fet se wan samting we i naes olsem, i mas wok. Mi hop se weta bae i no jenis bifo mifala i kasem ansa blong yu, from mi no wantem blong go antap mo trikim hem sipos mi mekem wetem han nomo, mo mi no wantem hem blong lusum fet long baromita blong yufala. … Plis talem long mi olsem wanem blong mekem i wok. Bae i no tras blong yu nao we bae i lus long ples ia, be mi nao bae mi safa, sipos nomo yu help.”

I no bin gat man i helpem mi long taem ia blong mekem Krismes presen ia i wok. Be boe blong mitufala, naoia we hem i wan papa, i tingbaot lav ia we mitufala i bin serem taem mitufala i help tugeta. Mo hem i stil filim fet we mitufala i bin gat blong trastem olsem wanem God i krietem graon mo skae blong mekem se yumi save talem situesen blong weta. Fet ia i no bin lus tru ware mo traehad blong mitufala blong mekem baromita ia i wok.

Mifala i bin lanem aot long hemia, wanem yu save tru long eksperiens blong yu. Sakses blong mekem ol naraman i glad, long Krismes oltaem i nidim help long ol naraman. Yu no save faenem tumas taem we yu traehad yuwan. Be taem yu joen wetem ol nara pipol tugeta i mekem glad ia i stap oltaem. Mo ating wanem we i moa impoten, i blong gat fet long Sevya we i krieta mo i sos blong ol glad we i no gat en, blong invaetem lav blong God we i klin gud, we hem i moa bigwan long evri presen mo tru sos blong glad we i stap oltaem.

Samting ia i bin kam tru long ol hat blong mifala long wan Krismes sisen yia afta we mifala i wok long baromita ia.

Mi disaed blong disaenem mo bildim wan spesel bokis long wud blong waef blong mi. Mi nidim ol gudfala help blong plante nara man we oli gat ol tul mo skil we mi mi nogat. Mi bin wok wetem olgeta blong sam wik. Mi nidim tu help blong Tabu Spirit blong faenem ol wei blong soem lav mo fet long gospel long presen ia.

Long led blong bokis mi kavem famle monogram blong mifala. Long fored, mi putum tu panel. Long wan panel mi kavem fas leta blong nem blong mi, mo hemia blong waef long narawan. Bokis ia i save openem nomo wetem tu defren ki, wan blong openem lok tru fas leta blong nem blong mi, mo narawan tru hemia blong waef blong mi.

Naoia mifala i yusum presen ia olsem wan spesel bokis blong famle. Mekem se long Krismes taem i stap andanit long tri, mo afta evri nara dei, blong luk bokis ia nomo i bin fulumap ol maen mo hat blong mifala wetem lav blong mifala wanwan mo from sakrifaes blong Sevya we i mekem mared mo ol famle we i no save finis i save hapen. Bokis ia, naoia i fulap wetem ol pikja blong famle mo pepa blong Krismes miusik, we i stap kolosap long piano long living rum. Blong mekem presen ia i bin givim wan filing blong lav blong famle mo Masta.

Wan wan taem, mi save luk yet mo talem tangkyu long pipol we i bin helpem mi mekem bokis ia. Taem mi luk olgeta bakegen, mi save filim glad we mifala i bin serem taem mifala i stap mekem wan presen blong lav blong wan famle mo wan simbol blong lav we mifala i serem blong Sevya. Mi luk glad long ol smael blong ol fren blong mi, taem mifala i bin wok tugeta blong mekem bokis ia.

Yu save tru long eksperiens blong yu long Krismes sisen se kaen glad ia i save kam nomo taem yu mekem mo givim iven wan simpol presen blong lav. Eksampol, plante long yumi i bin helpem wan pikinini blong mekem ol plet blong kuki i go long olgeta we oli filim se oli stap olgetawan nomo long Krismes. Long man we i kasem spesel presen ia long wan pikinini, i save kam wan spesel oel. Mo wan pikinini we i karem wan presen olsem i kam i rimaenem olgeta long ol Waes Man we i karem ol presen long Is i go long Sevya. Tugeta man we i givim mo hemia we i kasem i save tingbaot Kraes mo filim lav mo glad.

Ol yang man mo woman long Jos, tugeta wetem ol lida blong olgeta, i save givim ol presen blong lav mo testemoni long ples blong baptaes long ol tempol blong yumi. Blong gat moa tempol kolosap long ol yang pipol, i mekem eksperiens ia blong givim i kam moa mo moa isi long olgeta, mo plante moa taem. Ol waes bisop mo lida blong ol yut i help wetem strong tingting; sam long olgeta i iven joen wetem ol yut blong mekem tempol seves. Evriwan, oli serem blong givim blesing blong klinim mo mekem i klin gud we Sevya i bin mekem i stap, long olgeta we oli no save kasem presen ia taem we oli bin stap laef.

Wan namba blong ol misinari i go antap blong tekpat wetem Sevya mo ol kompanion blong olgeta blong givim ol presen blong laef we i no save finis. Wetem jenis blong ol yia blong save go mekem misinari wok, plante moa bae i filim glad blong givim presen ia we i nogat praes. Ol misinari tu i givim Buk blong Momon long evriwan we oli mitim. Hem i wan presen blong lav mo wan presen blong testemoni, we oli mekem tru inspiresen blong God i go long ol fetful profet blong hem blong ova handred yia. Sevya i nidim help blong ol profet blong mekem ol presen blong testemoni long Buk blong Momon, mo Hem i nidim help blong ol misinari blong serem.

Ol famle tu oli givim ol presen blong lav mo testemoni we i nogat praes long Krismes taem tru miusik mo ol toktok tu. Olsem wan yang boe, bae mi kam tugeta wetem famle blong mi raon long piano we tedei hem i moa long handred yia. Piano ia i stap long living rum blong mifala kolosap long spesel bokis ia. Piano ia i stap yet wan spesel memori blong famle from hem i spesel long mama blong mi olsem wan presen i kam long hasban blong hem taem tufala i bin pua. Ol paren blong mi i bin save pua laef mo traem blong lukaot gud ol samting. Ol Krismes presen we mifala i kasem i olsem blong tedei. Be mama blong mi i bin gat wan gudfala soprano vois. Hem i bin plei piano blong hem long Krismes taem hem i lidim mifala long singsing ol karol we mifala i save gud mo ol tabu hym.

Mi no save sipos hem i bin gat tingting ia, taem hem i stap invatem mifala blong serem wan presen we i save stap longtaem. Be tu olsem wan yang boe, mi no save talem glad ia taem mi singsing ol singsing ia. Miusik i bin fulumap smol hom blong mifala wetem wan spirit blong pis. Mi save filim, i no lav blong mama mo papa mo tufala brata blong mi nomo, be blong papa blong mi long Heven mo Sevya Jisas Kraes.

Mi filim se lav we mi bin filim long taem ia i bin wan samting we mi eksperiensem bifo laef ia long spirit wol. Mi bin wantem tumas blong filim bakegen sam dei long wan hom blong miwan. Mo mi wantem blong stap laef blong save gobak wetem wan famle blong miwan long hom blong mifala long heven, we mi save se Papa long Heven mo Sevya bae i wet. Nao taem mi luk spesel bokis ia mo piano, ol memori blong lav wetem famle blong mi, mo lav we i kam long Sevya i fulap long mi.

Taem yumi singsing long ol kwaea, ol famle, mo ol klas, mo taem yumi lisin tugeta tunaet, ol karol blong Krismes i rimaenem yumi long ol singaot blong glad taem yumi lanem se bae yumi kam long wol ia mo gat wan Sevya blong pemaot yumi. Samdei bae yumi singsing ol singsing ia wetem olgeta blong heven.

Hem i prea blong mi se Spirit bae i blesem yumi, long Krismes ia mo ol yia we i kam, wetem paoa blong givim ol nara presen blong lav mo testemoni blong Jisas Kraes mo gospel blong Hem we i kambak. Mi save se Spirit i save lidim wanwan long yumi long plante mo simpol wei blong givim lav, fet, mo glad long ol narafala man long sisen ia blong stap glad.

Mi testifae se Jisas Kraes i tru Pikinini blong God mo Sevya blong wol. Hem i presen ia we i stret evriwan we i kam long Papa we i gat lav. Long hemia mo evri sisen, Sevya blong yumi i invaetem yumi blong joen wetem Hem mo ol narawan blong givim presen blong glad we i nogat praes. Mi prea se bae yumi mekem, long nem blong Jisas Kraes, amen.